Monday, 10 March 2014

9th & 10th March 2014 news in Mizo

Latest news collection in Mizo language
MIZO TAWNG A CHANCHINTHAR LAWRKHAWM
10.3.2014
*Lamtluang pawh sangnga kan chuang
Nangmahni vang liau liau in facebook a Lamtluang page pawh in like tu 5000 kan chuang ve ta. I thiante la like ve lo te kha like tir nghal mawlh mawlh rawh le, an tan malsawmna i ni thei a nia. In zavaia chungah kan lawm em em e.

*Mizorama eptu pawl (MNF, ZNP, MPC etc.) ten MP Lok Sabha candidate tur an la thlang fel thei lo, vawiin a meeting an neihna ah an duhdan a inhmu thei lo a, ZNP lamin an hruaitu zing a mi vawrh an tum ni a sawi a ni. Naktuk zingah MNF party in hemi vang hian thutkhawm an nei dawn ni a sawi a ni bawk.
 
*VAWK LEH VAWKSA ATANGA THIL SIAM LAKLUH KHAP
Addl.District Addl. Magistrate thupek angin Aizawl District huamchhungah ram dang (foreign country), a bik takin Myanmar atangin vawk leh vawksa atanga thil siam natna hri pu lut thei tur ang chi reng reng lakluh khap tlat a ni. Thupek hi March ni 4 atangin thlaruk chhung hman tur a ni. Vawk natna hri (Porcine Reproductive & Respiratory Syndrome) chu khawvel hmun hrang hrangah a leng mek a, he natna avanga vawk thi hriat tur a lo awm tak avangin Aizawl District mipuite’n PRRS hrileng avanga harsatna an tawh lohnan he thupek hi tihchhuah a ni. - DIPR

 
*407 TRUCK CHESUAL AH MI 2 THI
Vawiin tlai dar 4:00 PM pelh hret khan Tuipang piah lawk, Tourist Lodge bulah Tuisi atanga Laki lama inneih man pe turte leh Contract hna thawk tura kalte chuanna motor 407 No-MZ 03-4096 chu a chesual a, mi 19 chuang zingah 2 an thi a, thite hi motor khalhtu nupui nei hlim hlawl Pu Beithlalo leh kum 27 mi tlangval Thady, Sudili Fapa te an ni a, Tuisi khua ve ve an ni. Serious tak tak an tam a, Tuipang CHC ah hliam te hi enkawl niin Saiha Dist Hospital a refer turin an buaipui mek. Motor hi Mt 100 chuang a lum a, a chhe hneh hle. Motor hian cement leh balu a phur tel.
Source: Baithai M Baithai via DINGDI Group

 
*FALKAWN A ZOKHUA KANG
Vawiin chawhnu dar 3 vel khan Art & Culture Dept ten Falkawn a Zokhua (Typical Mizo village) an siam chu a kang a thi leh hliam an awm lo. Kangmei chhuak hi hnamchawm in atanga kang tan a ni a, Lalin leh khawnbawl in bakah zawlbuk te chu bungrua engmah chuh hman lohin a kang ral. Art & Culture department lamin an chhut danin Falkawn Zokhua a kangral hi nuai 60 man hu vel niin an sawi.
Source: Vanneihthanga Vanchhawng via SPECIAL REPORT Group

 
*NOKIA IN ANDROID PHONE HRALH CHHUAK VE TA
Nokia chuan an products zinga android operating system hmang hmasaber tur mobile phone thar 'Nokia X' chu Rs.8,599 a lei theih in an zuar chhuak ta. Nokia X model ah hi a screen len zawng chu inches 4 niin Dual-SIM a hmang a,processor ah 1GHz dual-core Qualcomm Snapdragon a hmang a, RAM ah 512 MB a hmang bawk. Internal memory 4GB awmsa in microSD card 32GB a hmang tel thei bawk. Camera 3MP fixed-focus a hmang a, wi-fi, bluetooth leh A-GPS a hman theih bawk. Google service leh apps leh play store hman theih tur a siam 'Nokia X' hian Android 4.1.2 a hmang a ni.

 
*FOOTBALLER HAUSABER CHRISTIANO RONALDO
Goal Rich List 2014 in Real Madrid player Christiano Ronaldo chu khawvel a football khel mek zing a hausaber ah an thlang. C.Ronaldo hausakna zat hi 122 Million(Maktaduai) pound niin nikum a hausaber a an thlan David Beckham khan 165 million pound a nei a nih kha. David Beckham hi a chawlh tawh avangin thlan nawn theih a ni ta lo. Footballer hausa thlan na a 2-na chu Barcelona player Lionel Messi niin 120.5 million pound neiin 3-na chu Chelsea player Samuel Eto'o a ni a 70 million pound a nei a, a 4-na chu Manchester United player Wayne Rooney niin 69 million pound a nei a ni.

 
*2G Scam vanga Telecom Minister a nihna atanga bang ta leh a hnu a Tihar jaila tang chhunzawm ta A.Raja chu DMK party in Tamil Nadu a MP candidate 1 atan an thlang leh mauh mai.
 
*MISS CHAPCHAR KUT 2014, REBECCA VANLALPEKI
Mizo nula hmeltha Miss Chapchar kut Rebecca Vanlalpeki, Aizawl
Kum tina a lo tih thin tawh angin Diktawn Magazine chuan Miss Chapchar Kût Aizawl 2014 atan Rebecca Vanlalpeki (K-18) d/o D/o R. Lalrinzuala (L), Ramhlun Sports Complex, chu a thlang chhuak. 1st Runner Up - Lily R. Lalbiakdiki d/o R. Lalnithanga, Chhinga Veng; 2nd Runner Up - Bethsy Lalremtluangi d/o R. Zonunsanga, Hunthar Veng; 3rd Runner Up - Lalrindiki d/o Lallianmawia, Chhinga Veng ; 4th Runner Up - Lalrinchhuangi d/o Lalhmachhuana, Chaltlang Mualveng leh K.T. Brenda Lalnunpuii d/o K.T. Lalhriata, Upper Republic.

March ni 13 (ningani) dar 1 khian Zonet Studio-ah lawmman hlanna inkhawm neih a ni dawn a, Lalthanzara, Minister of State leh H. Zothangliana, Parliamentary Secretary ten lawmman an hlan ang.

Miss Chapchar Kût 2014, Rebecca Vanlalpeki hian Rs. 10000 bakah thilpek hlu tak dawng ang a, kum 2014 chhung zawng thla tin Rs. 1000 a dawng bawk ang. 1st Runner Up hian Rs. 5000, 2nd Runner Up in Rs. 3000, 3rd Runner Up in Rs. 2000, 4th Runner Up in Rs. 1000 an dawng ang a, heng bakah hian thilpek hlu tak tak an dawng theuh bawk dawn a ni.
Source: Diktawn Zofa via Diktawn Monthly Magazine Group

 
*AWNGTLAI BAWRHSAP IN KHAPNA THUPEK SIAM
Vawiin khan Lawngtlai District Magistrate Pu J. Hmingthanmawia chuan Section 144 Cr. Pc. 1973 tlawhchhanin Lawngtlai District chhungah Myanmar atanga Vawk lakluh leh zawrh khapna thupek a ti chhuak.

Thuchhuahin a tarlan danin, Mizoram Sawrkar AH & Vety Department thuchhuahin a tarlan danin tunlai hian Mizoram chhungah Vawk natna Viral Disease Porcine Reproductive and Respiratory Syndrome (PRRS) a leng nia hriat a ni a, he Vawk natna awm chhan ber pawh Myanmar atanga Vawk lakluh a nih vang nia hriat a ni.

Hei vang hian District Magistrate chuan Lawngtlai District huam chhungah, Myanmar atang vawk lakluh leh zawrh lam chi reng reng a khap a, natna avanga Vawk thi reng reng uluk tak leh thuk taka khur laia phum vek tur leh ran talhtu ten Vety Doctor hnen atanga ran hrisel ngei an talh a ni tih hriatpuina nei hmasa vek turin thu pek a chhuah bawk.

He thupek hi thuleh a awm hma chu thla hnih chhung atana hman phawt tur a ni. - DIPR

 
*Ruang hmu
Nikum (2013) December 14 a Synod Revival Camping Centre, Neihbawi/Sihphir atanga bo Pu Lallianpuia (k-40), Mission Veng chu inrinni chhun khan Sihphir ramah a ruang hmuh a ni a. Lumen pui a ni a, nimin Pathianni chhun dar 12 khan vui a ni. - DINGDI

 
*GOVERNOR-IN LAWMPUI (Governor congratulate Team Mizoram)
Mizoram Governor Pu Vakkom Purushothamam chuan Mizoram Football Team-ten Santosh Trophy-a champion an nih chungchangah lawmpuina thuchhuah a hnuai ami ang hian a siam.

March ni 9, 2014 – a National Football Championship Santosh Trophy hlu tak Mizoram Team – ten an chang thei hi hlim takin ka lawmpui a ni. He hlawhtlinna hian rampum huap inelna sang takah state dinhmun a chawi kang a, thalaite theihna leh tumruhna a pholang chiang a ni. Mizo thalaiten an theihna an lantir hi nakin hun zelah pawh rampum huap inelnaa hmahruaitu an nih ka beisei. State sorkar pawhin thalaite chungah beiseina sang tak neiin Olympic Vision 2016 atan pawh beiseina sang tak kan nei zui phah dawn a ni.

Mizoram Football Team leh Mizo mipui zawng zawngte ka lawmpui takzet a ni. -DIPR

 
*MLTP ACT SIAM THA RIH DAWN LO
Tun hnai a Mizoram mipui te zinga sawi hlawh tak MLTP Act thlakna tur dan thar siam tur chungchang ah Mizoram Legislative Assembly tun thla ni 18 a tan turah he dan thar hi put luh tur a sawi a nih mek laiin put luh a ni rih dawn lo a ni. Vawiin Aizawl atanga chanchinbu chhuak pakhatin a sawi danin, Lok Sabha inthlan dawn anih avangin sorkarin thuthlukna lian tham a siam a rem lo a, chuvangin MLPC bill hi putluh a rem dawn ta lo niin a tarlang. MLTP Act thlakna tur Zu bill thar tur chu kumin July thla velah emaw Assembly inkhawm neih leh hmasak ber ah putluh tum a ni.
Source: Lalhmachhuana Tochhawng via DINGDI Group (Mizoram daily news)
 
*National newspaper lamah pawh #Santosh_Trophy a Mizoram champion chu an tial nasa hle. The Hindu (10.3.2014 Issue)
The Hindu newspaper covering about Mizoram winning Santosh Trophy
9.3.2014
*
#Santosh_Trophy 2014 a Mizoram champion lawm nan Mizoram sorkar in tunkar nilaini hian chawlh a puang dawn ni a sawi a ni.
*#Santosh_Trophy 2014 Final Result: Mizoram 3 - 0 Indian Railways
Mizoram team thanks giving prayer after winning Santosh Trophy 2014 final match against Indian Railways by 3 - 0
Mizoram team thanks giving prayer after winning Santosh Trophy 2014 final match against Indian Railways by 3 - 0
68th National Football Championship ah Mizoram chuan 3-0 a Railways Team hneh in an champion ta. Mizoram team tan a Goal khungtute hi Zico Zoremsanga (vawi 2) leh F Lalrinpuia (Vawi 1) te anni. Mizoram team te hian final a an chak hnu hian an inkhelhna Kanchenjunga Stadium, Siliguri khelmual lai tak ah ding kual in "Halleluiah" ti a an aurual hnu in Pathian hnenah lawmthu sawi a tawngtaina a huho in an nei leh a ni. TV a an inkhel tichhuak tu DDK commentator chuan "Mizoram team te hian an chak apiang in khel mual laiah Pathian hnena lawmthu sawi tawngtaina an nei thin" tiin a sawi chhuak nghe nghe. Mizoram team te kan chhuangin kan lawmpui em em a che u. WE ARE THE CHAMPION! THANK YOU TEAM MIZORAM!!
 
*March 7 - 9 chhung hian Durtlang Presbyterian Kohhran Biak Inah Mizoram Presbyterian Kohhran Hmeichhe Rorel Inkhawm vawi 7-na neih mek a ni. Thupuiah ‘Lalpa lam i hawi ang u’ (Tah Hla 3:40) tih niin Dr.Lalnghakthuami, Associate Professor, ATC; Pi Rosangpuii, Central Committee Member leh Rev. Lalramliana Pachuau, Executive Secretary i/c Women te thupui hmang a Pathian thuchah an sawi tu anni . He rorel inkawhm hi zanin ah tiak ang.
 
*Mizoram Baptist Kohhran Rorelna sang ber – BCM Assembly vawi 118-na leh Assembly kum 100-na ni bawk chu Serkawn-ah neih mek ah vawiin chawhma inkhawm ah khan Pastor 6 nemngheh anni a, chungte chu:
1. K. Vanlalzika (Bawngkawn) – Zawlnuam bial
2. David Lalmalsawmna Sailo (Haulawng) -Diltlang bial
3. T. Hmangaihvulluaia (Paithar) – Lungchem bial
4. C. Malsawmzuala (Parva) — Bungtlang South bial
5. K. Lalsanglura (Saitual) – Farkawn bial
6. VL Buatsaiha – Kenya
Source:www.mizobaptist.org

No comments:

Post a Comment