Sunday 17 December 2017

LAMTLUANG PATHIANNI ZINGKAR CHANCHINTHAR LAWRKHAWM

17.12.2017, Aizawl:
*Naktuk chawhnu dar 2 ah Aizawl FC chuan Mualpuiah Shillong Lajong an lo mikhual dawn. December ni 27 ah Aizawl FC hian Minerva Punjab an mikhual leh bawk ang.

*Nimin a PM Narendra Modi an Aizawl leh Shillong a tlawh khan India hmarchhak state te tan kum 2/3 chhung in kawngpui siam nan sawrkar laipuiin Rs.Vaibelchhe 90,000 a pe chhuak ang tiin a sawi.

*Lamtluang a kan rawn tarlan tawh thin angin nimin khan Rahul Gandhi chuan an party Congress President mawhphurhna a la tan ta.

*December ni 14 (Ningani) khan Presbyterian Hindi Bible School (PHBS) te chuan an Chapel-ah an zirlai Batch 60-na te Graduation Day-cum-Farewell an hmang.

*Mizoram Baptist Kohhran hnuaia thawktu nitin Office kal te chuan December ni 20, 2017(Nilaini)atang khian Krismas leh Kumthar chawlh an hmang tan dawn a, Kumthar January ni 5, 2018 (Zirtawpni)ah Office hawng lehin, January ni 8 ah thawktute inhlantharna Programme, Serkawn Biak Inah hman ani ang.

*Philippines ram lailai laiah ruahsur nasa avangin tuilian leh leimin a awm nasa hle. Mi singkhat chuang te hmunhim lamah an insuan chhuak a ni.

*WHO chuan Africa khawmualpui a Gabon ram chu zeng natna awmlohna ramah a puang. Zeng natna hi tunah hian Afghanistan leh Pakistan ah te deuh chauh a hluar tawh a ni.

*December ni 7, 2017 khan Mizoram Baptist Kohhran hruaitu hlun Rev. Dr. C.L.Hminga hnenah Serampore College (University) chuan chawimawina ropui Doctor of Divinity an hlan. He chawimawina ropui hlanna inkhawm hi Serampore College Convocation, Chennai-ah neih niin Rev. Dr. C.L. Hminga hian amah ngeiin Bishop Dr. John S. Sadananda, Master of Serampore College hnen atangin Doctor of Divinity chawimawina hi a dawng a ni.

*Synod Revival Deptt buatsaihin kumin Krismas leh kumthar vuak vetah hianAizawl khawchhung hmun hrang hrangah Operation Nehemia tum ruk(6) neih tura ruahman a ni a, tin, Krismas leh kumthar inkarah Kohhranhote nena tangkawpin hmun 20-ah OpenAir Service neih tura ruahman a ni bawk.

MCS 2017 TOPPER KHAWBUNG TLANGVAL HMINGMAWIZUALA

Aizawl: Mizoram Civil Service (MCS) Exam 2017 result 15.12.2017 a tihchhuahah pakhatna chu Hmingmawizuala S/o.C.Thanglura, Khawbung khua a ni. Lamtluang thuhriat danin MCS topper nita Hmingmawizuala hian pawl 10 thleng an khua Khawbungah a kal a, chumi hnuah pawl 12 chu Auxillium HSS Aizawl atangin a zo a, Pachhunga University College atangin B.Sc (Mathematics) a zo leh a ni. Mizoram University atangin M.Sc (Mathematics) a zo bawk a ni. B.Sc leh M.Sc ah hian University topper niin Gold Medal a la ve ve a ni.

Hmingmawizuala, MCS 2017 Topper