FACEBOOK ATANGIN PAWISA A HLAWH THEIH EM???

Tuna kan thu chhiar tur hi, mi tam tak chuan kan hriat sa a ni thei e, a la hre ngai lo te kan awm takin i han sawi dawn ila.

Tunlai hian Facebook i hawnin Mizoram leh Mizo kaihhnawih chi thlalak chi hrang hrang post thinna page, i follow leh like pawh ni chuang si lo i hmu ve fo thinin a rinawm. Heng page te hian FB atangin sum a lakluh theih tih an hria a, an hmang tangkai a nih a rinawm.

Facebok-ah hian sumdawng tan emaw mimal pawn manchawia thil va zawrh leh vawrh lar ang chi advertisement a tih theih lam chu tun tumah hian sawi rih ta lo ila. Mi tupawhin sum an hlawh theihna dan lam hi kan sawi tum chu a ni.

A hre tawh sa te tana sawi kan nih loh avangin kimchang lutukin sawi ta lo mai ila. Facebook-ah hian page neite tan sum hlawhchhuah awlsam a, tin mimal account atang pawn milar leh thiam thil nei tan chuan public view theih tura dah chuan sum hlawhchhuah theihna a awm a ni.

I facebook page emaw mimal account kha follower i ngah viau chuan, Facebook lamin pawisa hlawh chhuah theihna i duh em? tih ang chi message, e-mail-ah leh i notification kaltlangin an rawn hriattir thei che a ni. Chumi ti tur chuan reels tha tak neih te, thlalak mi hmuh leh lawm tur chi post that a ngai, chung vanga follower i ngah chuan sawmna i dawng thei ang.

A chung lama kan sawi tawh angin, chung chu a lo hre tawh ten, Mizoram leh Mizo thil thlalak chi hrang hrang a neitute phalna pawh la hmasa lem lo emaw credit mumal pe chuang si lovin an lo post nasat tak em em ni. Helai tak hi mi kutchhuak kan post chhawng dawn anih chuan an phalna lak ngei ngei a tha, kan la lo a a pawi vak lo tur chi kan post chhawng anih chuan credit mumal tak pek hi kan bat a ni.

Youtube channel ang deuh tho hian, Facebook a i page emaw account mitin thlir theih tur (public account) awm chi anih chuan, follower leh likes i ngah a comment te a tam viau chuan pawisa i la lut thei dawn a ni. Chutiang ti tur chuan taihmak leh teirei peih erawh angai tih hriat tel tur a ni.

Anmahni va dem lam ni lo vin, chutiang lo varpawh tawh te chuan page an siam a, an page siamah Mizo group hrang hrang a mi thlalak post tawh te an lo download a, an post chhawng leh a, nang leh kei chuan an sum hlawhna a ni tih hre lem lo vin kan khua/kan veng te a lo lan chuan kan lo comment phur ve em mai a nih hi. Kan khawchhak unauten chung chu an uar zual ni te pawn a hriat.

Chutiang anih si chuan, nang pawh phone i nei a, thla i la thiam a, in veng te, in khua te kha thla la la, post thin la, i vahvelna apiangah thla la la, post ta zel mai la, follower i ngah hunah chuan sum lalut thei tur khawpin i lo awm thei ngei ang. Facebook page siam ve tawp mai phawt teh le.

Pu Mapuia of FTH te fiamthu ang deuhin, Mizoram chhungkaw tin atang hian Facebook page nei pakhat zel awm ta ila, chung chu in follow sak tawn ta vek bawk ila, in like sakin in comment sak zel thin bawk ila, fb kan hman pah hian chhungkaw tinin pawisa kan lalut thei mai tur asin.

Mizo te zingah thlalak thiam kan ngah a, mahse, kan photographer te hian page siam lam aiin group vela post hi an duhtawk tlangpui, anni pawn an thiamna leh talent neih te hi an lo hlawkpui theih nan page siam lamah tan la se, an duhsak awm khawp mai. Group aiin page neih a hlawk zawk niin a hriat.

Facebook page siam dan phei chun Youtube lamah pawh Mizo tawnga en tur a awm nual a, facebook a pawisa hlawh theih dan video te pawh i en duh chuan "How to earn money in facebook" tih google search ah emaw youtube lamah pawh i zirchiang thei ang.

A kip a kawiin kan ziak ta lo mai a, a tlangpuia FB a pawisa hlawh theih a ni tih a la hre lo te tan thiam lo takin kan rawn ziak ve a ni e.

Duhsakna nen,

In thian,

Lamtluang Online News