11th June 2014 news in Mizo

 Latest news collection in Mizo language

MIZO TAWNG A CHANCHINTHAR LAWRKHAWM

11.6.2014 
*WORLD CUP 2014 OPENING NEIHNA TUR STADIUM BELCHIANG ANG
Kumin Fifa World Cup 2014 hawnna neihna tur stadium hi Brazil ram khawpui lianber Sao Paulo a awm a ni. He stadium hi Sport Club Corinthians Paulista ho ta niin a hming dik tak chu 'Arena Corinthians" tih a ni a, mahse world cup chhung hi chuan 'Arena de São Paulo' ti a sawi thin a ni ang. Opening match Brazil vs Crotia bakah hian match 5 dang an thleng dawn a ni.

Sao Paulo stadium hi 30 May 2011 khan sak tan a ni a, 10 May 2014 ah hawn a ni. Stadium hi a pum a la sak zawh loh deuh a nia Wordl Cup chhung atan bik hian inkhel entute thutna tur seat 61,606 siam a ni a, World Cup zawh lamah la siam belh leh an tum a ni. Inkhelhna field zau zawng chu 105X68 metres a ni. A chhuatphah atan hian phullem Perennial Ryegrass an hmang a, a sak manah hian Brazil ram pawisa Real Maktaduai 965 seng tur a ruahman a ni.

He stadium an sak lai a hnathawk tu an tamber tum chu 2012 november kha niin hnathawktu mi 2300 a rual in an ruai thin a ni. He stadium hi World Cup zawh ah sak chhunzawm leh a ni ang a, February 2015 ah a pum a zawh hman an in beisei a ni. Chuan a chhungah hian zu inna dawr(bar) 75 a awm a ni.
 
*Mumbai metro service (khawpui chhung a rail tlan) chu hawn a nih atanga ni 4 chhung in mi maktaduai 1 an chuang tawh a ni.
 
*Vawiin khan Lok Sabha chuan Joint Parliament session a President thusawi lawmthusawina (motion of thanks) chu an passed.
 
*AIR LIVE PHONE IN PROGRAMME
Tun Inrinni lo awm tur, June ni 14, chawhnu dar 1:05-dar 2:00 inkar Telephone a zawhna leh chhanna AIR Aizawl Live Phone In Programme ah chuan “World Blood Donation Day” pualin ‘Thisen pe la, midang nunna chhan rawh ‘ tih chungchang a hriat duh neite tan a zawh theih dawn a. Mipui zawhna chu 1) Dr. Lily Chhakchhuak, Blood Bank Officer, Civil Hospital, Aizawl, 2) P.C. Lalhmingthanga, President leh C. Lalnunnema, Secretary, Association for Voluntary Blood Donation ten an rawn chhang ang. A zawt duh tan Telephone No. 0389/2323148 ah emaw a biak pawh theih ang. (DIPR)
 
*Vawiin khan Mizoram Civil Service (Combined) Preliminary Examination 2014 chu MPSC exam centre hrang hrang ah tluang tak a neih a ni.
Pix: MPSC Exam centre Lunglei

MCS exam centre, Lunglei, Mizoram

 
*GREEN MIZORAM DAY
"Thingphun uar la, Venghim rawh" tih thupui hmangin vawiin khan Mizoram hmun hrang hrang ah GREEN MIZORAM DAY hman a ni.
 

*ARUNACHAL RAMRI AH DUTY POST 54 SIAM THAR NI DAWN
Arunachal Pradesh a India leh China ramri ah Indo-Tibetan Border Police (ITBP) duty post 54 siam belh turin hma lak mek a ni a, he ruahmanna hi Union Home Ministry pawmpui turin thehluh a ni tawh a ni. Arunachal Pradesh ah hian 1,126 km a thui India leh China ramri a awm a ni.

 

*RBI IN BANK ACCOUNT HAWN NAN PERMANENT ADDRESS FINFIAHNA AWM CHUAN TAWK TI
Reserved Bank of India chuan India ram a bank hrang hrang te hnenah bank account hawng thar tur ten local address proof neilo mahse khawdang a parmanent address proof an neih chuan pawmsak turin hriattirna chhuah. Hei hi hnathawh leh tulna dang avanga khawdanga awm ten bank account siam nana a local address fiahna an phut thin avanga harsatna an tawh thin tih ziaawm theih nan a tih a ni.

 

*BANGLADESH AH WORLD CUP BORUAK A SANG
Bangladesh khawthlang lam a Jessore district thuneitu ten an district huam chhung a football fans ten an in chung leh dawr vel a Brazil leh Argentina etc flags an tar nasa lutuk chu, an ram Bangladesh flag dah pawimawh lohna ah ngaiin la thla turin an ngen. Bangladesh mipui te hi football ngaisang leh tuipui tak anni a, World Cup 2014 khelh tur avang hian khawpui leh thingtlang in tam tak ah an tan zawng a bikin Brazil leh Argentina flag an tar chei chuai a ni.

*PRIME MINISTER THAR IN A THUNEIHNA HMANG TAN
India Prime Minister Narendra Modi chuan sorkar hmasa in an lo din cabinet committee 4 te chu a thiat vek. Chung te chu: Cabinet committee on UIDAI-related issues te, Cabinet committee on World Trade Organisation matters te, Cabinet committee on management of natural calamities leh Cabinet committee on prices te anni.

Cabinet committee on UIDAI-related issues, Cabinet committee on prices leh Cabinet committee on World Trade Organisation matters te hi Cabinet committee on economic affairs huam chhungah dah luh anni tawh dan a, cabinet committee on management of natural calamities pawh ram chhungah leilung a chhiatna a thlen changin Union cabinet secretary kaihhruaina hnuia enkawl mai turin an ti a ni. PM thar hian thuneitu sang tak nei cabinet committee hrang hrang awm thluah ai chuan hmun khat a khaikhawm theih te chu a hlawm a dah a, kalpui mai thazawkin a hria a ni.

GOOD MORNING MIZORAM

LAMTLUANG ZINGKAR CHANCHINTHAR LAWRKHAWM

*Mizoram finance minister Lalsawta chuan Union budget 2014-2015 thlirlawkna (Pre-Budget consultation meeting) Delhi a neih ah Mizoram sum harsatna tawh chungchang leh central lamin ngaihsak bik a tulna te a sawi chhuak.

*Directorate of School Education chuan  9.6.2014 khan DEO, SDEO leh E.O te tana ‘Finalisation of Educational Statistics 2013-14’ meeting an buatsaih.

*Nimin khan Minister C.Ngunlianchunga chuan Lunglei a AH&Vety dept office leh  Govt. Press office te a tlawh.

*Karhmasa Zirtawpni zan a khawvar tui inleih a mahni inhal Vanlalnghaka (33) h/o Lalremruati, Serchhip Darnam Veng chu niminpiah zing dar 7:35 vel khan  Serchhip damdawiin ah a boral.

*Mizo zinga dan lam thiam hriatlat K.L Liana, MJS chuan facebook a ma hming a account lem (fake account) siamtu lakah FIR a thehlut. KL Liana hian a hming a fake account siamtu hi Lalpa Isua hming a titawp tur a ngen hnuah a tihtawp duh loh avangin FIR hi a thehlut ta a ni.

*27 April 201 a Darlawn atanga Sawleng a bial inkhawmpui tur a kal bus accident tawk ta te zing a tel Darlawn kohhran zaipawl member Nl.Laltharili (Seni) kum 36 chu hun rei tak accident vanga a dam that theih loh hnuah nimin khan a boral.

*Nimin khan Taliban firfiak pawl ten Pakistan a Karachi airport vengtu sipai te awmna Airport Security Force (ASF) training academy leh hostel complex ah te luh tumin an bei a, mahse an luh theih loh avangin sipai te nen an in kap  leh a, hun engemaw chen hnuah Taliban te hi an tlanchhe ta a ni, thi leh hliam an awm lo. Pathianni zan khan Karachi airport chu Taliban te hian an luhchilh tawh bawk a ni.

*Iraq Prime Minister Nouri al-Maliki chuan an ram hmarlam khawpui Mosul chu jihadist helpawl ten an lak avangin emergency puan hnan turin parliament ah thu a pu lut.

*Nimin khan Dimapur, Nagaland  bul ah Karbi helpawl United People's Liberation Army (UPLA) mi 10 police ten an man, an man zingah hian Commander-in-Chief Nikunja Kathar leh Deputy Commander-in-Chief Langring Terang te pawh an tel a ni. UPLA te hi tunhnai a Hamren SP leh  a PSO te thattu ni a rinhlelh anni.

*Rajasthan police te chuan National Rural Health Mission (NRHM) hnuaia ambulance leina tender chungchang ah thil dik lo ti a puh Chief Minister hlui Ashok Gehlot, Union Minister hlui Sachin Pilot leh state health Minister hlui  Aimaduddin Ahmed Khan te lakah FIR thehluh chu CID CB te chhuichian turin case an ziaklut.

*BJP kaihhruai sorkar thar chuan July chawlhkar 2 naah 2014-2015 Union Budget chu parliament ah pharh hman an in beisei.

*India leh Malaysia in hockey test series an khelh mek ah match 2-na ah nimin khan India hmeichhe team te chuan Malaysia team te chu 2-0 in an hneh a, ningani ah hian an inkhel leh ang.

*Nimin khan Muzaffarnagar, Uttar Pradesh ah BJP district hruaitu Omveer Singh Gurjar chu motor cycle a chuang mi 3 ten  khawlai ah an kaphlum

*Satellite image pechhuak thin Skybox Imaging chu US $ Maktaduai 500 in Google in an lei.

*HMANLAI VAWIIN: Kum 1509 vawiin angah khan England lal King Henry VIII chuan a nupui paruk zing a a neih hmasakber a unaupa nupui boral san tak nuthlawi kum 23 mi Catherine of Aragon chu Greenwich Biak In ah a nei a, a hnuah he nu hi then a duh leh a mahse Pope in Kristian dan a innei te inthen phalna a pek duh tak loh avang leh kohhran hriatpui a nupui dang neih leh a duh tak avangin Anglican kohhran (Church of England) hi a din tir ta a ni.

*MIZORAM HRECHIANG ANG: Mizo pa kutchhuak Mizo tawng a thuziak awmze nei upa ber nia sawi chu Lungleng lal Khamliana Sailo in Khawhrihnim tlang a Queen Victoria hriatrengna lungphun a siam khu a ni. A lungphun a landan chuan kum 1901 phun a ni. (Hei hi a thlalak kan rawn tarlan hi a ni a, thlalatu hi Saithanzuala a ni.)

*THURIL: "I nuih chuan hlim hmel a siam che a chu chuan i bul vel a mi te awm pawh a ti nuam thin." - Les Brown.
--------
Zingkar chanchinthar lawrkhawm hi a sei deuh vang nge in comment tha duh ta lo riau a, tih tawp mai tur em ni dawn le?Chhiar Chhuak Dap (CCD) kan awm chuan CCD tiin a comment theih e.

Victoria Memorial (Khamliana Lungphun), Khawrihnim, Mizoram
pix: Saithanzuala

10th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

10.6.2014 
*World Cup 2014 final khelhna tur Marcana Stadium ah hian entu mipui 73,531 an leng a, Rio de Janeiro khawpui a awm a ni. He stadium hi Fluminense FC leh CR Flamengo te home stadium niin World Cup 2014 pual liau liau hian sak that a ni. He stadium hlui ah khan kum 1930 khan World Cup final ah Uraguay chuan a thlengtu ram Brazil an lo hneh tawh a ni. 

Marcana Stadium, Brazil

 
*MAHNI MIHRINGPUI KAP HLUM
Inrinni liamta June 7 zan, zanlai vel khan Hualtu khuaa Lalhmingmawia (36) s/o Lalhluna chuan an khaw mi tho Lalruatsanga (34) s/o Pahlira chu ulhbun silaiin a dulah a kâp a, ká chhawn lohin a thi. Thu dawn danin, Lalhmingmawia leh Lalruatsanga te hi June 7 tlai aṭangin an intibuai a ni. (Vanglaini)
 
*GANJA HMUN TIHCHHIAT SAK
Mizoram Excise & Narcotics Department (END), Anti-Narcotic Squad-te chuan nimin ni 9.6.2014 dar 11:30 AM khan Chawlhhmun ah Ganja hmun an tichhia.

Excise & Narcotics Department, Anti-Narcotic Squad-te chuan Chawlhhmun ah Ganja (Cannabis plant) hmun an tichhia a, Ganja hmun siamtu Lalchhanhima (34) s/o Lalrinkima, Chawlhhmun, Aizawl chu an man nghal a ni. Heng Ganja (Cannabis plant) kûng an tihchhiat hi kûng 487 niin, a rih zawng pawh Kg. 60 a ni a. A ro a lo lâk sa hi Polythene 2(two) khata dah gram 433 pawh an man tel a ni.

Excise & Narcotics Department-te chuan a Ganja/Cannabis plant siamtu Lalchhanhima hi Section 20(a)(i) & 20(b)(ii)(A) of NDPS Act ’85 hnuaiah thubuai an siamsak a ni. (DIPR)
 

Ganja plantation destroyed by Mizoram Excise & Narcotics Department

*MIZO MUSIC VIDEO THAR
Mizo zaithiam Maggie Malsawmzuali leh Zoramchhani te gospel music video thar Samuel Ralte hlaphuah "I hming ka fak ning lawng" tih chu youtube ah entheih in dah a ni. A link chu a hnuaiah hian tarlan a ni e.
http://www.youtube.com/watch?v=GE48VCsG4gM

*SIKKIM AH BPL TE TAN 12% SORKAR HNA HAUHSAK DAWN
Sikkim sorkar chuan thuchhuah siam in an state chhung a sorkar leh public sector undertaking a hnaruak ah te mirethei (BPL) te tan 12% hna an hausak tawh dawn tih an puang. Sikkim ah hian BPL a inziak lut mi singnga sangnga an awm mek a, an ram mipui awmzat atanga chhut in 8% an awh pha a ni. An hna hauhsak tur hi BPL Sikkim a piang leh seilian te ngei anni tur a ni thung a ni.

*DELHI CONNAUGHT PLACE VENGAH WI-FI PE CHHUAK DAWN
Tata Docomo chuan New Delhi Municipal Council (NDMC) nen atang dunin Delhi a Connaught Place an tih Rajiv Chowk an tih bawk veng ah thlaleh atangin internet wifi an pechhuak tan dawn. An ruahman dan chuan wi-fi service an pekchuah tur hian 4km a huam dawn a ni. Wi-Fi hmangtute chu minute 20 chhung a thlawn a hman tir anni phawt anga , chutah an la hmang chhunzawm zel duh a nih chuan online in emaw card hmangin pawisa an chawi a ngai chhunzawm dawn a ni. Rs.20 in minute 40, Rs.30 minute 60, Rs.50 in minute 100 a lei theih dawn a ni.

*NAUPANG HUAISEN LAWMMAN ATAN HMING PEK THEIH
Sorkar laipui hnuaia Indian Council for Child Welfare chuan naupang huaisen te tana lawmman – National Awards for Bravery for Children 2014 atan hming a thehluh theih thu hriattirna a tichhuak.

He lawmman dawng thei tur te chu naupang kum 6 leh kum 18 inkar a mi an tur a ni a. An huaisenzia tarlang thei tura an thil tih te chu July ni 1, 2013 leh June ni 30, 2014 inkar a mi a ni tur a ni a. Hming pe lut duh te chuan Aizawl DC Office atangin Form lakchhuah tur a ni a, September ni 30, 2014 ral hma ngeiin thehluh tur a ni.

Hrechiang duh te chuan Aizawl DC Office-ah Office hun chhungin zawhfiah theih a ni. (DIPR)

*GOOD MORNING MIZORAM
LAMTLUANG ZINGKAR CHANCHINTHAR LAWRKHAWM
*Nimin khan Indian National Congress candidate Ronald Sapa Tlau chuan Mizoram Rajya Sabha MP inthlan atan nomination a file. Hetih lai hian MNF leh an thawhpui UDF te chuan an candidate atan L.Ramkinlova Falkland veng, Aizawl atan an puang fel ta bawk.

*Nimin khan Aizawl ah Mizoram Medical College Advisory Committee meeting neih a ni. An thurel pawimawh zual te:
(1)Medical College dinna tur Falkawna State Referral Hospital hlimthla thlir ho niin ruhrel siam that ngai leh thawm that ngai laite sawiho a ni.
(2) August, 2015 ah Class tan hman theih beisei niin a bul tan nan Anatomy, Biochemistry leh Physiology Department din nise, a batch hmasa berah zirlai 100 tal admit theih tum nise.
(3)HSCC (India) Ltd. chu consultancy firm atan thlan anni.
(4)Medical Council of India (MCI) phalna rang thei ber a lak a nih theih nan Dr N.K. Mohanty kaihruaina hnuaiah a bawhzui tur team din a ni.

*Ministry of Rural Development-in rambua tawh cheithar leh nana a hmalakna pawimawh tak Integrated Watershed Management Programme (IWMP) hnuaia 'District Level Training for Watershed Development Team' chu nimin khan SIRD Extension Training Centre, Pukpui-ah hawn a ni. Lunglei, Saiha, Lawngtlai leh Serchhip atangin Watershed Development Team thlanchhuah ten ni 5 chhung ram cheibawl that leh dan tur an zir dawn a ni. (DIPR)

*Sorkar laipuia Ministry of Labour & Employment hmalakna pakhat, Skill Development Initiative (SDI) Scheme kalpuina hnuaiah, nimin khan Mizo nula 50 rual chu Kolkata-a Emporium Training & Consultancy (ET&C) Pvt. Ltd a training turin tirhchhuah anni. Training hi thla li (4) awh tur niin, Mizoram Youth Commission chuan June thla chhung vek hian training turin mipa 40 tirhchhuah leh theih an beisei bawk. Zirlaite hi an kal man cheng sang nga (Rs. 5000) thleng tum sak vek an ni ang a, training chhung hian thlen man (boarding and lodging fee) nitin cheng 300 pek an ni dawn bawk. (DIPR)

*Saiha District thuneitu ten Green Mizoram day June ni 11 atan an district huam chhung a sorkar dept tin ten thing tiak 5 tal phun nise an ti.

*Tunhnai a Australia a Mizo awm Laltanpuia Pachuau (Matana Pachuau) in Mizoram CM Lal Thanhawla te nupa beer in lai thlalak internet a hmuh tur a awm vanga Aizawl Police station a FIR a thehluh chu finfiakna tak tak a awm loh avangin an hnawl sak ta tih Aizawl SP LR Dingliana Sailo chuan a sawi.

*VNR Vignana Jyothi Engineering Institute, Hyderabad a zirlai 24 te excursion a zin chu Pathianni khan Larji Hydroelectric projects, Himachal Pradesh atanga tui an sah avang in tuilian a la a, ruang 4 hmuh a ni tawh a, vawiin lamah tuitla ruang hi zawn chhunzawm leh a ni ang. Heng engineer zirlai te hian luikamah chawlin thla an la a, chutih lai tak chuan hydel project atang hian tui an rawn sah ta huk sia, tuilian in a la zo ta a ni.

*Brazil ramin World Cup 2014 thleng tur a an in buatsaih mek laiin nimin khan Open ceremony neihna tur stadium awmna Sao Paulo khawpui a metro worker nuar mek te chu police in mittui tlakna hlo nen an hmachhawn a ni. Nuar te hian an hlawh 12.2% a tihpun an ngiat a ni.

*54th National Inter-State Senior Athletics Championship, Lucknow a khelh zawh takah Punjab pa Arpinder Singh chuan mipa triple jump ah India national record thar siam in 17.17 metre a zuang a ni. Tihian Commonwealth Games Glosgow a neih tur ah India ai awh thei dawn ta a ni.

*West Bengal sorkar chuan an state chhung a college admission zawng tur te tan help line an siam a number chu 1800 103 7033 a ni. Zing dar 9 atanag tlai dar 6 thleng biak pawh theih anni ang. Tin, SMS in 9223225477 ah college admission chungchang hi zawh fiah theih a ni bawk dawn a ni.

*Nimin khan 6th Cine ASA Guwahati International Film festival Guwahati khawpui ah neih tan a ni.

*Pakistan ram Karachi airport mi firfiak ten an beih avang khan India rama airport ve pawh in ralring reng tur in sorkar in thupek thar a siam.

*Libya Prime Minister Ahmed Maiteg chuan Supreme court thupek angin a tlin dan chu a dik tawk lo tih a pawm ta a, PM anihna atang hian banna a thehluh tur thu a sawi bawk.

*Online bazar lun tak eBay's PayPal unit hotu David Marcus chuan banna thehlut in facebook a zawm dawn thu a sawi. David Marcus hi facebook company Vice President thar a ni dawn a, a hna chanpual tur chu i chhass leh thiante i biak fo na thin message service enkawl a ni dawn a ni. FB messenger atang hian nitin mi maktaduai 200 chuang in message an thawn ziah thin anga chhut a ni.

*HMANLAI VAWIIN: Kum 1943 vawiin angah khan Indopui II-na hun lai a ni a, Tangrual (Allies) sipai ten an hmelma Germany ram chu bomb hmangin an bei tan a ni. Kum 1946 vawiin angah tho khan Italy ramah Lal rorelna (monarchy) chu mipui rorelna (republic) in an thlak a ni.

*MIZORAM HRECHIANG ANG: Kum 1972 khan India parliament in ramchhung inrelbawlna tibuai thei te khapna leh hremna tur dan khauh tak Maintenance of Internal Security Act (MISA) chu a pass a. He dan bawhchhetu te chu man anih chuan bail a chhuah tir theih anni lo a ni. Mizoram pawh rambuai lai a nih avanging he dan hmang hian MNF leh mi thenkhat te pawh man an tawk hial a ni.

MISA hi khauh taka kenkawh a nih avangin dawra bungraw hralh tur buk reng reng pawh a dik loh vaih chuan, a hralhtu chu bail theih miah lova man nghal tur a ni mai. He Dan hian Mizorama Sa zuar te a ti luhai ta hle mai a, an sa buk a dik a ngai tawh sia, an chawi belh dawn ta mai a, tih dan an ngaihtuah chhuak ta a, a sa chekhnawk an hralh tel meuh lohte kha a sa tha zingah an zep ral ta a, chu chu tun thlengin tihdan phung a lo ni ta a ni. He Dan, MISA hi tunah chuan sa chekhnawk- a ke, beng, a lu sa, etc. sawi nan kan hmang ta a, thangthar te phei chuan Mizo tawng emaw an ti tawh niin a lang.

A nihna taka chuan "MISA hman avangin sa hi a buk dik taka bukin ei a awm lo, chuvangin a sa chekhnawk hi kan telh lo thei lova ni" tihna a tan- "A MISA telh a ngai” an ti ta thin a ni. Tunah chuan a MISA hlang te pawh kan lo lei ta zel a nih hi. (Source: AmiGo VLR Hname via misual.com)

*THURIL: "Thiamna diklo lakah fimkhur ang che, chu chu mawlna ai pawh in a hlauhawm si a." George Bernand Shaw.
-----------
Tukin chu sazuar te hnen atanga sa i lei an lo telh thin "a misa" lo chhuahna i hre tawh bawk a, tlemin sawi belh ve ila: he dan MISA hi kum 1977 khan tih tawp a ni a, khatih lai sorkar mek Janata party te khan ramchhung buaina tichhe thei zawng a hel leh danbawhchhia te hremna tur leh venna tur Terrorism and Disruptive Activities (Prevention) Act leh Prevention of Terrorism Act an siam ta thung a ni. "A misa" i ei hunah i lo hrechhuak thin dawnniaTukchhuak nuam vek ule. Comment lamah inkawm ila:)

9th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

9.6.2014 
*WORLD CUP OPENING AH JLO LANG DAWN LO
Naktuk tukleh lawk a Brazil a World Cup 2014 hawnna programme hmanna tur ah zaithiam Jennifer Lopez (JLo) chuan a theih leh loh tur thu inrinni zan khan a sawi thut. Ruahman ang chuan Wolrd Cup opening ceremony ah hian JLo hi rapper Pitbull leh Brazil ram pop star Claudia Leitte te nen an hla record "We Are One (Ola Ola)" tih chu live a sa tur a tih anni. FIFA thuchhuah in an sawi dan chuan " Jennifer Lopez (JLo) hian production lamah buaina a neih avangin a tel thei dawn lo ani an ti. An hla hi JLo tello hian Pitbull leh Leitte te hian an sak mai a ngai dawn ta a ni.
 
*LAL THANHAWLA’N PRIME MINISTER NARENDRA MODI HMU
Chief Minister Pu Lal Thanhawla chuan vawiin tlai khan Prime Minister Pu Narendra Modi chu a chenna In 7 Race Course, New Delhi-ah hmuin minute 20 vel inkhawmhona hun tha tak an nei.

Chief Minister Pu Lal Thanhawla chuan Prime Minister Pu Narendra Modi hnenah Mizoram mamawh hrang hrangte zingah sum leh pai lama harsatna chu a pawimawh ber anih thu a thlen a. Mizorama kawlphetha project te leh Kaladan Multi Modal Transport Transit Project te chu duh anga chaka kalpui anih loh thu Prime Minister hi hrilh bawkin, Prime Minister chuan hengte hi a lo enpui tur thu Chief Minister hi a hrilh a ni.

An in biaknaah hian Pu Lal Thanhawla chuan Prime Minister Modi chu NLUP chanchin tlangpui leh tun thlenga hlawhtlinna hrang hrang Mizoram leh mipuiten NLUP hmanga an hmuh te chu a hrilh a. Prime Minister chuan NLUP chu tha a tih thu hrilhin hun remchanga Mizoram a zin hunah a hmuna ngei hmalakna te en a duhthu Chief Minister a hrilh a ni.

Chief Minister hian Prime Minister Pu Narendra Modi chu a hman hmasak berah Mizorama lo zin ngei turin a sawm a, Prime Minister chuan sawmna hi pawmin, remchang hmasa ber ah alo zin tur thu a hrilh bawk a ni. (DIPR)
 

Mizoram Chief Minister Lal Thanhawla & Prime Minister Narendra Modi

*PRESIDENT THUSAWI LANGSAR ZUAL TE
Vawiin 9.6.2014 a India President Pranab Mukherjee in Parliament in 2 Rajya Sabha leh Lok Sabha member te hma a thusawi tlangpui te chu:

*Zirna in tha zawk a awm theih nan state tin ah IIT leh IIM din a ni ang.

*Infiammi te tan National Sports talent search system kalpui a ni ang.

*Hriselna mumal taka kalpui tum a ni a bawlhhlawh mumal zawk senghawi leh sawngbawl a nih theih nan "Swachh Bharat Mission" kalpui a ni ang.

*Ram thenawm te nen thawhhona tha leh boruak tha zawk neih a nih theih nan tan lak a ni ang.

*Sipai te tha tih chak leh hmanraw tha zawk a thuam anni ang a, lawng sipai te tan National Maritime Authority din ani ang a, ram tana nunan hlantu sipai te hriatrengna thlanmual National War Memorial siam a ni ang.

*Black money laklet anih theih nan ruahmanna siam turin Special Invetigation Team (SIT) din a nih tawh thu a sawi.

*Eiruk do nan Lok Pal bil uluk taka kenkawh a ni ang.

*Hna thar siam a nih theih nan tourism leh agro-based industries te tih len ani ang.

*Hnam tlem zawk leh tenau zawk te himna ngaihtuah sak leh an hmasawnna tur ngaihtuah sak anni ang.

*Hel leh firfiak pawlte lakah sorkar a nem lo hle ang.

*Retheihna umbo a nih theih nan chak taka hmalak a ni ang a, mi rethei te tan hmasawnna kawng dappui anni ang.

*Ei leh bar awlsam zawk a hmuh a nih theih nan hma lak a ni ang a, sorkar hriatpuina lo a ei leh bar tur hralh ruk ching te lakah hma lak anni ang.

*Thing tlang mi te nunphun tih hmasawn nan panchayati raj chak taka kalpui a ni ang.

*India ram in economy lamah hun harsa tak a tawng mek a, tualchhung leh khawvel huap in India economy siam tha turin theih tawp in hmalakna a ni ang.
 
*AIR AH PROGRAMME THAR
All India Radio, Aizawl chuan Science Magazine Programme thar ni 10.6.2014 (Thawhlehni) zing dar 7:00 atangin a puang chhuak tawh dawn a, kartin Thawhlehni apiangin a pe chhuak thin tawh dawn a ni. He programme ah hian Science lama ram chhung leh ram pawn a thil thleng thar ber ber leh kan mithiamte biangbiakna rawn tihchhuah thin a ni ang. He programme hi FM Zoawi-ah a ni ah vek tlai dar 6:40 ah tihchhuah leh thin a ni ang. (DIPR)
 
*INDIA IN BRAHMOS MISSILE HLAWHTLING TAKIN ENCHHIN
Vawiin khan India chuan Indo lawng INS Kolkata atangin lawng beih nan hman chi bomb mitnei (Anti-ship cruise missile) BrahMos chu hlawhtling takin enchhinna a nei. Enchhinna neihna hmun hi Karnataka Karwar tuipui kamah ah a ni. BrahMos missile hi India leh Russia thiamna hmangkawp a siam a ni.


*MNF in Mizoram Rajya Sabha candidate atan Ramkinlova an ruat.
 
*Taliban te chuan nizan a Karachi airport beitute annih thu an sawi. Kab rawn post tawh angin nizan zanlai atang a tukin zing dar 6 rik dawn thleng khan firfiak pawl te leh sipai te an inkap a ni. Sipai leh airport a thawk mi 28 an thi a, airport beitu firfiak pawl mi 10 te hi kahhlum vek anni.
 
*REANG (BRU) LO LET TUR DAWNGSAWNG TURIN IN PUAHCHAHNA KALZEL
Tripura Transit camp a Reang (Bru) la awmte la let tura inpuahchahna (6th batch repatriation) chu kalpui zel a ni a.

Hemi chungchangah hian Mamit DC Pu K.Lalthawmmawia hovin Mamit SP, Home Dept. lam hotute, Nodal Officer leh DIPRO, Mamit te chuan nimin June 6 khan North Tripura DM Pu Sandeep Rathod leh sorkar mi pawimawh dang te nen Reang (Bru) lakletna a thawh ho dan tur chungchangah inbiakna neih a ni a. Reang (Bru) ho an camp atanga an chhuahna tur motor leh venhimna chungchangah inbiakna hi neih a ni. Inbiakna ah hian June 17&18 chu Reang (Bru) laklet ni tur a ruahman a ni.

Tripura sawrkar nen inbiakna bawhzuiin karhmasa Inrinni khan Mamit DC Pu K.Lalthawmmawia hovin a pisaah sorkar dept. hrang hrang hnuaia officer ten 6th batch repatriation neih ni a hmalak dan tur, lo dawnsawn dan tur leh a dawngsawngtu tur te ngaihtuah ho a ni a. Lo dawnsawnna hmun atanga an awmna tur khua a hruai tur motor leh an chen lailawkna tur chungchang chu an meeting a ngaihtuah ho langsar zual a ni.

Mamit district atanga lo lut tur Reang (Bru) te hi Kanhmunah leh Zomuantlangah lo dawnsawn an ni ang a, heta tang hian Tripura Transit camp a an awm hmaa an chenna assembly constituency-ah theuh hruai tura ruahman a ni. Tarlan tawh angin 6th batch repatriation hi self-repatriation tur a ni a, lo let tur a hming inpe te chu anmahni finfiah a chian phawt an ni a. Hming inpe atangin chhungkaw 459 te chu laklet tur a ruahman a ni. (DIPR)
 

Mizoram official discuss about Reang (Bru) refugees

*CBI DIRECTOR IN INTERPOL SECRETARY CHUH TUM
Central Bureau of Investigation (CBI) director nilai Ranjit Sinha chuan Interpol Secretary General chuh ve tumin a hming a pe lut. Ministry of External Affairs in India miin he post hi a chan ngei theih nan Asia ram a Interpol executive member ni mek te tanpuina a sawm mek a ni. Ranjit Sinha hi IPS 1974 batch niin Bihar cadre a ni.

Interpol tih hi a lampum chu International Criminal Police Organization tih a ni a, khawvel a ram hrang hrang 190 ten thubuai leh misual chhuina kawng a an intanpui tawn theih nan a huho a pawl an din a ni. Lyon, France ah hmunpui an nei a, tuna secretary general nilai Ronald K Noble hian a zawnin term 3 a chelh tawh a, a term hi a tawp dawn hnai tawh a ni.
 

KARACHI AIRPORT AH DARKAR 6 CHHUNG SIPAI LEH FIRFIAK PAWL TE INKAP
Nizan zanlai pelh hret khan Pakistan a Jinnah International Airport, Karachi a mi chu firfiak pawl silai leh ralthuam dang keng ten luhchilh in security duty thenkhat leh airport a hnathawk dang te  kaphlum in buaina nasa tak an chawkchhuak  a ni.

Firfiak pawl te hi airport security uniform anga inthuam in terminal hlui zawk a Fokker building an tih atangin ID lem hmangin airport hi an lut ru a ni.  Machine gun (puakrang silai) leh puak thei thil granade leh rocket launcher te bakah suicide jacket te nen an inthuam avangin beih an khirh hle a, Pakistan sorkar DG Inter-Services Public Relations (ISPR) chuan tukin dar 5:22 khan firfiak pawl mi 10 te chu sipai ten an kaphlum vek niin a puang.

Firfiak pawl ten airport an rawn luh rukna lam ni a rinhlelh te hi passenger te luh nan an hman tawh loh VIP te luh nan leh bungaw thawnna (cargo) atan a an hman thin terminal hlui zawk niin hajj terminal leh engineering section awmna lam a ni. Tin, airport hungna thir hlingnei (barbed wire) an tichhia pawh a ni thei tho bawk. An zinga thenkhat hian airport runway ah tlan lut in thlawhtheihna lo ding te chu silai a an kah bakah granade in an vawm bawk a ni.

Thi zat leh hliam zat hi he thu ziah a nih lai thleng hian hriat chian a la har hle a, news report tam zawk a lan danin thi zat hi mi 12 an tling tawh a, hliam tuar mi 18 chuang an awm a ni, nunna chan zingah hian security guard 7 leh civil mi 2 leh police 1 an awm a ni. Thlawhna thlawk chhuak tur leh rawn tum tur te tihtawp vek an ni a, airport hnathawk te pawh hmun him lamah suan chhuak mek anni.

Buaina a chhuah hnu lawk atangin Pakistan sipai commando ten airport hi vil nghal in pawikhawihtu mi firfiak te chu huaisen takin an bitum nghal a ni. Rei fe an in beih hnuah firfiak pawl mi tam zawk an an kap hlum hman a, mahse a la dam chhun te chu airport chhung building 2 ah tanhmun an khawh tlat avangin sorkar sipai te nen  an la inkap chhunzawm ta zel a ni.

Tukin zing dar 4:14 khan Pakistan sorkar thupuangtu chuan firfiak pawl te hian thlawhthleihna hruaikawi tumin an rawn lut ru a mahse an tum angin an hlawhtling ta lo niin a sawi. An ralthuam hman te hi India siam anni hlawm ni a sawi a ni.

Pakistan sipai  thupuang tu Major General Asim Bajwa chuan tukin dar 5:35 khan Karachi airport chhung darkar  6 chhung firfiak pawl te leh sorkar sipai te inbeihn na chu a tawp tak thu leh firfiak pawl te hi kahhlum vek annih thu a puang ta a ni. A sawi zelna ah airport chhung a thlawhna ding te tihchhiat anni lo a, thlalak a thlawhna kang niawm tak a lang chu thlawhna nilo in building kang a nih zawk thu pawh a sawi a ni.

(Thi leh hliam zat te hi he thu post laia report kan hmuh atang te a tarlan a ni a, a hnu lamah a danglam hret thei tih hria ila.)

#karachi #jinnahairport #karachiattack #pakistan #karachiairport #pakistanairport

*LALTLANSANGI VAP LO THLENG
Dt. 25.5.2014 a Singapore-a a hnathawhnaa boral ta, lainat hlawh leh ngaihsak hlawh em em, Nl. Laltlansangi vap chu nimin Dt.8.6.2014 chawhnu dar 2:20 khan Lengpui Airport-ah Pi Sawmpuii, Singapore-a awm mek chuan amah insengso-in a rawn thlen a ni. An chenna in Bungkawn YMA Road-ah inkhawmna hunserh hmanpui a nih hnuin, Bungkawn thlanmual panpui a ni.
Source: Zothana Khiangte Tma‎ via SPECIAL REPORT Group

 *MIZORAM CONGRESS RAJYA SABHA MP CANDIDATE ATAN RONALD SAPA TLAU
19 June 2014 a Mizoram Rajya Sabha Member of Parliament thar thlanna neih turah Mizoram Pradesh Congress Committee chuan candidate atan Ronald Sapa Tlau S/o.Chhuanvawra, Nisarih Tlang, Vaivakawn, Aizawl chu an thlang. Amah hi Zoram Electronics Development Corporation Limited (ZENICS) Chairman ni lai a ni a, kum 2008 MLA inthlan ah khan Hrangturzo bial ah in candidate in a tling zo lo tawh a ni. Thiamna lamah M.A  (Mass Communication) a ni a, Mizo zinga USA atanag Mass communication subject zirchhuak hmasaber a ni.  Vawiin hian nomination a file ang.

Eptu lam Mizo National Front (MNF) chuan candidate neih ve ngei nise an ti a, an candidate tur chu an tanrualpui United Democratic Front (UDF) te nen inrawn tlang in vawiin lamah an puan tur thu an sawi.

Rajya Sabha MP te hi MLA ten an thlan thin annih avangin Mizoram ah hian rorellai Congress hian seat 40 awmah seat 34 an neih sa avangin Congress candidate hi tling sa anga ngaihtheih anni.

*Mizo nula Spice Jet ah Air Hostess a lut thar Mary Lallawmkimi Chhaihlo , D/O Lysa chhaihlo, Saikhamakawn, Aizawl.

Source: Nell Hlychho

Merry Lallawmkimi Chhaihlo

8th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

8.6.2014

*FRENCH OPEN AH NADAL AN DAL ZO LO
French Open 2014 Mipa single ah Rafael Nadal chuan 3-6, 7-5, 6-2, 5-4 a Novak Djokovic hneh in a a champion ta.

 

*Naktuk chawhma dar 11 hian India President Pranab Mukherjee chuan Central Hall of Parliament ah Rajya Sabha leh Lok Sabha member (Joint sitting of Parliament) te hma ah thu a sawi dawn. A thusawi lawmthu sawina hi Rajya Sabha leh Lok Sabha ah a hrang ve ve in an khel chhunzawm ang.

 

*India rama rawn zin mek China Foreign Minister Wang Yi had chuan vawiin khan Delhi ah External Affairs Minister Sushma Swaraj nen inbiakna neiin ram 2 China leh India te sumdawnna, ei leh bar leh ramri chungchang a thawhhona leh intanpui tawn dan tur an sawi dun a ni

 

*THLAWHTHEIHNA BO MH370 CHIN HRIA TE TAN HAUSAK LAWIH THEIH
May 8 2014 a chinhriat loh a bo Malaysia thlawhtheihna MH370 a chuang mi239 chhung te chuan vawiin khan thuchhuah siamin he thlawhtheihna bo hmu emaw a chin sawi thei an awm chuan lawmman ah US $ Maktaduai 5 (Rs.2,958,57988.17) pek an tiam a ni. He lawmman an siam chhan an sawi ah chuan mi tupawh in thlawhna bo chanchin an ngaihven a thudik an sawi theih nan an ti a ni.

 

*ANDHRA PRADESH CM THAR LAKLUH A NI
Zanin dar 7:27pm khan Telugu Desam Party (TDP) President N Chandrababu Naidu chu Andhra Pradesh Chief Minister thar atan rinawmna thu tiam tir a lakluh a ni ta. Telangana state pian hnua Andhra Pradesh thendarh la bang zawng a enkawl dawn ta a ni. CM lakluh inkhawm hi Vijayawada leh Guntur inkar a Nagarjuna Nagar ah neih a ni.

 

*AIZAWL NORTH COLLEGE PRINCIPAL BORAL
Aizawl North College Principal, Lalrinawma chu vawiin tlai dar thum vel khan a boral. An mahni hi Ramhlun North veng an ni.

 

*FRENCH OPEN HMEICHHE CHAMPION SHARAPOVA
Russian nula kum 27 mi Maria Sharapova chuan Romania nula Simona Halep chu 6-4, 6-7 (5), 6-4 a hneh in French Open 2014 hmeichhe champion a ni ta. Sharapova hian French Open title a lak vawi 2-na a ni a, Grand slam title a lak vawi 5-na a ni.

 

*MUMBAI METRO RAIL HAWNG DAWN
Vawiin chawhnu dar 1 hian Mumbai khawpui a a hmasaber turin metro rail service chu hawn a ni dawn ta. A project hi 2009 atang khan thawh tan a ni a Rs. Vaibelchhe 2356 an seng a ni.

 

*PENTIKOST NI
Vawiin hi Thlarau Thianghlim thlenni 'Pentikost Ni' a ni. Lal Isua thawhlehni atanga ni 50-na ah hman thin a ni. Pentikos ni chibai le.