Thursday 9 April 2015

9th April 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
9.4.2015

*TOURIST LODGE 2 PRIVATIZE A NI
Tourism Department hnuaia hmalakna pakhat, Privatization of Tourist Lodge kalpuina zelah, nimin (8.4.2015) khan Pi Manisha Saxena, Commissioner & Secretary, Tourism Department hovin Tourist Lodge 2, Buhchang leh Paithar a Tourist Lodge changtute nen Memorandum of Understanding (MoU) sign fel a ni a. Heng Tourist Lodge te hi mimal kutah kum 10 chhung atan Department chuan man chawiin a hawhtir a, a tul dan anga a hun chhung hi pawhsei theih niin a hman dan tur dik tak mikhual thlenna leh hahchawlh nana hman zui a ni ang.

Tourism Department hnuaiah hian Dis-investment Committee din a ni a, anni hmalakna in a vawikhatna atan Mizoram hmun hrang hranga Tourist Lodge te chu mimal kut a hlan turin nikum lamah khan Tender tih chhuah a lo ni tawh. Tourist Lodge engemaw zatin chhangtu a neih laiin, Tourist Lodge thenkhat chu chhangtu an awm lova. Chhangtu nei Tourist Lodge te ah Department chuan Offer Letter a pekchhuah hnuah in withdraw leh engemaw zat an awm bawk a ni. Chutih rualin Department chuan Tourist Lodge 2 MoU a sign pui bak chhangtu nei Tourist Lodge dang chu fimkhurna avangin ennawn leh turin a dah rih a ni.

Tourist Lodge privatize a nihna chhan ber chu hnathawktu indaih loh na vang a nih mai piah lamah heti lam kawnga tui mite tana eizawnna siamsak hi Department chuan a tum ber a ni a. Hun lo kal zel turah Tourist Lodge tam zawk hi mimal kuta hlan turin Tourism Department chuan hmalak zel a tum a ni. (DIPR)

*PU PRANAB MUKHERJEE, PRESIDENT OF INDIA IN MIZORAM RAWN TLAWH (PRANAB MUKHERJEE, PRESIDENT OF INDIA VISIT MIZORAM)
Vawiin chawhnu ah khan Pu Pranab Mukherjee, President Of India chuan a zinvahna tur bika siam Indian Air Force (IAF) thlawhtheihna in Lengpui Airport ah a rawn tum a. President hi Lengpui Airport ah Governor Pu Keshari Nath Tripathi, Chief Minister Pu Lal Thanhawla, Chief Secretary Pu Lalmalsawma, DGP Pu Dharmendra Kumar, Brig T.C. Malhotra, Commander, 23 Sector, Assam Rifles leh Official pawimawh ten an lo hmuak a. Lengpui atang hian Indian Air Force Helicopter in Thuampui pan nghalin hetah hian Home Minister Pu R.Lalzirliana, Finance Minister Pu Lalsawta, GAD Secretary Pu Lalrinliana Fanai, Aizawl DC Franklin Laltinkhuma leh official dangte’n an lo hmuak a ni.

President hi mi pawimawh tak tak 35 in an rawn zui a. Heng zingah hian Pu Venu Rajamony, Press Secretary to the President, Maj. General Anil Khosla, SM, VSM, Military Secretary to the President, Pu Pradeep Gupta, Private Secretary to the President leh mi pawimawh tak tak te leh chanchinbumi te an tel a ni. Armed Forces ten zahna chibai an lo buk a chhan let hnu in IAF Helicopter ah chuang in Thuampui Helipad a pan a ni. A cham chhung hian Governor, Chief Minister, Council of Ministers leh NGO hrang hrang hruaitute a kawm dawn bak ah Mizoram University Convocation a hmanpui dawn a ni.

Kum 79 a upa, President Pu Pranab Mukherjee hi December 11, 1935 khan Birbhum District, West Bengal chhunga thingtlang khaw te takte, Mirati an tih ah India zalenna sualtute zinga mi Pu Kamada Kinkar Mukherjee leh Pi Rajalakshmi te nupa karah a lo piang a. Thiamna lamah Law Graduate a nih piah lamah Political Science leh History ah te Master’s Degree neikawp niin College zirtirtu hna te thawk tawh in Journalist pawh rei tak a lo ni tawh a ni. Politics a luhchilh hnu in nihna pawimawh tak tak a chelh tawh bakah India ram hmasawnna nghawng thei dan leh ruahmanna ropui tak tak siamchhuah na ah sulsutu ropui ber pakhat a ni a.

July 25, 2012 ah khan President Of India 13-na niin a Pisa a luah tan a. Hemi hma hian Member of Parliament, Rajya Sabha ah term 5 leh Member of Parliament, Lok Sabha ah term 2 thlan tlin a lo ni tawh a ni. Union Cabinet Minister vawi tam tak a nih chhungin Foreign, Defence, Commerce leh Finance Ministries te hneh takin a lo enkawl tawh a ni. A remhriatna te, a thusawi thiam vangte leh a hnathawh that vangin chawimawina sang Padma Vibhusan, the Best Parliamentarian Award, Best Administrator in India Award, ‘Finance Minister of the year’ for Asia bakah India leh khawvel pumhuap a chawimawina ropui tak tak a lo dawng tawh a ni.

Kum 2004 leh 2012 inkar khan Administrative Reforms, Right to Information, Right to Employment, Food Security, Energy Security, Information Technology and Telecommunication, UIDAI leh Metro Rail te a lo puitlin theih nan a kaihruaitu pawimawh ber tia chhal theih niin khatih hunlai a Union Cabinet Minister zinga zah kai ber pawl President Pu Pranab Mukherjee hian nasa takin hna alo thawk tawh a. Kum 1970 chho ah leh kum 1980 chho ah te khan President Pu Pranab Mukherjee hian nihna pawimawh tak tak chelhin Regional Rural Banks (1975), the EXIM Bank of India leh National Bank for Agriculture and Rural Development (1981-82) te din a nih theihnan nasa takin hna a lo thawk tawh a. Centre leh State hrang hrang te sum leh pai bakah hlawkna chi hrang hrang awm thei te insem dan tur chu kum 1991 khan Economist Dr. D. R. Gadgil leh a thawhpui te nen an lo ruahman tawh a; chu ruahmanna “Gadgil – Mukherjee formula” ta mi tam zawkin an hmelhriat hi a ni. (DIPR)
President of India Mr.Pranab Mukherjee visit Mizoram
Pix: DIPR, Mizoram

President of India Mr.Pranab Mukherjee inspecting Guard of Honour at Lengpui Airport, Aizawl on his two days visit to Mizoram
Pix: DIPR, Mizoram


*Mizoram a harhna thlenna khua #Kelkang tlawhtu ten tih takzet in tawngtaina an nei lai. Kelkang a harhna chhim turin Mizoram leh state pawn lam atang te in mikhual ten an pan ruih ruih reng a ni.

Pix: Achhuana
Spiritual revival still continues in Kelkang village, Champhai district, Mizoram, India
Pix: Achhuana
 
*MPSC HNUAIA HNA DIL TUM TE TANA HRIATTUR PAWIMAWH
Mizoram Public Service Commission (MPSC) in hna a lak tur dilna form (application form) lakchhuahna man leh application fee hetiang hian siamthat a ni :

ST/SC/OBC TAN
1. Application Fee : Rs. 250 /-
2. Application Form man : Rs. 20 /-
TOTAL : Rs. 270/-

GENERAL CATEGORY TAN
1. Application Fee : Rs. 300 /-
2. Application Form man : Rs. 20 /-
TOTAL : Rs. 320/-

Dilna Form hi hna lakna tur advertisement tihchhuah anih hnu ah MPSC Office reception counter ah leh District tina Bawrhsap Pisa atang pisa kai ni apiangin chawhma dar 10 atanga tlai dar 3 thleng lakchhuah a thehluh theih a ni ang a, he rate thar hi April ni 1, 2015 atanga hman tan a ni.
Hna lak tur azirin Application Fee hi tihdanglam theih a ni a, Aplication Form man hi refund theih ani lo ang. (DIPR)

8th April 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
8.4.2015

 #‎IPL‬ 2015 inkhelh hmasaber ah Kolkata Knight Riders te chuan Mumbai Indians wicket 7 in an hneh a ni. Indian Premiere League (IPL) khelh tan tak hi season 8-na a ni.
 
*Vawiin khan India President in Rashtrapati Bhavan ah mi hrang hrang hnenah Padma award (Padma Bhusan, Padma shree etc.) hlanna a nei. Tun tum ah hian Mizoram atangin Padma chawimawina dawng an awm lo niin kan hria.

*MIZO NULA IN Ph.D DAWNG THAR
Lalthanpui Sailo (Jackie) d/o Dr. Saingura Sailo, Bungkawn Vengthar, Aizawl chuan vawiin 8 April 2015 khan Centre for Historical Studies, Jawaharlal Nehru University, New Delhi atangin Ph.D. a dawng thar. A thesis title hi "From Mercantilism to Land Adventurism: The Economy and Society of the Northern Province of the Estado da India 1534-1739" tih a ni.
Mizoram Scholar Lalthanpuii Sailo (Jackie) recently got Ph.D degree from JNU, New Delhi
*SP TRAFFIC HRIATTIRNA
Aizawl SP Traffic chuan a hnuai ami ang hian thuchhuah a siam :
Pu Pranab Mukherjee, President of India chuan Ni 9.4.2015 leh 10.4.2015 (Ningani leh Zirtawpni) hian Mizoram a rawn tlawh dawn avangin a hnuaia Veng tarlan huamchhung kawngpui sirah te hian lirthei eng chi mah, a hnuai a hun tarlan chhung hian kawngpui ah dah/hun phal a ni lo.

1. Dt.8.4.2015 : Zing dar 6:00AM atanga ni 10.4.2015 zan dar 8:00 pm inkar chhungin FCI Godown bul kawngpui dungah Truck leh lirthei park phal a ni lo.

2. Dt.9.4.2015 : Thuampui Helipad leh Raj Bhawan inkar, Chaltlang paltlang kawngpui dungah hian zing dar 6:00 am atanga tlai dar 6:00 pm inkar chhungin lirthei eng chi mah dah phal a ni lo.Thuampui (Hauva Filling Station) bul Maxi-Cab station-a maxi-cab zawng zawng te chuan dar 2:00 pm ah station an chhuahsan vek tur a ni.

3. Dt.9.4.2015 : Zing dar 10:00 am atanga ni 10.4.2015 VVIP i.e President of India in Lengpui Airport a chhuahsan hma chu Lirthei eng chi mah Raj Bhawan- Lengpui Airport via Vaivakawn inkar kawngpui dungah lirthei eng chi mah park phal a ni lo.

4. Dt. 10.4.2015 : Raj Bhawan leh MZU Campus inkar Temple square, Vaivakawn leh Zohnuai paltlang kawngpui dung ah zing dar 6:00 am atanga tlai dar 8:00 pm inkar chhungin lirthei eng chi mah park phal a ni lo. (DIPR)

*MISSION INDRADHANUSH HAWN A NI
Nimin chawhma dar 10 khan Civil Hospital, Auditorium Aizawl ah Naupang kum 2 hnuai lam leh rai puar zawng zawng ten, a bi kim a hri danna vaccine an lak theihna tur atana programme thar, Mission Indradhanush chu Dr.K.Ropari, Principal Director, Health & Family Welfare chuan hman theih turin a hawng. He hun hi Dr.Rosangluaia, Medical Superintendent, Civil Hospital, Aizawl in a kaihruai a.

Dr.K.Ropari, Principal Director, Health & Family Welfare Department chuan thusawiin, Hri venna lak pawimawhzia leh Nu in rai lai atangin hri venna vaccine a bi kim a lak ngei a tul thu leh naute a pian tirh ah vaccine lak a that thu sawiin hei hian an nakin hun ah leh tun mai ah hri an kai mai theihna lakah nasa taka a ven avangin hri venna lak hi ngaih pawimawh tur a ni a ti. Hemi hri venna pek kawngah thawktute pawh taima tak a, theihtawp chhuah tura a duh thu leh he mission hian nu leh naupang, engemaw avanga hri venna la ve hman lo te tan hun tha leh rah tha siam ngei se a duh thu a sawi bawk.

State EPI Officer, Dr.Lalzawmi chuan he mission hmalak dan tur te kalkhawm te hrilh hriatna neiin he mission hian Lunglei, Saiha, Lawngtlai leh Mamit District chauh a tuam dawn a. Hemi huam chhung a naupang kum 2 hnuai lam leh raipuar zawng zawng te tan Mission Indradhanush hnuaiah, hri venna la kim lo leh la la ve lo te tan, a thlawnin vaccine pek a ni dawn a, he hun hi nimin atanga tanin thla 4 chhung chauh hawn a ni dawn a, thla tin ni 7 ni zel ah tanin, ni 7 chhung zel neih tur a ni a, July ni 13 thleng a awh dawn a, he mission in a huam chhung a awm zawng zawng nu leh naupangten mahni awmna veng theuh a hun hawn anih hun ah lo ngai pawimawh a, he hun tha hi an chhawr tangkai ngei a duhthu leh department pawh in hma an lak thu a sawi bawk.

Dr.Rohmingthanga Ralte, Director of Health Services pawhin thusawina neiin Dr.K.Lalbiakzuala, Mission Director, National Health Mission in lawmthu sawina neiin hun a khar a ni. (DIPR)


*KOLASIB DISTRICT LEH CACHAR DISTRICT TEN SPORTS & CULTURAL OUTREACH PROGRAMME HMANG DAWN
Kolasib DC leh Cachar DC ten District pahnihte inkara inunauna, thawhhona leh boruak tha zawk a awm chhunzawm theih zel nan tunhma lama an inbiakna ah district pahihte inunauna leh inpawhna tichak leh ti phuisui zual turin exchange programme neih an rawt a. An rawtna ang chuan vawiinah district pahnihte inzawmna a that lehzual theih nan Sport & Cultural Outreach Programme, BNMPH School, Dholai Cachar District Assam ah buatsaih a ni dawn.

Tukin zing dar 10:00 ah he ni hnih awh tur programme hi Assam Border Areas Minister in a hawn beisei a ni a. Kolasib leh Cachar DC te pawhin he programme hi an hmanpui dawn a. Anni bakah hian Kolasib District officer te, District MJA hruaitute leh pawl hrang hrang aiawhte pawh he hunah hian tel tura beisei an ni. (DIPR)

6th & 7th April news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
7.4.2015

*MIZORAM SORKAR LEH SIR RATAN TATA TRUST TEN THAWH HONA TUR THUTHLUNG ZIAK
Kawng hrang hranga Mizoram tan hmasawnna ki pawimawh deuh deuh atan Mizoram sorkar leh Sir Ratan TATA Trust hnuaia North East Initiative Development Agency (NEIDA) te chuan vawiin khan thawh hona tur thuthlung an ziak a. Chief Minister Pu Lal Thanhawla kaihhruaina hnuaiah Mizoram sorkar aiawhin Chief Secretary Pu Lalmalsawma IAS leh, Ratan TATA Trust aiawhin Pu Burziz S.Taraporevala, Secretary & Chief Accountant, Sir Ratan TATA Trust ten Chief Minister Conference room ah thawh dunna thuthlung hi an ziak a ni.

Mizoram sorkar leh TATA Trust te inremna hi Mizoram sorkar lamah chuan NLUP Implementing Board kaltlanga thawh tur niin a bul tan nan TATA Trust hian kum 5 chhunga hma lakna turin vaibelchhe 18.8 a tum dawn a. Hemi hmang hian chhungkaw 17,000 te chu tanpui an ni ang a. He thawh dunna hnuaiah hian kawng hrang hranga miretheite khawsak dinhmun chawikanna tur te, vawkvulha eizawng te tan vawk notea intodelhna tur te, hlawk zawka horticulture thlai thar thar tih punna tur leh a bikin serthlum huan te tuaithar a, thei rah seng leh vawn thatna tur te, kawng hrang hranga ranvulh leh lo neia eizawngte chawikanna tur te, tui in tur thianghlim leh faina kawnga hma lakna tur te, zirna leh hriselna te, naupang thanglai ten mamawh tawk chaw tha an hmuh theihna tura hmalak dunna tur te a tel a ni.

Chief Minister Pu Lal Thanhawla chuan NLUP chungchang sawiin he project nihna leh a thil tum te chu India ram sorkar leh khawvel ram hrang hrang ten an ngaihven hle a ni, a ti a. NLUP thil tum te ti hlawhtling turin UN Agency 4 te nen thawh ho mek a ni tih sawiin tuna TATA Trust Fund nena thawh dunna chuan NLUP hnuaia hmalakna hrang hrang te chu a tichakin project hlawhtlinna kawngah thui tak a pui thei ngei dawn a ni, a ti.

Vawiina thawh dunna thuthlung ziahna ah hian Pu P.L.Thanga Vice Chairman, NIB chuan Ratan TATA Trust Fund leh Mizoram sorkar thawhdunna bul lo intan dan sawiin project kalpuina tur ruahmanna siam dan te a tarlang a. Pu Burziz S.Taraporevala chuan Ratan TATA Trust Fund lo din chhuah dan leh a thil tum te, he Trust Fund hnuaia India ram hmun hrang hranga hmalak dan te a sawi bawk a ni. Ratan TATA Trust hnuaiah hian North East Initiative Cell chu 2008 khan din a ni a. North East Initiative Development Agency(NEIDA) tih hminga in register in kum 2009 atang khan hmarchhak state 3, Arunachal Pradesh, Mizoram leh Nagaland ah te mipuite hmasawnna tur atan sum tam tak sengin hna an thawk a.

Vawiina thawh hona thuthlung ziahna ah hian Home Minister Pu R.Lalzirliana, NLUP Nodal MInister leh Pu Lalsawta, Finance Minister te bakah NIB Chairman Pu J.H.Rothuama leh Mizoram State Planning Board Vice Chairman Pu H.Liansailova te an tel a. Sir Ratan TATA Trust hnuaia NEIDA in hmarchhak state pathum a hmasawnna hna a thawh dan te tarlangin Pu B.Lalrinkima, Development Officer, Sir Ratan TATA Trust chuan tuna Mizoram sorkar leh NEIDA thawh dunna tur project chungchang leh hemi atanga Mizoram in hlawkna nasa tak a tel chhunzawm theih te a sawifiah a. Pu Lalhmingthanga IAS, Secretary, Agriculture department chuan lawmthu sawiin hun hnung a khar a ni.

Sir Ratan TATA Trust aiawha lo kal Pu Burziz-a leh a team te hian vawiin khan Thuampuia MULCO bawnghnute sawngbawlna hmun tlawhin naktukah Serchhip leh Thenzawla vawkvulhna hmun te an tlawh ang. (DIPR)
MoU signed between Government of Mizoram and Sir Ratan TATA Trust in Aizawl, Mizoram, India
Pix: DIPR, Mizoram


*MIZORAM SCHOOL TEXT BOOK CHUNGCHANG
Printing & Stationery Department chuan Mizoram School Text Book chungchangah a hnuai ami ang hian thuchhuah an siam:

Mizoram school text book class I - IV English leh Mizo chu Printing & Stationery Department in a chhut a buaipui a, chhut peih fel a ni tawh a. Distributor mamawh pek fel a ni tawh. SSA ta tur chu ni 8.4.2015 hian pek zawh fel a ni ang. Ni 26.3.2015 ah additional tlem tih belh leh a ni a, reilote ah peih thuai beisei a ni. (DIPR)

*MIDUM KHAM MIN
Vawiin khan Aizawl - Lunglei panna kawng Midum kham a min a, kawngthlang lam a bal tel bawk. Lirthei engmah kaltlang theih a ni lo a, he kawng a kal tum te chuan Damdiai - Changte - Samlukhai kawng ah kal turin mipui te hriattir anni.

Landslide in Aizawl - Lunglei road, Midumkham, Mizoram
*YEMEN TUALCHHUNG BUAI AH MI 53 BORAL
Nimin khan Yemen ram a tualchhung buaina kal zelah bomb puak avangin mi 53 an boral. Nunna chan te hi civil mi 17 leh an ram President Abedrabbo Mansour Hadi tantu mi 10 te anni. Yeman tualchhung buaina avang hian India sorkar chuan an mi leh sa Yemen a awmte thlawhtheihna hmangin India ah a phur haw tawh hlawm a ni.

*BANGLADESH AH THLIPUI TLEH AVANGIN mi 28 BORAL
Inrinni liamta a Bangladesh hmarthlang lam a thlipui tleh avanga nunna chan zat chu mi 28 an tling ta. Thlipui tleh hian Inrinni leh Pathianni zan khan Bangladesh hmarthlang lam nasa takin a tuam a, mihring chenna in 28,600 chuang a ti chhia a, zirna in 250 chuang a ti chhe bawk. Hliam tuar mi 200 chuang an awm bawk. Mihring chenna in leh zirna in bakah hian lo/leilet nasa takin a tihchhia a, ran rual tam tak an thi bawk.

*THUPEK
Sub-Divisional Magistrate, Aizawl District, Aizawl chuan Section 144 Cr. P.C. 1973 in thuneihna a pek angin hetiang hian thupek a chhuah :

President of India chuan ni 9 April, 2015 (Ningani) hian Mizoram a rawn tlawh dawn avangin thlawhna thlawk ten harsatna an neih loh nan heng a hnuaia thupek hi a chhuah.

Heng khua - Lengpui, Hmunpui, Serzawl, Nghalchawm, Lengte, Sihhmui, Sairang, Sairang Dinthar leh Mualkhang te hian Lengpui Airport a thlawhna veivak a tihbuai loh nan ni 9 April, 2015 leh ni 10 April, 2015 ni te hian huan leh lo an hal tur a ni lo.
He thupek hi ni 1 April, 2015 atanga hman tan a ni. (DIPR)

*LOCAL COUNCIL ELECTION ATANA RETURNING OFFICER TE TRAINING PEK AN NI
Nimin chawhma dar 11:00 khan Aizawl District Local Council Election 2015 atana Returning Officers ruatte chu I&PR Auditorium-ah training neih tir an ni a. He training hi Pi H. Lalchhandami, Election Officer, Aizawl in kaihruaiin, he hunah hian Pu K. Lalrohlua MCS, DLAO, Aizawl chuan training a pe a ni.

Aizawl Municipal area ah hian Local Council 83 awmin General Seat 392 leh hmeichhe tana reserved seat 143 a awm a. Local Council Election buaipui tur hian Returning Officer 83 ruat an ni. He training ah hian Returning Officer te mawhphurhna leh tihtur te hrilhhriat an ni.

State Election Commission chuan ni 1.4.2015 (Nilaini) khan Local Council inthlanna turin Press Note a ti chhuak a, in candidate tur te chu ni 6.4.2015 (Thawhtanni) atanga ni 13.4.2015 (Thawhtanni) thleng nomination thehluhna hun hawn sak an ni ang. Nomination inhnukdawk duhte tan ni 16.4.2015 (Ningani) chhun dar 12:00 thleng hawn a ni bawk. (DIPR)

*ZINGKAR CHANCHINTHAR TAWI LAWRKHAWM
*Aizawl Civil Hospital a inzaina pindan (OT) chu siam that a nih avangin thu leh awm hma chuan Surgery & Orthopaedic bikah emergency lo chu zai theih a ni dawn lo a ni.

*Central YMA hnuaia Training & Youth Affairs hmalakna in Mizo thalai 838 te chu cement, tile leh aluminium training pek an ni tawh.

*Mizo Zirlai Pawl (MZP) te chuan India President in Mizoram a rawn tlawh hunah sorkar laipuiin Mizoram governor te an duh duh a an chinglet thin duhloh entirnan lungawilohna lantir an tum.

*Sorkar laipui chuan sorkar laipui hnuai atanga pension hlawh la te chu an bank account leh aadhaar number register vek turin a hriattir.

*Union Agriculture Minister Radhamohan Singh chuan kum 3 lo awm leh tur chhungin sorkar in ramchhung a loneitu zawng zawng hnenah soil health card pek vek a tum a ti.

*Nimin khan India President Pranab Mukherjee chuan Geo-Scientist 23 te hnenah National Geoscience Award for the year 2013 a hlan.

*Kenya indo thlawhtheihna ten Somalia ah firfiak pawl al-Shabab te tawmna camp 2 an bei. Hei hi Kenya in Somalia firfiak pawl al-Shabab te indo thlawhtheihna hmang a beih vawi 1-na a ni.

*Egypt ram a Alexandria khua a biak in vengtu te awmna mi tutih hriatloh pakhatin a pawng kah chiam avangin police 1 leh civil mi 3 in nunna an chan.

*Nimin khan Assam a Karimganj district ah Assam Rifles sipai ten United Democratic Liberation Army helpawl a mi 2 an kaphlum.

*Sikkim chuan sorkar laipui puihna in kumin July thla hian silhfen leh puan thuina hmunpui Apparel and Garments Manufacturing Centre a nei hman dawn ni a sawi a ni. He centre bul tan nan hian sorkar laipuiin Rs.Vaibelchhe 18 a pe dawn a, Sikkim thalai 1500 te tan eizawnna pek theih an beisei a ni.

*Lamtluang page like/follow tute in dam tlang hlawm em? In dam zel kan beisei. Kan page in review na te kan lo hmu thin a, kan lawm hle mai. Kan page ah thuthar kan rawn tarlan thin te hi min lo like sak bakah in ngaihdan te comment lamah rawn sawi ve thin turin kan sawm a che u. Tukchhuah nuam vek ule.



*PRESIDENT OF INDIA ZIN TUR CHUNGCHANG INBUATSAIHNA THLIRHO
President of India, Pu Pranab Mukherjee-a'n Mizoram a rawn tlawh tur chungchanga inbuatsaihna thlirin nimin chawhma dar 11 khan Chief Secretary Conference Room-ah Chief Secretary Pu Lalmalsawma hovin sorkar mi pawimawhte an thukhawm.

Tarlan tawh angin President hi April ni 9 hian ni hnih chama Mizorama lo zin tura beisei a ni a. Venhimna tha tak hnuaiah mawihnai tak leh tha taka dawnsawn a nih theih nan sorkar chuan inpuahchahna uluk takin a kalpui a. Ruahmanna felfai leh kimchang tak buatsaih a ni. Nimin khan venhimna leh kalkawng chungchang te, traffic lam te leh medical lamte, cultural programme leh dinner bakah kawng hrang hranga an inbuatsaihna kal mek chipchiar taka thlir ho a ni.

President hian April ni 10-ah Mizoram University tlawhin Convocation a hmanpui hnuah New Delhi panin Mizoram a chhuahsan leh dawn a ni. (DIPR)

*MIZO NULA IN Ph.D DAWNG THAR
Dt. 06/04/2015 khan Nl. K. Lalhmingchhuanmawii D/o K. Biaknawla, Vengpui, Lawngtlai, Mizoram chuan PG And Research Department of Zoology, Pachayappas College, Chennai atangin Ph.D a dawng thar a. A thesis title chu "STUDIES ON THE EFFECT OF PUNICA GRANATUM AND ALLIUM SATIVUM ON COTYLOPHORON COTYLOPHORUM (FISCHOEDER.1901)" a ni.
Source: Chawia Cma
K. Lalhmingchhuanmawii D/o K. Biaknawla recently awarded Ph.D degree from PG And Research Department of Zoology, Pachayappas College, Chennai

*J&K AH HELHO IN POLICE 3 KAPHLUM
Nimin khan Jammu and Kashmir a Ashipora thingtlang khua ah helho in police 3 an kaphlum. Police te hi he khua a thil tisual awm enfiah tur a kal anni a, ralthuam engmah an keng ve lo a ni.
 
6.4.2015
*SORKAR LAIPUIIN STATE TAN Rs.VAIBELCHHE 37,420 PE CHHUAK
India sorkar laipui chuan 14th Finance Commission in thurawn a pek angin a thawh khatna atan state hrang hrang te tan Rs. Vaibelchhe 37,420 a pe chhuak tan. Sorkar thuchhuah in a tarlan dan chuan Uttar Pradesh tan Rs.Vaibelchhe 6735 pek a ni ang a, Bihar tan Rs.Vaibelchhe 3624 pek a ni ang a, Madhya Pradesh tan Rs.Vaibelchhe 2835 pek a ni ang a, West Bengal tan Rs.Vaibelchhe 2746 pek a ni bawk ang.

*TEK IN MI 3 DENGHLUM
Nimin chawhnu khan West Bengal a Ganga lui ah lawng a chuang mi 3 te chu tek in a denghlum a, mi 11 in hliam na tak an tuar bawk. Hliam tuar te hi Howrah district leh Kolkata a damdawiin hrang hrang ah enkawl mek anni.

4th & 5th April 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM

5.4.2015
*Vawiin khan Mizoram leh khawvel hmun hrang hrang ah Easter Sunday programme chu kohhran hrang hrang ten tluang takin an hmang thei a, zanin ah pawh kohran hran hrang ten Lal Isua thawhlehna lam hawi thupui hmangin thuchah an ngaithla chhunzawm leh dawn a ni. In kohhran in Easter programme te in hmang tluang thei em?

*RANGVAMUAL LEIVUNG PAIH CHUNGCHANGA AIZAWL DISTRICT DISASTER MANAGEMENT THUCHHUAH
Rangvamual leivung paih chungchanga Aizawl District Disaster Management thuchhuah chu a hnuai ami ang hi a ni :

Chanchinbu thenkhat a Rangvamual leivung paih chungchangah mipuite hriata sawifiah tul a awm a. Hetiang hi thil awmdan a ni.

He kawngpui hi Mizoram mipuite za-a sawmriat in kan rin ber a ni a, a tlang loh chuan nitin mamawh kan lakluhna ber a nih avangin thal laia tha taka laih tlang a nih loh chuan fur a a pin mai hi a hlauhawm hle a ni. Kan ram hruaitute pawhin an ngaipawimawh in an ngaihven hle a. Hemi avang hian Aizawl District Admin. pawh an chungah kan lawm hle a ni. Lei paihna hian a thlanga Concrete Building chu a deng deuh thin a, a in neitu pate pawhin District Disaster Management Authority Chairman pawh an hmu a. An paihna hi sawn an rawn dil a, amaherawh chu technical lam mithiamten an paihna hi an sawn chuan a min belh teuh thei dawn nia an hriat avangin a paihna hi sawn theih niin an ngai lova. Chuvangin a in neitupa pawh hi a duh ang tawka a in venhim nan fencing siam tur leh a senso zawng zawng chu District Disaster Management Authority in a tum sak tur thu hrilh a ni a. Leivung paihna sawn a nih loh chhan hi pawisa harsat vang a nilo. Tin, leivung hi tuna palh a nih loh chuan fur ah chuan he in hi leimin in a hnawl mai theih dinhmun ah a ding a ni.

Kan Opposition Leader zahawm tak pawhin Aizawl DC leh District Disaster Management Authority Chairman ni bawk pawh rawn hmu in an sawi dun a. DC chuan a aia tha paih dan leh a problem solve dan an hriat chuan an thurawn chu a dawnsawn theih reng thu a hrilh a. Amaherawhchu, solution tak tak hi uluk takin an sawi dun pawhin an hmu zo mai lo a ni.

JCB a chhiat chungchangah hian Police te hian inquiry an ti a, an rinhlelhte an ko mai a ni a, tumah Lock-up a riah tir leh Jail a khung pawh an awm lo a ni.
Rangvamual leimin hian Zoram mipuite min tibuai rei ta hle a, chuvangin furpui thlen hma ngeia mipui tana paih fai thuai hi a tul avangin mipuite hriatthiamna leh tawiawmna Aizawl District Disaster Management Authority chuan a ngen tak meuh meuh a ni. (DIPR)



*BCM IN JUBILEE BIBLE SCHOOL TAN DAWN
Mizoram Baptist Kohhran te chuan Jubilee Bible School chu ruahman lawk angin April 7, 2015 (Thawhlehni) atang hian an hawng tan dawn ta. Batch hmasa berah hian zirlai 33 an awm dawn a, an zinga 8 chu missionary thawk lai mek training turte an ni a; mi dang zawng chu Tualchhung Kohhran hrang hrang atanga thlan chhuah te an ni. A tirhah residential veka tih tum a ni nain la inpeih fel hman vek a nih loh avangin Missionary leh Pastor, nupui fanau neite chu Serkawn leh a chhehvelah inluah phalsak an ni.

Tunah hian JBS-ah an hotupa ber (Dean) chu Rev.H.Lalthlamuana a ni a. A ni bakah hian zirtirtu atan Rev. Sangliankhuma Chinzah, Upa HS. Lalhmingthanga leh Tv. David F. Lalkhawngaiha te an ni.
Source: http://www.mizobaptist.org

*GOVERNOR KALCHHUAKIN CHIEF MINISTER THLAHNA LEHKHA THAWN
Dr. Aziz Qureshi Mizoram Governor kalchhuak ta chuan Mizoram Chief Minister Pu Lal Thanhawla hnenah thlahna lehkha thawnin Mizoram a awm chhunga amah leh a thawhpui ten tha taka an thawhpuina ah lawmthu sawiin a theih ang chin chinah Mizoram a hriatreng nan Mizoram tan theihtawp a chhuah tur thu a sawi.

Dr. Qureshi chuan Mizoram mipui leh a ram pipu sulhnu (cultural heritage) ropui takte hi ka theihnghilh ngai dawn lova, tiin Mizoram a awm laia Chief Minister leh thawhpuite leh officers ten theihtawpa an tawiawmna avangin lawmthu a sawi in, duhsakna sang ber a hlan a ni. (DIPR)

*MIZORAM GOVERNOR ATAN PU KESHARI NATH TRIPATHI LAKLUH A NI
Mizoram Larsap thar atana ruat Pu Keshari Nath Tripathi, West Bengal Governor ni mek chu nimin tlai dar 4 khan Raj Bhawan-ah rinawmna thu tiam tira Mizoram Governor 16-na atan lakluh a ni a. Governor lakluhna inkhawm ah hian Chief Secretary Pu Lalmalsawma, chuan India President Dr. Pranab Mukherjee’n, Pu Keshari Nath Tripathi, Mizoram Governor atana a rawn ruatna lehkha Warrant of Appointment a chhiarchhuah hnuin Gauhati High Court Judge Justice Michael Zothankhuma’n rinawmna thu tiam tirin Pu Keshari Nath Tripathi hi Mizoram Governor atan lak luh a ni.

Larsap thar lakluhna inkhawm-ah hian Chief Minister Pu Lal Thanhawla, Assembly Speaker Pu Hiphei, Minister-te, Parliamentary Secretary-te leh MLA te bakah Sorkar mi pawimawh thahnem tak an tel.

Larsap thar hi kum 80 a upa niin 10 November 1934 khan Allahabad, Uttar Pradesh ah a piang a. Eizawnna ah Senior Advocate niin Allahabad High Court ah te pawh Ukil hlawhtling taka lo ni tawh thin a ni. Politics a luhchilh hnuin BJP Candidate niin Uttar Pradesh Legislative ah term 5 chhung thlantlin a ni tawh a. West Bengal Governor atan ruat a nih hma pawh hian Uttar Pradesh State ah Cabinet Minister leh Speaker nihna te a lo chelh tawh a ni. (DIPR)
Swearing-in ceremony of K N Tripathi for Mizoram Governor at Raj Bhavan, Aizawl
Pix: DIPR, Mizoram
*HARHNA THLEN NI LAWM
Nimin April 4, 2015 (Inrinni) kha Mizoram a Harhna Thlen Ni a ni a, kumin hi kum 109-na a ni. Kohhran hrang hrang ten Harhna thlen ni pual hian lawmthu sawi inkhawm an nei a ni.

*BCM EASTER SUNDAY THUPUI
Mizoram Baptist kohhran te chuan Easter Sunday Chawhma lam Inkhawm ah Headquarters atanga Easter Sunday thupui thlan sa ”Krista chu mitthi zing ata kaihthawhin a awm tak zet a ni” (I Kor15:20) tih hmangin thusawituten thuchah an puang ang a. Ram pumah Tawngtai thupui thlansa hmangin tawngtairual a ni bawk ang. Chawhnu lamah Kohhran inpawlhona leh zaikhawm awmin zan lamah pawh Inkhawm banah zaikhawm programme siam a ni bawk ang.
Tawngtai rual thupui(Subject) tur chu hengte hi a ni:-
1) Min chhandamna siam tura Lal Isua inpekna avanga lawmthusawina
2) Kristan Thihna hneha a tho leh in; sual leh thihna hnehna min siamsak avanga lawmthusawina
3) Thawhlehna thiltihtheihna kan hman thiam theih nana dilna.
source: www.mizobaptist.org
*MIZORAM PRESBYTERIAN EASTER SUNDAY THUPUI
Vawiin Easter Sunday ah hian Mizoram Presbyterian kohhran te chuan thupui 3 an ngaithla ang:
Chawhma inkhawm: Thihna chelh hlen rual loh - Isua (Tirh 2:22-24)
Chawhnu inkhawm: Kan hnênah awm ta che (Lk.24:13-32)
Zan inkhawm: Isua thawhleh angin kan tho leh ang. (Phil.3:21)

*VUR TAWLH VANGIN SIPAI 4 IN NUNNA CHAN
Nimin khan Jammu and Kashmir a Ladakh huamchhung Changla pass ah vur a tawlh avangin India sipai 4 a delhhlum a, sipai 2 in hliam na tak an tuar a ni. Hliam te hi army command hospital, Chandigrah ah phurh thlak anni.

*Lamtluang page chhiar tu zawng zawng te kan Lalpa Isua Krista thihna hneh a a thawhlehna champha khawvel in a lawm ni ah hian ‪#‎Easter‬ Chibai kan buk vek a che u. Khawvel ah hian Pathian ni a inchhal leh Pathian ni an ngaih mi tam tak an lo awm tawh thin a, mahse, thi a tholeh reng reng an la awm ve lo a ni. Easter Sunday hman nuam vek ule.

*Khawvel hmun hrang hrang a Kristian te Easter Sunday hmang turin an in buatsaih ta mup mup mai. US President Barack Obama te nupa pawhin an chenna White House ah 'Easter' lawmna ropui takin an buatsaih dawn a ni. He hunah hian US leh khawvel ram hrang hrang a sawm bik ten hun an hmanpui dawn a ni.

4.4.2015
*GUWAHATI MIZO WELFARE HRUAITU THAR TE:
President: Pu Thanga Jongte,
Vice president - Pu Lalthara Royte,
Gen secy- Pu John Gangte,
Asst secy - Isaac Rochunglura,
Treasurer - Nl Lalrinpuii Khiangte,
Fin secy - Nl.Dr.V.Sawmveli.
 
*NAKTUK ZANAH THLA AWKLEM AWM DAWN
Naktuk zanah kumin chhung a thla awklem hmasaber a awm dawn a, hei hi India ramah chuan Arunachal Pradesh a Tezu leh Roing khua atangin a hmuh theih ang. Thla awklem hi minute 4 leh second 43 chhung a hmuh theih dawn a ni. Tin, Dibrugarh, Imphal, Kohima, Port Blair leh Kolkata atang te pawh in a pum lo deuh in thla awklem hi a hmuh theih bawk dawn ni a sawi a ni.

Friday 3 April 2015

3rd April 2014 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
3.4.2015
*GOOD FRIDAY HI
Kum 2001 chhiarpui atanga chhut in India ramah hian Kristian sakhaw zuitu mi maktaduai 19 kan awm a, chu chu rampum a mipui awmzat atanga chhut in 1.9% kan ni. India ram mipui 98% te hian Good Friday hi hmang ve lo in enge a awmzia tak hre lo mahse sorkar chuan National holiday ah a puang kumtin a ni. Keini pawh in calendar a asen a lang thin sakhaw dang te ni pawimawh te, a awmzia tak tak hrelo a chawlh nan kan lo hmang ve ang hian India ram mipui tam zawk chuan vawiin hian chawlh an hmang ve mek a ni.

*PHILIPPINES AH RAMDANG MI KRAWS AH INKHENBEH KHAP
Kumtin Good Friday ni alo thlen in Philippines ramah chuan Lal Isua tuarna tawmpui nan Kristian thenkhat te Kraws ah darkar engemaw zat an inkhengbeh tir thin a, kumin erawh chuan Philippines a khaw tam tak ten ramdang mi tel ve an phal tawh lo a ni. Kumin hian Philippines mi Catholic mi leh sa te chauh kraws a inkhenbeh leh kraws rit tak put te phal anni. Kraws a inkhengbet te hi an nunna atana pawilo tur tawk velah an la thla leh thin a, hemi boruak chhim tur hian ramdang atangin khualzin tam takin Philippines an pan thin a ni.


*I&PR OFFICER-TE LEH MJA HRUAITUTE INKAWM
Niminpiah khan I&PR officer-te leh Mizoram Journalists Association hruaitute chu I&PR Director Pu Jim K.Chozah office ah an thukhawm.

Pu Jim K. Chozah chuan MJA member-te leh I&PR thawktute'n kum tak thawhhona tha tak neia an lokal ho tawh dante tarlangin, inthianthatna leh inunauna nghet zawk nen mipui rawngbawlho zel tha a tih thu a sawi a. MJA lam pawhin I&PR chu an tana nodal department an nih angin thu a chhia a tha an thlen theihna hmun a ni tiin an tana malsawmna an lo nih tawhnaah lawmthu an sawi a ni.

Meeting-ah hian Journalists Welfare Fund chungchang te, Press Accreditation Rules chungchang te chipchiar taka sawiho a ni a. Sorkar hmalakna mipui hnenah chak zawka puanzar a nih theihnan sorkar hmalakna hrang hrang Journalist-te'n an tlawh theihna tur remchang, Project Site Visit neih tha an tih thute pawh sawiho a ni. (DIPR)

*AIR LIVE PHONE IN PROGRAMME
Tun Thawhtanni (April ni 6) lo awm tur zan dar 7:05 - 8:00 inkar, AIR Aizawl a Tlephone a zawhna leh chhanna Live Phone In Programme ah chuan “Aizawl Women Polytechnic hmalak dan leh hmachhawpte” tih chungchanga hriat duh neite tan a zawh theih dawn a. Mipui zawhna chu - FVL Biakchhawna, Principal leh Malsawmtluangi, Selection Grade Lecturer, Women Polytechnic, Aizawl ami ten an rawn chhang ang. A zawt duh tan Telephone No. 0389/2323148 emaw 0389/2322515 emaw ah biak pawh theih a ni ang. (DIPR)

*FEBRUARY 2015 CHHUNGA SA EITURA RAN TALH ZAT 59,726 A NI
February 2015 chhunga Animal Husbandry and Veterinary Department Mizoram in State pumpuia ran a enkawi te :

OPD- ah ran chi hrang hrang 21,369 enkawl a ni a. Operation theater- ah ran 1956 zai a ni. Hri danna ran 3,056-ah pek a ni a. Mobile case-in ran 2,070 enkawl a ni a. Artificial Insemination( A.I.) programme kalpui a ni a. Bawngpui 262 leh Vawkpui 121 kahrai a ni. A.I. atangin bawng note 188 leh vawk note 420 an piang hman a ni.

Ram dang leh State dang atanga ran lo lut exam zat 17,576 a ni a, Sa ei atana ran talh chhinchhiah zat 59,726 a ni. Mimal vulh ran awm chhinchhiah zat 7,00,259 a ni. Government Revenue atan Veterinary Hospitals leh Veterinary Dispensaries Wing chauh hian February 2015 chhungin Rs. 2,69,135.00 an chhung lut a ni. (DIPR)

*MIZORAM PRESBYTERIAN KOHHRAN GOOD FRIDAY 2015 INKHAWM THUPUI
Mizoram Presbyterian Kohhran te chuan vawiin Good Friday inkhawm hian thupui 3 an ngaithla ang:

Chawhma ah: Kan tan kraws-ah khenbeh a ni. (Mt.27:39-44)
Chawhnu ah: Kraws chu damna a ni. (Lk.23:39-43)
Zan ah: Temple puanzar a thler (Lk.23:44-46)

*Lamtluang page chhiar tu zawng zawng te Good Friday 2015 chibai kan buk vek a che u.

*Nimin zing khan Arunachal Pradesh a Tupi khua ah NSCN hel ni a rin ten India sipai 4 Rajput Regiment te lambun in sipai 3 an kaphlum a, sipai 4 in hliam an tuar.

*Nimin khan Jammu and Kashmir hmar lam Baramulla district a Frasthar khua ah leimin in in 38 a tichhia a, thi leh hliam an awm lo hlauh a ni.

*Maharashtra ah swine flu vangin mi 6 an boral leh, tihian kumin chhungin swine flu vangin mi 422 in nunna an chan ta a ni.

*Lamtluang page hi i thian te lo like tir ve rawh le.

2nd April 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
2.4.2015

*IRAN NUCLEAR SIAMCHHUAH CHUNGCHANG A INBIAKNA NEIH MEK AH THU TLANGKAWM NA NEI THEI DAWN TAN
Nuclear ralthuam siamchhuak thin ni a sawi Iran leh khawvel ram ropui tak tak 6 - Britain, China, France, Germany, Russia, United States leh European Union hruaitu te chuan Switzerland ram a Laussane khawpuiah inbiakna an nei mek a ni. Iran nuclear ralthuam siamchhuah tih tlem dan tur chungchang a inbiakna hi ni 8 chhung an nei tawh a, karleh thawhlehni zanlai thleng inbiak hun hi pawhsei a ni a, thumum an nei thei dawn tan ni a sawi a ni. An inrem tlan zel theih chuan kumin June ni 30 ah thu tlangkawmna tluantling siam theih an in beisei a ni.

Lamtluang thulakna in a sawi danin an inbiak na ah hian Iran chuan nuclear ralthuam siamchhuah theihna uranium a neih hmun thum athen a hmun hnih chu a ti tawp ang a, chumi siam chhuahna khawl a neih te pawh a hmang chhunzawm tawh tur a ni lo tiin inremna an siam tan a ni. Tin, an inrem theih chuan Iran hian uranium a neih 19,000 centrifuges atangin 6,000 centrifuges chauh a kawl tawh ang a, a bak zawng chu IAEA enkawl na hnuaiah ramdang ah a thawn chhuak emaw a ti ral tur a ni tiin an indawr mek bawk a ni. Tin, Iran in nuclear siamna hmun leh hmanrua a neih te chu International Atomic Energy Agency (IAEA) te enfiah theih turin phalna a pe tur a ni an tiin an indawr mek bawk.

*WORLD AUTISM AWARENESS DAY HMAN A NI
United Nations General Assembly in December 2007-a khawvel ram tina hman tura resolution a lo pass tawh angin, “WORLD AUTISM AWARENESS DAY” 2nd April 2015 chu Spastic Society of Mizoram leh Pu Lal Dingliana IFS (Rtd) te Nupa thawhhona in AUTISM AWARENESS/RECREATION CENTRE, Robert Lalawmpuia IN, Sihphir-Neihbawih ah April Ni 2, 2015 zing Dar 11:30 atangin hman a ni.

Rualbanlohna chi khat Autism hi khawvelah hian a vei (Autistic) te hmuhchhuah an tam telh telh avangin UNO pawhin a ngai pawimawh em em a ni. Autistic ho enkawl hi rualbanlo te zinga harsa ber pakhat ni a sawi a nih avangin khawvel ram hrang hrangah Autism tan hian hmalak mek a ni a. Khawvel ah Autistic 67 Million chuang awm ni a hriat a ni a. Mizoramah pawh Autistic engnge maw zat an lo awm ve in hriat belh an ni mek bawk a. Spastic Society of Mizoram (SSM) te hian Rualbanlo te tana an hma lakna hrang hrang pawimawh tak tak kal mek zingah Autism hi an telh a. Tun hnaiah Health Minister Pu Lal Thanzara’n SSM hnuaia Gilead School ah Autism Centre a lo hawng in hmalak mek zel a ni a. Heng Autistic naupang te enkawl tur bik Mithiam pathum (3) pawhin Bangalore ah Training Course an zo tawh a ni. Autism tana Spastic Society of Mizoram hmalakna hi Mizorama Autism nei te leh an Nu leh Pa te tan malsawmna a nih zel beisei a ni.
He hun pawimawh tak hi Pu Lal Dingliana, Chief Information Commissioner chuan hmanpuiin Mizoram sorkar-in Autism nei ho tana hma a lak dante a sawi.

Inkhawm hi Pi Neihtluangi, Vice Chairman, Spastic Society of Mizoram chuan a kaihruai a, Rev. C. Tlanthanga, Sihphir Presbyterian Kohhran Pastor-in hunserh hmangin Autism Institute leh Autistic te channa lanna cinema an en ho a ni.

Autism nei (Autistic) te chuan a hnuaia zia danglam bik hi an nei tlangpui a. An neih te leh a nasat dan erawh chu a in ang vek lo:

1. Awmze nei manglo a nuih (laugh/giggles)
2. Mahni tana thil hlauhawm/pawi thei hlauh nachang hriat mang loh.
3. Na hre thei manglo ang in an lang.
4. Duat paha pawm/kuah vel duh mang lo.
5. Midang mit en (eye contact) pumpelh an duh.
6. Mahni chauha awm an duh zawk.
7. Duh leh mamawh sawi/tih lan harsa, (Autistic tamber chu a tawng thei - non-verbal an ni)
8. Thil engngemaw (objects) tih awm loh ang reng taka ngainat/atchilh/vawn tlat duh.
9. Thil awmdan pangngai anga awm tura duh tlat.
10. An mahni be tute leh midang be tute thusawi lo sawi nawn (eco) ve zel.
11. Thil (object) tih vir deuh reng emaw mahni vir . (DIPR)


*LAMTLUANG CHANCHINTHAR TAWI LAWRKHAWM
*Vawiin khan Jammu and Kashmir a Baramulla district ah India sipai leh helpawl te an in kahna ah India sipai 2 in nunna an chan.

*Bharatiya Janata Party National Executive meeting chu Bengaluru ah neih tan ani. Meeting hian nithum chhung a awh ang.

*Afghanistan a eastern Khost province a governor inbulah thihchilh bomb tihpuah a nih avangin mi 13 in nunna an chan a, mi 40 chuang inhliam an tuar.

*Nilaini a Russia ram a tuipui Sea of Okhotsk an tih a lawng pil avanga nunna chan zat chu mi 53 an tling ta. He lawng ah hian mi 130 an chuang a ni.

*Tukin zing dar 2:55 vel khan Uttarakhand a Chamoli district ah 5.1 richter scale a chakin lir a nghing.

*IAS hna a thawh atanga chhiar in a vawi 45-na atan Ashok Khemka chu Haryana sorkar in Transport Commissioner atangin Directer General, Archaeology and Museums department ah a sawn leh ta. Ashok Khemka hi sorkar hnathawk te zinga eiruk leh thil dik lo awm ni a a hriat te huai tak a puang thin a ni a, sorkar lam hian an sawnkual nasa tawh hle a ni.

*Zanin ah Lal Isua tuarna hrereng chungin hun i hman ngei kan duhsak a che.

*KRISTIAN KA NI AN TIH CHUAN AN KAP ZEL
Kenya ram hmarchhak a awm Garissa College University chu Islamic firfiak pawl al-Shabab ten luhchilh in mi 15 chuang an kaphlum a, zirlai engemaw zat an thuhnuai ah silai nen an dah mek a ni. Zirlai an thunuai ah an dah te hi Kristian te niin an sawi a, Muslim te chu an chhuah zalen zel niin sawi a ni. Hliam tuar zirlai 65 chuang te damdawiin ah enkawl mek anni.

Lamtluang thu lakna in a tarlan danin he University college a zirlai pakhat Collins Wetangula sawi dan chuan silai keng te chuan an hostel ah rawn lut in hostel a awm zirlai te chu Muslim nge Kristian an nih tih an zawt zel a, Kristian an tih chuan hmun leh hmunah an kap hlum nghal zel a ni a ti. University campus chhung a ralthuam nen a lut firfiak pawl te hian an hmai an tuam a, an zat chiah hriat nilo mahse mi 5 vel an nih rin a ni.

1st April 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
1.4.2015

*MIZO PA DOORDASHAN DIRECTOR GENERAL LAILAWK ATAN RUAT
C. Lalrosanga Addl. Director General (P & A) AIR & Doordarshan chu vawiin April 1, 2015 (Nilaini) khan Doordarshan Interim Director General atan ruat a ni. Doordarshan Director General nghet chu Prasar Bharati Board member 4 te hnawh khah annih hunah ruat tur a ni. DDG nghet ruat a nih hma chuan C.Lalrosanga hian he hna hi a lo thawk lailawk phawt dawn a ni. Mizo zinga he hna chelh hmasa ber a ni.

C. Lalrosanga hian kum 1975 ah All India Radio, Aizawl ah News Reader hna a zawm a, Mizo zingah AIR regular Newsreader hmasaber a ni a, kum 1982 ah Indian Information Service zawmin, All India Radio, Aizawl-ah News Editor a ni a.

Kum 1991 khan Union Public Service Commission kal tlangin Indian Broadcasting Programme Service a zawm a North eastern service of All India Radio (NES) Shillong ah Director hna a chelh leh a ni. AIR Aizawl ah leh DDK Aizawl ah te hotu hna a thawk leh bawk. Hemi hnu hian Mizoram sorkar hnuaiah hun engemaw ti chhung a thawk bawk a ni.

*ANDHRA PRADESH KHAWPUI TUR PUANG
Vawiin khan Andhra Pradesh Chief Minister Chandrababu Naidu chuan an state khawpui thar tu chu Krishna river kam ah din a nih tur thu leh a hming atan 'Amaravati' tih a nih tur thu a sawi. Lamtluang ah kan rawn post tawh angin Hyderabad khawpui chu Telangana state chhung a nih tak avangin kum 10 hnuah Andhra Pradesh hian Hyderabad chhuahsan in an khawpui thar lamah an insuan dawn a ni.
 
*MPSC MEMBER THAR ATAN REV.ZOSANGLIANA COLNEY LEH C ZORAMMUANA RUAT
Mizoram sorkar chuan Mizoram Public Service Commission(MPSC) member thar atan Rev.Zosangliana Colney leh C.Zorammuana (IPS Retd.) te  a ruat. Nimin khan appointment order hi sorkar in a tichhuak a ni. MPSC member te hian thlatin hlawh (fixed salary) Rs.75,000 bakah allowance dang an dawng thin a ni
 
*PETROL LEH DIESEL MAN TLAWM DAWN
Zanin zanlai atangin India ram pumah tuialhthei - petrol leh diesel man tih hniam a ni dawn. Petrol hi 1 litre zelah Paise 49 in a tlawm ang a, diesel hi 1 litre zelah Rs.1.21 in a tlawm ang.

*LAWNGTLAI TUI INTUR ENFIAH
Lawngtlai khawpui a Motor hmanga tui hralhtur chawi thinten an tuichawi thin hmun 11 a mi mithiam ten an endik ah hmun 8 a mi chu In atan a himlo tih hmuhchhuah a ni a, Motor a tuichawi ten an tuichawi an tih thianghlim nan PHE Department chuan a thlawnin Bleaching Powder a pe dawn.

Nimina DC Conference Hall-a Lawngtlai DC Pu J.Hmingthanmawia hova Lawngtlai a Motor a tuichawi thin ten Meeting an neih ah Lawngtlai DC chuan mipui ten tuithianghlim tha an tlan theih nan Sorkar chuan hma a la reng a, tuntum ah hian tui tlan thin hmun 11 ami Sample lak niin, PHE lamin an endik hnu ah hmun 8 a mi chu tih thianghlim hmasak loh chuan mihring tan a himlo tih hmuhchhuah a ni a ti a, motor a tuichawiten an chawi thinna hmundang 11 pawh endik leh tur a ni, a ti a, hei bakah hian Tuikhur tuite pawh endik vek tum a ni a ti bawk.

Nimin Meeting ah hian Tuithianghlim an chawi theih nan Motor enkawltute chu PHE lamin Bleaching Powder an pek vek tur thu leh an tuichawi a pawlhdan tawk pawh an zirtir vek tur thu DC hian a sawi. Lawngtlai khawpui chawmtur a mimal motor thuchawi thin hi 35 vel awmin vawiina he inhmuhkhawmnaa tel lote pawh a hran a Meeting hi neihpuii leh tum a ni bawk. (DIPR)

31st March 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
31.3.2015

*GOOD FRIDAY AH ZU ZUAR DAWN LO
MLTP Act hman a nih tak avangin Mizoram sorkar chuan Good Friday (3.4.2015) chu zu zawrh loh ni 'Dry day' ah a puang. He thupek hi Commissioner of Excise & Narcotics in a chhuah a ni.

*FIRE SERVICE WEEK PUALA THUCHAH
Kumtinin Fire Service Week hi India ram pumah April ni 14 - 20 chhungin hman thin a ni a. Kum 1944, April ni 14 khan Indo lawng lian tak ‘Fort Stikine’, ralthuam leh bomb lam chi tam tak phur chu Bombay (Mumbai) lawng chawlh hmunah a kang vak mai a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna hlu tak an chan phah a. Hemi denchhen hian kang thelhna-a Fire mi leh sa nunna chan-te hriatreng nan kumtinin April ni 14 bik hi India ram pumah Fire Service Day / Martyr’s Day atan hman a ni a, April ni 14 - 20 chhung hi Fire Service Week atan hman a ni ta thin a. He Fire Service week/hapta, kum tin India ram puma hman thin in a tum bulpui ber chu mipui vantlang leh mimal tin te, kan nitin nun, khawsak leh chet velna tinrengah kangmei ti chhuak lo tura invenna leh fimkhurna chang kan lo hriat deuh deuhna tura in zirtir a ni.

Mei tel lo hian mihring a awm theih loh a, mitin tana pawimawh leh tangkai tak a ni. Kangmei erawh mihring te tan chhiatna, piansualna leh thihna hial thlen a, kan rohlu in leh lote meivapa chantirtu a ni. Sawrkar laipui chuan ram pum a hman tur in Kumin 2015 Fire Service Week thupui atan hian “To prevent Fire : Adopt Safe housekeeping practices and approved electrical appliances” tih a rawn thlang a. Mizo tawng chuan “ Kangmei laka i him theih nan fel taka khawsak zir la, Electric hmanrua rintlak chauh hmang thin rawh” tiin a dah theih awm e. Kangmei laka fimkhur nachang kan lo hriat a, kan him tlan theih nan a hnuaia tarlan pawimawh zualte hi zawm theuh i turn ang u.

(1) In chhuahsan hma leh zan mut hmain kangmei ti chhuak thei thilte enfel hmasa ziah rawh.

(2) Gas (LPG) fimkhur takin hmang la, a leak anih chuan hmang lui suh. Gas hman loh laiin a regulator ah ‘OFF’ thin tur a ni.

(3) Electrical Wiring tha lo hi kangmei ti chhuak thei a nih avangin, a thiamte chauh khawihtir thin rawh.

(4) Parda, thosilen leh puanzar bulah mombati, bati chhit loh tur. Petrol, khawnvartui, diesel hmang fimkhur la, mei bul hnaiah dah suh.

(5) Circuit breaker (MCB) hman ngei tur a ni a, Fuse wire pawh a dik tak chauh hman tur a ni.

(6) Meinung lai reng reng ngaihthah loh tur, Meizial bung paih fimkhur la, a nung chungin paih suh.
(7) Meichhemna thil nawalh, lighter te naupang khawih phakah dah loh tur a ni.

(8) In leh a velah kangmei tichhuak thei en fel thin la, khaw daifem deuha awm i nih chuan ram kang laka i him nan i in bul zau tawk tak thianfai ang che.

(9) Electric Istiri, Heater, room-heater, Geyser, Electric stove, Immersion heater hman lai ngaihthah lo la, i hman zawhah ‘OFF’ ringawt lovin a plug phawi thin ang che.

(10) Kangmei a lo chhuahin chi-ai mai lo la, rangtakin in chhunga mite leh thenawm hnaite hrilh vat la, Fire station hnai ber-ah fiah leh rang takin kangmei chhuahna hmun hriattir ang che. (DIPR)