Thursday, 15 August 2013

Morning News (15.8.2013)

This post is in Mizo language, also known as Mizo tawng. Mizo tawng is largely use by Mizo people who are mostly living in Mizoram state in India and it's neihbouring states like Tripura, Manipur, Assam and Meghalaya and also in Bangladesh and Myanmar.

ZINGLAM CHANCHINTHAR LAWRKHAWM (15.8.2013)

*Ahmasaberin vawiin hi India in British awpna lak atanga zalenna ni a hmuh cham vawi 67 na hming chibai kan buk vek a che u. Tukin zing dar 6:25 ah khan a lawmna pui ber chu New Delhi a Red Fort hmun ah nei tanin India Prime Minister Manmohan Singh chuan hnam puanzar pawt pharh in sipai te leh zirlaite chibai buk a chhang let a ni. Mizoram ah chuan a lawmna pui ber Aizawl sipai lammual ah tukin zing dar 9 ah tan a ni ang a, CM Lalthanhawla'n hnam puanzar pawtpharh in sipate te leh zirlai te chibai buk a chhang let ang.

*Mizoram sorkar aiawhte leh HPC(D) hel pawl aiawhte chu nimin khan Tourist Lodge, Chaltlangah an inbia a, duh dan a inan loh avangin inkahhaina thuthlung, Suspention of Operation (SoO) chu pawtsei a ni lo. Tin Autonmous district council chungchang pawh sawi lan a nia, mahse thutlukna siam a ni lo. -Vanglaini

*Vawiin atang hian Mizoram a nitin chanchinbu semchhuah tam ber Vanglaini chuan Mizoram a hmasaber atan phek 12 in an tichhuak ta.

*Mizoram Synod chuan tun hnaia Ramhlun Sports Complex-a leimin tuarte hnenah Synod Relief Fund atangin chhawmdawlna a pe a, leimin avanga in chhia chhungkaw 15 hnenah Rs. 5,000/- theuh leh mi in luaha khawsachhungkaw 23 hnenah Rs. 2,000/- theuh, a vaiin Rs. 1,21,000/- a sem ral a ni. -Synfocity

*Nimin atang khan ui leh kel thlun pawlh ang mai inhal tawn Israel leh Palestine sorkar hruaitu te chuan inremna zawngin inbiakna an tan ta. An inbiakna hmun hi security lam afimkhur thu hla vangin mipuite hriat ah an puangzar duh lo a ni.

*Zanin atanga Pathianni zan thleng awh tur Mizoram Synod Mission Board hnuai a Home Mission & Cachar Tlangram Missionary Retreat, chu Aizawl Chawlhhmun Presbyterian Kohhran Biak In ah tan a ni dawn.

*Nimin khan Pachhung University College library building thar, cheng nuai 280 sĂȘnga sak chu Mizoram University vice chancellor, Prof. R Lalthantluanga'n a hawng. Nimin vek khan PUC te hian an college dincham lawmnan a thlawn thisen unit 292 an pe.

*Egypt (Aigupta) ram a nimin a tualchhung buaina chhuak ah mi 235 chuang an thi tawh. Egypt ah hian sipai sorkar in rorelna an chang mek a ni.

*Vawiin tlai dar 3 ah hian Hyderabad Mizo Association te chuan kumin an member kalthar te pualin freshers' social hun St.George's Church Hall, Abids ah an hmang dawn.

*Pachhunga University College-a Department of History-a zirtirtu pahnih - Malsawmdawngliana leh Rohmingmawii te lehkhabu buatsaih, 'Mizo Narratives : Accounts from Mizoram' tih chu nimin khan PUC seminar hall-ah Mizoram sorkara principal secretary, RL Rinawma'n a tlangzarh. -Vanglaini

*Nizan khan Seventhday Adventist, Southern Asia Division hnuai rorelna inkhawm President's Council chu Mizoram Chief Minister Lalthanhawla'n Tourist Lodge, Chaltlang, Aizawl ah a hawng, he inkhawmpui hian 18 Aug thleng a awh ang.

*Nimina Aizawl a Traffic Rules bawhchhia man zat : Two Wheeler 6, Taxi 11, LMV 6, HMV 1, Bus 1, fine tlingkhawm Rs 5,400/-

*Reserve Bank of India chuan mimal leh company ten  ramdang a pawisa an peipun dawnin RBI phalna an la hmasa tur a ni tiin khuahkhirhna thupek thar an siam.

*Hindu atanga Kristian a inlet Kanti Lakra chu a an khua Kesura, Hazaribag Dist, Jharkhand a Hindu ten Kristian dana phum an phalloh avangin Police venhimna hnuai ah nimin khan Kristian danin vuiliam a ni. He nu khawngaihthlak tak hi a thih hnu hian a pasal  Shiv Prakash Ram chuan Kristian dan a phum a tum a an khua a Hindu ho tan chiah thlan/mitthi halna a awm avangin an huan ah phum a tum ta chu pawh chu an khaw miten dodal in a tawp ah Police te venhimna hnuai ah Kristian dan ngeiin  sorkar ram ah phum a ni ta a ni.

*Kumtin Mumbai khawpui a naupiang 3,000 te chu thla 1 chhung in inenkawlna tha awm tam loh vangin an boral leh ziah thin niin mithiam ten an chhut.

*vairam lamah purunsen man ala to uchuak hle zel a, sorkarin ramdanga purunsen thawn chhuah man pawh a ti sang hial a ni. India ah hian Maharashtra, Karnataka leh Gujarat te purunsen thar chhuak hnem ber anni a, kumin fur ruah tui a tam avangin kum dang angin an thar chhuak tha thei lo a rampumah purunsen man a to phah ta a ni.

*Central YMA in Zo beihpui a thlak hnuah Phunchawngah Zu a tlem phah sawt a, rem chu ala rem lo a, a hranpa a bihchian teh vak ngai lo khawpin a rem niin an sawi.-DINGDI

* LPS Vision leh ICFAI Mizoram tandun buatsaih HSS Quiz intihsiak Second round-ah nizan khan Helen Lowry Higher School leh St.Pauls HSS te an in tum a, St. Paulsin point 125 hmuin Hellen Lowry HSS in 115 an hmu a, St.Pauls an chak ta zawk a, zanin hian Synod HSS leh Chaltklang HSS an intum ve leh ang. -via Special Report
________________________________
Lamtluang in blog thar kan siam a www.lamtluangnews.blogspot.in ah pawh tlawh theih reng kan ni ta e. Sorkar hnathawk te leh zirlaite chawlh hman nuam vek ule.

No comments:

Post a Comment