Saturday, 21 February 2015

20th February 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAW
20.2.2015

*CHAMPHAI SCOUTS & GUIDES TEN THINKING DAY HMANG
Nimin khan Govt. Vengthlang Middle School-ah Scouts and Guides buatsaihin Thinking Day hman a ni.

He hun hi Pu Lalngilneia Colney, DSYO Champhai chuan kaihruaiin, Pi Lalsiamliani ADSD5C chuan Thinking Day chanchin leh hman anih chhan a sawi a. Scout & guides a mi inhmang tak tak te hi mipuitling ah an chhuak thin a ni tiin, ruihtheih thil laka fihlim turin kalkhawmte zirlai naupangte chu a chah bawk a ni.

Thinking Day hi khawvel pumah February ni 22-a hman thin a ni a. Kuminah Sunday-a a tlak avangin Champhaiah chuan nimin khan hman a ni. (DIPR)
*CHIEF MINISTERIN DDK EXTENDED PROGRAMME TRANSMISSION HAWNG
Chief Minister Pu Lal Thanhawla chuan zanin dar 7:00 PM khan Doordarshan Kendra (DDK), Aizawl programme pawhseina, DDK,Aizawl Extended Programme Transmission chu DDK Studio, Durtlangah a hawng.

Chief Minister chuan hawnna thu a sawiah DDK.Aizawl programme pawhsei a ni chu Mizoram tan mellung thar a ni tiin, abikin alo thlir leh ngaithlatu tam ber thingtlang mite tan a lawmawm tak zet a ni a ti a. Khamlo taka DDK programme kan thlir thin chu zan dar 9 thleng thlir leh ngaihthlak theih ani tur hi a thawktute thahnemngaihna vang ani a, a lawmawm hle a ni a ti.

Chief Minister chuan India hmarchhakah Mizoram chu kan vannei bik hle a a hriatthu sawiin, DDK a a hotu zingah Mizo ngei Addl Director General kan nei hi a vanneih thlak hle a ni a ti a. He Station hi a hawn kum 1995 khan a tel ve thu sawilangin, tunah chuan nasa taka hma a sawn ta hi a lawmawm hle a ni a ti a. DDK programme hi Cable Operator ten an tichhuak ngei tur a ni tih danin a phut angin, DC tinte chu he dan an zawm em tih uluk taka vil reng tura hriattir an nih tur thu Chief Minister hian a sawi a. Hei hi zokhaw lama chengte tan a pawimawh bik a ni a ti a. Ram dang leh state danga zohnahthlak chengten DDK, Aizawl programme an tangkaipui thin thu a sawi bawk a. Hnam inpumkhatna ti nghettu a ni a ti.

Chief Minister chuan DDK, Aizawlin kuthnathawktute tan te, hriselna lam hawi programme te,zirna lam te leh sorkar programme pawimawh tak NLUP te an tichhuah thinah lawmthu a sawi a. Chanchinthar chhiar hun erawh AIR news chhiar hun nen a inang avang leh inkhawm lai nilo thei se tia, a siamrem dan awm thei se tiin rawtna a siam bawk a ni.

DDK Additional Director (P&A), North East Pu C.Lalrosanga chuan Mizoram State Day a DDK,Aizawl Local programme pawhseina hun hman ani a chu a lawmawm hle a ni a ti a. DDK, Aizawl hi kum 1995 a hawn anih atang khan mipui rawngbawlin National Broadcaster a ni pha a ni a ti a. DDk programme hi sattelite kaltlanga tihchhuah anih avangin a fiah bik a ni a ti a. A tira darkar hnih leh a chanve programme nei thin kha tunah chuan dakar ruk kan nei thei tawh dawn a ni a ti. Cable TV Network Regulations, 1995 in a phut angin Cable Operator ten DDK programme te hi an tichhuak ngei ngei tur a ni a ti. DDK,Aizawlin chanchinthar a puan hun chu naktuk zan atangin zan dar 8:45 ah puan thin tawh tur a nih thu Pu C.Lalrosanga hian a sawi bawk a ni.

DDK, Aizawl programme pawhsei hawnaah sawmbikte an kal thain, zan dar 9 thleng hun hman a ni. (DIPR)


*MIZORAM UNIVERSITY A ARCHITECTURE ZIR DUH TAN (MZU ARCHITECTURE COURSE ADMISSION NOTICE)
Mizoram University is starting a Bachelor of Architecture Program from August 2015; Prospective students should clear the National Aptitude Test in Architecture (NATA). NATA is an online test and its Phase – I is from 14/03/15 – 25/05/15 and Phase – II is from 01/06/15 – 31/08/15. For further details please visit www.nata.in or contact:
Emeline Zodingliani, Assistant Professor: 7308970585
Sylvia Romawizuali, Assistant Professor: 8731060062

Admission Criteria for admission to the Department of Planning and Architecture, Mizoram University:
(a) All candidates must clear the National Aptitude Test in Architecture.
(b) 50% of seats will be filled through JEE-CSAB 2015, the other 50% will be filled through Mizoram University's Entrance Test in Architecture. Higher Secondary or 10+2 examination or its equivalent from any recognised Board having secured a minimum of 50% marks in aggregate with Physics, Chemistry and Mathematics (relaxable by 5% for SC/ST candidates).

*NIGER A MITTHI VUINA AH MI 37 AN THI
Nimin khan Nigeria ram thenawm Niger ah mitthi vui lai indo thlawhna a beih annih avangin mi 37 in nunna an chan. Thlawhna hmanga bomb thlaktu te hi tutenge tih hriat nilo mahse Nigeria sorkar thlawhna te annih rin a ni a, Nigeria erawh chuan an pha thung a ni. Hetih lai hian Nigeria sorkar thuchhuah chuan Niger ram hmarchhak lamah firfiak pawl Boko Haram te an beihna ah firfiak pawl a mi 300 an that niin an sawi bawk a ni.

*SANGAU AH INFORMATION COMMISSIONER PU L. HRANGNAWNA HOVIN RTI CAMPAIGN NEI
Nimin khan Sangau 3 Community Hall ah Right to Information Act chungchang mipuite hrilh hriatna hun hman a ni a, Information Commissioner Pu L. Hrangnawna chu Khuallian a ni.

State Information Commission, Mizoram buatsaihin Sangau 3 Community Hall ah RTI chungchanga mipuite hriattur inhrilh hriatna hun hi neih niin he huna khuallian Pu L. Hrangnawna chuan mipuite chu a tha zawnga dil chhut tur leh kan chanvo te hrechiang tura an beng chhi reng turin a fuih a, Right to Information in a tum ber chu ram mipuiten an chanvo dik tak an chan theih nana kawng sial sak a ni a, chumi nei tur chuan ram mipuite vek hi kan pawimawh a ni a ti. Chutih laiin RTI hmangin kan duh loh zawngte tih mualphona remchang pawh hawnin a awm ang a ngaihna a awm thei ve bawk a, amaherawh chu hei hi RTI in a tum ber a nilova,hman thiam a tul hle a ni a ti bawk.
Pu L. Hrangnawna hian RTI chungchang Subject hrang hrangte a sawi a, zawhna neite tan zawhna leh chhanna hunte pawh a hawng bawk.

He hun hi Sangau BDO Pu Vanlaltanpuian a kaihruai a, Lawngtlai District Information Officer Pu K. Saitluanga’n kalkhawmte hnenah lawmthu sawina hun a hmang bawk. Sangau khaw chhunga zirlaite, tlawmngaipawl hruaitute, Vilage Council member te leh sawrkar hnathawkte bakah khaw thenawm atangin mi engemawzatin he hun hi an rawn hmang a ni. (DIPR)


* #‎UEFA‬ CHAMPIONS LEAGUE FIXTURE
25.2.2015 (Wednesday)
Manchester City vs Barcelona (1:15 am IST)
Juventus vs Dortmund (1:15 am IST)
 
*DISTRICT LEVEL SEMINAR ON SPICES BUATSAIH
Sawrkar Laipui, Ministry of Commerce & Industry hnuaia Spices Board leh Directorate of Horticulture, Govt. of Mizoram tangkawp te chuan District Level Seminar on Spices chu Horticulture Conference Hall , Aizawl ah niminpiah leh nimin khan khan an buatsaih.

He seminar hi Dr. E. Saipari, Joint Director, Directorate of Horticulture chuan hawngin Spices nasa zawk a thar chhuah leh hralhna hlawkziate a sawi a. Conference rawn hmanpuitu Pu P.C. Gopapkrishnan, Deputy Director, Spices Board, Guwahati chuan seminar thil tum te sawi.
Technical session hrang hrang ah, mithiam ICAR Research complex for NEH region, Kolasib; Krishi Vigyan Kendra, Central Agriculture University, Selesih.; NERAMAC Ltd. Zonal Office, Aizawl; Directorate of Horticulture, Govt. of Mizoram ; Mizoram University leh Krishi Vigyan Kendra, Lawngtlai leh Spices Board, Aizawl atang a lo kal ten zirtirna an pe.

He ni hnih awh seminar hi HRD programme leh Mission for Integrated Development of Horticulture sum hmanga buatsaih a ni. He seminar ah hian Department officer te, progressive farmers leh NGO te an tel a. He seminar ah hian Spices te hlawk zawk a thar dan chungchangte, a sawngbawl dan thar leh tha zawk te theh darh a, a enkawl leh hralh chhuahna a harsatna awm chungchang te zir ho a ni. (DIPR)
*BIHAR CM IN BANNA THEHLUT
Tukin a Lamtluang a kan rawn tarlan tawh angin Bihar assembly ah Chief Minister Jitan Ram Manjhi sorkar vawiin ah buk tur a tih a ni a, mahse, a sorkar buk a nih hma hian Manjhi hian Governor hmu in banna a thehlut a ni. Governor hnenah hian assembly chu thiah a inthlan that buatsaih a rawt nghal bawk a ni. Bihar state sorkar buai in tawp hun a la nei thei rih lo zel e.
*Retweeted Narendra Modi (@narendramodi):
Wishing my sisters and brothers of Mizoram on the State's Statehood Day. http://t.co/wkx5kCl4P0
*AGRICULTURE DEPARTMENT-IN SERCHHIP-AH NLUP SEM
Nimin chawhma dar 11:00 khan Agriculture Department, Serchhip District chuan FIAC Hall, Agriculture Complex, New Serchhip-ah NLUP 2nd Phase hnuaia Serchhip I, II, III, IV, V, New serchhip, Keitum leh Bungtlanga Oil Palm leh Sugarcane (Fu) trade thlangtute hnenah tanpuina sum hnuhnungber (last installment) semna hun buatsaih a ni a, Dr. C.Lalzarliana, Director (CH), Agriculture Department chuan khuallian niin he hun hi a hmanpui.

Khuallian hian NLUP beneficiary te fuihna thusawiin NLUP atang hian Sawrkarin Chhungkaw eizawnna ngialnghet siamsak a tum thu leh NLUP tobul leh kalphungte chiang lehzuala sawifiahna hun a hmang a, Pu Lalrinliana, Joint Director, NLUP Agriculture Department Nodal Officer leh Pu Lawmkima, MCS, Nodal Officer, NLUP, Serchhip District ten thusawina hun hmangin beneficiaries te hmalak dan tur leh thil pawimawh dang inhrilhfiah nan hun hman a ni.

Nimin a NLUP 2nd Phase hnuaia Oil Palm leh Sugarcane (Fu) trade thlangtute hnena tanpuina sum (last installment) pek dan chu hetiang hi a ni :
1. Serchhip I : 12 beneficiaries
2. Serchhip II : 9 beneficiaries
3. Serchhip III : 31 beneficiaries
4. Serchhip IV : 11 beneficiaries
5. Serchhip V : 1 beneficiaries
6. New Serchhip : 2 beneficiaries
7. Keitum : 48 beneficiaries
8. Bungtlang : 66 beneficiaries
TOTAL : 180 beneficiaries

Beneficiaries te hi Department Official ten an hnathawhte a hmunah kalin an endik sak vek hnu ah hnathawk thate chu tanpuina pek chauh an ni a, Oil Palm trade thlangtute hian Rs. 40,000/- theuh dawngin, Sugarcane (Fu) trade thlangtute hian Rs. 28,000/- theuh an dawng a, tanpuina sum hi beneficiary te bank account ah theuh thusak an ni a, vawiinah vek hian khaw hrang hrangah tanpuina sum hi sem chhunzawm mek a ni bawk. Beneficiary te hi Actual Payee Receipt (APR) leh intiamkamna sign tir nghal an ni a, hemi rual hian tanpuina sum an dawn hmangna ah an thawhdan tur kaihhruaina lehkha a chhutchhuah pek theuh an ni bawk.

Nimin a NLUP sem inkhawm hi Pu James Lalsiamliana, DAO, Serchhip District in a kaihruai a, Pu Zokhuma Varte, SDAO in lawmthu sawina in hun a khar a ni. (DIPR)


*SWINE FLU DARH ZEL CHUNCHANG A I HRIATTUR TE - INVENNA LEH A NATNA CHUNGCHANG
Nimin khan India ah swine flu avangin mi 4 an boral leh. Kumin chhungin India ah swine flu avangin mi 703 an boral tawh a ni. Nimin thleng khan India ram pumah swine flu vei hmuhchhuah tawh zat chu mi 11,071 an tling tawh a ni. Lamtluang a kan rawn post tawh thin angin Swine flu hi a darh zel a India hmarchhak pawh lo thleng tawhin Mizoram leh Nagaland ah te pawh hmuchhuah a ni tawh a ni.
Swine flu hi a natna vei te atang chauh a kai chhawn theih a ni. Ka leh hnar a natna hrik (H1N1 virus) lut atanga kai a ni tlangpui a, chuvangin mitin ten kut bal leh sillo a thil ei mai mai loh tur a ni a, hmai huam chin taksa peng engpawh khawih dawnin kut sil hmasak zel hi inven theihna awlsam ber a ni. India ram hmun tam takah chuan dawrkai ten hmai khuhna/tuamna (mask) an zuar a, hralh a kal thei hle a ni.

INVEN THEIH NA AWLSAM TE
*Swine flu hi H1N1 virus taksa a luh vanga kai theih a ni a, midang kaichhawn loh nan khuh leh hahchhiau laiin hnar leh ka hup thin tur a ni.
*Mit, hnar leh ka te kut lawnga khawih loh a tha.
*Swine flu vei te hman hnu mobile phone, laptop/computer te hman loh a tha ber.
*Hmun thianglimlo leh tawphnawk te pumpelh a tha.
*I awmna hmunah swine flu vei an awm chuan pawn chhuah emaw mipui punkhawmna hmun a i awmin hmai khuhna (mask) hman a tha.
*Swine flu vei nia in hriat chuan a khat tawkin tuilum chial in fo a tha.
*Swine flu vei nia in hriat chuan tuilum chial emaw thil tuiril lam a lum a in a tha, hei hian pumpui atangin natna hrik a umbo ve thei a ni.

HRIATTUR PAWIMAWH TE
*Mihrisel pangngai tak i nih chuan swine flu kai a awlsam em em lo.
*Swine flu hi a saptawng a 'swine' tih hi 'vawk' tihna anih avang ngawtin vawk atanga kaichhawn theih chu a ni chiah lo. A natna vei mihring leh mihring te inkaichhawn chi a ni.
*Swine flu hi naupang, raipuar, zunthlum nei leh lung lam thalo ten an kai awlsam bik. Natna/tlang hrileng kai/vei hma te tan swine flu kai a awlsam bik.
*Khawsik thut 100 F aia sang, taksa chauh na, hritlang, luna, khuh, hahchhiau, hrawkna/khuhhnawk, kawthalo, chaw eituilo thut te hi swine flu natna lanchhuah na langsar te anni.
*Hetiang a chunga kan tarlan nei/vei nih pawhin swine flu an vei tihna a ni kher lo thei, achhan pawh swine flu natna hi khawsik leh tlanghrileng dang nen a inang em a, engamah hmaa chiai mai lo in ni 2/3 khawsik reh thei lo i neih chuan doctor rawn hmasak phawt a tha ber.
*Khawsik i nei a nih chuan a dam hma chu in a awm a tha ber.
*I hriselna vawng tha la, i taksa enkawl uluk rawh. Chaw hrisel chauh ei la, kham khawp in mu rawh, inngaihtuah hah vak vak pumpelh a tha.
*Mipui vangtlang hmun leh punkhawmna hmun pumpelh atha, i kal anih pawhin i haw ve leh i kut leh ke silfai la, i hmai phih fai thin ang che. A theih phei chuan inbual ziah a tha.
*Swine flu damdawi nazawng ring suh. Doctor leh damdawi lam thiam ten a tha an tih chauh hmang ang che. I taksa a chak vak lo a natna i kai hma a nih chuan swine flu vaccine lak a tha.
*Swine flu natna hi mihring in a vei tih laboratory ah chauh finfiah theih a ni. A test na pawh laboratory danglam bik a ngai a, swine flu natna test thei nazawng ring suh la, sorkar leh damdawi lam thiam te pawmpui ah chauh i test duh pawh in pan thin ang che.
*Mahni chenna in leh hmunhma theuh te vawn fai a tha a, mahni taksa theuh ei leh in ah fimkhur pui a, taksa enkawl fai hi swine flu vennan leh darh zel tur ven nan a mitin tih theih awlsam ber a ni.
*Lamtluang online news in swine flu natna laka i him hi kan duhsak em em che a ni.

*RAINFED AREA DEVELOPMENT PROGRAMME INZIRTIRNA KHAWZAWL AH NEIH A NI
Phai leilet neituten hlawk zawk a buh leh thlai an thar chhuah theihna tur Rainfed Area Development Programme (RADP) chu Champhai District-a hmalakna hmasa ber leh he Scheme a vawikhat kalpuina tur atan khaw pahnih - Hmunhmeltha leh Khawzawl te chu thlan an ni a. He hmalakna atan hian niminpiah (17.2.2015) khan Khawzawl Joint YMA Information Centre, Zuchhip vengah Khawzawl Agriculture Sub-Division Staff-ten Training an pe a ni.

Training hunah hian Khawzawl Sub-Divisional Agriculture Officer Pu R. Vanlalchhuanga chuan zirtirna a pe a. Tuisen phai a leilet neitute buh chin te chu a tluk nasat avang leh buh si a tam thin avangin RADP hnuaiah hian leilet neituten hlawk zawk a buh an thar thei dawn tih a sawi a. Tractor kalpawh theihna leilet-ah te chuan Tractor hman te, chinai thi hmangin lei tih that te, a remchan dan ang zela leilet neitute tan tui dahkhawlna siamsak an nih tur thu te a tarlang a ni.

He hunah hian Tuisen phai a leilet neitu mi 50 vel an tel a, hmalak dan tur kalphung inhrilhhriatna neih rual hian zawhna leh chhanna hun te an hmang nghal a ni. (DIPR)


*VAWIIN HI MIZORAM STATE DAY A NI
Kan hriat theuh angin Vawiin hi Mizoram State day a ni a, Mizoram a sorkar pisa leh zirna in te an chawl a ni. Mizoram hi kum 1987 February ni 20 khan India ram state 23-na a lo ni tan a ni. Kum 2011 chhiarpui a alandan chuan Mizoram ah hian mipui Nuai 10.97 kan awm a ni. Mizoram mipui zawng zawng te State day chibai kan buk vek a che u.
 
*BIHAR SORKAR BUK A NI DAWN TA
Vawiin hian Bihar Chief Minister Jitan Ram Manjhi sorkar chuan thlawptu a nei tam tawk em tih buk a ni dawn ta. Lamtluang ah pawh kan rawn tarlan fo tawh thin angin CM Manjhi hi tunhnai khan a awmna party Janata Dal (United) chuan CM atanga bantir a aiah CM hlui Nitish Kumar dah leh an tum a, mahse Manjhi hi a ban duh loh avangin JD(U) atanga hnawhchhuah a ni. CM nimek Manjhi hian sorkarna chang zel turin MLA vote 117 a mamawh a, tun ah hian JD(U) atanga hel MLA 12 ten Manjhi hi thlawp an tum a, BJP in an tanpui chuan MLA 87 thlawptu a neih theih beisei a ni. Hetih lai hian eptu lam JD(U), RJD, Congress, CPI leh Independent MLA 128 ten Nitish Kumar chu CM ni leh turin an thlawp tur thu an sawi ve thung a ni.

Bihar Chief Minister Jitan Ram Manjhi hian an party chhung a buaina a lo chhuah tak hnu leh a sorkar a buai hnu in thuthar lakhawmtute hma ah "Manjhi a lawng chu a pil ve ngai lovang" tiin a lo sawi tawh a, vawiin ah a sorkar kahhruai (lawng) hi a pil dawn leh dawn loh chu a chiang dawn ta a ni.
‪#‎bihar‬

*HMARCHHAK NSS KHAWMPUI TIAK
Niminpiah chawhnu ah khan Mizoram University Multipurpose Hall ah ni 5 chhung awh Northeast Region National Service Scheme(NSS) buatsaih North East Youth Festival, 2015 kharna hun chu Pu Hmingdailova Khiangte, Parliamentary Secretary, Sports & Youth Services etc., in a hmanpui.

North East Youth Festival, 2015 kharna huna thusawitu Pu Hmingdailova Khiangte, Parliamentary Secretary chuan North East a state 8 a chengte chu kawng engkim ah an lungrual a ngaihthu leh rilru inhmu taka chen ho zel a pawimawh thu sawiin state 8 te chu state 1 ang maia an in pumkhat a pawimawh thu a sawi a. Thalaite tan puitlinna kawng siamsak tura NSS hmalakna chu fak in NSS hian vantlang tana hna tha tak tak thawk tura thalaite zirtirna a pek bakah eizawnna kawng 
kawhhmuhna kawng ah pawh thalaite tan chak zawka hma lak thar a ngai a ni a ti. NorthEast mite chu India khua leh tui dik tak ni mah ila duhthlanna vang nilovin pianphung leh hmelhmang te a lo danglam deuhva, chu chuan hnamdang te lakah enhranna a siam ve thei niin hmun thenkhat ah chuan a lang a.Chuvangin nungchang leh incheina te an uluk a nih loh phei chuan India ram hmun tam takah harsatna hrang hrang kan tawk awlsam thei a ni a ti.NSS volunteer te chuan ramhruaitu nakin lawkah an la ni dawn tih hriain an nungchang uluk tlat tur leh taimakna nen hmalam an pan a ngaih thu a sawi a. Hun tha an neih laia an inzir fin loh chuan nakin lawkah ram hruaitu hman tlak loh a ni thei tho bawk tih hrechianga fimkhur turin a chah a ni.

February 15 -19, 2015 chhunga neih tak NSS North East Youth Festival, 2015 huaihawtna atana senso hi Ministry of Youth Affairs & Sports in a tum a, Mizoram Sawrkar leh NSS Regional Centre, Guwahati te tangkawpin Mizoram University Campus, Tanhril ah an thleng a ni. NSS North East Youth Festival, 2015 ah hian Hmarchhak state 8 atangin NSS Volunteer 261, an hruaitu NSS Programme Officer 24 leh Official pawimawh dang te an tel a, Festival an hman chhung hian Judo, Taekwando leh taksa insawizawina atanga nitin hun tan hmasa in chhun ah leh chawhnu ah te thisen pek pawimawhna chungchang, Human trafficking chungchang, hmeichhe chunga hleilenna do dan tur chungchang,personality development, disaster management leh thingphun uar tulna chungchanga zirtirna te mithiam sawm bikte hnen atangin an dawngsawng thin a ni. Festival kharna programme hi Pu Zothanmawia, Director, Sports & Youth Services in a kaihruai a.

Pu Sunil Kumar Basumatary, Youth Officer, NSS Region Centre, Guwahati leh Dr.Lalzuiliana, State Liaison Officer, NSS Cell, Mizoram te pawhin thusawina hun an hmang a ni. (DIPR)



*SORKAR LAIPUIIN CONGRESS IN HEADQUARTERS A AN HMAN MEK CHHUAHSAN TURIN TI
Union Urban Development Ministry chuan Indian National Congress party hnenah thupek pe in an party headquarters atana an hman mek 26, Akbar Road, New Delhi a mi leh sorkar building 3 dang party office atan a an hman mek te chu an hman theih hun a tawp tawh avangin chhuahsan turin a ti. Sorkar thuchhuah in a tarlan danin Congress te hian June, 2013 atang khan an hman theih hun hi a tawp tawh niin a sawi. Sorkar thupek hi chhanglet in Congress party chuan kum 3 hman leh an dil mek niin an sawi ve thung.
 
*H1N1 (SWINE FLU) CHUNGCHANGA HEALTH DEPARTMENT THUCHHUAH
India ram state thenkhatah H1N1(Swine flu) a lo lan chhuah leh tak avangin IDSP (Integrated Disease Surveillance Programme) Health & Family Welfare Department, Govt. of Mizoram chuan theih tawp chhuahin hma a la zel a. He hmalakna hnuaiah hian kar kal ta khan Mizoram-ah Swine Flu vei case pakhat (1) hmuh chhuah a ni a. A tul anga hmalak chhunzawm zel niin enkawlna pawh uluk taka kalpui a ni a. Tunah hian swine flu vei hi a tha chhhuak tawh a ni. Hemi rual hian he damlo chenpui te pawh hi a venna (Tamiflu) pek vek an ni a, an chhui zui zelna ah Damlo dang an awm lo tih pawh chiang taka hriat a ni.

Vawiin ni thlenga Health Department in H1N1 a test tawh zat hi pali an ni a. Tuna vei lai mek tih loh hi chu he hri lak atang hian an fihlim vek a ni. H1N1 avanga Damlo awm thut palh a damdawi hman tur hi H1N1 hri lenna hmunah lo chuan pek a nih loh avangin Health Minister Pu Lal Thanzara hmalakna in Delhi UT Sorkar ta chu puk a ni.

Health Department thu chhuahin a tarlan danin Swine Flu hi hriat hma a nih chuan tih dam theih a ni a. Mipuite thil tul lova chi-ai mai lo tur leh thuthang diklo theh darh lo turin an chah bawk a ni.
(DIPR)

*FIRST MIZORAM FINANCE COMMISSION IN GOVERNOR HNENAH REPORT THEHLUT
Nimin tlaiah khan Mizoram Finance Commission hmasa ber, 1st MFC chuan an Report buatsaih, bung 12 thenhran leh phek 362 a chhah chu Mizoram Governor Dr. Aziz Qureshi hnenah an thehlut. He Report hi Mizoram Sawrkarin a zir chian hnuah bawhzui a nih dan (Action Taken Report) te siamin Mizoram Legislative Assembly ah pharh a la ni ang a. Chumi hnu-ah mipui nawlpui hmaah la tlangzarh- chauh tur a ni ang.

Mizoram Finance Commission hi Mizoram Finance Commission Act, 2010 hnuaiah 30th September, 2011 ah part time Chairman Pu Van Hela Pachuau leh Member Secretary Pu Lalthansanga neiin din a ni a. Chumi hnuah 30th August, 2012 khan Full time a thawk turin anni pahnih hi dah ngheh an ni a. Mizoram Finance Commission hi a hmasa ber a nih avangin Report buatsaih hi hun tiam 30th October, 2014 ah zawh hman a ni lova, an hnathawh zawh tur hun hi 31st March, 2015 thleng pawh sei a ni. Tuna Report submit tak hi Saptawng a buatsaih niin Mizo Tawng a buatsaih leh mek chu March 2015 thla tawp hma a peihfel hman beisei a ni.

Mizoram Finance Commission Report in kum 5 chhung 1st April, 2015 atanga 31st March 2020 thlenga hman tur atan a rawtna a siam tur te chu - Tualchhung Sawrkar Autonomous District Council (ADCs), Aizawl Municipal Council (AMC) leh Village Councils (VCs) te hian an mawhphurhna an hlen chhuah theihna tur atan Sawrkarin chhiah a lakkhawm atangin sum a pek chhuah ve dan tur ruahmanna siam te, anmahniin an lo hman ve nghal theih tur atan eng chhiahte nge an lo khawn ve tur ni ang tih te. Hna bik leh thil bik atana Tualchhung Sawrkar te sum hman tur Sawrkarin a pek chhuah dan tur ruahman te a ni a. Tualchhung Sawrkar te sum dinhmun a that zawk theihna tur a hma an lak dan tur ruahman te bakah hian Mizoram Finance Commission in a lo hriat tel ngei ngei tur pawimawh tak tak 8 (pariat) an chhawpchhuah te a ni. (DIPR)

*I NGAIHDAN A NI EM?
Mizo Kristian te hi Biak In a kan inkhawm hian Bible leh hla bu kan keng ziah thin tlang pui a. Mizoram kohhran tam tak hi chu kan harsa tawh vak lo bawk a, Biak In thuthleng tin deuh thaw ah hian hlabu leh Bible dahna kan nei fur bawk si. Chuti a nih chuan inkhawm te hman tur in Bible leh hla bu hi kohhran hian Biak In ah dah sa/nei sa ta vek mai ila kan awlsam phah zawk angem? (A bikin Vairam a Mizo Christian fellowship inkhawmna hmun ah te hian an ti vek deuh thaw a, Mizoram kohhran te hian ti ve ila a pawina a awm angem?)
 
*INDIA IN NUCLEAR MISSILE HLAWHTLING TAKIN ENCHHIN
Nimin zing dar 9:20 khan India sorkar enkawl Defence Research and Development Organization (DRDO) te chuan Nuclear ralthuam pai thei bomb mitnei Prithvi-II missile chu Integrated Test Range (ITR), Chandipur, Odhisa tuipui kam atangin hlawhtling takin enchhinna a nei. Prithvi-II missile hian 350 km a hla a kap thei a, ralthuam 500-1000 kg a rit a thlawhchhuah pui thei a ni. Prithvu-II missile hi a taksa dung 8.56 metre a sei a ni a, a vang zawngin 1.1 metre a lian a ni, a rih zawng chu 4600 kg ani. Hmelma missile pawh a kap ral vek thei a ni

No comments:

Post a Comment