📰 Vawiin hi Khawvel Sunday School ni a ni a, hriattheih chinah Presbyterian Kohhran ten 'Bible Pathian thu nung' tih thupui an zir ho ang. Baptist kohhran te chuan thupui thlan sa 'Pathian thu kan kawng entu (Sam 119:105)' tih an zir ho ang.
Khawvel Sunday School Ni hi Dr. Bailey-a, Tabernacle Presbyterian Church, Philadelphia (USA)-a Kohhran Upa rawt chhuah a ni a. Kum 1907-a World Sunday School Association Convention, Rome-a neih tumah leh kum 1910-a Washington-a Convention neih tuma an sawihona bawhzuiin kum 1910 atang khan neih tan a ni. India ramah chuan kum 1876 khan India Sunday School Union din tan a ni. Mizoramah chuan kum 1944 atangin Khawvel Sunday School Ni hi hman tan a ni a; hemi pual hian thawhlawm pawh thawh tura rel a ni. Kum 1945 atang khân November Pathianni hmasa ber hi Khawvel Sunday School Ni atan hman a ni ta zel a ni.
📰 Tukin zing dar 10:30 hian BCM Biak In, Bazar, Hnahthial-ah Missionary Tirhchhuah Inkhawm neih a ni dawn a. Tun tumah hian Cambodia-a kal tur, Mahni-a inchawm Missionary (Tent making Missionary) atana lak te - J. Vanlalpekzuala, BCM Bazar, Hnahthial leh H. Lalrinmawii, BCM Electric, Hnahthial te tirhchhuah an ni ang. Rev. Lalremsiama Ralte, Mission Director-in tirchhuakin, Rev. Dr. R. Lalthanmawia, AGS Mission in thuchah a sawi ang.
📰 Nov. 1, 2024 chawhma dar 10:00 khan Synod Literature & Publication Board (SL&PB) Meeting vawi 30-na chu J.M Lloyd Hall, Synod Office-ah an thu. Presbytery atanga thu lut te, SL&PB Board-a Department aiawh tur ruat chungchang te, Mizo tawng hman dik, hman uar, humhalh, vawn him leh ziah dan dik chungchanga hma lak dan tur te leh 2025-2026 budget te chu an thu ngaihtuah langsar zual te an ni.
📰 Pentecostal Youth Department (PYD) ten inkhawmpui vawi 46-na Ningani zan atang khan Hnahthial-ah an nei mek. Zaninah an tiak ang. Inkhawmpui thupui hi 'Thlarau Thianghlim nei rawh u' tih a ni. Mizoram leh ram pawn aá¹ang palai thahnem tak an kal.
📰 BCM Mission Board Committee Meeting 31st October, 2024 a thukhawm chuan missionary tur mi 15 an la thar.
📰 Nov. 1, 2024 khan Kulikawn Presbyterian Kohhran Hall-ah Synod Prison Ministry buatsaihin 'Jail tâng chhuak Follow-Up programme vawi 4-na' hman a ni.
📰 November 1-3, 2024 chhung hian Umswai Model Presbyterian Church, Karbi Anglong-ah PYF Youth Camp 2024 hmangin CKṬP Committee member, Synod Choir leh Bial aiawh mi 130 an kal.
📰Mizoram UPC Bible Zirna hmun ATI Graduation Day chu October ni 31 Ningani khan hman a ni. Graduation Day inkhawm hi ATI Chapel-ah neih niin Rev. Ngurthanpara Sailo Principal chuan a kaihruai a, Graduate-te Certificate hlanna leh tawngtai sakna General Superintendent Rev. P. Lalrinawma’n neiin fuihna thu a sawi bawk a ni. ATI Graduation Day-ah hian Executive Chairman Upa Lalzirliana, ATI Board Chairman Upa J. Lalramliana, Rev. Jeremy Lee Lang, ALJC leh SU President James Lallawmsanga ten thu an sawi bawk a, unaunu C. Lalruatsangi Dinthar hnen atangin fakna hla mawi tak ngaihthlak a ni. Kumin hian ATI Graduate mi 10 awmin, Lalnunhlima, Zemabawk Dinthar chu Topper a ni.
📰 October 25 – 1 November 1, 2024 chhung khan AICS, Aizawl-ah Baptist pastor 7 pualin Pastor's Refresher Course neih a ni. November 2-8 chhung Kolkata lamah training an neih chhunzawm leh ang.
📰 October 24&25, 2024 zan khan Saron Veng Kohhhranah Praise On 2024 Second round (Top 30) intihsiakna neih a ni a, Top 30-ah hian Sound track hman a ni. Zan khatnaah mi 16 intihsiakin zan hnihnaah mi 14 an intihsiak a. Intihsiakte hian Pathian hla an duh ber an sa a. Top 30 atang hian Top 10 thlan chhuah an ni a, Top 10 intihsiakna hi November 7-8, 2024 chhungin Dawrpui Kohhran Hall-ah neih a ni ang. Top 10 atang hi chuan live music-a zai rem a ni tawh dawn a ni. Top 10 leh Top 5 intihsiakna hi Dawrpui Kohhranah neih a ni ang.
Top 10 thlan chhuahte chu :
1. C. Lalthanmawii Lungmual West Branch
2. Ramdingliani Bethlehem Branch
3. Sailokima Kulikawn Branch
4. J. Lalruatsangi Sihphir Branch
5. P. Vanlalhriatpuia Chaltlang South Branch
6. Samuel Lalmuanchhana Armed Veng Branch
7. Saizampuii Tuikual North Branch
8. Lalthlanawma Ramhlun Branch
9. Maria Lalmuanpuii Chhiahtlang Bazar Branch
10. Zaithanmawii Kolasib Vengthar Branch
📰 Mizoram UPC Tanpuitu Hmeichhe Pawl, Inkhawmpui lian vawi 28-na chu October ni 25 atanga ni 27 Pathianni hmang khan Lersia Field, Ruantlang-ah tluang taka neih zawh a ni a, inkhawmpui ro relna chuan Buhfaitham cheng 15/- a hralh thin chu cheng 20/- ah a man a ti sang.
📰 November 5-9, 2024 chhung hian Synod Revival Camping Center, Neihbawiah a duh apiang tan Camping buatsaih a ni dawn a. Speaker tur chu Upa H. Lalhlimpuia, Prayer Foundation Team a ni ang. Camping Fee mi pakhat tan ₹ 100/- a ni a, Mutbu bakah Bible, Hlabu, Pen, Note Bu ken tur a ni. Ruihtheih thil ken luh phal a ni lo a. Mobile Phone pawh ken luh phal a ni lo. Thawhlehniah lutin Inrinniah chhuah leh tur a ni ang. Camp neihna hmun Neihbawiah chhun dar 12 - tlai dar 4 inkarah Registration tih fel vek tur a ni a, rokhawlhna lian tak nei an nih loh chuan tlai dar 4 hnu lamah in Register theih a ni lo ang. Ei leh in chu Synod-in a tum vek dawn a ni.
📰 Lamtluang Online News chhiartute in zavaiin tukchhuah nuam vek ule. Pathianni hun tha taka in hman theih nan duhsakna kan hlan a che u.
No comments:
Post a Comment