Friday, 6 February 2015

3rd - 5th February 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
 5.2.2015
*CENTRAL UNIVERSITY THABER LAWMMAN PRESIDENT IN HLAN
Nimin khan India President Pranab Mukherjee chuan India rama central university thaber lawmman "Visitor's Award for the Best University 2015" chu University of Hyderabad (UoH) hnenah a hlan. He lawmman hi UoH aiawh in Pro Vice Chancellor Prof. E.Haribabu an a dawng a ni. University of Hyderabad hi kum 1974 October thla a Parliament in central university atan a an din niin National Assessment and Accreditation Council (NAAC) rating ah a sangber 4 a chhut in 3.72 an hmu a ni.

Nimin vek khan President hian University of Delhi a zirtirtu 2 - Prof. Vijay K Chaudhary leh Dr. Amita Gupta te hnenah "Visitor's award for innovation" a hlan a, tin, "Visitor's award for research" chu Jamia Milia Islamia University a Astrophysics and Cosmology lama researcher Prof. M Sami, Prof. Sushant G Ghosh, Prof. Sanjay Jhingan leh Prof. Anjan Ananda Sen te hnenah a hlan bawk a ni.

Pix: UoH Pro VC in Best University Award a dawng lai.
Prof. E.Haribabu received Vistor's Best University Award 2015 from the President of India Mr.Prannab Mukherjee
 
*JORDAN IN ISLAMIC STATE TE THLAWHNA IN BEI TA
Jordan sorkar chuan a lo intiam tawh angin an ram fighter pilot Maaz al-Kassasbeh thattu Islamic State firfiak te laka phuba lak nan vawiin khan IS te hi indo thlawhtheihna hmangin an bei. Jordanian King Abdullah II chuan "Maaz al-Kassasbeh martyr na thisen luang hi a thlawn lo ang a, Jordan sorkar leh a sipai te chuan kan fapa duhtak nunna channa hi a phu tawkin a chhanglet dawn a ni" a ti a ni.
 
*ALL INDIA RADIO-A MW, SW LEH FM ZOAWI PROGRAMME NGAIHTHLAK THEIH HUN
All India Radio, Aizawl in Medium Wave leh Short wave hmanga programme a puanchhuah te chu tun Pathianni lo thleng tur 8.2.2015 zing dar 5:55 to 9:30 inkarah F.M. Zoawi 100.7 MHz ah pawh ngaihthlak theih a ni tawh dawn a. Tun thla ni 8 atangin zinglam a programme tha tak tak an puanchhuahte FM Zoawi 100.7 atangin fiahfai zawkin ngaihthlak theih a ni tawh bawk ang. Ngaithla tuten MW leh SW bakah FM Zoawi atanga heng programme te hi lo ngaithla zel turin an ngen a ni. (DIPR)
 
*GOOD MORNING MIZORAM: LAMTLUANG ZINGKAR CHANCHINTHAR TAWI LAWRKHAWM
*Kerala a National Games vawi 35-na khelh mek ah Mizoram team chuan football ah Punjab 2-0 in an hneh. Khelh khatna ah West Bengal 2-0 in an lo hnehtawh bawk a ni. Mizoram team te hian Semi final an lut ta a ni.

*Delhi Assembly inthlan neih tur chu vawiin hi campaign hun tawp a ni a, he inthlan ah hian AAP leh BJP te chu an inbei ber a, congress leh party dang ten thawm an nei lutuk lo.

*Jordan sorkar chuan Islamic State firfiak ten an ram mi fighter Pilot hnathawk lai Moaz Al-Kassasbeh chu an hal hlum avang a phuba laknan Al-Qaeda mi an ram tan in a tang mek 2 Sajida al-Rishawi leh Ziad al-Karbouly te an khaihlum ve.

*Nikum December ni 28 a tlawhtheihna chesual AirAsia QZ8501 a boral te zing a mi 6 ruang te chu nimin khan lakchhuah belh anni. Ti hian he thlawhtheihna chesual atang hian ruang 90 lakchhuah a ni tawh a ni.

*Gujarat ah swine flu natna avanga thi mi 3 an awm belh. Gujarat ah hian Swine flu avanga thi mi 45 an awm tawh a ni. Tin, Punjab ah pawh swine flu avang hian mi 3 an boral tawh a ni. Delhi ah chuan swine flu vanga damlo mi 77 hmuchhuah belh a ni bawk.

*National Games vawi 35-na Kerala a neih mek ah Haryana chuan gold medal 21 leh silver medal 8 la tawhin hma an la hruai mek. 2-na Services in gold medal 21 leh silver medal 5 an la tawh a, 3-na Maharashtra chuan Gold medal 11 la tawhin silver mdeal 18 an la tawh bawk a ni. A thlengtu Kerala chu 4-na anni mek bawk.

*Jharkhand chuan Sports University rei lo te ah din an tum ta.

*Democratic Republic of Congo ramah misual ten mi 21 an muthilh laiin an that.

*Egypt ram court chuan kum 2011 a sorkar paihthlak tum a mipui punkhawm huaihawt a tel mi 230 te chu damchhung lungin tang turin a hrem.
 
*BJP DOCUMENT IN NORTH EAST MITE RAMDANGMI TIIN ZIAK
Delhi Assembly inthlan neih tur a campaign neih mek ah BJP in vision document ah India hmarchhak mi Delhi a awm te venhimna tha zawk pek anni ang tih a saptawng a ramdang atanga danlo a pemlutte "North Eastern immigrants" tih an hman avangin India hmarchhak mi te thin a rim a hle. He thumal an ziah avang hian Congress party chuan rang taka chhanglet in BJP hian North East mite ramdangmi anga an ziak hi thupha an chawi tur a ni an ti. He thu hi BJP chuan an chhut sual ti a sawifiah in "immigrants" tih nilo in "migrants" tih zawk tur niin an sawi ve thung a, an tihsual ah North East mipuite hriatthiamna an dil bawk a ni. BJP te thu ziah sual avang hian nimin khan Assam ah chuan dodalna nasa takin a chhuak nghal a, Congress party leh Krishak Mukti Sangram Parishad (KMSS) te phei chuan sorkar office leh BJP office kawt ah te mipui punkhawm an huaihawt a ni.
 
*UNION HOME SECRETARY BANG
India ram sorkar laipui hnathawk te zing a hnasang ber pawl a ngaih Home Secretary tanglai Anil Goswami chu nimin khan a bang. Anil Goswami hi 1977 batch IAS niin Jammu & Kashmir cadre a ni a, Union Minister hlui Matang Singh man lo tur in CBI hotute a biak vanga bang ta ni a sawi a ni. Union Home minister Rajnath Singh an a nimin khan insawifiah tur a a koh hnu in Prime Minister office in bang turin a hrilh ta a ni. Bang lo se chuan kumin June thla thleng hnathawhna hun a la nei a ni. Appointments Committee of the Cabinet thuchhuak angin Anil Goswami hmunruak ah hian Rural Development Secretary tanglai L.C. Goyal chu ruatthar a ni.
 
4.2.2015
*NLUP TANPUINA
Vawiin khan AH & Vety Department hnuaia NLUP-a Ar vulh thlangtu mi 190 te hnenah 2nd Phase 3rd Installment atan Arnote 50 leh a chaw man tur Rs 8000/- theuh sem a ni.

Dampa Constituency khaw 23 leh Mamit Constituency khaw 4 atang hian NLUP 2nd phase ah hian ar vulh thlangtu mi 355 an awm. (DIPR)
 
*AIR LIVE PHONE-IN
Tun Inrinni lo awm tur, February ni 7, 2015 chawhnu dar 1:05 - 2:00 inkar, AIR Aizawl a Telephone a zawhna leh chhanna Live Phone-in programme ah chuan ‘Thisen man lak’ chungchang a hriat duh neite tan a zawh theih dawn a. Mipui zawhna chu Dr. Sangzuala, Dy. Director, Mizoram State AIDS Control Society leh Lalhmingliani Pachuau, Quality Manager, MSACS ten an rawn chhang ang a. A zawt duh tan Telephone No. 0389-2323148 ah a biak pawh theih ang. (DIPR)
 
*TAIWAN THLAWHNA TLA AH MI 12 THI
Taiwan ram khawpui Taipei ah TransAsia Airways thlawhtheihna tla ah mi 12 an boral. He thlawhtheihna ah hian mi 58 an chuang a, Keelung lui a leilawn an zuk su a, lui ah an tla darh ta a ni.
 
*ISLAMIC STATE TEN JORDAN PILOT HALHLUM
Nimin khan Islamic State firfiak pawl ten video thar tichhuak leh in an video ah hian an mi tang kawl mek Jordan mi Pilot hnathawk Muath al-Kasaesbeh chu an hal hlum lai a lang a ni. He video hi a tak a ni.ngei em tih finfiahna awm lo mahse Jordan ram sorkar erawh chuan he thil thleng avang hian na taka Islamic State firfiak te laka phuba lak let an tum thu an sawi a ni.
 
3.2.2015
*HARPER LEE IN NOVEL THAR TLANGZARH DAWN
America a novelist lar leh 'To Kill a Mockingbird' tih thawnthu ziaktu pitar Harper Lee (88) chuan kumin July thla hian a thawnthu ziah 2-na 'Go Set a Watchman' tih chu a tlangzarh dawn. Harper Lee hian kum 1960 khan a thawnthu ziah 'To Kill a Mockingbird' avangin Pulitzer Prize a lo dawng tawh a ni.
 
*BRAZIL MISS THLAN LAIIN THIL MAK THLENG
Kar hmasa Zirtawpni khan kumtin a Brazil ram a miss thlan an neih thin Miss Amazon 2015 ah Miss atana thlan Carolina Toledo (20) in lallukhum (crown) a khum lai chu 2-na (runner-up) atana thlan Sheislane Hayalla chuan phih thlak sakin stage chhuat ah a paih sak a ni. Dangdai taka che Sheislane Hayalla hian "Miss atana thlan tlin hian pawisa chungchang ah inhnamhnawihna a nei a, chuvangin Miss nih hi a phulo" tiin a thiltih hi a insawihfiah a ni. Miss lallukhum a paisak lai a a bul a ding te pawh an hawihai hle a ni.
 
*35th NATIONAL GAMES AH HARYANA IN HMAHRUAI MEK
Kerala a National Games vawi 35-na neih mek ah Haryana chuan Gold medal 11 la tawhin hma an hruai mek a, Services in Gold medal 9 la tawh in pahnihna anni mek a, Maharashtra in Gold medal 7 la tawhin pathumna anni a, a thlengtu Kerala chuan Gold medal 6 la tawhin palina anni mek a ni.

*BIHAR AH SC/ST LEH HMEICHHIA TE ATHLAWNIN ZIRNA PE DAWN
Bihar state cabinet thukhawm chuan an state chhung a sorkar college leh university ah te hnamhnufual Scheduled Castes (SC) leh Scheduled Tribes (ST) bakah hmeichhia te chu a thlawnin zirna pek an remti. Heng zirlai te atang hian sorkar in admission fee a la dawn lo a, College leh Post Graduation level thlengin a thlawn in zirna an pe tawh dawn a ni. SC/ST leh hmeichhiate te admission fee lak a nih loh avanga college leh university in sum an hloh te chu sorkarin a rulh sak thin dawn a, hemi atana sum senso tur hi kumtin Rs. Vaibelchhe 29 ruahman a ni bawk.
 
*PETROL LEH DIESEL MAN TLAWM DAWN
Zanin zanlai atangin India ram pumah Petrol leh Diesel man tih hniam a ni dawn. Petrol hi 1 Litre zelah Rs 2.42 in a tlawm ang a, Diesel hi 1 Litre zelah Rs 2.25 in a tlawm ang. Tuialhthei man tih tlawm nachhan hi international crude oil man a tlawm vang a ni.
 
*HRIATTIRNA
Aizawl District Magistrate chuan hetiang hian hriattirna a chhuah :
Sakawrtuichhun - PTC Lungverh kawngpui chu siam that a nih dawn avangin 3rd February, 2015 atangin dar 10:00 am - dar 5:00 pm chhung khar ziah a ni dawn.

Hei hian kawngpui siamna atana hman lirthei erawh a huam lo ang. (DIPR)
 
*JNNURM CHU VAJPAYEE HMING CHAWIIN THLAK A NI DAWN
India ram khawpui 500 te tihhmasawnna tur a sorkar laipuiin hmalakna a duan Jawaharlal Nehru National Urban Renewal Mission (JnNURM) tih thin chu Prime Minister Atal Vajpayee hming chawiin Atal Mission for Rejuvenation and Urban Transformation (AMRUT) tih a ni tawh dawn a ni. He programme hi sorkar laipui tanpuina in khawpui 500 ah kum 10 chhung kalpui tur a tih a ni a, sum senso atan Rs. Nuaih Vaibelchhe 2 ruahman a ni bawk.
 
*OPINION POLL AH AAP SANG BER
Tunlai a India ram political news a hmun luah tam ber pawl Delhi Assembly inthlan neih turah ABP News-Nielsen in mipui ngaihdan (Opinion poll) an lakkhawm ah Aam Aadmi Party (AAP) in vote an hmusang ber. Mipui ngaihdan lakkhawm ah hian AAP te hian seat 35 an la a, BJP in seat 29, Congress in seat 6 an lak rin a ni.

Chief Minister thar atana an mi duh lakkhawm ah pawh AAP hotupa Arvind Kehriwal chu mi 48% in an duh a, BJP candidate Kiran Bedi chu mi 42% in an duh thung a ni.

#delhielection #delhi

No comments:

Post a Comment