5th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

5.3.2015

*END HOTUTEN PHUNCHAWNG HMUNA RTP LEH SS WAREHOUSE TLAWH
Vawiin chawhma ah khan Pu P.C. Lallawmsanga, Principal Secretary, Excise & Narcotics Department (END) chuan Phunchawng Vengchhunga awm sapzu chhekkhawlna In, S.S. Enterprise leh R.T.P. Bonded Warehouse sak mek a tlawh a. Commissioner of END Pu Lalhmunsanga leh a thawhpui ten Principal Secretary hi an tawiawm a ni.

Principal Secretary Pu P.C. Lallawmsanga hian Warehouse an tlawh chhan chu March, 2015 thla lai hawl ah MLPC Act/Rules anga Sapzu chhekkhawl leh hralhchhuah a nih theih nan hna pawimawh chinfel hmasak ngai zingah warehouse sak zawh hman ngei hi a tel vang a ni a ti. END hotute hian warehouse venhim hna ruahman dan, electric hrui thlun luh dan te, Warehouse luhna bula END Site Office, Warehouse Staff Quarter/duty post leh lirthei atanga bungraw thiarluhna tur leh bungraw thiarchhuahna tur hmun hma te an endik a. Warehouse sak hna hi contractor te hian karleh chhung ngeia zawhfel vek hman an inbeisei a ni. 

Pu Lalhmunsanga, Commissioner of Excise & Narcotics chuan MLPC a taka hmang turin Department leh staff a inpei tawh thu sawiin Excise official te mawhphurhna hrang hrang leh posting pawh siam fel vek a ni tawh a ni a ti. (DIPR)

*VETY DEPARTMENT HNUAIA NLUP HMALAKNA DOCUMENTARY FILM
NLUP Media Cell, I & PR/NIB ten an buatsaih documentary Film, 'Vety department hnuaia NLUP hmalakna' chu ZONET Cable TV ah ni 7.3.2015 zan dar 8:00 ah tih chhuah a ni dawn. (DIPR)

*KAN THEIHNGHILH NGAI LO VANG
Phuahtu: Mafaa Hauhnar
(India Sorkar-in kum 1966, March ni 5-a a khua leh tui râlpui nuaia min nuai chiam champha Zoram Ni pualin)

Kan khawpui vutdûra in chantir kha,
A hma ang diak khan min dinsak leh dawn em?
Kan hliam-ser zawng zawng kha tirehin,
Kan nu leh pa, u leh naute thisen,
Tuihâwk ang maia in luantir kha,
Inhnûk kir leh thei dawn em ni?

Kan pitar, putar leh nunaute lungchhiat
Mittui zozaite kha in hru hul leh dawn em?
A tlâng tluana thlabâr leh ralṭi-a insiamte
Thinlung keh-sawmte in char khâwmin,
Kan hun leh tha hloh zozaite kha,
Min hmuh kirtir leh thei dawn em?

Fahrahte hnenah an nu leh pate pe lêtin,
An chin pawh hriat lohva ruang ṭawih ral ta
Kan laihrui-zawmpui unaute kha,
In kai thovin in tinung leh thei dawn em?

A nih loh chuan, min hrethiam ula,
Kan laka tawrâwt in chhuahna leh,
Chintâwk nei lova diriam taka,
Min hmelma beihna zawng zawngte kha,
Kan hriat reng loh lai pawhin,

Kan theihnghilh ngai lo vang.

(This poem is composed by Mafaa Hauhnar for remembering the inhuman bombing of Aizawl city by the cruel Indian Air Force that happened in March 5, 1966)

*"KHI TE KHIAN AIZAWL A BOMB AN TI"
MZP Chanchinbu 1980 September thla a chhuak a Dr.Laltanpuii thuziak 'Zawlkhawpui senmei chan ni kha' tih ah chuan heti hian a ziak tel a "Khi te khian Aizawl a bomb an ti, kei erawh ar ang ka lo vai e." tiin. Kum 1966 March ni 5 khan Mizo hnam sipai ten India lakah helna an chawhchhuah taka vangin India sorkar chuan Indo thlawhna (Hunter leh Toofani fighter) hmangin Aizawl, Tualbung leh Hnahlan ah bomb an thlak a ni. Heng Indian Air Force thlawhtheihna te hi IAF air base Tezpur atangin an rawn che chhuak a ni.

Khatih laia India PM Indira Gandhi kha Mizoram a bomb thlak a nih chungchang ah thuthar lakkhawmtu pakhat in a zawh chuan "Indo thlawhna te chu sipai leh eitur thlak nan chiah kan hmang' tiin a chhang a ni. Chutih lai a Assam MLA DD Nichols Roy chuan "Aizawl a bomb an thlak keh them te chu Prime Minister hnenah chuan thawn ila, i eitur rawn thlak tir hi engtin nge i chhum thin bik a?" tih a rawt hial a ni.

The Indian Express editor-in-chief Shekhar Gupta sawi dan chuan Mizoram a thlawhtheihna hmanga bomb thlaktu pilot te zingah hian politician a inlet ta Rajesh Pilot leh India in 2010 a commonwealth games athlen tum a Organising Committee Chairman a hnu a CBI in an man tak Sureh Kamaldi te an tel ve a ti.

Kum 49 kalta vawiin anga khan Mizo mipui te chu Indian Air Force indo thlawhna hmanga beih annih avangin an thlabar em em a, an chenna in tam tak pawh an bomb thlak avangin a alh zuai zuai a, chenna in neilo in an awm phah ta hial a ni.

That little thing they say has bombed Aizawl, and me I’m lost and so helpless’. ("Khi te khian Aizawl a bomb an ti, kei erawh ar ang ka lo vai e.")

Mizo people remembering bombing of Mizoram by Indian Air Force in March 5, 1966

4th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

4.3.2015
*CHAPCHAR KUT PHOTO EXHIBITION
Information & Public Relations Department leh Mizo Photographers' Society buatsaihin Chapchur Kut pual Photo Exhibition chu March ni 5 atanga ni 7 chhung Vanapa Hall-ah neih a ni dawn. He photo exhibition thupui atan hian 'Traditional' tih hman a ni a. A duh apiang tan tlawh theih a ni ang. (DIPR)

*HRIATTIRNA
Mizoram Sorkar tirhin, Sorkar hnathawk lai Diploma nei te tan NERIST ah B.Tech Electrical Engineering a zir theih a. A zir duhte chuan Technical Wing, Higher & Technical Education, Chaltlang, Aizawl ah dilna ni 2nd - 20th March, 2015 thleng theh luh theih a ni e. (DIPR)

*NATIONAL FOLK DANCE FESTIVAL MIZORAM AH NEIH A NI
NEZCC, Dimapur leh Art & Culture Department,Mizoram tangkawp buatsaih Discover North East-Mizoram Programme chu March 3, 2015 (Thawhlehni)khan Sesawng-ah tan a ni. He programme atan hian North East Seven Sisters,Sikkim leh North Zone Cultural Centre atangin Haryana te nen mi 100 chuang an tel a ni.

Discover North East Programme hi India Hmarchhak state hrang hrangte inpumkhatna atana ruahman niin State hrang hrang atanga Cultural Troupe te hian hnam lam an entir a. Nimina a hawnna Programme Sesawng Commmunity Hall kianga hmanah hian Assam, Arunachal Pradesh, Manipur, Meghalaya, Mizoram, Nagaland, Tripura, Sikkim leh Haryana ten hnam lam an entir a.

Discover North East - Mizoram Programme hi Falkawn(March 4,2015) ah leh Lengpui (March 5,2015) ah chhunzawm a ni ang a,March 6 (Zirtawpni) a Chapchar Kut,AR Ground a neih turah Pu Lipokmar Tzudir, Director, NEZCC ,Dimapur in thu a sawi ang a,heng Cultural Troupe lo kal te hian Choreographed Dance an entir bawk ang.Mizoram-a hun an hman zawh hian Discover North East- Tripura hman chhunzawm turin March7,2015(inrinni) zingah Silchar an pan leh ang. (DIPR)

*POST-MATRIC SCHOLARSHIP 2ND INSTALMENT CHUNGCHANGA H&TE THUCHHUAH
Mizoram sawrkar chuan zirlaiten mawi lo tak a sawrkar hotute kawngzawh khum a, an au khum hnu pawhin nu leh pa an nihna hre rengin Post-Matric Scholarship, Ministry of Tribal Affairs atanga 2nd Installment dawn do letna atan Rs. 360 lakhs zet harsa tak chungin zirlaite hamthatna ngaihtuah chungin a theh chhuak leh ta a.

Direct Benefit Transfer-a tih anih angin internet leh power supply te a tluang a, technical problem-te a awm anih loh chuan March ni 4 tlai lam atang hi chuan zirlai eng emaw zat account-ah a luh hman beisei a ni. (DIPR)

3rd March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

3.3.2015

*ZORAM NI HMANG DAWN
Mizo Zirlai Pawl General Headquarters huaihawtin in naktuk chhun dar 12 ah I&PR Auditorium, Aizawl-ah 'Zoram Ni' hman a ni dawn. Kum 1966 March ni 5 khan India sorkar chuan Jet fighter hmangin in Mizoram a bomb a chumi hriatrengna denchhen chuan he ni hman thin a ni ta a ni. Kumin hian MZP in a ruahman dan chuan Zofate inkarah inpumkhatna, inunauna thar leh ram leh hnam hmasawnna kawnga inzirtirna ni atan a hmang dawn a ni.

 

*KOREA PALAITE PUALIN CHIEF MINISTER-IN ZANRIAH BUATSAIH
Ni thum chhung Mizoram rawn tlawh tura nimina Aizawl lo thleng, Republic of Korea (South Korea) palai te chuan nimin khan Chief Minister Pu Lal Thanhawla chu a chenna bungalow ah hmuin, Chief Minister hian an pualin zanriah a buatsaih sak a, anmahni lo lawm nan zai leh cultural programme buatsaih a ni bawk.

Korea palaite hi Korea Ambassador to India Pu Joongyu Lee in a rawn ho a. Ani bakah hian palai pasarih Pu Song Jin Hwa, Political Counsellor, Pu Joon Yul yoo, Chief Project Manager, Hyundai Engineering & Construction Co.Ltd, Pu Il Joon Kwan, Managing Director, Doosan Power System India Ltd, Pu In Hwan Ok, Chairman, Posco E&C India Pvt Ltd, Pu Jinyong Shin, Director, Korea Trade Investment Promotion Agency (KOTRA), Pu Illwhoan Chin, Managing Director, Korea Electric Power Corporation (KEPCO) leh Pu Youngeun Song, Managing Director, Time Tech Management Pvt Ltd te an lokal bawk a ni.

Korean Ambassador Pu Joongyu Lee chuan Chief Minister-in Mizoram tlawh tura a sawmna chu lawmawm tiin, Korea leh Mizoram state te inlaichinna tichak tura lokal an nih thu a sawi a. A bul tan nan Cultural programme Exchange a hmalak ni se tia rawtna a siam chu Chief Minister chuan tha hle dawna a hriat thu a sawi a. Pu Lee chuan ‘Mizo thalaiten Korea culture an ngaina tih a hriatin inpawhtawn taka awm tur kan nih chu ka ti’ a ti a, tun tum an lokal hi bul tanna tur chauh ani a ti.

Chief Minister Pu Lal Thanhawla chuan Korean palaite chu thinlung taka alo lawmthu a sawi a. Mizote chu inpawh tak leh intluktlang hnam kan ni tiin, ei leh barah leh sum leh paiah intodelh hi kan duh ber a ni a ti a. Hemi atan hian sorkarin NLUP a kalpui mek a ni tiin, a programme hi a that avangin UNO peng palite pawhin rawn tel tumin tunah hian hmalak mek a ni a ti. Mizo thalaiten Korean culture an ngainat thu leh an film te chu Mizo tawnga letlingin, hmuhnawm ti taka an en thin thu a sawilang bawk a ni.

Chief Minister hian Korean palaite chu thilpek a hlan vek a, Korean palaite pawhin thilpek an pe ve bawk a ni.

Chief Minister hi Pu Lalrinmawia Ralte, Minister of State for E&F, Chief Secretray Pu Lalmalsawma leh Pu Lalram Thanga, Principal Secretary to Chief Minister ten an tawiawm a ni.

Korean Palaite hian vawiinah Speaker hmuin Speaker chamber ah meeting an neihpui ang a, Chief Secretary pawh a office ah meeting an neihpui bawk ang. Hemi zawhah hian NLUP Implementing Board Officialte leh Mizoram Chambeer of Commerce te meeting an neihpui leh bawk ang. Naktipah CYMA hruaitute leh Environment & Forest Minister te meeting an neihpui leh bawk dawn a ni. (DIPR)

*ZENICS LEH NIELIT IN MoU SIGN
Vawiin khan ICT Secretary Office-ah ZENICS leh NIELIT chuan CCC Computer Course-ah thawhdunna thuthlung (Memorundum of Understanding) an sign a. Thawhdunna thuthlung hi Pu C.Lalhmachhuana, Secretary ICT, ZENICS Managing Director ni bawk leh Pu N.Debachandra Singh, Director NIELIT ten hming an sign a ni. He Course hi thla thum chhung zir tur a ni a, Course Fee a awm dawn lova, mi tupawh a duh apiangin he Computer Course hi man chawi lovin an zir thei dawn a ni. A zir duh chuan ZENICS Office-ah zawhfiah theih a ni. (DIPR)

*ARMY TUR LAK RUNPUI NEI DAWN
Director Army Recruiting Office, Silchar hnen atanga thu kan dawn angin, Army Trade hrang hrang lakna runpui Dt.01 April to 08 April,2015 chhung hian Dima Hasao sport Assn ground, Halflong, DIMA Hasao (Assam) hmunah neih a ni dawn a. Dt.03-04-2015 ah hian Soldier Tech, Soldier Nursing Assistant, Soldier Clerk, Store Keeper Technical, Clerk inventory Management tur Northeast state zawng zawng atanga candidates te inlan tur a ni. Hrechiang duh tan Deputy Commissioner Office ah emaw I & P.R.O, Lunglei ah te zawhfiah theih a ni. (DIPR)

*MIZORAM SIKUL TEN INTERNET CONNECTION NEI THA LO
Digital Empowerment Foundation ten Mizoram chhung Aizawl District chhung zirchianna an neih ah sikul 50% te chuan internet connection an nei lo tih an tarlang. Computer leh a kaihhnawih khawl awman sikul ah te pawh hmangtangkai turin zirtirtuten training tha an dawng lo niin an hria. He zirchianna hi Massachusetts Institute of Technology leh Sir Dorabaji Tata Trust aiawh ten state 3 Rajasthan, Chhattisgarh leh Mizoram an zirchianna atanga an thil hmuhchhuah a ni.

*MAHARASHTRA AH BAWNGSA ZAWRH LEH KAWL KHAP A NI
Maharashtra state sorkar chuan an state chhung ah bawngsa zawrh leh kawl a khap. Dan bawhchhia te chu kum 5 chhung lung in tan leh Rs.10,000 chawitir theih anni dawn. He bawngsa zawrh leh kawl khapna dan hi Maharashtra Animal Preservation Amendment Bill 1995 tlawh chhanin India President in hman phalna a pe a ni. Amaherawh chu lawisa erawh chu zawrh leh kawl khap a ni lo thung a ni. Lamtluang chhiar tu ten kan lo hriat atan Maharashtra ah hian BJP in Shiv Sena te thawhpuina in sorkarna an siam mek a ni.

2nd March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

2.3.2015 
*CADC HUAMCHHUNGA VILLAGE COUNCIL GENERAL ELECTION 2015 TLUANG TAKA NEIH ZAWH A NI TA
Chakma Autonomous District Council hnuaia Village Councils inthlanpui chu ni 25.2.2015 khan Village Council 81-ah tluang taka neih zawh a ni ta. Hetah hian khaw 10-a Candidate-te chu thlan ngai lova uncontest-a tlinga puan an ni a. Village Council 71 inthlanpui buatsaihna khuaah hian voters 26,140 awmin voters 22,153 in vote an thlaka, a pumpuia voter turn-out percentage chu 84.74% a ni.

Vote thlak that berna khua hi 15-Old Bajeisora a ni a, voter 142 awmah 138 in vote an thlak a, 97.18% in vote an thlak tihna a ni. Vote tlak chhiatna ber chu 79-Parva-lll a ni a, he khuaah hian 61.30% a tla thung a ni.

A hnuaia mi ang hi Party-wise results chu a ni:-
BJP - 7, INC-63, MNF-3, Independent - 5, No clear majority - 3, Total - 71

He inthlanpuiah hian harsatna lian tham thleng engmah a awm lo a, vote thlak chungchang bakah dan leh thupek kenkawh kawngah leh inbiak pawhna lamah pawh District Election Officer, Addl. DC, Asst. District Election Officer leh Staff-te, Election Observer, CADC thuneitu te, SDO/BDO/Zonal Officer, Sector Officer-te, Returning Officer, Polling Official-te, SP leh District Police, MPRO, Political Party-te leh NGO a bik takin Young Chakma Association (YCA)-te inpekna leh thahnemngaihna avangin a felfaiin a muanawm hle a ni. Hemi avang hian SEC chuan he inthlanpui tluang taka neih a nih theihna atana mawhphurtu leh tha thawhtu zawng zawngte chungah lawmthu a sawi tak meuh meuh a ni. (DIPR)

*Vawiin khan Mizoram zirlai scholarship lak phut a kawngzawh ten "Hawl eka" tiin an au rual lai a hnuai a youtube link ah hian en theih e.
https://www.youtube.com/watch?v=tdBGzLFsNcg

*MIZO TLANGVAL IN JNU ATANGIN Ph.D ZO THAR
Tv.Robert Lalremtluanga Ralte S/o.Vanlalsiama Ralte, Kolasib New Diakkawn chuan vawiin 2.3.2015 khan Centre for Historical Studies, Jawaharlal Nehru University, New Delhi atangin Doctor of Philosophy (Ph.D) a dawng thar. A thesis chu 'Forest, land and development: An ecological history of Mizoram 1952-2000' tih a ni.

Robert Lalremtluanga Ralte recently awarded Ph.D from JNU

*KUM 5 CHHUNGA NLUP APEX BOARD MEETING HNUHNUNG
27.2.2015 khan NLUP Apex Board chuan Chairman, Pu Lal Thanhawla Chief Minister hovin NLUP Implementing Board conference hall-ah Apex Board meeting vawi 14-na leh, kum 5 chhung atana a hnuhnung ber tur an nei a. NLUP hnuai hmalakna hrang hrang te leh heng atanga hmasawnna dinhmun te thlir hovin NLUP kalpui chhunzawmna tura thil pawimawh te an ngaihtuah ho a ni.

Chief Minister Pu Lal Thanhawla chuan “NLUP chu mirethei kut hnathawktu ten mi hausa leh thil tithei zawkte tlawn ngai lova, mahni kutkea an din ve theihna tura Pathian programme a nih avangin titawp tura theihtawpa beihna leh hekna nasa tak tawk mah se, project kalpui chhunzawm zel tura sum mamawh zat chiah central sorkarin a rawn pe a, kalpui chhunzawm zel a ni ang,” a ti.

Apex Board meeting ah hian kum 5 chhunga NLUP kalpui dan tlangpui leh kum 2014-15 atana NLUP sum ruahmanna thlir ho a ni a. NLUP kalpui chhunzawmna tura ruahmanna hrang hrang- UN Agencies te nena thawh hona tur te, thil deh chhuah hralhna tur market chungchang te, NLUP Phase II kalpui chhunzawmna tur leh hemi hnuaia beneficiary 15,000 dang tanpuina tur te, Funding Agencies dang pahnih, North East Region Livelihood Project(NERLP) leh Tata Trust Fund under Corporate Social Responsibility(CSR)te thawhpuina kawng dap dan chungchang te, Skill development atana hmalakna tur te, NLUP hnuaia hmalakna chhuanawm bik leh chhenfakawm tanpuina pek dan tur chungchang te, Horticulture department hnuaia thlai chi leh hmanraw sem dan tur chungchanga ruahmanna siam te bakah NLUP hmalakna enpui tura State Planning Board mawhphurhna pek chungchang te thlir hovin zau taka sawiho a ni.

He meeting ah hian line department 9 ten kum 5 chhunga an hmalakna leh hmasawnna te, harsatna tawh leh tuna an dinhmun tlangpui theuh te tarlangin presentation an pe a. A pumpuia NLUP dinhmun tlangpui tarlangin NIB Vice Chairman Pu P.L.Thanga’n report a pe a. Consultative Committee on NLUP member pahnih- Dr. Robert Halliday leh Pu Zion Lalremruata ten Marketing leh Safe farming- Israel model chungchang ah presentation an pe bawk a ni.

Apex Board meeting ah hian kum 5 chhung thahnemngai taka NLUP kalpui leh enkawltu Line department 9 te hnenah chawimawina, Certificate of Appreciation, Pi Lal Riliani, President, Indian Society on Tobacco & Health, Mizoram Chapter-in a hlan a. Chief Secretary Pu Lalmalsawma IAS in lawmthu sawiin meeting hun hnung a khar a ni. (DIPR)

*KHAWLAILUNG IN KURTAI KUT 2015 HMANG DAWN
Khawlailung khua chuan March ni 11(Nilaini),2015 khian 'KURTAI KUT' an hmang dawn. Khawlailung khua hi in 530 niin fu ching hi in 150 an awm mek bawk.

Khawlailungah hian fu hi a tha duhin sum lakluhna pui ber atan an hmang mek a, nikum khan KURTAI Quintal 1000 tharin tun kum 2015 ah hian Quintal 3000 thar an in beisei a ni. Hriat theih chinah Mizorama fu ching tamna ber khua niin KURTAI thar tam ber an ni bawk a, hetiang taka an hlawhtlinpui thlai a nih avang hian 'KURTAI KUT' hman hi an rel thlu ta a ni.

He 'Kurtai Kut' ah hian Home minister, Agriculture Minister ni bawk Pu R.Lalzirliana chu Khuallian a ni ang a, Parliamentary Secretary leh Official engemawzatin an hmanpui dawn a, Vanlalhlana’n zaiin mipui a awi bawk ang. '

KURTAI KUT' ah hian hengte hi chhawp chhuah tum a ni:-
1. Fu feh tur - Free
2, Fu tui in tur - Free
3. Kurtai - Discount
4. Faisa hlawm
5. Kurtai atanga siam Toffee
6. Hmawngsawi
7. Fu tui chhuang khang lai-Khuallian chawh khal tir a ni ang.
8. Zochhang leh Kurtai Official te tan.

He 'KURTAI KUT' hmang tur hian Zoram mipuite sawm vek kan ni a, Khawlailung hian KURTAI chauh an ngah lova, Footballer - MPL Player, ISL Player leh National Player te pawh an nei a ni. Anmahni i hmuh duh chuan he KUT ah hian kal ngei chi a ni. Khawlailung KURTAI thlum leh thlum loh i hriat duh chuan March 11,2015 ah ngei ngei aw……

Source: Norbert Khawlhring

*FILM COMPETITION BUATSAIH DAWN
Information & Public Relations Department chuan film siam lama tuimi, Mizoram Films Development Society ( MFDS ) – a in ziaklut film producer te tan Competition a buatsaih dawn a. Film hi 85 to 90 minutes chhung daih a ni ang a, thupui thlan bik awm lovin film siamtuin tha a tih ber a thlang ang a. April 15 hmain film hi siam zawh tur a ni dawn a ni. (DIPR)

*AIZAWL KHAWPUI CHHUNGA RANTALHTUTE HMAN TUR SLAUGHTER HOUSE BAWNGKAWN BRIGADE RAM AH SAK BELH DAWN

AH & Vety Minister Pu C.Ngunlianchunga chuan Bawngkawn Brigade ramchhunga rantalhna in sak tum, 'Rural Slaughter House Brigade Veng' hmunhma leh a panna kawngpui te a endik a. Minister hi AH&Vety Director Dr. L.B. Sailo leh a thawhpuite bakah khawtlang hruaitute'n an tawiawm a ni.

AH&Vety hotute hian helai hmun a Slaughter House sak a tulna chhan sawiin Aizawl khawpui chhuahlam, chhimlam leh New Market rantalhtu zawng zawng te'n Mualpui venga Slaughter House an hman tawh avangin helai hmuna leng ve lo hmundanga rantalhtute tan rantalhna in hran mamawh a nih vang a ni an ti a. He Slaughter House hi Bawngkawn Bazar, Vaivakawn Bazar, Hunthar Veng, MZU kawngpui dung leh Mualpui Slaughter House hmang pha lo tan rantalhna hmun atan hman a ni ang.

Nikhat chhunga bawng 40 leh vawk 50 talh theihna tur, Rural Slaughter House Brigade Veng sakna leh a panna kawng siamthat hnathawhna tur sum Rs. 387.28 Lakh hi NABARD hnuaia Rural Infrastructure Development Fund(RIFD) atanga hmuh a ni a. A sak hna leh kawngpui cheithat hna hi 2015-16 Financial Year chhunga zawh hman beisei a ni. Slaughter House awmna tur hmun hi Brigade Field bul chiah a kawngpengthuampui atanga 600 meters a hla niin rantalhna thli pawh Effluent Treatment Plant(ETP) ah luanluh tir a ni ang. (DIPR)

*MIZO TAWNG A PHONE, COMPUTER LEH INTERNET KAIHHRUAINA
Mobile phone, computer leh internet hmangtu te tan a tangkai leh kaihhruaina Mizo tawng ngei a tarlanna page a hnuai a link kan tarlan hi i la like loh chuan lo like sak ve rawh le. I apps leh software hman duh tam tak kha i hriatchian phah thei ania.
https://www.facebook.com/Hmangchang.Blog 

*ASSAM AH SWINE FLU VEI HMUCHHUAK
Assam ah swine flu (H1N1) vei 2 hmuhchhuah an ni. Heng damlo te hi Namrup leh Guwahati a mi te anni. India hmarchhak state dang Nagaland ah swine flu vei mi 4 hmuhchhuah tawh anni a, Mizoram ah swine flu vei 1 hmuhchhuah tawh a ni bawk.

*MPSC CHAIRMAN THAR
Mizoram Governor chuan ram danpui Article 316 (1)-in thuneihna a pek angin Mizoram Public Service Commission (MPSC) Chairman atan MPSC Member ni lai mek Andrew Lalherliana a ruat thar.