Tuesday 14 January 2014

1st - 14th January 2014 news in Mizo

Latest news collection in Mizo language:
MIZO TAWNG A CHANCHINTHAR LAWRKHAWM
14.1.2014
*Tuikuk hel - Bru Liberation Front nia rinhlelh ten ni 23 Nov 2013 a Mamit District a mi 3 an rukbo te chu zanin hian chhuah an tum niin sawi a ni a, Mizoram sorkar leh helho mi rubo tute hi an in be mek a ni. Central YMA pawn mi 3 an rukbo mek te hi chhuah thuai turin helho hi te hi an ngen bawk a, an chhuah thuai loh chuan Central YMA in bo zawn dan an ngaihtuah dawn niin an sawi.

*Vawiin khan Kerala ah India football premiere league zing a mi Federation Cup chu khelh tan a ni a, he tournament hi knock-out match a khelh a ni.
 
*Hrangmana(55) Tuipui-D, Lunglei District chu an khawbul Sailuta Vau ah thi a chhar a ni. Nimin a chhuak nizan thleng a rawn haw lo a ni a, a ruang ah hian kutthlak na hnuhma awm a sawi a ni a, police te enfiah tur a nghah mek a ni.
source:Gilbert Renthlei via Lunglei Chanchinthar
 
*IIM in kum tin a business mangement zir tum te tan a exam an buatsaih thin CAT 2013 result chu vawiin ah tih chhuah a ni ta.
12.1.2014
*Sheikh Hasina chu a tum 3-na atan Bangladesh Prime Minister thar a tan lakluh a ni.
 
*Odhisa sorkar chuan 12th Plan chhungin RUSA scheme hnuai ah hmeichhia te pual bik tur Women University din an tum.
 
*Indonesia a Mount Sinabung leh khawthlang lam Sumatra thliarkar ah te tlangkang in lei chhung sa a rawn vawrh chhuah nasat avangin mipui 25000 chuang ten an chenna hmun atangin hmun him lamah an inthiar chhuak
10.1.2014
*RIPANS-Aizawl a assistant professor - 2, Lalzikpuii d/o Liansailova, Tuikual North leh Lalduhsanga Pachuau te chuan Dibrugarh University-a Department of Pharmacy aṭangin Doctor of Philosophy (Ph.D) an hmu thar.
 
*Rev.Dr V Kapenga lehkhabu ziah, 'Hei le, Leitlangpui' tih chu nimin khan I&PR auditorium-ah Rev.Dr CL Hminga'n a tlangzarh. - Vanglaini
 
*Union Cabinet chuan National Youth Policy 2014 chu pawmin thalaiten hmakhua leh eizawnna kawng an zawh theih nan ram pum huap in hmalak na tur ruahman a ni dawn a, tin, MBBS zir theihna tur qouta sing 1 a tihpun turin ruahmanna Union Cabinet hian an ngaihtuah mek bawk a ni.
9.1.2014
*MZP General Hqrs Meeting chuan ni 23rd November 2013(Inrinni) a Tuikuk misual ten an rukbo Mizo pahnih(2) Pu Sanglianthanga s/o Vanlalhmuaka Taxi driver, Mamit leh Pu Lalzamliana s/o Buanga Pickup driver, Zuangtui Muanna veng Aizawl leh hnamdang Deep Mondal s/o Nikil Mondal Airtel hnathawk te tun thlenga chhuah an la ni lo chu pawi a tiin, a rubo tu te hi a dem tak zet a, rukbo te chhuah an nih theih nan ni 13 January, 2013 hian “BO ZAWN HNATLANG” neih a rel a ni. Hnatlang a thawkchhuak turte chu ni 11th January, 2014 (Inrinni) thleng MZP Pisa Pui ah ah in report theih a ni ang. Hnatlan dan tur leh a tul hrang hrang te ngaihtuah turin ni 10th January, 2014 (Zirtawpni) hian MZP Pisa Pui ah Bru khaw hrang hrang a V.C aiawh pakhat (1) theuh leh Bru Co-Ordianation Committee (BCC) te nen Joint Meeting neih leh tur a ni.
 
*FIFA secretary general in thuthar lakhawmtute a hrilh danin Qatar ramin 2022 World Cup an thlen tur chu an ramah nipui khua a lum uchuak thin avangin World Cup khelh hun atan june-july nilo in 15 Nov-15 Jan inkar a nih tur thu a sawi.
8.1.2014
*Aizawl khawpui chhunga nitina tlan thin City Bus khalhtu leh conductor-te chuan tun thla January 15 atang hian thawmhnaw hak tur bik (uniform) hmangin hna an thawk tawh dawn a. Driver leh conductor-te uniform tlangzarhna hun hi vawiin chhun khan Ngaizela ACBOA office-ah buatsaih niin Transport Minister Pu John Rotluangliana’n a hmanpui a ni. Uniform hi tun thla ni 15 atangin Thawhtanni, Nilaini leh Zirtawpni-ah te hak tur a ni a. Driver form rawng hi a pawl, Conductor a paw dal niin MR form hi a sen a ni. -DIPR
 
*Aizawl khawpui a dawrkai tur leh kawngsir a advertisement hoarding tar duh te chuan Aizawl Municipal Council ah phalna an lak hmasak zel a ngai tawh dawn.
7.1.2014
*Lai Autonomous District Council huam chhung a Village Council inthlanna chu kumin February thla chhung a neih tur a tih a ni.
 
*Vawiin hian Patna ah 75th National and Inter-State Table Tennis Championship chu khelh tan a ni.
 
*Mizoram sorkar in MLTP Act kumin chhungin en that an tum.
 
*PHE department chuan Aizawl khawpui kawngsir ah a thlawn a mipui te tui intur chhawp chhuah an tum.
6.1.2014
*Kumin a India Republic Day lawmna pui ber Delhi a neih turah Japan Prime Minister Shinzo Abe chu khuallian a ni ang.
 
5.1.2014
*Indian Space Research Organisation (Isro) chuan vawiin tlai dar 4:18pm khan GSLV-D5 rocket hlawhtling takin an kapchhuak, GSLV-D5 rocket hi nikum august khan kahchhuah tur a buatsaih vek tawh a nih laiin kahchhuah a nih hma darkar 2 ah a rocket ah leak a awm vangin thulh leh a ni.
 
*Lok Sabha inthlanpui chu kumin april thla chawhnu lam leh may thla chhung a neih tur a rin niin a hun tur dik tak chu Election Commission of India in kumin February thla tawp lam emaw March thla chawlhkar tir ah an puang chiang dawn ni a sawi a ni. Lok Sabha inthlanpui rual hian Andhra Pradesh, Odisha leh Sikkim ah te Assembly inthlan neih a ni bawk dawn niin sawi a ni.
 
*Tennis World No.1 Rafael Nadal chuan Qatar Open mipa final ah Gael Monfil 6-1, 6-7, 6-2 a hnehin nizan khan a champion.
 
*Vawiin dar 11:45 vel khan Tawipui North-1 ah H.S Hmangaihzauva in assam type a sak chu bungrua engmah chuh hman loh in a kang ral.
 
*Vawiin hian Bangladesh ah inthlanpui neih mek a ni a tukin dar 8 atang khan mipui ten vote an thlak tan.
 
*Vawiin kum 2014 a chawlhni hmasaber ah hian Mizoram a kohhran hrang hrang ten Sunday School hming ziakna an nei ang.
4.1.2014
*Vawiin ah Goa ah building chim ah mi 7 an thi a, mi 10 chhanchhuah tawh niin mi 30 chuang inchim ah hian an la tang niin thuneitu ten an sawi.
 
*H. Lalchhuanvela, Ramhlun South, Aizawl chuan Jadavpur University, Kolkata atangin Engineering subject ah Ph.D a hmu thar. A thesis "Optimal Selection of process parameters in ultrasonic machining system" tih a ni.
 
*Nizan khan Chumukedima, Dimapur District, Nagaland ah mithi ruang chhe tawh tak 9 kawr a inphum hmuh chhuah an ni. Mitthi ruang te hi an lu a hnai tak a silai kahna hnuhma awmin polythene pawl a khuh anni tih police ten an sawi a, he thil thleng chungchang hi chhui mek a ni.
 
3.1.2014
*Zanin zanlai dar 12 atang hian India ram pumah petrol man 75 paise leh Diesel man 50 paise in tihpun a ni dawn.

2.1.2014
*2006 a Israel Prime Minister a nih lai a stroke a vang a tunthleng a damchhuak thei ta rih lo Ariel Sharon chu a enkawltu doctor ten a dinhmun in hniam lam pan zelin a taksa peng pawimawh tam tak te pawn hna an thawk tha thei tawh meuh lo niin an sawi. Israel ram hi PM nilai Ariel Sharon hi a la thih loh avang hian 2006 atang khan interim Prime Minister kaihhruaina hnuai ah an awm mek a ni.
 
*Mizo Damdawi: Thingfanghma hel leh thingtheihmu hnah chhumpawlh hi zungkawng tha lo leh kalna tan a tha
 
1.1.2014
*Sorkar in chhungtin dawn tur a bithliah bak a eirawngbawlna gas (LPG) lei thin te tan a man Rs.220 in tihpun a ni. He non-subsidized LPG man pung hi international rate a san vang tih niin sawi a ni.
 
*Kumthar chibai vek ule, he kumthar hian nangmah leh in chhungkua ah huntha rawn her chhuah pui ngei se tiin duhsakna kan hlan vek a che u.

No comments:

Post a Comment