Monday, 21 September 2015

21st September 2015 (Monday) news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM

*JHARKAND LEGISLATIVE ASSEMBLY HNUAIA PUBLIC ACCOUNT COMMITTEE IN MIZORAM RAWN TLAWH
Ni. 19.9.2015 khan Jharkhand Legislative Assembly a Public Accounts Committee te chuan Study Tour neiin Mizoram an rawn thleng a, ni 22.9.2015 hian an ram lam panin an haw leh ang.

He Assembly Committee hian vawiin khan Mizoram Legislative Assembly Speaker Pu Hipheia chu a Pisa ah hmu in titi hona an neihpui a, Speaker hian ngaihhruina thilpek a lo pe a ni, Hemi hnu hian Mizoram Legislative Assembly a Public Accounts Committee Member te nen Joint Sitting an nei a. State pahnih-a Committee hnathawh dan chungchang te sawihoin, inzirna tur an neih ang ang te leh thil pawimawh dangte an sawi ho a ni. (DIPR)

*ZU RUI MI 28 MAN
Mizoram Excise te chuan August 2015 chhung khan Zu rui mi 208 an man a, Zu zuar mi 97 an man bawk. Rakzu 2562.625 litres & 9 packs an man a, Asenchi (MFL) um 303 leh beer um 12 an man a, Zu bilhlai tin 6080 an man bawk.

*MIZORAM POLICE CONSTABLE (UNARMED) LA DAWN
Mizoram Sorkarin Mizoram Police Manual one time relaxation hmanga a phal angin Mizoram Police Constable (Unarmed) mi 20 a la dawn a Law and order kenkawh-ah hian pa lian leh chakte hi an tangkai bik hle a, hei hi hriain sorkar chuan fit 6 (182 cms) aia sang hlir 20 (an daih loh chuan fit 5 leh inches 10 (178 cms) chin chunglam) lak tha a ti a. Anni hi khawpui chhunga duty bik tur an ni anga. a tul erawh chuan hmun dangah pawh duty tir theih tho an ni thung dawn a ni. He Police Constable hna a lut turte chu HSLC leh a tlukpui pass, September 30, 2015 a kum 18 leh 28 inkar (SC/ST tan chuan kum 33 thleng) an ni tur a ni a. middle school a zir chin ang Mizotawng an ziakin an chhiar thei tur a ni bawk.

Dilna form hi District SP Office pariat leh PHQ atangin ni 23 September atangin office hun chhungin Rs 50/- zelin lakchhuah theih a ni a. Hriattur tulte chu dilna form-ah ziahlan a ni. Dilna chu a tul anga ziahluh turte ziah luh hnuah 3rd BN MAP Ground, Mualpui-ah Ni 12 Oct, 2015 Dar 10-ah thehluh a, medical test neih nghal tur a ni dawn a, a tlingte chuan ni 14 atangin physical test - Long Jump (3.30 mtrs), High Jump (1 mtr), 1 Km Run (minute 5 chhung), 100 mtrs (15 secs. chhung) te test anni leh ang a, heta tlingte hian written test leh personal interview neih leh tur a ni ang. Hriatchian duh nei chuan AIG - 1 Office, Police Headquarters, Khatla, Aizawl-ah zawhfiah theih a ni. Mizoram Police website www.police.mizoram.gov.in-ah en theih a ni bawk. (DIPR)

*LIRNGHING VANGIN MI SANGKUA IN IN LEH LO CHAN
September ni 16 a 8.6 magnitude a chak a Chile a lir a nghin avangin mi 9000 chuang in in leh lo an chan. Mi 13 chin hriat loh in an awm mek.

*CSS HINDI TEACHER TE HLAWH TUR NAWRIN SORKARIN THEIHTAWP A CHHUAH RENG
CSS Hindi Teacher te hlawh chungchanga School Education Department thuchhuah chu a hnuai ami ang hi a ni.

Tun hnaia tualchhung chanchinbu thenkhata lo lang CSS Hindi zirtirtuten thla 7 hlawh an la tawh lo tih chungchangah thil awm dan chu hetiang hi a ni.

Mizoram sorkar chuan CSS Hindi Teacher te hlawh atana sum dilna (sanction proposal) chu Govt. of India-ah thehlutin a tul apiang a bawhzui zel a, theihtawp a chhuah mek. Hindi teacher-te hlawh atana sum dil kawngah hian Ministry of Human Resource Development (MHRD), Govt. of India chuan kumdanga a phut ngai loh thil chi hrang hrang a rawn phut a. An thil phut chi hrang hrang thehluh anih hnuah pawh duh angin hna a kal chak mawh hle mai a, a hma thei ang bera nawrchhuah tumin Mizoram sorkar chuan a nawrzui zel a ni.

Hindi Teacher-te hlawh tur dilna thehluh dawn hian a hmaa sum hmuh tawh hmanna audit certificate thil tel a ngai zel a, hetiang anih avang hian Accountant General Mizoram-in min audit zawh veleh an hlawh tur proposal hi Govt. of India-ah audit certificate nen thehluh nghal a ni. AG hian Audit calendar ang pawh ni lovin Department in hmanhmawh a ngenna a hriatthiampui avangin audit hi min tih hma sak nghe nge a, a lawmawm hle. Proposal hi School Education Department-a official-ten Audit certificate nen thlap Ministry of Human Resource Development (MHRD), Govt. of India-ah Dt 22.4.2015 khan thehlutin an nawrzui zel a ni.

MHRD ah hian Languages (Hindi teaching scheme) khawihtu officer-te Ministry dangah transferred an ni a, Officer thar, mi thar, a hma lam thu hre loten an khawih avangin file a kal chak mawh hle. Rei tak proposal an enfiah hnuah kum danga an la phut ngai loh, High School leh Middle School Hindi Teacher list leh contact number-te MHRD hian a rawn phut thar a. Hei pawh hi OSD Mizoram House, New Delhi kaltlangin Dt 23.7.2015 ah thawn a ni.

MHRD chuan an ngaihtuah zel a, State sorkar pawhin bawhzui ngai apiang a bawhzui reng bawk a, chuti chung chuan Dt 7.9.2015 ah MHRD chuan thil pahnih - CSS Hindi Teachers 1305 te tan Govt. of India-in approval a pekna leh Heng mite Department-in a chhawr avanga State-in a hlawkpuina (Progress report leh physical achievement) thehlut turin Mizoram sorkar a rawn hriattir leh a. Heng an thil phutte hi Dt 10.9.2015 ah chhanna peihfel a ni a (vide No.A.11013/8/2015-EDN Dt 10.9.2015) Dt 11.9.2015 ah Minister, School Education Department-in Delhi-ah a keng nghal nghe nghe a ni.
School Education Minister, Parliamentary Secretary leh Department official-ten Hindi teacher hlawh tur dilna hi bawhzuiin an ngaihven reng a. Department chuan a tih theih a ti nghal zel a ni.

Sorkar kalphung leh thawktu inthlak danglam nasa tak kan tawng a. MHRD ah phei chuan he lam khawihtu Section Officer, Under Secretary, Deputy Secretary, Economic Adviser, Director, Joint Secretary, Additional Secretary, Secretary thlengin mi thar an ni a, eng stage-ah pawh hian thil hrechiang turin hun an mamawh niin a lang.

CSS Hindi Teacher te hlawh tur nawr hian School Education Department chuan theih tawp a chhuah reng a ni.

*SAUDI INDO THLAWHNA TEN YEMEN BEI ZEL
Saudi Arabia leh an tanrual pui Arab ram te indo thlawhtheihna ten Yemen hmarthlang lam Sa'ada an beihna ah mi 50 chuang an boral. Lamtluang thulakna in a tarlan danin Saudi leh Arab tangrual te indo thlawhtheihna ten Yemaen an beihna ah hian tunhnai ah mi 100 chuang in nunna an chan a ni. Ram pahnih buaina avang hian mi 5300 chuang in nunna an chan tawh a, mi sang tam takin hliam an tuar bawk a ni. He inbeihna ah hian India mi hnathawk a awm thenkhat te pawh in nunna an chan a ni.

*TRIPURA AH NLFT HEL 3 MAN
Niminpiah zan khan Tripura police ten National Liberation Force of Tripura(NLFT) zing a mi 3 an man. Lamtluang thulakna in a tarlan danin heng zinga mi 2 te hi Bangladesh ramchhung Japui thingtlang khua atangin an man a, pakhat dang chu Sepahitala khua atangin an man a ni.

*INDIA LEH PAKISTAN IN LOC AH MEETING NEI DAWN
Vawiinah India leh Pakistan sipai hotute chuan Jammu and Kashmir a Poonch hmuna Chakan da Bagh a Line of Control (LoC) ah ramri kan chungchang a inremna neih tumin inbiakna an nei dawn. Lamtluang thulakna in a tarlan danin he inbiakna hi sipai brigade commander level ten an nei dawn a ni.

*TURKEY TUIPUI HNAIHAH RALTLAN TE LAWNG KEHCHHIA
Nimin khan Islamic State firfiak te hlau a tlanchhia raltlan te chuanna lawng Turkey tuipui hnaih ah a keh avangin raltlan mi 13 an thi. Lamtluang thulakna in a tarlan danin he lawng keh ah hian mi 46 an chuang a, mi 29 te chu chhanchhuah an ni a, thi zingah hian naupang 4 an tel, midang 27 te chu chin hriat loh in an la awm a ni. He lawng kehchhe ta hian Greek thliarkar Lesbos an pan laiin lawnglian nen an insu palh a ni.

20th September 2015 (Sunday) news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM

*GREECE INTHLANAH ALEXIS TSIPRAS PAWL TE CHAK
Tunhnai a an ram economy chhiat avanga buai tak Greece ram inthlanpui neih zawh takah Prime Minister hlui Alexis Tsipras a pawl Syriza party te chuan hnehna an chang. Lamtluang chhiartu ten in hriat atan Greece hian kum 6 chhung in inthlanpui vawi 5 an hmachhawn hman a ni. Vote hi chhiar mek a nia vote tla 60% chhiar tawh ah Syriza party in 35% an hmu a, sorkar lai New Democracy party chuan 28% an hmu a, Golden Dawn party ten 7.1% an hmu a ni. Alexis Tsipras a party te hi chak a puan a nih tawh na chhan chu Independent Greeks party ten thlawp an tum thu an sawi vang a ni. Hetiang anih chuan Greece hian an PM hlui August a bangta Alexis Tsipras chu PM thar atan an nei leh dawn nii a lang ta a ni.

 
*EIFFEL TOWER AH PAWIKHAWIH TUM AWM VANGIN KHAR
Paris khawpui a khualzin ten an tlawh nasat em em khawthlirna sang tak Eiffel Tower chu mi pakhat ralthuam keng ni a hriat lawn ru a awm ni a an hriat avangin khar a ni. Lamtluang thulakna in a tarlan danin Eiffel Tower hi Muslim firfiak pawl ten beih tumin an lo vau fo tawh thin a ni. France ramah hian kumin January thla a Charlie Hebdo office Muslim firfiak ten an beih hnu atang khan inralrinna an nei nasa hle a ni.

 
#‎EPL‬ RESULT UPDATE
Southampton 2-3 Manchester United (Full time)
Liverpool 1-1 Norwich City (Full time)

 
*POPE FRANCIS AN CUBA AH MASS A THEH
Roman Catholic Puithiam luber Pope Francis chuan Cuba khawpui Havana a kawtthler lar tak Revolutionary Square ah open air mass a theh. Lamtluang thudawn danin Pope Francis hian mass a theh lai hian Cuba ram mite tawng hmang Spanish a hmang a, an ram tlawh tu Pope te zinga Spanish hmang hmasaber a ni. Revolutionary Square a mass thehna ah hian Cuba President Raul Castro pawh in a telpui a ni. Pope Francis hian Raul Castro leh Cuba hruaitu hlun Raul Castro unaupa Fidel Castro te a hmu dawn a ni. Pope hian a thusawina ah "Ngaihtuahna chauh nilo in a takin mipui te rawngbawl sak rawh u" a ti a ni.

 
*INDIA CRICKET HOTUPA BORAL
Zanin dar 8 vel khan Board of Control for Cricket in India (BCCI) President Jagmohan Dalmiya chu lunglam tha lo avangin Kolkata ah a boral. Lamtluang thulakna in a tarlan danin Jagmohan hi Ningani khan B.M Birla Hospital ah admit a ni. Amah hi kum 75 a upa a ni.

 
#‎Bundesliga‬
VfB Stuutgart 0-1 Schalke 04 (Full time)
Dortmund 1-0 Bayer Leverkusen (23 mins)
Fc Augsburg 0-0 Hannover 96 (23 Mins)

 

#‎F1‬
Singapore Grand Prix vawiin a tlan zawh takah Ferrari driver Sebastian Vettel chu 1-na a ni. 2-na Daniel Ricciardo - Red Bull, 3-na Kimi Raikkonen - Ferrari, 4-na Nico Rosberg - Mercedes, 5-na Valtteri Bottas - Williams.

*NEPAL IN DODALNA KARAH RAM DANPUI HMANG TAN DAWN
Vawiinah khan Nepal President Ram Baran Yadav chuan an ram danpui siamthar chu a tak a hman theih turin hming a ziah hnan ta. Lamtluang thulakna in a tarlan danin an ram danpui (constitution) hi secular leh democratic tur a duan a ni a, kum 7 chhung ngawt an ram lal ten mipui te hnen a thuneihna an hlan hnuah he dan nei tur hian harsatna chi chi hrang hrang an lo kaltlang tawh a ni. Madhesi pawl te chuan he dan thar hi duh lo in buaina nasa takin an siam thin a ni. An ram dan thar in a duan angin an ram rorelna Upper House ah member 60 an awm ang a, Lower house (house of representatives) ah member 375 an awm thung ang. Nepal ram danpui ah hian 37 divisions, 304 articles leh 7 annexes a awm a ni.

*SENIOR DEPARTMENT INKHAWMPUI HMANG
Vawiin ah Mizoram Presbyterian kohhran Pastor bial thenkhat chuan Senior department inkhawmpui an hmang mek a, bial thenkhat ah pawh Naupang inkhawmpui hmang an awm bawk.

*LAHPET THOKE (LAPHETAUH)
Mizo ten Burma ram atanga eitur kan hmelhriat 'laphetauh' kan tih mai hi "Lahpet Thoke" a ni a, a lamdan dik chu 'la-pei-toe' tih a ni. Lamtluang page chhiartu ten in lo hriat atan Lahpet Thoke an telh thingpui hnah hring (green tea) leh 'thoke' (chawtani) inchawhpawlh a ni, a chawtani ah hian badam kan, be zailep, chhawhchhi, thlai kan ro, kaikuang te chi, tomato, sawhthing etc te hman a ni. Thingpui hnah hring hi an chhum so phawlh a, chu chu mau thei ah tawt takin an hnawh a, an um thin a ni. Tunhma chuan 'Lahpet thoke' hi Burma lal leh lal indo ten inremna thuthlung an siam zawh ah remna entir nan an ei ho thin a ni.

Lahpet thoke/Laphetauh
 
#‎EPL‬ SUNDAY FIXTURE
Tottenham vs Crystal Palace (6PM)
Liverpool vs Norwich City (8:30 PM)
Southampton vs Manchester United (8:30)

*SUNHLU THAT ZIA HI I HRE VE TAWH EM?
Mizo ten sunhlu kan tih hi khaw thenkhat ah chuan 'sinhlu' te pawh an ti bawk. Hindi chuan 'Amla' emaw 'Amlakka' an ti a, Saptawng chuan 'Indian gooseberry' an ti. Sunhlu ah hian Vitamin C a tam em em a, Vitamin C mamawh te tan a hel a ei mai theih a ni. Lamtluang page chhiartu ten in lo hriat atan Sunhlu hi hritlang leh hrawk na atan pawh a tha em em. Ka chhung ulcer nei tan ei a tha bawk. Ek chhuah harsatna nei tan sunhlu ah fibre atam avangin ei a tha hle. Mit chaklo tan ei atha a, pumpui thalo tan pumpui ah acid level a siamthat theih avangin chaw pai tawih a ti awlsam bawk. Meizu mi leh zuk leh hmuam ti thin tan pawh ei a tha. Sunhlu hian thisen a ti thianghlim thei a HB hniam leh RBC nei tlem te tan ei a tha em em bawk. Taksa a chemical thalo toxin a ti ral thei bawk. Taksa tan Sunhlu hi damdawi tha tak a lo ni e.


#‎EPL‬ SATURDAY RESULT
Swansea City 0-0 Everton
Aston Villa 0-1 West Brom
Stoke City 2-2 Leicester City
Bournemouth 2-0 Sunderland
Newcastle 1-2 Watford
Manchester City 1-2 Wesh Ham
Chelsea 2-0 Arsenal

*EGYPT IN PRIME MINISTER THAR NEI
Nimin khan Aigupta ram (Egypt) Prime Minister thar atan Sherif Ismail chu rinawmna thu tiam tir a lakluh a ni. Lamtluang thulakna in a tarlan danin Ismail hi sorkar hmasa a minister of petroleum and mineral resources changtu ani thin a ni. Prime Minister thaer hian cabinet member 33 a nei dawn a, an zingah hian hmeichhia 3 an tel ve a ni. PM hlui Ibrahim Mahlab chu September ni 12 khan a ban avangin Sheriff Ismail hi amah thlaktu atan lakluh a ni ta a ni.

*INDIA BADMINTON THIAM AJAY CHAK ZO TA LO
Vawiin a BWF Korea Open Championship khelh zawh takah India badminton khel thiam Bengaluru tlangval Ajay Jayaram chuan mipa single final ah a tumpuipa China mi Cheng Long chu 14-21,12-21 in a hneh zo ta lo a ni.
 
*SORKAR IN BETHANY HOSPITAL PAWM
Mizoram sawrkar chuan Bethany Hospital, Mission veng, Aizawl a mi chu tunhnai khan a pawm (recognise) a, he damdawiin a inenkawlna te sawrkar ah a bill let ve theih tawh ang. (zalen.co.in)

*UPC IN RINGTHAR 400 CHUANG NEI
UPC kohhran Missions Board chu Nilaini atanga Zirtawpni inkar khan an thukhawm a. Field 7 enkawl mekin ringthang 408 an nei tawh.

General Missions Secretary Evan. P.C. Lalrokima chuan report pein North East India huam chhungah Field 8 enkawl thin chu Chhimtuipui district kutah July 26, 2015 khan Chakma Missions Field chu hlan a nih tak avangin field 7 enkawl mek a ni a. January leh September inkarah Missions Field atang member thar 408 lawmluh an ni.

Kumin budget kal mekah 44% a lut tawh a, Missionary chawmna Partner in Missions (PIM) bikah budget ruahman atangin 78% a lut tawh bawk.

Meeting-ah hian Manipur tualchhung buaina avanga member kal thei lo tih loh member an kal kim a, Hmarchhak state hrang hrang bakah Andaman & Nicobar Island atangin member an kal bawk.
Field 7-a thawktu Field Director ten an report an pe. Dimapur, Odisha leh North Bengal Sikkim Missions Field-a thawktu lakte approve an ni a, thawktu mi pali regularised an ni bawk.

Board-ah hian Licence dilna chung-chang, Contract Workers te lawmman tihpun dan turte an ngaihtuah a. Guwahati-a building sak tur chungchang leh Dimapur Building Committee rawtna thlen chungchang te an ngaihtuah bawk a. Heng bakah hian kum 2016 budget tur siamin 2016 Missions Field Plan & Budget-te an thlirho nghal bawk a ni. (zalen.co.in)

*SYNOD IN LUNGLEI AH HOSPITAL HAWNG DAWN
Presbyterian Kohhran Missionary Doctor hmasa ber hming chawia din, John William Hospital, Lunglei chu October 1, 2015 hian Rev. Lalramliana Pachuau, Executive Secretary-in hawnna leh Pathian hnena hlanna a nei dawn.

A hawn ni hian Lungleia MJA te, Civil Hospital leh BCM Serkawn Hospital bakah Chhim lama Pastor leh Pro. Pastor te leh mi thahnem tak sawm an ni a. A tuk (October 2)-ah Free Clinic neih a ni nghal ang.

John William Hospital-ah hian HDC Electrolyte Analyser te, Swelab (Cell Counter) te, Photo Meter 5010, X-Ray CR System, Ultrasound, ECG, puansuk khawl lian chi, Auto Clave, inzaina theater (a/c awm), Nau neihna Ward leh NICU felfai tak leh tunlai khawl changkang tak tak te chu hman theiha peih a ni tawh a ni.

Hawn theih turin thawktuten chak takin hma an la mek a, a room vel pawh felfai leh thianghlim taka duan tur a ni. (zalen.co.in)

*BCM IN BEIRUAL THUPUI ZIR TAN DAWN
Mizoram Baptist Kohhran chuan kum tina an hman thin angin September thla tir atangin Tualchhung Kohhran ten Crusade/Camping leh House Fellowship, Home Visit, etc. siamin Beirual Programme a hmang mek a. Karleh Thawhtan zan September 21 atang hian Beirual thuzir tan a ni ang. Kumin Beirual Thupuiah “Mizoram Kristiante leh Tunlai Khawvel” tih thu, mi hrang hrang ziak zir a ni dawn a ni. (mizobaptist.org)

*KOHHRAN UPA TEN TRAINING NEI
Synod Family Guidance & Counselling Centre chuan Thawhleh zan atang khan Synod Conference Centre-ah Church Leaders’ Intensive Residential Pastoral Care & Counselling Training vawi 23-na an buatsaih a, he training hi August 19, 2015 khan an zo a ni.

Training hi Rev. Lalramliana Pachuau, Executive Secretary i/c FG&CC-in hawngin thuchah a sawi a.Training-a tel tur hian Pastor Bial 8 – Lallen, Vairengte, Kawlkulh, Khawbung, Lunglei Venglai, Phullen, Khawzawl Vengthar leh Lungdai Bial chhunga Kohhrante koh an ni a, mi 28 an tel.

Training-ah hian Rev. R.Lalhmingthanga, Director, FG&CC; Rev. Zothansanga, Luangmual; Rev. C. Rosiama, Mission Veng; Rev. Vanlalchhunga, Tlangnuam leh Dr. Ruth Lalmuanpuii, Civil Hospital Doctor ten zirtirna pein an thuziak an ziho ni.

FG&CC hian tunah hian Counselling Centre paruk an nei a, client an neih tawh zawng zawng hi mi 13,131 niin, kumin 2015-ah hian client 1,996 an nei tawh bawk a ni. (zalen.co.in)
 
*POPE IN CUBA RAM TLAWH
Nimin khan Roman Catholic hruaitu luber Pope Francis chuan Vatican atangin Cuba khawpui Havana a thleng. Lamtluang thulakna in a tarlan danin Pope hi Cube President Raul Castro an airport ah a lo hmuak a ni. Pope hi Cuba ah hian ni 4 a cham anga chumi hnuah US a pan leh ang. Kum 2012 khan Pope hmasa Benedict XVI khan Cuba hi a lo tlawh tawh bawk a ni. Pope Francis hian Havana a Revolution Square ah mass a theh dawn a ni.
 
*RAM TAN CHAWNGHEIIN TAWNGTAI DAWN
Mizoram Baptist Kohhran Assembly roreln-a-in a lo rel angin, September 26, 2015 (Inrinni) khian Ram tana chawnghei tawngtai nilengin neih a ni dawn. Programme hi chawhma dar 11:00 atanga tanin tlai dar 6 thleng tur a ni a, zanriah nghei tur a ni. He hun ruat hi inkhawm anga hman tur a ni ang a, Detailed Programme chu Tualchhung Kohhranin tul leh tha a tih angin a siam ang a, tawngtai thupui siamte hi kaihruaituin sawi zauvin, tawngtai thupui dang pawh thawh belh theih a ni bawk ang. Hun hman dan tur chu hetiang hi a ni ang. (mizobaptist.org)
 
*KRISTIAN CHHUNGKAW HAPTA HMANG DAWN
Mizoram Presbyterian kohhran te chuan Beihrual programme kal zelah September ni 21-27 chhung hian Kristian Chhungkaw Hapta an hmang dawn a, zantin Kristian chhungkaw pual bik a thupui thlan an zirho ang. Tin, September ni 1-6 chhung khan zantin Ramthar hapta an lo hmang zo tawh bawk a ni.

Sunday, 20 September 2015

19th September 2015 (Saturday) news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM

*SAKEI THAU DUH VANGIN SAKEI THAT
Madhya Pradesh a thingtlang khaw pahnih Sakhai leh Itarsi a mi pahnih te chu sakei thau an duh avang a sakei that a puh annih avangin man a ni. Lamtluang thulakna in a tarlan dan in heng mi pahnih te hian tualchhung damdawi siam nan tiin sakei hi an that ni a hriat anni a, Special task force ten an hnen atang hian sakei thau um 2 an man sak a ni. Sakei thau ni ngei a hriat um 2 hnih te hi Centre for Cellular & Molecular Biology (CCMB) Hyderabad leh Wildlife health monitoring centre (WHMC) Jabalpur ah enfiah tur a thawn a ni. Heng thingtlang khawmite hian sakei thau hi thak damdawi leh mipatna hmang tha theilo te tan damdawi ah an hmang thin ni a sawi an ni.
*MIZO TLANGVAL IN POLAND AH PAPER PRESENT
International Conference lian, professor leh scientist a sang tela inhmuhkhawmna, EMRS Fall Meeting 2015, Warsaw University of Technology, Warsaw, Poland ah Tv. Krista Roluahpuia, Pu K.Liannawla fapa, Mualbu (L), Lawngtlai District tuna IIT - Bombay a Ph.D (Physics) zirlai mek chuan 15-18 September 2015 khan paper pahnih a zu present. 

Lamtluang in kan zawh chianna ah a paper pakhat zawkah chuan Ge1-xSnx quantum heterostructure chhunga atom inremkhawm dan a zir chian chu a present a. Molecular Beam Epitaxy hmanga quantum heterostructure nei tura atom an remkhawm dan te, tin a bik takin temperature hniam lutuk atom an rem avanga thil lo danglam bik dan te leh Atom te chu tha chakna, entirnan lumna hmanga tha an pekin engtin nge an lo danglam tih a zirchianna chu a zu present a ni. 

Lamtluang page chhiartu ten in lo hriat duh takin a paper pakhat zawkah chuan Ge1-xSnx chu quantum well anga siamin a chhah zawng chu de Broglie wavelength(electron wavelength anga ngaih pawh a pawi lutuk loang kan hriatthiam theih zawngin) ang leka panin Molecular Beam Epitaxy hmangin atom chu temperature hniam lutukah an remkhawm leh a. Chutah chuan electron emaw exciton emaw chu mihringte anga dimension thum khawvela awm thin kha dimension hnihah chauh an awm tir a. An energy zir tur pawhin quantum mechanics takin zir a lo ngai ta a, a hmaa energy continuous nei thin kha a lo bung(discrete/­quantize) ta a. Chumi avang chuan an energy density states pawh grapah kan plot chuan step angin a lo awm ta a ni. Chu chuan tangkaina tam tak a nei a. Atomic scale transport properties lama a nghawng dan te, eng lam(optical properties) lama thil tha zawk a thlen theih dan leh mihring ten kan hman tangkai theih dan tur Tv Krisa hian a zirchianna leh mi tihdikloh lai nia a hmuhchhuahte chu a present a ni.

Lamtluang in kan rawn sawi tawh angin Tv Kris-a hian a thil zirchian tharte leh mi zirchian dan fuh chiah lo nia a hmuhchhuahte a zu present a. Lamtluang zawhna chhangin Pathian avang liau liauin tha takin a present thei niin a sawi. Mi tihdikloh laite sawichhuah avangin zawhna khirhkhan deuh deuhte pawh a tawng a mahse Pathian zarah tha takin a chhang a. Thian tam tak a siam belh a, a thusawi zawhah phei chuan a thusawi chhimtute pawhin an umzui ve a, professor thenkhat te pawh an tel a. High tea neih laiin rei tak an titi ho a nakin zela hna thawh ho dan turte pawh an sawi a ni. Anmahni symposia a thusawitute zawng zawng kha professor, scientist puiting leh postdoctoral vek an ni a, a ni lo zawnga ngaihtuah chuan a zamawm tep niin a sawi a. Mahse a thil zirchianna chu tha nia a hriat avang leh hetiang hun tha a chang chu vannei a in ti a, phur takin a present tling tla ta a ni. A sawi danin India ram ang lo takin thusawi laiin an polite a, nuam ti hle a ni.

Tv Kris-a hian a sikul kal tawhna apiangah sikul tihmingthatu a ni zel thin a. Examnaa a tihthat piah lamah hian Quiz conpettition, Science Seminar leh a dang tam takah a kal tawhna sikul a lo champion pui tawh thin a. National Children Science Congress ah phei chuab Baptist Higher Secondary School (BHSS), Boys Hostel a an tui hman dan a zirchianna chu A++ grade a lo hmuhpui tawh a. He grade hi North East ah chuan hmu hmasa ber leh awmchhun a ni. 

Lamtluang chhiartu ten in lo hriat atan Tv Kris-a hi chhungkaw harsa taka lo seilian a ni a. Ani chuan anu tawngtaina, apa rawngbawlna zar leh tlinglo taka mission field lamah kum tin thlakhat chhung a puih ve thin avanga hetianga Pathian malsawmna hi dawng niin a insawi a ni. A hmaa a sawi danin "ka hming hi hriat a awlsam avang leh harsa taka lehkha zir ka nih avangin miin ka chanchin tha laite mi fuih nan an hmang ve thin a mahse engmah ka nih bik loh zia hi ka inngaihtuah chhuak thin a. Khawngaih ngen chungin sawi tawh lo turin ka ti thin a. Mahse an sawi luih duh tlat chuan Pathian avang chauh a hetiang dinhmun thleng thei ka nihzia hi lo sawi tel ngei ngei ang che u tiin ka ngen thin" tiin a sawi a ni. Tin, hlawhtlinna a neih hian amah lo zirtir thintute vang a ni tih a pawm a, zirtirtu hlui, lo zirtir tawh thintute a ngaihtuah chhuak thin a, an chungah a lawm hle a ni.

Krista Roluahpuia IIT-Bombay
*MIZORAM SORKAR IN NAKKUM ATAN HOLIDAY 2 TIBO
Mizoram sorkar GAD thuchhuah in a tarlan danin nakkum 2016 atan Mizoram sorkar chawlh (holiday) ni thin zing ah Missionary Day (Jan ni 11) leh State day (Feb ni 20) te chu holiday atangin a thai bo.

#‎EPL‬ Result
Chelsea 2-0 Arsenal
*MAPUII SAM SIAMNA NEITU IN NE WOMEN ENTREPRENEUR AWARD DAWNG
Vawiin a IIM-Shillong a India hmarchhak a hmeichhe sumdawng hlawhtling te chawimawina NE Woman Entrepreneur of the Year (2013-14) Award an sem ah Mapuii Sam siamna neitu Lalhlimpuii Hmar, Aizawl chuan he award hi Mizoram atangin a dawng. Lamtluang thudawn danin he award hi Guwahati a Sreemanta Sankar Mission te buatsaih a ni. Lawmman dawngtu dang te chu - Lata Lepcha(Sikkim), Toko Likha Yaram (Arunachal Pradesh), T Jemima Achumi (Nagaland), Moiregthem Muktamani Devi (Manipur), Sukla Rani Debbarma (Tripura), Queency Thangkhiew (Meghalaya)leh Kanta Dey (Assam) te anni. Nikum khan KC Facepack neitunu pawh in a lo dawng tawh a ni.
Lalhlimpuii Hmar owner of Mapuii Sam Siamna, Aizawl, winner of NE Woman Entrepreneur of the Year (2013-14) Award

*AIZAWL - LUNGLEI KAWNG PING
Aizawl leh Lunglei panna National Highway - 54 chu Zemabawk a forest check gate hlui bulah leimin in a hnawhping. Zaninah motor kal theih a a tlang hman beisei a ni lo.

*CHIEF INFORMATION COMMISSIONER HOVIN KHAWRUHLIAN AH RTI CAMPAIGN NEI
Central YMA, Mizoram Information Commission leh Mizoram Legal Services Authority te tangkawpa huiahawt Right to Information (RTI) Act and Legal Awareness Campaign chu nimin nileng khan Khawruhlian Community Hall ah neih a ni a, Mizoram Chief Information Commissioner Pu Laldingliana’n a hmanpui.

Khuallian CIC Pu Laldingliana, IFS(Rtd) chuan thusawiin RTI chu mipui thuam chakna, mipui hamthat nana sawrkar hmalakna khalh ngiltu leh hlemhletna vengtu hmanrua tangkai tak a ni tiin sawrkar hnathawk leh mipui ten kan hriatchian a pawimawh hle a ni, a ti. RTI chu India khua leh tui zawng zawng, a duh apiangin an hman theih a nih thu sawiin langtlang sawrkar siam nan hmanraw tangkai a nih thu te a sawifiah bawk. Sawrkar hmalakna hrang hrangah mipui ten sawi theih kan nei ve a ni tih hriaa, mipui tana sawrkar hmalakna hrang hrang te dik tak leh fel taka thawh a nih theih nan RTI hmang tangkai theuh turin mipui te chu a sawm bawk a ni.

RTI Act leh Legal Awareness Campaign hi Pu K.Darthantluanga, Chairman, Legal Sub Committee, CYMA-in a kaihruai a, RTI chungchanga hriatchian loh lai te inzawtfiahin sawihona te neih zui a ni. Chalfilh Group YMA huama Branch YMA 18 te tana buatsaih a ni a, Group huam chhunga YMA member te, tlawmngai pawl hruaitute leh school zirlaite an tel a ni.

Chawhnu lamah Dan leh Hrai inzirtirna Legal Awareness Campaign neih zui a ni a, Advocate Pu Laltanpuia leh Advocate Pu J.Lalremruata Hmar ten zirtirna pe-in sawihona te neih a ni bawk. Chief Information Commissioner hian Khanpui ah khawtlang leh tlawmngai pawl hruaitute nen inkawmna hun hmanpuiin RTI pawimawhna leh hman tangkai dan tur te a sawipui bawk.
CIC hi MIC Secretary Pu Vanlalngena leh mi dang ten an tawiawm a ni. (DIPR)
*RATU-AH LO ZAWH RUNPUI
Nimin khan Agriculture Minister Pu R.Lalzirliana hovin Ratu khuah lo zawh runpui neih a ni a. Parliamentary Secretary Lt. Col. Z.S. Zuala, Govt. Deputy Chief Whip leh bialtu MLA ni bawk Pu RL Pianmawia leh Women Commission Chairperson Pi Lalawmpuii Chawngthu, MLA te’n he hun hi an hmanpui a ni.

Lo zawh runpui puala programme tawite buatsaihah thusawiin Pu R.Lalzirliana chuan khawvel changkang zelah Mizote khawsak phung pawh inthlak danglam zel mah se kan pipute hun atanga kan eizawnna pui ber lo neih chu tun thlengin a la pawimawh reng a. Mahni intodelh chu ropuina a ni tih leh kuthnathawh ngaihsanna nachang hria, mi taima heti zatin an thawh rah malsawmna an seng thei chu a lawmpui takzet thu a sawi a. An hlimna ni hmanpui tura an sawm chu lawmthu hrilhin hlim leh lawm taka hun hmang turin duhsakna a hlan a ni. Minister chuan tunlaia saza thi a awm fo thin chu a chhan chhui chian mek a nih thu leh natna hrik virus chi khat vang nia mithiamte’n an hriatthu he hunah hian a sawi a. Hei hi mihring tan pawha hlauhawm thei nia a lan avangin saza thi an hmu a nih chuan khawih lo tur leh Environment & Forests thawktute hnena report thuai turin mipuite a chah a ni.

Parliamentary Secretary Lt.Col.Z.S.Zuala pawhin Ratu khaw mipuite thawhrah buh hmun tha tak an hmu thei leh lo zawh ni hmanpui tura an sawm chu lawmthu a sawi a. An thawhrah thlirin Ratu khaw mipuite taimakzia a lang chiang hle, a ti.

Pu R.L.Pianmawia chuan ei leh bara intodelh mite an ropui a, Pathian thu zawm tute an ni, a ti a. Mizoram hmun dangte tana entawntlak tur khawpin mahni intodelh kawngah tan la lehzual turin a sawm a. Pi Lalawmpuii Chawngtu pawhin kuthnathawktute fuihin Agriculture mithiamte nena thawh hona tha neih chhunzawm zel a, an zirthiamna chhawr tangkai thiam turin a fuih a ni.

Ratu khawchhung atanga kilometre 8 dawna hla, Buallawn zau-ah lo zawh runpui hi hman a ni a. He hmunah hian chhungkaw 115 vel zetin lo an nei a. Buh thar rang, tai, an seng a ni. Minister leh a thawhpuite nen lo zawh leh buh seng hun hlimawm tak an hmang a, tlai lamah lo zawh ruai ropui tak an kil ho nghal a ni.

Lo zawh programme hi Agriculture Director (Crop Husbandary) Dr.C.Lalzarliana’n a kaihruai a. Buallawn zau hruaitu te, khawtlang hruaitu te, sawrkar department hrang hrang hotute leh khawtlang mipui engemawzatin he hun hi an hmang a ni. (DIPR)
*Congress Vice President Rahul Gandhi chuan Bihar inthlan lo awm tur atan tunah hian mipui hmaah thu sawiin campaign hmasaber a tan ta.
*LEHKHABU THAR TLANGZARH
Denish Lalmalsawma Vuangtu lehkhabu ziah 'Panlai Nun' tih leh 'Vangkhawpui' tih chu vawiinah PUC Mizo Dept. HoD Pi Vanlalauvi Chawngthu chuan a tlangzarh. Lamtluang thudawn danin lehkhabu tlangzarh na hi I&PR auditorium, Aizawl ah neih a ni
Denish Lalmalsawma Vuangtu - Mizo Book Release function, Aizawl

Saturday, 19 September 2015

18th September 2015 (Friday) news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM

*MIZORAM COLLEGE ZIRTIRTU 7 PROFESSOR AH KAISANG
MPSC chuan vawiin khan Mizoram sorkar hnuai a College zirtirtu 7 te chu Associate Professor (Stage -4) atangin Professor ah a kaisan tir. Chungte chu:

1.Dr.Vanlalhruaii, Dept of Education, Principal, IASE
2.Dr.J.Zorema, Dept of History. Govt.JB College
3.Dr.S.Haukhanlian Mate, Dept of History, Govt.Saitual College
4.Dr.C.Lalthlengliana, Dept of History, Govt.Aizawl West College
5.Dr.Vinod Kumar Bharati, Dept of Chemistry, Govt.Kolasib College
6.Dr.B.Zoliana, Dept of Physics, Govt.Ziritir Residential College
7.Dr.R.Lalnuntluanga, Dept of Economics, Govt. Aizawl North College
*NETAJI SUBHAS CHANDRA BOSE FILE HLUI TLANGZARH DAWN
Vawiinah West Bengal sorkar chuan India ram zalenna sualtu lar ‪#‎Netaji‬ Subhas Chandra Bose file pawimawh tak tak x-file te chu mipui te hmuhtheih turin an tlangzarh dawn. Lamtluang thulakna in a tarlan danin heng file an tlangzarh tur ah hian Netaji chu kum 1945 ah Taiwan a thlawhtheihna chesual a thi anga chhinchhiah nimahse kum 1964 thleng a dam a ni tih lanna file te pawh a tel dawn ni a sawi a ni. File an tlangzarh tur zingah hian kum 1941 January ni 16 a Netaji an house arrest a pumpelh dan US intelligence te report pawh a tel dawn bawk in sawi a ni.
 
*FIFA ZIAKTU LIAN SUSPEND A NI
Fifa secretary general Jerome Valcke chu eiru a puh anih avangin chawlhtir a ni. Lamtluang thulakna in a tarlan danin Valcke hi world cup thlengtu tur ram thlan chungchang a pawisa a inthamna thubuai ah a inrawlh ve ni a sawi a ni. Kumin May thla atang khan Fifa hotu thenkhat zingah eirukna awmin hriat a ni a, Swiss police ten Zurich khawpui a hotel pakhat an luhchilh hnuah Fifa hruaitu thenkhat te thubuai siamsak anni. Hman deuh lawk khan Fifa president Sepp Blatter pawh eiruk thubuai avang hian a bang tawh a nih kha.

*CHINESE HMEICHHE RIL ATANGIN LUNGHLU LACHHUAK
Chinese hmeichhia kum 39 a upa Jiang Xulian ril atangin lunghlu 6-carat gemstone chu doctor ten an lachhuak. Lamtluang thulakna in a tarlan danin Jiang Xulian hian Jewelry fair an kalna ah lunghlu arukin a dawlh a, mahse a thianpa nen Thalailand pan tura an kal laiin Bangkok a Suvarnabumi airport x-ray na ah a taksa chhungah phalloh thil a pai tih alan avangin police ten an man a, a hnuah a inpuang ta a ni. A lunghlu dawlh chu doctor ten an lakchhuak sak ta a, a hlut zawn chu $278,000 hu vel a ni
 
*KAWNPUI BANGLA VENG LEIMIN THENFAI AVANGA NH-54 A LIRTHEI TLAN DAN TUR SIAM
Kawnpui Banglaveng-a Leimin, NH 54 kawngpui hnawhtu chu lirthei kaltlang theiha sial tlang ni tawh mahse, tawlh leh thei mai thei dinhmuna a din reng tho avangin tunkar Zirtawpni atang khian nitin a thenfai hna thawh a ni dawn a. Hnathawh hunchhung darkar siamin, chumi hunchhung chuan Lirthei eng chi mah kaltlang tir phal a ni dawn lo.

PWD NH leh SDO(C), Kawnpui ten ruahmanna an siam angin nimin khan Lirthei kal theih loh tur hun chhung darkar chu tihfel a ni a, tunkar Zirtawpni atang khian hman nghal tur a ni ang. SDO(C), Kawnpui chuan Leimin thenfai hna thawh anih chhunga khualzin te kawng laka an tan reng lohna turin Lirthei Service te pawh insiam rem turin a chah nghal bawk. A hnuaia tarlan ang hian hnathawh hun chhung leh Lirthei dan hun chhung siam a ni a, hei hian tun thla chhung a huam ang. Nitin (Sunday tiam lohin) : Chawhma dar 10:00 AM to Chawhnu dar 1:00 PM Sunday (Pathianni) bikah : Zing dar 8:00 AM to Chawhnu dar 1:00 PM Lirthei dan hun chhung nitin darkar 3 leh Sunday bikah darkar 5 chhung tih loh chu engtiklai pawhin Lirthei kaltlang theih reng a ni thung ang. (DIPR)

*India ram khawpui Delhi a dengue natna darhzel chungchang ah Delhi High Court chuan sorkar laipui leh Delhi sorkar chu engtiang in nge hma an lak tih September ni 24 hma a sawifiah turin a hriattir.

17th September 2015 (Thursday) news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM
*NATIONAL OPEN ATHLETICS CHAMPIONSHIP TAN
Nimin khan Sports Authority of India complex, Salt Lake, Kolkata ah National Open Athletics Championship vawi 55-na chu tan a ni. Lamtluang thulakna in a tarlan danin state hrang hrang atanin infiammi 968 an fuankhawm a ni. Heta tel tam zawk te hian Rio a Olympic lo awm tura tel theih ngei tumin he intihsiakna hi an bei dawn niin ngaih a ni. Mipa leh hmeichhia category ah inelna 44 siam a ni. September ni 19 ah khar a ni ang.

*NAGA HEL NSCN(K) TE KUM 5 CHHUNG ATAN DAN PAWLAH HNAWL ANNI
Nimin khan India sorkar laipui chuan Naga hel pawl Nationalist Socialist Council of Nagaland-Khaplang (NSCN-K) te chu kum 5 chhung atan dan pawnah an hnawl. Lamtluang page chhiar thin tu te chuan in hriat tawh angin thla hmasa lawk pawh khan NSCN(K) te hian Manipur ah India sipai te rawng takin an that a nih kha. NSCN(K) hotupa SS Khaplang he a pawl te hi Burma ram chhungah an in kulh a, India ram ah buaina an rawn siam thin a ni.

*R. ROMAWIA’N MIZORAM EDUCATIONAL JOURNAL A TLANGZARH
Mizoram Educational Foundation te buatsaih Mizoram Educational Journal chu nimin tlai khan Ritz Hotel ah Pu R. Romawia Minister of Higher & Technical Education etc chuan a tlangzarh.

Nimina a lehkhabu tlangzarh chu Mizoram Education kal zelna ah hmasawnna ni thei se a duh thu sawiin Pu R. Romawia chuan zirna leh thiamna atan hian senso a hniam thei lo va, kan dam chhung hian zir tawp chin a awm thei lo bawk, chuvang chuan kan hringnun kawngah hian Education hian hmun pawimawh tak a chang reng dawn a, a hre lo zawk leh thiamna duh a zir mek te kaihhruai zel chu Education lama thawkte chuan kan ram hmasawnna atan an mawhphurh na ah ngai thei se, zirlai te leh nu leh pa te pawhin Educational Journal chu tangkai takin hmang thei se a duhsak thu a sawi.

Book Release programme hi Dr. L.N.Tluanga, Chief Patron, Mizoram Educational Foundation in a kaihruai a. Dr. Sanny Tochhawng, Editor in Editorial report a pe a. Dr. Lalbiakdiki Hnamte, Gen.Secy in Journal preview neiin, Dr. C. Lalremruata, Chairman, Editorial Board in lawmthu sawiin hun a khar. (DIPR)

*HUNGARY SORKAR IN RALTLAN DUHLOHNA NASA ZAWK IN KALPUI
Lamtluang ah kan rawn tarlan fo tawh thin angin Hungary sorkar chuan an ram chhungah Africa leh Middhle East atanga Muslim raltlan te chu an ramchhungah luh an phlallo chhunzawm zel. Lamtluang thulakn in a tarlan danin nimin khan Seria leh Hungary ramri ah raltlan te hian Hungary ram a luh luih an tum avangin ramri vengtu police te nen an intibuai a, mittui tlakna hlo leh tui silaimu te in raltlan te kah anni. He an buaina ah hian Hungary police 20 in hliam an tuar a ni.
 
*AUSTRALIA IN ISLAMIC STATE FIRFIAK TE BEI TAN
Nimin khan Australia sorkar chuan Islamic State firfiak te indo thlawhtheihna hmangin a vawi khatna atan an bei tih an puang. Lamtluang thulakna in a tarlan danin Australia indo thlawhtheihna te hian Syria leh Iraq a IS hmun te an bei dawn niin an sawi. Australia hian tum 15 zet Iraq a IS hmun te indo thlawhtheihna hmang hian an bei tawh a ni
 
*KHAWKHENG TUARTE TAN MGNREGA NI 150 AH TIPUNG
India sorkar laipui chuan khawkheng tuarte tan ni 100 inhlawhna ti a hriat lar Mahatma Gandhi National Rural Employment Guarantee Act chu ni 150 ah a tih pun sak. Lamtluang thulakna in a tarlan danin nimin khan Union cabinet chuan thingtlang mite tih hmasawnnan Shyama Prasad Mukherjee Rurban Mission (SPMRM) hnuaia hman turin Rs. Vaibelchhe 5,000 a ruahman fel bawk.
 
#‎ChampionsLeague‬ ‪#‎UCL‬ result
Chelsea 4-0 Maccabi Tel-Aviv
Bayer Levkn 4-1 Bor
Roma 1-1 Barcelona
Dinamo Zagreb 2-1 Arsenal
Olympiakos 0-3 Bayern Mun
Dynamo Kiev 2-2 FC Porto
KAA Gent 1-1 Lyon
Valencia 2-3 Zenit St P
 
*SONIA GANDHI MAKPA AIRPORT AH SECURITY CHECK TUL VE TAWH DAWN
INC hotunu Sonia Gandhi makpa Robert Vadra chu kum rei tak India ram chhung a airport ah te security check tih buai ngai lo a lut tlang thei VVIP list ah telh a nih hnuah nimin khan he a vanneihna hi sorkar in a tih tawp sak. Lamtluang thulakna in a tarlan danin Pryanka Gandhi pasal Robert Vadra hian a facebook status ah Narendra Modi sorkar in airport security VVIP list a hming an la ti bo lo chu a nuihzat thu a tarlang a, hei hi aviation ministry chuan chhui zuiin a hming hi an paihsak ta a ni.

16th September 2015 (Wednesday) news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM
*AIZAWL SP THAR IN MAWHPHURHNA NA LA
Vawiinah khan Aizawl SP kalchhuak C.Laldina IPS hnen atangin Lalhuliana Fanai MPS chuan SP mawhphurhna a la. Lamtluang thulakna in a tarlan danin Aizawl SP kalchhuak C.Laldina hi DIG (Training) ah a awm dawn a ni.


*LO ZAWH RUNPUI NEI
District Agriculture Office, Mamit leh Chungtlang VC leh YMA buatsaihin vawiin khan Chungtlang khuain Lo zawh runpui an nei.


Lo zawh runpui hun hi Pu Malsawmtluanga, VCP Chungtlangin kaihruaiin, Agriculture Department Director Dr. C. Lalzarliana leh District Officer dang ten an telpui a ni. Agriculture lam hotute chuan hlawk zawka lo an neih theih dan tur te an sawipui bawk.

Chungtlang khua hi in 100 vel khua niin an khua atanga 2km vela hla Tuichhirthlekah zau Tin 250 vel a zau an nei a. He zau ah hian chhungkaw 70 in Lo an nei a, in khatin tin 3 vel theuh hmun an nei a ni. He zau panna atan hian NLUP hnuaiah link road laih a ni a. Lo zawh runpui ah hian khawnawta chhuakin, ruai buatsaih a ni bawk (DIPR)



*PEON HNA MI NUAIH 23 IN DIL, AN ZINGAH Ph.D ZA CHUANG TEL
Uttar Pradesh a State secretariat a peon hna an laktur 368 chu mi nuaih 23 chuang in dilna an thehlut. Lamtluang thulakna in a tarlan danin heng peon hna diltu te hian Lucknow khaw mipui chanve dawn thuak an zat a ni. Peon hna diltu tam tak te hi thiamna lamah chuan B.Tech, B.Sc, M.Sc leh M.Com degree neite annih bakah mak deuh mai chu Ph.D degree nei mi 255 te pawhin peon hna hi an dil a ni. Peon hna dil zingah hian Ph.D degree nei pakhat Alok chuan "Hna neilo a awm reng ai chuan peon hna thawh pawh a tha zawk ka ti" a ti a ni.

*SILPAULIN LEH TARPAULIN MAN SAWRKAR AH CHHUN LUH A NI
State Disaster Management Authority (SDMA) Chairman Pu Lal Thanhawla, Chief Minister, Mizoram ho a thutkhawm hnuhnung ber a thurel bawhzuiin Department of Disaster Management & Rehabilitation chuan Silpaulin pakhat zelah handling charge atan Rs.100 a la a. Ni 18.2.2015 - 9.9.2015 chhunga pawisa tlingkhawm hi Rs.20 lakh ni tawh in, tunah hian chu chu sawrkar sum bawmah chhunluh a ni.

SDMA thuchhuah hnu hian Department chuan Silpaulin sing khat leh Poly-Tarpaulin singkhat chu Government approved supplier atangin a lei a. Handling charge hi Minister leh MLA te hnena Silpaulin pek chhuah atang pawhin lak sak vek thin a ni.

In kang leh chhiatna hrang hrang avanga chhiatna tawk te atang erawh chuan a enfiahtu Zonal officer te report dan a zirin he handling charge hi lak sak loh tur a tih a ni bawk. (DIPR)



*MDOA IN OFFICER KAISANG LAWMPUI
Mizoram Departmental Officers’ Association (MDOA) chuan an member kaisang te lawmpuina hun nimin khan Forensic Science Laboratory Office building-ah an nei a. He hun hi Pu Lal Thanzara, Ex-Minister chuan a hmanpui a ni.

He function hi an pawl President Pu Lalchuailova’n a kaihruai a, Pu R. Lalrammawia, Secretary in lawmpuina an pek dan chungchangah an pawl kalphung te a sawi a. Pu Lal Thanzara, Ex-Minister in lawmpuina thute leh fuihna thu te a sawi zawh hnu in Dr. J.T. Vanlalngheta, Vice President in lawmthu sawiin hun hnung a khar a ni.

Nimin a lawmpuina MDOA in a pek te hi : 1) Pi Vanlaldini, Director, Social Welfare Department ; 2) Pu George Lalromawia, Director, Soil & Water Conservation Department ; 3) Dr. H. Lallenmawia, Director, Geology & Mineral Resources Department ; 4 ) Pu H. Sangchungnunga, Director, Forensic Science Laboratory Department te an ni. (DIPR)

*THI TURIN AN CHUNGCHANG REL SAK
Kuwait ram sorkar chuan kumin June thla a Imam al-Sadeq mosque a thihchilh bomb tihpuahna a inhnamhnawih mi 7 te chu thi turin an chungthu a rel sak. Lamtluang thulakna in a tarlan danin Egypt sorkar pawhin Muslim Brotherhood te thlawptu mi 8 te chu thi turin an chungthu a rel sak bawk a ni.
 
*IISc LEH IIT DELHI WORLD RANKING AH LANG
QS World University Rankings of 2015-16 in a tarlan danin Indian Institute of Science (IISc), Bangalore chu rank 147 ah an lang a, Indian Institute of Technology (IIT), Delhi chu rank 179 ah an lang pha a ni. Lamtluang thulakna in a tarlan danin IISc leh IIT Delhi te hian kum hmasa lam aia ranking tha an neih avangin India President Pranab Mukherjee chuan heng institution 2 te hi lawmpui na a thawn a ni.

*SYRIA TUALCHHUNG BUAINAAH RUSSIA A INRAWLH EM NI?
Syria ram hmar thlang lam a airfield awmna Latakia chu Russia indo thlawhna thahnem takin an luah mek ni a sawi a ni. Lamtluang thulakna in a tarlan danin Syria President Bashar al-Assad hian tualchhung ah dodaltu a nei mek bakah Islamic State firfiak te nen in hmachhawn reng annih avangin Russia sorkar hian a rukin Assad pui tur hian indo thlawhtheihna leh indo lawng te ramri hnaihah a chhawp lut nia sawi a ni. Lamtluang in khawvel chanchinthar ziahna site hrang hrang a chhui naah Russia sorkar erawh chuan Syria ah hian ralthuam nilo in mihring te tanpuina lam chi thil thawnlut niin an insawi ve thung a ni. US chuan Russia hi Syria ram a indona hmanrua leh ralthuam te thawnlut lo turin a lo hriattir tawh a ni.


*FB AH DISLIKE BUTTON ENCHHIN THUAI DAWN
Facebook founder Mark Zuckerberg chuan an headquarters a zawhna leh chhanna hunah mi thil post emaw comment te duhlo emaw ngaina lo tih entirna tur 'dislike' button siam tum a hmalak mek a ni a, kan enchhin tep tawh a ti. Lamtluang thulakna in a tarlan danin Mark Zuckerberg hian kum 2009 a 'like' button hman anih atang khan FB hmangtu tam takin 'dislike' button siam ve turin ngenna an rawn siam thin a, hei hi kan ngaihtuah mek a ni a ti.