Saturday 13 June 2015

8th - 13th June 2015 news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM
13.6.2015

*KHAWVELA INNEI UPA BER TE
Vawiin khan Sapram England a Eastbourne khua ah putar kum 103 mi George Kirby leh pitar kum 91 mi Doreen Luckie te chu an innei. Lamtluang thulakna in a tarlan danin hemi nupa tuak thar te hi khawvel a innei upa ber anni. Hemi te nupa hi innei lo in nupa angin kum tak an lo khawsa tawh a tu leh fa pawh annei duah tawh a ni. Tihian tlaikhawhnuah an inkutsuih thar te leh ta ani.

12.6.2015
*MIZO IDOL 2015 Elimination round chu vawiin khan an zo ta a,
ni 16 June 2015 (Thawhlehni) ah Second round neih tan leh a ni ang.
Mizo Idol 2015 Judges
L to R: Mr. Lalsiamkima Chhakchhuak, Ms. Mimi Renthlei, Mr. Rinzauva Sailo

*TWITTER HOTUPA BANG DAWN
Social media site lartak Twitter Chief Executive Officer (CEO) Dick Costolo chu thlaleh July ni atangin a bang dawn. Lamtluang chhiartu ten in lo hriat tunhnai chho ah twitter hi an thang chak vak lo a investor lam atang in nawrna a nasa CEO hian ban a tum ta a ni. Costolo hmun ruak hi Twitter co-founder Jack DOrsey an a lo luah hrih dawn a ni.

11.6.2015
*Vawiin khan Mizoram pum ah Green Mizoram day hman a ni a, Mizoram hmun hrang hrang ah thing tiak phun a ni. He hun hmanna pui ber chu Hmuifang ah neih a ni a, Mizoram larsap chu khuallian a ni.
 
10.6.2015
NESTLE COMPANY EISIAM MAGGIE LEH A KAIHHNAWIH THIL A HEALTH DEPARTMENT THUCHHUAH

Health Department, Mizoram chuan Nestle Company in a siam Maggie noodles leh a kaihhnawih thila Mizoram mipui hriattur thuchhuah a siam.

Health Department thuchhuah in a tarlan dan chuan - Tunlai hian India ram pumah, Nestle Company siam ‘MAGGI’ noodles in sawi a hlawh hle a. Thil pawi leh hlauhawm tak ni thar thutah ngaiin mi tam tak kan chi ai niin a lang a. Amaherawhchu tun dinhmunah engmah chiai- na tur a awm lova. Thil awm dan leh tuna Mizoram sawrkar hmalakna chu hetiang hi a ni.

1. India ram chhunga ei leh in hriselna (food safety) lama thuneitu sang ber Food Safety and Standards Authority of India (FSSAI) chuan, State thenkhata ‘Maggi’ noodles test result avangin India rama State zawng zawngte chu mahni State chhung theuha Maggi te chu Food Testing Laboratory ah test tur leh a result pawh Central a thawn nghal vek turin May ni 25, 2015 khan hriattirna a tichhuak a. Tin, 4th June, 2015 khan state tin Commissioner of Food Safety te chu New Delhi ah he mi chungchang ah hian meeting a neih pui bawk a ni. Meeting chuan State tin atanga Maggi test result dawn kim a nih hunah ‘MAGGI’ chungchanga thutlukna ram puma zawm tur siam nise tiin a rel ani.

2. Mizoram pawhin Maggi kan test theih nan Assam Public Health Laboratory a dawr mek a, tun atanga rei lo te ah Maggi te test turin kan thawn thei dawn a, tin Maggi chauh ni lo, eitur chi hrang hrang he laboratoryah hian test zui zel tura ruahmanna siam a ni nghe nghe a ni. He mi chhung, result hriat hma chuan mitin te fimkhur turin kan in hriattir a ni e.

3. Tun dinhmunah FSSAI chuan fimkhur thuah Nestle Company chu an Maggi siam mek te titawp a, hralh chhuah tawhte pawh la kir turin order June ni 5, 2015 khan a pe a. Mizoramah pawh Food Safety hnathawk te chuan he Maggi laklet dan enfiah pui tura a hriattir angin tunah hian Food Safety Officer ten Maggi laklet dan (recall process) hi uluk takin an en zui a ni. (DIPR)


*MIZORAM BHARAT SCOUTS & GUIDES STATE CHIEF COMMISSIONER LAK LUHNA
3rd June 2015-a Mizoram Bharat Scouts & Guides State Council Meeting-in State Chief Commissioner atan a thlan Pu Zothanmawia, Director, Sports & Youth Services chu nimin 9th June, 2015 (11:00AM) khan Directorate of Sports & Youth Services Conference Hall-ah lakluh a ni.
Lakluhna hun tawi, PuThankhuma State Secretary kaihruaiah hian Rev. Dr. C.L. Hminga, Vice President Mizoram Bharat Scouts & Guides-in Scout thutiam chham tirin a lawm lut a. He hun hi State Council member engemawzatin an hmang a, Pi Saizampuii Joint State Secretary in lawmthu sawiin hun hnung a khar a ni.

Pu Zothanmawia hi Scouting ah a mikhual lo hle. A College kal lai hunah theihtawp a Rover Scouting a lo inhmang ve tawh thin a ni. Mizoram Bharat Scouts & Guides in State Chief Commissioner a neih tawh zinga a pasarih (7) na a ni. Mizoram sorkar in Scouts & Guides activities a kenkawh atanga State Chief Commissioner lo ni tawhte chu :-

1) Dr.Mrs. N. Chatterjee
2) Dr. L.N. Tluanga
3) Pu Hranthanga
4) Wg. Cdr. J. Lalhmingliana
5) Pu Zoliana Royte.
6) Pu Lalzirmawia Chhangte
7) Pu Zothanmawia te an ni.
(DIPR)
9.6.2015
*DEGREE LEM HMANG A PUH VANGIN DELHI LAW MINISTER MAN
Aam Aadmi Party hruaitu leh Delhi Law minister nilai Jitendra Singh Tomar chu Bihar a Bhagalpur University atanga degree lem hmang a puh a nih avangin vawiin ah man a ni. Lamtluang thulakna in a tarlan danin Jitendra Singh Tomar hi court thupek anga man a ni a, vawiin chawhnu dar khan Saket court ah hruai tur a tih a ni.

8.6.2015 
*MANCHESTER UNITED CHU KHAWVEL A FOOTBAL BRAND HLUBER AH PUANG
Khawvel a football club te chhinchhiahna (brand) hlut zawng chhuitu Brand Finance chuan khawvel a football brand hluber atan Manchester United an puang. Lamtluang page chhiartu ten in lo hriat duh takin nikum khan Bayern Munich chu brand hluber an lo ni tawh bawk a ni. Machester United brand hlut zawng hi $Tluklehdingawn 1.2 a ni a, Bayern Munich in an dawt a, 3-na Real Madrid leh Paris St-Germain, 4-na Manchester City, 5-na Chelsea anni.

*JET AIRWAYS IN AIR HOSTESS / CABIN CREW LA DAWN
Jet Airways chuan June ni 16, 2015 hian Regency Hotel, Aizawl-ah Air Hostess / Cabin Crew tur atan interview a buatsaih dawn a, hrechiang duh chuan Aviation Wing Office, Raj Bhawan-ah zawhfiah theih a ni. (DIPR)

*KOREAN ZAI INTIHSIAKNA HMUN ATAN MZU MULTIPUPOSE HALL
Vawiin chawhnu khan Chief Secretary Pu Lalmalsawma hova sawrkar mi pawimawh thukhawm chuan Republic of Korea leh Mizoram inkara cultural exchange programme huang chhunga event pakhat K-Pop Contest Northeast Round Aizawl khawpui a nghahna tur hmun atan Mizoram University Multipurpose Hall, MZU Campus, Tanhril an ruat fel.

July 25, 2015 a neih tur K-POP Contest North East Round nghahna tur MZU Multipurpose Hall ah hian mihring 1500 chuang an lengthei tura chhut a ni a. K-POP Contest a rawn zai turin Korean Pop stars te leh he contest buatsaihtu te’n inbiakna an nei mek a. Entry ticket chungchang ah erawh chuan thutlukna siam a la ni lo. (DIPR)

1st - 7th June 2015 news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM

7.6.2015
LAMTLUANG CHANCHINTHAR TAWI LAWRKHAWM
*Aizawl YMCA Annual General Conference vawi 27-na chu nimin khan Enginering Officers’ Club, Babutlang, Aizawl ah neih a ni a, President Pu P.C.Zoram Sangliana, Chairman, MIFCO-in programme hi kaihruaiin YMCA din cham, kum 171 a tlinna an lawm nghal bawk. (DIPR)

*7th Batch Reang (Bru) Repatriation atana Sawrkar ruahman lawkna anga Tripura Transit Camp a Reang (Bru) te Mizoram mi an ni nge ni lo endik hna thawhkhatna chu 2nd - 4th June, 2015 chhung khan Kaskau Camp-ah neih a ni a, endik tura inlan tumah an awm lo. Kaskau Camp-a Reang (Bru) awmte endik tura inlan an awm tak loh avangin endik sa te Facilitation Centre, Kanhmun a lo hmuak tura ruahmanna chu kalpui theih a ni dawn lo a ni. (DIPR)

*A tum nga-na atan Barcelona chuan UEFA Champions League nomawi chu an chawi leh ta. Nizan khan final ah hian Barcelona chuan 3-1 in Juventus an hneh a ni.

*June ni 4 a Manipur a helpawl ten India sipai 18 an kahhlum chungchang chhuichian hna chu sorkar laipui in National Investigation Agency (NIA) te kut a hlan ta.

*Maggi noodles thubuai kal zel ah Punjab leh Karnataka te pawh in an state chhung ah maggi zawrh an khap ve ta. Lamtluang thulakna in a tarlan danin Punjab hian kum khat chhung atan an khap phawt a, Karnataka chuan sorkar laipui thuchhuah an zawm thung a ni.

*French Open khelh mek ah Mipa final ah World No.1 nilai Novak Djokovic leh Switzerland mi Stanislas Wawrinka te vawiin ah an intum dawn. Lamtluang page chhiartu ten in lo hriat duh takin nimin khan hmeichhe single final ah World no.1 nilai Serena Williams chuan 6-3,6-7,6-2 in Lucie Safarova a hneh a ni.

*Khawvel a ram hausa ber ber 7 te chuan Germany a Bavarian Alps ah G7 summit an hmang dawn. Lamtluang page chhiartu ten n lo hriat atan ahma chuan anni ho hi G8 tih anni thin a nikum khan Russia in Crimea a run avangin G8 atangin Russia hi an ban a ni.

*Nimin khan Pakistan a Quetta khu a Pashtoonabad hmun ah mi tutihhriatloh ten silai hmetpuak in police 4 chuang in nunna an chan.

*Thawhtannni liamta zan a China khualzin phur lawnglian (cruise ship) Yangtze river a pil ta avanga nunna chan zat chu mi 396 an tling tawh. Lamtluang page chhiartu ten in lo hriat duh takin he lawng ah hian khualzin leh lawng a hnathawk mi 456 an chuang a ni.

*Nimin khan Meghalaya a helpawl pakhat Garo National Liberation Army (GNLA) zing a mi 3 te chu police te kut ah an in pe. Lamtluang in thu a dawn danin helpawl inpe te hian an ralthuam te pawh an rawn tung nghal a ni.

*Nimin ah India ram tlawh a lo zin mek Netherlands Prime Minister Mark Rutte chuan Mumbai ah sumdawng lian hotute leh Maharashtra sorkar hruaitu lian te a kawm.

*Nimin tlai khan Mumbai a Powai veng ah In chhawng 22 a sang ah kangmei a chhuah avang in mi 7 in nunna an chan a, mi 28in hliam an tuar. Lamtluang thulakna in a tarlan danin he kangmei chhuak hi nizan zanlai khan an thelh mit thei chauh a ni. Kangmei hi inchhawng 14 atanga chhuah tan a ni.


*PM IN BANGLADESH A TLAWH MEK A I HRIAT TUR TE
*Nimin khan India PM Narendra Modi leh Bangladesh PM Sheikh Hasina te chuan India leh Bangladesh ramri 4096 km a thui kum 41 chuang chinfel tawh lo chu an sawifel ta.

*Lamtluang thudawn danin India leh Bangladesh ramri chifel anih tak huamchhung a cheng mi 50,000 chuang ten khawiram zawk a cheng nge annih tih an tichiang thei tawh ang.

*Bangladesh chuan an ram chhung Chittangong leh Mongla lawngchawlhhmun te chu India sumdawng lawng te hman ve a phal sak ta. Lamtluang thu dawn danin heti anih chuan India sumdawng lawngten Bangladesh a bungrua an phurh in Singapore a hlang thla tawh lo in awlsam takin an ti thei tawh dawn a ni.

*India chuan Bangladesh tan khwlphetha, hriselna lam leh zirna lam a tanpui nan $Tluklehdingawn 2 hmantir a rem ti.

*Lamtluang in thu a dawn danin India in Bangladesh hnen a kawlphetha 50MW a pek thin chu 1,100MW ah tihsan a ni.

*India leh Bangladesh inkar a bus 2 service tur vailiam nghal a ni. Hei hi nimin ah mumal zawk in Lamtluang page ah kan tarlang tawh a i lo hailet mai dawnnia.

*Kum tam tak India leh Bangladesh in an sawifel theih loh luilian 2 Teesta leh Feni te chungchang a inhriatthiam lohna awm pawh rang zawk a sawifel tum a ni. Lamtluang page chhiartu ten in lo hriat atan India PM in Bangladesh a tlawh denchhen hian a vawi khatna atan he lui Teesta thubuai hi official level sawichhuah a ni ta a ni.

*India in Bangladesh a Sylhet leh Khulna ah te consulate office thar a hawng ang. Lamtluang page in thu a hriat danin Bangladesh in Guwahati ah consulate office thar a rawn hawng ve bawk ang.

*Bangladesh chuan India company te tan an ram chhung a sum peipun phal sak in hnathawhna hmun pawimawh bik Special Economic Zone (SEZ) siam sak a rem ti.

*Lamtluang page chhiartu ten in lo hriat atan tun tuma India PM Narendra Modi zin hi West Bengal Chief Minsiter Mamata Benarjee in a tawiawm a ni

6.6.2015
*Vawiin khan Andhra Pradesh Chief Minister N. Chandrababu Naidu chuan an state khawpui thar tu Amravathi ti a ahming an phuah thar lungphum chu Guntur district a Tullur bulah a phum. Lamtluang page chhiartu ten in lo hriat atan Andhra Pradesh atanga Telangana a pian tak atang khan AP hian Hyderabad khawpui kum 10 chhung an tawm ang a, chumi hnuah an khawpui siam thar tur Amravathi ah hian an insawn chhuak dawn a ni.

4.5.2015
*MANIPUR AH SIPAI 15 CHUANG THI
Tukin dar 8.45 khan Manipur a Chandel district ah India sipai 6 Dogra Regiment te chu Imphal atanga km 80 a hla Tengnoupal - New Samtal road ah an patrol laiin helpawl ten lo an lo bei a, sipai 15 chuang in nunna an chan a, sipai 10 in hliam an tuar. Lamtluang page chhiartu ten in lo hriat duh takin sipai hliam tuar te hi thlawhtheihna hmangin damdawiin lam panpui anni. Sipai beitu te hi Meitei helpawl People's Liberation Army of Manipur (PLA) leh the United National Liberation Front (UNLF) ten annih rin a ni.

*INDIA LEH US IN RAMVENHIM KAWNGAH THAWHHONA THUTHLUNG ZIAK
Nimin tlai ah khan India Defence Minister Manohar Parrikar leh India ram a lo zin mek US Defence Secretary Dr. Ashton Carter te chuan New Delhi ah kum 10 chhung a ram 2 ten ralthuam siam leh tihhmasawnna kawng a thawhhona tur thuthlung an ziak. Lamtluang thulakna in a tarlan danin US chuan India ramah ralthuam siamchhuahna te an rawn din ang a, India mithiam te leh US mithiam ten an thiamna te an inthleng tawn dawn bawk a

3.6.2015
*MAGGI THUBUAI IN ZUAL LAM PAN ZEL
Kerala sorkar chuan an state chhungah Maggi noodles chu mihring hriselna atan a thalo ni a sawi a nih avangin a zawrhchhuahna hmun 1,000 chuang atangin zawrh a khap lailawk, sorkar in thutlukna thar a siam hma chuan an state chhungah hian maggi zawrh a ni hrih lo ang. Lamtluang page chhiartu ten in lo hriat atan Uttar Pradesh a ei leh in leh damdawi lam enfiah tu Food and Drug Administration (FDA) te chuan Maggi noodles ah hian mihring hriselna atana pawi thei khawp in hmehhan Monosodium glutamate (MSG) an telh niin an finfiah a , tualchhung court ah maggi siamchhuaktu Nestle company chu thubuai an siamsak tawh nghe nghe a ni. Bihar court pawh in niminpiah khan maggi fakmawitu (brand ambassador) filmstar 3- Amitabh Bachchan, Madhuri Dixit leh Preity Zinta te chu thubuai siamsak turin thupek a chhuah bawk a ni.
 
2.6.2015
*TELANGANA STATE DINCHAM PHA LAWM MEK
Vawiin hi India ram a state 29-na Telangana piancham vawi 1-na a ni a, Telangana sorkar chuan an state dincham pha hi ropui takin an lawm mek a ni. Lamtluang page chhiartu ten in lo hriat ve atan Andhra Pradesh atanga Telangana state thar siam a nih atang khan Telangana hian sum leh pai ah hma a sawn zel a, chutih laiin Andhra Pradesh erawh sum leh pai lamah a harsa chho zel a ni. Telangana state budget 2015-16 ah chuan sum leh pai lakluh na lamah mamawh bak achuang (Revenue surplus) Rs.Vaibelchhe 531 an nei a, Andhra Pradesh state budget 2015-16 ah chuan sum leh pai lakluh lamah leiba Rs. Vaibelchhe 7300 an nei thung a ni.

*CHAMPHAI DC KELKANG AH
Nimin khan Champhai DC Pu H. Lalengmawia chuan Kelkang harhna chhimtu mikhual thahnem tak Mizoram hmun hrang hrang atang an neih thin avanga harsatna awm thei te enfiaha sawihona Kelkang khawtlang hruaitu te a neihpui. He hunah hian Champhai DC chuan Sorkarin a ngaihtuahpui theih harsatna emaw mamawh an nei a nih chuan thlen hrehlo turin a chah a ni.

Kelkang khawtlang hruaitu ten an khaw mamawh hrang hrang te an lo thlen zingah hian Emergency light leh street light dah belh tur te, khawtlang tana harsatna siam lova bawlhhlawh paih theih dan tur te a tel a. Khawtlangin thu pawimawh an hriat zung zung theih nan aurinna (long horn mike) ngaihtuahsak tur te leh tuikhur leh tui tanky siam belh sak turin an lo ngen bawk a ni.

Champhai DC hi PHE Department, Excise & Narcotics Dept leh UD&PA Dept hotute bakah MJA leh Sub Hqtrs YMA hruaituten an tawiawm a ni. (DIPR)
1.6.2015
*MIZO PA IN CHHIARKAWP ATANGIN Ph.D DAWNG
A.Zothansanga chuan 30 May 2015 khan Department of Mathematics, University of Delhi, New Delhi atangin Ph.D. a dawng thar. A thesis title hi "Approximate Frames and Riesz Basic Sequences" tih a ni. Amah hi Department of Mathematics, University of Delhi ah Assistant Professor ni lai mek a ni.

28th - 31st May 2015 news in Mizo

Latest news collection in Mizo language (Online News update from Mizoram)
MIZO TAWNG A CHANCHINTHAR LAWRKHAWM

31.5.2015
*KUM 700 HNUAH OXFORD UNIVERSITY IN HMEICHHE VC NEI DAWN
United Kingdom a University upa ber Oxford University chuan kum 700 chuang VC post an neih tawh hnuah nakkum atangin hmeichhe Vice Chancellor hmasaber an nei ve dawn ta. Lamtluang page chhiartu ten in lo hriat atan Oxford University thuneitu sang 'Congregation' chuan nakkum 2016 January thla ah hmeichhe Vice Chancellor hmasaber tur in Professor Louise Richardson an ruat ang. Professor Louise Richardson hi University of St.Andrews a principal leh vice-chancellor hna thawk lai mek a ni. Oxford University hian kum 1230 atang khan Vice Chancellor post an nei tan a, he post chelhtu te hi mipa hlir an la ni vek a ni.

*FA CUP FINAL RESULT
Arsenal 4-0 Aston Villa
Scorers: Walcott (40'), Sánchez (50'), Mertesacker (62'), Giroud (90'+3)
‪#‎FACup‬

30.5.2015
*US IN CUBA CHU FIRFIAK PAWL TANPUITU LIST ATANGIN PAIH TA
United States chuan Cuba ram nen a inkungkaihna tha neih theih nan Cuba chu firfiak pawl te tanpui thin (State Sponsor of Terrorism) ram ti a chhinchhiah atangin a thaibo ta. Lamtluang page chhiar thintu ten in lo hriat atan nikum December thla khan US President chuan Secretary of State John Kerry hnenah Cuba an chhinchhiah dan hi ennawn turin a lo hrilh tawh a, April ni 8, 2015 khan Kerry chuan a report a thehlut ta a ni. US leh Cuba hi kum 54 chhung zet an lo 'in mu leh ar' tawh a, tunhnai chho ah inremna zawngin an indawr chho leh tan a ni.

*SHILLONG LAJONG IN NORTH EAST UNITED NEN AN THAWHHONA TITAWP
Tunkar Ningani khan Shillong Lajong Football Club (SLFC) chuan Indian Super League (ISL) a franchise nei North East United Football Club nen an thawhhona an ti tawp. Facebook a Lamtluang page chhiartu ten in lo hriat atan nikum a ISL khelh a nih khan Shillong Lajong hian John Abraham-a club North East United FC nen an lo thawk tlang tawh a ni.Shillong Lajong FC managing director Larsing Ming Sawyan chuan grassroot a hmalak nan leh India hmarchhak a thalai te tan nasa zawk a hmasawnna kalpui an duh avangin he thutlukna hi siam niin a insawi.

*MIZO KHAWTLANG NUN ZIRCHIANNA SEMINAR NEI
Nimin khan Govt. Johnson College hnuaia Research & Extension Committee chuan Mizoram Cooperative Apex Bank Ltd. nen tangkawpin I&PR Conference Hall-ah National Seminar on Emerging Issues in Contemporary Mizo Society tih an buatsaih a. He hun hi Higher & Technical Education Department Director Pu R. Lalrosanga chuan khuallian niin a hmanpui.

Pu R. Lalrosanga chuan, “Mizo society-in chak taka hma a sawn mek laiin, hmasawnna in a ken tel thilthar tam tak min hualveltu te hi chik taka kan zirchian zel a ngai a. Chumi atan chuan college leh university zirtirtute’n tihtur tam tak kan nei a ni,” a ti.

He seminar-ah hian mithiam 11 te thuziak ngaithlak leh zirho ni a. A buatsaihtu Research & Extension Committee-ten zu leh Mizo zirlaite nun thu a Case Study an neih pawh thlir ho a ni bawk. (DIPR)
29.5.2015
*DDK-AH ‘A TAK RAM’
Doordarshan Aizawl chuan zanin 29th May 2015 (Zirtawpni) zan dar 8:00, 'A Tak Ram' (Episode-II) programme ah 'VIP Culture' tih thupui sawihona a ti chhuak dawn a. Mi pawimawh nih duhna thinlungin Sorkar leh Sorkar hnathawkte a tibuai em, Mizo mipui rilru sukthlek leh Kohhran thlengin enge nghawng a neih tih te huam zau taka sawi hona a ni. He hunah hian ziaktu lar Pu PL Liandinga, The Aizawl Post Editor Pu C Lalrambuatsaiha leh J. Malsawmzuala Vanchhawng ten hun an hmang ang. (DIPR)

* #‎MIZORAM‬ FOOTBALL ASSOCIATION HRUAITU THAR TE
PresidenT: Pu Lal Thanzara
Sr. Vice President: Pu PC Vanlalhruaia, 
Vice President: Pu KC. Lalrinmawia, 
Honorary Seretary: Pu Lalnghinglova Hmar
Jt. Seretary: Pu C. Vanlalmawia
Treasurer: Pu Tuikhuahthanga
Financial Seretary: Pu Lalruatsanga Tochhawng
 
28.5.2015
*CLASS X HNUAI LAM CERTIFICATE DEO SIGN NGAI
Sorkar-in Soldier General Duty (Dispensation Category) dil thei chin a bithliah chu Class VIII leh a chunglam pass certificate nei chin te an ni a. Diltute zingah certificate lem siam an awmlohna turin hmarchhak biala Recruiting Director chuan sipaia intlar tur te chuan Class X hnuai lam Education Certificate an kente chu District Education Office countersign tir ngei turin a phut a ni. (DIPR)