7th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

7.6.2014

*Naktuk tlai ah Andhra Pradesh Chief Minister turin TDP hotupa N.Chandrababu Naidu lakluh a ni dawn.
 
*India civil nuclear plant neih len ber Kudankulam nuclear power plant (KNPP) chu vawiin khan 1,000MW pechhuak thei turin hlawhtling taka enchhin a ni.
 
*GREEN MIZORAM DAY 2014
State Level Committee on Green Mizoram (SLCGM) chuan karleh nilaini June ni 11 khi Green Mizoram Day ah an puang. Kumin hian Central Agriculture University, Selesih ah thingpui beihpui thlak tur a ruahmanna siam a ni.
 
*CHIEF MINISTERIN SAIRANGAH INTERPRETATION CENTRE A HAWNG
Ramngaw, thing leh mau, lui leh a chhunga cheng sangha, nungcha leh chungleng savate leh kan chhehvel boruak pawimawhna zawng zawng hrethiamlo te tana inzirtirna leh inhrilhhriatna hmun, ‘Interpretation Centre’ chu Environment & Forest department enkawlna hnuaia awm Sairang Nursery Centre ah nimin tlai khan Chief Minister Pu Lal Thanhawla chuan a hawng.

Hawnna inkhawm he centre lecture hall a neihah Chief Minister chuan boruak tha hip tur leh sik leh sa mihringte mamawh tawk kan neih theihna tur kawnga thil pawimawh tam takte hi Mizote hian kan la hre tawk lo viau a, kan ramngaw neih ang chhunte, lui leh ram leilung kan enkawl danahte zir tur kan ngah hle a ni a ti a. He centre hi chutiang zitchhuah tur kan neihte dahkhawmna a ni a ti. Mizoramin sik leh sa tha tak kan neih hi tangkai taka kan hman theih nan inzirtirna hmun tangkai tak a ni dawn a ni a ti.

Chief Minister chuan kan ram neih ang chhun chhunte hi a renchem zawnga kan hman a tul thu sawiin, ram hmasawnna tura project lian tak tak bun nan ram awl tha kan la mamawh dawn chauh a, chuvangin kut tlinglova sum lakluh tum lova neitu rilru pua thawktu kan nih a ngai a ni a ti.

Environment & Forest Minister Pu Lalrinmawia Ralte chuan ramngaw leh lui te hi mipuite ta, mipuite tan vek anih avangin, mitinin kan tangkaipui theihna turin Forest department hian a humhalh hna a kengkawh a, hei hi mi tam takin an hrethiam thin lo a. Chuvangin hetiang lam hrethiamlote hnena hrilhfiahna hmun ‘interpretation centre’ hi kan neih makmawh a ni a ti. Ramngaw, ram awl, lui leh a chhung leh pawna nungchate hi mipuite tan Forest department hian a humhalh a ni tiin, ‘wildlife sanctuary’ ah te chuan ‘Nature Interpretation Centre’ hi siam thin a ni a ti.

Bialtu MLA Pu K.Sangthuama pawhin thusawiin,a bial chhunga sorkarin hmasawnna hna a thawh reng reng chu a tawiawm tlat tur thu a sawi a bawk.

He centre, cement concrete a chhawng thuma sak hi Environment &Forest department in Rs.45 lakhs senga an sak a ni a, a chhunga bungua, cheinate leh tul dangte dah nghal vek a ni. A building ah hian lecture hall, dinning hall leh choka leh room awlte awmin, a vaia zau zawng hi 309.96 sq.m a ni.

Hawnna inkhawm hi Pu Lalram Thanga, IFS, PCCF & Principal Secretary in a kaihruai a ni.(DIPR)
 
*NEICCYA Biennial Conference-cum-Seminar
June 12 - 15, 2014 hian North East India Christian Council Youth Assembly (NEICCYA) 15th Biennial Conference- cum-Seminar, ECM Church of Vaihpi, Saiha-ah neih a ni dawn a, inkhawmpui hi Evangelical Church of Maraland (ECM) ten an thleng dawn a ni. Inkhawmpui thupuiah ‘Oneness in Christ’ (John 17:20 - 21) an hmang ang.

Inkhawmpui neih chhung hian Mizoram Synod Choir-te tum 4 (Inrinni zan, Pathianni Chawhma, Pathianni Chawhnu leh Pathianni Zan) an zai ang. (Synfocity)
 
*INDIA HMARCHHAK MITE NEN INLAICHINNA THA NEI TURIN INBIAKPAWHNA HMAN TANGKAI DUH
India hmarchhak miten ramchhung hmun hrang hrang a hmusit leh enhran an tawh thin tihreh na tur ngaihtuah tu tur a committee sang sorkar laipuiin a din hruaitu M.P. Bezbaruah leh a thawhpui te chuan nimin khan Information and Broadcasting Minister Prakash Javadekar an hmu. Union Minister hian India hmarchhak ram a chengte chu ramchhung hmundang a mite nen telecom, digital, radio leh TV hmang te a inpawhna tha zawk siam a tul thu a lo hrilh a ni.

Union Minister leh amah hmutute hian North East India lam hawi film siam leh film dangah pawh NE lam te telh ve thin a tha a an rin thu te an sawi ho a ni. Union Minister hian TV leh Radio Channel ah te India hmarchhak lam hawi te a tam thei anga puanchhuah ve thin nise that tur thu a sawi bawk a ni.
 
GOOD MORNING MIZORAM
LAMTLUANG ZINGKAR CHANCHINTHAR LAWRKHAWM

*Nizan khan Miss Mizoram 2014 thlanna khar a ni ta a, Miss Mizoram 2014 atan hian H.Lalchhanhimi, Armed Veng South, Aizawl chu thlan niin lawmman pawisa fai Rs.Nuai 1 leh Sing 1 a la a ni. 2-na chu Aizawl Luangmual nula C.Vanlalmalsawmi niin lawmman Rs. Sing 5 a dawng a, 3-na chu Aizawl chhimlam veng Kulikawn nula Lalruatfeli niin lawmman Rs.Sing 3 a dawng thung a ni. Miss Mizoram 2014 Grand Finale hi Nl. Rinthiaghlmi (Rini Hlondo) in a host a, Zonet leh LPS ten live telecast in an pechhuak bawk a ni. Miss Mizoram thlan hi C.Dinthanga, Editor & Publisher Lelte Weekly hmalakna a huaihawt thin a ni.

Winners of Miss Mizoram 2014, Grand finale held @ Vanapa Hall, Aizawl

*Syndney, Australia a awm mek Mizo pa Laltanpuia Pachuau (Matana Pachuau) chuan  tun hnai lawk a facebook group pakhat a Mizoram Chief Minister Lal Thanhawla leh a nupui Riliani ten foster beer an in lai thlalak a hmuh avangin MLTP Act an bawhchhia tia puh in Aizawl Police Station ah CM te nupa lakah hian FIR a thehlut. A FIR thehluh hi hma lo lakpui tur hian Mizoram Sorkar in a din Ethic Committee leh Central Young Mizo Association te hnenah sawmna lehkha a thawn a bawk a ni.

*Nimin khan I&PR Auditorium Aizawl ah  Chhingchhip Citizen Welfare (CCW) ten inkhawmpui an hmang. An inkhawmpui hi  Dr.C.Sangnghina, Chairman, CCW General Headquarter in a kaihruai a, Chhingchhip khaw chhuak MLA Pu John Siamkunga, bial chhung khaw chhuak MLA Er. Lalrinawma leh HSLC leh HSSLC a titha te lawmpuina thuziak hlan an ni. Chhingchhip khua atang hian MLA leh Gazetted officer 140 chuang an chhuak tawh a ni. (DIPR)

*Finance Minister Pu Lalsawta leh Finance Commissioner Pi L.N. Tochhawng te chuan vawiin June ni 7, 2014 hian New Delhi-a Pre-Budget Consultation Meeting neih mek a tel turin Aizawl an chhuahsan dawn.

Union Budget Session 2014-2015 lo awm tur atana lo inrawn lawkna neih turah hian ram pum ei leh bar dinhmun siamthatna atana Sorkar hmalaknate (macroeconomic policy) leh, sum leh pai dinhmun tihthat (fiscal consolidation) lam te thlur bing a ni ang a. He meeting hian Sorkar laipui leh State Sorkarte inkarah inlaichinna leh thawhhona tha zawk a thlen theih nan leh, ram pum tih hmasawnna hmanrua a nih ngei theih beisei a ni. (DIPR)

*Nimin khan Thingsulthliah Teachers’ Association (TSA) buatsaih in kumin HSLC leh HSSLC Exam-a zirlai hlawhtling te puala chawimawina programme hman a ni. Thingsultliah atang hian kumin HSLC leh HSSLC Exam-ah te hian zirlai 108 an hlawhtling a, HSSLC Exam a I Division a 7, II Division a 13 leh III Division a 29 an passed a, HSLC Exam a Distinction a 4, I Division a 13, II Division a 19 leh III Division a 59 an passed a ni. (DIPR)

*Nimin piah khan Assam a Hamrem District police SP Nityananda Goswami leh police dang 1 te chu helpawl Karbi People’s Liberation Tigers(KPLT) ten Rumphung ah an kaphlum.

*Kum 2009 a Uttarakhand a MBA zirlai kum 22 mi Ranbir Singh kaphlum tute zing a mi police 18 te chu Delhi Court in thiam loh a chantir a, an chungthu hi vawiinah puan a ni ang. Ranbir Singh hi police ten thuphuah chawp hmanga puh in an kaphlum a ni.

*India hmar lam Uttar Pradesh, Rajasthan, Haryana, Punjab, Madhya Pradesh leh Gujarat ah te nipui khawlum in zual lam a pan zel a nimin khan Churu (Rajasthan) ah chuan 48.6C a ni hial a ni. Hetih mek lai hian nimin vek khan India chhimtawp Kerala ah chuan fur ruah (South West Monsoon) 2.5mm a sur thung a ni.

*Nimin khan tun inthlan hnuhnungber a che chhe tak Aam Aadmi Party chuan Delhi ah national executive meeting an nei. An meeting ah hian inthlanpui a an party chetchhian chhan thlir ho na leh an kal zel dan tur te an rel a ni.

*Hman ni lawk a hmeichhe naupang rual rubo tu Muslim firfiak pawl Boko Haram te chuan Nigeria hmar chhak ah thingtlang mi 100 chuang an that. News report thenkhat ah phei chuan thi zat hi mi 400-500 niin an tarlang.

*May25, 2014 (Pathianni) khan Rev.Z.D. Lalhmachhuana, Barak Area Church & Mission Administrative Secretary, Mizoram Synod- in Barak Area Karimganj Bial chhung Patharkandi-ah Preaching Station a hawng. Inkhawmna tur Biak In an la neih loh avangin an member, Sunanda Sinha ten an insak thar room pakhat chu inkhawmna atan an hmantir dawn a ni. (Synfocity)

*Pakistan Electronic Media Regularity Authority (PEMRA) chuan an ram a TV station lian ber neitu  Geo TV te chu ni 15 chhung an licence a tihtawp sak bakah Pakistan pawisa Rs.Vaibelchhe 1 chawi turin a hrem. Geo TV te hi Pakistan ISI ten an hnathawh dan a him lo an ti a ni.

*French Open Mipa final ah Rafael Nadal leh Djokovic te an intum dawn ta.

*India external affairs minister thar leh Mizoram Governor hlui Swaraj Kaushal  a nupui Sushma Swaraj chuan minister a nih hnu a rampawn a tlawh hmasaber ni turin tun thla tawp hian Bangladesh a tlawh dawn.

*Delhi bazar rate ah chuan Rangkachak (Gold) man chu gram 10 zelah Rs.27,250 a ni. Tangkarua (Silver) chu Kg 1 zelah Rs.41,000 a ni. International rate ah chuan Gold ounce 1 chu $1,256 a ni a, Silver chu ounce 1 ah $19.12 a ni thung.

*54th National Inter-State Senior Athletics Championships chu PAC Stadium Lucknow ah neih mek a ni a, Pathianni hian a tiak ang.

*India lawng sipai hotu Vice Admiral Anil Chopra chuan Commander-in-Chief of the Western Naval Command mawhphurhna a la fel ta. Indian Navy a officer senior ber dawttu Anil Chopra hian  01 July 1975 khan Indian Navy a zawm a ni.

*Nimin khan US President Barack Obama leh Russia President Vladimir Putin te France ah minute 15 chhung inhmu in Ukraine buaina chungchang an sawi.  Ukraine buai na tlen hnu a an US leh Russia hruaitu 2 te hi an inhmuh vawi 1 a ni. France sorkar in D-day vawi 70-na an lawm vang a inhmukhawm anni. Russia President Vladimir Putin leh Ukraine President thlan thar Petro Poroshenko te pawh inhmu in ram 2 chungchang an sawi dun a ni.

*HMANLAI VAWIIN: Kum 1776 vawiin angah khan Richard Henry Lee chuan America ram chhung a thliarkar 13 ten rorelna khawl an din United Colonies ah America ram independent a puanna tur motion (Declaration of Independence)
 a pu lut a, mahse member thenkhat in an pawmloh avangin declaration of independence lo draft turin committee an ruat ta a ni. USA nita America ram khu tunhma chuan British in an awp thin a, ram pum 1 a awm lo in state hrang hrang ah mahni a ro in rel hrang in an awm fur thin a ni.

Kum 1654 vawiin angah khan Europe lal te zinga rorel rei ber Louis XIV chu bishop of Soissons in lal atan a nemnghet a ni. Louis XIV hian kum 72 leh ni 11o ro a rel a ni.

*MIZORAM HRECHIANG ANG: Mizoram a tlangsang ber dawttu Lengteng huamchhung  ram 12,000 ha (30,000 acres) chu ramsa humhalhna hmun (national wildlife sanctuary) atan 31 May 2001 khan Ministry of Environment and Forests chuan a puang a, a hming atan Lengteng Wildlife Sanctuary vuah a ni. He Wildlife Sanctuary huam chhung a Selam khaw mi thenkhat ten thing an lo zai ruk avangin tunhnai khan E&F dept thawktu te nen intibuaiin sorkar in buaina ching fel turin police a thawn hial kha.

*THURIL: "Chhungte hmangaihna leh thian te ngainatna hi hausak leh dinhmun that ai pawh in a pawimawh zawk a ni" - Charles Kuralt.
-----------------
I lo ngaihtuah ve ngai em? Facebook leh internet site vel a kan khawsa zia (like, comment leh site visit) thin te atang hian kan mizia leh nihna a hriattheih. A taka i tih ngam loh  leh tih duhloh tur kha internet khawvel ah hian zalenna famkim nei ta leh duh duh tih ngamna/theihna hmun ah i ngai thin em? Nangmah ngei kha in enfiah thin ang che. Zingkar atang hian i mood kha han ti tha em em phawt mai teh.

6th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

6.5.2014 
*MISS MIZORAM 2014 FINAL RESULT
1-na: H. Lalchhanhimi, Armed Veng South, Aizawl
2-na: C.Vanlalmalsawmi, Luangmual, Aizawl
3-na: Lalruatfeli, Kulikawn, Aizawl
Pix Courtesy:  Jiksaw Photography

Miss Mizoram 2014 winner H.Lalchhanhimi, Armed veng, Aizawl

Miss Mizoram 2014 1st Runner up C.Vanlalmalsawmi, Luangmual, Aizawl

Miss Mizoram 2014 2nd Runner up Lalruatfeli Royte, Kulikawn, Aizawl

*MISS MIZORAM 2014 GRAND FINALE
Zanin dar 8 hian Miss Mizoram 2014 thlanna final zan hman a ni dawn ta. Miss Mizoram Grand Finale host tur hi Rini Hlondo a ni dawn a ni. In lam atanga en duh tan Zonet leh LPS ten live telecast in an tichhuak dawn a ni. Tu tak tling ang maw? 

  *WCC ZIAKTU LIAN MIZORAM LO KAL DAWN
June 12-15, 2015 chhung hian Archpriest Dr. Daniel Buda, General Secretary, World Council of Churches (WCC) chuan Mizoram a rawn tlawh dawn a, Mizoram Synod chu lo dawngsawngtu atan ruat a ni. (Synfocity)
 

*MISS MIZORAM 2014 BIKINI ROUND VIDEO
A hnuai a youtube link ah hian Miss Mizoram 2014 contestant te bikini dress nen an in lan lai video clip en theih e.
https://www.youtube.com/watch?v=LecuNLsiGfk&feature=youtu.be

*LADC MEMBER THLAN THAR TE
Vawiin Dt. 6.6.2014 hian Lai Autonomous District Council bial pahnih Bye-Election Dt. 4.6.2014 a vote thlak chu Lawngtlai a BNRGSK hall ah tluang taka chhiar zawh a ni a, Lawngtlai Bazar bial ah MNF Candidate Lalropuia Chinzah, Lawngtlai Bazar veng chu thlan tlin a ni a. Tuithumhnar bialah INC Candidate Pu Malsawmdawngliana, Tuithumhnar chu thlan tlin a ni thung.

Tukin zing dar 10:00 AM atang khan vote te hi chhiar tan a ni a, Lawngtlai Bazar bial chhiar hmasat niin an vote hmuh dan chu a hnuai a mi ang hi a ni.
Sl. No. Name of Candidate Party Affiliation Vote hmuh zat
1. C. Sangchhunga INC 495
2. Lalropuia Chinzah MNF 515
3. C. Zobuanga Independent 142

Lawngtlai Bazar bial chhiar zawh hian Tuithumhnar bial chhiar leh nghal a ni a, an vote hmuh dan chu a hnuai a mi ang hi a ni.
Sl. No. Name of Candidate Party Affiliation Vote hmuh zat
1. Malsawmdawngliana INC 1051
2. H. Sangkunga MNF 736

Vote chhiar hi chhun dar 12:00 khan zawh fel a ni a, Returning Officer Pu. J. Hmingthanmawia, District Election Officer ni bawk chuan thlan tlin te hnenah hian thlan tlin an nihna Certificate a hlan nghal a ni.
Source: Lawngtlai Future Group
 
*BREAKING NEWS: MIBO RUANG HMUH A NI
1.6.2014 (Sunday) tlailam dar 3:00 khan Rangvamual atangin a chin hriat lohva bo Pu Zothansanga Kum 67, Pachang (Hauruang) khua, Pu Malsawmkima, Lower Kanan, (Pu B. Zosangliana in luah tute) mikhual chu Rangvamual Ruatkima petrol pump thlenthlak hma kawng thlanglamah Dar 4:20 p.m vel khan a ruang hmuh a ni. 
Source: BigDaddy Hmahmatea IV via ZORAM KHAWVEL : CHANCHINTHAR Group

Missing person body found in Rangvamual at Aizawl outskirt

*LOK SABHA SPEAKER THAR HMEICHHIA THLAN A NI TA
Member of Parliament atana a Indore, Mahdya Pradesh atanga vawi 8 thlan tlintlin ni tawh Sumitra Mahajan (71) chu vawiin khan chuhtu awmlo in Lok Sabha 16-na Speaker atan thlan tlin a ni.Amah hi India ram hmeichhe MP nireiber niin BJP party ticket a thlan thlin a ni. Thiamna lamah M.A., LL.B a ni. Kum 1989 atang khan Indore bial atang hian a la tling ta char char a ni. India ram parliament Lok Sabha a hmeichhe speaker 2-na a ni. A pasal Jayant Mahajan nen fapa 2 annei a ni.
 
*ZOSAP MISSIONARY BORAL
Zosap Pi Hlimi (Gwen C Evans), kum 1958 leh 1959-a Synod Hospital leh PC Girls’ School, Aizawl-a lo thawk tawh chu April 11, 2014 Zirtawpni zing dar 8:30 khan London-a a chenna inah kum 93 mi niin a thi. (Synfocity)
 
*ATI DIRECTOR THAR
Tunhnaia IAS-a tling thar Dr. Lalrozama chu Administrative Training Institute (ATI) director hna chelh tura tih a ni. Dr. Lalrozama ATI director atana ruatna order hi June 4 khan tihchhuah a ni. (Vanglaini)
 
*Lengteng Wildlife Sanctuary-a thing zai rûk leh Environment & Forest department motor hâl thubuaia man Selam khaw mi 14-te chu nimin piah chawhnu khan bail-a chhuah an ni. Mi 14-te hi Champhai chief judicial magistrate, R Lalduhawmi court chuan nimin piah khan bail a phal a, anmahni buaipuitute'n an bail nghal a ni. (Vanglaini)
 
*WORLD CUP 2014 TICKET MAN
FIFA World Cup 2014 Brazil-a khelh tur ticket man i hre duh em? Brazil ram pawn kotlang A team naran te tan ticket hi category 4-ah then a ni a, category 4na hi pianphung a rualbanlo te tan hauh a nia ticket man erawh catgory 3-na nen a inang a siam a ni. Chuan Opening match ticket man chu: $495 (Rs.29447.25), $330 (Rs.19550.92), $220 (Rs.13033.95) te anni. Final match atan a ticket man chu: $990 (Rs.58652.76), $660 (39101.84), $440 (Rs.26067.90).
 
GOOD MORNING MIZORAM
LAMTLUANG ZINGKAR CHANCHINTHAR LAWRKHAWM
*Mi harsa zualte hnena tanpuina turin Joint YMA North Vanlaiphai chuan Rs. 2,000/- (cheng sanghnih ) leh Village Council North Vanlaiphai chuan Rs. 3,000/- (Cheng sangthum) Chief Minister Relief Fund ah an chhung lut.(DIPR)

*Tripura Transit Camp atanga Reang (Bru) laklet na tura ruahmanna kal mekah nimin khan Home Minister Pu R.Lalzirliana hovin a pisaah meeting pawimawh tak nei leh a ni.

Reang (Bru) chhungkua engemaw zat hruai letna tur thawh rukna ah hian Reang (Bru)chhungkua te duhthlanna (self-repatriation) ngeia laklet tur an ni dawn a. Chhungkua 492 velin lo let an duhthu hi hriat a ni a, mahse chhungkaw zat hi la danglam thei a nih avangin, tun dinhmunah chuan chiang taka lo let tur zat tur hriat theih a nih loh thu Mamit DC, K. Lalthawmmawia chuan a sawi. Reang (Bru) ho thiarna tur chungchangah Tripura sawrkar nena inbiakna neih tum anih thu pawh sawilan a ni bawk.

Vawiin meeting ah hian Home Department , Mamit District hotute bakah tlawmngai pawl hrang hrang CYMA, MUP, MZP, MSU leh MHIP te an tel a. Hmalak dan kal mek te leh hmalak zel dan tur te in hrilhriat a ni.(DIPR)

*Nimin khan Cooperative Societies Secretary leh Registrar Pu Jack L.Darkim IRTS, hovin Mizoram Pig Producers’ Cooperative Federation (PIGFED) chuan General Assembly vawi 21-na, Chanmary YMA Hall-ah an hmang.

*Mizo lemziak thiam Tanpuia leh Saitluanga Sailo buatsaih Duet Painting Exhibition 2014 Aizawl Art Gallery chu nimin khan hawn a ni a, June, ni 12 thleng zing dar 10 atanga tlai dar 7 thleng Exhibition hi en theih a ni.

*Nimin khan United Nations Organisation hnuaia Food and Agriculture Organisation in June ni 1 hi kum 2001 atang khan ‘World Milk Day’ ah alo puan tawh angin Mizoram a a vawi 1-na tana June ni 1 kha chawlhni a nih avangin nimin khan Vanapa Hall ah hman a ni. Inkhawmah hian Mizoram hmun hrang hrang atangin bawng vulhtu thahnem tak an tel a, chawhnu session ah paper presentation leh sawihona neih chhunzawm a ni.

*Mizoram sorkarin zirna tihhmasawnna tura a ruahmanna ‘Educational Campaign’ bultanna chu nimin khan Lunglei Saikuti Hall-ah neih a ni a, Education Parliamentary Secretary Pu Joseph Lalhimpuia chuan he Campaign Kick-off hi a hmanpui a ni. State pum tuam tur Educational Campaign thupuiah chuan ‘Education For All-Round Development’ tih vuah a ni. (DIPR)

*Vawiin hian India parliament rorelna hniam zawk Lok Sabha 16-na atan a Speaker tur thlanna neih a ni dawn a, tun thleng hian rorellai BJP candidate Sumitra Mahajan khing turin tumah in hming an pek loh avangin chuhtu dang awm lo a thlan tlin anih ngei rin a ni. Amah hi kan rawn tarlan tawh angin Indore, Madhya Pradesh atanga vawi 8 lai MP atan a thlan tlin a ni tawh a ni.

*Andhra Pradesh Governor ESL Narasimhan chuan Telegu Desam Party hotupa Chandrababu Naidu chu sorkarna siam turin a sawm. Naidu hian CM atana lakluh inkhawm hi Vijayawada leh Guntur inkar ram Nagarjuna Nagar ah June ni 8 zan dar 7:27 ah neih a tum a ni. Kan rawn post tawh thin angin Andhra Pradesh khawpui thin Hyderabad chu Telangana huam chhung a nih tak avangin CM thar tur hian Andhra huam chhung ngei ah rinawmna thu thiam lak a tum ta zawk a ni. Hyderabad khawpui chu Telangana leh Andhra Pradesh in kum 10 chhung an intawm anga, a hnuah Telangana khawpui a ni chhunzawm tawh ang a, Andhra lam hian khawpui tar thar an din leh dawn a ni.

*Prime Minister Narendra Modi chuan US President Barack Obama an kumin September thla chawlhkar tawp ber a inhmu tur a sawmna chu a pawm.

*Tamil Nadu Chief Minister Jayalalitha chuan PM hnenah lehkhathawnin Afghanistan ram a Kristian sakhaw puithiam hel pawl ten an rukbo Father Alexis Prem Kumar chungchang ah a rang thei ang ber a Afghanistan sorkar sawipui tur leh chhuah a nih theih nan hma la turin a ngen.

*Airport Council International(ACI) chuan Indira Gandhi International Airport, New Delhi chu khawvel a airport thaber dawttu ah a puang a, Chhatrapati Shivaji International Airport, Mumbai pawh 5-na ah an puang a ni.

*Prime Minister Narendra Modi an PM a nih hnu a rampawn a tlawh hmasak ber tur atan Bhutan a thlang ni a sawi a ni, a tunthla tawp hian Bhutan khawpui Thimpu a tlawh dawn a ni.

*Maria Sharapova chuan French open semi final ah Eugenie Bouchard hneh in final a lut. In hneh dan chu 4-6, 7-5, 6-2 a ni. Hmeichhe semi final dang ah Romanian hmeichhia te zinga French Open final thleng hmasaber ni turin Simona Halep chuan a khingpui Andrea Petkovic chu 6-2, 7-6, (7/4) in a hneh bawk.

*Zanin tlai dar 5:30 hian French Open Mipa semi final khelh a ni dawn a, intum tur te chu: N.Djokovic vs E.Gulbis leh Rafael Nadal vs Andy Murray te anni.

*Google Map chuan World Cup 2014 khelhna tur stadium 12 te entheihna turin online in street view an dah thar.

*HMANLAI VAWIIN: Kum 1674 vawiin angah khan Maratha lal Shivaji chuan Raigad (Maharashtra) ah Hindu lal atan ropui takin lakluh a ni. Khatih lai khan India ram chu Muslim lal ten an awp a, Hindu thil ti thei deuh te chu loneitu hotu zamindar ah te bak an ruat ngai lo a,  Shivaji hian chu chu duh tawk lo in a ma thu in puithiam te a rawn a Hindu danin lal ah a inlakluh tir ta a ni. Kum 1947 vawiin angah khan  Basketball Association of America chu New York khawpui an din tan a ni.

*MIZORAM HRECHIANG ANG: 30.4.1991  khan Mizoram Public Service Commission Chairman hmasaber turin SR Vala IAS (Orissa Cadre) chu Mizoram sorkar in a ruatna order a tichhuak a, 1.5.1991 khan a hnathar hi a zawm a ni. Chuti chuan Mizoram in state a neih atanga kum 4-na ah State Public Service Commission a nei ve t a ni. 12.7.1991 khan MPSC member hmasaber turin M.Lalmanzuala IAS chu sorkarin a ruat a, a ni hian a hna thar hi 15.7.1991 khan a zawm a ni.

*THURIL: "'Ka hmangaih che' tih sawi tur hian mi pakhat in 'Ka' tih hi a sawi ngam phawt a ngai. - Ayn Rand
--------------
Sorkar leh company a hnathawk te tan chuan a tlangpui thu in Zirtawpni hi chawlhkar 1 chhung a hnathawh tawp berna hun a ni a, khawthlang ram leh phai lamah chuan tul leh hah tak a kartluan a hnah an thawh chu zirtawpni tlai ah an chawlh hun a lo thlen dawn avangin "TGIF" an ti thin a chu chu "THank God It's Friday" tihna a ni a Mizo tawng chuan "Zirtawpni a lo thleng leh ta Lalpa ka lawm e" tihna a ni mai awm e. I thiante pawn an timeline ah TGIF te chu an post ve fo thin kha, hrethiam tawh mai em? Chuan, comment lam hi chu in chan a nih kha, rawn ti leh hram la aw. Ni hman nuam le.

*SHILLONG KAWNG BANDH
East Jaintia Hills, Narpuh Elaka hnuaia khaw sawm pasarih (17) tualchhung thuneituten nimin piah zing dar 6:00 atang khan darkar 72 chhung awh tur Bandh National Highway 44 ah an huaihawt a. Hemi avang hian Deputy Resident Commissioner Shillong chuan Shillong lama zin veivak tur te fimkhur turin a chah. (DIPR)

5th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

5.6.2014 
*CONGRESS IN LOK SABHA DEPUTY LEADER TUR RUAT
Congress party chuan Lok Sabha a an deputy leader atan Ludhiana bial MP Captain Amrinder Singh an ruat. Jyotiraditya Scindia chu Chief Whip of Congress ah ruat niin Venugopal leh Dipender Singh Hooda te pawh hip of Congress ah ruat bawk.
 
*FOOTBALLER DIDIKA'N NUPUI A NEI TA
Vawiin chawhnu dar 2 khan BCM Biak In, Electric Veng, Lunglei ah Mizo Footballer lar East Bengal FC midfielder leh India International Player Lalrindika Ralte (Didika) chuan Vanlalruati Renthlei, Luangmual, Aizawl chu damchhung atan "Tiam Tlat E' a tih pui ta. Vawiin inneih hi Bialtu MLA Pu Joseph Lalhimpuia bakah Mizo Footballer lar tak tak te bakah chhung leh khat, thenrual tha leh thian ten an hman pui a, mipui an tam hle. Inneih zawhah hian Cake dangdai tak, Football cake, Zomawii Hrahsel (Tepuia Chhang) siam chu an zai nghal bawk a ni.!
Source: Gilbert Renthlei via Lunglei Chanchinthar Group
#Lalrindika_ralte_wedding

India national football player and East Bengal FC Midfielder Lalrindika Ralte weds  Vanlalruati Renthlei in Lunglei Mizoram

*MELRIAT DAIAH MARUTI 800 ACCIDENT, A HMUNAH PAKHAT THI
Vawiin tlai Dar 2 vel bawr khan Maruti 800 chu Melriat daiah chesualin a hmunah Jacob Zoengthanga ( Jacob Ngente), kum 24 s/o Ng Rosangliana(L) Venglai, Lunglei chu a thi nghal, Motor ah hian mi 4 chuangin mi 3 chuang ve te hi an na lutuk lo niin thu kan dawng.

Jacob Zoenthanga hi Bangalore-a a zirlai zirzawm tura chhuk tur a ni a, a ruang hi Lunglei lamah phurh haw mek a ni.

Source: Gilbert Renthlei via Lunglei Chanchinthar group
 
*MISS MIZORAM 2014 PEOPLE'S CHOICE SMS HMANGIN VOTE THEIH
Vote dan tur : missmz space contestant no. chhuta, phone no. 9212148888 ah sms a thon mai tur a ni. Entirnan: contestant no. 14 i vote duh chuan: missmz 14 tih type la 09212148888 ah thawn mai tur a ni.

Contestant te number chu:
1 H. Lalchhanhimi Armed Veng, Aizawl
3 C. Vanlalmalsawmi Luangmual, Aizawl
4 Lalchhanchhuahi Khiangte Durtlang, Dawr kawn
5 Biti Soren Kulikawn, Aizawl
6 Lalruatfeli Royte Kulikawn, Aizawl
7 Christina Lalhmingthangi Electric Veng, Aizawl
8 Vanlalhruaii Hlondo Kolasib Venglai
9 Vansangkimi Mualpui, Chhingchhip, Serchhip Dist
10 Ngurthanpuii Sailo Zarkawt, Aizawl
11 Ramthanmawii Champhai/North Khawbung
13 Lalhriatpuii Zemabawk, Aizawl
14 Naom VL Hmangaihzuali Sialsuk, Aizawl Dist.
16 Zonunmawii Champhai
18 Laltanpuii Champhai Vengsang
19 Zodinhlui Pachuau Edenthar, Aizawl
21 Lalruatfeli Kulikawn, Aizawl

Couretsy: MISS Mizoram 2014 page

Miss Mizoram 2014 charinity show@Millennium centre, Aizawl

*MISS MIZORAM 2014 BIKINI ROUND
#missmizoram #missmizoram2014 

Miss Mizoram 2014 bikini round

 
*OIL PALM CHINNA KHUAAH AGRICULTURE DEPARTMENT HOTUTEN ZIRTIRNA BEIHPUI AN THLAK
Agriculture Department (Crop Husbandry) Director, Dr.C.Lalzarliana leh Officer pawimawh ten Mamit District huam chhunga Oil Palm chinna hmunpui khaw thenkhat tlawhin Oil Palm enkawl dan an zirtir.

Saithah leh Phuldungsei khuaah te Agriculture hotute kalin training an buatsaih sak a, Salem Boarding chhehvela Zawltezau ram ah Oil Palm a huhova chinna hmun Agriculture hotute hian an fangkual nghal a ni. He Zauvah hian chhungkaw 38 in ram tin 112 ( 45 Ha.) hmunah Oil Palm a huhovin an ching a, heng hmunte hi Agriculture hotuten fangchhuakin, an thlawhhma ah ngei an zirtir a ni. He Zauah hian Oil Palm 6435 phun a ni a, tha taka enkawl an ni.

Agriculture Director leh a hoten Damparengpui- a Oil Palm an chinna hmunpui, Sesihzau, tin 300 zet a zau pawh an tlawh zui nghal a, he khua hi Mizoram chhunga khawtlang anga Oil Palm hmun siam hmasak berna a ni. Ram tin 300 hmun a zauah Oil Palm kung 9850 an phun a, a neitu bik awm lovin khawtlangin an enkawl a. Agriculture Officer te hian Oil Palm enkawl dan zirtirna an pe zui nghal a ni.

Pu L.V.Zomuana, District Agriculture Officer, Mamit, Pu R.K.Nithanga, Dy.Director (Oil Palm) leh Pu Tlangtimawia Zote te’n Director hi an tawiawm a ni. (DIPR)

 
*Tukin zing lam khan East Garo Hills bawr velah GNLA helpawl te leh Meghalaya police te an inkap. Thi leh hliam report a awm lo a ni.
Source: North East Today.
Courtesy: Maena Pautu
 
*NATIONAL CHAMPIONSHIP-AH MIZORAM KARATE TEAM IN MEDAL 5 AN RAWN HAWN
All Mizoram Karate Association (AMKA), General Headquarters Mizoram State Sports Council (MSSC) tirh chhuah Mizoram Karate Team chuan date 30.5.2014 - 1.6.2014 chhunga Karate Association of India (KAI) Sub-Junior, Cadet, Junior & Under 21 years National Karate Championship New Delhi-a neih chu khelin, Under 21 years category-ah Bronze Medal 4 leh Junior category-ah Bronze Medal 1 lain Medal 5 an hlawh chhuak.

He National Karate Championship-ah hian India ram State leh UT hrang hrang bakah Force/Security Team hrang hrang, a vaiin Team 40 vel telin player 1000 zetin an khel a; Mizoram Karate Team pawh player 17 leh Team Manager 1 leh Team Coach 1 an tel a. Mizoram Karate Team hi Team Manager Pu Lalnunhluna, Mission Veng, Aizawl leh Team Coach Sensei F.C. Sahku @Sasa te hovin an feh chhuak a a ni.

Medal latute chu hengte hi an ni:-

Lalmuanawmi, Sialsuk Under 21 yrs- below 53kgs Bronze Medal

Zonunmawii, Lianpui Under 21 yrs- above 60 kgs Bronze Medal

Lallawmzuala, Lawngtlai Under 21 yrs- below 68kgs Bronze Medal

Lalsangliana, Ramhlun Venglai Under 21yrs- below 78kgs Bronze Medal

Zorinkima, Tlangnuam, Aizawl Junior- below 76kgs Bronze Medal
(DIPR)

 
*OIL PALM CHINNA KHUAAH AGRICULTURE DEPARTMENT HOTUTEN ZIRTIRNA BEIHPUI AN THLAK
Agriculture Department (Crop Husbandry) Director, Dr.C.Lalzarliana leh Officer pawimawh ten Mamit District huam chhunga Oil Palm chinna hmunpui khaw thenkhat tlawhin Oil Palm enkawl dan an zirtir.

Saithah leh Phuldungsei khuaah te Agriculture hotute kalin training an buatsaih sak a, Salem Boarding chhehvela Zawltezau ram ah Oil Palm a huhova chinna hmun Agriculture hotute hian an fangkual nghal a ni. He Zauvah hian chhungkaw 38 in ram tin 112 ( 45 Ha.) hmunah Oil Palm a huhovin an ching a, heng hmunte hi Agriculture hotuten fangchhuakin, an thlawhhma ah ngei an zirtir a ni. He Zauah hian Oil Palm 6435 phun a ni a, tha taka enkawl an ni.

Agriculture Director leh a hoten Damparengpui- a Oil Palm an chinna hmunpui, Sesihzau, tin 300 zet a zau pawh an tlawh zui nghal a, he khua hi Mizoram chhunga khawtlang anga Oil Palm hmun siam hmasak berna a ni. Ram tin 300 hmun a zauah Oil Palm kung 9850 an phun a, a neitu bik awm lovin khawtlangin an enkawl a. Agriculture Officer te hian Oil Palm enkawl dan zirtirna an pe zui nghal a ni.

Pu L.V.Zomuana, District Agriculture Officer, Mamit, Pu R.K.Nithanga, Dy.Director (Oil Palm) leh Pu Tlangtimawia Zote te’n Director hi an tawiawm a ni. (DIPR)
 
*LARSAP IN MIZORAM STATE CANCER INSTITUTE A TLAWH
Mizoram Governor Pu Vakkom Purushothaman chuan nimin khan Zemabawk-a Mizoram State Cancer Institute a tlawh. Governor hi Pu Manoj Kumar, IAS, Secretary to Governor, Dr. Lalsiampara, Director, Mizoram State Cancer Institute leh helai hmuna Institute-a doctor-ten an tawiawm a. Institute enkawltu doctor leh nurse-te leh thawktu dante titi puiin Institute enkawl chungchanga an harsatna leh mamawh hrang hrangte a ngaihthlak sak a. Governor hian Institute-a awm damlote hi Blanket 1 theuh a pe.

Mizoram State Cancer Institute hi 2012 khan tunhmaa TB Hospital awmna thinah khan din a ni a. Tunah hian khum 40 awmin damlo mi 26 an awm mek a, Doctor 9 leh Nurse 18 – in helai hmun hi an enkawl a ni. He Institute bakah hian a bulhnaiah Cancer Day Care Centre khum 15 awmna a awm bawk a ni. (DIPR)
 
*MIZORAM SAWRKAR HNUAIA VIP LIGHT CHHI THEI TE

Mizoram Sawrkar chuan sawrkar motor-a VIP Light chhi thei a hnuai ami ang hian a siam thar :-

Red Light with Flasher Mizoram chhungah : 1) Governor ; 2) Chief Minister ; 3) Judges of High Court ; 4)Speaker, State Legislative Assembly ; 5) Cabinet Ministers ; 6) Leader of Opposition in Legislative Assembly ; 7) Deputy Chief Whip ; 8) Vice Chairman (SPB) ; 9) Deputy Speaker of State Legislative Assembly ; 10) Minister of State ; 11) Parliamentary Secretaries ; 12) Chief Secretary, (Govt. of Mizoram) ; 13) Director General of Police ; 14) Advocate General ; 15) State Election Commissioner ; 16) Chairman, Aizawl Municipal Council (AMC) ; 17) Chairman Mizoram Public Service Commission (MPSC) ; 18) State Chief Information Commissioner.

Blue Light with Flasher Mizoram chhungah : 1) Vice Chancellor of University ; 2) Principal Secretaries/Commissioner/Secretaries of Govt. of Mizoram.

Blue Light with Flasher on Jurisdiction ah : 1) Deputy Commissioner ; 2) Chairman Autonomous District Council ; 3) District & Session Judges ; 4) Police Officers SP Level atanga Addl. D.G.

Multi Colour Light, blue, white etc. but not red leh Siren : 1) Ambulance ; 2) Police Escorts ; 3) Patrol Cars.

A chunga tarlan te bakah khian Sawrkar in an anpui a a dahte pawhin an rank puite chhit ang VIP Light chhit phal a ni a, VIP te an chuan loh chuan light hi a khuhna dumin khuh tur a ni, official duty ah chauh chhit tur.

VIP light chhi theite hian Sawrkar motor an kawl laiah chauh chhit tur, an private motor ah dah phal a ni lo.

VIP light chhit tur bituk ang nilo chhi te chu dan angin hrem theih an ni. (DIPR)

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM
*Nimin khan Lai Autonomous District Council huam chhunga MDC Seat ruak pathum hnawh khahna tura Bye-Election vote thlak chu tluang taka neih a ni a, II-Borapansury II bial ah erawh chuan tlai lam dar 4:00 Pm thleng khan vote tla a la awm lo.

*Mizoram Youth Commission leh Labour Employment & Industrial Training Department buatsaih, ni hnih awh tur, Mizoram Skill Fest 2014 chu nimin khan Assembly House Annexe Building-ah neih tan a ni a vawiin tlai ah khar a ni ang. Vocational Training Providers (VTP) hi ram chhung hmun hrang hrang atangin 22 an lokal a ni.

*Nimin khan Lunglei DC Office Chamber-ah Lunglei khawpui chhunga ui leh ran dangte khuahkhirh chungchang meeting neih a ni a; sorkar Department, Village Council leh NGO hrang hrang aiawhte an tel. Ui leh ran dangte nasa leh zuala khuahkhirh chu a tul thu leh veng tin VC te chu thuneihna pek an nih angin khuahkhirh dan tur chu an vengchhung theuhah kengkawh mai se tih an rel. (DIPR)

*Tun Inrinni lo awm tur, June ni 7, chawhnu dar 1:05-dar 2:00 inkar Telephone a zawhna leh chhanna AIR Aizawl a Live Phone In Programme ah chuan “Tunlai chanchin inhrilhhriatna kawnga fimkhur tulna (pawimawhna)” chungchang a hriat duh nei te tan a zawh theih dawn a. Mipui zawhna chu - 1) Vanlalfaka Ralte, Addl. SP, CID (Crime) ; 2) Lalthlamuana, Chief Informatics Officer, ICT ; 3) Lalrempuia Sailo, Deputy Engineer, NIELIT leh 4) David H. Lalthangliana, OSD-cum-Under Secretary, Home Department ten an rawn chhang ang a. A zawt duh tan Telephone No. 0389/2322515 ah emaw 2323148 ah emaw a biak pawh theih ang. (DIPR)

*Union minister for Road transport and highways  Nitin Gadkari chuan Gopinath Munde boral san tak ministry 3 -rural development, panchayati raj leh drinking water and sanitation te chu a minister thar ruat a nih leh hma zawng a hmui hrih dawn a ni.

*Indore, Madhya Pradesh atanga vawi 8 lai MP atan a thlantlin lo ni tawh Sumitra Mahajan (71) chu Lok Sabha Speaker atan thehchhuah a nih rin a ni. He nu hi 2002-2004 khan Atal Bihari Vajpayee sorkar ah Union Minister of State a lo ni tawh a ni. Kan rawn post tawh thin angin Zitawpni ah Lok Sabha Speaker thar hi thlan a ni dawn a ni.

*Nimin khan Delhi CM hlui leh AAP hotupa leh a thuihruai mi 2 te chu Delhi Metropolitan magistrate Muneesh Garg chuan bail in a chhuah tir ta.

*Vawiin hian Lok Sabha 16-na atan a thlantlin MP ten rinawmna thu tiam an la tan dawn.

*Tunhnai lawk a hmeichhe naupang thahnem tak rubo tu Nigeria ram a Muslim firfiak pawl Boko Haram te chuan nimin khan Nigeria hmarlam Borno state ah mi 12 an kaphlum. An mi kahhlum na hmun 1 phei chu Biak In compound chhung ah a ni.

*India rama khualzin phur thlawhna service thar AirAsia chuan kar leh atangin Bangalore leh Goa inkar thlawh tan an tum a, minute 10 chhungin an thlawh hmasak ber atana zin tum ten ticket an leizo nghal vek.

*Madras High court chuan Tamil Nadu a engemaw hunbik a bawng insual tir (Jallikattu) an chin thin chu khapna thupek a siam hnuin Madurai khua a Arulmigu Muniyandi Temple festival a arpa insualtir an chin thin pawh khap an duh thu state sorkar an hriattir.

*Thawhtanni zan ah khan Pune ah software professional Muslim tlangval kum 28 mi Shaikh Mohasin Sadiq chu Facebook ah Shivaji leh Shiv Sena hotu boralta Bal Thackerey te thlalak mawilo tak a post avangin Hindu sakhaw zuitu mithenkhat lungawilo ten hockey tiangkawm in an vawhlum. He tualthah na a inhnamhnawih ni a rinhlelh mi 13 te police in an man tawh a ni.


*Syria President thar atan Bashar Assad chu thlan nawn leh a ni. Asad hian a khingpui 2 te lakah vote 10,319,723 votes ( 88.7%) a hmu a ni.

*US thuruk puangdarh tu Edward Snowden chuan Russia ram a awmphalna pawhsei a dil.

*KUMTE CHU NUMBER MAI MAI ALAWM: China ram a Xinjiang Autonomous Region a tarchawmna in (old age home) pakhat ah Pitar kum 113 mi Azatihan Sawuti chuan amah aia kum 43 a naupang Aimti Ahemti kum 70 mi chu pasal atan a nei. He mi te nupa hi tarchawmna in atanga inchhar niin thla 6 chhung an inngaizawng hman a ni.

*HMANLAI VAWIIN: Kum 1851 vawiin angah khan bawih tihduhna thawnthu lar tak Mizo ten 'Pu Tawma In" ti a kan hriat lar a sap tawng a "Uncle Tom's Cabin" tih chu a ziaktu Harriet Beecher Stow chuan a vawi 1-na atan The National Era chanchinbu ah a chhuah tan. Kum 1967 vawiin angah khan 'Niruk indo' (Six day War) chu Israel leh a thenawm ram Egypt, Syria leh Jordan ten an tan. Kum 1723 vawiin angah khan  Classical economics lar Adam Smith chu Kirkcaldy, Fife, Scotland ah a lo piang.

*MIZORAM HRECHIANG ANG: Mizoram a Vocational subject a degree/diploma laktheihna awm hmasaber Mizoram Polytechnic chu kum 1981 khan Hrangchalkawn, Lunglei ah sorkar in a din. Department 4 a awm a chungte chu:
Electrical Engineering, Civil Engineering, Mechanical Engineering, Computer Science & Engineering te anni. Kan hriat theih dan awlsam ber tur chu JE zirna ti ila kan sawi sual tamlo ang. Mizoram Polytechnic Lunglei hian zirna thatlam tehna ah ISO 9001:2008 a nei mek a ni.

*THURIL: "Hlawhtling tur chuan kan ti thei a ni tih rin hmasak phawt angai" - Nikos Kazantzakis.
----------
In comment hlu tak tak te hi kan lo chhiar chhuak dap (CCD) thin a nia, comment leh like hi inthlahrung reng reng suh u, in fakna kher lo pawh induhkhawp lona leh sawisel ngai lai in hriatte pawh comment ah rawn sawi thin rawh u.

Chuan, kan page a thu kan post te hi 'share' chhawn kan phal a, tin share option hmang lo a angial a ngan a lo copy thin te tan "Thulakna: Lamtluang" tih tarlang tel thin turin kan ngen a che u. Vawiin hun hman nuam vek ule.
 

4th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
4.6.2014 
*MODI LEH OBAMA INHMU DAWN
India Prime Minister Narendra Modi leh US President Barack Obama te chu kumin September thla chawlhkar tawp ah Washington ah an in be dawn.
 
*RS.20 A RU LAI HMEICHHE NAUPANG IN A LO HMUH VANGIN A THAT
Nimin khan Chembur, Mumbai ah Prokash Hajra (kum 30) chuan an thenawm a awm hmeichhe naupang kum 7 mi Beauty Sarkar in a pawisa ru lai a lo hmuh avangin a that. Tualthattu Prokash hian an thenawm in Beauty Sarkar te chenna ah hian a mobile phone a charge a, chutih lai chuan inneitupa pawisa dahna ipte atangin Rs.20 a la ru lai chu Beauty Sarkar hian a lo hmu si a, a sawichhuah a hlauh avangin a man lawk a tuiah thawtheilo in a chiah hlum ta a ni awm e. Nimin chawhnu dar 2:30 khan hmeichhe naupang nu hnathawk rawn haw chuan a fanu thi lo a ruang a awm chu, damdawiin a panpui nghal a mahse doctor a thi tawh tih an lo hrilh a ni. Tualthattu hi police ten manin a thah ngei a ni tih a inpuang tawh a ni.
 
*PAWNGSUAL DUH LOH VANGIN A LU AH KAP DARH
Meghalaya a South Garo Hills a Raja Rongat khua ah nu pakhat chu a pasal leh a fate nen nizan thimhlim a inah an awm laiin helpawl Garo National Liberation Army (GNLA) pawl a mi 4/5 ten hruaichhuak in pawngsual an tum a, a duh loh avangin an a lu ah an kaphlum. GNLA helpawl te hian he nu pasal leh a fate 5 hi inchhung ah kalhkhum in nu ber hi an hneh lak a ni. Police te sawi danin a lu a rifle a an kah avang hian hmun hnih ah a darh a niin an sawi. He thil thleng hi Garo Hills MP PA Sangma chuan a dem thu a sawi.
 
*MIZORAM DGP THAR LO THLENG
Mizoram DGP thar tur, Dharmendra Kumar, IPS chuan nimin khan a hna thar zawm turin Aizawl a lo thleng. Dharmendra Kumar hi 1984 batch IPS niin, AGMUT cadre a ni a, Delhi Police Special Commissioner thin a ni. Nimina Mizoram a lo thlenin Mizoram police hotute'n Lengpui Airport-ah an lo hmuak a ni. (Vanglaini)
 
*BRITISH LAWNG KHALHTU IN MH370 HMU
8 March 2014 a Malaysia thlawhtheihna  MH370 bo zan khan British hmeichhe lawngkhalhtu Katherine Tee (41) chuan Indian Ocean ah lawng atang thlawhtheihna kang chung a thlawk lai a hmuh thu a sawi.  A sawi dan in a thlawhtheihna hmuh chu tuifinriat hmar lam atang a chhim lam panin a thlawk a "Thlawhtheihna sei chi serthlumrawng lar tak, a mei lam a meikhu chhuak awm" a ni a ti.

Katherine Tee hian thil hmuh hi MH370 a ni chiah em tih finfiahna tak nei bik lo mahse he thlawhtheihna bo zawng mek tu Joint Agency Coordination Centre (JACC)te hnen ah a thil hmuh dan leh GPS data a neih ang ang te zirchian an duh chuan a tanpui theih tur thu a hrilh tawh a ni. Katherine Tee leh a pasal Marc Horn te hian lawngin Kochi, India atangin Phuke an pan a, chutih lai chuan thlawhtheihna kang thlawk lai hi hmu in a insawi a ni.
#MH370

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM
*Nimin khan Salvation Army India Eastern Territory-a Chief Secretary thar tur Lt. Colonel Davidson Varghese leh a nupui, Lt. Colonel Miriama Varghese te chu Territorial Headquarters chuan Territorial Head quarters Chapel ah an lawm lut a,inkhawm  hi Territorial Commander, Comissioner Lalngaihawmi’n a kaihruai a ni.

*Nimin zing a Delhi a car accident a boral Union Rural Development Minister Gopinath Munde ruang chu vawiin tlai hian an khua Parli, Beed District, Maharashtra ah vui a ni ang.

*Vawiin hian India Parliament Lok Sabha vawi 16-na chu neih tan a ni dawn ta a, Protem Speaker (Speaker lailawk) atan congress pachal Kamal Nath chu rinawmna thutiam tir a lakluh a ni ang. Union Minister Gopinath Munde boral ta sunna hun an neih hnua ah house an tin ang a, naktuk leh zirtawpni ah MP te lakluh anni ang a, zirtawpni hian Lok Sabha speaker tur thlanna neih a ni bawk ang. Vawiin hian MP thar te lakluh annih dawn hrih tak loh avang hian Protem speaker Kamal Nath chiah hi Lok Sabha member a chhiar theih a ni hrih dawn a ni.

*Nimin khan Pakistan khawthlang ram Parachinar ah truck in bomb a chil puak a, mi 7 an boral a, mi 3 in hliam na tak an tuar.

*Egypt (Aigupta) ram President thar atan  Army chief Field Marshal hlui Abdel Fattah el-Sissi chu thlan tlin a ni.

*Nimin khan Syria ram mipui ten an ram President thar tur thlanna an nei.

*Tunlai hi Delhi University in admission an hawn lai a ni a, admission buaipui in zirlai te an pungkhawm nasa thei hle. Delhi Mizo Zirlai Pawl te pawh hin Mizo zirlai te tanpui nan Help Desk an siam a ni.

*French Open tennis khelh mek ah India tennis khel thiam Sania Mirza leh a tanpui Sara Black te chuan Women's Double quarter final ah  Su-Wei Hsieh leh Shuai Peng te hneh loh in an tla.

*Nimin khan IIT Kanpur chuan khawlthluak nei chakber chi Supercomputer thar an Rs.Vaibelchhe 48 seng a an din chu an hawng ta. IIT Kanpur hian Supercomputer 2 an nei ta a ni.

*Union Minister Gopinath Munde chuanna car su tu Tata Indica car (DL 7C E5459) khalhtu Gurvinder Singh (32) chu court ah hruai a nih hnu in bail in chhuah tir a ni.

*Tennis World No.2 Novak Djokovic chuan French Open 2014 semi final a lut ta.

*England football captain hlui David Beckham chuan nikum may thla atanga football a chawlhsan hnu in hunrei tak a lo khelh thin game a chawlhsan ta chu insum a har thin thu BBC in an kawmna ah a sawi chhuak. Basketball game a en thin thu leh infiammi ten theih tawp an chhuah lai hmuh chuan inkhelh ve leh mai a chak thin thu leh "ka inkhel ve mai dawn em ni aw? "Ka kir leh mai dawn?" "Ka chawl tawh ka tih na in inkhelh leh zawk mai tur em ni aw?" tih te a rilru ah a awm nasat thin thu a sawi.

*BSNL chuan an customer te tan internet tello a facebook an hman theih dan tur ruahmanna thar an siam. Unstructured Supplementary Service Data (USSD) hmangin BSNL customer te chuan internet/date connectivity tello in Facebook an access(hawng) thei tawh ang a, post leh status an en theih bak ah, friend requet chhan te, birthday reminder en leh message thawn te pawh a theih dawn a ni. He ruahmanna hmang te chu BSNL plan Rs.4-Rs.20 inkar charge thin anni thung dawn a ni. BSNL hian U2opia Mobile nen ruahmanna hi an siam a, East leh South zone ah kalpui phawt a nih hnuah West leh North zone ah te chhunzawm zel a ni ang.

*Football ngaina tu ten an nghahhlelh em em FIFA World Cup 2014 khelh nan ni 8 chiah angai ta.

*HMANLAI VAWIIN: Kum 1647 vawiin ang ah khan Kumpinu (British) sipai ten an lal King Charles I chu man in Newmarket tan in ah an khung. Kum 1878 vawiin angah khan Turkey chuan Kupra (Cyprus) thliakar chu Britain hnen ah a hlan.

*MIZORAM HRECHIANG ANG: Mizoram a ran doctor zirna awm chhun Selesih a College of Veterinary sciences & Animal Husbandry hi 1997 khan  B.V.Sc. & A.H batch hmasaber an lut tan a ni. He college ah hian UG, PG leh Ph.D te a zir theih a Central Agricultural University, Manipur enkawlna hnuai a awm a ni.

*THURIL: "Hmatiam hlen thar tur emaw suangtuahna thar nei tawh lo tur khawp a kum upa a awm theih loh." - CS Lewis
--------
Facebook a Lamtluang page pawh tunah hian like tur nangmah tiamin mi 9619 kan awm a, Sing kan tlin lohna chu mi 381 chiah a ni ta, tang tlang ila, mahni thian te theuh like tir ang aw.  I rawn comment ve loh chuan a nuam lo a nia, tukchhuak nuam vek ule.