Sunday, 1 February 2015

29th - 31st January 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
31.1.2015
*NATIONAL GAMES VAWI 35-NA TAN A NI
Vawiin khan Kerala khawpui Thiruvananthapuram ah 35th National Games chu tan a ni. Union Urban Development minister Vekaiah Naidu an infiammi te chibai buk a chhang let a, Kerala CM Oommen Chandy an inlawmna thu a sawi a ni. India ram state leh UT hrang hrang atangin infiammi 2,500 chuang an kalkhawm a ni.
 
*AUSTRALIAN OPEN HMEICHHE FINAL AH SERENA WILLIAMS CHAMPION
Australian Open 2015 hmeichhe single final khelh zawh takah Serena Williams chuan a khingpui Maria Sharapova 6-3, 6-7 a hnehin a champion.

Naktuk ah mipa final ah Novak Djokovic leh Andy Murray ten an intum ang.
 
*IS TEN SAUDI ARABIA RUN TUM
Islamic State firfiak pawl ten video tichhuak in Saudi Arabia ram run an tum thu an sawi. Saudi Arabia run an tum chhan ah hian hmanni lawkah an lal a boral a lal thar an neih hlim a run nghal tha in an hria a ni.
 
*KURDISH TEN KOBANI LALET
Kurdish sipai te chuan ni 112 chhung ISIS firfiak te nen an inbeih hnuin Syria ramri hnaih khua Kobani chu an lalet leh ta. Kobani hi Syria ramchhung Turkey nen a an inri na hnaih a awm a ni a, ISIS te leh Kurdish sipai te nasa taka an inbeihna hmun a ni a, in leh bazar hmun ten nasa takin a tuar a ni. Kurdish sipai te hi US kaihhruai indo thlawhna ten an pui bawk a ni.
 
*MIZO GOSPEL SINGER PENSY ALBUM TLANGZARH A NI
Nimin khan Mizo Zaithiam Lunglei Zohnuai nula Pensy B.Lalthangliani chuan gospel album thar Nitinin hmangaih che ka duh - Min tir ta che" tih a tlangzarh. He album hi Lunglei khawchhunga awmte tan #VirtualCity Chanmari ah leh #BrotherEnterprise Bazar vengah te, Aizawl khaw chhunga awmte tan #OMBooks Chanmari ah leh #ColneyBrothers ah te,Shillong khaw chhunga awmte tan #OMBooks ah te lei theihin a awm reng ani. CD leh DVD in a awm a, a man hi Rs.200/- a ni.
 
 30.1.2015
*LAMTLUANG WEEKEND SPECIAL (MIZO FIAMTHU)
An fanu sawn pai an hauh lai takin kawhtebel zuar an lo kal a -
Ka pu kawhtebel in lei duh em?
Pa ber - Kawhte pakhatah pawh chhungkua min ti buaia, a bel bel chuan kan duh lo ang  
 
*OFFICER SIKSAWI
DP & AR (CSW)chuan thuchhuah siamin IAS/MCS Officer thenkhat te chu an hna chanpual siksawi a ni a, an awmna hmun tur chu a hnuai ami ang hi a ni :
H.L. Rochungnunga, IAS
Hnachelh lai: Special Secretary, SAD & Industries Department
Hnathar tur: Director, Food Civil Supplies & Consumer Affairs

H.Lalengmawia, IAS
Hnachelh lai: Director, School Education Department
Hnathar tur: DC Champhai

Sangdingliana, IAS
Hnachelh lai: DC Champhai
Hnathar tur: Special Secretary, Industries Department

K.Lalthawmmawia, MCS
Hnachelh lai: DC Mamit
Hnathar tur: Director, School Education Department

Vanlalngaihsaka, MCS
Hnachelh lai: Addl. Secretary, GAD & H&FW Department
Hnathar tur: DC Mamit

R.Zarzosanga, MCS
Hnachelh lai: Addl. Secretary, LR&S and DM&R
Hnathar tur: DC Saiha
 
*AIR AH ZAIPAWL KUTPUI (CHORAL FESTIVAL) BUATSAIH DAWN
All India Radio Aizawl chuan Thawhtanni February ni 2, 2015 chhun dar 12 hian an office kawtzawl ah Zaipawl Kutpui (Choral Festival) a buatsaih dawn a. Aizawl khawpui chhunga Kohhran hrang hrang zaipawl tha tak tak 15 an zai dawn a. He hunah hian Prasar Bharati Board Chief Executive Officer - Pu Jawhar Sircar bakah All India Radio mi pawimawh tak tak te an tel bawk dawn a. He programme hi AIR, FM Zoawi leh Doordarshan Aizawl ten Live in an pe chhuak ang.
(DIPR)
 
*DIK LO TAKA SUM LAKLUH VANGIN MLA 2 BAN
Uttar Pradesh ah Lok Ayukta in thu a rawn angin sorkar hna thawk chung a hlawkna tel ruk thubuai nei MLA 2 Bajrang Bahadur Singh (BJP) leh Uma Shankar Singh (BSP) te chu MLA atangin Governor in a ban. Heng MLA 2 te hi MLA a thlan tlin annih tawh hnuah contractor hna an thawh chhungzawm avangin ban anni.
 
*SAIHA-AH M.S.O. LIBRARY HAWN A NI
Nimin hawhnu dar 1 : 30 khan M.S.O. (H) Inpui, New Colony Saiha-ah M.S.O. Library hawn a ni.

He Library hawnna inkhawm tawi neih hi Pu Aldrin Laihlei Hlychho, Vice President, M.S.O.Headquarter Saiha chuan a kaihruai a, hunserh Rev. Dr. S.T. Zawsi, Patron Member, MSO chuan a hman hnu-ah Khuallian Pu Beila Khithie, Additional Deputy Commissioner, Saiha Distrct, Saiha chuan thu sawina a nei a, a ni bakah hian Pu FC Khihnia, Adviser MSO, Headquarter Saiha pawhin thu sawina a nei bawk. Pu C. Laitha, Secretary i/c Education chuan Technical Report a pe a, MTP leh MCHP aiawh ten thusawi tawi an neih bakah a duh a piang thusawina hun hman a ni. He MSO Library ah hian Lehkhabu chi hrang hrang mi tlawmngai ten an pek 650 a awm a, Computer pathum Internet thlunzawm a awm bawk. Pu T. JB Rona, General Secretary, MSO, Headquarter, Saiha chuan lawmthu sawina neiin he MSO Library hawnna hi tihtawp a ni. (DIPR)
 
*THALAI TRAINING CHHUAKTE HNENAH CERTIFICATE HLAN
Nimin khan Mizoram Youth Commission leh Mizoram Building & other Construction Works Welfare Board bultuma Emporium Training Consultancy Pvt., Ltd. Kolkata a Professional course hrang hrang, Aviation, Hotel Hospitality, Travel, Tourism sector a training zo Mizo thalai mi 39 te hnena certificate hlanna programme chu Horticulture Conference Hall, Aizawl ah Pu T. Sangkunga, Chairman, Mizoram Youth Commission hovin neih a ni. (DIPR)
 
*INDIA RAM CENTRAL UNIVERSITY THABER AH UNIVERSITY OF HYDERABAD THLANG
India ram Central University te zing a thaber thlanchhuahna neih ah University of Hyderabad chu pakhatna a ni. He chawimawina 'Visitor's Award for the Best University' hi University of Hyderabad hnenah thlaleh February ni 4 hian India President Pranab Mukherjee an Rashtrapati Bhavan ah a hlan ang.

University of Hyderabad hnenah ‘Visitor’s Award for the Best University’ pek a nih dawn bakah hian, chawimawina dang ‘Visitor’s Award for Innovation’ chu University of Delhi a mi Prof.Vijay K. Chaudhary leh Dr.Amita Gupta te hnenah hlan a ni ang a, ‘Visitor’s Award for Research' chu Cosmology and Astrophysics Research Group of Jamia Milia Islamia’s Centre for Theoretical Physics te hnenah hlan a ni ang.

'Best University award' dawngtu te hian citation leh tropy a dawng ang a, 'Innovation leh Research Award' dawngtu te hian citation leh pawisa fai Rs. Nuai 1 an dawng bawk ang.

India President hi India ram a Central University zawng zawng ah "Visitor" a ni a, 'Vistor's Awards' te hi pathum ah then a ni a, chungte chu - 'Best University', 'Innovation' leh 'Research' ah te then a ni. Heng chawimawina te hi nikum a Central University Vice Chancellor's Conference ah India President in central university te inkar a inelna tha zawk a awm theih nan tiin a siamthar a ni.

"Visitor's Awards" dawng tur hian Central University zawng zawng hnenah online application a thawn turin hriattirna chhuah a ni. Selection Committee member te chu:

Chairperson - Ms Omita Paul, Secretary to the President,

Member te -
Secretary, Department of Higher Education, MHRD;
Secretary, Department of Science & Technology;
Chairman, University Grants Commission (UGC);
Chairperson leh Vice Chairpersons of National Innovation Foundation;
Director-General, Council for Scientific & Industrial Research (CSIR)
Director, Indian Institute of Technology (IIT) Delhi
 
*MARTYR'S DAY HMANG DAWN
Kum tinin India zalenna suala nun chanta te hriatreng nan ram pumah vawiin January 30 hian Martyr’s Day hman thin a ni a. Mizoram sorkar pawhin kumin hian urhsun takin he ni hi a hmang leh dawn a. January ni 30, zing dar 11-ah Siren tihrik a ni ang a, hna kallai zawng zawng dah tha a, motor tlan lai leh khawlaia mipui kal velte pawh chawla minute 2 chhung ngawi renga ding turin sorkar chuan mipuite a hriattir a ni. (DIPR)
 
*SAWRKAR OFFICE ZAWNG ZAWNGAH CLEANLINESS DAY HMANG DAWN
Mizoram sawrkar chuan National Cleanliness Day, vawiin ni 30.1.2015 (Zirtawpni) hi sawrkar office zawng zawnga hman turin a rel a. Hemi denchhen hian sawrkar hnathawk zawng zawng ten Faina Beihpui Hnatlang mahni office theuhah nei tura hriattir leh ngen an ni. (DIPR)

#cleanmizoram
 
*STATE 6 IN CONDOM SEM TUR TLACHHAM
HIV hrik darh zel tur vennan a sorkar in condom a sem thin chu India ram state 6 Haryana, Uttarakhand, Madhya Pradesh, Uttar Pradesh, Andhra Pradesh leh Rajasthan ah te nasa takin sem tur an tlachham. Heng state te harsatna hi nimin a National AIDS Control Organisation (NACO) senior official ten Union health Secretary Lov Verma an hmuhna ah an thlen a ni.

29.1.2015
*Vawiin chawhma dar 11 hian Govt, J.Thankima College Building sak tur Bawngkawn Brfigade Field bula mi chu Mizoram Chief Minister Pu Lal Thanhawla'n a lungphum a phum ang.
 
*INDIA HMARCHHAK LEH RAMRI A KAWNG SIAM TUR COMPANY SORKAR IN DIN
Nimin khan Union Road transport and highways minister Nitin Gadkari chuan India hmarchhak leh ramri hnaih te a rang zawk a kawng siam leh insak hna thawktu tur National Highways and Infrastructure Development Corporation (NHIDCL) logo leh hmathlir a tlangzarh. He e-company hian tlangram chhengchhia leh India hmarchhak ah te kawng siam hna chak zawkin an thawk thei dawn a ni. He company hi e-PSU a nih avangin office hnathawhna ah pawh paper an hmang dawn lo a electronic hmanraw hmang in hna an thawk thin dawn a ni.
 
*DEVELOPMENT DEPARTMENTS MEETING NEI DAWN
Vawiin 29.1.2015 khian Principal Secretary, DM&R, Excise & Narcotics Pu PC Lallawmsanga hovin Lunglei DC’s Conference Hall-ah chawhnu dar 2:30-ah Lunglei District chhunga Development Department zawng zawngte hmalakna leh thawh tawhnate thlirhona (review meeting) pawimawh tak neih a ni dawn a. He meeting-a tel tura hriattir Department-te chu a hnuaia mi ang hi an ni :

1. SP, Lunglei
2. SE, P&E Department, Lunglei
3. SE, PHE Department, Lunglei
4. SE, PWD, Lunglei
5. Project Director, DRDA, Lunglei
6. General Manager, DIC, Lunglei
7. Conservator of Forest, Lunglei
8. Joint Dirtector, AH&Vety, Lunglei
9. DAO, Lunglei
10. DFDO, Lunglei
11. DUDO, Lunglei
12. DO, Soil & water Conservation, Lunglei
13. EE(PWD) Highway Div-IV, Lunglei
14. DHO, Lunglei
(DIPR)
 
* Nizan ah National Democratic Front of Bodoland-Songbijit faction helpawl zinga 1 chu Kokrajhar district, Assam ah kahhlum a ni.

*KRISTIAN IAS OFFICER THUHRIL TAWH LO TURIN TI
Tamil Nadu sorkar chuan an state chhung a IAS officer tanglai Kristian sakhaw zuitu C.Umashankar chu vantlang zing a Pathianthu sawi tawh lo turin a hriattir. C.Umashankar hi Kerala a Kanyakumari district a Pathian thu a sawina ah sakhaw dang te tan a pawi tur a sawi a puh anih avangin sorkar hian hriattirna hi a chhuah a ni. Umashankar hi Hindu sakhua atang a Kristian a inlet a ni a, vantlang leh media lamah Pathian thu a hril nasa a, Hindu firfiak pawl te pawhin nasa takin an dodal a ni. "Mipui te ka thusawi ngaithla a damna chang turin an lo pungkhawm thin a. Keimah ah thiltihtheihna a awm lo a ti tu chu Isua a ni" tiin Umashankar chuan a sawi a, "Kristian sakhaw zirtirna ka sawi avang chauh a dodalna tawk ka ni a, thuhril hi ka chhunzawm zel ang a, sorkar thupek hi dan ang takin ka hmachhawn dawn a, sorkar hi Hindu pawl thenkhat ten an fuihpawrh mai mai niin ka hria" a ti a ni.
 
*INDIA FOREIGN SECRETARY THLAK A NI
India foreign secretary tanglai Sujatha Singh chu Nilaini tlai atang khan sorkar laipuiin a hna atangin an chawlhtir. IFS 1976 batch Sujatha Singh hian a hun pangngai ah chuan thla riat hun a la nei a ni. US a India ambassador tanglai Subrahmanyam Jaishankar chu foreign secretary thar atan ruat a ni. Amah hi IFS 1977 batch a ni. Tunhma lamin China, Singapore leh Czech Republic ah te India ambassador a lo ni tawh thin a ni. Jaishankar hian a hna thar hi karleh ningani ah a zawm dawn a ni.

No comments:

Post a Comment