14th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

14.6.2014

*WORLD CUP 2014 RESULT UPDATE
Columbia 3-0 Greece
Costa Rica 3-1 Uruguay
Italy 2-1 England

*WORLD CUP 2014 A RED CARD HMU HMASABE
Uruguay defender kum 30 mi Maximiliano Pereira chu tun kum world cup a red card hmu hmasaber a ni ta.

*EPTU TEN UKRAINE SIPAI THLAWHTHEIHNA AN KAP THLA
Ukraine rama Russia zawmduh vanga hel na chawkchhuaktu pawl ten vawiin khan Ukraine sipai thlawhtheihna Ilyushin-76 (Il-76) chu Ukraine khawchhak lam a Lugansk khawpui ah an kap thla a, a chhung a chuang sipai 49 an boral a ni. Nunna chantate hi thlawhna crew member 9 leh paratrooper 40 anni.

Ukraine khawchhak lam ah hian thla 2 kalta atang khan Russia sorkar zawm duh tu ten sorkar lakah buaina an siam tan a, khawvel sorkar lian hruaitu hrang hrang te pawh in an buaina hi an ngaichang reng thin a ni.

*BANGLADESH AH MI 9 HALHLUM
Tukin khan Bangladesh khawpui Dhaka ah Kashi veng a Mirpur hmun a Bihari camp ah tualchhung mi Bangalee leh Bihari mite intihbuai avangin mi 9 halhlum anni. Thi zingah hian naupang 2 an tel a ni. An intihbuaina hi nizan a Muslim kut Shab-e-Barat an lawm lai a halpuah hal nasat vang a lo irhchhuak a ni a, he kut hmanlai hian halpuah hal khap a ni thin a ni.

Bihari camp a awmho te hi Urdu tawng hmang Muslim sakhaw zuitu Bihari ho India atanga pem an ni a, Pakistan zawm duh mahse Pakistan sorkar in a lak tak loh te anni. Kan hriat angin tunhma chuan Bangladesh hi Pakistan in an awp thin avangin East Pakistan tih annih thin kha.

*FIFIFA WORLD CUP 2014 FIXTURE
14.6.2014 (Saturday) 9:30 PM Columbia vs Greece
15.6.2014 (Sunday) 12:30 AM Uruguay vs Costa Rica
3:30 AM England vs Italy
6:30 AM Cote d'lvoire vs Japan
9:30 AM Switzeland vs Ecuador

*Indian railway chuan faina beihpui thlak an tum. Railway Board Chairman Arunendra Kumar zone hrang hrang a railway thawktu te hnenah thupek chhuah in rail platform te, ek in leh zun in te, waiting room leh retiring room bakah passenger te awmna hmun leh tui dawhna te, luikawr zawng zawng te pawh tifai vek thin turin a ti. He thupek hi a hlawhtlin theih nan Divisional Railway Manager ten nitin chawlhkar 2 chhung an enfiah thin a, an report te chu zonal railways office kal tlangin Railway board an an thawn thin dawn a ni.

*Israel President thar atan Reuven Rivlin (74) thlan tlin a ni. A ni hian an president nilai Simon Peres a thlak dawn a ni. Thiamna lamah  Hebrew University of Jerusalem atang in dan (law) a zir chhuak a, dan hremi ukil ah a tang chhunzawm ta zel a ni. Israel president zing a sipai lama tawnhriat neilo awm chhun a la ni. Lukud party mi leh sa niin kum 1998 khan Knesset member atan thlan tlin a ni tan a, kum 2003 khan an ram rorelna in Knesset ah speaker atan thlan tlin a lo ni tawh bawk a ni.

Reuven Rivlin hi Nechama nen innei in fa 4 annei a ni. 1960 atang khan sa eilo (vegetarian) ah a inlet a, football a ngaina a an ram club  Beitar Jerusalem football club tan em em tu ni a hriatlar a ni.

*Goa sorkar chuan an state sum hmang a MLA 6 te World Cup 2014 en tur a tirh an tum chu mipui lam atanga sawiselna a nasat em avangin an thulh leh. Goa state sports department hian a tir chuan an zin nan hian Rs.Nuai 89 an thehchhuah sak a ni. Zin tur zing a mi Goa Sports Minister Ramesh Tavadkar chuan World CUp en tur a sorkar sum a zin an tum chu an thulh tih a sawi. A thian MLA dang 5 te chuan an mahni sum sengin World Cup en tur hian kal an tum ta tho tih a sawi bawk. Sorkar sum hmanga kal an tum hi eptu pawl leh civil society ten nasa tak a an sawisel avangin an ti hlawhtling ngam ta lo a ni.

*PREITY ZINTA IN A EX A KHING
Bollywood star Preity Zinta chuan a bialpa hlui Ness Wadia lakah a thubuai a theh lut. May ni 30 zan khan Wankhede stadium, Mumbai ah Preity Zinta te team Kings XI Punjab leh Chennai Super Kings an inkhel a, chumi zan chuan stadium chhung ah hian a ex Ness Wadia hian a tihbuai bakah a vau avangin Marine Drive Police station ah FIR a thehlut ta  ani. Preity Zinta leh sumdawng hausa Ness wadia te hi kum 5 an inngaizawng a tlemlai deuh khan an in then (break up) ta a ni. 

GOOD MORNING MIZORAM
LAMTLUANG ZINGKAR CHANCHITHAR LAWRKHAWM
*Nimin tlai dar 4:00 khan Pu Zodintluanga, Minister UD& PA, PHE & SYS chuan Champhai Chhangphut Field a phul lem phah tur bul a rawn tan pui. Vawiinah Champhai Stadium Zotlang-a sak tur leh hmun dang danga sawrkar hmalak mek te a tlawh leh ang.

*Nikum MPSC buatsaih a Combine Exam a tling Mizoram Civil Service Officer thar 15 leh Mizoram Finance & Accounts Service Officer thar 2 te chuan Larsap Pu Vakkom Purushothaman chu nimin khan a chenna In ah an hmu a. Inkawm hona hun tha tak neiin thingpui in hona an nei bawk. Heng officer thar te hi ATI ah 3 June atang khan thla thum chhung training an nei dawn a ni.(DIPR)

*Nimin khan INTACH Mizoram Chapter buatsaih Essay and Painting Competition lawmman semna Secretariat Conference Hall, Aizawl-ah neih a ni.

*Nimin chawhma dar 11.00 khan, MZP Headquarters, Kolasib huaihawtin St. John’s Higher Secondary School, Kolasib-ah he khawpui chhunga kumina HSLC leh HSSLC Exam-a titha te chawimawina inkhawm buatsaih a ni. (DIPR)

*May 2014 chhunga Aizawl Civil Hospital report chu hetiang hi a ni :
Admit zat - 1356 ; Mi zai zat -1818; Nau piang zat - 373 ; X-Ray a en zat - 2710 ; Laboratory a en zat - 49952 ; Khawl dang a en zat- 2703 ; Damlo outdoor leh casualty a en zat - 34408; Dam lo thi zat – 78 ; Mizoram pawn lama refer zat - 237. (DIPR)

*May 2014 chhunga Excise & Narcotics Department (END) chuan zu zuar mi 168 an man a, zurui mi 7 an man a zu phurhna motor 15 an man tel bawk. Zu chi hrang hrang an man dan chu hetiang hi a ni:
Rak Zu: 2772.375 litres
Zu bilhlai: 8359 tins
Dawidim: 2.5 kgs
IMFL 750 ml: 7055 bottles & 4 Loose
375 ml: 869 bottles
180 ml: 90 bottles
Canned Beer 500 ml: 24 cans
Foreign (Imp) Canned Beer: 3644 cans
(DIPR)

*Nimin khan 9-13 June 2014 chhung a neih 'Horti Fair"chu Assembly House Annexe Basement Seminar Hall-ah a kharna hun hman a ni.

*Socio-Economic and Caste Census (SECC) 2011 Draft List chu 25th June, 2014 hian khaw tinah tarchhuah a ni dawn a. Hemi chungchangah hian sawisel duh leh thun belh/ paih ngai chungchangah hriattur pawimawhte inhrilhhriatna hun “State Level Workshop for BNVs on SECC Claims and Objections” chu nimin khan State Institute of Rural Development in I&PR Auditorium-ah workshop buatsaih a ni. (DIPR)

*Nimin piah khan Serchhip District Legal Services Authority buatsaihin Lal Thanhawla Higher Secondary School-ah World Day Against Child Labour pualin hun hman a ni a, Pi Lalsiampuii, District Child Protection Officer chuan Resource Person niin a hmanpui a ni. (DIPR)

*Union Road Transport minister  Nitin Gadkari chuan sorkar laipuiin ram chhung a National Highway zulzuiin thingkung vaibelchhe 200 phun tur a ruahmanna siam a ni a ti.

*India President Pranab Mukherjee chuan Israel President atana thlan thar Reuven Rivlin chu duhsakna chibai thawn in  India leh Israel in inlaichinna tha tak neih chhunzawm zel a duh thu a hrilh a ni.

*Vawiin hian Goa tuipui kam hnaiah Prime Minister Narendra Modi chu India indo lawng lianber INS Vikramaditya ah a chuang dawn a, helicopter hmangin lawng hi panpui a ni ang. Lawng sipai ten lawng chhungah hian ralthuam leh ralbeih dan hrang hrang te an entir dawn bawk a ni.

*Niminpiah a  Chhattisgarh a steel siamna hmunpui Bhilai Steel Plant a gas put vang a chhiatna thleng vanga thi zat chu mi 6 an tling tawh a, thi zingah hian deputy General manager 2 pawh an tel a, hliam tuar mi 30 an awm bawk. Chhiatna thlen chhan chhui chiang tur hian magisterial inquiry din a ni tawh a ni.

*Thailand a sipai sorkar hruaitute te chuan kumin September thla hian sokar lailawk (interim government) din an tum thu an sawi. Chumi hnuah politics boruak a that chhoh zel chuan kum 1 hnuah inthlan buatsaih an tum a ni.

*June ni 15 YMA Day hian Prime Minister Narendra Modi chuan ni 2 cham turin Bhutan a tlawh dawn. Hei hi PM a nih hnua ramdang a tlawh hmasakber tur a ni.

*Burma (Myanmar) ram a mipui siam sorkar din duhtu hruaitu lar Aung Suu Kyi chuan ni 3 cham turin Nepal a tlawh mek.

*Somalia ram a Islam firfiak pawl Al-Shabab te chuan bazar ah hmeichhia 100 chuang man in an taksa leh hmai khuh tawh turin an hriattir. An sakhaw hmeichhia te inthuamna tur hmai leh taksa khuh vek chi Niqaab an hmang lo a man an tawk leh a nih chuan vantlang hma a sawisak ah an vau bawk a ni.

*Iraq sorkar chuan an ram khawpuiber Baghdad chu firfiak pawl ten an rawn beih thut theih avangin chak zawkin venhimna an kalpui mek. Islam firfiak pawl te hian an ram khawpui pawimawh thenkhat an awp mek a, Baghdad pawh hi lak tum in an beih mai rin a ni. US sorkar pawh in ngun takin Iraq tualchhung buaina hi a thlir mek a, a tul hun hun a che ve mai thei turin an in ralring tawh a ni.

*Iraq ram tualchhung buaina avang hian khawvel ram hran hrang a tuialhthei sumdawnna a buai phah hle a, India pawh Iraq atanga tuialhthei la lut nasa ram anih avangin India pawisa hlutna paise 51 in a tlakhniam phah a ni.

*Ukraine sorkar sipai te chuan Russia zawm duh vanga buaina siam mek chu Mariupol lawngchawlhhnum ah an bei. Sorkar sipai te hian he khawpui inlakhran duh pawl ten an awp mek chu an hnehchhuh let leh niin sawi a ni a, he inbeihna ah hian inlakhran duh pawl mi 5  an thi a, sorkar sipai 4 in hliam an tuar bawk a ni.

*Maharashtra cabinet meeting chuan Thane district chu hmun 2 a then an rawt a, Thane atang hian district thar Palghar an indang dawn a ni. Palghar chu an state chhung a district 36-na a ni dawn a ni.

*Union Minister of State of Petroleum and Natural gas, Dharmendra Pradhan chuan eirawngbawlna gas (LPG cylinder)  man tihpun a ni dawn lo a ti.

*Khawvel mipui tam takin World cup football in buaipui mek lai hian Men's Hockey World Cup chanchin lo zep ve ila. Netherland ram khawpui Hague a khelh mek Mipa Hockey World cup ah a thlengtu ram Netherland leh Australia ten final an khel dawn.

*Microsoft chuan micromax phone thar chi 2  Windows Phone 8.1 device an tlangzarh thuai dawn. Aman tur chu pakhat zawk hi  Rs 6,000-7,000 a ni ang a, a dang leh chu Rs 10,000-11,000 a ni ang. Microsot hian hian Google android khum tumin nasa takin hma an la mek a ni

*HMANLAI VAWIIN: Kum 1775 vawiin angah khan America ram in zalenna a neih theih nan sipai pawl Continental Army chu din a ni a, hei hi United States Army din tanni a ngaih niin naktuk angah khan US President hmasaber nita George Washington chu he continental army commander-in-chief atan hian ruat a ni. Kum 1907 vawiin angah khan Norway ram a hmeichhia te vote an neih phalsak anni.Tichuan kum 1945 vawiin angah khan kan thenawm ram Burma chuan British lakah zalenna (independence) an nei.

*MIZORAM HRECHIANG ANG: Kum 1894 February-March khan sap Missionary Pu Buanga leh Sap Upa ten  Mizo A AW B min siam sak a, kum 1894 April ah Sikul hmasaber hawn a ni, hemi kum hian Lungleng lal Khamliana'n lehkhathawn a ziak a ni. Kum 1895 October thla khan Mizo tawng lehkhabu hmasaber 'Mizo Zirtir Bu' tih chhuah a ni. Kum 1898 khan Mizoram Map siam a ni.

*THURIL: "Hmalam hun neitu te chu vawiin a lo inbuatsaih lawk te hi anni." - Malcolm X
------------
Facebook ah hian i hmelhriat loh thian nei suh, a pawng a pui a hmel hriat loh add thin te hian hmelhriat chauh thian (friend)  a neite aiin buaina leh hmingchhiatna an tawk nasa bik thin, a chhan pawh thian an thlan uluk loh vang a  ni. Thian thlang uluk tawh ang che, vawiin a i thlalak hi i hmelhriat ngai miah loh tute computer hard disc leh phone memory a a awm ve avang ngawt khan ngaihtha chuang suh ang che. Kawppui leh duhzawng tak tak te hi chu internet ah nilo a tak ah zawn zawk tur a ni. Ransa te mahin thian bik an nei thin a, hmelhriat loh an fawm ve tun ngai lo asin. Enge i ngaihdan ni ve le?

Pix: Thlalak kan rawn tarlan te hi nimin a MCS leh MFAS thling thar Governor hmute te leh an hruaitute anni e. Thlalak hi DIPR lam ta a ni.

Newly appointed MCS and  MF&AS officers with Mizoram Governor

13th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

13.6.2014 
*MIZORAM RAJYA SABHA MP CBI IN CHHUI
Vawiin khan Rajya Sabha MP nilai mi 6 leh MP hlui te lakah an zinna senso khuh nan (leave travel concession) a bill lem la thin a puh annih avangin Central Bureau of Investigation (CBI) chuan thubuai a siam sak. Thubuai siamsak zinga hian Mizoram Rajya Sabha MP nilai Lalhmingliana (MNF) pawh a tel a ni. MP dang D. Bandopadhyay (Trinamul Congress), Brajesh Pathak (Bahujan Samaj Party), Anil Kumar (Janata Dal (United)), J.P.N. Singh (BJP), Mahmood A Madani (Rashtriya Lok Dal), Renu Pradhan (Biju Janata Dal) te hming pawh a lang a ni.

MP te bakah hian Air India customer service agent Rubaina Akhtar leh Lajpat Nagar a Air Cruise Travels Private Ltd te pawh thubuai siamsak anni. MP te thubuai hi 1 November 2013 a LTC diklo an chhui chianna atanga lo irh chhuak a ni.

Lalhmingliana, Rajya Sabha MP Mizoram

 
*BUHFAITHAM DOCUMENTARY TLANGZARH
Vawiin June 13, 2014 (Zirtawpni) chawhnu dar 2:00 khan J.M.Lloyd Hall, Synod Office, Aizawl-ah Kohhran Hmeichhiate buatsaih Buhfaitham Documentary Film chu tlangzarh a ni.

Programme hi Pi C. Lalhmangaihi, Chairman-in a kaihruai a, Pi H. Lalpianthangi, General Secretary-in thupuanna hun a nei a, Pi Laldawnkimi, Convener hnen atangin Report ngaihthlak a ni bawk. Upa C. Vanlalsiama hnen atangin Technical Report ngaihthlak niin Rev. Lalramliana Pachuau, Executive Secretary-in Documentary Film chu tlangzarh hnuah Pathian hnenah a hlan a ni.

Buhfaitham hi kum 1910-ah tham tan a ni a, kum 2010 khan Electric Veng Kohhran ah Rorel Inkhawm rualin Buhfaitham Centenary lawmna hun hman tawh a ni. Centenary denchhenin Central Committee chuan Synod Executive Committee-ah Buhfaitham Documentary Film buatsaih an dil angin rem tih a ni a. Sub -Committee te insiamin hma lak chhoh a ni a, a thawnthu (script) lo siam turin Pi C. Lalneihthangi ruat a ni a, Zarkawt leh Mission Veng Kohhran Hmeichhiate a chang tura sawm an ni a, a tul angin milem te dah tel a ni bawk. (Synfocity) 

Buhfaitam, a handful or rice in Mizoram church

*HMEICHHE MITDEL CIVIL SERVICE AH INZIAK TLING
Tamil Nadu a nula kum 24 mi, mitdel NL Beno Zephine chu nimin a UPSC in Civil Service Exam 2013 result a tih chhuah ah rank 343 ah a tling a ni. Amah hi SBI ah probationary officer hnathawk lai a nia , Stella Maris College, Chennai atanga English literature subject a graduate a ni.

Mitdel ta na na chu mahniin inbuatsaih theih vek a ni lo a, mitdelte hman chi lehkhabu (Brailled book) tlem a neih bak chu a pa leh a thian ten nasa takin an tanpui thin a ni. Tuk tin chanchinbu chhiar sak turin a pa a ngen thin a ni. A pa in chanchinbu a chhiar sak chu uluk takin Beno hian a lo ngaithla a, a vawng thlap zel a ni. A pa hi railway a thawk niin a nu chu homemaker a ni a, a pa hian hnasang tak thawk tur hian a fuih char char thin a ni.

Civil Service exam tura a inbuatsaih lai hian Bharathiar University ah Ph.D zawm turin a inbuatsaih mek bawk a ni. SBI a PO hna a thawh bawk avangin "Ka hna leh zirlai intibuai lo turin inbuk tawk tak a hun hman ka zir a, chu chuan awmze nei takin hun ka hman theih phah a ni" a ti a ni.

Tun tum civil service exam result chhuak ah hian NL Beno Zephine bakah hian Chennai a mi tho Sujitha leh Varanasi a mi Krishna Gopal Tiwari tepawh mitdel chungin an in ziak tling ve a ni.

*NEICCYA BIENNIAL CONFERENCE CUM SEMINAR
India hmarchhak Kristian thalai te intawhkhawmna kum 2 dana neih thin North East India Christian Council Youth Assembly (NEICCYA) 15th Biennial Conference-cum-Seminar chu June ni 12 atang khan Evangelical Church of Maraland (ECM) Biak In, Vaihpi, Saiha-ah neih neih tan a ni a, June ni 15 Pathianni zanah a tiak ang. Inkhawmpui thupui chu ‘Oneness in Christ’ (John 17:20 - 21) tih a ni.

*SYNOD BOOKROOM CONFERENCE HALL KOLASIB AH HAWNG
Nimin (June 12, 2014) chawhnu dar 1:00 khan Synod Bookroom Kolasib-a Bookroom Conference Hall thar chu Rev. Lalzuithanga, Senior Executive Secretary in hawng in Pathian hnenah a hlan.

Programme hi Pastor R. Lalremruata, Diakkawn-in a a kaihruai a, Pastor C. Lalchhuanawma, Hmar Veng-in hunserh a hmang a, Upa C. Lalhmingmawia, Bookroom Committee Secretary hnen atangin Technical Reports ngaihthlak a ni a, Rev. Lalzuithanga, Senior Executive Secretary leh Upa R. Lalmalsawma, General Manager, PRESCOM-in thusawina hun an hmang. Diakkawn Bial Zaipawl, Tv. Dintluanga Tochhawng leh Tv.Andrew Laltlankima te an zai a, a duh apiang tan thusawina hun hawn leh a ni a, Upa K. Lalrema, Account In-charge, Bookroom Committee-in lawmthu sawina hun a hmang a, Rev. C. Lalrintluanga, Kolasib Venglaiin malsawmna in hun a khar a ni.

*CHELSEA IN FABREGAS AN LEI
Barcelona player Cesc Fabregas (27) chuan kum 5 chhung atang London club Chelsea a zawm dawn ta.

"Arsenal in contract min sign pui duh se chuan duhthlang thei hmasaber anni tih mi zawng zawng hriat a nia, mahse hmalakna an nei ta silo, awmzia a awm ta lo a ni" a ti a ni. Contract sign pui duh club hrang hrang te nguntak a a ngaihtuah hnuah Chelsea a luh chu thaber a hriat tak thu leh a sawi a ni.

Cesc Fabregas hi tunah hian an ram Spain aiawh in Brazil ah World Cup khel turin a thang mek a ni.

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM

*Nizan khan khawvel in a nghahlelh em em  pakhat FIFA World Cup 2014 chu Brazil ram a Sao Paulo stadium ah khelh tan a ni a, inkhelh hmasak ber ah hian a thlengtu ram Brazil in 3-1 in Croatia an hneh a ni.

*Nimin khan Mizoram Chief Minister Lal Thanhawla ho in power supply chungchang sawiho na neih a ni. World Cup Football khelh chhung zawnga mumal taka power supply a awm theih nan theihtawp chhuah turin thu an ti thlu a ni.

*Nimin piah zanlai (12 June 2014) dar 12 vel khan Khawzawl Vengthar a cheng putar kum 83 mi engmah tithei tawh lo Lianhenga chu a fapa Tuankipmanga (35) an a that. Tualthattu hi zu in thin a ni a, a pa a thah lai hian a rilru lam a buai hle ni a sawi a ni. Khawzawl police ten tualthattu hi man in tan in ah an khung tawh a ni.

*Nimin tlai ah kan post tawh tho nangin in lo hmuhloh takin nimin khan UPSC in Civil Service Exam 2013 result a tih chhuah ah Zohnahthlak hming 4 a lang a chungte chu:
Rank 501: Grace Lalrindiki Pachuau [Ani hi IRS (Income tax) nikum khan a hmu] D/o. Vanhela Pachuau, IAS (Retd.)
Rank 1010: Esther Laltankim Serto [Ani hi nikum khan Indian Forest Service ah tling] D/o.  Yaimuchung
Rank 1025: Malsawmtluanga S/o. Lalmalsawma, IAS
Rank 1038: Samuel S Vaiphei

*Nimin a supply minister ho a FCS&CA, CYMA leh Consumer Union te inhmuhkhawm chuan eirawngbawlna gas (LPG) cylinder tichingpen leh hralhru thin te chu khauh tak a vil ni se an ti. Sorkar hian CYMA leh Consumer Union te nen tang kawp in dan bawhchhia an man te pawh media hmanga tarchhuah thin nise an ti a. Kawngpui dung a LPG tihchingpen leh hralhruk ven hna chu CYMA in branch hrang hrang te nen an thawk dawn a ni.

*Diktawn monthly magazine editor Lalhmachhuana Zofa lehkhabu ziah  'Mizo Tlang Hmingthangte’ Vol I leh Vol II chu nimin khan Zonet Studio, Zarkawt-ah a tlangzarh a ni.

*Lalnundika Hnamte hin Department of Political Science, University of Hyderabad a Mizoram leh Gurjarat a zu khapna dan an hman mek research a tih atanga a lehkhabu ziah  'Prohibition: Socio- Economic Assessment of Gujarat and Mizoram' tih chu nimin khan Savidge Lorrain Hall Khatla, Aizawl ah tlangzarh a ni.

*Nimin khan Lawngtlai District DC conference hall ah Lawngtlai Khawpui chhunga Census Enumerator, Supervisor leh Local Registre te chuan Lawngtlai District chhunga National Population Register kalpui dan tur training an nei a, chawhnu lamah enrollment bul tanna neih nghal a ni. (DIPR)

*11.6.2014 khan Zote South khua a Rs.Nuai 10 seng a sak YMA Run chu PC Lalthanliana, LAD minister in a hawng.

*Sairang Dinthar Veng a Gas Bottling Plant dahna atana Food Civil Supplies & Consumer Affairs Department-in Indian Oil Corporation hnen a an ram an hawhtir phal chu sorkar hotute ten an enfiah. Mualkhang a IOC botlling plant (Gas thunchhawnna) ah hian a ram a zim avang in Mizoram mamawh ni 2 tla chiah LPG a dahkhawl theih a, Sairang a IOC ten gas thunchhawnna  an sawn theih hunah chuan kar 1 tla tal an dahkhawl theih tawh beisei a ni.

*Ukil senior Mukul Rohatgi chu kum 3 chhung atan Attorney General of India thar atan ruat a ni. Sorkar hnuai a Attorney General, Solicitor General leh Additional Solicitors General te hian court thubuai a awm in sorkar aiawh a an din thin bakah sorkar chu dan lamah thurawn an pe thin bawk a ni tih i hriat loh kan duh lo e.

*Parliamentary Affairs Minister Venkaiah Naidu  chuan Budget session of Parliament chu July chawlhkar hnihna ah neih tan a ni ang a ti. Lok Sabha Deputy Speaker tur pawh thlan nghal a ni ang.

*Mizoram Synod hnuai a Pro.Pastor lak thar ten Orientation training an neih mek chu vawiin ah a tawp anga, zanin ah Synod Officer Meeeting member te nen inkawmho hun an nei ang.

*Hindu ho in lui thianghlim a an ngaih Ganga leh lui pawimawh dang te thenfai na atan sorkarin kumin Octorber thla atangin mipui te nen tangrual in hmalak tan an tum.

*Information and Broadcasting Minister Prakash Javadekar chu chuhtu awmlo in nimin khan Madhya Pradesh atanga Rajya Sabha Member atan thlan tlin a ni.

*Janta Dal-United National president Sharad Yadav pawh nimin vek khan Bihar atangin chuhtu awmlo in Rajya Sabha Member atan thlan tlin a ni ve bawk.

*Himachal Pradesh a tuilian in a lak  Hyderabad zirlai naupang 24 zinga mi 2 ruang chu nimin khan hmuh belh anni. Tihian ruang hmuh tawh zat chu 8 anni ta a, ruang la hmuhloh 16 an la awm a ni.

*Urban development and housing minister Venkaiah Naidu chuan sorkar hnathawk te chu zing dar 9 a office a thleng hman vek tawh turin a hriattir.

*Nizan dar 7 vel khan Chattisgarh a  Bhilai steel plant (BSP) methane gas pipeline pawp (leak) avangin mi 6 an thi a, mi 40 chuang in hliam an tuar. Thi leh hliam zat hi an awm belh zel rin a ni.

*Tunkar tawp ah hian petrol man litre khat zelah paise 45-60 in a thlaniam dawn ni a sawi a ni.

*Infosys company chuan CEO thar atan Vishal Sikka  an ruat. Executive chairman N R Narayana Murthy leh a fapa Rohan Murty pawn october thla a Infosys an chawlhsan ang.

*US President Barack Obama chuan firfiak pawl ten Iraq khawpui tam tak an lak mek chungchang ah indo an puan loh thu a sawi a, indo puang lo mahse Iraq rama mipui thlan lal sorkar hruaitute tanpui na tur erawh an theihna zawng zawng a an dap mek thu a sawi thung.

*Nimin khan Pakistan ram hmarthlang ram ah US missile kahchhuah avangin helpawl  ni a rinhlelh mi 13 an thi a ni.

*Karhmasa Inrinni a lawng suamhmang (pirate) ten Malaysia lawng oil litre maktaduai 1 phur (oil tanker) MT Budi Mesra Dua an hruaibo chu Malaysia sorkar in nasa takin an zawng mek.

*World Cup thlengtu ram Brazil ah hian tunhma chuan a tribal ho an cheng thin a, kum 1500 khan Portugese tuipui mihrang Pedro Álvares Cabral chuan a hmuchhuak a ni. Portugal hian kum 1808 thleng khan an awp a, hemi hnu hian Napolean a ho France in an awp chhunzawm a ni. Kum 1815 khan Algarves nen lalram pakhat ah dahdun anni a, kum 1822 ah zalenna hmu in Empire of Brazil tih anni ta a ni. 1889 ah mipui rorelna (republic) din a ni a, buaina hrang hrang an paltlang a, 1964-1985 khan sipai rorelna hnuaiah an lut a ni.

1988 ah tuna an danpui (constitution) hman mek hi an nei tan a, an ram chu state hrang hrang te inpumkhat si mahse state tin in an tualchhung awpna tur a thuneihna pumhlum nei ang chi Federal republic anni ta mek a ni. state 26 leh municipality 5564 an nei mek a ni.

*HMANLAI VAWIIN: Kum 1900 vawiin angah khan China rama Boxer helna (Rebellion) an tih ah ram dangmi leh tualchhung mi Kristian a inpe te an dodal mek chu tharum thawh zawngin kalpui tan a ni. Kum 1978 vawiin angah khan Israel in a tawp nan Lebanon ram atangin a sipai te a la let.

*MIZORAM HRECHIANG ANG: Mizo zinga zaithiam ber ni a sawi thin chu Buizova niin a zai tak tak chuan a zaina sunhlu kung hnahte te pawh an til er er thei a ni. Mizo zinga  thinchhe hmingthang ber chu Pawngvina a ni. A thinchhiat zia an sawina pakhat ah chuan a feh hawng chu an uipuiin a lo lawm a, a lo zuan vel chung a, a thin in a tuar ta lo a, "Nang a lawm a, nui rual ka nih loh hi" tiin a chempui chu a la lawk a, a uipui chu a sat bung ta hmawk mai a ni.

*THURIL: "Zu hi thil a ni" - Laldenga
--------

Pix: Thlalak kan rawn tarlan hi nizan a World Cup 2014 hawnna 'opening ceremony' neih lai a ni.

Fifa World Cup 2014 Opening ceremony
pix: AFP

*FIFA WORLD CUP 2014 UPDATE
Brazil 3-1 Croatia (FULL TIME)

Goal scorers:
Marcelo (no.6) (Own Goal) - 11 Minutes
Neymar Jr (No.10) - 29 Minutes
Neymar Jr (No.10) - 71 Minutes
Oscar (No.11) - 91 Minutes

12th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

12.6.2014 
*WORLD CUP OPENING CEREMONY JLO INLAN LEH DAWN SI
Tukin leh karhmasa lama kan rawn tarlan tawh zaithiam Jennifer Lopez World cup 2014 opening ceremony a inlan lo tur a sawi kha a inlan leh dawn si a ni. Kan rawn tarlan tawh thin angin JLo hian a zaipui tur a tih Pitbull leh Leitte te rual a zai ve dawn ta lo ni a sawi a nih kha, a rilru thlak leh in zanin hian Arena Corinthians stadium an ah an 3 hian 'We Are One (Ola Ola)' tih chu an rawn thlawh ho dawn ta a ni.

JLo zai dawn lo ti a sawi anih chhan ah hian a bialpa Casper Smart nen an inthen thut vang niin news reporter thenkhat chuan an tarlang. Chuan zanin a i lo nghahlelh em em pakhat JLo hian chhass thar zaithiam ve tho kum 34 a upa MMaksim Chmerkovskiy a nei niin an sawi leh tawh.
 
*CIVIL SERVICE RESULT CHHUAK A ZOHNAHTHLAK HMING LANG TE
Vawiin khan Union Public Services Commission chuan Civil Services Examination, 2013 result a tichhuak.  Tling zinga Zohnahthlak hming lang kan hriat theih chin te:
Rank 501: Grace Lalrindiki Pachuau (A ni hi IRS nikum ah pek a ni)
Rank 1010 Esther Laltankim Serto (ani hi nikum a Indian Forest Service a tling kha a ni),
Rank 1025: Malsawmtluanga
Rank 1038: Samuel S Vaiphei

UPSC Civil Service exam 2013 ah hian a pumpui ah Jaipur a mi Gaurav Agrawal chu  1-n a ni.Candidate 1122 te chu tling puan anni a,an zingah hian General ah 517, OBC ah 326, SC ah 187, ST ah 92 te an aw a ni.

Zohnahthlak hming kan tarlan te hi tih hmaih kan neih chuan comment lamah rawn sawi ula kan lawm hle ang.

Pix: Thlalak kan rawn tarlan hi tlingthar zing a rank 501-na Grace Lalrindiki Pachuau D/o. Vanhela Pachuau, IAS (Retd) a ni e.

Grace Lalrindiki Pachuau

*ZU KHAPBUR NA DAN ZIRCHIANNA LEHKHABU TLANGZARH
Vawiin chawhnu dar 1:00 PM khan Savidge Hall, Aizawl-ah P.C. Lalthanliana, Minister i/c Horticulture, LAD, Social Welfare chuan Lunglei Zohnuai tlangval Lalnundika Hnamte lehkhabu ziah 'Prohibition: A Socio-Economic Assessment of Gujarat and Mizoram", tih chu a tlangzarh. He lehkhabu hi saptawng a ziah niin a ziaktu hian Dept. of Political Science, University of Hyderabad a research a tih atanga a ziah niin Serials Publications, New Delhi-in a publish a ni. He tlangzarhna inkhawm hi Dr. Malsawmdawngliana, PUC chuan a kaihruai a, lehkhabu thlirlawkna (book preview) hi Dr. H. Vanlalhruaia, Govt. Aizawl North College chuan a nei bawk.

He lehkhabu hi India rama zu khap burna dan (total prohibition) hmanna state pahnih, Gujarat leh Mizoram te a total prohibition-in khawtlang leh economy a nghawng dan leh heng state pahnihte hi an thenawm state zu khap ve lote nena an khawtlang leh economy dinhmun khaikhinna a ni. He lehkhabu hian sawrkar, sakhua leh khawtlangte’n zu dona kawnga an hmalaknate a thlir tel bawk a ni.

Lehkhabu tlangzarhna hun hman zawhah hian sawm bik Academician te, PRISM, SOSA, Journalist te, leh NGO hruaitute thenkhatte’n “Tunlai khawvelah zu khapna dan khauh tak (MLTP Act) hman hi a la fuh zel em?” tih thlirna chi hrang hrang: i) Khawtlang nun leh sakhuana atanga thlirna te; ii) Economy atanga thlirna; leh iii) Hmasawnna, insumdawntawnna thlirna atangtein sawihona an nei a. He sawihona hi Dr. Rohmingmawii, PUC chuan a kaihruai a ni.

Pix: Mala Chongte

Minister PC Lalthanliana releasing Lalnundika Hnamte book "'Prohibition: A Socio-Economic Assessment of Gujarat and Mizoram" at Aizawl.

 *PRIME MINISTER HLUI VAJPAYEE M.A RECORD A BO

India Prime Minister hlui Atal Bihari Vajpayee documentary siam mek tu BJP MP Nirmala Sitharaman chuan Vajpayee M.A Original degree neih a duh avangin a lehkhazirna thin University ah a dil a mahse an hmu zo lo.

PM hlui Vajpayee hian DAV College, Kanpur atangin 1946-47 khan M.A Political Science a zirzo a, chu college chu Agra University (tunah chuan Bheem Rao Ambedkar University tih a ni tawh) hnuai awm thin a ni. Agra University (BRAU) atang hian hman deuh khan University 10 an indang a, chuvang chuan PM hlui education record hi a zirna college awmna  Kanpur anih avangin Chatrapati Sahuji Maharaj University, Kanpur lamah an thawn a ni a sawi a ni.

Chatrapati Sahuji Maharaj University, Kanpur a Registrar Syed Waquar Hussain chuan Agra University in AB Vajpayee education record an rawn thawn loh thu leh record an neih sa ah pawh hmuh tur a awm loh thu a sawi a, thawn ni a an insawi chuan an thawn dan leh a hun hriat a duh thu a sawi a ni.

Prime Minister hlui Atal Bihari Vajpayee hian DAV College, Kanpur atangin M.A Political Science First Class ah a zo a ni.

*WORLD CUP 2014 OPENING CEREMONY NEIH HUN TUR
Zanin atangin Fifa World Cup 2014 chu Brazil ah khelh tan a ni dawn ta a, a hawnna inkhawm 'Opening Ceremony' chu Sao Paulo khawpui a Arena Corinthians stadium ah neih a ni ang. World cup 2014 opening ceremony hi India sana (Indian Standard Time) ah chuan zan dar 10:30 p.m (IST) ah tan a ni ang a, zanlai dar 12:30 a.m (IST)ah a tawp ang. Chumi zawh dar 1:30 a.m (IST) ah Opening match Brazil leh Croatia ten an khel dawn a ni.

Zanin World Cup 2014 Opening ceremony ah hian US Rapper Pitbull leh Brazil ram zaithiam Claudia Leittee ten World Cup hla "We Are One (Ole Ola)" chu an sa ang a, kan rawn post tawh ang khan he hla record tu zinga 1 Jennifer Lopez (JLo) chu a tel ve dawn ta lo a ni.

Zaithiam dang Beyonce Knowles leh The Beatles zaitupaber Sir Paul McCartney te pawh an inlan dawn a, hemi te 2 hi an zaidun dawn nge a hrangin an ti dawn tih hriat chian theih la ni lo.

Pelestina ram a an Idol ve "Arab Idol" an tih a pakhatna hauhtu Palestinian zaithiam Mohammed Assaf pawh FIFA hotu ten zaiturin an sawm a ni. Zaithiam te bakah hian lamthiam mi 600 chuang an inlan dawn bawk ani.

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM
*Nimin khan I&PR Conference Hall, IOC Veng, Serchhip-ah Serchhip District Child Protection Unit te hmalakna in "Capacity Building Programme on Soft Skills" neih a ni a. Serchhip-a Hnuchham enkawlna in pahnih Zoar Children’s Home leh Lalchhungkua Unity Children’s Home enkawltu mi 14 an tel a ni. (DIPR)

*Ni 100 inhlawhna tia hriatlar MGNREGA kalpui zel dan turin ngaihtuah in nimin khan State Employment Guarantee Council (SEGC) chu kumina a vawikhatna atan an thukhawm. An thu ngaihtuah zingah an hnathawhte endik leh vil tura State Quality Monitoring Unit din te, hnathawh dan puangzar tura Information Board din chungchang leh job card dil tur ten EPIC an neih a tul thu te a tel a ni. (DIPR)

*Nimin khan School Education Conference Hall, Aizawl-ah All District Project Coordinator’s meeting neih a nia ,  State Project Office atangin officer te, Intervention Coordinator te leh District atangin District Project Coordinator, Deputy District Project Coordinator te an tel a ni. (DIPR)

*Nimin khan Mizoram State Cancer Control Society (MSCCS) meeting vawithumna Aizawl ah neih a ni a, sorkar laipui duhdan in health society hrang hrang te chu a hrang hrang a awm lo in Mizoram Health Society (MHS)  hnuaiah zaikhat a luangkhawm tur a tih anih avangin Mizoram State Cancer Control Society chu tihtawp nise tiin an rel ta a ni. (DIPR)

* Nimin piah 5th IR Battalion hmunpui Lungverh ah State Disaster Response Force Training Batch 9-na atan training neih tan a ni.

*DDK Aizawl chuan June ni 13 (Zirtawpni) zan dar 5:30 leh dar 6:30 inkarah Information Technology leh Dan Bawhchhiatna tih thupui hmangin Live Phone-In Programme a buatsaih dawn a. Zawhna zawt duhte tan DDK Phone No. 2362387 ah phone theih a ni ang a. In zawhna te hi Pu Joseph Lalchhuana, IPS, SP, CID (Crime), Pu Vanlalfaka Ralte, Addl. SP, CID (Crime), Pu Lalthlamuana, Chief Informatics Officer, ICT leh Pu Lalrempuia Sailo, Deputy Engineer, NIELIT ten an rawn chhang ang. (DIPR)

*Sawi neuh neuh awm reng karah sorkar hmasa UPA in appointment an lo pek tawh India sipai lalber (General) tur atan Lt. General Dalbir Singh Suhag chu nemngheh a ni tawh tih Defence Minister, Arun Jaitley chuan a sawi. Mi tam tak chuan BJP sorkar in hepa appointment hi an tihdanglam sak an ring a ni.

*India ram hmun thenkhat ah ruahsur vanga nunphung a buai lek lek laiin nimin khan Uttar Pradesh a Banda district ah chuan 48.2 degree Celsius in boruak a lum a ni. Delhi ah pawh boruak lum lam chu 45C a ni.

*Nimin zing a kan rawn tarlan tawh Iraq rama a an khawpui lianber dawttu Mosul chu Islamic State of Iraq and the Levant (ISIL) firfiak pawl ten an awp tak avangin mipui nuaih 5 nga chuangin an sahimna ngaihtuah in he khawpui hi an chhuahsan. ISIL te hian nimin khan khawpui lian dang Tikrit pawh an la tawh niin sawi a ni.

*UNO Secretary General Ban Ki-moon chuan China leh Vietnam in tuipui a ramri an inchuh chungchang ah UNO in sawifelpui an inhuam reng thu a sawi.

*Delhi khawpui a power supply mumal lo chuan ziaawm lam a pan thei rih lo Delhi khawpui hian nitin power supply 5800 MW a mamawh laiin 5400MW chiah an dawng thin a ni.  Power a awm loh avangin chhungkaw tam tak chu inchhung ah a.c/fan/cooler etc an hman theih loh a pawnah an riak thin a ni. Eptu pawl te chuan sorkar an dem hle bawk.

*Pathianni kalta a tuilian in Himachal Pradesh a Beas lui a Hyderabad zirlai mi 24 a lakbo zingah mi 1 ruang hmuhbelh a ni a, ti hian ruang an hmuh tawh zat chu 6 a ni tawh a, mi 18 ruang chu chinhriat loh in an la bo mek a ni.

*Nimin zing khan Uttar Pradesh a Gauriya khua ah hmeichhe pakhat kum 45 mi ruang thing a inkhai chu hmuh a ni a, police ten an chhui naah he nu hi Thawhlehni khan ruk bo a ni a, a rubotu te hian an pawngsual hnuah that in thingah hian an khai niin sawi a ni. Police ten an mi rinhlelh mi 3 an man tawh a, post mortem  report atangin pawngsual a ni ngei em tih hriat theih anih beisei a ni.

*Kar hmasa Thawhleni zan a Pune a Muslim tlangval Mohsin Sadiq Shaikh that anih chungchang ah Hindu sakhua vung taka kalpui duh pawl  Hindu Rashtra Sena hotupa Dhananjay Desai chu police ten thuzawhfiah atan an man.

*May 21 a Mukherjee Nagar, Delhi a India hmarchhak (Northeast India) zirlai te tawngkam mawilo taka chhawnchhaih tu nia  puh  Pawan Gupta leh a fapa te pahnih chu trial court in anticipatory bail a pe.

*Lok Sabha inthlan hnuhnung ber a an chetchhiat em vang leh party chhung a lungawilohna nei an awm neuh neuh avangin Congress party chuan Maharashtra Chief Minister Prithviraj Chavan  chu an thlak mai thei ni a sawi a ni. Kumin October hian state assembly election an hmachhawn dawn a ni.

*Minsitry of Commerce and Industry in an tarlan danin thla hmasa May chhung khan India in ramdang a sumdawnan thil a thawnchhuah chu 12.8% in a pung a, mahse sumdawnna kawnga leiba chu 11.23 billion dollar in a pung thung a ni.

*Facebook a FIFA World cup page chuan like(follower) tu mi maktaduai 20 chuang an nei tawh. Zanin dar 10:30 (IST) atangin Opening ceremony neih tan a ni ang.  Zaithiam leh lam thiam thanhnem tak an in lan dawn. Hemi chungchang hi post hran in kan siam a tukin dar 8:30 a.m ah i lo chang mai dawnnia.

*World Cup 2014 thlengtu ram Brazil hi khawvel a ram lianber 5-na a ni a, mipui tam lamah pawh khawvel ah 5-na tho anni. Khawvel a Portuguese tawng hmang awmtamna ber ram anni bawk. An ram pawisa hming chu 'Real' a ni a, Real ! leh India Rs.26.54 a intluk a ni. Brazil ram chanchin bengvar thlak lam chite hi World Cup khelh chhungin Lamtluang page ah hian a khat tawkin kan rawn tarlang thin dawnnia.

*Harry Potter thawnthu ziaktu JK Rowling chuan Scotland ram in independence an puan loh nan a campaign tute sum hman turin British pawisa Pound maktaduai 1 a thawh. Kumin September thla hian Scotland mipui te hian kum 300 zet an lo zawm tawh England ram atanga a indan a zalenna neih tur nge tur loh an thlang fel dawn a ni. JK Rowling hian Scot ho te chu inla hrang lo a Britain mite ten unau anga khawsak ho zel a duh a ni.

*Nigeria ram a nasa taka hleilenna thlen tu Boko Haram ten an beihthut theih hlauhthawn thil thu ah sorkar in World Cup enna hmunlian te chu hawng lo turin an hriattir. Mipui an punkhawm tam chaun firfiak pawl te hian an rawn target duh maiin an ring a ni.

*HMANLAI VAWIIN: Kum 1812 vawiin angah khan French General Napoleon chuan Russia do tumin Russia ramri chhungah a sipai te a luhpui a ni. Kum 1926 vawiin angah khan Indopui I-na zawh a remna leh muanna a awm theih nan pawl an din thar League of Nations atangin Brazil a inhnukdawk. Banker hausa David Rockefeller chu kum 1915 vawiin angah khan New York ah a lo piang.

*MIZORAM HRECHIANG ANG: Kum 1912 September thla khan British sorkar hotuten Mizo lal te leh hnamchawm te Lammual ah an ko khawm a, Bawrhsap chuan Mizo lal zinga khawngaihna leh zaidamber , mahni khaw vawng fai ber atan Kairuma Sailo, Tlaikuang lal chu a thlang a ni. Bawrhsap chuan a ram chin a zawt a, Kairuma chuan, "Chhak lamah Tiau chin, Thlang lamah Reng lal nen kan in ri" an ti mai chu(h)! Lal dang pawh an awm teuh a chutiang a sawi ngam chu huaisen a ti khawp aniang Bawrhsap chuan parthi leh thutna a pek bakah "Tual vawi 3 thleng thah phalna" a pe ni a sawi a ni. Bawrhsap hian "Tual vawi 3 pawh that la i chungah engmah pawi a awm lo ang" a ti a ni an ti.

*THURIL: "Midang tan a nun hman hi hringnun a ti hlutu chu a ni" -Albert Einstein.
--------------
Tukin chu comment lamah World Cup 2014 a i tan tur ram leh champion tur ram i rin te lo sawi ve la. In comment a awm mang loh thin hi chuan a nuam lo duh ve lutuk a nia. Ni hman nuam le.

pix: Thlalak kan rawn tarlan hi nimin a Serchhip a Green Mizoram Day an hmang lai a ni a, khuallian Mizoram a hmeichhe MLA awmchhun Vanlalawmpuii Chawngthu  in thu a sawi lai a ni. Thlalatu te hi DIPR lam anni.

The lone female MLA in Mizoram Vanlalawmpuii Chawngthu delivered a speech at Green Mizoram Day programme in Serchhip, Mizoram , India.
pix: DIPR

11th June 2014 news in Mizo

 Latest news collection in Mizo language

MIZO TAWNG A CHANCHINTHAR LAWRKHAWM

11.6.2014 
*WORLD CUP 2014 OPENING NEIHNA TUR STADIUM BELCHIANG ANG
Kumin Fifa World Cup 2014 hawnna neihna tur stadium hi Brazil ram khawpui lianber Sao Paulo a awm a ni. He stadium hi Sport Club Corinthians Paulista ho ta niin a hming dik tak chu 'Arena Corinthians" tih a ni a, mahse world cup chhung hi chuan 'Arena de São Paulo' ti a sawi thin a ni ang. Opening match Brazil vs Crotia bakah hian match 5 dang an thleng dawn a ni.

Sao Paulo stadium hi 30 May 2011 khan sak tan a ni a, 10 May 2014 ah hawn a ni. Stadium hi a pum a la sak zawh loh deuh a nia Wordl Cup chhung atan bik hian inkhel entute thutna tur seat 61,606 siam a ni a, World Cup zawh lamah la siam belh leh an tum a ni. Inkhelhna field zau zawng chu 105X68 metres a ni. A chhuatphah atan hian phullem Perennial Ryegrass an hmang a, a sak manah hian Brazil ram pawisa Real Maktaduai 965 seng tur a ruahman a ni.

He stadium an sak lai a hnathawk tu an tamber tum chu 2012 november kha niin hnathawktu mi 2300 a rual in an ruai thin a ni. He stadium hi World Cup zawh ah sak chhunzawm leh a ni ang a, February 2015 ah a pum a zawh hman an in beisei a ni. Chuan a chhungah hian zu inna dawr(bar) 75 a awm a ni.
 
*Mumbai metro service (khawpui chhung a rail tlan) chu hawn a nih atanga ni 4 chhung in mi maktaduai 1 an chuang tawh a ni.
 
*Vawiin khan Lok Sabha chuan Joint Parliament session a President thusawi lawmthusawina (motion of thanks) chu an passed.
 
*AIR LIVE PHONE IN PROGRAMME
Tun Inrinni lo awm tur, June ni 14, chawhnu dar 1:05-dar 2:00 inkar Telephone a zawhna leh chhanna AIR Aizawl Live Phone In Programme ah chuan “World Blood Donation Day” pualin ‘Thisen pe la, midang nunna chhan rawh ‘ tih chungchang a hriat duh neite tan a zawh theih dawn a. Mipui zawhna chu 1) Dr. Lily Chhakchhuak, Blood Bank Officer, Civil Hospital, Aizawl, 2) P.C. Lalhmingthanga, President leh C. Lalnunnema, Secretary, Association for Voluntary Blood Donation ten an rawn chhang ang. A zawt duh tan Telephone No. 0389/2323148 ah emaw a biak pawh theih ang. (DIPR)
 
*Vawiin khan Mizoram Civil Service (Combined) Preliminary Examination 2014 chu MPSC exam centre hrang hrang ah tluang tak a neih a ni.
Pix: MPSC Exam centre Lunglei

MCS exam centre, Lunglei, Mizoram

 
*GREEN MIZORAM DAY
"Thingphun uar la, Venghim rawh" tih thupui hmangin vawiin khan Mizoram hmun hrang hrang ah GREEN MIZORAM DAY hman a ni.
 

*ARUNACHAL RAMRI AH DUTY POST 54 SIAM THAR NI DAWN
Arunachal Pradesh a India leh China ramri ah Indo-Tibetan Border Police (ITBP) duty post 54 siam belh turin hma lak mek a ni a, he ruahmanna hi Union Home Ministry pawmpui turin thehluh a ni tawh a ni. Arunachal Pradesh ah hian 1,126 km a thui India leh China ramri a awm a ni.

 

*RBI IN BANK ACCOUNT HAWN NAN PERMANENT ADDRESS FINFIAHNA AWM CHUAN TAWK TI
Reserved Bank of India chuan India ram a bank hrang hrang te hnenah bank account hawng thar tur ten local address proof neilo mahse khawdang a parmanent address proof an neih chuan pawmsak turin hriattirna chhuah. Hei hi hnathawh leh tulna dang avanga khawdanga awm ten bank account siam nana a local address fiahna an phut thin avanga harsatna an tawh thin tih ziaawm theih nan a tih a ni.

 

*BANGLADESH AH WORLD CUP BORUAK A SANG
Bangladesh khawthlang lam a Jessore district thuneitu ten an district huam chhung a football fans ten an in chung leh dawr vel a Brazil leh Argentina etc flags an tar nasa lutuk chu, an ram Bangladesh flag dah pawimawh lohna ah ngaiin la thla turin an ngen. Bangladesh mipui te hi football ngaisang leh tuipui tak anni a, World Cup 2014 khelh tur avang hian khawpui leh thingtlang in tam tak ah an tan zawng a bikin Brazil leh Argentina flag an tar chei chuai a ni.

*PRIME MINISTER THAR IN A THUNEIHNA HMANG TAN
India Prime Minister Narendra Modi chuan sorkar hmasa in an lo din cabinet committee 4 te chu a thiat vek. Chung te chu: Cabinet committee on UIDAI-related issues te, Cabinet committee on World Trade Organisation matters te, Cabinet committee on management of natural calamities leh Cabinet committee on prices te anni.

Cabinet committee on UIDAI-related issues, Cabinet committee on prices leh Cabinet committee on World Trade Organisation matters te hi Cabinet committee on economic affairs huam chhungah dah luh anni tawh dan a, cabinet committee on management of natural calamities pawh ram chhungah leilung a chhiatna a thlen changin Union cabinet secretary kaihhruaina hnuia enkawl mai turin an ti a ni. PM thar hian thuneitu sang tak nei cabinet committee hrang hrang awm thluah ai chuan hmun khat a khaikhawm theih te chu a hlawm a dah a, kalpui mai thazawkin a hria a ni.

GOOD MORNING MIZORAM

LAMTLUANG ZINGKAR CHANCHINTHAR LAWRKHAWM

*Mizoram finance minister Lalsawta chuan Union budget 2014-2015 thlirlawkna (Pre-Budget consultation meeting) Delhi a neih ah Mizoram sum harsatna tawh chungchang leh central lamin ngaihsak bik a tulna te a sawi chhuak.

*Directorate of School Education chuan  9.6.2014 khan DEO, SDEO leh E.O te tana ‘Finalisation of Educational Statistics 2013-14’ meeting an buatsaih.

*Nimin khan Minister C.Ngunlianchunga chuan Lunglei a AH&Vety dept office leh  Govt. Press office te a tlawh.

*Karhmasa Zirtawpni zan a khawvar tui inleih a mahni inhal Vanlalnghaka (33) h/o Lalremruati, Serchhip Darnam Veng chu niminpiah zing dar 7:35 vel khan  Serchhip damdawiin ah a boral.

*Mizo zinga dan lam thiam hriatlat K.L Liana, MJS chuan facebook a ma hming a account lem (fake account) siamtu lakah FIR a thehlut. KL Liana hian a hming a fake account siamtu hi Lalpa Isua hming a titawp tur a ngen hnuah a tihtawp duh loh avangin FIR hi a thehlut ta a ni.

*27 April 201 a Darlawn atanga Sawleng a bial inkhawmpui tur a kal bus accident tawk ta te zing a tel Darlawn kohhran zaipawl member Nl.Laltharili (Seni) kum 36 chu hun rei tak accident vanga a dam that theih loh hnuah nimin khan a boral.

*Nimin khan Taliban firfiak pawl ten Pakistan a Karachi airport vengtu sipai te awmna Airport Security Force (ASF) training academy leh hostel complex ah te luh tumin an bei a, mahse an luh theih loh avangin sipai te nen an in kap  leh a, hun engemaw chen hnuah Taliban te hi an tlanchhe ta a ni, thi leh hliam an awm lo. Pathianni zan khan Karachi airport chu Taliban te hian an luhchilh tawh bawk a ni.

*Iraq Prime Minister Nouri al-Maliki chuan an ram hmarlam khawpui Mosul chu jihadist helpawl ten an lak avangin emergency puan hnan turin parliament ah thu a pu lut.

*Nimin khan Dimapur, Nagaland  bul ah Karbi helpawl United People's Liberation Army (UPLA) mi 10 police ten an man, an man zingah hian Commander-in-Chief Nikunja Kathar leh Deputy Commander-in-Chief Langring Terang te pawh an tel a ni. UPLA te hi tunhnai a Hamren SP leh  a PSO te thattu ni a rinhlelh anni.

*Rajasthan police te chuan National Rural Health Mission (NRHM) hnuaia ambulance leina tender chungchang ah thil dik lo ti a puh Chief Minister hlui Ashok Gehlot, Union Minister hlui Sachin Pilot leh state health Minister hlui  Aimaduddin Ahmed Khan te lakah FIR thehluh chu CID CB te chhuichian turin case an ziaklut.

*BJP kaihhruai sorkar thar chuan July chawlhkar 2 naah 2014-2015 Union Budget chu parliament ah pharh hman an in beisei.

*India leh Malaysia in hockey test series an khelh mek ah match 2-na ah nimin khan India hmeichhe team te chuan Malaysia team te chu 2-0 in an hneh a, ningani ah hian an inkhel leh ang.

*Nimin khan Muzaffarnagar, Uttar Pradesh ah BJP district hruaitu Omveer Singh Gurjar chu motor cycle a chuang mi 3 ten  khawlai ah an kaphlum

*Satellite image pechhuak thin Skybox Imaging chu US $ Maktaduai 500 in Google in an lei.

*HMANLAI VAWIIN: Kum 1509 vawiin angah khan England lal King Henry VIII chuan a nupui paruk zing a a neih hmasakber a unaupa nupui boral san tak nuthlawi kum 23 mi Catherine of Aragon chu Greenwich Biak In ah a nei a, a hnuah he nu hi then a duh leh a mahse Pope in Kristian dan a innei te inthen phalna a pek duh tak loh avang leh kohhran hriatpui a nupui dang neih leh a duh tak avangin Anglican kohhran (Church of England) hi a din tir ta a ni.

*MIZORAM HRECHIANG ANG: Mizo pa kutchhuak Mizo tawng a thuziak awmze nei upa ber nia sawi chu Lungleng lal Khamliana Sailo in Khawhrihnim tlang a Queen Victoria hriatrengna lungphun a siam khu a ni. A lungphun a landan chuan kum 1901 phun a ni. (Hei hi a thlalak kan rawn tarlan hi a ni a, thlalatu hi Saithanzuala a ni.)

*THURIL: "I nuih chuan hlim hmel a siam che a chu chuan i bul vel a mi te awm pawh a ti nuam thin." - Les Brown.
--------
Zingkar chanchinthar lawrkhawm hi a sei deuh vang nge in comment tha duh ta lo riau a, tih tawp mai tur em ni dawn le?Chhiar Chhuak Dap (CCD) kan awm chuan CCD tiin a comment theih e.

Victoria Memorial (Khamliana Lungphun), Khawrihnim, Mizoram
pix: Saithanzuala