Latest news collection in Mizo language
MIZO TAWNG A CHANCHINTHAR LAWRKHAWM
13.11.2014
*DIRECT BENEFIT TRANSFER SCHEME CHUNGCHANGA FCS & CA DEPARTMENT THUCHHUAH
Indian Oil Corporation Limited (IOCL) hnen atanga thu dawn danin, kum 2015, April atangin Central Sawrkar in Mizoram a Domestic LPG Consumer-te tan Direct Benefit Transfer Scheme a kalpui tawh dawn a. He scheme ruahmanna-ah chuan, LPG Consumer ten LPG Distributor/Agent-te hnen atangin Gas man tlawm a lei tawh lovin, a man pangngai (Market Rate) in an lei tawh ang a, a man tlawmna (Subsidy) chu Consumer-te Bank Account-ah sawrkar in a thunsak tawh dawn a ni. Hetianga kalpui anih tawh dawn avang leh Consumer ten he hamthatna hi an dawn ngei theihna atan, Domestic LPG Connection neitu zawng zawng ten Indian Oil Corporation Limited (IOCL)-in a rawn duan, Form 3 leh Form 4 hmangin, Gas Subsidy an dawnna tur Bank Account Number leh Mobile Phone Number, an mahni Distributor/Agent-te hnenah theuh thehluh tur a ni. Bank Account neilo leh thehlut lo chuan he hamthatna hi a dawng ve thei lo ang.
Mizoram chhunga Consumer-ten harsatna an tawh loh nan leh felfai zawk a kalpui anih theih nan, a hetiang hian ruahmanna siam a ni:
i) Consumer-ten Bank Account No. leh Phone No. thehluhna tur form hi copy khatah Rs.5/- ai a to lovin Distributor-ten an hralh thei ang. Midang Form lei-sa pawh photocopy siam a hman theih a ni ang a, internet atanga download pawh pawm a ni bawk ang.
ii) Consumer-te awlsam zawkna atan, Distributor hnenah kal kher ngai lo in, Bank account nei sa tan,Bank-ah ‘Form 3’ hmangin an thehlut thei bawk ang.
iii) Consumer ten form an thehluhna ah hian an Bank Passbook, thlalak leh Hming leh Account No. lanna photo copy an thil tel tur a ni.
iv) He Direct Benefit Transfer Scheme atanga consumer-ten harsatna an tawh loh nan leh leh hun tiam hma a zawhfel a nih ngei theih nan Distributor-te hmalakna lo tawiawm turin, mipuite a ngen a ni. (DIPR)
*CASEY WILSON IN NAUPAI
'Marry Me' tih film changtunu Casey Wilson chuan a pasal David Casley nen a an fa hmasaber tur a pai mek thu a sawi chhuak. Hemite nupa hi kumin May ni 25 khan OJai Valley Inn, Ojai (California, US) ah an innei a ni.
*THUPEK
Sub-Divisional Magistrate, Aizawl District Aizawl chuan Sec.144 Cr.P.C. 1973 in thuneihna a pek angin a hnuaia mi ang hian thuchhuah a siam :-
New Secretariat Complex huam chhung hmun hrang hrangah hian Driving Scholl-a zir te leh mi hrang hrangten motor/lirthei khalh an zir thin tih hriat a ni a. Helai hmun hi sorkar office pawimawh awm khawmna a nih bakah ke a kal mihring te leh lirthei vei vak te tan a hlauhawmin a him tawk lo hle tih hriat anih avangin helai hmuna motor/lirthei khalh zir hi khap ngei tula hriat a ni a.
Tun atang chuan New Secretariat Complex Khatla huam chhungah hian mi tumahin motor/lirthei khalh an zir tawh tur a ni lo.
He thupek pawisa lo tute chu Dan anga hrem theih an ni ang. He thupek hi sut leh a nih loh chuan vawiin ni 15.11.2014 atanga thla hnih (15.1.2015) chhung a huam ang. (DIPR)
*THOSI IN MIHRING THISEN AN ZUK DUHNA CHHAN HRECHHUAK
Rockefeller University, New York a mithiam te chuan thosi in mihring thisen an zuk duh na chhan hi mihring taksa a chemical awm sulcatone rim an hriat theih vang a ni an ti. He mi rim hi mihring ten kan neih avangin thosi te chuan kum sang tam tak kalta atang khan chaw awmna rim niin an lo hre thang tawh a ni an ti.
*TLAILAM CHANCHINTHAR TAWI
*Tamil Nadu sorkar chuan an Chief Minister hlui J.Jayalalitha chu kum 10 chhung atan sorkar kaihhnawih a tel thei lo turin hremna a pe. A bial Srirangam Constituency pawh a ruak anga ngaih tur leh inthlan that nei tur a tih a ni.
*Sorkar in petrol leh diesel atanga chhiah (excise duty) a tihpun avangin petrol leh diesel man litre 1 zel ah Rs.1.50 in tihsan a ni a, hei hi petrol pump ten an zawm nghal dawn em tih a la hriat loh.
*Nizan a kan rawn post European Space Agency te te thlalem kahchhuah Philae chu simeikhu ah a tum hnu in a chin hriat loh in a awm mek. ESA scientist te hian Philea atang hian engmah inbiakpawhna leh thlalak an la dawn belh thei hrih lo a ni.
*Supreme Court chuan sorkar laipui hnenah ni 10 chhung a state leh UT zawng zawng chief secretary te ko khawm a India ram hmun hrang hrang a chenna in leh lo neilo te chhawmdawl dan tur ngaihtuah rang turin hriattirna a pe.
*India leh US chuan eitur chhekkhawl chungchang ah inremna thar an siam. Hei hian WTO thuthlung India in a ziahpui duh loh chungchang ah awmzia a nei hle tur a ngaih a ni. WTO thuthlung ah chuan ram pakhat in ram dang a thawn chhuak lo a eitur a chhek khawl teuh bik hi phalloh a ni.
*Post hlui te khu 'see more' tih kha click la hai thla zel teh nizan leh nimin lama kan news post i la chhiar loh a tam a nia. I hrelo bik ang tih kan hlauh pui che.
*BOARD MEMBER ATAN RUAT
All India Board Examination for Finger Print Expert-2014, November 15 - 22, 2014 chhunga New Delhi-a neih tura Board member 4 (palin) zingah Pu H. Sangchungnunga, Joint Director, Forensic Science Laboratory, Mizoram chu ruat a ni a ; North-East atanga he board member atana ruat hmasak ber a ni. All India Finger Print Expert Examination hi National Crime Record Bureau (MHA) Government of India chuan kum tin a buatsaih thin a ; heta tlingte chauh hi All India Finger Print Expert atan pawm an ni thin. (DIPR)
*LAMTLUANG ZINGKAR CHANCHINTHAR LAWRKHAWM
*Mizoram legislative assembly session neih mek chu vawiinah chhunzawm leh a ni ang.
*Kumin September ni 28-a thi, a tuk ni 29-a North Chaltlang thlanmuala phum tak J Lalawmpuia (20) s/o.Laldawngliana ruang chu nimin khan Magistrate kaihhruaina hnuaiah phawrh lehin, a hmunah Post Mortem a ni. J.Lalawmpui hi September ni 28, 2014 khan Aizawl Ramhlun Sports Complex-ah nikhaw hrelo-in hmuh a ni a, damdawiin panpui a nih laiin a thi a, a chhungten Bawkawn P/S ah FIR an thehluh avang in a ruang hi phawrh leh a ni.
*School Education Department leh Health & Family Welfare Department tangkawpte chuan Children's Day leh World Diabetes Day pualin Fitness Run, naktuk November ni 14, 2014 ah an buatsaih dawn.
*Nimin khan Mizoram Chief Minister Lal Thanhawla'n All Mizoram Farmers' Union (AMFU) din champha vawi 20-na Vanapa hall, Aizawl ah a hmanpui.
* Vaivakawn-Kanan-Seventh Day Tlang kawng peng thuam lai kawngpui tawt thin lutuk sutkian nan kawngpui rawt hniam chungchang sawihovin nimin chawhnu khan UD&PA Minister Pu Zodintluanga hovin Secretariat Conference Hall ah sorkar department kaihhnawih officer te leh helai kawngpui hmangtu veng hrang hrang
khawtlang hruaitute an thukhawm. Kawng rawthniam hna hi tunkar Inrinni zan dar 6 atanga thawh tan tur a tih niin chawlhkar khat chhung a thawh zawh hman an inbeisei a ni.
* Maharashtra Assembly speaker thlan thar Haribhau Bagade chuan nimin a Maharashtra assembly session a thusawi tur a an state Governor lo luh lai a mawi lo tak a an khawsak avangin Congress MLA panga te chu kum 2 chhung atan hremna a pe.
*Lamtluang ah kan rawn post tawh thin angin Inrinni liam ta a Chhatisgarh thingtlang khua Pendari a sorkar doctor ten nu nau nei tawh lo tur an siam te zing a thizat chu 13 an tling ta. (I la hriat chian loh chuan kan post hmasa ho hai let la). Heng hmeichhe insiamte khawihtu ber Dr.R.K Gupta chu police ten thuzawhfiah turin an man tawh a ni. Khami ni khan nu 83 a insiam tir a, insiam nan hian nu pakhat khawih nan minute 2 vel a hmang ni a sawi a ni. Nu 70 te he insiamna avang hian damdawiin ah enkawl mek anni.He thil thleng enfiah tur hian AIIMS, Delhi doctor rual ten Chhatisgarh an thleng tawh a, nimin khan damlo te hi an enfiah a ni.
*Nimin zing khan Gwalior, Madhya Pradesh ah sipai lak tur intlar laiin electric hrui chat a awm tih thuthang a awm avangin sipai a intlar ho an inchil buai a mi 50 chuang in hliam an tuar.
*Nimin khan India Prime Minister Narendra Modi chuan Myanmar ram khawpui Nay Pyi Taw a Park Royal hotel ah Myanmar ram a mipui thlan sorkar din duhtu leh Opossition leader ni mek Aung San Suu Kyi a ti ti pui. I lo hriat loh takin Suu Kyi hi Lady Shriram College, Delhi a lehkha zir thin a ni. PM Modi hian Myanmar ah hian India-ASEAN summit vawi 12-na a hmang a ni.
*India sorkar chuan Indian railways hnuai ah rel(train) ekin, a tihfai leh insukna tha chi siam nan leh zun leh ek sawngbawl nawn turin ram dang atangin company te rawih phalna a pe. Hei hi Foreign Direct Investment dan kalphung ang a tih tur a ni.
*Nimin khan Tamil Nadu a Dindigul district huam chhung a Vilampatti khua a Kallar Higher Secondary School a pawl 12 zirlai Vinod chu a pawlpui pa nen an insualna ah a thaw a chham a boral.
*Russia chuan NATO sipai hotuten Ukraine khawchhak lama Russia zawm duh pawl helpawl te pui tur a sipai leh tank rual a tir chhuak nia an sawi chu thudik lo a ni a ti.
*EBOLA VANGA THI ZAT PUNG ZEL
World Health Organization (WHO) thuchhuah in a tarlan danin Africa khawthlang lama ebolna natna hrileng vangin November ni 9 thleng khan mi 5,147 an thintawh a ni. He natna vei chhinchhiah tawh zat chu mi 14,068 an awm a ni.
*POLICE IN ZIRLAI NAUPANG SAWISA
Kolasib Police Station a duty lai Lalremruata IR battalion a mi chuan Diakkawn Salem veng naupang, Class X zirlai Malsawmtluanga chu mobile phone rû ah a puh vangin Police Station ah silawng khawpin kut a thlak a, hei vang hian exam a chhunzawm theilo. Kut thlaktute atang hian nizan thlenga ngaihdam dilna mumal tak an la dawn loh vangin naupang chhungte hi an
lungawi tawh lo hle.
Source: Kolasib Aw
*MARC ANTHONY TE INNEI TA
Tunkar Thawhleni (11 Nov) khan zaithiam Marc Anthony (46) leh a bialnu model kum 26 a upa Shannon De Lima chu a in La Romana,Dominican Republic ah "tiam tlat e" an ti ta. An inneih hmanpuitu te hi mi sawm bik 100 anni. Nupa tuak thar te hi kum 2012 atang khan a chang a intihthiamloh nei ve fo chungin an lo inkawp tawh a ni. Marc Anthony hi Jennifer Lopez pasal hlui a ni tih inhriat sa kha, tun a a nupui De Lima pawh hian midang lakah fapa 1 a nei tawh bawk a ni.
*SIMEIKHU AH MIHRING SIAM THLALEM TUM TA
India sana a zanin dar 9:30 khan European Space Agency te kahchhuah thlalem Philae lander an tih chu Simeikhu (Comet 67P/Churyumov-Gerasimenko) ah him takin a tum ta. Thlalem Philae lander hi India sana a vawiin chawhnu dar 1:30 khan a kengtu thlalem lianzawk Rosetta spacecraft atang a tawlh chhuak in simeikhu hi a pan a ni. Philae lander hian simeikhu a thla a lak te chu Rosetta spacecraft ah a thawn hmasa zel anga chuta tang chuan lei lamah scientist te zirchian turin a rawn thawn chhawng leh thin dawn a ni.
No comments:
Post a Comment