Saturday, 29 March 2014

27th, 28th & 29th March 2014 news in Mizo

Latest news collection in Mizo language
MIZO TAWNG A CHANCHINTHAR LAWRKHAWM
29.3.2014
*KHAWPUI THAR THLIR DAWN
Sorkar laipui chuan Andhra Pradesh atanga Telangana a indan dawn tak vangin Andhra Pradesh state khawpui thar tur lo ngaihtuah turin member 5 awmna panel a din ta. Member te chu K. Sivaramakrishnan (retired IAS officer), Prof K.T. Ravindran, Prof Jagan Shah, Aromar Revi leh Dr. Rathin Roy te anni. Andhra Pradesh khawpui Hyderabad chu Telangana state thar in khawpui atan an hmang chhunzawm ang a, hetih rual hian kum 10 chhung Hyderabad hi Andhra Pradesh leh Telangana ten an intawm hrih dawn bawk a ni.
 
*CJI THAR ATAN JUSTICE LODHA RUAT
Supreme court judge tanglai zinga senior ber Justice R.M. Lodha chu april 26 atang a Chief Justice of India 41-na ni turin sorkar in an ruat fel ta. Justice Lodha hi 1994 ah High Court Judge ni tanin Bombay leh Rajasthan high court ah a thawk thin a, may 2008 ah Patna High Court Chief Justice ah hlankai a ni a, December 2008 atangin Supreme Court Judge atan lakluh tan a ni. Amah hi acid zawrh khapna dan passed tu kha a ni.
 
*IAF THLAWHNA TLA
Nimin khan India in tunhnai a US hnen atanga a lei Indian Air Force thlawhtheina Super Hercules (C-130J) chu Madhya Pradesh leh Rajasthan ramri Karauli District ah a tla a, a mi chuang Air Force sipai 5 te an boral vek a ni. Nimin zing dar 10am khan Agra atangin an thlawk chhuak a, an vanduai zui ta a ni. Super hercules thlawhna hi aman chu Rs. Vaibelchhe 965 man a ni.
 
28.3.2014
*Supreme Court in India cricket thuneitu sangber BCCI President lailawk(Interim working President) atan Sunil Gavaskar a ruatthar. BCCI President N.Srinivasan chu IPL season 6 thubuai dik taka chhui a nih theih nan bang turin an hriattir a ni.
 
*March 27 - 30, 2014 chhung hian National Council of Churches in India (NCCI) Centenary - North East India Celebration, Synod Conference Centre & Mission Veng Kohhran Biak Inah neih a ni dawn a, Mizoram Synod-in a thleng dawn a ni. Pi Zaii Hall, Synod Conference Centre-ah Centenary lawm hawnna programme neih a ni dawn a, a lawmna pui ber chu March 30, 2014 hian Mission Veng Kohhran Biak Inah neih a ni ang. NCCI hruaitute hi palai 100 vel an ni dawn a, heng bakah hian a thlengtu Mizoram Synod, Baptist Church of Mizoram, Aizawl Theological College leh Mizoram Theological Association atangin palai engemaw zat an tel dawn bawk a ni. - Synfocity=480
 
27.3.2014
*EXCISE & NARCOTICS TEN RUIHHLO MAN
Vawiin khan Excise & Narcotics Department (END) thawktute chuan heroin (No.4) gram 46 leh a neitu Singneihpari (35) d/o Paudokhup, Khampat, Amanhnit ‘C’ Group, Myanmar chu Edenthar Vengah an man. He ruihhlo hi Myanmar lam atanga lakthlak, Aizawl-a hralh an tum mek lai niin END chuan tarlangin, an mi man hi Section 21 (b) of The Narcotic Drugs & Psychotropic Substances Act, 1985 (NDPS Act) hnuaiah thubuai an siamsak nghal a ni. - DIPR
 
*WHO IN INDIA AH ZENGHRI AWMLOHNA AH PUANG
Vawiin tlai a New Delhi a Health Ministry in thuchhuah an siam danin India ram chu World Health Organisation (WHO) in zenghri(polio) awmloh na a puang ta. Ti hian India chu South-East region a zenghri awmlohna ram 11-na a ni ta a ni. A region ang zawng pawh in WHO hian South-East Region hi zenghri awmlohna apuan zing a 4-na a ni dawn ta a ni. 1994 khan America region chu polio free region ah a lo puang tawh a, 2000 ah Pacific region chu puang leh in 2002 khan European Region pawh zenghri awmlohna ah a lo puang tawh a ni.
 
*KUM 17 HNU AH PIANO TUM THIAM YANNI INDIA AH LO KAL LEH DAWN
Khawvel huap a piano tum thian Yanni chuan 1997 a Taj Mahal a concert a neih hnu a India ram a concert a neih leh hmasakber tur hun a ti chiang ta. 14 April 2014 zan dar 8 ah hian Nehru Indoor stadium, Chennai ah concert a nei ang a, 18 April 2014 zan dar 8 ah White Orchir Convention centre, Bangalore ah concert a nei chhunzawm leh dawn a ni. Chennai concert ticket man hi Rs. 2000 - Rs. 20000 a ni a, Bangalore concert ticket man chu Rs. 2500 - Rs. 20000 ni thung. #Yanni hi a hming tak chu Yiannis Chryssomallis niin 14 November 1954 khan Kalamata, Greece ah a lo piang a 1972 khan B.A Psychology zirtruin United states of America ah a pem a ni. US a a pem tan tirh hian a lehkhazirna University of Minnesota student Union ho thlengsil te in a inhlawh ve nasa thin a ni. Saptawng a thiam nal zan loh avangin theih tawpin a zir a, a hnua a sawi leh danin saptawng zir chu thiam chak a har duh khawp mai paragraph tin hi a awmzia hre turin vawi tam tak chhiar nawn tlut tlut a ngai a ti hial a ni.
 
*SAMSUNG IN GALAXY S5 HRALH CHHUAK DAWN
Samsung chuan android phone #Galaxy_S5 chu kumin April ni 11 atangin India ramah a lei theih tawh dawn niin an sawi. Aman hi Rs.51,000 - Rs.53,000 niin India ram khawpui 8 leh online atang te hin Rs.1500 advance a pekin a lei theih dawn a ni. Glalaxy S5 hi rawng chi 4 - adum, avar, apawl leh rangkachak rawng te a ni dawn a ni. A screen hlai zawng hi 5.1 inch niin 1080 x 1920 pixels AMOLED screen a hmang a, camera 16MP a nei a, a hmalamah 2mp camera a awm a, RAM 2GB a chak a hmang a 1.9 Ghz exynos processor a nei bawk. Android 4.4.2 version hmangin battery 2800mAh a hmang a, a body hi tui leh vaivut luhtheih loh tur a duan a ni a, finger-print scanner a awm bak ah heart-rate sensor a awm tel bawk. Internal memory 16/32 GB a nei a, microSD card 64GB thleng hman tel theih bawk.
 
*CRICKET THUBUAI AH SUPREME COURT IN BCCI HOTU BANG TURIN TI
Supreme Court of India chuan nikum khelh zawh tak Indian Premier League (IPL) a thamna leh thildiklo awm dik tak a chhui a nih theih nan Board of Control for Cricket in India (BCCI) ni mek N.Srinivasan chu bang turin an hriattir. IPL season 6 ah khan Chennai Super Kings (CSK) leh Rajasthan Royals (RR) a infiammi thenkhat te pawisa a tham annih avangin he thubuai hi a kal mek a, BCCI President ni mek N.Srinivasan te company Indian Cements hian Chennai Super Kings hi an enkawl lai niin amakpa Gurunath Meiyappan chu he thamna pek thubuai ah hian a inrawlh thuk hle nia hriat a ni. Supreme Court hian thuthlukna a siam thar berah chuan Chennai Super Kings leh Rajasthan Royals team te hi kumin a neih tur IPL season 7 ah hian an thubuai tihfel a nih hma chuan tel tir loh nise an ti a, tin BCCI President lailawk atan Sunil Gavsakar chu ruat nise an ti bawk. Court hian BCCI chu zirtawpni ah an thuthlukna thawn let turin a hriattir a vawiin khan BCCI hian an president chuan he thubuai dik tak a chhui a nih theih nan ban a tum thu court an hriattir a, thubuai chhhui chhung chuan an secretary Sanjay Patel an BCCI chu lo kaihhruai hrih mai se an ti ta a ni.

No comments:

Post a Comment