Saturday, 24 May 2014

24th May 2014 news in Mizo

 Latest news collection in Mizo language
 
MIZO TAWNG A CHANCHINTHAR LAWRKHAWM
For news related to Mizo people & Mizoram Contact us: lamtluangmizo[at]gmail[dot]com
24.5.2014 
*Vawiin khan South Africa President thar a tan an khawpui Pretoria ah Jacob Zuma lakluh inkhawm neih a ni. African Nation hruaitu thahnem takin an telpui a ni. Jacob Zuma hi President a nih tum 2-na a ni.
 
*#LAMTLUANG_WEEKEND_SPECIAL
POWER SUPPLY AWM LOHNA KHUA A PHONE CHARGE DAN
(la hrelo kan awm takin)
Power supply in a thlen phak lohna khuaah i awm a, i phone charge dan turah i buai thin em? Buai suh, a hnuai point te hi a indawta i tih chuan phone battery full pang i nei thei ang :-

1. I phone chu Nokia nge Samsung (sam-sang ti paw'n lam la sam-sung pawh tila a pawilo) khawchhak chhuak leh pawih sumdawng ta i lei pawh nise a pawilo, a theih vek.

2. Airtel nge i hman Aircel, Reliance emni zawk BSNL pawh nise battery full kha a pawimawh.

3. Top up i ngah em net pack i thun em a pawimawh lo, sms pack pawh nei mahla, i battery a low chuana manganthlak tho tho.

4. Lo ning suh a charge dan ka sawi trep.

5. I phone ah hla i thun em, mizo sex video leak out chhiava te te dah teuh mahla i battery a low chuan darbenthek ri mai mai ai pawhin a ho zawk.

6. Nia phone a thih bul mai hi chuan a MANGANTHLAK ani tiraw..heti hian ti rawh le.

I PHONE CHARGER LA LA, THENAWM KHAW HNAI BER, POWER SUPPLY AWM NA-AH KAL LA, VA CHARGE FULL PÂNG RAWH LE.
Good luck!!

Source: Sena Leo Ngente via Lunglei Chanchinthar leh Hlui group

 
*MIZORAM CM IN NARENDRA MODI LAKLUH INKHAWM TELPUI DAWN
Karleh thawhtanni tlai dar 6 a India Prime Minister thar Narendra Modi lakluhna inkhawm Rashtrapati Bhawan a neih tur a tel turin Mizoram Chief Minister leh MPCC President nibawk Lal Thanhawla chuan vawiin khan Aizawl chhuahsan in New Delhi a pan. Mizoram sorkar Press Information Officer to Chief Minister in a tarlan danin Mizoram CM Lal Thanhawla hi Narendra Modi hian Prime Minister ni tura lakluh inkhawma tel ngei turin a rawn sawm niin a sawi a, Lal Thanhawla duhsakna leh tawiawmna a ngen nghal bawk tiin a tarlang.

 
*NAGALAND CM THAR LALUT
Vawiin khan Nagaland Governor Ashwini Kumar chuan Nagaland Chief Minister 19-na ni turin T.R Zeliang chu rinawmna thu tiam tirin a lalut.Kan rawn post tawh thin angin Nagaland CM nilai Neiphiu Rio chu Lok Sabha MP atan a thlan tlin a nih avangin a hmunruak hi hnawhkhat a ni ta a ni.

 
*MARY KOM INDIA AIAWH TURIN TEL DAWN TA LO
Hmeichhe boxing a world champion vawi 5 lo ni tawh, Manipur boxer Mary Kom chu India aiawh a Commonwealth Games a boxing khel tur zawnnaah a chak zo ta lo. Mary kom hian nimin khan Haryana nula Pinki Jangra chu a hneh tak loh avangin Glasgow (Scotland) a July 23 atanga khelh tan tur Commonwealth Games ah India aiawhin a kal ve dawn ta lo a ni. Mary Kom hian nikum khan a fa 3-na a hring a, tin, a nauneih zawh atanga thla 4-na ah a thin a zaitir bawk avangin a taksa duhthusam in a la fit tawk lo niin a sawi a ni.

India aiawh a boxing khel tur te chu:

Mipa: L Devendro Singh (49kg), Shiva Thapa (52kg), Mandeep Jangra (69kg), Vijender Singh (75kg), Sumit Sangwan (81kg), Dinesh Kumar (91kg), Praveen More (+91kg).

Hmeichhia: Pinki Jangra (51kg), L Sarita Devi (60kg), Pooja Rani (75kg).
*SHAKIRA IN WORLD CUP 2014 HLA 'LA LA LA' TLANGZARH
World Cup hmasa 2010 a 'Waka Waka (This time for Africa)' hla mawi tak a lo sa tawh tu Shakira chuan 2014 FIFA World Cup anthem (hla) 'La La La (Brazil 2014)' tih chu a tlangzarh ta. He hla thar video ah hian a satunu ber Shakira chu thawnhnaw dum in a inthuam a, a kar lakah football star Lionel Messi, Cesc Fabregas, Eric Abidal, Neymar, James Rodriguez, Sergio Aguero, Radamel Falcao bakah a bialpa Gerard Pique te pawh an lang a ni. A video ah hian Shakira leh a chhass Gerard Pique te fapa kum 1 leh thla 4 mi Milan pawh ball a pet lai a lang ve a ni. Tin Brazilian star Carlinhos Brown pawh a khat mawi tawkin a lang a ni. He music video hi Shakira hian khawvel a eitur neilo te buaipui tu World Food Programme (WFP) tanpui nan a siam a nih thu a sawi.

Kumin world cup 2014 ah hian theme song 2 a awm dawn niin a lang a US rapper Pitbull pawn Jennifer Lopez nen zaidunin World Cup official theme song 'We Are One (Ole Ola)' tih chu thla hmasa april khan a lo tlangzarh tawh bawk a ni. Shakira hlasak leh Pitbull hla sak te hi youtube ah en theih in a awm ve ve tawh a ni.

Shakira 2014 FIFA World Cup anthem 'La La La'
GOOD MORNING MIZORAM
LAMTLUANG ZINGKAR CHANCHINTHAR LAWRKHAWM

*POLICE LAL IN BIAL FANG:Deputy Inspector General of Police Southern Range L.H Shanliana, IPS chuan nimin khan Lawngtlai District chhung a Thingkah khua a 3rd Indian Reserve Battalion awmna hmun tur a tlawh .3 IR Battalion awmna tur buatsaihna tur pawisa hi sanction fel tawh niin thla thar atanga hna tan tawh mai tura ruahmanna siam a ni a, a hmun luahtu tur 3 IR Battalion te hi tunah Assam lamah an la awm avangin a hmunhma lo cheibawla bul tan theih tura lo buatsaih turin 2nd Battalion MAP, Lunglei hmuna awmte chu ruat niin, karleh atangin sipai Platoon khat emaw talin an awmchilh nghal dawn nia thu dawn a ni. He hmun cheibawlna tur hian Rs.Vaibelchhe 2850 vel ruahman a ni.

*AGRI HNATHAWK KHAWMPUI: Nimin khan Tourist Lodge, Chaltlang, Aizawl-ah Mizoram Agriculture Service Association (MASA) chuan General Conference – 2014 an hmang. Integrated Training Centre (ITC), Hnahthial hming thlak chungchang te, MASA Cadre Post turin Secretary, Additional Secretary, Joint Secretary post nei ve tura Sorkar-a thlen chungchang te leh Transfer Norms chungchang te an sawiho.

*RORELTUTE:Mizoram Legislative Assembly Secretariat Annexe Building Committee Room-ah Assembly Committee peng pakhat Committee on Public Undertaking chu May 29, 2014 (Ningani) chawhma dar 11 : 00 AM - ah an thu dawn.

Committee-ah hian N.K Chakma chu chairman niin member dangte chu- J.H Rothuama, P.C Zoramsangliana, John Siamkunga, Dr K.Beichhua leh Er. Lalrinawma te an ni.

*THUPEK SUT: Deputy Comissioner, Lunglei District, Lunglei chuan vawiin khan thupek chhuahin, MP(Lok Sabha) Election zawhfel a nih takah chuan Memo No.C.15016/2/2013-DCL dt 13.3.2014 hmanga mimal silai reng reng Police Station hnai berah thehluh tura thupek a chhuah kha vawiin atang hian sut a ni. (DIPR)

*HATIM LUNGLEI: Nimin khan Higher & Technical Institute, Mizoram (HATIM) chuan nimin khan 'Graduation Day 2014' an hmang a, he hunah hian LAD Minister PC Lalthanliana chu Khuallian a ni.Higher & Technical Institute, Mizoram (HATIM) hi Baptist Church of Mizoram (BCM) enkawl lai niin 21 June, 2007 khan he zirna in hi Principal, Lecturer 2, Staff 3 leh zirlai 29 neiin tan a ni a. January ni 24, 2008 khan Education Minister Dr.Lalthangliana khan a hawng a ni. HATIM hian Mizoram University hnuaiah Bachelor of Computer Applications (BCA), Bachelor of Commerce (Honours), Bachelor of Commerce (General), Bachelor of Social Work leh Bachelor of Arts (English Core) Course-te a nei mek a ni. Nimina Graduation Day 2014 hmanah hian zirlai 53 lai heng Course hrang hrang zovin an pass chhuak a ni. (DIPR)

*SIHPHIR VENHLUN H/S: Nimin khan Lal Thanzara leh Deputy Speaker R.Lalrinawma te chuan Sihphir Venghlun High School, HSLC pass tharte lawmpuina programme an hmanpui. Sihphir Venghlun High School hian an sikul atanga regurlar -a exam mi 25 ah 22 an pass a, private a exam 8 an pass bawk. An sikul atang hian Lalnunchama chuan Distinction-ah pass in 9-na dinhmun a hauh a, zirlai 3 dang First Division ah pass in, zirlai 10 Second Division-ah, zirlai 16 chu Third Division-ah an pass a ni.

*EDUCATION DEPTT HOTUTE: Nimin chawhnu khan School Education Minister Pu H. Rohluna chuan Mizoram Education Inspecting Officers’ Association (MEIOA) inkhawmpui chu SSA Mission Conference Hall, DIET Complex Chaltlang-ah a hmanpui a. He hun hi Parliamentary Secretary Pu Joseph Lalhimpuia pawhin a hmanpui a ni.

*CRICKET STADIUM HMASABER HAWNG TA: Nimin a kan rawn post tawh Mizoram a Cricket Stadium hmasaber Aizawl Cricket Stadium, Sihphir a mi chu nimin khan Mizoram Chief Minister Lal Thanhawla'n a hawng. hawng. Stadium sak hna buaipuitu Mizoram State Sports Council hian Cricket Association of Mizoram (CAM) hnenah an hlan nghal a ni. CAM te kuta a awm hnu hian Suaka Cricket Stadium tih a ni tawh ang. Hawnna inkhawm hi R.Lalvena,IAS, Secretary, Sports & Youth Services in kaihruai a ni.

*APUANGTUTE: All India Radio, Aizawl chuan Hmar, Lai, Mara leh Chakma atanga puangtu tur Dialect Casual Announcer leh Hindi Casual Announcer engemaw zat a la thar a, result hi tar chhuah nghal a ni. (DIPR)

*AAP HOTU JAIL AH: BJP hruaitu Nitin Gadkari an politician eiru tia a puh a duh loh vang a Aam Aadmi Party hotupa Arvind Kejriwal lakah thubuai a thehluh ngaihtuah mek ah Arvind Kejriwal chu nimin khan Metropolitan Magistrate hmaah hruai leh a ni a, mahse tihsual neilo ni a a in hriat avangin amah bail na tur bond pawh a sign duh ta chuang lo a, June 6 thleng tang turin Tihar jail ah thawn let leh a ni.

*NAGLAND CM: An state Chief Minister nilai Neiphiu Rio chu Lok Sabha MP atan thlan tlin anih tak vangin vawiin hian Nagaland CM thar atan T.R. Zeliang lakluh a ni ang. Amah hi an state a Geology and Mining minister nilai a ni a, an party Naga Peoples’ Front in Chief Minister thar atan an thlang ta a ni.

*BLACK MONEY CHHUI TUR: Supreme Court chuan sorkar laipui hnenah chawhkar khat chhung a balck money chungchang chhui chiang tur Special Investigation Team (SIT) din turin thupek khauh tak a pe.

*PEON LEH DRIVER FANUTE TAN: Prime Minister ni mai tur Narendra Modi chuan Gujarat sorkar hnuai a thawk driver leh peon fanu te lehkhazir tanpui nan a pawisa khawl atangin Rs. Nuai 21 a pe.

*HNEHNA CHANG: Bihar Chief Minister thar Jitan Ram Manjhi sorkar chu nimin khan thlawptu angah tawk em tih fiah a nia, he trust vote ah hian dan in a phut zat thlawptu neiin hnehna a chang a ni.

*CABINET SIKDAWI: Kan thenawm ram Tripura Chief Minister Manik Sarkar chuan a cabinet minister te hna chanpual a siksawi sak baka Cabinet minister 12-na atan Naresh Jamatia a la lut bawk.

*MEIZU MI TAN HMUN AWM LO: Rajasthan sorkar chuan thupek siamin an state chhung a sorkar hnaruak dil tur reng rengin meizial leh gutkha an zu/ei ngailo tih hriattir ziak a dah zel tawh tur a ti. Meizial zu leh gutkha ei thin te tan sorkar hna dil dawn chuan nghei phawt a ngai tawh dawn a nih hmel.

*THAILAND BUAI: Thailanad ram a sipai ten ram rorelna an lak hnu in an Prime Minister hlui Yingluck Shinawatra leh a chhungte bakah a lamtang politician engemaw zat te chu sipai ten pawn chhuak theilo in an hreng mek a ni.

*PUTIN AN UKRAINSE CHUNGCHANG SAWI: Russia President Valdimir Putin chuan tunhnai a an ram thenawm Ukraine tualchhung buaina thleng vanga dem a hlawk mek laiin Chawlhni a Ukraine inthlanpui neih tur result chu a zah sak tur thu a sawi.

*FLIPKART THANG ZEL: India rama online a thil lei theihna service lar tak Flipkart chuan online a thawmhnaw kaihhnawih zuar thin lar tak Myntra chu US dollar maktaduai 330 in an lei.

*PSG IN DAVID LUIZ LEI DAWN: Chelsea club hruaitu ten an defender David Luiz chu France club pakhat Paris St-Germain hnenah British pound maktaduai 40 in hralh chhawng dawn ta. David Luiz hian 2011 khan Chelsea hi Benfica atangin British pound maktaduai 21.3 hlawh turin a zawm a nih kha kan la hrereng awm e. Tunah hian India pawisaw Rs.98.50 leh British pound 1 a intluk meka ni.

*MIZORAM HRECHIANG ANG: Mizo zing a All India Radio top grade artist awmchhun chu Vanhlupuii, Dawrpui, Aizawl a ni. Rambuai kum 1966 khan All India Radio Aizawl station din tan a ni.

*HMANLAI VAWIIN: Kum 1738 vawiin angah khan Methodist kohhran hmuchhuak tu John Wesley chuan thlarau lam a chaklo takin London a Aldersgate Street ah inkhawmna ah a kal a, chutah chuan thlarau lam harhtharna changin a rawngbawlpui George Whitefield nen Medthodist kohhran an din chhuak ta a ni. Kum 1941 vawiin angah khan zaithiam lar Bob Dylan chu Duluth, Minnesota, U.S. ah a lo piang a, apian tirh hian a hming atan Robert Allen Zimmerman tih phuahsak a ni a, kum 1985 vel khan a hming pangngai aiah Bob Dylan tih hi a pu chho tan a ni.
-----------
"Kan ram Mizoram hi ngaihtuah ila abik in dan siamtu (legislator) leh dan roreltu (judiciary) te hian an chanvo hi an hneh lo deuh niin i hre ve thin em? High Court nei ila dan lam mithiam ten duhsak leh thlei bik nei miah lo in dan ang takin min enkawl se kan thubuai neuh neuh tam tak hi chu a reh in a rinawm. High Court puitling neih hi kan mamawh tak zet in a lang tawh. I ngaihdan comment ah rawn sawi ve rawh le.

Pix: Thlalak kan rawn dah hi kum 1982 a AIR Aizawl station atanga Short Wave(SW) 5050 kHz pek chhuah phalna an nei ta tih AIR Aizawl station director K.P.K Nambiar an a thawhpui Pune a mi a hrilhna post card a ni e. (Courtesy: airddfamily.blogspot.in)
AIR Aizawl Station Director post card

No comments:

Post a Comment