Wednesday, 14 December 2016

MCS 2016 TOPPER LALRINSANGA HNAMTE CHANCHIN TAWI (Short Biography)

Mizoram Civil Service Exam 2016 topper Mr. Lalrinsanga Hnamte
Mizoram Public Service Commission in Mizoram Civil Service Exam 2016 a buatsaih a topper Tv. Lalrinsanga Hnamte (Sangtea) hi kum 1987 November 12-ah Pu R.H Zachhunga leh Pi Lalnunziri fa 5 zinga upa ber ni turin a lo piang a. An khua Sialhawk-ah Primary leh Middle School thleng a kal a,  High School hi Class 8- Helen Lowry school ah a zir a, Class 9 chu Govt. High School, Sialhawk ah a zir thung a, Aizawl ah chhuk leh in Providence High School, Babutlang atangin kum 2003 khan Class 10 Distinction ah a pass.  St.Anthony's College, Shillong atangin Class XI & XII a zir zo a, St.Edmund's College, Shillong atangin B.Sc (Physics) First Division-ah a zo a, chumi hnuah kum 2010 khan University of Hyderabad atangin M.Sc (Physics) zir zo in CSIR-UGC NET exam ah JRF ah a inziak tling a University of Hyderabad ah hian Ph.D (Physics) a zir zawm leh a ni. Lamtluang thuhriat danin kum 2012 khan Ph.D a zir laiin Gandhigram Rural University, Tamil Nadu-ah Asst.Professor hna a zawm a, kum 1 chuang a thawh hnuah Civil Service exam a tum avangin Delhi lamah a insawn san ta a ni. Delhi-ah hian Delhi University hnuai a Miranda House - University College for Women ah zirtirtu ah a tang leh a, chumi hnuah a hnathawhna insawn leh in tun thleng hian Kirori Mal College (Delhi University hnuai a mi tho) a Department of Physics-ah zirtirtu hna a thawk a ni. 

Lamtluang thuhriat danin MCS 2016 topper Sangtea hian pianpui unau hmeichhia 2 leh mipa 2 a nei a, an unau zingah hian amah hi a upa ber a ni. Mi ngawichawi leh mi inngaitlawm tak a ni a, lehkhazir leh hnathawk a a awmna hmun hrang hrang ah a theih tawkin kohhran leh khawtlang ah a inhmang thin a, Delhi Mizo Thalai Inkhawm-ah Leader a ni mek a, North Delhi Thalai Inkhawm-ah Leader niin Delhi KTP branch committee ah committee member a ni mek bawk. Amah hrechiangtu a lehkhazir pui thin te sawi danin mi invawng tak, mi pawisawi hlau em em leh mi zaidam tak a ni a, mi dangte tanpuina lamah pawh Mizo tlangval tlawmngai a nih thu an sawi uar hle. Infiamna lam pawh a tui hle a University of Hyderabad a lehkha a zirlai pawhin University aiawh in football team-ah te a lo tel tawh thin a ni. Hyderabad-a awm lai hian Hyderabad Mizo Association pawh in Best Student Award an lo pe tawh a ni. Tv.Sangtea hi mi lehkhathiam thei tak a ni a, M.Sc a zir zawh hlim in CSIR-UGC NET a inziah tlin bakah All India exam dang - Graduate Aptitude Test in Engineering (GATE) ah pawh a lo inziak tling tawh a, a subject Physics bakah hian allied subject dang Geography ah pawh UGC-NET Exam-ah a inziak tling bawk a ni. College a zirtirtu hnathawk chunga Civil Service exam tur a inbuatsaih anih avang hian chhunlamah college a zirtirna a thawh zawh hnuah zan lamah te subject thenkhat ah coaching class te a va kal thin a ni.
Mizoram Civil Service (MCS) 2016 Topper Mr. Lalrinsanga Hnamte (Sangtea)

No comments:

Post a Comment