20th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

20.5.2014 
*KAWRTETHAWVENG WELFARE IN KHAW MI HMINGTHA TE CHAWIMAWI

Vawiin chawhnu khan I&PR auditorium ah Kawrtethawveng Welfare Committee(KWCA), Aizawl chuan an khawchhuak chawimawi phu ni a an hriat te chawimawina hun an hmanga. Infiamna khawvela hmingtha National level a medal la phak chin, University a Gold Medalist-te, MBBS, MS leh Ph.D hlawhtling taka sual chhuak tute bakah ramhruaitute he chawimawina dawngtu zingah hian an tel a. Pu Lalrinmawia Ralte, Minister of State pawhin chawimawina a dawn ve avangin he hunah hian a tel ve a ni.
KWCA felicitation programme hi an pawl Chairman Pu Hmingchungnunga in a kaihruai a. KWCA in chawimawina a lo pek tawh te zingah hian infiammi-7, university gold medalist-3, MBBS & MD-2, Ph.D-2, Group A Officer-15, MES-3, MHS-1, MF&AS-2,MSS-1, MIS-1, MPS-2,MCS-2,IAS-1,MLA-1, Minister-2, Advocate-1, AMC councillor-1,MPS-2 leh pastor-8 te an ni. (DIPR)

*MIZO NULA VANLALAWMPUII CHAWNGTHU MLA ATAN SPEAKER IN LA LUT
Hrangturzo Assembly bial MLA thar atan thlan tlin leh Mizoram Legislative Assembly 7-na ah hmeichhe MLA awm chhun tur Nl.Vanlalawmpuii Chawngthu chu vawiin khan Mizoram Legislative Assembly Speaker Pu Hiphei chuan Mizoram Legislative Assembly Conference Hall-ah rinawm thu tiam tir in MLA atan a la lut.

Nl.Vanlalawmpuii Chawngthu MLA atana lakluhna programme ‘Swearing-in-Ceremony’ ah hian Chief Minister Pu Lal Thanhawla, Home Minister Pu R. Lalzirliana bakah Cabinet Minister-te, Deputy Speaker Minister of State-te, , Parliamentary Secretary-te leh MLA te an tel kim hle a ni.

Nl.Vanlalawmpuii Chawngthu hi Pu C. Chawngkunga leh Pi Lalliankimi Sailo fanu niin kum 34 a upa a ni a, zirna lamah MA (Political Science) niin MPYCC a nihna hrang hrang te lo luah tawh in tunah hian MPYCC President ni lai mek a ni a, Dawrpui Vengthar ah chhungkua in an khawsa a ni. (DIPR)

Vanlalawmpuii Chawngthu (Opi) - Newly elected and lone female legislator in Mizoram State Assembly

*MIZO FOOTBALLER IN NUPUI NEI DAWN
Mizo tlangval East Bengal club a football khel mek Lalrindika Ralte (Didika) chuan June ni 5 2014 hian Lunglei Electric veng BCM Biak In ah nupui a nei dawn. A nupui tur hi kohhran dan a vawi 2 puan a la ngaih avangin kan thu dawnna ten an la zep hrih a ni.
 
*MODI-A HNUK A ULH
Vawiin khan BJP Parliamentary Board leh MP thlan thar ten Prime Minister atan Narendra Modi an thlang a, Modi hming hi party member senior L.K Advani an a rawt a ni. Modi-a chuan PM atan an thlan a pawm hnuah thusawiin hnuk ulh teuh in LK Advani an BJP tan thil tha i ti a ni a tih chu chhangin: fapa chuan a nu tan thil tha a ti lo ngai em ni? a tia, an party miten a chungah thil tha an ti chauh zawk niin a sawi. An inhmuhkhawmna Central Hall of Parliament chu a vawi 1 luhna a ni a, a thingthi a chal in chhuat sik tirin zah takin a lut a ni. Parliament house zahawm a tih thu leh Gujarat assembly house a luh hmasak ber leh CM bangla a luh hmasak ber tum te a hriatchhuah thu a sawi. An party MP te chu nihna ah buailo a ram tan a thawh chu an mawhphurhna a ngai zawk turin a ngen a, 2019 ah ram tan hmasawnna report lawmawm ka entir dawn che u ati a ni. A sorkar chu a tawp ah chuan mirethei ten an hlawkpui ber ang a ti bawk. Chhungkaw harsa tak a bul rawn tan a nih thu sawiin ram mipui ten mawhphurhn an pek leh beisei ang a hnathawh a tum thu a sawi a "Keima tan nilo in ram tan hna ka thawk dawn a ni" a ti.
 
*GUJARAT IN HMEICHHE CM NEI DAWN
An state Chief Minister tanglai Narendra Modi chu Prime Minister a nih dawn tak avangin Gujarat chuan Chief Minister thar atan nuthlawi kum 73 mi Anandiben Patel an nei dawn niin BJP hotuten an sawi. CM thar tur Anandiben Patel hi Narendra Modi hnuai a minister for revenue, urban development and roads and buildings ni lai mek a ni a, Gujarat a hmeichhe MLA ni rei ber niin kum 1998 atang khan MLA a la ni char char a, Modi a hma a Kesubhai Patel-a sorkar ah pawh khan minister a lo ni hman tawh a ni. A pasal Mafatbhai (77) nen kum 15 kal ta khan an inthen a, a fapa nen inkhat ah an cheng dun thung a ni. Gujarat ah hmeichhe CM hmasaber a ni a, ningani 22 may ah rinawmna thu tiam tir a lakluh a nih rin a ni.
 
*RUSSIA IN SIPAI LAKIR LO
Russia sorkar in Ukraine ramri a an sipai dah te lakir turin in sawi mahse an la awm reng niin NATO leh US sipai ten an sawi. Russia hian an sipai te Ukraine ramri hrul Rostov, Belgorod leh Bryansk ah a dah a, hei hian Ukraine tualchhung buaina thleng mek a remna zawnna kawng ah harsatna a siam thei ni a hria in khawthlang ram te hian lakir turin an ngen a ni.
 
*THAILAND AH SIPAI RORELNA
Thailand tualchhung politics in mumal lam an pan theih loh avang leh mipui aiawh thlan ten sorkar ngialnghet an siam theih loh avangin an ram sipai ten rorelna an laksak. Thailand sipai hotute thuchhuah chuan hei hi sipai rorelna ram din tumna nilo in buai lai a ram chhung a fel zawk nan a thuneihna la hrih chauh ni in an in sawi thung a ni. Kan hriat theuh angin hmanni lawka Thailand Prime Minister chu eiruk thubuai avangin court in an ban tir a nih kha.
 
*BUS ACCIDENT
Tukin khan J&K Ramban district a Jammu-Srinagar kawngpui ah bus 1 kham ah a tlanliam a mi 17 an thi a, mi 27 in hliam an tuar a ni.
 
*UGANDA NURSE KUM 3 TANG TURIN TI
Uganda ram a nurse pakhat kum 64 mi, HIV/AIDS vei, Rosemary Namubiru chuan a damlo enkawl lai mipa naupang a chiu dawn laiin tihpalh thilthu in a chiuna tur hriau chuan a ma taksa a vit palh a, chu chu naute nu leh pa ten an fapa chungah HIV/AIDS a kai tir thei tiin an khing a, court in kum 3 lung in tang turin an hrem.

Nurse Rosemary hian naute chiuna tur in a thisem zam (vein) a zawn sak a, chutih lai tak chuan tihpalh thilthu ah a ma kut zungtang hriau in a tai palh zauh chauh a nih thu leh a naute chiu tur chungah a hri vei HIV/AIDS thehdarh tumna a neih loh  thu a sawi ve thung a ni. Uganda ramah hian mipui 7.2% in Aids an vei mek anga chhut a ni.
 

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM

*MSU IN ZIRLAI CHAWIMAWI: Nimin khan Vanapa Hall, Aizawl ah Mizo Students' Union ten HSSLC 2014 exam a zirlai tithate chawimawina hun an hmang a, Education Minister H.Rohluna chu khuallian a ni. MSU in chawimawina an hlan hi Art subject-a tithate hnenah ‘Lalziki Award’, Science subject-ah ‘Rev. Zairema Award’ leh Commerce subject-ah ‘A.Sawihlira Award’ tiin hming phuahin, zirlai 10 (stream tinah pakhatna atanga pathumna zel) hnenah an sem a ni.

*TUICHANGRAL ZIRLAI: Tuichangral Zirlai Pawl te chuan sorkar in an ngenna ngaipawimawh a Gov't. Chekawn Primary School a zirtirtu an dah thar avangin he sikul khar an tum chu an thulh leh.

*CM BIRTHDAY: Nimin khan Indian Society on Tobacco & Health, Mizoram Chapter (ISTH-M) in vawiin khan Chief Ministr Pu Lal Thanhawla chu kum 76 a tlin champhaphak denchhenin Chief Minister tum nga ni theia thlan tlin anihnaah lawmpuiin a office chamberah chawimawina thilpek an hlan.

*TUITLA CHHAR: Nimin zinga kan rawn tarlan Sairang Dur lui a chesual H.Lalhmingmawia (21) S/o. H.Lalhmingthanga, Vaivakawn, Aizawl ruang chu nimin chhun dar 12 vel khan hmuh a ni.

*MIZO PHANTOM: Nimin khan Mizo Phantom K.Chhawnthuam leh a rual a man ve K.Lalhruaitluanga, Journalist te chu court in bail a chhuah an phal sak ta.

*VAWIIN AH: BJP MP thlan tlin thar mi 282 te chuan vawiin chhunah Central Hall of Parliament ah Narendra Modi chu Prime Ministe atan an thlang ang. Narendra Modi hian PM atana thlan a nih zawh hunah President a hmu ang. Tlailamah Delhi atangin Ahmedabad a pan anga, naktuk ah Gujarat Chief Minister a nihna atangin banna a thehlut ang.

*CBSE PAWL 10 RESULT: Vawiin tlai lam hian Central Board of Secondary Education (CBSE) chuan Class 10 examination 2014 result an ti chhuak dawn. Result te hi www.results.nic.in, www.cbseresults.nic.in leh  www.cbse.nic.in ah te bakah Phone number 011-24300699,  011-28127030 (MTNL) leh 1255536 (BSNL) te hriat theih ang.

*MODI THLAKTU TUR: Gujarat CM Narendra Modi an ban chuan a aiawh tu atan revenue minister nilai Anandiben Patel a nih ring an tam hle.

*BIHAR CM THAR TUR: Bihar CM tanglai Nitish Kumar a ban thut avangin a aiawh tur in SC/ST welfare Minister Jitan Ram Manjhi (68) chu thlan a ni.

*INDIA CM NI REI BER TUR NAKTUK AH: Naktuk ah Sikkim Democratic Front hruaitu Pawan Chamling chu Sikkim Chief Minister atan lakluh a ni dawn. Pawan Chamling hi kum 63 mi niin 12 December 1994 atang khan CM a la ni char char a, naktuk ah lakluh leh a nih chuan a zawn a vawi 5 CM a nihna a ni dawn ta a ni. A term tha tak a hmang zo a nih chuan India ram a CM ni rei ber Jyoti Basu an West Bengal a kum 23 chhung CM hna a lo chelh chu a khum thei dawn a ni.

*CM LEH BAWK: Biju Janata Dal (BJD) president Naveen Patnaik pawh naktuk hian Odisha Chief Minister atan lakluh leh a ni dawn a, a ni pawh hian a zawnin tum 4 CM hna a chelh dawn a ni.

*CWC IN RAHUL-A TE NUFA BAN PHALLO: Nimin a Delhi a Congress party thuneitu sang Congress Working Committee(CWC) thukhawm chuan Sonia Gandhi leh Rahul Gandhi ten Lok Sabha inthlan a an party chakloh chu an mawhphurhna a ni tia ban an tum chu an pawmsak lo a ni.

*EMBASSY KHAR: Saudi Arabia chuan Libya khawpui Tripoli a an ram palai leh embassy a hnathawk te an sahim na ngaihtuah vangin an ko haw.

*RUSSIA IN SIPAI KO HAW: Russia President Vladimir Putin chuan Ukraine  tualchhung buaina avang a ramri hnaih a  an sipai an tirh chhuah te chu a an hmun ngai ah let leh tawh turin thu a pe.

*TULIAN: Serbia leh Bosnia ramah tuilian  in zual lam a pan zel a, mi 35 chuang in nunna an chan tawh a, mi maktaduai 1 chuang in an tuar mek a ni. Khawvel ram hrang hrang ten tanpuina leh chhanchhuah na hnathawk tur an tir lut mek.

*NUNNA HI A HLU A SIN: Britain a hmunpui nei Syrian Observatory for Human Rights te chuan zirchianna an neih ah Syria ram a tualchhung buaina thleng vang a nunna chan zat an chhinchhiah zat chu mi 162,402 an ni. UN pawh in nikum July thleng khan mitthi zat hi 100,000 an lo chhinchhiah tawh a ni.

*MINISTER RAIL IN CHILHLUM: Nimin khan Uttar Pradesh Minister of State nilai Satai Ram Yadav leh a driver leh personal guard te chu an chuanna motor in rail kawng an kan laiin rail lo tlan in a su hlum.

*OIL MAN TO: Libya ram a helpawl ten oil  supply an tihbuai vangin Asia ramah tuialhthei man a sang.

*MIZORAM HRECHIANG ANG (G.K): Mizoram state bird (Sava) chu Vavu (Hume's Bartailed Pheaasant) a ni a, Mizoram state animal(ramsa) chu Saza (Serow), Mizoram state tree (thing) chu Herhse (Mesual Ferrea/Nahar) niin Mizoram state flower(pangpar) chu Aiting (Dancing girl ginger) a ni.

*HMANLAI VAWIIN: Kum 1506 vawiin angah khan America khawmualpui hmuchhuaktu tuipui mihrang Christopher Columbus chu  Valladolid, Spain ah kum 54 mi niin a boral. A thih chhan ah hian tuipui nanta 'gout' an puh thin a mahse a hnua an zirchian na ah tunlai mithiam te chuan 'Reiter's Syndrome' niin an ring zawk. Kum 1902 vawiin angah khan Cuba ram chuan Spain sorkar lak atangin zalenna a hmu.
1874 vawiin angah khan Levi Strauss company chuan tun thleng pawh an la chin chhunzawm jeans kekawr pawl, a ipte tlang a dar(copper) chhutber vuah an hralh chhuak tan a ni. Kum 1942 vawiin angah khan Japan in Burma an la.

*THURIL: "Thil tha hian awmzia pahnih a nei, a awmzia pakhat chu thil tha famkim hi a ni a, a dang leh chu midang te tan a thiltha tih a ni." — Aristotle
--------
"Mizo ten 'april par' kan tih hi may thla ah a par chauh sia, a saptawng ah pawh 'may flower' tih a nia, 'may par' tih leh hnuhnawh pawh ni ila a pawi dawn em ni le?" Tukchhuah nuam, comment ah i duhkhawp loh lai lo sawi la, kan lo ngaichang ang che.

Mizoram state tree, flower, animal & bird

19th May 2014 news in Mizo

 Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

19.5.2014 
*MIZO PHANTOM BAIL IN CHHUAK DAWN
Mizo Phantom tia hriatlar K.Chhawnthuama chu Helen Dawngliani, AD&SJ chuan bail ah a chhuah a phalsak a, tin, a rual a man tawk ve K.Lalhruaitluanga, Journalist pawh bail a chhuah phalsak a ni ve bawk.
 
*Vawiin chawhnu dar 1 : 00 atang khan NLUP Implementing Board (NIM) Conference Hall-ah Non-official NLUP, Apex Board Member leh NIB Member te meeting pawimawh tak Pu J.H Rothuama, Chairman, NIB & NLUP Apex Board, Vice Chairman ni bawk hovin neih a ni. Pu J.H Rothuama chuan memberte lawmna thu sawiin, inthlan leh a kaihhnawih avangin NLUP puihna sem leh thil dang chawlh a ngaih phah avangin duh angin hnathawh a harsa a, Election Code of Conduct hun a tawp ve leh, NLUP kalpui chhunzawm dan tur rel ho tura kalkhawm an nih thu a sawi.

Chairman, NIB chuan tun hnaiah Mamit, Kolasib leh Champhai District te tlawhin, NLUP hmalakna a hmunah ngei a en thu leh mi taima leh rinawmte chuan tun maiah pawh hlawhtlinna an neih thu a sawi a, ti tha duhlote chuan an mahni tan leh an tu leh fate tan thleng harsatna an insiam chawp ve mek bawk a ni a ti.

Pu P.L Thanga, NIB Vice Chairman & CEO chuan Lines Department te hmalakna fuh tawk lo leh thalote siamthat tul a tih leh Beneficeries lam a tan lak dan tur te sawiin, hemi chungchangah memberte tan ho a tul zia te a tarlang bawk. Zawhna chhangin Pu P.L thanga chuan UN Technical Team ten Mizoram an rawn tlawh chu India State a an tlawh hmasak ber leh Mizoram tan bik State dangte aia Project tam zawk rawn thawk turin NLUP hmalakna avanga an inbuatsaih chu lawmawm a tih thu sawiin, UN Team lo kal te hi mi thenkhatin Mizoram Sorkar sum senga lokal anga an sawi chu a dik lova, an mahni sum senga lo kal an ni a, Mizoram chhungah erawh an thlenna, ei leh in bakah an kalkualna senso te chu a mikhualtu ten kan tum sak ve anih thu a sawi.

Dr. Robert Rualthankhuma, Project Co-ordinator, NIB chuan, inthlan result puan anih tak avangin NLUP Beneficeries hnathawh en paha pek zawm tlakte hnenah NLUP sum pek zawm tur a, Lines Department hotute leh District tin Deputy Commissioner te hriattir an nih thu a sawi a, pek zawm tlak lohte chu tupawh nise, pek chhunzawm an nih dawn loh thu a sawi bawk.

Vawiin kalkhawm hian uluk leh zual a NLUP kalpui anih theih nan tanrual leh a hmun ngeia kala hmalaknate a theih ang anga en ho thin an rel a, tha zawk leh chak zawka hmalak dan turte an sawi ho a ni. (DIPR
 
*ST. PAUL’S HSS-IN AN ZIRLAI TITHA TOPPERS-TE CHAWIMAWI
St. Paul’s Higher Secondary School chuan vawiin khan kumina HSLC leh HSSLC Exam naah an sikul naupang Top Ten-a tlingte leh subject mala mark hmu sangte chawimawina “Paulians’ Proficieny Awards 2014” programme an buatsaih a. He programme Paulians’ Alumni Association te nen tangkawpa an buatsaihah hian School Education Minister Pu H. Rohluna chu khuallian niin a hmanpui a. Parliamentary Secretary Lt. Col. (Retd.) ZS Zuala leh Mizoram Board of School Education, Chairman Dr. Lalchungnunga te chu khualzahawm niin programme hi an hmanpui bawk a ni.

Kumin HSLC Exam-a, 1-na, 2-na,(mi pahnih), 4-na(mi pahnih), 7-na, 9-na leh 10-na te an hauh a; HSSLC Science Stream-ah, 1-na atanga 7-na thleng an hauh bakah HSSLC Commerce Stream-a 6-na atanga 10-na thleng an hauh a. St. Paul’s zirlai naupang te hian English, Mathematics, Physics, Biology, Computer Science leh Business Mathematics subject-ah te mark hmu sang ber nihna an hauh bawk a ni.

HSLC Exam-ah khan zirlai naupang 308 neiin an zavaiin an pass vek a, chung zingah chuan 131 chu Distinction-ah, 137 in I Division-ah, 35 in II Division-ah leh 5 in III Division in an passed.

HSSLC Science Stream-ah naupang 140 an neih te chu pass vekin chung zinga 42 chuan Distinction-ah, 86 in I Division-ah leh 12 in II Division-ah an passed.

HSSLC Commerce Stream-ah naupang 42 an neih te chu pass vekin chung zinga 4 chu Distinction-ah, 14 in I Division-ah, 20 in II Division-ah leh 4 in III Division ah te an passed a ni. (DIPR)
 
*MANCHESTER UNITED MANAGER THAR TUR
Netherlands coach Louis van Gaal(62) chuan World Cup zawh atanga kum 3 chhung a Manchester United manager hna thawk turin inremna thuthlung a ziak fel ta. Ryan Giggs pawh a puitu ah a tang chhunzawm dawn a ni. Van Gaal hi Ajax, Barcelona leh Bayern Munich ah te manager a lo ni tawh thin a, Bristish ram pawn atanga Manchester United manager hna thawk tur hmasaber a ni dawn ta a ni.
 
*Jammu District a Aknoor area ah helpawl te bomb tih puah vangin India sipai 1 a thi a, sipai dang 2 in hliam an tuar.
 
*New York khawpui ah chuan kum 21 tling chin lo chuan meizial (Cigarette) an lei thei tawh dawn lo.
*ARUNACHAL CM LALUT
Nimin khan Itanagar a Raj Bhawan ah Arunachal Pradesh Chief Minister 8-na ni tur in Congress hruaitu hlun Nabam Tuki chu rinawmna thu tiam tir a lakluh a ni. Nabam Tuki hian CM hna hi a zawn in (a term 2-na) a chelh chho leh chiah dawn a ni.
 

GOOD MORNING MIZORAM:
LAMTLUANG ZINGKAR CHANCHINTHAR LAWRKHAWM

*VAWIIN AH: Tun Lok Sabha inthlan a che chhe tak Congress party chuan vawiin ah Delhi ah Congress Working Committee meeting an nei dawn. An hotunu Sonia Gandhi in a kaihhruai ang a, inthlan thlirletna an nei ang. Vawiin vek hian Bihar ah Janata Dal(United) te chuan Chief Minister thar tur thlanna a nei ang.

*NAUPANG PAWNGSUAL: Lamtluang in whatsapp lama a thu kan dawn danin nimin tlai ah khan Aizawl Dinthar vengah Pa pakhat kum 54 miin hmeichhe tleirawl kum 13 mi pawngsual a tum a, a hma in a nau hmeichhe naupang kum 10 pawh a lo pawngsual tawh bawk avangin, an unau tangrual hian an nu an hrilh ta a, pawngsualtu hi police ten man in  Vaivakawn Police Station ah an dah ta niin an sawi. (Hei hi thudik a  ni em tih nemnghehna erawh kan nei bik lo)

*TUITLA: Nimin tlai dar 4:30 vel khan Home Mission School a pawl 7 zirlai H.Lalhmingmawia S/o. Lalhmingthanga, vaivakawn, Aizawl chu Tlawnglui Sairang ah tla hlum a, he thu ziah a nih lai hian a ruang an zawng mek a ni. Hmingmawia te hi an chhungkua in lui ah hian an kal a vanduai ta a ni.

*INAWKHLUM: Inrinni khan Lunglei District a Thangte (Thrangte tia lam tur) khua ah mipa naupang kum 9 chu khum khuhna puan hmanga a inawkhlum hmuh a ni. Pawl 4 zirlai niin a inawhhlum chhan hriat ni lo mahse a nu leh pa in vuakdup thei lo tawh lo tur a hrilh in an ram an kal san, in a nghah laiin vanduaina hi a thleng ta a ni.

*THINGZAI MAN VANGIN MOTOR HAL: Kar hmasa zirtawpni chawhnu khan Selam khawdai a Champhai forest divion a thawktuten thingzai an man sak motor a phurh an tum chu Selam khaw mi thenkhat ten duhlo in forest dept truck 709 chu an halsak a ni. Forest dept lam hian Ngopa P.S ah FIR an thehlut a ni. (Truck hal thlalak kan rawn telh e)

*CHAMPHAI PRO FIGHT: LCN ZOKHAWPUI leh CHADBA (Champhai District Boxing Assn.) tangkawp chuan August ni 7 2014 atangin Champhai District huap Boxing Pro-Fight an buatsaih dawn. August ni 7 ah hian  Tlangrawt Boxing Hall-ah opening ceremony neih a ni ang.

*NUCLEAR RALTHUAM VANGIN MAW?: June 16 atanga ni 20 chhung in Vienna khawpui ah nuclear ralthuam chungchang sawiho turin Iran leh khawvel aram lian 6 - US, UK, France, Russia, China leh  Germany hruaitute an inhmukhawm dawn.

*AFRICA HRUAITUTE TANGRUAL DAWN: France khawpui Paris a inhmuhkhawm an neih hnuah Nigeria leh an thenawm ram hruaitu inzawmkhawm te chuan Nigeria ram a hmeichhe naupang rubo tu firfiak pawl Boko Haram te lakah indo an puang.

*TUILIAN: Zirlaibu a Indopui I-na chhuah chhan an sawi thinna hmun Bosnia-Hercegovina leh Serbia ah te tunlai hian tuilian a nasa hle a, mi sang tam tak in leh lo neilo in an tlanchhe mek a ni. Tulian vang hian nunna chan mi 35 an awm tawh a ni.

*SYRIA GENERAL THAH A NI: Mizo ten Suria kan tih Syria ram Air Defence force General Hussein Isaac chu nimin khan Tirkoh Paula engin a chhun thlukna hmun Damaska (Damascus) khaw dawi ah helte nen an inbeihna ah a hliam tuar lo in boral. Hel pawl te hian kum 3 kalta atang khan President Bahsah al-Assad paihthlak tumin buaina an lo siam tawh a, an tualchhung buaina vang hian mi Nuai 1 sing 5 in nunna an chan tawh a, mihring maktaduai 1 chuang mi ramah an sahimna zawngin an vakvai mek bawk.Remna leh muanna hlut zia hi i chhut ngai em le?

*WORLD CUP 2014: I hriat tawh sa ni tho mai thei a, nilo mai thei bawk a, World Cup 2014 chu kumin June ni 12 hian khelh tan a ni ang a, July ni 13 ah final khelh a ni ang. World Cup 2014 hi Brazil in an thleng dawn a ni. India sana aiin Brazil sana hi darkar 8:30 in a tlai a, entirnan: India a thawhtanni zing dar 2:50 a nih mek laiin Brazil ah chuan chawlhni tlai dar 6:20 a la ni mek thung a ni.

*I THEI LO: I kiu kha liah han tum chhin teh, i theilo mai thei a ni. I liah theih chuan i thiante aiin i lei a sei bik tihna aniang.

*MIZORAM HRECHIANG ANG: Mizoram a sakhaw hrang hrang awmzat chu: Kristian - 86.96%, Buddhist - 7.93%, Hindu - 3.55%, Muslim - 1.13%, Mizo religion - 0.15%, Judaism - 0.10%, Others - 0.17%. Khawvel a ram bial khat chhung a kohhran tamna ber kan ni hial mai thei bawk.

*HMANLAI VAWIIN: Kum 1588 vawiin angah khan Spain indo lawng rual Spanish Armada an tih te chuan England Lalnu Queen Elizabeth I-na do turin Lisbon an chhuahsan.  Kum 1926 vawiin angah khan Benito Mussoloni chuan Rome khawpui ah mipui rorelna democracy tihtawp a nih thu leh facist state a nih tak thu a puang. Kum 1890 vawiin ang ah khan Vietnam ram hruaitu ropui leh zalenna sualtu lar tak Ho Chi Minh (Nguyen Sinh Cung) chu Nguyễn Sinh Cung ah a piang.

*THURIL: "Nun hi awlsam tak a ni a, mahse  a harsa thei ang ber a siam tum in tan kan khawh reng lawi si a ni." - Confucius.
----------
Hnam ropui tak nih kan duh chuan thil engpawh lo thleng se rik rum rum nghal ai chuan zirchian a thuthlukna siam chauh zel a tha, nawmsakna ringawt um lo in a tha zawk tur a nih chuan tawrh leh chan pawh kan huam tur a ni. Kan ram, kan hnam hi vawiin atan chauh nilo, kan thlah lo kal zel te tan a ramnuam a siam tur hian mawhphurhna pek kan ni vek. Chawlhkar thar hman nuam vek ule. I comment kan lo ngaichang leh tawp a nia aw.

Pix: Thlalak kan rawn tarlan hi 16.5.14 2:00pm a Selam khaw mipui pungkhawm thinrim in Champhai E&F truck 709 an hal chu a ni. Source: Hlima Khiangte

Angry Selam villager burnt Forest department truck in Champhai District, Mizoram

18th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

18.5.2014

*KHAWVEL A FOOTBALLER MANTO BER MESSI NITA
World Player of the Year vawi 4 ngawt lo ni tawh Lionel Messi chuan Spanish football club Barcelona ah khel chhunzawm turin kum 1-a Euro maktaduai 20 hlawh turin in contract ziak fel ta. Messi hian kum 1 chhung in hlawh pangngai tur Euro maktaduai 20 bakah hian extra in Euro maktaduai 5 a lalut thel dawn bawk a ni. A contract ziah thar tak avang hian Lionel Messi hi khawvel a football khelthiam zingah a man a to ber ta a, Real Madrid in Cristiano Ronaldo Euro maktaduai 17 a an lei akha a khum ta a ni. Messi hian 2004 a FC Barcelona a zawm atang in game 424 an khelh tawh ah goal 354 a petlut tawh a ni.

 

*PRESIDENT IN LOK SABHA THIAT
India President Pranab Mukherjee chuan Union Cabinet thurawn angin Lok Sabha 15-na chu a thiat(dissolve) ta. Union Cabinet hian Inrinni khan thutkhawm hnuhnung ber neiin an thuthlukna hi parliamentary affairs minister Kamal Nath chuan President hnenah ziak in a hlan a ni. Tihian Lok Sabha 16-na atana thlan tlin mi 543 te hming chu tihdan phung pangngai angin Election Commission of India in President hnenah an hlan tawh a, President hian sorkar siam tur in a tling tam ber te a sawm dawn a ni.

 

*THUFING: "Kan nuna thil lo thleng tam zawk hi kan chochhuah a ni. A eng zawnga kan ngaihtuah chuan thil tha ka chochhuak nge nge a, a thim zawnga kan ngaihtuah tlat chuan min delh rittu thil a lo thleng mai thin."
(Zara, Nangma Khawvel, phek 106, 2013)

 

*THUFING: "Nun hi intlansiakna mual a ni lo va, zinkawng a ni. He zinkawngah hian rahbi tleu lo tur chuan rah chat chat a ngai."
(Zara, Nangma Khawvel, phek 67,68, 2013)

  

*ENGE AN SAWI?
"A hei ka rawn lut thei taaa... Lamtluang news page hi a tha dawn e.... a that loh leh a chhia a ni mai, rawn lut sup2 teh uuuu."
- K.L Liana
Presiding Officer, Mizoram State Legal Services Authority

#LAMTLUANG_WEEKEND_SPECIAL 

KL Liana message to Lamtluang Mizo online news page

*VIETNAM TUALCHHUNG BUAINA
China in Vietnam nen a an inchuh mek tuipui (South China sea) huam chhung ah tuialhthei laichhuah a chhunzawm zel duh loh vangin Vietnam ah buaina a chhuak. Vietnam mipui lungawi lo ten an ram chhung a China in industry leh sumdawnna hmun a neih te an suasam a, motor leh factory an halsak a ni. China leh Taiwan mi an ram chhung a awm te pawh a rang thei ang ber an ram chhuahsan turin an hriattir bawk. BBC report a landan in he buaina ah hian Chinese 2 in nunna an chan a, midang 100 in hliam an tuar bawk (Reuters report ah chuan mitthi leh hliam tuar zat hi mi 13 an chuang niin an sawi thung). China sorkar chuan an mi leh sa ten Vietnam an chhuahsan theih nan thlawhtheihna leh lawng te a ruahman sak rum rum a ni. Communist ram 2 China leh Vietnam te hi kum 1979 a ramri chungchang a an indo ve zuai tih loh chu in rem takin an awm thin kha nai, tun buaina hi an intihthiam loh leh na hmasaber chu a ni awm e. Vietnam sorkar thupuang tu in a sawi danin buaina chhuak thar a awm tawh hrih lo a ni. China chuan Vietnam ho thil tih dan hi an dem hle a ni.

 

GOOD MORNING MIZORAM:
PATHIANNI ZING CHANCHINTHAR LAWRKHAWM

*NEICC: India hmarchhak a Kristian inpawlkhawm North East India Christian Council (NEICC) Annual Meeting, Sielmat, Churachandpur a neih mek chu zanin hian an tiak ang. Mizoram kohhran hruaitu te pawh an tel a ni.

*MISSIONARY RETREAT: Mizoram Synod Mission board hnuai a India ram laili a misionary thawk mek ten 'Missionary Retreat for Central region'ITI Vengchhak Kohhran Biak In a an hman mek chu zaninah a tiak ang. Thusawitu tur te: Rev.C.Lalsangliana (Chawhma inkhawm), Rev.Chawngliana (Chawhnu), Rev.P.C Pachhunga (Zan). Retreat thupui hi "Krista Thuhretu' (Tirh. 2:32) a ni.

*BCM KRISTIAN CHHUNGKAW NI: Mizoram Baptish kohhran te chuan vawiin hian 'Kristian Chhungkaw Ni' an hmang dawn a, zing inkhawm ah ‘Kan thlen chin atang khan hma i sawn zel ang u' tih an zirho a ang a, zan inkhawm ah ‘Thilpek- tisa leh Thlarau lam malsawmna' tih an zirho ang.

*BCM MISSIONARY FAPA BORAL: A nu leh pa Rev. FJ Raper (Pu Reia) leh Florence Rice (Pi Reii) te Mizoram a Baptist missionary an thawh lai a piang Rev. David Minton (Pu Zomawia) chu kum 77 mi niin thin cancer avangin London-ah April ni 4 khan a thi a, May ni 12, 2014 khan London Road Baptist Church, Lowesoft, UK-ah vui liam ani.

*UPC NEI: May 15, Ninga ni khan UPC(NEI) Litterature and Publication Board te chu UPC Complex, Mualpui Salem vengah thupawimawh tak tak ngaihtuahin an thu khawm a, Chairman Rev. Lalmalsawma Sailo chuan rorel hi a kaihruai a, an rorel zingah Kum 2014 Beihrual thuzir tur "Kohhran Rawngbawlna leh Thlarau thianghlim " tih chu a ziaktute'n an ziak zo tawh a, ennawn a ni. Upa Dr. H.L ruata ziah "Oneness Pentecostal Church" tih chu Litterature Board pawmpuina hnuaiah chhuah ni se. Tin, Oneness Pentecostal Church Part - 2 pawh endik mek a ni bawk. Lehkabu ziak tute'n an ziah man (Royalty) chungchang ngaihtuahin, atul anga siamthat a ni tihte an rel a. Kum 2015 Beihrual thuzir tur thupui atan "Isua lokal lehna leh Tunlai khawvel" tih chu hman a ni ang.

*CATHOLIC HMEICHHE PAWL: Mizoram Diocese Catholic Hmeichhe Pawl buatsaihin nimin khan Christ The King Cathedral Hall, Kulikawnah ‘Seminar on Gender Poilicy’ neih a ni a, Mizoram State Women Commission Chairperson Lalnipuii te, Alphonsa, Co-ordinator, Woman Commission NE Region te, Rev. Sr. Lucy Laltluangi, Director, DCHP te paper buatsaih an zirho.

*THLAWHNA TLA: Sipai thlawhna (Antonov AN- 74TK-300) tla ah Laos ram Deputy Prime Minister leh Defence minister ni bawk Douangchay Phichit te, Governor of Vientiane te leh sipai hotu lian 18 te pawh an boral a ni.

*NIGERIA HMEICHHE NAUPANG TE CHUNGCHANG: Boko Haram firfiak pawl ten Nigeria hmeichhe naupang rukbo mek te chhanchhuah dan tur chungchang ngaihtuah in nimin khan France khawpui Paris ah Nigeria, Benin, Cameroon, Niger leh Chad ramhruaitu te an inhmukhawm a, UK, US leh EU aiawh ten an telpui a ni.

*KOHHRAN INKHAWMPUI: Niruk chhung awh tur Church of Scotland Annual General Assembly chu Edinburg khawpui ah tan a ni a, an thurel tur zingah tuai (gay) minister chungchang pawh a tel a ni. An inkhawmpui hi kum 1560 atang khan kumtin khello in an la hmang deuh ziah a ni.

*CM PAHNIH BANG: Lamtluang a kan rawn post tawh Bihar Chief Minister Nitish Kumar chuan nimin khan banna thehlut a, Assam Chief Minister Tarun Gogoi pawn an hruaitu Sonia Gandhi a hmuh hnuah kar chhungin banna thehluh a tum thu a sawi. Lok Sabha inthlan a an party an chet chhiat vanga ban tum ve ve an ni.

*RAMRI AH INKAP: Zirtawpni zan tir lam khan Jammu & Kashmir Poonch District a Pakistan leh India ramri (LOC) ah Pakistan sipai ten India sipai duty post an rawn kap a, zan dar 7:40 thleng an inkap a ni. Thi leh hiam an awm lo ve ve niin sawi a ni. An inkahna hmun hi Krishna Ghati Sector ah a ni.

*BJP HOTUTE INHMUKHAWM DAWN: Thawhlehni lo awmtur 20 may hian BJP Parliamentary board an thukhawm dawn a, hetah hian Narendra Modi chu Prime Minister turin mumal zawkin an thlang dawn a ni.

*SOUTH ASIA BASKETBALL AH INDIA TLANGVAL TE AN CHAMP: Nepal khawpui Kathmandu a khelh zawk tak 3rd South Asian Basketball Association (SABA) Basketball Championship for men ah India chuan final ah Maldive hneh in an champion ta. 2-na Bangladesh, 3-na Nepal, 4-na Sri Lanka, 5-na Maldives.

*MIHAUSA CHHIAH LAKSAK DAWN: Taiwan Parliament chuan dan thar siam in an ram chhung a mihausa an kumkhat lakluh US Dollars 333,000 tling chin te chu 45% income tax laksak tawh turin an rel. Chhiah lak an tihpun tur avang hian an ram in pawisa tluk leh dingawn 65 an hmuhbelh theih an beisei a ni.

*MIZORAM HRECHIANG ANG: Mizoram a tlangsang ber Phawngpui (Blue mountain) san zawng chu 2,157 metre a ni. Phawngpui tih hi Lai tawng niin 'Phawng' tih chu 'phul/phul hmun' tihna niin, a awmzia chu 'Phulpui' emaw "Phul hmun ropui' tihna a ni thei awm e. Kum 1992 khan National Park ah sorkar in a puang a ni.

*HMANLAI VAWIIN: Kum 1804 vawiin angah khan French rorel khawl Senate chuan an ram lalber (emperor) atan Napoleon Bonaparte an puang. Kum 1974 vawiin angah khan India chuan a vawi 1-na atan Rajasthan a Pokhran thlaler ah nuclear bomb hlawhtling takin a tipuak chhin a ni. Chuan maw, kum 1999 vawiin ang khan a lawm, vawiina nu lo ni tawh thenkhat te la nulat lai a an star em em thin, Backstreet Boys ten an album 3-na "Millennium" tih an tlangzarh kha.

*THURIL: "Nangmah atangin Pathianni hi dahbo phal ngai suh ang che, i thlarau in Pathianni a neih loh chuan fahrah dinhmun ah i ding a ni." - Albert Schweitzer
----------
Weather forecast(Khawthlirna) atang a landan chuan vawiin leh zanin thleng Aizawl, Lunglei, Saiha, Mamit ah chuan boruak a tha in ruahsur a hlauhawm lem loh a, Serchhip ah chawhnu lamah khua a duai in a rinawm a, Kolasib ah zan lamah khawpui ri awm mai thei a, Champhai ah ruah a sur mai thei bawk.

Inkhawm mi leh mi lem lo te in za vaiin Chawlhni hman nuam ule. Nimin a in comment te kha kan lo hmu a, min ti lawm em em asin. Kan tih dik loh leh duhthusam loh lai te pawh comment ah rawn sawi rawh u, kan lo chhiar ve zel a nia, tukin pawh i rawn comment ve leh hram aniang chu tiraw? (I friendlist a mi ten chhiar ve se i tih leh i wall/timeline ah khan share ve hmiah mai rawh)

Pix: Thlalak kan rawn dah hi Bible a Philipi khua Paula leh Sila te lungin tanna hmun kha a ni e.

Prison for Paul and Silas at Philipi

7th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

17.5.2014 
*FA CUP 2014 AH ARSENAL CHAMPION
Khawvela association football competition upa ber FA (Football Association Challenge) Cup final ah Arsenal chuan 3-2 a Hull City hneh in an champion ta.
#FA_CUP
 
*ENGE AN SAWI?
"Eee..Lamtluang news page hi a tha ka ti hle mai.. thangthar ten Media kan hmang thiam chho zel hi a lawmawm hle a ni... chhiartu lo zauin thuthar rintlak leh bengvar thlak chhuahna leh hriatna lo ni zel se tiin duhsakna ka hlan che u a.. thawktute inpekna a ropui ka ti...khawvel hmung hrang hrang atanga zofate in hrilh pawh zung zungna mai ni lova min ti pumkhattu leh in unauna siamtu a nih theihna turin duhsakna ka hlan e."
- Rosiamngheta
Councillor, Aizawl Municipal Council

#LAMTLUANG_WEEKEND_SPECIAL

Rosiamngheta, Councillor, Aizawl Municipal Council

 *ENGE AN SAWI?
"Chanchin thar, hriatna ti zau kan tawng e - Lamtluangah"
- Hmingsanga
Mizo Sports writer & commentator
#LAMTLUANG_WEEKEND_SPECIAL

Hmingsanga, Mizo Sports writer

*PRESIDENT IN MANMOHAN SINGH ZANRIAH KILPUI
India Prime Minister kalchhuak tur Manmohan Singh pual in zanin khan India President Pranab Mukherjee chuan a chenna Rashtrapati Bhavan ah a buatsaih a, Vice President, Lok Sabha Speaker, Union Council of minister te bakah eptu lam hruaitu (Leader of Opposition) Sushma Swaraj pawh in a telpui a ni. Kan hriat theuh angin vawiin khan Manmohan Singh hian PM a nihna atang a banna President hnenah hian a thehlut a ni.
 
*ENGE AN SAWI?
"Lamtluang page hi mahni buai buai a ka buai ve avangin ka tlawh tam vak lo a, mahse hei ka'n bih chianga rinaiin a lo phusui in news pawh a lo fun kim tha khawp mai a. Tlawh nawn ziah tlak a ni ka ti ta riau mai. A enkawltute in kal zelna turah duhsakna sangber ka hlan a che u." - BigDaddy Hmahmatea IV (Author of Matea te unau leh Zoram tan & Admin of Thu Ngaihnawm Huang)
#LAMTLUANG_WEEKEND_SPECIAL

Bidday Hmahmatea IV

 
*HMEICHHE MP TAM BER TUM A NI DAWN
Lok Sabha 16-na hi tum dang zawng zawng ai a hmeichhe Member of Parliament an tam ber tum a ni dawn. Result a a landan in MP zingah hmeichhia 61 an awm dawn a ni. Lok Sabha hnuhnung ber ah khan hmeichhe MP 59 an awm a, an tlember tum chu 1977 niin chu mi tum chuan hmeichhe MP 19 chiah an awm a ni. Tun tum a hmeichhe MP thlantlin langsar zual te chu: Rahul-a Nu Sonia Gandhi te, Hema Malini te, Maneka Gandhi te, Kirron Kher te, Poonam Mahajan te, Sushma Swaraj te, Uma Bharti te, Dimple Yadav te, Moon Moon Sen te leh Meenakshi Lekhi te anni.
 
*CEO HOVIN PRESS MEET NEI
Vawiin khan Mizoram Chief Electoral Officer Pu Ashwani Kumar leh Joint CEO Pu H. Lalengmawia hovin I&PR Auditorium-ah Lok Sabha inthlan neih zawh tak chungchangah chanchinthar lakhawmtute nen inkawmkhawmna hun hman a ni.

Vawiin press meet-ah hian CEO chuan hlawhtling tak leh harsatna liantham awm lova Lok Sabha inthlan tluang taka zawh ani chu lawmawm a tih thu a sawi a. Vote tla zat pawh a tha thawkhat hle a, Model Code of Conduct bawhchhiat chungchangah sawi tur a tam lo hle bawk a, state dangte nena khaikhin chuan Mizoran inthlan boruak chu a muanawm hle a ni, CEO chuan a ti a; Election-a mawhphurhna nei zawng zawngte leh mipui tawiawmna chungah lawmthu a sawi bawk.

Joint CEO Pu H. Lalengmawia pawhin tlawmngai pawl leh kohhran hrang hrangten inthlan tantirh atanga a tawp thlenga an tawiawmna chungah lawmthu sawiin, Sorkar Department hrang hrang atanga election-a mawhphurhna neite leh venhim hna thawktute chungah pawh an thawh that vangin lawmthu a sawi bawk. (DIPR)
 
*BIHAR CM IN BANNA THEHLUT
Bihar Chief Minister Nitish Kumar chuan an party JD(U) in Bihar ah Lok Sabha seat 40 awmah seat 2 chauh an lak avangin a mawhphurhna hlen zo lo nia inhria in Governor hnenah CM atanga a banna lehkha a thawn a ni.
 
*CHANDRABABU NAIDU CM LEH DAWN
Nimin a Lok Sabha inthlan result puan rual a assembly inthlan result puan tel ah Andhra Pradesh state thendarh tur a Seemandra ah Telegu Desam Party(TDP) leh BJP inkawp ten Chandrababu Naidu ho in sorkar an siam ang. Telangana ah Telangana Rashtrya Samiti (TRS) in an hotupa K.Chandrasekhar Rao ho in sorkar an siam thung ang.
 
*PRIME MINISTER BANG DAWN
Vawiin hian India Prime Minister Manmohan Singh chuan a lo sawi lawk tawh ang ngeiin a banna lehkha India President hnenah a thehlut dawn ta a ni. Manmohan Singh hi Rajya Sabha MP a nih avangin house ah erawh a hmel kan la hmu chhunzawm thei dawn a ni.
 
*BEKANG EISUAL VANGIN KHAWPUM BUAI
Lawngtlai district a Bungtlang South khua ah karhmasa khan Kohhran hmeichhia ten sum tuak nan bekang um an zuar a, chumi ei avang chuan mi tam tak pumna leh luakchhuak, kawthalo in an awm a, PHC a dahluh sen loh khawp in mipui ten harsatna an tawk a ni. Damlo na zual te chu Lawngtlai Civil hospital ah hruai anni. Bungtlang south khawpum deuh thaw bengkang eisual vang hian an buai a ni. Bengkang hi forensic lam mithiam te enfiah turin thawn a ni tawh a ni.
Thulakna : Lomte VL Lawma Hnamte via Lunglei Chanchinthar Group
 

GOOD MORNING MIZORAM:
LAMTLUANG ZINGKAR CHANCHINTHAR LAWRKHAWM

*LAL ANGIN DELHI AH LUT DAWN: Nimin a hnehtak thlantlin BJP Prime Minister candidate Narendra Modi chuan mim ang a pianna Gujarat atangin tukin dar 10 hian IGI Airport Delhi a thleng ang. BJP mi leh sa ten ropui tak alo hmuah an tum a, Airport leh BJP Headquarters inkar ah hmun 3- Dhaula Kuan (T-point), Patel Road, 11 Murti ah te an chawl ang. Tichuan BJP Hqtrs. ah thusawina a nei ang. Karleh nilaini (21 May) ah Prime Minister thar atan lakluh a ni dawn a ni.

Narendra Modi a tleirawl lai nupui  Jashodaben Modi chuan a pasal kum tam tak a hmuh tawh loh nen hian Ambaji hmun a Pathiannu Amba hnen a tawngtaina hman dun a chak thu a sawi chhuah ve hial a ni. Jashodaben hian an nupa inkar thu hla hi kum tam tak engmah a sawi ngai lo a, rinawm takin pasal dang pawh neih san chuang lo in Modi an a rilru a thlak hun hi a lo nghak ve char char mai a ni. Tun a tawngtai dun a chak thu pawh hi inthlahrung takin "amah Modi an a duh ve chuan" a ti ngam chauh zawk a ni. He mi te nupa hi an chhungte remsiam angin an tleirawl laiin an innei a, mahse reilo te an awmdun hnuah inthen thu sawi chuang lo in tun thleng hian an awm hrang ve ve a ni. Jashodaben hian kum 40 kalta atang khan a pasal nen an awmdun leh theih nan tiin sakhaw rinna vuanin buhfai a ei ngai ta lo a ni.

*OBAMA PAWN MODI LAWMPUI: US President Barack Obama pawn Narendra Modi tling chu lawmpuiin telephone in a bia a, remchang hmasaber a US tlawh turin a sawm a ni. MOdi hi US sorkar in hman deuh khan visa an pe duh lo tih chu in hriat vek kha. PM  anih dawn meuh chuan US pawn an be chhe thei ta bik lo a nih hi.

*RALLENG CM BANG: Nagaland CM nilai Neiphiu Rio chu MP atana thlan tlin a nih tak avangin a aiawh turin a cabinet minister zing a mi T.R Zeliang a thlang a ni. Neiphiu Rio hi BJP sorkar ah hian union minister a chanphak beisei a ni.

*RUIHHLO MAN: Nimin chawhnu dar 2:50 khan Mizoram Excise & Narcotics Department, Anti-Narcotics Squad-te chuan Parvon Spas capsule 510 leh a neitu, Lalnunfeli (24) d/o Lalbiaktluanga (L), Ramthar Veng Aizawl inti chu Zodin Square, Aizawl-ah an man.

Excise & Narcotics Department chuan Parvon Spas neitu, Lalnunfeli hi Section 21(b) of the Narcotics Drugs & Psychotropic Substances Act (NDPS Act) hnuaiah thubuai an siamsak. (DIPR)

*MIZO MUSIC VIDEO THAR TLANGZARH: Nizan khan Central YMA hall ah Mission YMA North Branch te chuan Lengzem Music video thar an siam 'Zokhaw Tleitir' tih chu an tlangzarh. He music video hi zawrh tur ni lo a thlawn a thil neih duh reng reng a khawsa Mizo te rilru rem turin youtube ah dah a ni ang a, a duh duh in an download mai turin an ti dawn a. Lamtluang in zankhua a link kan zawn hnu leh a hreawm deuh te kan zawh pawhin youtube link hi kan la hrethei hrih lo a, reilo te ah an rawn upload thuai in kan ring.

*BAIRABI AH EXCISE CHECK GATE DAH REL: Nimin khan State Apex Level Co-ordination Committee on Drugs chu Chief Secretary Pi L.Tochhawng kaihhruaina hnuaiah Chief Secretary Office-ah an thukhawm a, an thurel zingah Bairabi-a Excise & Narcotics Chaeck Gate a rang lama dah dan tur chungchangte pawh an sawi ho a ni.

*ZOROCK-A PENSION DAWN HNAI: Mizo zaithiam Shillong a khawsa Rosangliana (Zorock-a) chu a hnathawhna BSF sipai atangin kumin October thla hian pension in a chhuak dawn a, kum 1976 khan BSF ah hian a lut a ni.

*SYNOD IN TANPUI: 12 May 2014 a Dinthar veng a inchim neitu R.Thlamuana te chhungkaw hnenah Mizoram Synod chuan Synod Relief Fund atangin chhawmdawlna atan Rs.Sing 1 an hlan a, an lawina Dinthar Kohhran in Rs.Sing 5 in an tanpui bawk.

*UPC ROREL: Nimin khan UPC (NEI), North Mizoram District Pentecostal School of Ministry (PSM) Committee neih a ni a, thlaleh June-a PSM zirna kalpui dan tur an thlirho a ni.

*BATIST KOHHRAN THUTHAR:Christian Hospital Serkawn-a M.O a thawk turin  Dr. Laldinsangi Hnamte, Zohnuai leh Dr. Goldie Lalrinsangi Sailo, Venglai Lunglei leh Nursing Tutor atan Nl. Laltlankimi Fanai, Chanmari, Lunglei te lakthar anni. Jubilee Bible School Principal thar Rev.H.Lalthlamuana chuan a hnathar Serkawn ah a zawm fel ta.

*GREEN MIZORAM DAY: Green Mizoram Sub-Committee chuan kumin June ni 11 ah Green Mizoram Day hman leh nise an ti. Kumin hian ollege of Veterinary Sciences & Animal Husbandry, Central Agriculture University, Selesih ah thing kumhlun chi phun nise tiin an rel.

*MIZORAM HRECHIANG ANG: Mizo hmeichhe zinga MLA thlan tlin hmasaber chu L.Thanmawii niin PC Ticket in Serchhip bialah kum 1978 khan thlan tlin a ni a, kum 1979 ah Aizawl East bial ah thlan nawn leh a ni. Hetih lai hi Mizoram  Union Territory ala nih hunlai a ni. L.Thanmawii hi 6 july 2012 khan kum 92 mi niin Aizawl Venghlui ah a boral. Kum 1987 MNF sorkar ah khan Hlimpuii MLA ah thlan tlin a ni a, chumi hnu kum 27 a liam a nimin khan hmeichhe MLA thar  Vanlalawmpuii Chawngthu thlan tlin a ni leh ta chauh a ni.

*HMANLAI VAWIIN: Kum 1756 vawiin angah khan Bristish chuan France lakah indo a puang.Khatih hunlai khan khawvel ram hrang hrang awptum a Europe sorkar ten hma an lak nasat lai a ni. He indo hian kum 7 a awh a, a sap tawng a 'Seven Years War' an tih kha a ni. Kum 1978 vawiin ang ah khan fiamthu thiam Charlie Chaplin ruang a thlan Lausanne, Switzerland atang a kar 11 misual in an ruk bo hnuah Swiss Police ten an hmuchhuak leh a ni.

*THUDIK CHIANG SA: Vawiin ah hian Mizoram ah chuan Sabath serh thin kohhran ten inkhawm an nei ang a, tin, chawhmeh leh sa zuar ten hralh tam loh hlau in an hman hlel ve thung bawk ang. Chhungkaw tam tak ah chuan insuk leh in tihfai nan hun hman a ni bawk ang. Thing tlang lam a kut hnathawktute pawn chawhnu lam haw hma ni ah an hmang ngei bawk ang.
--------------
Lamtluang page like tur nangmah tiam in mi 8386 kan awm mek a, midang i like tir that chuan news kan update te pawh hi a phurawm ve thin. I nuih za chiah lo mahse zinkar atang khan lawmna tur thil zawng la nileng a i hun hman a ti nuam ngei ang. Ni hman nuam vek ule. I comment kan chhiar ve chak a nia.

Pix: Thlalak kan rawn tarlan hi BJP PM candidate Narendra Modi an nimin a MP a thlan tlin a nih hlim a, a nu Heeraben Modi (kum 95) hnenah kalin malsawmna a va dil lai a ni. Vai ho hian nu leh pa zah hi an la na em em a, entawn atan a thil tha a ni.

Narendra Modi seek blessing from her mother Heeraben Modi (95)
Photograph: Saurabh Das/AP