21.2.2018 (Nilaini/Wednesday) Aizawl: Khawvel huap Pathian thuhriltu lar Rev.Billy Graham (99) chu India sana a Nilaini zan dar 6 vel khan an chenna Montreat, North Carolina, US ah a boral. Lamtluang thulakna in a tarlan danin Evangelist Billy Graham hian kum 1992 atang khan Parkinson desease (natna) a vei a, chumi hnu chuan rawngbawlna lamah zawi zawiin a chawl chho tan a, kum 2010 April thla a Billy Graham Library cheithat leh hlanna an neih tum a mipui hmaa a lan bak chu pawn a chhuak ta mang lo a ni. Kum 2013 khan a birthday vawi 95-na niah TV kaltlangin Pathian thu a sawi a, chu chu a sermon sawi hnuhnun ber a ni ta a ni.
Rev.Billy Graham hi a nupui Ruth Graham chuan kum 2007 khan a boral san tawh a ni. Rawngbawltu ropui Billy Graham hian a damlaiin khawvel ram hrang hrang 185 chuangah crusade vawi 400 chuang a nei a ni.
A THLANAH ENGE INZIAK DAWN?
Pathian in rawngbawl tur a a kohna chu a theih na sangberin a ti hlawhtling thin a, www.facebook.com/Lamtluang in Billy Graham Evangelistic Association a belhchian danin a thlan lungah "Lal Isua Krista chanchintha hriltu" tiin an ziak dawn niin an tarlang a ni.
A LAICHIN TUTE NGE A KALSAN?
Billy Graham hian a farnu Jean Ford, a fanute 3- Gigi, Anne leh Ruth, a fapate 2 - Franklin Graham leh Ned Graham te leh a tute a kalsan a ni.
ENGTIKAH NGE VUI A NIH DAWN?
Amah vuina inkhawm hi anupui an phumna Billy Graham Library ah neih tur a ruahman a ni a, a hun tur chu nakina la puan chian tur a ni.
RALNA LEH HRIATRENGNA ENGTIA THAWN TUR NGE?
A rawngbawlpui Billy Graham Evangelistic Association te chuan mipuite hnenah thuchah siamin amah sunnan pangpar aiah ama puala thilpek emaw hriatrengna thu te online a thawn mai turin ngenna an siam a, ralna leh hriatrengna thu thawn/ziak duh tan an website https://billygraham.org ah thawn mai theih in an siam a ni. Tin, daka thawn duh tan Billy Graham Evangelistic Association, 1 Billy Graham Parkway, Charlotte, NC 28201, USA.
A HUN TAWP LAMAH ZAWHTE NEN AN INKAWM THIN
Billy Graham fapa Franklin Graham chuan nikum 2017 July ni 7 khan facebook page ah a pa hriselna dinhmun chungchang a tarlang a, a pa chuan a kum 99-na a hmang chho dawn mek a, a hriselna pawh a tha tho nachungin a kum te a upat ve tawh avangin harsatna hrang hrangin a tlakbuak thu a sawi a, a farnu leh a fanu leh fapa te leh a tu leh fa ten a kan reng thin thu leh, A ma pual pastor Rev.Dr.Don Wilton pawh in chawhkar tin a tlawh thin thu a sawi. A pa chanchin a tarlannaah hian a pa kum 90 tlin lawmnana a tu leh faten zawhte "Kitty" ti a hming an sak an pek chu Billy Graham pawn chhuak thei tawh lo tan a thian tha tak a nih thu a tarlang tel bawk a ni.
#billygraham #lamtluang #mizonews
No comments:
Post a Comment