Tuesday, 18 November 2014

15th November 2014 news in Mizo

Latest news collection in Mizo language
MIZO TAWNG A CHANCHINTHAR LAWRKHAWM

15.11.2014
*ANGELINA JOLIE RED CARPET AH
Kumin August thla a Brat Pitt nen an inneih hnu a mipui hma a a inlan leh hmasak ber ni turin nimin Zirtawpni zan khan Angelina Jolie chu 2014 Hollywood Film Awards semna Palladium ah a in lan.
 
*LAMTLUANG WEEKEND SPECIAL (MIZO JOKES)
Zirlai 1 : Result a chhuak dawn, va en ang hmiang...
Zirlai 2 : Ka buai lutuk, min rawn en kep la, Subject khat ka fail chuan
"Chibai" rawn ti la, subject hnih ka fail a nih chuan in pafa in chibai tih i rawn sms mai dawn nia..
A hnu deuh hlek ah chuan.
Zirlai 1 : ( SMS) " Thianpa in chhungin chibaiule.." 
 
*MISS NORTH EAST CONSTEST RESULT
Nizan a Tourist Centre, Beraw tlang, Aizawl a Miss North East contest neih zawh tak result chu hetiang hi a ni:
Winner - Rupali Longjam, Manipur
1st runner up - Suman Lyngdoh, Meghalaya
2nd runner up - Ananya Sharma, Assam
 
*INDONESIA AH LIRNGHING
Vawiin chawhma lam khan Indonesia khawchhak lama Maluku thliarkar ah 7.2 magnitude a chakin lir a nghing. Lirnghing vang hian Tsunami a thleng thei ni a hriat a nih vangin inralrinna thu chhuah nghal a ni. Lirnghing vang hian thi leh hliam an awm hriat a la ni lo.
 
*LAMTLUANG ZINGKAR CHANCHINTHAR LAWRKHAWM
*Nimin khan Dungtlang lalfanu,Lianchhiari ruhro chu a thihna hmun Hreichuk khua ami chu Dungtlang VC,NGO leh Hreichuk VC leh NGO te chuan phawrh in urhsun takin hun hman a ni. Hemi hnu hian Dungtlang lamah a ruhro hi phurh chhoh a ni ta ni. Lianchhiari hi a ngaihzawng Chawngfiang nen inneih tum anni a, an palai in sual a chhuah avangin an innei ta lo a, a lungleng in khawdang a pemta Chawngfianga a thlirna hmun chu tunlai thlengin 'Lianchhiari lunglen tlang' tia hriat a ni.

*Nimin zing dar 4:30 a an hostel atang a tlak vang a boral O2 Academy, Hyderabad a zirlai Malsawmdawngsanga (25), Govt. Complex, Aizawl ruang chu vawiin ah Hyderabad atangin Kolkata panpui hman beisei a ni a, ruhman anga thil a kal a nih chuan Pathianni ah Mizoram thlenpui hman tur a beisei a ni.

*Boko Haram firfiak pawl ten Nigeria ram a kumin April thla a sikul naupang hmeichhia 200 an ruk chhuahna khua Chibok chu Ningani tlai ah khan an thuhnuai ah an dah ta. Chibok khua hi Kristian awm tamna khua a ni.

*I lo hriat loh takin Boko Haram te hi Nigeria ram a Muslim firfiak pawl niin an sakhua Islam rorelna hnuai a Nigeria ram leh tum tute anni. Kum 2002 khan an indin tan a, an din tan tirh a an tumber chu khawtlang ram te zirna dodal a ni. Kum 2009 atang khan ral beih hna an thawk tan a ni. An pawl hming awmzia hi "Khawthlang zirna/zirtirna khap tlat a ni (Western Education is forbidden)" tihna a ni.

* European Space Agency (ESA) te chuan an thlalem kahchhuah Philae in nilaini a simeikhu (comet 67P) leilung a thlen hnu lawk khan a awmna chiah an chhuizawn thei rih lo a, heti chung hian Philae thlalem hian simeikhu thlalak thenkhat chu a mah kengtu thlalem lian zawk Rosetta satellite hnen ah thlalak thenkhat a thawn hman tho a ni. ESA scientist te hian Philae thlalem hi a hmalam hun tur sawi har an ti a, a chhan pawh an awmna tak an hriat chian theih tak loh ah chuan a mah tinungtu battery pawh a tawp thut thei niin an sawi a, an beisei anga an han chhuizui thei lo a nih chuan a battery hian vawiin bak a daih an ring lo a ni.

*UK a Coventry a cheng mipa naupang kum 5 mi Ayan Qureshi chu khawvel a Microsoft exam a pass naupang ber a ni. Ayan hi a pa chu IT consultant a ni a, a pa hian kum 3 a nih lai atangin computer hmandan a lo zirtir tawh a ni. Microsoft exam hi computer lama specialist nih tum ten an hmachhawn thin a ni a, Ayan-a hian a hmachhawn dawn tum hian exam vengtu ten a naupang lutuk an lo ti a, mahse a pa in a exam a dilpui hnuah ah phalsak a ni. Exam chu tha takin a pass ta a, tihian khawvel a Microsoft Certified Professional naupang ber a ni ta a ni. An chhungkua hi 2009 khan Pakistan atangin UK ah an pemlut a ni.

* National Pharmaceutical Pricing
Authority (NPPA) chuan India ram damdawi hralh tam ber pawl chi hrang hranh 100 te chu man tlawm zawk a zawrh tawh turin ruahmanna a siam. An ruahmanna te hi health ministry pawmpui turin an thawn tawh a ni. Heng damdawi man tih tlawm tur a tih te hi stress, hypertension, HIV, nachhawkna leh pneumonia damdawi te anni.

* BSF intelligence wing ten sorkar a report an thehluh ah China sipai ten India ramri hrul ah Pakistan sipai te ralthuam hman dan an zirtir thin niin an sawi.

*Aam Admi Party hotupa leh Delhi CM hlui Arvind Kejriwal chu Delhi assembly inthlan lo awm turah New Delhi assembly constituency ah a ding nawn leh dawn niin an party hruaitu pakhat chuan a sawi.

*Sochi, Russian a khelh mek World Chess Championship ah India chess khelthiam Vishwanathan Anand chuan champion lai Magnus Carlsen chu game 5-na ah a draw pui. Game sarih khelh tur an la nei a ni.

*India President Pranab Mukherjee chuan nimin khan India ram pum huap a naupang academic, sport leh culture lama hlawhtlinna nei mi 20 hnenah chawimawina a hlan.

*Tukin hian Mizoram khawpui lian leh thingtlang khaw tam tak ah vawk leh bawng thahnem tak talh a ni. Hei hian chhungkaw tam tak te Pathianni tuk chawei a tih tui phah hle thei dawn nia rin a ni 
 
*PRINCE WILLIAM TE NUPA IN US TLAWH DAWN
Kumin December ni 7-9 chhung hian Kumpinu lalfapa te nupa Prince William leh a nupui Kate Middleton te chuan US khawpui pahnih New York leh Washington DC an tlawh dawn. December ni 8 ah Prince William hi Washington DC ah kal in World Bank in anti corruption conference an neih turah a tel ang a, Kate Middleton chh New York a cham chhunzawm in tualchhung child development center a tlawh ang. Hemi ni tlaiah hian an nupa in NBA inkhel an en dun ang. A tuk zing ah an nupa hian youth centre an tlawh ang a, zanah St.Andrews University ah gala dinner an kil dawn a ni.
 
*MTV STAR CANCER IN BORAL
MTV Real World/Road Rules Challenge season a a changtunu thin Diem Brown (32) chu tunkar Zirtawpni (November 14) khan chibawm (ovarian) cancer avangin a boral. Kum 2006 khan cancer a ni tih hriatchhuah a ni a, mahse a natna chuan inhneh tir tum lo a MTV a challenge show ah a tel chhunzawm zel a, chemotherapy vawi nga la tur a tih a ni a, mahse vawi 1 chauh a la la hman tih ah a boral ta a ni. Kum 2012 thleng khan cancer vei chungin MTV show ah a la tel a ni.
 
*ISIS FIRFIAK TEN A HRANGA PAWISA NEIH AN TUM
Tunlai a Middle East leh Africa khawmual pui ram thenkhat te chawkbuai em em tu ISIS firfiak pawl te chuan an mahni a pawisa (currency) siam chhuah ve an tum. An pawisa siam tur hi rangkachak (gold), tangkarua (silver) leh darsen (bronze) a siam a ni ang a, a hmingah Islamic dinar tih a ni dawn a ni. He thupek hi the Islamic State pawl thuneitu sang Shura Council in a pawmpui tawh a ni.

No comments:

Post a Comment