Wednesday, 24 December 2014

Mizoram pawn a Mizo te Krismas hman dan tur

ENGTIN HMANG MAW KAR HLA A LENG RUALDUH TEN?
Lamtluang in Mizoram pawn - India state dang leh ramdang a Mizo awm te kan theih ang angin kan be pawp a, a hnuai a mi ang hian hmun dang a awm Mizo ten Krismas programme 2014 hman an tum:

#Delhi Mizo Inkhawm (DMI) te chuan zanin urlawk zan programme chu dar 8:30 atangin an hmang tan ang. Krismas ni pawh Mizoram house ah hian an hmang chhunzawm dawn a chawhnu dar 2:30 ah tanin ruai an theh ang.

#Mumbai Mizo Christian Fellowship (MMCF) te chuan vawiin tlai dar 4 ah Aruna Children's home an tlawh dawn a. Lamtluang thu dawn danin, naktuk Krismas chu YMCA hall, Byculla ah an hmang dawn a, ruai an theh nghal ang.

#Hyderabad Mizo Christian Fellowship (HMCF) te chuan vawiin tlai dar 4:30 hian St.George's Church, Abids ah Urlawk zan programme an hmang dawn a, Krismas chu tlai dar3 ah Railway Officer's Club, Tarnaka, Secunderabad ah an hmang dawn a, ruai an theh nghal ang.

#Bangalore Mizo Christian Fellowship (BMCF) te chuan Krismas ni chawhma dar 11 atangin Seventhday School Auditorium, Spencer Road, Near Coles Park ah an hmang tan ang a, ruai an theh nghal ang. Tin, Lamtluang thu dawn danin Bangalore Mizo Presbyterian Church (BMPC) te chuan UTC Campus ah Krismas ruai nen an hmang bawk ang.

#Chennai Mizo Welfare Association (CMWA) te chuan Krismas chu Anderson Hall, Madras Christian College (MCc), Tambaram ah ruai nen an hmang dawn a ni.

#Culcutta Mizo Christian Service (CMCS) te chuan zanin urlawk zan chu zan dar 6 atangin Mizoram House, Ballygunge ah an hmang ang a, ruai theh a ni ang. Krismas ni pawh tlai dar 3 atangin a hmun ngai Mizoram House ah hian an hmang chhunzawm ang a, tlaiah ruai an theh leh ang.

#Pune Mizo Christian Fellowship (PMCF) te chuan zanin dar 8 ah Urlawk zan programme Salisbury park ah an hmang ang a, naktuk Krismas chu an inkhawmna hmun pangngai Hindustan Covenant Church, Solapur Road ah an hmang ang a, tlaiah Salisbury park ah ruai an theh ang. Tin, Lamtluang thu dawn danin Spicer Adventist University, Pune a Mizo awm Mi 180-200 bawr te chuan an campus chhungah ruai nen ropui takin lawm an tum bawk.

#Nagpur Mizo te chuan December ni 22 zan khan Nagpur khawchhung a mi chanhai te blanket leh eitur leh thawnhnaw te pe in an thawk chhuak a, ni 23 zan khan NCCI Campus ah mei chhep in Pathian faka zaiho neih pahin sawhchiar an pir bawk a. Tin, Krismas ni pawh YWCA hall ah ruai nen ropui takin lawm an tum a ni.

#Guwahati Mizo te chuan mahni kohhran biak in theuh ah a hrangin an hmang dawn a ni. Lamtluang thu dawn danin Presbyterian kohhran chuan zanin atangin ruai nen an hmang tan dawn a, naktuk ah pawn ruai an theh chhunzawm ang.

#India chhim Tamil Nadu a Mysore khawpui a Mizo awm te pawh in ruai nen Krismas hman an tum.

#America Mizo Seventh Day Adventist te chuan urlawk zanah zaikhawm in chhangban leh eitur dangte siam in hun an hmang dawn a, Krismas ruai vawi 2 theh turin an inbuatsaih mek bawk. Lamtluang thu dawn danin America ah hian Mizo kohhran hrang 4 an awm a, chungte chuan mahni lawina kohhran theuh ah Krismas ruai nen lawm an tum vek a ni.

#Dubai (Rasalkhaimah) a Mizo awm mi 4 te pawh in an awmna hmun inhlat tak tak atangin Krismas hman ho an tum bawk a ni. Tin, Lamtluang thu dawn danin UAE a awm Mizo te hian December ni 17 khan Pi Nancy Khiangte te chenna in ah Winter meet cum advance Christmas an lo hmang ho tawh bawk a ni.



#Chandigarh Mizo Inkhawm ten naktuk tlai dar 3 ah YWCA hall, Sector 11 ah inkhawmna hun an hmang a, ruai an theh nghal bawk ang.

#Pondicherry lam pawn zaninah urlawk Tv Vincent-a an PMF secretary inah eitur tuihnai tak nen an hmang ang a. Krismas Ni hi tlai dar 4:30 ah, Calvary Church near Pondicherry Institute of Medical Science , Mizo Pastor Rev Lalthakima enkawl mek kohhranah Inkhawmna neiin chhangban ruai nen lawm an tum a ni.

#Tirunelveli (Tamil Nadu) a awm te chuan Krismas chawhma lam ah Inkhawmna nei in, chawhnu lam chu Home ah Christmas thilpek pe a hun hman an tum.

#Ziro, Arunachal Pradesh ah pawh Mizo missionary 30 ten khawvawt tak karah hlim taka hman an tum.

 
#Ram pawn khawpui leh hmun danga awm Mizo a huho a Krismas hman tum kan la tarlan loh te in awm chuan comment ah emaw inbox ah min rawn hrilh ula, kan lo tarchhuak zel dawnnia. Mizo Kristian khawvel hmun hrang hrang a mi te Krismas hlim taka in hman kan duhsak che u a, in Krismas hman dan tur te Lamtluang hnenah min rawn hrilh ve zel turin kan ngen che u a ni.

Mizo Christian Fellowship in different parts of the country

No comments:

Post a Comment