Tuesday 18 November 2014

16th November 2014 news in Mizo

Latest news collection in Mizo language
MIZO TAWNG A CHANCHINTHAR LAWRKHAWM

16.11.2014
*CHINA OPEN AH INDIA MI 2 CHAMPION
China Open khelh zawh takah India badminton khelthiam K.Srikanth chu mipa final ah a champion a, India badminton khel thiam tho Saina Nehwal pawh hmeichhe final ah a champion bawk. India mi 2 te hi an che tha hle a ni.
 
*IS FIRFIAK TEN AN MI MAN LU TAN SAK
Islamic State (IS) firfiak te chuan US mi Peter Kassig leh Syria sipai 18 an man te chu an lu an tan sak lai video an tlangzarh.
 
*PATHIANNI ZING CHANCHIN THAR LAWRKHAWM
*Synod Executive Committee vawi 252-na report a alan danin kumin 2014 June thla atanga October thla chhungin Synod Relief Fund atangin Damlo rethei mi 38, Rethei leh rualbanlo mi 34, Tuilian vanga thi mi 2, Leimin tuar mi 15, Thlipui tuar mi 23, Kangmei tuar mi 26 leh thil danga harsatna tawk mi 35 hnenah tanpuina sum pek a ni.

*November 10 - 28, 2014 chhung awh tur Missionary Orientation Training chu November 10, 29014 atang khan Mission Veng Kohhran Hall-ah neih tan a ni. Training hi Synod Mission Board-in kum 2015 chhung missionary (Evangelist, Evangelist Teacher, Staff Nurse, Health Worker, Craft Teacher, Office Assistant) tur mi 119 a lak tharte puala neih a ni.

* Christian Hospital Serkawn ah November 13, 2014, chhun khan
Cabin block thar hawn a ni a, hawnna leh Pathian hnena hlanna hi Upa Dr.B.Laldinliana, Medical Superintendent-in kaihruaiin Report a pe a, Rev. Lalbiaksanga Chinzah, Associate General Secretry, i/c Service in Pathian hnenah hlanna leh lawmthusawina neiin a hawng nghal a ni. Tuntuma Cabin block thar hawn takah hian hian Cabin 8 a awm a ni.

* Nakum 2015-a Mizoram Baptist Kohhran Hmeichhe Pawl(MBKHP) Inkhawmpui Hnahthiala lo awm tur atan Thlarau lam inbuatsaihna pakhat atan Hnahthial khawpui chhunga Kohhran hrang hrangah a rualin November 15-23, 2014 hian Mass Evangelism Programme buatsaih a ni dawn a. Hnahthial North leh South bial huam chhungah hian Kohhran 12 a awm a, Biak in
tinah Crusade/camping hi neih a ni dawn a ni.

* Mizoram UPC hnuaia rampawna thawk Missionary Puala Seminar chu November ni 10, chawhma dar 11 hian Headquarters Biak In Tuikhuahtlang, Aizawl-ah neih a ni. He seminar ah hian missionary 100 vel bawr an tel a ni.

* Union Minister of Health and Family Welfare, Jagat Prakash Nadda chuan sorkar laipuiin ramchhung mipui te tan health scheme thar a duang thuai dawn a ti.

* US Department of Homeland Security hnuai a Immigration and Customs Enforcement te report thar ber in an tarlan danin US a ramdang atanga lehkhazir awm tamber dawttu chu India zirlaite anni. US a India zirlai pun chak lam chu 28% niin zirlai 1,34,292 an awm tling a ni. Australia leh New Zealand ah pawh India zirlai te an pung chak hle a, UK ah erawh pun lam aiin an tlem tial tial zawk a ni.

*Mumbai khawpui sir Mulund hmuna cheng mipa naupang kum 8 mi Aryan Parab chuan kum 2014-2068 thleng calendar a tahrik ni te chu eng ni ber nge (entirnan Thawhlehni) tih second 30-40 inkar chhung a sawi dik vek thei. A thluak that zia entirnan hian mi hrang hrang in kum lo la awm tur a calendar a ni zat te chu engni nge a nih ang tih an zawt a chhan sual a nei lo ni a sawi a ni.

*West Bengal thingtlang khaw thenkhat ah tunkar liamta chhung khan rorellai Trinamool congress leh BJP mi leh sa te nasa takin an intibuai a, hmun tam taka tharum thawhna a thleng a ni. Nimin khan Sirsita khua ah bomb an tipuak hial a ni. Party pahnih te inkar a buaina chhuak hi chinfel tumin police tam tak in buaina chhuahna hmun te an awmchilh mek a ni.

* Democratic Republic of Congo chuan an ram chu ebola natna lak atangin an fihlim ta niin an puang. Congo ramah hian thla thum liamta chhung in ebola hrileng vangin mi 49 an boral a ni.

*China chuan ebola hrilenna hmun Africa ram hrang hrang ah tanpuina hna thawk turin an ram sipai PLA medical team atangin mi 1,000 thawn chhuah a tum. Zirtawpni khan sipai 163 Liberia ramah a thawn a, tin, hemi ni vek hian sipai 41 te pawh Sierra Leon ah a thawn bawk.

*China Open Super Series Premier khelh mek ah India badminton khel thiam Saina Nehwal leh K.Srikant te chu hmeichhia leh mipa final an lut ve ve a ni.

*India chess khelthiam Vishwanathan Anand chuan Russia a World Chess championship khelh mek ah champion lai Magnus Carlsen chu a game 6 na ah a hneh lo. A vaiin game 12 khel tur anni a, game 6 khelh an la hmabak a ni.

*Indian Super League khelh mekah nizan khan Indira Gandhi stadium, Guwahati ah NorthEast United FC leh FC Pune city te goal thun lo ve ve in an in draw a ni.

*Brisbane, Australia a khawvel sorkar lian rual 20 te inhmuhkhawmna G20 summit neih mekah ram hrang hrang hruaitu ten Russia chu Ukraine buaina a a sipai te lachhuak vek turin an ngen hlawm. He inhmuhkhawmna ah hian.kan rawn tarlan tawh thin angin India PM Narendra Modi pawh a tel ve a ni.

*Kan thu post hmasak ho te khu i la chhiar lo a nih chuan "see more" tih kha hawng la i keu thla zel thin dawnnia. Midang ten an hriat tawh lai inhriat ve loh kha kan hlauh pui che ania. Pathianni hman nuam vek ule.
 
*SIMEIKHU AH PHILAE THLALEM A THI
Nilaini liamta a European Space Agency te thlalem kahchhuah Philae chu simeikhu (comet 67P) ah darkar 57 a awm hnu in a khawl tinungtu battery a zawh takin a vangin biak pawh theih a ni ta lo. Philae hi ni zung chakna hmanga a battery recharge theih tur a duan ni mahse, a han tumna hmun simeikhu ah ni sa a awm tlem avangin a inti nung zo ta lo ni a ngaih a ni.

Lamtluang thulakna in a tarlan danin Philae hi lei atanga mihringte siamchhuah thlalem hmanga simeikhu thleng hmasaber a ni. A vawi khatna anih avangin simeikhu leilung awmdan hi mihring tumah in an la hrechiang bik lo a, a han tumna hi kham emaw hmun awih deuh a nih avangin, a tum nghehna tur a duan angin a tum fuh thei ta lo a ni. ESA spacescraft operation manager Stephan Ulamec chuan simeikhu in ni a hnaih deuh hunah Philae thlaem battery tihnun leh theihna hun a la awm mai thei niin a sawi.
 
*FACEBOOK IN MAN CHAWI LO A PAGE SIAM TE NEWS FEED TIH TLEM SAK Facebook chuan an sumlakluhna tih len nan kumin January thla atang khan kalphung thar an hmang a. Sumdawng leh pawlho, a thlawna a an sumdawnna emaw pawl hminga page nei te chu customer ten an thil post an hmuhkim an duh chuan pawisa chawi/ad lei angai tawh an ti. Chung pawisa chawilo a thlawn a thu/video/thlalak post thin te chu fb hmangtute news feed an dawn tur an tih tlem sak tawh a ni. Hei vang hi a niang Lamtluang pawh hi a thlawn in kan post thin sia notification dawng in tlem em em tak ni!! Amaherawhchu, kan thu post te in comment leh like hian in friendlist a kan page like ve tu ten kan page an lo hmuh tam phah ve thei a, comment lamah leh like lamah he thu post hmu pha chin te chuan tan min lo lakpui ve thin turin kan ngen che u a ni. Tin, kan page a thu post te i like loh emaw comment ngailoh chuan notification i dawng khat tial tial bawk dawn a ni.

No comments:

Post a Comment