Sunday, 20 April 2014

19th & 20th April 2014 news in Mizo

Latest news collection in Mizo language
MIZO TAWNG A CHANCHINTHAR LAWRKHAWM
20.4.2014
*Mizoram Congress Party Spokesperson (Thupuangtu) leh Media Department-a Secretary Lalrozara tun hnai Mizoram Police CID ten Khehpuam chungchanga an man zingah khan a tel a, vawiin khan Aizawl Civil Hospital ah a hriselna Doctor ten an endik hnu in Central Jail lamah an thawn thla ta a ni.
 
*PONDICHERRY UNIVERSITY ADMISSION TIH THEIH
Pondicherry University (Central University) ah Post Graduate course zir tum tan online application 23.4.2014 - 15.5.2014 chhungin a thehluh theih. Chiang zawkin University website http://www.pondiuni.edu.in/ ah en theih e
 
*DELHI UNIVERSITY PG COURSE APPLICATION HUN PAWTSEI
Delhi University Post Graduate online application submit theih hun chhung pawh sei ani a tunthla 30th April thleng online a apply theih a ni, hetah hian mumal zawkin en theih http://admission.du.ac.in/pgadm/

 
*THINGTLANG MITEN AN LEILAWN SIAM AH POLITICIAN TE KAL VE PHALLO
Bihar a Dharbanga parliamentary constituency huam chhung a thingtlang khua te chuan Lok Sabha inthlan April 30 a neih tur ah vote thlak an tum loh thu an sawi a, politician ten inthlan dawn apiang a luiral leh lam khuate Kamalpur - Brahmotar Ghat kal kaina tur cement concrete a lei dawh an intiam ziah hlawhtling ngai chuang silo chu an hre peih tawh lo niin an sawi. He an lungawiloh avang hian nikum November thla khan in tin a Rs.3 khawnin an mahniin mau leilawn metre 40 a sei, metre 3 a zau an dawh chawp ta a, chu an lei dawh chu thuthiam hlen ngailo politician (MP & MLA) te zawh ve an phal sak loh avang in heng khua ah te hian politician tumah campaign tur in an kal kai ngam ta lo a ni.
 
*FACEBOOK CHHASS IN A BUM VANGIN KAPHLUM
Nimin khan tlangval kum 22 mi U.P a Muzaffarnagar khua a mi Vineet Singh chuan Jabalpur ah kum 3 chhung facebook kaltlang a lo biak C.K thin Jyoti Kori chu a kaphlum. Police ten an chhuichianna ah Jyoti Kori hi nu pasal nei tawh kum 45 mi niin fa 3 a nei tawh a, housewife a nih avangin facebook ah a chat regular thin hle a, nula kum 21 mi ni a insawiin a profile picture ah pawh filmstar thlalak a hmang thin a ni. Amah kaphlumtu Vineet Singh nen hian online a intawngin kum3 chhung inhmu lo a an lo chat tawh thin hnu ah nimin khan Jabalpur a marble rock ah inhmu turin an in tiam a, an in hmuh nuah a bialpa chuan bum a ni tih inhrechhuak in silaiin a kaphlum a, amah pawh inkap ve nghal in a hliam tuarin lo in damdawiin a thi chhunzawm ve leh a a ni. A ruka mipa lo be thin Jyoti Kori pasal hi irrigation department ah clerk niin fa 3 an nei a, an fanu upaber pawh kum 21 mi a ni tawh a ni.
 
*"Isua a tho ta sawi ang khan" Happy Easter!
Easter Sunday  Morning 2014
Pix:azassk
*Lal Isua thawhlehna ni hriatrengna Easter Sunday Chibai le!
 
19.4.2014
*MIZORAM KOHHRAN LIAN 2 EASTER SUNDAY 2014 PROGRAMME
Mizoram Presbyterian Kohhran te chuan naktuk Easter Sunday hian Synod atanga thupui thlan sa 3 - "Thihna leh thlan thim hneh zovin Isua a tho leh", "Tho leh Lalpa Minunga hi a mite hnenah a inlar" tih leh "Isua thihna leh thawhlehna tawmpuitute rilru put dan tur" tih hmang te in chawhma, chawhnu leh zan inkhawm ah te thuchah an ngaithla dawn a. Hetih lai hian Mizoram Baptist Kohhran chuan naktuk Easter Sunday Chawhma lam Inkhawm ah Headquarters atanga Easter Sunday thupui thlan sa – “Thawhlehna Thiltihtheihna” tih hmangin thusawituten thuchah an puang ang a. Ram pumah Tawngtai thupui thlansa hmangin tawngtairual a ni bawk ang. Chawhnu lamah Kohhran inpawlhona leh zaikhawm awmin zan lamah pawh Inkhawm banah zaikhawm programme siam a ni bawk ang.
 
*Mizoram Baptist Federation (MBF) chuan a vawi khatna atan Lunglei Chanmari Biak inah April 25-17, 2014 hian General Conference an nei dawn a, Conference thupui atan “Inpumkhatna” (John 17:11) tih thu hman a ni ang. Zirtawp zan-atangin zan tin Vantlang Inkhawm leh Chhun lamah pawh Inkhawm leh Fellowship Programme te siam a ni. Inrinni chhun dar 11:30-4:00 chhungin MBF Rorel a awm ang a, hemi chhung hian Rorel ve lo te pualin Fellowship program siam a ni bawk. Heng Programme hrang hrangah hian Kohhran member a duh apiang tel theih a ni.

Tunah hian Mizoram Baptist federation (MBF) ah han member (Association) 5 an awm mek a chungte chu:-

1.Baptist Church of Mizoram (BCM)
2.Lairam Isua Krista Kohhran (LIKBK)
3.Zomi Baptist Church (ZBC)
4.Evangelical Baptist Convention(EBC)
5.Conregational Church of India, Maraland (CCIM)
6.Fundamental Baptist (FBAM)

MBF Hruaitu ni mek te:
Chairman : Rev. H. Lianngaia
Chairman Elect : Rev. Dr. Raltawnga
Secretary : Rev. Dr. Lalpekhlua
Asst. Secretary : Rev. AZ Beirakhaw
Treasurer : Rev. TC Lalsanghmuna
Fin. Secretary : Upa L. Laizika
Source: www.mizobaptist.org
 
*Vawiin khan Jammu & Kashmir a Nowpora khua, Sapore district ah firfiakpawl Lashkar-e-Taiba (LeT) lo tanpuithintu Imran Ahmad Jabroo chu zirtawpni zan a tualchhung hmeichhe 1 kidnap a tum vangin mipui lungawilo in a chenna in leh a in kawt a car 2 awm te an hal ral sak a ni.

*Australian official ten Malaysia thlawhtheihna bo MH370 black box Indian ocean tuihnuai a an zawn mek chu ni 5-7 chhung a zawh theih an inbeisei a hetih lai hian Malaysia Transport Minister Hishammuddin Hussein ve thung chuan "Vawiin leh naktuk atan he kan thil zawn chungchang ah hian dinhmun khirh tak ah kan ding mek a, engemaw tal kan hmuh chhuah theih nan khawvel a mi zawng zawng te min tawngtaipui turin kan ngen a che u" tiin a sawi a ni.
 
*Abdelaziz Bouteflika chu Algeria President atan thlan nawn leh a ni. Amah khingtu Ali Benflis chuan inthlanna ah hian thil fel tawk lo a awm tiin a tang ve thung.
 
*Australian National University (ANU) leh Germany ram a University of Heidelberg mithiam inkawp ten chloroquine hmanga sikserh(malaria) enkawl dan thar an hmuchhuak.
 
*Nimin khan Mizoram leh khawvel hmun hrang hrang ah Kristian ten Lal Isua tuarna pualin Good Friday programme urhsun takin an hmang.
 
*GOOD FRIDAY PUALIN INKHENGBET

Nimin Good Friday khan Philippines ram hmarlam San Pedro Cutud khua ah kumtin an lo tih thin dan angin Lal Isua tuarna hriatpui nan mi thenkhat in Kros ah an inkhenbeh tir leh a ni. Kros a inkhenbeh tir hi mi 18 chuang an tling a, an zingah hian lemziakthiam Ruben Enaje (53) te Demark mi Film siamtu Lasse Spang Olsen (48) te pawh an tel a ni. He tiang a mahni duhna avanga Kros a inkhenbeh tir hi he khua a Roman Catholic kohhran leh Health department lam chuan mihring taksa tan a pawi thei thil ni a hriat avangin tihtawh loh an duhthu an sawi chamchi a ni.

No comments:

Post a Comment