15th - 17th October 2013 News in Mizo

News collection in Mizo language:

MIZO TAWNG A CHANCHINTHAR LAWRKHAWM TARLANNA:

17.10.2013
*Election Commission of India-in Mizoram inthlanpui hun atana Inthlan ni 4/12/2013 leh Vote chhiar ni 8/12/2013 a rawn ruat fel tawh ah Mizoram Political Party, Kohhran leh tlawmngai pawl hrang hrang ten remchang lova hriaa a hun sawn tura ngenna an siam avangin ECI chuan CEO chu heng pawl hrang hrangte hi lo kawm tura a tih angin vawiin chhun khan CEO Pu Ashwani Kumar chuan ama office chamber ah Political Party, Kohhran leh tlawmngai pawl thenkhat aiawhte a kawm a. CEO chuan inthlanna tluang tak leh thianghlim taka neih a nih theih nana Kohhran leh tlawmngai pawl te hmalakna ah lawmthu sawiin state hrang hrang atana inthlanpui neih hun tur ruat chungchangah ECI chuan ngun tak leh zau taka thil thlira inthlan hun a ruahman thin dante a sawifiah a, Mizoram-a Political Party, Kohhran leh tlawmngai pawl hrang hrang ten an ngaihdan an sawi chhuak bawk a, an inkawmna atanga an duh dan leh rawtna te chu CEO chuan ECI hnenah a hriattir tur thu a hrilh a ni. Inthlan hun ruat chungchang hi thutawp neitu chu Election Commission of India a ni. - DIPR
 
*69th Young Mizo Association General Conference chu Ratu ah nghah a ni.  

*Zanin hian YMA General Conference vawi 68-na Khawbung a neih mek chu a tiak dawn ta, zanin inkhawm ah hian hruaitu thlan thar te inhmelhriattirna bakah special item chi hrang hrang ngaihthlak mek a ni. President kal chhuak tur T.Sangkunga'n thusawina a nei bawk.
Pix: Mapuia Hnamte

68th YMA General Conference, Khawbung Pix: Mapuia Hnamte

 * CYMA HRUAITU THLAN THAR TE
Central YMA hruaitu thlan thar leh an vote hmuh dan
President : Lalbiakzuala Khatla Vote 1927/2438
Vice President : Vanlalrema Rokhum Zemabawk vote 828/2424
Gen. Secretary : Vanlalruata, Tuikual 'S' vote 1415/2398
Asst. Secy : Lalhmachhuana, Ramhlun North vote 1060/2240
Treasuer : J. Lalsailova, Mission veng vote 1254/1954
Fin. Secy : Lalrochuanga Pachuau (LPS) Zarkawt vote 835/1965
-Dawngtea Cms vis SPECIAL REPORT Group 

16.10.2013

*Nizan khan YMA General Conference vawi 68-na chu Khawbung a Tupuiral Run ah tan a ni ta a, palai lawmna inkhawm programme nizan khan hman a ni. Vawiin lamah inkhawmpui pual hian pandal kawtah YMA Exhibition neih a ni ang, chawhma dar 11 atangin Khawbung Community Hall ah palai thlan chhuah ten rorel inkhawm an nei ang a tun tun inkhawmpui ah hian Central YMA hruaitu thar thlanna neih a ni bawk ang. Rorel palai nilo ten pandal ah variety programme an hmang thung ang. Palai thleng tawh zat hi mi sangli chuang anni tawh a ni. Khawbung khua ah hian In 538 awmin mihring 2097 an cheng mek a ni.

*Mizoram state assembly election neih ni tur a ruat 4 Dec 2013 sawn tura Mizoram Kohhran Hruaitute Committee leh tlawmngai pawl thenkhat ten Election Commission of India hotu te an ngenna chu rawn chhanglet in Mizoram chief electoral officer hnenah inthlan ni sawn loh dan kawng lo dap turin an rawn hriattir a ni. Vote thlak ni sawn harsa mahse vote chhiar ni 8 Dec 2013 erawh la ngaihtuah nawn leh a theih mai theih thu an sawi a ni.

*Tukin chhuak Vanglaini chanchinbu in an tarlan danin Chiahpuam thubuai chunchang ah Aizawl District Court Chief Judicial Magistrate Court chuan thutlukna a siam tawh in court thutlukna hi tih chhuah a ni dawn hnai a sawi a ni. Court thuremna ang chuan, Chiahpuama thubuai neite zawng zawng te chu a chhuah zalen tawh dawn ni a sawi niin Chiahpuam chungchang chu a remchan ang leh a duh anga sorkar chinfel turin a dah. Thubuai pathum tihfel tawhah hian Chiahpuama a bul tumte zinga mi - Roliana, Muanpuii leh Vanlalzapi te chu chhuah mai tur a tihfel anni tawh bawk ni a sawi a ni.Chiahpuam sum, bank-a tuna awm zat chu Rs. 11,76,61,489 a ni.

15.10.2013

*Tukin dar 8:12 khan Philipines ah 7.2 magnitude a chakin lir a nghing a mi 93 an boral tawh. Philipines ram a khaw hrang hrang ah in leh thil pawimawh dang te pawh a chhe nasa hle a ni.

 

*Bethel Electronics Ṭhazual 10
1. D.J.Lalvenhimi – Inthen lo`ng
2. Lawmi Khiangte - Kumtluang atan
3. Priscilla Fanai- Ka dawn thiam lo
4. Biakmuana – Hmangaihna Rinawm
5. Famkimi Kawlni - Min hersan si
6. Remkimi Cherput – Runmawi
7. Apples – Ka dem lo che
8. HC Sanglura - En teh lungrun
9. L.Hmingpuii – Min hriatpui ve a sin
10. Sangkimi Khiangte - Hleihten an dang zo ta.
Source: Vanglaini

 

*Aizawl Art Gallery & School of Fine Art te huaihawt Painting Exhibition 2013 chu nimin khan MUP Building 2nd Floor, Aizawl ah hawn a ni. Painting Exhibition 2013 ah hian artists 23 (Mipa 20, Hmeichhia 3) te kut chhuak lemziak 109 - Oil Painting, Water Colour Painting, Pencil drawing leh Sculpture te pho chhuah a ni. Heng lemziakte hi nitin zing dar 10:0am - zan dar 8:30pm inkarah 19 October 2013 thleng, mimal, chhungkua, pawl leh Zirna inhrang hrangte tan man chawi lovin tlawh theih a ni. Lemziak pho chhuahte hi a duh a piang tan lei theih a ni bawk. - DIPR

 

*Nobel Prize for Economic 2013 dawng turin University of Chicago a Professor 2 -Eugene Fama, Lars Peter Hansen leh Yale University a Professor nilai Robert J Shiller te thlan anni. Anni 3 hian thilman sang tur lo chhutlawk dik theihna an duang chhuak a ni.

 

*Subroto Under 14 football tournament final ah Mizoram aiawh Govt. Chawngfianga M/S, Kolasib chuan Betkuchi School, Assam 2-1 a hnehin an champion a, lawman pawisa fai Rs.Nuai 2 leh nomawi an dawng a ni.