2nd March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

2.3.2015 
*CADC HUAMCHHUNGA VILLAGE COUNCIL GENERAL ELECTION 2015 TLUANG TAKA NEIH ZAWH A NI TA
Chakma Autonomous District Council hnuaia Village Councils inthlanpui chu ni 25.2.2015 khan Village Council 81-ah tluang taka neih zawh a ni ta. Hetah hian khaw 10-a Candidate-te chu thlan ngai lova uncontest-a tlinga puan an ni a. Village Council 71 inthlanpui buatsaihna khuaah hian voters 26,140 awmin voters 22,153 in vote an thlaka, a pumpuia voter turn-out percentage chu 84.74% a ni.

Vote thlak that berna khua hi 15-Old Bajeisora a ni a, voter 142 awmah 138 in vote an thlak a, 97.18% in vote an thlak tihna a ni. Vote tlak chhiatna ber chu 79-Parva-lll a ni a, he khuaah hian 61.30% a tla thung a ni.

A hnuaia mi ang hi Party-wise results chu a ni:-
BJP - 7, INC-63, MNF-3, Independent - 5, No clear majority - 3, Total - 71

He inthlanpuiah hian harsatna lian tham thleng engmah a awm lo a, vote thlak chungchang bakah dan leh thupek kenkawh kawngah leh inbiak pawhna lamah pawh District Election Officer, Addl. DC, Asst. District Election Officer leh Staff-te, Election Observer, CADC thuneitu te, SDO/BDO/Zonal Officer, Sector Officer-te, Returning Officer, Polling Official-te, SP leh District Police, MPRO, Political Party-te leh NGO a bik takin Young Chakma Association (YCA)-te inpekna leh thahnemngaihna avangin a felfaiin a muanawm hle a ni. Hemi avang hian SEC chuan he inthlanpui tluang taka neih a nih theihna atana mawhphurtu leh tha thawhtu zawng zawngte chungah lawmthu a sawi tak meuh meuh a ni. (DIPR)

*Vawiin khan Mizoram zirlai scholarship lak phut a kawngzawh ten "Hawl eka" tiin an au rual lai a hnuai a youtube link ah hian en theih e.
https://www.youtube.com/watch?v=tdBGzLFsNcg

*MIZO TLANGVAL IN JNU ATANGIN Ph.D ZO THAR
Tv.Robert Lalremtluanga Ralte S/o.Vanlalsiama Ralte, Kolasib New Diakkawn chuan vawiin 2.3.2015 khan Centre for Historical Studies, Jawaharlal Nehru University, New Delhi atangin Doctor of Philosophy (Ph.D) a dawng thar. A thesis chu 'Forest, land and development: An ecological history of Mizoram 1952-2000' tih a ni.

Robert Lalremtluanga Ralte recently awarded Ph.D from JNU

*KUM 5 CHHUNGA NLUP APEX BOARD MEETING HNUHNUNG
27.2.2015 khan NLUP Apex Board chuan Chairman, Pu Lal Thanhawla Chief Minister hovin NLUP Implementing Board conference hall-ah Apex Board meeting vawi 14-na leh, kum 5 chhung atana a hnuhnung ber tur an nei a. NLUP hnuai hmalakna hrang hrang te leh heng atanga hmasawnna dinhmun te thlir hovin NLUP kalpui chhunzawmna tura thil pawimawh te an ngaihtuah ho a ni.

Chief Minister Pu Lal Thanhawla chuan “NLUP chu mirethei kut hnathawktu ten mi hausa leh thil tithei zawkte tlawn ngai lova, mahni kutkea an din ve theihna tura Pathian programme a nih avangin titawp tura theihtawpa beihna leh hekna nasa tak tawk mah se, project kalpui chhunzawm zel tura sum mamawh zat chiah central sorkarin a rawn pe a, kalpui chhunzawm zel a ni ang,” a ti.

Apex Board meeting ah hian kum 5 chhunga NLUP kalpui dan tlangpui leh kum 2014-15 atana NLUP sum ruahmanna thlir ho a ni a. NLUP kalpui chhunzawmna tura ruahmanna hrang hrang- UN Agencies te nena thawh hona tur te, thil deh chhuah hralhna tur market chungchang te, NLUP Phase II kalpui chhunzawmna tur leh hemi hnuaia beneficiary 15,000 dang tanpuina tur te, Funding Agencies dang pahnih, North East Region Livelihood Project(NERLP) leh Tata Trust Fund under Corporate Social Responsibility(CSR)te thawhpuina kawng dap dan chungchang te, Skill development atana hmalakna tur te, NLUP hnuaia hmalakna chhuanawm bik leh chhenfakawm tanpuina pek dan tur chungchang te, Horticulture department hnuaia thlai chi leh hmanraw sem dan tur chungchanga ruahmanna siam te bakah NLUP hmalakna enpui tura State Planning Board mawhphurhna pek chungchang te thlir hovin zau taka sawiho a ni.

He meeting ah hian line department 9 ten kum 5 chhunga an hmalakna leh hmasawnna te, harsatna tawh leh tuna an dinhmun tlangpui theuh te tarlangin presentation an pe a. A pumpuia NLUP dinhmun tlangpui tarlangin NIB Vice Chairman Pu P.L.Thanga’n report a pe a. Consultative Committee on NLUP member pahnih- Dr. Robert Halliday leh Pu Zion Lalremruata ten Marketing leh Safe farming- Israel model chungchang ah presentation an pe bawk a ni.

Apex Board meeting ah hian kum 5 chhung thahnemngai taka NLUP kalpui leh enkawltu Line department 9 te hnenah chawimawina, Certificate of Appreciation, Pi Lal Riliani, President, Indian Society on Tobacco & Health, Mizoram Chapter-in a hlan a. Chief Secretary Pu Lalmalsawma IAS in lawmthu sawiin meeting hun hnung a khar a ni. (DIPR)

*KHAWLAILUNG IN KURTAI KUT 2015 HMANG DAWN
Khawlailung khua chuan March ni 11(Nilaini),2015 khian 'KURTAI KUT' an hmang dawn. Khawlailung khua hi in 530 niin fu ching hi in 150 an awm mek bawk.

Khawlailungah hian fu hi a tha duhin sum lakluhna pui ber atan an hmang mek a, nikum khan KURTAI Quintal 1000 tharin tun kum 2015 ah hian Quintal 3000 thar an in beisei a ni. Hriat theih chinah Mizorama fu ching tamna ber khua niin KURTAI thar tam ber an ni bawk a, hetiang taka an hlawhtlinpui thlai a nih avang hian 'KURTAI KUT' hman hi an rel thlu ta a ni.

He 'Kurtai Kut' ah hian Home minister, Agriculture Minister ni bawk Pu R.Lalzirliana chu Khuallian a ni ang a, Parliamentary Secretary leh Official engemawzatin an hmanpui dawn a, Vanlalhlana’n zaiin mipui a awi bawk ang. '

KURTAI KUT' ah hian hengte hi chhawp chhuah tum a ni:-
1. Fu feh tur - Free
2, Fu tui in tur - Free
3. Kurtai - Discount
4. Faisa hlawm
5. Kurtai atanga siam Toffee
6. Hmawngsawi
7. Fu tui chhuang khang lai-Khuallian chawh khal tir a ni ang.
8. Zochhang leh Kurtai Official te tan.

He 'KURTAI KUT' hmang tur hian Zoram mipuite sawm vek kan ni a, Khawlailung hian KURTAI chauh an ngah lova, Footballer - MPL Player, ISL Player leh National Player te pawh an nei a ni. Anmahni i hmuh duh chuan he KUT ah hian kal ngei chi a ni. Khawlailung KURTAI thlum leh thlum loh i hriat duh chuan March 11,2015 ah ngei ngei aw……

Source: Norbert Khawlhring

*FILM COMPETITION BUATSAIH DAWN
Information & Public Relations Department chuan film siam lama tuimi, Mizoram Films Development Society ( MFDS ) – a in ziaklut film producer te tan Competition a buatsaih dawn a. Film hi 85 to 90 minutes chhung daih a ni ang a, thupui thlan bik awm lovin film siamtuin tha a tih ber a thlang ang a. April 15 hmain film hi siam zawh tur a ni dawn a ni. (DIPR)

*AIZAWL KHAWPUI CHHUNGA RANTALHTUTE HMAN TUR SLAUGHTER HOUSE BAWNGKAWN BRIGADE RAM AH SAK BELH DAWN

AH & Vety Minister Pu C.Ngunlianchunga chuan Bawngkawn Brigade ramchhunga rantalhna in sak tum, 'Rural Slaughter House Brigade Veng' hmunhma leh a panna kawngpui te a endik a. Minister hi AH&Vety Director Dr. L.B. Sailo leh a thawhpuite bakah khawtlang hruaitute'n an tawiawm a ni.

AH&Vety hotute hian helai hmun a Slaughter House sak a tulna chhan sawiin Aizawl khawpui chhuahlam, chhimlam leh New Market rantalhtu zawng zawng te'n Mualpui venga Slaughter House an hman tawh avangin helai hmuna leng ve lo hmundanga rantalhtute tan rantalhna in hran mamawh a nih vang a ni an ti a. He Slaughter House hi Bawngkawn Bazar, Vaivakawn Bazar, Hunthar Veng, MZU kawngpui dung leh Mualpui Slaughter House hmang pha lo tan rantalhna hmun atan hman a ni ang.

Nikhat chhunga bawng 40 leh vawk 50 talh theihna tur, Rural Slaughter House Brigade Veng sakna leh a panna kawng siamthat hnathawhna tur sum Rs. 387.28 Lakh hi NABARD hnuaia Rural Infrastructure Development Fund(RIFD) atanga hmuh a ni a. A sak hna leh kawngpui cheithat hna hi 2015-16 Financial Year chhunga zawh hman beisei a ni. Slaughter House awmna tur hmun hi Brigade Field bul chiah a kawngpengthuampui atanga 600 meters a hla niin rantalhna thli pawh Effluent Treatment Plant(ETP) ah luanluh tir a ni ang. (DIPR)

*MIZO TAWNG A PHONE, COMPUTER LEH INTERNET KAIHHRUAINA
Mobile phone, computer leh internet hmangtu te tan a tangkai leh kaihhruaina Mizo tawng ngei a tarlanna page a hnuai a link kan tarlan hi i la like loh chuan lo like sak ve rawh le. I apps leh software hman duh tam tak kha i hriatchian phah thei ania.
https://www.facebook.com/Hmangchang.Blog 

*ASSAM AH SWINE FLU VEI HMUCHHUAK
Assam ah swine flu (H1N1) vei 2 hmuhchhuah an ni. Heng damlo te hi Namrup leh Guwahati a mi te anni. India hmarchhak state dang Nagaland ah swine flu vei mi 4 hmuhchhuah tawh anni a, Mizoram ah swine flu vei 1 hmuhchhuah tawh a ni bawk.

*MPSC CHAIRMAN THAR
Mizoram Governor chuan ram danpui Article 316 (1)-in thuneihna a pek angin Mizoram Public Service Commission (MPSC) Chairman atan MPSC Member ni lai mek Andrew Lalherliana a ruat thar.

1st March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

1.3.2015

*J&K CM THAR LALUT
Vawiin ah Jammu and Kashmir Chief Minister 12-na turin PDP hotupa Mufti
Mohammad Sayeed chu lakluh a ni. Jammu and Kashmir ah hian People Democratics Party (PDP) leh Bharatya Janata Party (BJP) ten tangrual sorkar an siam ta a ni.

*Zirlaite chanvo rahbeh duh lohna kawngzawh"-Mizo Students' Union

KAWNGZAWH DAN TUR
@Monday 10:00 am: Chanmari kawn ațanga Vanapa Hall thlenga kawng zawh tur te:

1. Govt. Hrangbana College
2. Govt. Aizawl North College
3. Govt. J.Thankima College
4. Govt. Zirtiri Residential Science College
5. Govt Aizawl West College
6. Govt. Mizoram Law College
7. Mizoram University
8. Women Polytechnic
9. ICFAI University
10. Sikkim Manipal University
11. NIELIT
12. Private Insitution leh zirlai scholarship dil, Aizawl hmar lama awm zawng zawng te.

MSU President PC Larinhlua, General Secretary Lalremruata Chhangte leh Finance Secretary T. Nengkhansut leh hruaitu dangte bakah SU leader-te'n an ho vang.

@Monday 10:00 am Sikulpuikawn ațanga Vanapa Hall thlenga zirlai kawngzawh tur te:

1. Govt. Aizawl College
2. Pachhunga University College
3. Govt. Johnson College
4. Govt. T. Romana College
5. ITI zirlaite
6. Private Institution leh zirlai scholarship dil Aizawl chhim lama awm zawng zawng te.

He hunah hian MSU Vice President R. Lallawmsanga, Asst. General Secretary Lalthanzuala, Treasurer Benjamin Lalnghaka Fanai leh hruaitu dangte bakah SU leader-te'n an ho vang.

ZIRLAI SCHOLARSHIP DIL ZAWNG ZAWNGTE KIM TAKA KAL VEK TUR A NI.

*DIK LEH RIL: HENG MAKE-UP HI LO HMANG VE TEH
I hmui ah - THUDIK
I mit ah - LAINATNA
I kut ah - THILPHALNA
I hmai ah - HLIM HMEL
I ka ah - TAWNGTAINA
I thinlung ah - HMANGAIHNA

 

*BCM ASSEMBLY NA TUR HLAN DAWN
Baptist Church of Mizoram (MCM) Assembly vawi 119-na chu March ni 4-8 hian Mizoram Baptist Kohhran Biak In, Farmveng, Lunglei-ah nghah a ni dawn a, hemi inkhawmpui neihna tur Biak in leh a hual vela Pandal an zar chu zanin ah bialtu pastor Rev.JC. Vanlalluaia ho in hlanna neih a ni dawn.

*MIZO IRS OFFICER RL RINAWMA CHAWL TA
Nimin 28.2.2015 khan Mizo pa Indian Revenue Service (IRS) officer R.L Rinawma chu a hna Principal Chief Commissioner of Income Tax - Delhi Region atangin a chawl ta. Amah hi 1978 IRS batch a ni a, kum 37 zet IRS officer hna a thawh chhung in India ram hmun hrang hrang - Pune, Bangalore, Mumbai, Mysore leh Delhi ah te post a ni a, a awmna apiangah sorkar tan leh Mizo te tan a mi tangkai tak a ni thin a ni. Kum 2009 khan Mizoram sorkar ah deputation in a lo chhuak a commissioner/Secretary hna a thawk a, kum 2014 khan Delhi ah a parent department Central Board of Direct Taxes ah a kir leh a ni.

*KTP ROREL INKHAWM ZANINAH TIAK ANG
Mizoram Presbyterian kohhran Kristian Thalai Pawl rorel inkhawm vawi 6-na Mission Veng Kohhran Biak In, Aizawl-a neih mek chu zanin ah a tiak ang. KTP rorel inkhawm hi General conference neih loh kum apiang in neih thin a ni. Palai + Chhimtu mi 828 an awm a ni. Rorel inkhawm an an thu pawm te chu post hmasa lamah tarlan a ni tawh a, i lo hai let mai dawnnia.
Pix courtesy: Matluanga Mission veng

27th & 28th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM
28.2.2015
*PETROL LEH DIESEL MAN SANG DAWN
Zanin zanlai atangin India ram pumah petrol leh diesel man tih san a ni dawn. Petrol hi 1 litre zel ah Rs.3.18 in a to dawn a, Diesel hi 1 litre zel ah Rs.3.09 in a to dawn bawk. International a crude oil man a to tak vangin India ah pawh tuialhthei man hi tih san a ni dawn ni a sawi a ni.

*LAMTLUANG WEEKEND SPECIAL(MIZO FIAMTHU)
*Non-Mizo Pakhat Kristiana inpe kha vanram a kai dawn em tih an zawt a, "Kai chu kai ang, mahse tlem chu hau ang" a ti😀.

*Tlangval sual deuh pakhat pawh hian a pa hnenah meidila tlak a hlauh thu leh a sat tur zia a sawi a, a pa chuan,'mite pawh an awm theih chuan awm theih tum ve tur ania'.. a ti.

*KRISTIAN THALAI PAWL (KTP)
Rorel Inkhawm Vawi 6- na
A hmun : Mission Veng Kohhran Biak In
A hun: Feb 27-March 1, 2015

1.Palai Inchhiarna
i)CKTP-23
ii)Bial aiawh palai-186
III)Br.aiawh Palai-605
Iv)synod puipate-3
V)C Kohhran Hmeichhe Committee-2
VI)Minister,Pastor,Pro.Pastor/Upate-7
Vii)chhimtute-2
Total-828

2.Kum 2017 -a KTP Rorel Inkhawm vawi-7 na.A hmun :Bawngkawn Kohhran Biak In
A hun :March 3-5,2017
Agenda pass te:
1)YRC pual hian Budget Aizawl khawpui chhung tan member pakhatah Rs 50,District Capital tan Rs 30 leh a dang zawng Rs 20
2.YRC pualin thawhtan zan inkhawm thawhlawm tum khat hi ram pum huapin lakkhawm ni rawh se.
3.Central KTP in ram pum huapin sual thupha chawi tawngtai rual buatsaih rawh se leh CKtp hmalaknain Branch tinah zoram tan chawnghei tawngtai neih ni rawh se.
4.Ram pum huapin thawhtan zan inkhawm vawi khat thawhlawm hi synod Hospital pualin pek rawh se.
5.Cenral KTP in Orchestra Band din dan ngaihtuah rawh se.
6.Kum Puan thupui atan
Pathian nena lendun (Mika 6:8)


*#‎Budget2015‬
Vawiin a Union Finance minister Arun Jaitley an Lok Sabha a Budget 2015-16 a pharh a India hmarchhak lam tan a thil lawmawm te:
*Assam ah All India Institute of Medical Sciences (AIIMS) din a ni ang.

*Nagaland ah National Institutes of Pharmaceutical Education and Research din a ni ang.
*Arunachal Pradesh ah Centre for Film Production, Animation and Gaming din a ni ang.
*Mizoram in a bik a thil thar kan chan ve tur sawilan a awm lo thung.

*Central Young Lai Association, Lawngtlai in February 24, 2015 atanga sorkar a an thilphut te tihlawhtling tura sorkar nawrna, total bandh an neih chu sorkar atanga thu lawmawm hriat tur a la awm loh avangin March 4, 2015, zing dar 6 atanga tan leh turin chawlh lailawk a ni dawn.

Hetih chhung hian motor leh mihring khualzin tang te pawh chhuah an ni ang. Thawhlehni thlenga sorkar lam atangin thu lawmawm hriattur a awm loh chuan total bandh hi chhunzawm leh a ni ang.

*KARNATAKA DG&IGP LALROKHUMA PACHUAU CHAWL DAWN TA
Vawiin hian Mizo pa IPS tuna Karnataka state a Police hotu luber Director-General and Inspector General of Police nilai Lalrokhuma Pachuau chu a hna atangin a chawl dawn ta a ni. Amah hi 1977 batch IPS officer niin Karanataka cadre pek a ni. Hman deuh khan Mizoram ah lo chhuak in DGP hna a rawn thawk a, a hnathawhna state ah DG&IGP hna thawk turin Bengaluru ah a chhuk leh a ni. Lamtluang a thlalak kan rawn tarlan hi nimin a amah thlahna parade KSRP Ground, Koramangala a neih a guard of honour a dawng lai a ni.

27.2.2015

*DDK AIZAWL AH UNION BUDGET 2015 SAWI HONA NEI DAWN
Union Budget 2015 chu 28th February, 2015 (Inrinni) ah Finance Minister Arun Jaitley-a'n a pharh dawn a, tlai dar 5:30-6:30 ah Budget pharh tak chungchang sawihona hi Doordarshan Aizawl chuan a buatsaih zui ang. He live discussion ah hian Prof. Vanlalchhawna Department of Economics MZU te, Dr James C.T. Thanga Asst Prof. MZU leh J.Malsawmzuala Vanchhawng DDK ten hun an hmang ang. (DIPR)

*NATIONAL COMMISSION FOR MINORITIES MEMBER-IN CHIEF MINISTER HMU
Ni li chhung cham tura Mizoram rawn tlawha nimina lo thleng, Capt. Praveen Davar, Member, National Commission for Minorities (Union MOS rank) chuan nimin tlai khan Chief Minister Pu Lal Thanhawla chu a office Chamber-ah a hmu.

Capt. Praveen Davar hi Prime Minister 15 Point Programme leh Multi Sectoral Development Programme chungchanga Mizorama lokal a ni. Indian Air Force Chief in a Chief Minister hnena pek tur thilpek a ken tir chu Capt. Praveen hian Chief Minister hnenah a hlan bawk a ni.

Capt. Praveen Davar hian Chief Secretary leh official pawimawh dangte nen vawiin ah a la kawm dawn a ni. (DIPR)

*MBSE IN A HRANPA IN EXAM BUATSAIH DAWN LO
Mizoram Board of School Education thuneitute chuan Higher Secondary School Leaving Examination 2015 tan hun dawn a Central Young Lai Association (CYLA) in Bandh an siam chu pawi an ti a. He Bandh avanga zirlai naupang Higher Secondary School Examination a thu thei lo te tan a hranpa in exam dang nakin ah a buatsaih theih loh tur thu leh, Exam an beih leh theihna hmasa ber chu nakum 2016 a nih thu MBSE chuan an sawi. (DIPR)

*RAIL BUDGET MIZORAM TAN CHHAWR VE TUR AWM EM?
Nimin a Union Railway Minister Suresh Prabu an Parliament a Rail Budget 2015-16 a pharh tak ah khan point 52-na ah India hmarchhak state zawng zawng te railway line pek vek annih tur thu a sawi a, Meghalaya pawh India railway map ah rinluh theih a ni tawh a, kumin March thla atangin Barak Valley pawh rel kawng lian chi (broad gauge) hmang bul tan a ni ang a ti. Mizoram tan bik Barak valley (Silchar vel bawr) rel kawng lian chi - broad gauge hmanga tih zauh a nih chuan bungrua leh ei leh in tur lakluh kawngah pawh kan awlsam phah ve thei a, tin, hmun hla zawk zin nan te pawh Guwahati atang chauh nilo, Silchar vel bawr atang te pawhin rel a chuan theih ve theih thuai turah ngai ila. Tin, Union minister hian NE state dang a rel kawng siam mek te pawh in chak takin hma a sawn zel niin a sawi bawk.

26th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM
26.2.2015

*MIZO CHAWHMEH ONLINE A ORDER NA (MIZO FOODS ONLINE ORDERING)
A hnuaia link hi en la Mizo chawhmeh online in a order theihh e. Mizo te hian online a thawmhnaw leh bungrua chah reng bik lo hian online a thil thawnchhuak tu kan ni ve thei a ni tih i hre vek ang u.
https://www.facebook.com/zoei2014

 

*Ph.D DAWNG THAR
K.Lalbiakchhunga s/o K.Zahmuaka, Ramhlun North, Aizawl chuan vawiin hian Centre for American Studies,School of International Studies,Jawaharlal Nehru University, New Delhi atangin Ph.D a dawng thar a. A thesis title chu "Role of US in Dismentlement of Weapons of Mass Destruction in former Soviet Union 1991-2000" a ni. Tv.Biaka hi kum 2013 khan UPSC ah pawh inziak tlingin Indian Defence Account Service (IDAS) a zawm a, tunah Guwahati ah post mek a ni.

*CHIEF MINISTER-IN MHIP RUBY JUBILEE LAWMNA HMANPUI
Mizo Hmeichhia Insuihkhawm Pawl (MHIP) in kum 40 tlin, Ruby Jubilee lawmna Sipai Lammual AR Ground a buatsaihah Chief Minister Pu Lal Thanhawla chuan a hmanpui a, MHIP hian Mizo hmeichhiate tana sorkarin hamthatna a siam, inneih leh inthen thulha Mizo hmeichhiaten chanvo an nei theihna tur dan siam thu ah Chief Minister leh a nupui an chawimawi nghal.

Chief Minister chuan MHIP in kum 40 a tling ta chu Mizo hmeichhia zawng zawngte chu chibai bukin lawmpuina thu a sawi a. Chawimawi a nihna ah Pu Hawla chuan a phulo ber a ni tiin, dan hremi leh thiam anih loh thu leh mi chikmi a ni lo a, a thawhpui midangte ngaihtuahna atanga lo chhuak, Law Commission leh MLA mithiam rual te atang chhuak a ni a ti a. Heti chunga a hminga a hotu a nihnaah an chawimawi chu lawm thu thinlung takin a sawi a ni a ti a. Lawm nachang hriat hi Pathian duh zawng anih avangin MHIP chu malsawmna in ala vur zel ang tih a beisei a ni a ti.

Chief Minister chuan hmeichhiate hi an pawimawh hle a ni tiin, ringtu zingah phei chuan an pawimawh lehzual a ni a ti a. Khawtlang leh kohhrante tha taka kaihruai tur hian inchhung atanga bul tan a ngai a. Hetah hian pa aiin nu hi in pawimawh hle zawk a ni a ti a. Mizote hi kan vannei bika a hriatthu sawiin, Pu Hawla chuan tlawmngai pawl NGO tha tak YMA leh MHIP kan nei hi sorkar tan leh khawtlang tan pawl tangkai tak an ni a ti a. India ram pawhin a hriat tham tlawmngai pawl an ni a, kan vannei hle a ni a ti. MHIP lo kaihruaitu tawh zawng zawngte chungah lawmthu a sawi a ni.

Chief Minister leh a nupui Pi Lal Riliani te hi chawimawina thilpek citation MHIP hian an hlan a. Chief Minister hian MHIP kum 40 tlin hriatrengna monument a hawng bawk a ni.

Inkhawm hi Pi Lalthlamuani, President, MHIP Gen. Hqrs. in a kaihruia a, lawmna hunah hian mal zai bakah zaipawl te hla sak mawi tak tak ngaihthlak a ni a, lam chi hrang hrang engemawzah entir a ni bawk a ni.

Kum 40 tlin lawmnaah hian MHIP Gen. Hqrs. hruaituten Pu R.Lalzirliana, Home Minister, Pu R.Lalrinawma, Dy Speaker, Pu T.Sangkunga, Chairman, Mizoram Youth Commission leh Pi Vanlalawmpuii Chawngthu, MLA te an sawm bawk a ni. (DIPR)

*SIPAI LAK RUNPUI NEI DAWN

Mizoram thalaite tan Rajiv Gandhi Stadium, Mualpui-ah Indian Army tan Sipai Lak Runpui (Recruitment Rally) chu March ni 6 - 11, inkarah buatsaih a ni dawn a. Rally ah hian Soldier (General Duty) Soldier (Tradesman); Soldier (Technical); Soldier (Nursing Assistant) leh Soldier (Clerk/Storekeeper/Inventory Management) te lak a ni dawn.

March ni 6 hian Soldier (General Duty) leh Soldier(Tradesman) tan Aizawl, Saiha, Lawngtlai leh Mamit District te an intlar thei ang a; District dang(Kolasib, Lunglei, Serchhip leh Champhai) te chu Soldier (General Duty) leh Soldier (Tradesman) tan March ni 7 ah an intlar thei ang. Soldier (Technical); Soldier (Nursing Assistant) leh Soldier (Clerk/Storekeeper/Inventory Management) tang duhte chu March ni 8 leh 9 ah an intlar thei ang.

Soldier (Technical); Soldier (Nursing Assistant) leh Soldier (Clerk/Storekeeper) te tan hian Mizoram thalai bakah Arunachal Pradesh, Assam, Meghalaya, Sikkim, Tripura leh Nagaland a mite pawh an intlar thei ang. Sipai tanglai fate, sipai pension tawh fate, sipai pasal sun tawh hmeithai fate, NCC ‘C’ Certificate nei te leh infiam mite chu Soldier (General Duty) leh Soldier (Tradesman) atan heng ni ah te hian an intlar thei ang.

March ni 10-11 inkarah Rally-a tling te Document leh hriselna (Medical) endik a ni ang. Hetah tling Soldier (General Duty) te chuan March ni 15 khian Aizawl ah Written Exam an nei ang.

He sipai lak runpui atan hian a hma in dilna thehluh hran a ngai lova, a ni a intlar mai tur a ni ang. Soldier(General Duty) leh Soldier (Tradesman) chu Pawl 8 pass chin tan dil theih niin kum bithliah chu 17 ½ - 21 inkar a ni a. Soldier (Technical) leh Soldier (Nursing Assistant) te tan chuan 10+2 (Science) leh Soldier (Clerk/Storekeeper) tan chuan 10+2 (Arts, Science leh Commerce) chin tan dil theih niin kum bithlaih chu 17 ½ - 23 inkar a ni.

Hre chiang duh tan Army Recruiting Office, Supply Point Zembawk ah zawhfiah theih a ni. Office Phone no. te chu 0389-2351166 leh 0389-2351518 te an ni. Aw record sa –Integrated Voice Response System hmangin phone no. 0389-2350141 ah a zawhfiah thei bawk a ni.

Intlar ni ah hian thawmhnaw inthlakna ken tel a that thu leh document te chu sarang emaw file cover emaw (huh thei lova) dah turin ARO te hian intlar tumte chu a chah. Hriselna endik hunah hian beng a fai tawk loh thin avangin leh taksa a tattoo an neih avangin mi tam tak an tla thin a, chuvangin beng ti fai tur leh tattoo tihreh chu ngaipawimawh turin an chah tel bawk a ni. Sipai a tling hi mahni theihna, merit based behchhan anih avangin mibum hmang te laka fimkhur turin leh sum tham a sipai a luh tir thei a insawi an awm chuan chung mite chu thuneitute leh ARO te hnenah pawh hriattir(report) turin an ngen bawk a ni. (DIPR)

#‎RailwayBudget‬ pharh mek ah:
*Rel(train) chuan man tihsan a ni lo.

*Rel pindan zawng zawng ah mobile phone charge dah a ni dawn.

*Rel tlanchak chi 9 siamthar a ni ang.
*Digital India hnuai ah B class station te chu wi-fi facility pek anni ang.
*Smart phone leh debit card hmangin unreserved ticket lei theih tur a siam a ni ang.

*Union Railway Minister Suresh Prabhu chuan Lok Sabh ah BJP in sorkarna an chan hnu a Railway Budget hmasaber chu a pharh mek.

*TRIAU TRACKX MUSIC VIDEO HIT HLE
Nimin a Triau Trackx ten an music video thar 'Hmalam i pan ang' tih youtube a an dahthar chu viewer 5135 an nei tawh a, a MP3 zoland.in ami chu mi 8941 in an download tawh bawk a ni.

‪#‎triautrackx‬

*#‎Lawngtlai‬ ah Central Young Lai Association huaihawt in a ni 3-na atan total bandh kalpui leh mek a ni.

LAMTLUANG ZINGKAR CHANCHINTHAR LAWRKHAWM
*Nimin khan MNF Party huaihawt Total Bandh neih a nih mek laiin Vairengte ramri a autoricksaw stand ah bandh duty ten Assam R.O pakhat kaltlang tum an phalsak loh avangin buaina a chhuak tep a, ani hi Assam police te hnenah zualko in Assam Police te an SP ho in ramri ah an rawn chho a, mahse Bandh a nih avanga kaltlang phallo anni tih duty ten an lo hrilhfiah a. Engemaw chen an inhnialbuai hnuah bandh tihtawp a ni tak avangin buaina an tawk chhunzawm ta lo a ni.

*Nimin khan Chakma Autonomous District Council huamchhungah bial 81 ah tluang takin Village Council inthlan neih a ni. Vote hriat theih chinah Congress party an che tha ni a sawi a ni.

*Islamic State firfiak ten Syria atanga Kristian 90 chuang an rukbo avangin Syria ram leh a thenawm a Kristian te an thlabar hle. Kristian tam tak chuan an in leh lo te tlansanin hmun him zawk ni a an hriat ah te an raltlan mek a ni.

*Vawiin ah India Parliament ah Union Railway Minister Suresh Prabhu chuan Railway Budget 2015-16 a pharh ang. Hei hi Sorkar laipui a BJP in sorkarna an chan hnu a Railway Budget pharh hmasak ber tur a ni.

*Telecom Regulatory Authority of India, (TRAI) chuan dan siamtha in mobile phone hmangtu ten an number thlak lo a service provider dang a an insawn theihna, Mobile Number Portability (MNP) chu state chhungah chauh ni tawh lo in, rampum huap in an duh na hmun hmun ah an thlaktir theih a phalsak ta. Heihi thlaleh March ni 3 atanga hman tan a ni ang.

*Digital India programme hnuaiah India ram a Gram Panchayat nuai 2 leh sing 5 te hnenah internet chak chi high speed broadband connectivity pek anni dawn. Mizoram ah chuan Gram Panchayat hi Village Council kan ti daih.

*Sorkar laipui chuan India hmarchhak state hrang hrang te a ramdang mi khualzin te tan a tlawh phallohna dan Restricted Area Permit chu tihtawp dan a ngaihtuah mek.

*Nimin khan Union Minister of State for Home Haribhai Chaudhary chuan Rajya Sabha ah Nagaland police 5 ten hel pawl NSCN-IM hnenah ralthuam leh hmanrua te an hralh ruk avangin man anni a ti. Police an man te hi Superintendent of Police, Deputy Superintendent, sub-inspector, assistant sub-inspector leh Havildar te anni.

*Afghanistan ah vur sur leh vur tawlh avangin mi 108 chuang in nunna an chan. Vur tawlh hian mihring chenna in 100 chuang a ti chhia a ni.

*Philippine sipai ten hel pawl Abu Sayyaf te beiin an zinga mi 5 an kaphlum. Sorkar sipai lamah mi 2 in nunna an chan ve bawk.

*Niminpiah khan Nigeria a Potiskum khawsir a bus station ah bomb vawi 2 apuah avangin mi 27 in nunna an chan. Bomb tipuak tu te hi Boko Haram firfiak pawlte anni.

*US President Barack Obama chuan UN Security Council permanent member thar atan India a luh theih nan kawng a sial mek niin White House Press Secretary Josh Earnest chuan a sawi.

*Nimin khan Imphal ah Manipur Legislative Assembly budget session neih tan a ni.

*Niminpiah zan khan Karnataka a Mangalore khawpui a St Joseph Vaz worship centre chu mi tu tih hriat loh ten an suasam. Pawi khawihtute hian lung te vawm lut in tukverh darthlalang te an tikeh a ni.