1st November 2013 news in Mizo

Latest News collection in Mizo language:

MIZO TAWNG A CHANCHINTHAR LAWRKHAWM

*Vawiin hi Andhra Pradesh, Karnataka leh Kerala state te din champha (state formation day) a ni.

 

*Prof.J.V Hluna leh a thuihruai MNF General Secretary 3 leh midang thenkhat ten MNF chhuahsan in Congress party ah vawiin hian lawmluh anni dawn nia sawi a ni. Prof. J.V Hluna te hian nikum Nov ah khan MPC atanga chhuak an party dinthar MPC(Reformed) chu MNF party nen an lo insuihfin pui tawh a nih kha. Prof.Hluna ten MNF an chhuahsan na chhan hi MPC leh MNF thawkho turah an duh anga thil a kal loh vang niin mi tam tak chuan an ring.

 

*Vawiin atangin Mizoram leh Madhya Pradesh a Assembly Election a MLA din tum te tan nomination a tih tan theih ta e.

 

*US sorkar thuruk ti put ru tu Edward Snowden chu Russia sorkar in venhimna(asylum) a pek atanga thla 3 hnuah 1 Nov atang hian Russia ram a company lian tak 1 hnuai ah hnathar hmu in web developer hna a thawk tan dawn a ni.

 

*US Federal Aviation Administration(FAA) chuan thlawhna passenger ten thlawhna chhung ah electronic hmanrua (smartphone, tablets, iphone etc) an hman an phalsak tawh dawn. FAA hotuten he dan thar an hman tur an sawi dan chuan 10,000 ft hnuai lamah pawh electronic hmanrua te hi hman phal a ni tawh ang a mahse phone call dawn leh siam erawh chu khap chhunzawm zel a la ni ang an ti. He dan thar hi kalpui anih dawn chuan airlines operator ten an thlawhna electronic khawl in a tihbuai theih loh tur a an thuam that erawh a ngai phawt dawn a ni.

31st October 2013 news in Mizo

Latest News collection in Mizo language:

MIZO TAWNG A CHANCHINTHAR LAWRKHAWM
*Zanin zanlai atangin India ram pumah petrol man 1 Litre zelah ah Rs.1.15 in tihhniam a ni dawn a, Diesel man 1 litre zelah Paise 50(Duli) in tihsan a ni thung ang.
 
*All India Congress Committee (AICC) general secretary Luizinho Faleiro in thuthar lakhawmtute a hrilh danin Mizoram Assembly election 2013 lo awm tur ah UPA Chairperson Sonia Gandhi chuan 18 November ah Lunglei ah a campaign dawn a, 21 November ah Rahul Gandhi chuan Champhai ah leh Kolasib ah te tlawh in a campaign dawn a ni. Prime Minister Manmohan Singh an Mizoram a tlawh hun tur chu la tihchian tur a tih a ni. Heng Congress party hotuten mipui hma a thu an sawi hunah Mizoram People's Forum (MPF) local forum ten an kaihruai dawn em tih zawhna chu Special Protection Group (SPG) in a kaihhruaina a siam ang a kalpui a ni ang tiin Congress secretary hian a chhang. 2008 a Mizoram inthlan ah khan COngress hotu lian ten Mizoram a an rawn campaign khan MPF in dan a lo siam an zawm that loh avangin sawiselna nasa tak a lo awm tawh a nih kha.

*FORBES TOP 10 MOST POWERFUL PERSON
US a Business magazine 1 Forbes in khawvel a mi thiltithei ber (most powerful person in the world) a thlan chhuah top 10 a lang te chu:
1.Vladimir Putin (President, Russia)
2.Barrack Obama (President, USA)
3 Xi Jinping (General Secretary, Communist Party, China)
4.Pope Francis (Pope, Vatican)
5. Angela Merkel (Chancellor, Germany)
6. Bill Gates (Co-Chair, Bill & Melinda Gates Foundation, USA)
7.Ben Bernanke (Chairman, Federal Reserve, USA)
8. Abdullah bin Abdul Aziz Al Sand (King, Saudi Arabia)
9.Mario Draghi (President, European Central Bank)
10.Michael Duke (CEO, Wal-Mart Stores)

*India zalenna atana beitu ropui leh Mizorama freedom fighter awmchhun Pu Darthawma, Chanmari, Lunglei chawimawina hun chu vawiin khan Heritage Foundation, Assam leh YMA Sub. Hqrs. Lunglei tawngkawpin YMA Conference Hall, Lunglei-ah hman a ni a, he hunah hian Lunglei bawrhsap Pu V.Sapchhunga chu Khuallian niin Maj. Gaurav, 2IC, 28 AR Lunglei leh Pu Hurui Zeliang, Dy. Speaker, Naga HOHO te chu Khual Zahawm an ni. -Vulmawi

 

*CRPF HNUAIAH CONSTABLE HNA RUAK
Kum 2014-2015 chhung atan CRPF-hnuaiah India ram hmarchhak mite tan Constable (Technical/Tradesmen) hna hrang hrang a ruak a; diltu chu thiamna lamah Pawl sawm pass (matriculation), ni 01.01.2014-a kum 18-23 inkar a ni tur a ni a, ST tan kum nga leh OBC tan kum thum ngaihnatthiam (relaxation) an ni ang. Dilna hi Application Form duansa hmangin ni 11.11.2013 thleng thehluh theih a ni. Hrechiang duh tan CRPF website- www.crpf.nic.in- ah leh Directorate of Information & Public Relations Office, Treasury Square, Aizawl- ah zawhfiah theih a ni e. -DIPR

 

*Mission Veng Youth Adventure Club-a hruaitu pahnih, Vanlallawmzuala Leader leh PC Lalramengmawia Dy.Leader te chuan tukin zing Dar 6:00 khan Thirsakawr hmanga Saiha thlen tumin Aizawl an chhuah san. -Maro Colneya Bungsut via SPECIAL REPORT GROUP

 

*Vawiin khan Assam a Goalpara District a Krishnai khua a national highway 37 dangchat tuten bus ah hal avangin police ten hnawhdarh an tumna lamah silai hmetpuak in mi 1 an kaphlum a mi 5 in hliam an tuar bawk.

 

*Vawiin ah hmanni lawk a Patna a bomb tipuaktute zing a rinhlelh Mehram Alam chu National Investigation Agency(NIA) te kut a awmlaiin a awmna chin hriat loh in a put ru bo.

 

*Supreme Court of India chuan Centre leh State sorkar hnenah thupek chhuah in civil servants ten an post chelh hun tur chhung bithliah thlap na tur thla thum chhung a siam turin a hriattir. He dan hi hman a nih chuan politician ten an duh duh huna civil servants te an sawn kual thin hi a tawp theih court chuan an beisei a ni. SC vek hian IAS officer te posting, transfer leh hrem dan tur bakah politics a an inrawlh theih lohna tur kalphung nghet dan siam turin Parliament a hriattir bawk.

 

*Vawiin hian Gujarat CM Narendra Modi chuan khawvel a milim sangber tur Sardar Vallabhbhai Patel lim bronze a siam tur chu an state chhung a Sardar Sarvoar Dam, kamah a hawnna inkhawm a neihpui dawn. He milim siam tur san zawng hi 182 metres niin a siam manah Rs.Vaibelchhe 2074($ 340 million) hman tur a chhut a ni. An ruahman anga siam zawh a nih chuan khawvel a milim sangber a nih dawn bakah a milim len zawng pawh statute of liberty, US a mi let hnih ni tur a duan a ni.

 

*Thla hmasa lawk a Muzaffarnagar district, Uttar Pradesh a tualchhung mite intihbuai vanga mi 60 chuangin nunna an chan phahna leh mi 40,000 chuang te mahni inlum pawh luah thei lo a an vahvaihna hmun ah khan nimin tlai ah buaina thar chhuak leh in mi 4 in nunna an chan leh, thi zingah hian hmeichhia 1 a tel. Buaina thar chhuah leh chhan ah hi Mohammadpur khaw tlangval pakhat Hussain Kalan khaw miten an lo sawisa a, hliam tuar tlangval chuan an khaw lamah a haw hnuin a va zualko ta a tichuan heng khaw 2 te hi an in tualvuak leh ta chiam ni a sawi a ni. He buaina hi police ten khap mit tawh in buaina dang chhuak palh thei tur vengin an chenchilh mek a ni.

 

*MISS ASIA PACIFIC 2013 AH INDIA NULA THLAN TLIN A NI
India nula Faridabad a mi kum 21 a upa Srishti Rana chu nizan khan Miss Asia Pacific 2013 atan South Korea ah thlan tlin a ni. Amah hi zirlai a la ni a Miss Asia Pacific 2013 lallukhum hi Miss Asia Pacific 2012 nilai India nula tho Himangini Singh Yadu chuan a hlan a ni. Miss Asia Pacific contest ah hian 2000 khan Bollywood filmstar Dia Mirza pawh thlan tlin a lo ni tawh a ni. Tuna Miss Asia Pacific 2013 lo nita Srishti Rana hian Best National Costume award pawh dawng telin Arawn chang/hmul a siam mermaid dress nen a in lan a ni.

----------------

Facebook ah Lamtluang page hi i lo like ve dawnnia

28th - 30th October 2013 news in Mizo

News collection in Mizo language:

MIZO TAWNG A CHANCHINTHAR LAWRKHAWM

30.10.2013
*World Bank leh International Finance Corporation ten an chhut danin India ram ah Delhi chu sumdawnna company din tum te bultan nan a awlsam ber a Kolkata chu bul tan nan a harsa ber an ti. Delhi ah hian company register nan ni 32 nghah angai a chutih laiin sumdawnna khawpui lian dang Bengaluru ah chuan ni 40 chuang a duh thin thung a ni. India khawpui te zingah Hyderabad chu sumdawnna company din tawh tihtawp duh te tan hun a duh rei lo ber bawk niin an chhut. Sumdawnna company bultan awlsam dan indawt te chu Delhi, Patna, Jaipur, Hyderabad, Bubaneshwar te an ni.
 
*Lonely Planet chuan 2014 a khawvel hmun hrang hrang khualzin ten an tlawh nasat tur hmun thlang chhuak in Sikkim chu 'Best region to visit in 2014' ah an thlang a, 'Best countries to visit in 2014' ah chuan Brazil thlang chhuak in 'Best cities to visit in 2014' ah Paris an thlang chhuak bawk.
 
*LPS thupuangtu thin leh AMC a councillor ni mek Lalmalsawmi(Mali) chu MNF ticket in Tawi consituency ah a ding dawn ni a sawi a ni, helai bial hi Home Minister R.Lalzirliana bial vawn lai mek a ni.
 
*Lungsen khaw mipuite chuan an khawchhung ah National Highway kaltlang tir a nih loh chuan tun tum MLA inthlan lo awm turah hian an khua ah eng party mah campaign an phal dawn lo a, sorkar lam atanga chhanna an hmuh loh phei chuan inthlan thleng a dodal inhuam a hmalak an tum. -DINGDI





*ISRO chuan kumin november 5 hian sikeisen(mars) ah thlalem kahchhuah an tum. India mithiam te hi an hlawhtling a nih chuan khawvel a ram hrang hrang mars mission zing a budget senso tlem ber tura beisei a ni.

*Tukin khan Manipur Chief Minister Okram Ibobi Singh chenna Imphal bul hnai a bomb puak ah mi 2 an thi a hliam tuar mi 7 chuang an awm. Nimin khan Imphal bazar lun lai ah bomb puakin mi 5 in hliam an lo tuar tawh bawk a ni.

*Tukin khan Bangalore atanga Hyderabad lam pana tlan Volvo AC bus mi 43 te chuanna chuan Andhra Pradesh chhung Mahbubnagar district ah oil tanker a su a bus hi a kang nasa hle a sawi a ni. Tun thleng a hriat theih chinah michuang zing a 30 te chu an kang hlum a rin an ni.

*Mizo National Front (MNF), Mizoram People Conference (MPC) leh Maraland Democratic Front (MDF) te chuan tun kum MLA inthlan lo awm turah hian thawhho tumin inremna thuthlung nimin khan an ziak fel ta. Hetiang hian bial chan tur an insem:

MNF:Hachhek, Dampa, Mamit, Kolasib, Serlui, Tuivawl, Ṭawi, Aizawl North-III, Aizawl East-II, Aizawl West-I, Aizawl West-II, Aizawl West-III, Aizawl South-I, Aizawl South-II, Aizawl South-III, Tuichang, Champhai North, East Tuipui, Serchhip, Tuikum, South Tuipui, Lunglei North, Lunglei West, Lunglei South, Thorang, West Tuipui, Tuichawng, Lawngtlai West, Lawngtlai East leh Saiha.

MPC:Tuirial, Chalfilh, Aizawl North-I, Aizawl North-II, Aizawl East-I, Champhai South, Hrangturzo, Lunglei East.

MDF:Palak
source:vanglaini

*Nimin zing khawvar hma, dar 1 vel khan Mausen, Lunglei district-ah Zokhumi in a kâng a, bungrua chuh hman awm loin a kâng ral. Mausen khawtlang chuan nimin khan in kâng neitute chhawmdawl hna an thawk nghal a, Mausen YMA-in Rs. 2,000, MHIP-in Rs. 1,000 leh bialtu MLA PC Lalthanliana'n silpauline leh rangva an pe a ni. - Vanglaini

*Vanglaini a Bichianna columnist leh Sabereka Khuangkaih magazine Editor ni mek R. Lalzarmawia (Zara ti a hriatlar) lehkhabu ziah 3-na 'Nangma Khawvel' tih chu lehkhabu dawr hrang hrang ah lei theih turin a awm ta e. Aman Rs.100 a ni.

 

29.10.2013

*Supreme Court of India chuan vawiin khan lungalhthei thubuai(coalgate scam) CBI in an chhui mek ah Prime Minister chu chhui tel ve ni rawh se tia FIR thehluh chu an hnawl a ni.

 

*Indian Air Force Vice Chief Marshal nilai mek Arup Raha chu 31 December 2013 atanga Indian Air Force Chief AIr Marshal thar turin an thlang fel ta, a ni hian Air Chief Marshal NAK Browne chu a thlak dawn a ni. Air Marshal Arup Raha hian 1974 khan IAF a zawm a ni.

 

*November thlaa ṭan tur, Mizo Idol 2013 chu October 31, Ningani thleng chauhin form a thehluh theih ta. Form la chhuak duh tan Zonet Office-ah Oct 31 hma hian a la lak chhuah theih a, theih luh ran erawh a ngai tawh hle. - Vanglaini

 

*Vawiin khan I & PR Auditorium-ah Disaster Management & Rehabilitation Department leh GeoHazards Society tangkawpin, lirnghing leh leimin vanga chhiatna thlen thulha Aizawl khawpui a nghawng theih dan zirchianna an buatsaih leh hemi kawnga mipuite inralrin theih dan turte sawihona hun an hmang.

Dr. L. Thomas Tobin (Public Policy and Geotechnical Engineering), Senior Adviser, GeoHazards International, California chuan Mizoram chu lirnghing na tak thlen theihna hmuna awm a nih avangin, Aizawl khawpui leilung awmdan te, chenna in sak dan leh mihring nuna pawimawh hrang hrang leh chhiatrupna thlen thulha ruahmanna kan neih sa atang te in; lirnghing, a tehnaa 7.0-a nain a khawih pawi theih dan turte zirchianna buatsaih a nih thu a sawi a. Hei hi lirnghing lo thleng tur hrilhlawk tumna lam nilovin, hemi chungchanga mipuiten kan dinhmun kan hriatchian nan leh ruahmanna tha leh inpuahchahna tha tak nen erawh chhiatna rapthlak zawk thleng thei tur nasa takin kan tikiam thei a ni, tih inzirtirna atana buatsaih a nih thu a sawi bawk.

GeoHazards Society hi tlawmngai pawl, Delhi a hmunpui nei niin, India ramchhunga lirnghing leh harsatna dang thlen hlauhawmna hmunah te state sorkar te nena tangruala mipuite himna tura hma la thin an ni a; a zawmpui tlawmngai pawl tho California-a hmunpui nei, GeoHazards International hi kum 1991-a din niin, kum 21 chhung ram hrang hrang 20-ah khuarel chhiatna thlen tamna hmunah te nunna chan zat tihniam turin mipuite hnena zirtirna leh inpuahchahna bakah, chhanchhuahna hnathawh kawngah ruahmanna tha nei turin hma an lak pui thin. Aizawl khawpui zirchianna hi he pawl pahnih inthlunzawm atanga mithiam 12-in thla ruk chhung an kalpui a ni.

He hun hi Pu P.C. Lallawmsanga, Principal Secretary, Disaster Management & Rehabilitation Department chuan kaihruaiin; Pu P.C.Lallianthanga, SP(MPRO) lehkhabu ziah, “Chhiatrupna Laka Inven Dan” tih chu a tlangzarh nghal bawk. He sawihona hunah hian Pi M.Zohmingthangi, IAS (Rtd), CEO, Aizawl Municipal Council, Pu Dominic Lalhmangaiha bakah, line department hrang hrang hotute leh tlawmngai pawl aiawhte an tel a ni. -DIPR

*Sorkar thupawimawh te a ruka pawn lam miin an lo hriat mai mai loh nan central leh state sorkar deparment office ah te NIC email service chauh hman ni turin India sorkar chuan hma a la mek. Tunah hian Dept of Electronics and Information Technology in hmalak dan tur an duang mek a kumin december atang chuan sorkar office indawr tawn naah private email-gmail,yahoomail,hotmail etc te hman a theih tawh loh mai thei a ni.

 

28.10.2013

*Samsung chuan India ram a an product zinga phone man to ber tur Galaxy Golden flip phone an tlangzarh ta. Samsung Galaxy Golden flip hi Rs.51,900 man niin dual-touchscreens a siam a ni. Android 4.2 operating system a hmag a 1.5GB RAM niin 1,820mAh battery a nei bawk.

 

*Directorate of Sports & Youth Services, Government of Mizoram Office chu Khatla atangin House No. B-163, Dawrpui (Sarawn Road) - ah sawn fel a ni ta tih Sorkar Department-te, Dak lehkha semtute leh mipuite hriattir in ni e.
Address :Directorate of Sports & Youth Services,
Government of Mizoram,
House No. B-163, Dawrpui (Sarawn Road),
Aizawl - 796001.

*Vawiin khan India leh Pakistan ramri Line of Control bul Uri Sector, Kashmir valley ah India sipai junior commissioned officer 1 kah hlum a ni.

 

*Vawiin khan Mizoram inthlanpui atana hmalak dante thlirhovin ECI Awareness Observer Pu Subramanian, IIS hovin Aizawl District Election Officer Dr. Franklin Laltinkhuma Office Chamber-ah Media Certification and Monitoring Committee (MCMC) meeting neih a ni.

He meeting-ah hian party leh candidate-te hamthatna tura chanchinthar ni awm taka pawisa chawia thuchhuah (paid news) a awm leh awm loh te, electronic media leh social media (Facebook, Twitter, YouTube, Whatsapp, etc.) kaltlanga campaign duh ten phalna an lak hmasak phawt tur a nih chungchang te, Mizoram chhunga chi leh chi inkara boruak thalo chawkchhuak thei zawnga thusawi leh ziah kawngah fimkhur a ngaih thu te sawi a ni.

Mizoram pum atan ECI chuan Awareness Observer pahnih a ruat a. Pu Subramanian hian Aizawl, Mamit, Champhai leh Kolasib District-te a vil dawn a ni. Ni 26.10.2013 (Inrinni) khan Aibawk Block Hqrs.-a Voters’ Facilitation Centre leh Aizawl South I, II leh III-a polling booth-te a tlawh a. Vawiin hian Aizawl North, East leh West a Constituency hrang hrang polling booth te a tlawh zui ang a, Mamit, Kolasib leh Champhai District te tlawhin an inbuatsaih dan leh hmalak dan te a thlirpui dawn bawk a ni.

Vawiin tlai khan ECI huaihawtin Mizoram puma District tina R.O. leh A.R.O. te nen nomination leh inthlan chungchangah Video Conferencing neih a ni bawk. -DIPR

*Vawiin Dt 28th Oct, 2013 hian Tv. B Lalzarliana, Champhai chuan Doctor of Philosophy (Ph.D), Centre for the Study of Social System (Sociology), Jawaharlal Nehru University (JNU), Delhi atangin a dawng. A thesis title hi 'Confronting the Metropolis: A Study of Northeast Students in Delhi' tih a ni. Kan lawmpuiin kan chhuang em em e.

B Lalzarliana Ph.D (Sociology), JNU

*Nimin zing dar 9:30-12:30pm inkar khan Bihar khawpui Patna ah BJP PM candidate Narendra Modi campaign rally neih laiin hmun hrang hrang ah bomb vawi 8 a puak a, thi mi 6 awmin hliam tuar mi 100 chuang an awm. Bomb tipuak tu ah hian Indian Mujahideen te rinhlelh an ni.

22nd - 27th October 2013 news in Mizo

News collection in Mizo language:

MIZO TAWNG A CHANCHINTHAR LAWRKHAWM

27.10.2013

*Mizo Students Union(MSU) hruaitu ten Election commission hotute hnen a Mizoram atanga Tuikuk raltlan Tripura camp a awm mek te chu Mizoram inthlan lo awm tur a an awmna a pan chilh a vote thlak tir lo tur a an ngenna chu Mizoram Election Jt.Commissioner chuan tihhlawhtlin a harsat tur thu in MSU hruaitute a lo chhang. -Zalen

*Mizoram Batist Kohhran hnuai a Area Baptist Council(ABC) inkhawmpui chu hmun hrang hrang 13 ah zirtawpni zan atang khan neih tan niin zanin ah an tiak ang.

 

*Tuilian vangin Odhisa leh Andhra Pradesh state 2 ah te mipuite nunphung a khaihlak nasa hle, A:P ah hian tuilian leh ruahsur nasa vanga thizat chu nimin thleng khan 32 an tling tawh a ni.

 

25.10.2013

*Mizoram Assembly inthlan hun atan 25 Nov 2013 ah ECI chuan a sawn hma ta, vote chhiar ni atan 8-9 Dec 2013 a ni ang.

*Central YMA President hlui T.Sangkunga chuan Congress party a zawm. Nimin piah khan MPCC General Assembly Vanapa Hall ah lawmluh a ni.

 

24.10.2013

*Manipur a Armed Forces Special Power Acts hlih tir tum a kum 12 chuang chawnhei tawh Irom Sharmila chu nimin khan a vawi 1 na atan National Human Rights Commission memberten JN Hospital, Imphal ah an tlawh. Human right hotuten kum 12 hnu a an tlawh chauh hi mitam tak chuan an dem hle a ni.

 

23.10.2013
*Burma rama mipui rorelna awm theihnan a beitu lar tak Aung San Suu Kyi chuan kum 1990 a European Union in Sakharov Prize for Human Rights an pek chu European Parliament, Strasbourg ah a nimin khan kum 20 hnuah a dawng ve ta chauh a ni. Kum 1990 a he award pek a nih lai khan Myanmar sipai sorkar in Aung Suu Kyi hi house arrest a an dah lai kha a ni.

 
*Mobile phone siamtu lar Blackberry chuan Blackberry Messenger(BBM) leh iOS & Android phone hmangtute tan an service inhmantawm an phal ve ta. He service thar hi hmang duh tan Blacberry website ah in register theih a ni e.

*Nimin zing dar 2:45 atang khan Tamil Nadu a India nuclear power plant sawihlawh tak leh a khaw mipui ten vawi tam an lo dodal tawh thinna Kudankulam power plant atangin kawlphetha 160MW siam chhuah tan a ni ta a, power siamchhuah te hi southern grid ah thlun zawm nghal a ni. Atomic Energy Regulatory Board (AERB) chuan 500MW siamchhuah phalna a pe tawh bawk a ni. He nuclear power plant hi 2001 khan bul tan a ni a, kum 12 hnuah hman tak tak a ni ta chauh a ni.

*Mukesh Ambani enkawl Reliance Industries chuan UK a 2 Sisters Food Group (2SFG) te nena a tang tlangin India ram khawpui hrang hrang ah chicken(arsa) restaurant thar hawn an tum, a hming ah 'Chicken came First' tih a ni ang a, KFC (Kentucky Fried Chicken) el pha tura rin a ni.

 

22.10.2013

*Lok Sabha Speaker Meira Kumar chuan RJD hotupa Lalu Prasad leh JD(U) party mi Jagdish Sharma te chu Bihar a ranchaw leina tubuai an awrh avangin Lok Sabha M.P annihna atangin nimin khan a chawlhtir/ban. He mi hma hian Congress Rajya Sabha MP Rasheed Masood chu court thubuai a neih vangin MP anihna atanga chawlhtir/ban a lo ni tawh bawk a ni.

 
*Indian Institute of Management Indore (IIM-I) ah Fellow Programme in Management (FPM) - 2014 zir tum tan dil theih ta e. Dilna form hi 15th November 2013 thleng thehluh theih a ni ang. Hrechiang duh tan a hnuaia link ah hian en theih a ni e.
http://www.iimidr.ac.in/iimi/pages/institute/fpm-admission.php

 
*Kum 2013-15 chhunga Central YMA office bearer atana thlan tharte chu hruaitu hluite'n nimin khan CYMA office-ah OB meeting room-ah mawhphurhna an hlan. Mawhphurhna inhlan zawhah hmalak dan turte an sawiho zui nghal a ni.

 

*Nimin khan Justice Lakshmi Kanta Mohapatra chu Manipur High Court Chief Justice thar atan lakluh a ni. Amah hi Allahabad High Court a Judge tanglai a ni.

 

*Dinhmun chhe tak emaw natna hreawm tak i vei pawh a ni thei, beiseina nei tawh lo hial pawh nila, lei hnuaia chatuan khawvar nghaka feet 6 hnuaia awmte ai chua i ropui zawk asin, tih thei ila nei i ke kha pen khat in pen det zel la hawikir ngai lo la lawmna leh damna hun thlen hun i la nei dawn asin.

 

*NABARD chuan vawiin hian National Institute of Agriculture Marketing (NIAM) nen tangrualin Kolasib AMFU Hall-ah Loneitute hnathawhna kawng hrang hranga kawhhmuhna tur training an buatsaih dawn a. Zing dar 9 ah tannin he hun hmanpui tur hian NABARD hotu, RK Brahma, Lead District Manager bakah hotu dangte Aizawl atangin an kal dawn a ni.

NABARD hian tun hnai mai khan Kolasib-ah office hawngin Asst. Project Manager-in a thutchilh a ni.

 

*Sept 2013 chhung khan Mizoram Excise & Narcotics Dept report danin zu zuar mi 185 man anni a, zu rui mi 5 man an ni.