19th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
19.2.2015

*DDK AIZAWL PROGRAMME PAWT SEI DAWN
Doordarshan Kendra Aizawl Programme chu February 20, 2015 (Mizoram State Day) zan atangin zan dar 9:00 thleng tih chhuah thin a ni tawh dawn a. He Programme pawh sei hi Chief Minister Pu Lal Thanhawla’n DDK Studio-ah hemi zan dar 7:00 ah a hawng ang a. Live Programme hmuhnawm tak takin chhunzawm a ni ang. He hawnna live programme hi DDK Aizawl bakah DD NE Channel ah pek chhuah a ni ang a. Cable Operator ten la chhawng vek tura ngen leh hriattir an ni. (DIPR)

 

*MUMBAI UNIVERSITY VC BAN LAILAWK
Maharashtra Governor Ch Vidyasagar Rao chuan Mumbai University Chancellor a nihna angin Vice Chancellor nilai Rajan Welukar chu a hna atanga lo chawl hrih turin thupek a siam. Bombay High Court in VC Ranjan Welukar hi VC ni turin a qualify tawk lo ti a thutlukna a siam avangin Governor hian VC hi a hna atangin chawl hrih turin a ti ta a ni.

*SONY IN SMARTPHONE SUMDAWNNA TI TAWP MAI THEI
Japan company Sony chuan tunhnai ah smartphone an siamchhuah te an hralh that loh avangin smartphone sumdawnna zawi zawiin an titawp dawn niin mithiam ten an sawi. Sony CEO Kazuo Hirai chuan "smartphone hralh tam lamah tan lak kan tum tawh lo" a ti a ni. Sony hi smartphone leh TV hralhchhuah lamah an tlachhe nasa hle a ni. Hetiang anih avang hian Sony hian PlayStation videogame network leh camera image sensors lama sumdawnna an thlur bing rin a ni.

 

*#‎UEFA‬ CHAMPIONS LEAGUE RESULT
Real Madrid 2-0 Schalke
FC Basel 1-1 FC Porto

*2nd Hualliana Memorial Football Tournament 2015 Hmuntha khuaa khelh chu nimin khan a kharna hun hman a ni a, Pu Joseph Lalhimpuia Parliamentary Secretary chu khuallian niin he hun hi a hmanpui.

Pu Joseph Lalhimpuia Parliamentary chuan thusawiin Pu Hualliana’n Hmuntha khaw tana hna a lo thawh tawhte leh a faten Hmuntha tana thahnemngai taka an thawh zuinaah lawmthu a sawi a. Mizoram sorkarin mipuite tana hna a thawh chi hrang hrang tarlangin Mizoram sorkarin hmeichhiate dawmkanna atana tun hnaia Assembly-a dan a siam thar Mizoram Marriage and Divorce and Inheritance Act chu ramchhung hmun danga mite nena khaikhin pawhin chhuanawm a tih thu a sawi a. Hindu Law (Marriage Act 1955) te, Hindu Adoption and Marriage Act 1956 te, Christian Indian Divorce Act 1869 te, Muslim Protection of Rights on divorce Act 1986 te leh Parsi Marriage and Divorce Act 1936 te ai pawhin he dan hi a tha zawk nia a hriat thu a sawi a. Mizo nupa an inthena hmeichhiate chanvo hi a sang tawh zawk tih sawiin Mizo hmeichhiate hian zaa 50 thleng ro an chang ve thei tawh a, hei hi hmundanga mite pawhin an awt hle a ni a ti.

Pu Joseph Lalhimpuia chuan School building tla bal tawh tam tak chu thawmthatna tur kan nei thei dawn a, Mizo medium leh English medium school te chu session thar atangin an zirlai a inang tawh dawn a, Mizo School-a an zirlai ang chiah kha English medium-ah pawh English-in an zir thung mai dawn a ni a ti. Football tournament kharna inkhawma infiammi leh mipui kalkhawmte chu hlawhtlinna atan ruihtheih thil leh zuk leh hmuam laka inthiarfihlim turin a sawm a, thalaite chu an hma lam hunah hlawhtlinna nei turin discipline tha tak nena inbuatsaih turin a sawm a ni.

He Football tournament-ah hian team 14 an tel a. Pool 4 ah then an ni a, Pool Leaque a khelh a ni. Hmuntha khua leh a thenawm bakah Keitum, Darlawng, Saitual, Durtlang leh Aizawl atang tein Football Club club hrang hrang an tel a ni. Kharna inkhawm neih zawh hian Hualliana Football Club Hmuntha leh F.Pianmawia Memorial Football Club Keitum Team I ten an khel.
He tournament khelh zawh takah hian Champion team-in Trophy leh medal bakah pawisa fai Rs 12,500/- an dawng a, runners up-in trophy leh medal bakah pawisa fai Rs 7,000/- an dawng bawk. (DIPR)

*CONGRESS HOTU ATAN RAHUL GANDHI DAH DAWN?
Indian National Congress party chuan an Vice President nilai Rahul Gandhi chu President ah an ruat dawn hnai ni a sawi a ni. INC hian AICC session March emaw April ah Bengaluru neih an tum niin news report thenkhat ah a lang. He session ah hian Rahul Gandhi hian a nu Sonia Gandhi chu a thlak dawn niin an sawi. Sonia Gandhi hian party a official a mawhphurhna chelh hi a duh tawh lo a, a aiah Rahul dah a duh niin an sawi. Sonia Gandhi hi INC President ni rei ber a ni mek a kum 1998 March thla atang khan a la ni ta char char a ni.

 

*Facebook a LAMTLUANG page chhiar tute tan Mizoram khaw hrang hrang thlalak a tahtawl a tarlan thin tum a ni a. Mahni khua/veng bakah zinna leh vahvelna lama landscape thlalak nei te tan kan page inbox ah emaw email in lamtluangmizo@gmail.com ah emaw fb acc Lam Tluang Thuthar inbox thawh theih a ni. Mi thlalak ruk erawh phal a ni lo, hmanah midang thlalak sa rawn thawh an awm a kan buai phah nek tawh a ni. Thlalak rawn thawh tu hming tarlan tel thin a ni ang. Thlalak thawhtu chuan a thlalakna hmun chiang tak a sawiin a hming tarlan a duhdan pawh sawi tel thin tur a ni. Thlalak rawn thawhtu te chungah lawmthu kan sawi bawk e.

*ANTI TOBACCO SQUAD IN DRIVE NEI
Nimin khan Lawngtlai leh Champhai District Anti Tobacco Squad te chuan COTPA dan bawhchhia an awm leh awm loh vai in drive an nei.

Lawngtlai ah chuan puipunna hmun hrang hrang bakah School 15 zet an tlawh a, phallohna hmun a meizu man tur an awm lova, Zirna School in an tar ngei ngei tur tar lo an tam hle a last warning an pe nghal. Champhai ah pawh phallohna hmuna meizu man tur an awm lo. (DIPR)

*CABINET MEETING NEIH A NI
Chief Minister Pu Lal Thanhawla kaihhruaina hnuaiah nimn khan Chief Secretary Conference room-ah Council of Ministers meeting neih a ni.

Council of Ministers meeting, Cabinet meeting tia hriat bawkah hian sawiho tur agenda 24 chhawpchhuah zingah 23 pawm a ni a. Chung zinga cabinet meeting-in a pawmte chu The Mizoram Horticulture Service (Amendment) Rules, 2014, Final Achievement of 40 RFD (Result Framework Document) Implementing Departments for the year 2013-14 under Performance Evaluation System, The Mizoram Secretariat Service (Cadre Training) (Amendment) Regulations,2014, Draft Mizoram Planning, Economics & Statistics Service (Amendment) Rules, 2014, Regularisation of Contract Employees under UD&PA department, Draft Mizoram Right to Public Services Bill, 2014, Regularisation if Contract Employees under under Acconts & Treasuries, The Mizoram Transparency in Public Procurement Rules, 2014, Second Supplementary Memorandum on Public Sector Enterprises Restructuring, Proposal for Amendment of the Mizoram New Defined Contributory Pension Scheme, 2010, Introduction Unit Area Method of Property Taxation in Aizawl Minicipal Council pawm ah, a tirah 3% rate a lak a ni ang.

Heng bakah The Mizoram Grants-in-Aid to Aizawl Municipal Council (Amendment) Rules, 2015, Waiving of turnover tax/ Work Contract Tax for infrastucture projects under 10% Lumpsum Grant for NER including Sikkim te, Amendment of the Mizoram Right to Childrento Free and Compulsory Education Rules, 2011, Shifting of School Timing in respect of Primary, Middle, Secondary and Higher Secondary Schools remtihnaah Primary school timing chu 8:00A.M - 1:00P.M, Active teaching hours ah 4 hours leh assembly/break time ah 1 hour a ni anga, Middle school timing chu 8:00A.M - 2:00P.M., Active teaching hours ah 5 hours, break time 1 hour a ni ang a, Secondary leh Higher Secondary school timing chu 8:00AM - 3:00PM, Active teaching hours ah 6 hours leh break time ah 1 hour a ni bawk ang. Hei hi academic session 2015-2016 atanga hman tur a ni.

Agenda remtih dangte chu Draft Mizoram Factory Rules, 2014, Draft Mizoram Maternity Benefit Rules, 2014, Draft Electronics Service Delivery Rules, 2014, The Mizoram Compulsory Registration of Marriage (Amendment) Bill, 2014, The proposal for creation of Director and Superintendent posts in Forensic Science Laboratory , Upgradation of 28 posts of Veterinary Field Assistant (Group ‘C’) to the post of Veterinary Supervisor Group ‘B’(NG), Proposal for discontinuation of existing VIP quota on Rice and Sugar leh Approach to Developing Comprehensive Growth Strategies for Mizoram te an ni. (DIPR)

*INDIA LEH BANGLADESH RAMRI AH PATROLLING NEIH REMTI
Tunkar Thawlehni liam ta khan New Delhi ah India-Bangladesh Joint Working Group
meeting neih a ni a, India leh Bangladesh sorkar aiawh ten ramri ah ram 2 atangin a huho a sipai partrolling neih an remti. India leh Bangladesh inrina Mizoram leh Tripura hrula ramri hungna leh hungna awmlohna hmun ah te danlo a ramri kan leh a ruka sumdawnna kalpui thin te enfel a tihawlsam theih ngei an beisei a ni.

*MAMIT-AH CHAPCHAR KUT HMAN DAN TUR REL
Nimin khan Mamit DC Conference Hall-ahChapchar Kut hman dan tur Pu Vanlalngaihasaka Mamit DC hova rel a ni.

Meeting-ah hian Pu Vanlalngaihsaka chuan Chapchar Kut lawmna chu State Level Chapchar Kut Celebration Committee in ni 6 March, 2015 ah hman ni se ti a a lo rel tawh thu sawiin, hemi atan hian Mamit chu Rs.1,00,000/- pek tura ruahman a nih thu a tarlang a. Mamit hian Mizoram pum huap Presbytertian Kohhran Hmeichhe khawmpui lian ni 6-9, March chhung a thlen dawn avangin Mizoram hmun dang rualin a lawmna a buatsaih ve theih loh tur thu sawiho a ni a. Chapchar Kut chu Mizo ten Kut lian kan neih zinga mi a nih avangin hman ngei ni se tih chu kalkhawm te duh dan a nih avangin March 13-a hman mai ni se ti a rel a ni a. Hemi atan a sorkar lama buaipui tul te DC office lamin lo buaipui se ti a rel a ni. Heng bakah hian a hmandan tur kimchang chu Sub headquarter YMA, Mamit kaihhruaina in NGO ten lo ruahman se ti a rel a ni bawk.

Nimin meeting-ah hian DC Office mi leh sa te, DIPRO bakah Sub Hqrs. YMA Mamit, Joint VC, MJA, MZI, MHIP leh MUP aiawh te an tel a ni.

Nimin vek hian Kohhran Hmeichhe Inkhawmpui lian Mamit-in a thlen tur chungchanga ruahmanna felfai tak nen a lo dawnsawn a nih theih dan tur te sawihona neih a ni bawk. (DIPR)

*KARLEHAH SCHOLARSHIP
Dated 18th February, 2015: Vawiin khan Post Matric Tribal Scholarship zirlaite dawn tur Rs.3600 lakhs chu file thlen chin thlithlaiin MSU General Headquarters, Aizawl ațangin General Secretary Lalremruata Chhangte leh Aizawl City College Jt. Students' Union General Secretary John A. Lalnghakzuala te chuan an bawhzui a. Scholarship allocation file hi Finance Commissoner hnen ațanga pawm chhuakin Addl. Seceretary (Budget)-ah luhpui a ni a, heta țang hian Joint Secretary (Finance)-ah kalpui leh niin Under Secretary (Finance)-ah thlenpui a ni a, Under Secretary hian he file hi a tifel nghal a, Mizoram Scholarship Board-ah thawn phei nghal tura siam fel a ni.

He thu hi MSB hotute hrilh nghal a ni a, scholarship sum pek chhuahna tur sanction order hi MSB hian naktukah sawrkar an dil leh nghal ang. Finance Commissoner ațang bawka file hi kal leh tur a ni a, hei hi MSU leh ACCJSU hruaitute chuan an bawhzui leh nghal ang a, sawrkarin pawisa awm sa pek chhuahna order a tihfel nghal theih chuan karleh lamah zirlaite nghahhlelh em em Post Matric Tribal Scholarship hi an pek chhuah theih kan beisei e.

*INDIA RAMAH SWINE FLU DARH ZEL
Natna tihbaiawm tak Swine flu emaw H1N1 an tih chu India ramah a darh zel a, he natna avang hian mi 663 in nunna an chan tawh a ni. He natna hi India hmarchhak kil Nagaland ah pawh a vei hmuchhuah a ni. India ram pumah kumin chhungin he natna vei hmuchhuah tawh zat chu mi 10,025 an tling tawh a ni. Tun thla February ni 16-17 chhung ringawt ah pawh mi 39 in nunna an chan phah tawh a ni. Rajasthan, Gujarat, Madhya Pradesh ah te he natna vei an tam zual a ni. Kan rawn tarlan tawh angin Mizoram a he natna vei hmuchhuah pawh enkawl dam a ni tawh a ni.

18th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
18.2.2015

*Vanbuangi Gas Agency neitu leh hmingput chhan Vanbuangi (80) w/o.Vanhlira, Mission veng, Aizawl chu vawiin chawhnu dar 1:30 khan stroke vangin a boral. Zanin ah tlaivarpui a ni ang a, naktuk ah vui a ni ang.

*TERRITORIAL ARMY-IN ARUNACHAL PRADESH-AH HMARCHHAK THALAITE TAN RECRUITMENT RALLY NEI DAWN
Territorial Army hnuaia 121 Infantry Battalion (TA) Garhwal Rifles chuan March ni 3, 2015 khian Sports Stadium, Pasighat, Arunchal Pradesh Recruitment Rally an nei dawn a. Recruitment Rally kaltlang hian Soldier (General Duty) 10 leh Chef Mess, Hair Dresser(Barber) Chef Community leh Mess Waiter 1 theuh an la dawn. Heng hna hi Hmarchhak pual bik anih avangin Hmarchhak state miten a dil theih dawn a ni.

Mizoram atanga he hna dil tum chu thiamna lamah Soldier (General Duty) tan Pawl 10 Pass leh hna dang tan Pawl 8 pass an ni tur a ni a. Kum bithliah chu kum 18 leh kum 42 inkar a ni a. He hna diltu chu mahni a eizawnna nghet nei emaw Sawrkar leh private hnuaia hna nghet nei a ni tur a ni.

Territorial Army hi indona leh tul dang a awm hunah hman atana sipai reserve force a ni a. Kum tin thla 2 leh ni 14 an training thin a, hemi hun chhung chauh hian hlawh an nei thin a ni. (DIPR)

*MIZORAM AH SWINE FLU VEI HMUCHHUAK
Mizorama swine flu (h1n1) kai hmuhchhuah pakhat chuan ziawm lam a pan tawh. Mizoram ah mi pali test an ni tawha pakhat hmuhchhuah a ni. Vaccine leh damdawi hi swine flu lenna lo ah an pekchhuahloh avangin Delhi mi Mizoram state in a chah. Thu thang diklo vanga chiai lo turin Health department chuan mipui te a hriattir.

Source: DDK Aizawl

*KOHIMA AH HMARCHHAK THALAITE TAN SIPAI LAK RUNPUI NEI DAWN
Hmarchhak(Arunachal Pradesh, Assam, Meghalaya, Manipur, Mizoram, Nagaland leh Tripura) thalaite tan Indira Gandhi Stadium Kohima, Nagaland-ah Indian Army tan Sipai Lak Runpui (Recruitment Rally) March ni 3, 2015 khian neih a ni dawn.

Rally ah hian Soldier(Technical); Soldier(Nursing Assistant) ; Soldier(Clerk); Soldier( Storekeeper); Soldier (Invertory Management) leh Soldier(Nursing Assistant) te lak a ni dawn a.

He sipai lak runpui atan hian a hma ah dilna thehluh hran a ngai lova, an ni a intlar mai tur a ni ang. Heng hna diltute tana kum bithliah chu 17½ – 23 inkar a ni a. Thiamna lamah Pawl 12(Arts, Science leh Commerce) pass an ni tur a ni.

Intlar tum te chuan Permanent Residential Certificate(DC/ADC sign); Pawl 10 leh 12 certificate leh marksheet te; Character certificate leh Unmarried certificate (VCP sign); Sports leh NCC certificate(an neih chuan) an keng tur a ni a. Sipai bang fate Discharge certificate an keng bawk tur a ni.

Heng hna te hi Hmarchhak state tin te pualin tam tham tak a awm avangin Army Recruiting Officer (ARO) Rangaphar chuan thalaite tel ngei turin ngen a ni.

Hrechiang duh tan Army Recruiting Office, Supply Point Zembawk ah leh Directorate of Sainik Welfare & Resettlement Office, Treasury Square ah te zawhfiah theih a ni a. (DIPR)

*AIRMAN RALLY
February 28 - March 10, 2015 chhung hian 11 Airmen Selection Centre, Guwahati ah Airman Recruitment Rally neih a ni dawn a,hrechiang duh tan Aviation Wing Office, Opposite Raj Bhavan, Aizawl ah zawhfiah theih a ni.

*TUIALHTHEI MAN THAR
Mizoram puma Tuialhthei (MS, XP & HSD) man chu Ex-storage point price ennawn a nih avangin a hnuaia mi ang hian tihdanglam a ni. He man thar hi ni 15.02.2015-16.02.2015 atanga hman tan a ni.

Sl.no - Khua - MS - XP - HSD
1. Aizawl- 56.31 - 59.31 - 45.97
2. Vairengte 56.04 - 59.04 - 45.82
3. Champhai - 56.51 - 59.51 - 46.06
4. Kolasib - 56.12 - 59.12 - 45.86
5. Lawngtlai - 56.21 - 59.21 - 45.91
6. Lunglei - 56.30 - 59.30 - 45.95
7. Serchhip - 56.31 - 59.31 - 45.96
8. Hnahthial - 56.22 - 59.22 - 45.92
9. Saiha - 56.33 - 59.33 - 45.97
10. Mamit - 56.04 - 59.04 - 45.82

(DIPR)

*AIZAWL CIVIL HOSPITAL AH JANUARY THLA CHHUNGIN MI SINGTHUM CHUANG IN ENTIR
January, 2015 chhunga Aizawl Civil Hospital report chu hetiang hi a ni :
Admit Zat - 1320
Mi zai zat - 1595
Nau piang zat - 448
X- Ray a en zat - 2119
Laboratory a en zat - 49085
Khawl dang a en zat - 1729
Damlo Outdoor leh Casualty a en zat - 30065
Dam lo thi zat - 76
Mizoram pawn lama refer zat - 186
Health Care - 312
RSBY - 349

(DIPR)

*AIGUPTA HRUAITU IN IS TE UN HNUAIA A HUHOA BEIH A RAWT
Egypt (Mizo ten Aigupta kan tih) President Abdel Fattah al-Sisi chuan an thenawm Libya a Islamic State firfiak pawl te chu United Nations in khawvel ram hrang hrang te tangrual turin sawm se ahuho a beih nise a that a rin thu a sawi.Egypt sorkar hian IS ten an rammi Kristian 21 te an lu an tansak hnu atangin indo thlawhna hmangin IS firfiak te hi a bei nghal mawlh mawlh a ni.

*THUTHA LAWRKHAWM
1. Hausakna uma nupui pasal nei chuan zalenna a hloh.
2. Pathian tihna chu sual huat hi a ni.
3. Miropui chuan midangte ropuina a phochhuak thin.
4. Michapo ten midang chapo an haw chawk.
5. Tlakchhiatna hnar ber chu beidawnna hi a ni.
6. Hlawhtlinna kawng hi pumpelh a awm lo.
7. Lungawina tela phurrit phurh hi a zang ber.
8. Thildik titen rorelna an hlau ve lo.
9. Thudik chauh sawi la, i zak ngai lo ang.
10. Thil chin thalo hi khum nuam tak, lungngaihna in a zui si a ni.
11. Chhungkaw inhauh fo na hmunah naupang an tha thei lo.
12. Diklo taka sum dehchhuahin lungngaihna a thlen thin.
13. Mirethei hmusittu chuan a siamtu Pathian a hmusit a ni.
14. Mahni hmasial ten pawlho-ah chhiatna an thlen thin.

 

*INDIA PM IN SAKHAW HRANG HRANG INKAR A INHUATNA AWM PHALLO
Nimin khan India Prime Minister Narendra Modi chuan Syro-Malabar Catholic church, Delhi ah thusawiin a kaihhruai sorkar chuan sakhua zawng zawng angkhat vekin a zah tih a sawi. A sawi zelna ah Sakhaw dang betu ten sakhaw dang lakah hleilenna leh tharum thawhna an lantir chuan an pawm theih loh tur thu leh chutiang thil thleng pawh natak a adem thu a sawi. India ram a sakhaw hrang hrang betu te chu inzahtawn leh inhrethiam tak a dan hnuai a leng turin a ngen a ni.

Nimin khan Syro-Malabar Catholic church te hian tunhnai a Pope in India mi Kuriakose Elias Chavara leh Euphresia te mithianghlim a a puan lawmna inkhawm ah Prime Minister Narendra Modi hi khuallian ah sawm a ni. Amah tawiawmtu Union Finance Minister Arun Jaitley pawh in tunhnai a Delhi a Kristian biak in leh sikul te beih a ni chu a dem thu a sawi a, pawikhawihtu te chu sorkar in hremna a pe ngei dawn niin a sawi.

*CHAMPHAI BAWRHSAP IN THUTHAR LAKHAWMTUTE KAWM
Nimin tlai khan Champhai DC Pu H. Lalengmawia chuan Champhai khawpui chhunga thuthar thehdarhtute a Pisa-ah a kawm.

Champhai DC chuan Champhai District mipui tana theih tawp chhuah a tanlak a tum thu tarlang hmasa in, hmalak dan turah District huam chhung chik zawk leh fiahfai zawka hriat hmasak a tum thu a sawi a ni.

Thuthar thehdarhtu lam atangin District tih hmasawnna tura rawtna hrang hrang a tarlan zingah faina chungchanga hmalak dan tur te, Dan leh thupek kenkawhna kawnga chak zawka hmalak a pawimawhna leh khawtual mite nena tangrual a chak zawka hmalak a tul thute, kangmei laka him tlan theihna tura kori tuzawka hmalak dan turte tarlan a ni a. Champhai DC hmalakna-ah District MJA chuan theihtawp chhuah a atawiawm tur thu an sawi bawk.

Champhai DC Pu H. Lalengmawia pawhin MJA-te thil thlen chu a ngaihpawimawh zawng anih thu leh District chhung mipuite nen tangrual a theih tawp chhuah a tum thu a sawi a ni.

Pu H. Lalengmawia hi Additional DC Pu R. Vanlalsawta leh Champhai District IPRO Pi Emily Lalrinpuii Sailo ten an tawiawm a ni. (DIPR)

*NLUP MALSAWMNA SERCHHIP DISTRICT-AH
NLUP Media Cell, I & PR/NIB ten an buatsaih documentary Film, ‘NLUP Malsawmna, Serchhip District-ah’ tih chu DDK ah vawiin ni 18.2.2015 tlai dar 5:30 ah tih chhuah a ni dawn.

He documentary film ah hian NLUP avanga chhungkaw eizawnna ngelnghet nei chho mek Serchhip District khaw thenkhat a mi tih lan an ni ang.

*NECS Cup 2015 Inter Village Football
Tournament lo awm tur chungchangah Aizawl District Football Association (ADFA) chuan vawiin chawhnu dar 1:30 hian Aizawl Press Club ah press conference an nei ang.

*#‎UEFA‬ Champions League result
PSG 1-1 Chelsea
SHK 0-0 Bayern

*LOCALITY LEVEL OFFICER (LLO) TRAINING NEI
Nimin dar 11 khan Aizawl District Local Council Electoral Rolls Revision 2015 neih mek atana inbuatsaihna kal zelah veng tina Electoral Roll buaipuitu tur Locality Level Officer (LLO) atana ruatte Vanapa Hall-ah training neih tir an ni a. He hunah hian Pu K. Lalrohlua MCS, DLAO, Aizawl chuan training a pe.

Aizawl Municipal Area ah hian Local Council 83 awmin Local Council Electoral Roll buaipui tur hian Locality Level Officer 207 ruat an ni. (DIPR)

*Vawiin February 18, Nilaini hi UPC kohhran Missionary hmasa ber Rev. Ellis Luther Scism a'n Mizoram a lo luh ni a ni a, he ni hi North East India UPC kohhran chuan kohhran ni pawimawhah ngaiin Office chawlhah a puang.

UPC General headquarters office, District hrang office, kohhran zirna in, Book store leh hmun pawimawh dangte pawh khar a ni ang.

Source: Kiddy Vanchhawng via Special Report Group (FB)

*SAMARITAN SOCIETY OF MIZORAM IN SILVER JUBILEE HMANG
Nimin khan Pu Lal Thanzara, Health & Family Welfare Minister chuan Samaritan Society of Mizoram ten Silver Jubilee lawmna I&PR Auditorium, Aizawl-a an neih chu a hmanpui.

Samaritan Society of Mizoram ten Silver Jubilee an lawmna hun hi Pu C.Dinthanga, Executive Member, SSM in kaihruaiin, Pu Lalhrima Sailo, General Secretary SSM in report a pe a. Dr. N. Pallai, President SSM pawhin thu a sawi bawk.

Samaritan Society of Mizoram te hi Ni 15.01.1990 kum khan din tan a ni a, tanpui ngai te tanpui tih thupui hmangin tanpui ngaite tanpui hna an thawk thin a. Tunah hian Samaritan Society of Mizoram te hian Ruihhlo ngai leh HIV vei te tan tanpui hna nasa tak in an thawk chho mek a ni. (DIPR)

*SORKAR THUPEK
District Magistrate Aizawl District Aizawl chuan Section 144 of Cr. P.C..,1973 in thuneihna a pek angin a hnuai ami ang hian thupek a chhuah :

1. Lo/Huan hal tur tur te chuan ni 15.3.2015 hma in an hal vek tur a ni.

2. Lo hal turten lo hal hmain mei-kawng tha taka sial vek tur a ni.

3. Mi tumahin ram tih kan loh tur a ni a. Village Council/Local Council te hriattir hmasa lovin mahni duhthu-a lo hal mai mai loh tur. Village Council/Local Council tinin an area chhung a kan loh nan uluk takin an puangzar tur a ni.

4. Ramhnuai ah meizial bung paih leh meichhem/hal mai mai loh tur a ni.

5. Kangmei lakah kan him theih nan kan In leh a velte tifai tha-in, awlsam taka kangkai thei thil (petrol, diesel etc.) lakah kan fimkhur tur a ni.

6. Heng khua - Lengpui, Hmunpui, Serzawl, Nghalchawm, Lengte, Sihhmui,Sairang, Sairang Dinthar leh Mualkhang te hian Lengpui Airport-a thlawhna veivak a tihbuai loh nan tlai dar thum(3) hnulam ah chauh lo/huan an hal tur a ni.

He thupek zawmlo te chu Section 188 IPC hmangin hrem an ni ang. He thupek hian 17th February, 2015 atanga thla hnih (2) chhung a huam ang. (DIPR)

*BUAINA, THIHNA LEH NATNA KHAWVEL TUALZAU
*Nimin khan Pakistan a Lahore khawpui a police complex hungpawn ah bomb a puak a, mi 8 in nunna an chan a, hliam tuar mi 23 chuang an awm bawk. Tehreek-i-Taliban Pakistan te chuan an tihpuah niin an sawi.

*Nimin khan Afghanistan khawchhak lam Logan khua ah Police officer ten chawchhun an ei laiin Taliban ten luhchilh in bomb an tipuak a, officer 22 chuangin nunna an chan a ni. Taliban thupuangtu Zabihullah Mujahid chuan bomb tipuak tu mi 4 te hi an mi leh sa te niin a sawi.

*Maharashtra ah swine flu natna vei mi 88 hmuhchhuah thar anni. Tihian Maharashtra ah swine flu vei hmuchhuah tawh zat chu mi 530 an tling tawh a ni. Kumin chhungin India ram pumah swine flu vangin mi 624 an boral tawh a ni.

*Nimin chawhnu khan Odhisa a Kotapeta khua ah truck in auto-rickshaw a sut avangin mi 8 an thi a, mi 8 in hliam natak an tuar. Thi zingah hian naupang 2 an tel a ni.

*Nimin khan Nigeria ram hmarchhak a Biu Khawpui bul checkpoint thihchilh bomb hmanga beih a nih avangin mi 11 in nunna an chan.

*Nimin khan Haiti ramah Canival parade an neih laiin current man vangin mi 20 in nunna an chan.

*Khawvel zauzawk chanchinthar hriat a nuam lo thin hle a ni. Lamtluang page hi i thiante like tir ve la kan lawm ngawt ang

*MYANMAR SORKAR IN KOKANG BIAL AH EMERGENCY PUANG
Kan thenawm ram Myanmar (Burma) a Kokang bial ah helpawl Myanmar National Democratic Alliance Army (MNDAA) leh sorkar sipai te kumin February ni 9 atanga an inbeih reng avangin, helai bial huam chhung ah hian sipai sorkar chuan emergency a puang a ni. Buaina chhuah chhan ah hian helpawl hruaitu Phone Kya Shin kum 5 chuang China a tlanbo hnua a let leh vang ni a sawi a ni. He buaina avang hian sorkar sipai 50 leh helpawl a mi 26 ten nunna an chan tawh a ni. Nimin khan mi tutihhriatloh ten sipai convoy Myanmar Red Cross Society (MRCS) tih chuanna an kah avangin mi 2 in nunna an chan a ni. Tualchhung ah buaina a chhuah zel avang hian mipui 30,000 chuang ten ramri kanin China ah an raltlan mek a ni. Helai bial a cheng mipui tam zawk hi Han Chinese anni.

*REL TLAN LAIIN EKIN AH NAUTE NEI
Pathianni khan Rajasthan a Suratgarh atanga Hanumangarh pana tlan rel (train) ekin chhungah nu pakhat Manu chuan nau neiin a nau neih zawh hian nikhawhrelo in a awm nghal a, nau pianghlim hi vanduaithlak takin ekin kua ah a tla a, a hnuah rel kawng a hnathawk ten nungdam in an chhar a ni. Rel hian Hanumangarh station a thlen veleh naute nu damdawiin ah dahluh nghal a ni a, a fapa thar pawh hi a nu bulah damdawiin ah dah a ni tawh a ni. Naute leh a nu awmna Hanumangarh town hospital doctor ten hemi te nufa hi uluk takin an enkawl mek a ni.

*IS TEN IRAQ AH MI 45 AN HALHLUM
Tunlai khawvel chanchinthar luah lum em em tu Islamic State firfiak pawlte chuan nimin khan Iraq ram khawthlang lam a khawpui pakhat al-Baghdadi ah mi 45 an halhlum a ni. He khawpui hi ISIS te hian karhmasa Ningani khan an la a ni.

17th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
17.2.2015

*Mi harsa zualte hnenah tanpuina turin MUP Chaltlang Unit, Chaltlang Aizawl chuan Rs. 5,000/- (Cheng sang nga) Chief Ministers’ Relief Fund ah an chhunglut. (DIPR)

*SCHOLARSHIP THUTHAR
(16.2.2015) Reserve Bank of India (RBI) chuan zirtawpni kal ta khan zirlaite scholarship tur chu Mizoram sawrkar sum bawmah a rawn chhung lut ta e. Mizoram Scholarship Board (MSB) lamin Finance Department-ah allocation an dil mek a. Vawiin lamah emaw, naktukah emaw MSB lam chuan allocation hi a fel an beisei a. Chumi hnuah treasury-ah MSB lamin bill an thehlut tawh ang. Treasury-a tihkhawtlai a nih loh nan MSU chuan theihtawp a chhuah zel dawn a ni. - MSU

*KURDISH TEN IS FIRFIAK ZING A MI 35 THAT
Niminpiah khan Syrian Kurdish sipai te chuan an ram tibuai em em tu Islamic State firfiak te an beihna ah IS zing a mi 35 chuang an that niin Syrian Observatory for Human Rights thuchhuah chuan a tarlang. He inbeihna hi hmun thum ah thleng in an inbeihna hmun hi Syria ram hmar lam khawpui Kobani leh Aleppo huam chhung ah a ni. Kurdish sipai te hian Islamic State firfiak te kut atangin Tal Baghdaq khawpui chu laklet tumin nasa takin an bei a ni.

*AIZAWL DISTRICT VILLAGE COUNCIL FINAL E-ROLL LEH AIZAWL DISTRICT LOCAL COUNCIL DRAFT ROLL TARCHHUAH A NI
Nimin chawhma ah khan Aizawl District Deputy Commissioner Dr. Franklin Laltinkhuma chuan ama Office ah Political Party hrang hrang aiawh-te, NGO hruaitute leh chanchinbumite kawm in Aizawl District Village Council Electoral Rolls, 2015 Final Electoral Roll leh Aizawl District Local Council Draft Electoral Roll, 2015 a tarchhuak a. Aizawl Local Council Final Electoral Roll hi Election Calendar ang chuan 27.02.2015 ah peihfel hman tura ruahman a ni.

Aizawl District Village Council Electoral Rolls, 2015 Final Electoral Roll in a tarlan dan chuan - Voters tlemna ber, Chhanchhuahna Khawpui voters 100 awmna ah mipa 56 leh hmeichhia 44 an awm a .

Voters tamna ber, Sihphir Village Council huam chhung 2793 voters awmna ah mipa 1348 leh hmeichhia 1445 an awm thung a ni. Aizawl District Village Council Electoral Roll ah hian vote thlak thei 71014 zingah mipa 35292 leh hmeichhia 35722 vote thlak thei te an ni. (DIPR)

*CHENGKHAT LEHKHA SIAMCHHUAK LEH DAWN
Reserve Bank of India chuan India pawisa chengkhat lehkha note chu a siamchhuak leh dawn. RBI hian kum 1994 atang khan chengkhat note an siamchhuah thin chu a chhutna man a to tak avangin a lo chawlhsan tawh a ni. Kum 20 dawn thaw India mipui ten a thar an lo neih tawh ngailoh Re.1 note chu reilo te ah siam a ni leh dawn a ni.

*BUS CHESUAL AH MI 10 CHUANG BORAL
Nizan khan Madhya Pradesh a Dahar district chhung a Mahcliya Ghat kham ah private bus chesual ah mi 10 chuang an boral a, mi 33 in hliam an tuar. He bus chesual ah hian passenger 55-60 an chuang ni a sawi a ni. An chetsual hun hi zan dar 9.15 pm vel niin kham 150ft chuang a sang ah an tla a ni. He bus hi Indore atanga Galiakot (Rajasthan) lam pan a tlan a ni.

*CHIEF MINISTER IN KAWLKULH KHUA TLAWH
Zan li riaka Champhai a tlawh hnuin, Chief Minister chuan nimin khan a haw lamah Kawlkulh khua a tlawh a, a tlawh hmasak ber tum a ni.

Chief Minister chuan a hun taka an thlenglo chungin Kawlkulh mipui ten a khawnawta dawhthei taka an lo hmuak chu lawmthu a sawi a. Zoram thar sorkar-in a buatsaih chho mek a ni tiin, kan ram zimte hi Lalpa min pek a ni a, A duhdana a leilung fate hian neitu rilru puin kan cheibawl tur a ni a ti a. Mizote hi Pathianin a vohbik hnama min thlan kan ni a, chuvangin thu tak leh felna nen, rinawmna leh taimakna nen a malsawmna tawng buak kan tum tur a ni a ti.

Chief Minister chuan hnam zahawm leh ropui ni tur chuan ei leh barah leh sum leh paiah intodelh a tul hmasa a. Chumi tur chuan Lal Isua’n ‘heng mi te berte chunga in tih hi Ka chunga ti in ni’ a tihte hi leirem rah tira khaweng an hmuh hmasak a ngai a. Hemi tur hian sorkar chuan a kalkawng a hria a, a ar khaw thim dai mai mailo a ni a ti. Chuvangin Kawlkulh mipuite chu sorkar hmalakna ngaichang thiam a, tawiawm tlat thin turin a chah a ni.

Vantlang inkhawm hi Kawlkulh Gate Venga Bazar shed-a neih a ni a, Kawlkulh VCP Pu Hmangaihzauva’n a kaihruai a ni. Chief Minister hi Pu T.T. Zothansanga, Parliamentary Secretary leh Pu R.Vanlalvena, MLA & Chairman, ZOHANCO ten an tawiawm a ni.

*EGYPT IN INDO THLAWHNA HMANGIN IS TE BEI
Nimin zing a Islamic State ten Egypt mi Kristian 21 te an lu an tansak lai video an tlangzarh hnu darkar reilo te ah Egypt sorkar chuan Libya rama Islamic State ten an thuhnuai a an dah Derna khua chu indo thlawhna hmangin an bei let ve nghal.

Egypt indo thlawhna te hi Libya sorkar thlawhna te pawhin an lo thawhpui niin Libya air force commander Saqr al-Jorousi chuan a sawi. He beihna avang hian Islamic State firfiak zing a mi 50 ten nunna an chan ni a sawi a ni. Islamic State firfiak te hian Egypt leh Libya inrinna lai thlaler ah te ralthuam nasa takin an tawlh ru thin a ni.

Nimin a kan rawn tarlan tawh angin Islamic State firfiak te hian Egypt ram a Kristian Coptic Christian ti a hriat mi 21 te chu Libya tuipui kamah khalh khawmin an lu an tansak a ni.

*HMARCHHAK HUAP NSS INTAWHKHAWMNA ‘NORTH EAST NSS YOUTH FESTIVAL 2015’ MZU-AH TAN A NI
Sports & Youth Services Minister Pu Zodintluanga’n nimin ah Mizoram University-a Hmarchhak huap National Service Scheme (NSS) thalaite intawhkhawmna ‘North East NSS Youth Festival 2015’ hawnna programme MZU Multipurpose Hall-ah neih chu khuallian niin a hmanpui.

Festival hawnna programme ah hian Hmarchhak state hrang hrang aiawh te hian an hnam lam te an entir a ni.

North East NSS Youth Festival hi NSS Regional Centre, Guwahati leh NSS (Cell) Sports & Youth Services Department tangkawpte buatsaih niin February ni 19 thleng a awh dawn a, he Festival a tel turin hian Hmarchhak state hrang hrang atangin zirlai naupang 300 vel rawn zin a. Festival chhung hian nitin thupui neiin thil zirhona hun an hmang dawn a ni. (DIPR)

16th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
16.2.2015

*INDIA LEH SRI LANKA IN NUCLEAR SIAMCHHUAH CHUNGCHANG AH INREMNA SIAM
Vawiin khan India Prime Minister Narendra Modi leh India ram tlawh a lo zin mek Sri Lanka President Maithripala Sirisena te chuan New Delhi ah Civil Nuclear siamchhuah chungchang ah thawh dunna tur thuthlung an ziak. Hei bakah hian ram pahnih te inkar ah agriculture, culture leh Nalanda University project a thawh dunna tur an ziak fel bawk. Civil nuclear energy siamchhuah kawngah ram 2 ten an thiamna leh theihna te an in tanpui thin dawn bakah a huho a hnathawh theih na te siam a ni ang.

*SIPAI LAK CHUNGCHANG SAWIFIAHNA
Lamtluang a tukin a sipai lak tur chi hrang hrang CAPF (Staff Selection Commission) kan rawn tarlan kha mi tam takin online a tih a har in tih thu leh hriatchian duh nei zawhna kan dawn nual avangin hrechiang duh tan a hnuai a mi hi chhiar nise.

A dil duh tan online leh offline in dil theih ve ve a ni a. Offline Dilna form hi Rs.50 man a ni. CRFS stamp Post Office ah lei tur a awm. Mizoram tana exam centre chu Aizawl a ni a centre code chu 5701 a ni. Dilna form hi Sainik Office, Aizawl leh Lunglei ah te lak theih a ni ang. Dilna thehluh hun tawp: 23.2.2015 (Mizoram leh NE tan bik 2.3.2015 thleng)

Thiamna ngai zat: Pawl 10 pass chin
Kum ngai zat: 1.8.2015 a kum 18-23 tling pha chin. (2.8.1992-1.8.1997 inkar a piang tan) ST tan kum 5 ngaihnathiamna pek theih a ni.
San zawng: Mizoram leh NE mi ST tan Mipa: 160 cms, Hmeichhia: 147.5 cms
Exam hun: 4.10.2015

Offline a dilna form thawnna tur:
Regional Director(NER),
Staff Selection Commission,
HOUSEFED Complex, West End Block, Last Gate, Beltola Basistha Road, Dispur, Guwahati, Assam-781 006.

Online Dilna form tihna:http://ssconline.nic.in/tpform1.php…

Hnaruak chungchang hriattur pawimawh leh hriattirna pdf a download na:
http://ssc.nic.in/…/FINAL_NOTICE_(Employment%20News)_24_01_…

Hriatthiam loh i nei emaw, hriatchian duh i neih chuan in awmna atanga hnaiber Sainik Office pan tawp la an lo pui thei ang che.

*RANGVAMUAL KAWNG KHAR VANGIN ZIRLAITE'N HARSATNA AN TAWK

Sawrkarin Rangvamual leimin a thenfai dawn avanga zing dar 6 ațanga tlai dar 6 thleng kawng a block chungchangah Sairang leh a chhehvel khua zirlai lehlanga Aizawl kalte'n promotion exam an neih deuh vek dawn avangin he kawng block mek hi tihtawp lailawk emaw, zirlaite tana harsatna siam lo tura rawtna chu vawiin khan MSU General Headquarters, Aizawl chuan Aizawl DC-ah lehkha a thehlut a, DC hi a hmuh theih rih loh avangin zanin hian hmuh tum a ni.

Vawiin tlai khan MSU President PC Lalrinhlua hovin General Secretary Lalremruata Chhangte leh Asst. General Secretary Lalthanzuala te chuan he hmun Rangvamual hi pan an tum a, Pu Lalruatkima petrol pump-ah mipuite police te'n an lo dan avangin a hmun an thleng thei ta lo a ni. He hmuna zirlai leh mipui tangkhang hi mi 500-700 vel lai an ni.

*ZU PEK DUH LOH VANGIN ASSAM RIFLE TEN MI 2 KAPHLUM
Nizan khan Tezpur a Patia Chuburi vengah Assam Rifle sipai ten zu an dil an pek duh loh avangin chhungkaw pakhat a mi 2 an kaphlum a, an kahhlum te hi Gautam Das leh Babu Das te anni a, an chhungkaw zing a hmeichhe 1 Jinu Das pawh an kap hliam bawk a ni. Assam police ten he thil thleng hi uluk takin an chhui chiang mek a ni.

*SSC IN SIPAI SING RUK CHUANG LA DAWN

CAPF (Staff Selection Commission) chuan pawl sawm pass chin kum 18-23 inkar (hmeichhia leh mipa) tan sipai chi hrang hrang a la thar dawn a, sipai lak tur zat hi 62390 a ni. He hnaruak hi online in 23 February 2015 thleng dil theih a ni ang.

Sipai chi hrang hrang lak thar tur leh lak tur zat te chu:
1. CRPF - 24588 (Male - 22623, Female -
1965)
2. BSF - 22517 (Male - 17698, Female -
4819)
3. CISF - 5000 (Male - 4493, Female - 507)
4. SSB - 6224 (Male - 5619, Female - 605)
5. ITBP - 3101 (Male - 2795, Female - 306)
6. Assam Riffle - 600 (Male - 300, Female - 300)
7. SSF - 274 (Male - 247, Female - 27)
8. NIA - 86 (Male - 82, Female - 04)

Pay Scale - Rs. 5200/- to Rs.20200/- +
Grade Pay of Rs. 2000/-

Mumal zawkin http://ssc.nic.in ah en theih a ni e.

*ISIS TEN KRISTIAN TE LU AN TANNA VIDEO TLANGZARH
Nizan khan Lybia ram a Islamic State firfiak ten an mi man Egypt ram mi Kristian (Coptic Christian) 21 te tuipuikam a, a mal mal a an lu an tan sak lai video an tlangzarh a ni. Video a landan chuan heng an mi man te hi kawr serthlum rawng an hak tir a, tuipuikam ah a mal te te in firfiak pawl mi 1 zelin hmaituam chungin an veng a, thingthi tur a hrilh annih hnu ah an hmaiin hnuai lam a chhawn ta tih ah an lu tan sak anni ta a ni. Heng Kristian an lu an tansak tak te hi nikum December leh kumin January thla a a Libya khawchhak lam khawpui 1 Sirte ah ISIS te hian an man a ni. Egypt sorkar chuan heng Kristian boral ta te hi chawlhkar khat sunna hun hman turin hriattirna a chhuah nghal a, an ram President Abdel Fattah el-Sissi chuan engtia chhanlet tur nge tih ngaihtuah turin national security emergency meeting a ko nghal bawk a ni.