Lamtluang Online News: Lalthanglura Zadeng (91), Indian Postal Service (IPoS) Retired chu March ni 3, Thawhlehni khan Shillong-ah a boral. Amah hi kum 1997 khan Shillong-ah Chief Post-Master General-in a pension a ni.
Lalthanglura Zadeng hi Lunglei thlang deuh lawka awm Thehlep khaw Lal fapa a ni a, a pa chu Thehlep Lal Thlanga Zadeng a ni a, a nu chu Chemsini Pachuau a ni. Kum 1947 atanga 1951 chhungin Serkawn-ah sikul a kal thin a, chumi hnuah Shillong-ah High School zir turin a chhuk a, kum 1956-ah matric a zir zo leh a ni. Kum 1958-ah St. Edmund's College aṭangin PU a zir zo a, chumi hnuah kum 1960 khan Scottish Church College, Kolkata aṭangin BA a zir zo leh a ni.
Kum 1963-ah khan Indian Postal Service (IPoS) ah a inziak tling a, Mizo zinga IPoS a inziak tling hmasaber dawttu a ni. Kum 1963-64 chhungin Mussoorie leh Mount Abu-ah te a hna thar chu training a nei a, chumi hnuah Silchar, Gauhati, Kohima, Kolkata leh Shillong-ah te IPoS hna hi a thawk kual a ni.
Lamtluang Online News thu hriat danin, Lalthanglura Zadeng hian pianpui unau 8 a nei a, an unau zingah a upa lama chhiarin 6-na a ni. A boral lai hian a nupui leh a fanu pahnihte a kalsan a ni. March ni 4, 2026, chawhma lam dár 11-ah khan Shillong-a an chenna in - Zadeng Complex, House No. 16, Pohkseh North III-ah vui liam a ni.
A pa lalna khua Thehlep hi Lunglei atanga hla lutuk lo khawtlang lama awm a ni a, tunah hian he khuaah hian chhugkua 4/5 vel chauh an cheng tawh a, Vanhne khaw VC hnuaiah an awm mek a ni.
Lalthanglura Zadeng hi Shillong lamah pawh a hna avangin mite hriat hlawh leh fak tak a ni thin a, a boral thu pawh hi Shillong chanchinthar puangtu lian leh chanchinbu hrang hrangah an chhuah chuai chuai a ni.
 |
| Lalthanglura Zadeng (IPoS) Shillong-ah a boral |
No comments:
Post a Comment