23rd May 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

23.5.2015

GOOD MORNING ‪#‎MIZORAM‬: LAMTLUANG ZINGKAR CHANCHINTHAR LAWRKHAWM
*Vawiin chawhma dar 11 hian Madras University Centenary hall ah AIADMK hotunu J,Jayalalithaa chu Tamil Nadu Chief Minister thar atan lakluh a ni dawn.

*Thlaleh June ni 16 atangin Aizawl Municipal council chuan AMC huam chhung ah Property tax a la tan dawn.

*Dr. Lalramliana (Deptt. Of Zoology, PUC), Dr.Lalnuntlunga (Deptt. Of Environmental Science, MZU) & Samuel Lalronunga (Deptt. Of Environmental Science, MZU) te chuan sangha chi thar chu Chhimtuipui atangin an hmu chhuak. He Ngha-lung-bawk / Ngha-lung-bet (Psilorhynchus sp.) chi thar hi a hming atan an hmuhchhuahna lui hming chawiin Psilorhyncus kaladanensis an vuah.

*Nimin chawhma khan Central YMA leh Disaster Management & Rehabilitation Depaetment buatsaihin Champhai Venglai Community Hall-ah Community Awareness Programme on Disaster Management cum Training For YMA Volunteers neih a ni. (DIPR)

*Tukin dar 6 vel khan Assam a Kokrajhar district a Salakati leh Basugaon inkar ah Sifung khualzin phur rel (train) a chesual a, he rel hi Alipurdwar leh Guwahati inkar a tlan a ni. Thi leh hliam an awm leh awm loh hriat theih ala ni lo a ni.

*Nimin khan Defence Minister Manohar Parrikar chuan Jammu & Kashmir state tlawh in Leh khua a thleng a ni. Lamtluang thulakna in a tarlan danin Defence Minister hi Army Chief General Dalbir Singh Suhag leh General Officer Commanding in Chief of Northern Command Lt Gen DS Hooda ten an tawiawm a ni. Vawiinah Jammu bial a tlawh leh ang.

*Islamic State firfiak pawlte chuan nimin a Saudia Arabia khawchhak lama Shia mosque a thihchilh bomb puak chu an mahni tih niin an sawi. Lamtluang chhiar tu ten in lo hriat atan he bomb puak avang hian mi 21 chuang in nunna an chan a ni.

*Assam Education minister Sarat Borkotoky chuan June thla chhung in an state chhung a zirtirtu hnaruak sang sarih te chu hnawhkhah vek a ni dawn niin a sawi. Heng zirtirtu hnaruak te hi Prmary leh Upper Primary school a thawk tur te anni.

*Tukin hian Forex rate atanga chhut in India pawisa Rs.63.49 leh US $1 a intluk a ni.

*Mumbai khawpui a lunghlu a sumdawng lar tak Hare Krishna Exports Pvt. Ltd te chuan Muslim tlangval MBA zirzo in an company a hna a dil an chhanlet na ah Muslim ni lo chauh hnathawk a an chhawr thin thu an hrilh. Lamtluang thulakna in a tarlan danin he an chhanna hi sakhaw thleibikna thil ni a lan avangin sorkar in a enfiah mek a, a tul angin he thil hi chhuichian a tum a ni.

*European Union chuan Ukraine ram ei leh bar siamthat nan Euro tluklehdingawn 1.8 puk tir turin inremna a siam. EU leh Urkraine te hian Riga ah inremna an ziak a ni.

*Department of Science and Technology in an tarlan danin India chu scientific publication lamah khawvel a parukna a ni.

*Vawiin ah India Prime Minister Narendra Modi kahhruaina hnuaiah Chiefs of Central Information Commission (CIC) leh Central Vigilance Commission (CVC) thar ruat turin meeting neih a ni dawn.

*Columbia sorkar sipai ten nimin khan Marxist helpawl mi 18 an that.

*Ireland ramah neih inang inkawp te dan anga inneih phal sak chi anni em tih ngaihdan khawn khawmna vote thlak chu nimin khan zawh a ni a, vawiinah vote tla te hi chhiar a ni ang a, mipui ten vote hmang a an ngaihdan an lantir atangin an ramah neih inang inkawp te hmalam hun tur a hriat theih dawn a ni.

*Kum 1430 vawiin angah khan Joan of Arc chu Burgundians ten an man a, Sap ho (English) hnenah an hralh a ni. Kum 1915 vawiin angah khan Indopui I-na hunlai a ni a, Italy chuan tangrual (Allies) zawmin Austria- Hungary lakah indo a puang nghal. Lamtluang chhiar tuten in lo hriat atan kum 1949 vawiin angah khan West Germany ram din a ni.

*Mizoram hrechiang ang: Mizoram a Mizo zingah MBBS zir zo hmasaber chu Dr.Tlanglawma Hmar a ni a, kum 1953 khan a zir chhuak a ni. Lamtluang chhiar tu ten in lo hriat tel atan Mizoram hmeichhia te zingah Dr.Lalengi Khiangte chu MBBS zirchhuak hmasaber a ni a, kum 1964 khan a rawn zir chhuak a ni.

*Lamtluang hi facebook ah i la like lo a nih chuan www.facebook.com/Lamtluang hi hawng la i lo like ve dawnnia.

*CT GROUP CUP KHARNA HUN HIGHER & TECHNICAL EDUCATION MINISTER IN HMANPUI
Nimin chawhnuah khan Aizawl Lammual ah CT Group Cup Inter Branch YMA Football Tournament Final neih a ni a. He tournament kharna hunah hian Higher & Technical Education Minister Pu R.Romawia chu khuallian ah hman a ni.

CT Group Cup tournament hi MFA leh CYMA tangkawp te’n CT Group of Institutions, Jalandhar, Punjab in sum a thawh hmanga an huai hawt a ni a. He tournament a khel tur hian Branch YMA Team 191 an inziak luta, Armed Veng leh Lengpui ten final lutin Champion Trophy leh Sum fai Rs. 1,00,000/ an inchuh a. A chaklo zawk hian Rs.50,000/ leh Trophy an dawng thung ang.

CT CUP kharna hun a thusawitu Higher & Technical Education Minister Pu R.Romawia chuan mi thilphal te inpekna in Football Tournament liantham te a khat tawk in buatsaih a la ni zel chu lawmawm a tih thu sawiin hei hian rah tha tak chhuah mek zelin India rampum pui huap ah Mizoram a ti hming tha hle a ni a ti. Mizoram sawrkar in thalai te rual awhna au aw chhangin khelmual tha a siam sak a, heng khelmual te hi tangkai taka hman chhunzawm a nih theih nan mi thilphal te an pawimawh dawn chauh a ni a ti. Aizawl FC in I-League a khel thei tur leh India National Senior team a Mizo tlangval 5 ngawt thlan an ni chu Mizo te tan inchhuanna tham a tling a ti a ni.

Thusawitu dang, Health Minister Pu Lal Thanzara, MFA President ni bawk chuan Football Tournament lian tham chu talent haichhuahna rem chang a nih avangin a hlut thu a sawi a. MFA in ruihhlo do na kawnga CYMA a lungrualpui zia lantir nan MFA sum Rs 10,000/- CYMA hotute hnenah a hlan nghal a ni.

CT Group Cup Tournament huaihawt nan hian CT Group of Institutions hian Rs 5 lakhs a tum a. Pu Mandir Singh, President, CT Group of Institutions leh a thawhpui te pawh in Final hi en ve in Tournament hi hlawhtling hle a an hriat thu an sawi a ni. (DIPR)

20th, 21st & 22nd May 2015 news in Mizo

Latest news collection in Mizo language (Online news update from Mizoram)

MIZO TAWNG A CHANCHINTHAR LAWRKHAWM

*TAMIL NADU CM BANG
Tukin dar 8:30 khan Tamil Nadu Chief Minister nilai O.Panneerselvam chuan governor hnenah a banna a thehlut a, governor K.Rosiah hian a banna thehluh hi a lo pawm sak a ni. Lamtluang chhiar tuten in lo hriat atan tukin dar 7 khan AIADMK MLA te chuan legislature party leader thar atan J.Jayalalitha an thlang a, naktuk ah Chief Minister atan lakluh nghal a ni ang. CM Panneerselvam hian banna a thehluh chhan chu an party hotuber Jayalalitha tan CM nih leh theihna hun a hawn sak a ni.

*VAIVAKAWN BANK RAWK A NI
Aizawl Vaivakawna Mizoram Rural Bank chu Thawhtanni zan khan rawk a ni a, cheng nuai 10 a bo.

Bank Asst. Manager Lalthanmawii’n Vaivakawn Police Station-a FIR a thehluh danin, Thawhtanni, ni 18 tlai dar 4:30 vel khan an Bank chu an khar a, a tuk ni 19-a an hawn leh chuan Bank-ah chuan tute emaw an lut tih hriat a ni a, kawngkhar pakhat chu tihchhiat a ni. Bank-a lut te hian thil an hai a, mahse, pawisa an dahna safe chu an hawng thei lo niin an sawi a, an Bank chu rawk a ni tih an hriatin an pawisa kawl a kim leh kim loh an endik a, hetah hian Rs. 1,000 note 1,000, a vaiin Rs. 10,00,000 chu a kim lo tih an hmu chhuak niin a sawi.

Source: Lalhmachhuana Tochhawng via DINGDI group (FB)

*TUIALHTHEI MAN THAR
Ni 15.5.2015 zanlai atang khan a hnuai ami ang hi Mizoram hmun hrang hranga tuialhthei hralhna man thar a ni:

Sl.No - Locations - Revised RESP of MS - XP - HSD
1. Aizawl: 65.43 - 68.43 - 51.66
2. Vairengte/Mamit/Saitual: 65.16-68.16 - 51.51
3.Thenzawl/Serkhan/Ngopa; 65.10 - 68.10 - 51.46
4. Champhai: 65.64 - 68.64 - 51.79
5. Kolasib: 65.24 - 68.24 - 51.56
6. Lawngtlai: 65.34 - 68.34 - 51.61
7. Lunglei: 65.43 - 68.43 - 51.66
8. Serchhip: 65.01 - 68.01 - 51.61
9. Hnahthial: 65.35 - 68.35 - 51.62
10. Saiha: 65.46 - 68.46 - 51.68

 

*GOVERNOR THAR LAKLUH DAN TUR SAWIHO
Mizoram Governor thar tur Lt. General Nirbhay Sharma PVSM, UYSM, AVSM, VSM (Retd). lo thlen huna hmuah dah tur leh thu tiam lak (Swearing-in) programme relin nimin khan Chief Secretary Conference Room-ah Pu K. Lalnghinglova IAS, Commissioner & Secretary hovin sorkar mi pawimawhte an thukhawm.

Pu Nirbhay Sharma hi Arunachal Pradesh Governor ni lai mek a ni a, Mizoram Governor tur atana rawn sawn a ni. Ruahhman lawk ang chuan Governor thar tur hi May 25,2015 (Thawhtanni) ah Lengpuiah sipai chawimawina famkim ‘Guard of Honour’ nena hmuah a ni ang a. A tuk ni 26 May, 2015 (Thawhlehni) chawhma dar 11:00 ah rinawmna thu tiamin Governor atan lak luh a ni ang.

Mizoram Governor thar tur Lt. General Nirbhay Sharma hi Kum 1946 ah Lucknow (Uttar Pradesh) - ah a piang a. Madras University atangin M.Sc & M.Phil Defences Study a zir chhuak in kum 1966 ah Indian Army ah commissioned a ni a, chanchinbu hrang hrang-ah Article a ziah te chu an chhuah nasa thin hle a ni.

A nupui Pi Jyotsna Sharma nen fapa Abhay Sharma leh fanu Nupur Sharma an nei a ni. (DIPR)

21.5.2015

*MHIP GEN.HQTRS HRUAITU THAR TE
Mizo Hmeichhe Insuihkhawm Pawl (MHIP) hruaitu thar te:

President : Lalthlamuani
Vice President : Dr.Thanpuii
Gen. Secy : Saipuii
Asst. Secy : T.Lalthangpuii
Treasurer : Lalengkimi
Fin. Secy : Lalngaihawmi (Seni)

 

*KARLEH THAWHTANNI AH LARSAP THAR LALUT DAWN
Lamtluang in thu kan lo hriat danin Mizoram larsap (governor) thar tur a ruat Lt.Gen (Retd.) Nirbhay Sharma chu karleh Thawhtanni (May ni 25) ah Raj Bhavan Aizawl ah rinawmna thu tiam tir a lakluh a ni dawn. Kan rawn tarlan tawh thin angin amah hi Arunachal Pradesh atanga rawn insawn tur a ni.

 

20.5.2015

*JAYALALITHAA CM LEH DAWN
AIADMK hotunu sum leh pai lakluhna lama court thubuai a neih avanga Tamil Nadu Chief Minister atanga bang ta J.Jayalalithaa chu May ni 22 hian vantlang hma ah a inlan leh dawn. Hemi ni hian Chennai a Anna salai ah an party hruaitu 2 te lim ah pangpar a dah dawn a ni. Lamtluang thulakna in a tarlan danin Jayalalithaa hi May ni 23 ah Chief Miniater atan lakluh a ni dawn niin sawi a ni bawk.

*India Prime Minister Narendra Modi chuan a kaihhruai sorkar in kum 1 a tlin denchhenin vawiin ah a cabinet minister zing a mi pawimawh zual te nen inhmukhawmna a nei dawn. An inhmuhkhawmna tur ah hian union minister lawk zual Rajnath Singh, Sushma Swaraj leh Arun Jaitley te chu tel tur chiang sa anni. PM hian tunhnai a ram 3 a tlawh report pawh a pe tel dawn ni a sawi a ni.

*ASSAM AH SUKHOI-30 THLAWHTHEIHNA TLA
Nimin khan Assam a Nagaon district a Juria khua ah Indian Airforce thlawhtheihna Sukhoi-30 chu a tla a, pilot leh co-pilot te chu nungdam in thlawhna tla kar atang in an vakchhuak thei a, thlawhna tlakna bul hnai a lo awm civil mi 2 erawh in hliam an tuar. Lamtluang chhiar tuten in lo hriat atan he thlawhna tla hi chhui chiang turin court of inquiry din a ni tawh a ni.

19th May 2015 news in Mizo

Latest news collection in Mizo language (Online news update from Mizoram)

MIZO TAWNG A CHANCHINTHAR LAWRKHAWM

19.5.2015

*VAIVUT THLI TLEH VANGIN MI 7 BORAL
Rajasthan ah vaivut thli natak a tleh avangin mi 7 ten nunna an chan a, mi 16 ten hliam an tuar bawk. Nunna chanta te hi Bharatpur ami 5 anni a, midang 2 te chu Bikaner khu a mi te anni. Vaivut thli hian bang leh in te a tichhia a hemi avang hian nunna chan an awm phah ta a ni. Lamtluang chhiartu ten in lo hriat atan leh kan page a news kan tarlan thin group/page/whatsapp lama lo lachhawng thin credit pawh min pe ngai chuang lo te pawh huam in Rajasthan hi thlaler hnaih a awm a nih avangin vaivut thli tleh hi an tan a hlauhawm em em bik a ni.

*THLIPUI LEH RUAHPUI MIZORAM-AH THLENG THEI A NI
National Disaster Management Authority, Govt. of India in alert/warning an chhuah danin District Disaster Management Authority Aizawl chuan heng warning te hi mipui hriat atan a tarlang. May 19 - 20 hian Mizoram hmun thenkhatah thlipui leh ruahpui thleng tura rin a nih thu leh 21-22 May hian ruah nasa taka a sur rin a ni.

Hemi chhung hian mitin fimkhur turin an hriattir. (DIPR)

*FOOTBALL KHELTHIAM BORAL THUT
F.Lalengmawia S/o.F.Thankama, Chanmari, Lunglei chu tukin ah Thuamluaia Mual ah TKP sport tur atan football an practice laiin a chau thut a, nikhawhrelo in a awm a, damdawiin panpui a nih hnuah a boral. Amah hi 2nd MAP a constable nilai a ni a, vawiin ah vui a ni ang.

Source: Gilbert Renthlei via Lunglei Chanchinthar group

*ISCE CL 12 TOPPER IN FULL MARK HMU TREP
Nimin khan Indian School Certificate Examinations class XII result tihchhuah a ni a, India ram pumah Arkya Chatterjee, Vivekananda Mission School, Kolkata ami chu pakhatna niin full mark 400 ah mark 399 a hmu a ni. Lamtluang thulakna in a tarlan danin subject 3 - Mathematics, Physics leh Computer Science ah te full mark (100/100) a hmu a ni. Aman a sawi danin ISCE a hmachhawn dawn avang hian nitin dar 10-12 lehkha a zir thin a ni.

18th May 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

18.5.2015

 

*MUMBAI AIRPORT AH NIKHAT CHHUNG THLAWHNA LUT LEH CHHUAK 851
Kar hmasa Zirtawpni khan Mumbai Airport ah thlawhtheihna lut leh chhuak 851 an awm a, hei hi Mumbai airport a nikhat chhung a thlawhtheihna tum leh thlawk chhuak tur an buaipui hnember tum a ni. Kumin February thla khan nikhat chhung in thlawhna tum leh thlawk tur 840 an lo buaipui tawh bawk a ni. Lamtluang chhiar tuten in lo hriat atan leh he kan thu post credit mumal pawh min pek sak duh chuang lo a group/page/whatsapp ah te mahni kutchhuak ni awm hrim a lo lachhawng thin te pawh huam telin, hetia Mumbai airport a thlawhtheihna lut leh chhuak lo pung ta thut hi thlawhna te chi charter aircraft operation a pun chhoh vang a ni. Nikhat chhung in Mumbai airport ah hian charter flight 30-40 vel an tum in an chhuak thin a ni.

 

*UNION HRD MINISTER LO THLENG
Union Minister of State for Human Resource Development Prof. Ram Shankar Katheria chuan vawiin khan Aizawl lo thlengin Mizoram University Examination Building a hawng.

Prof Ram Shankar Katheria chuan Mizoram University chu kum 14 leka upa ni mahse kawng tinrengah hmuh theihin hma a sawn a, a changtlung hle chu fakawm a ti a, Vice Chancellor leh a thawhpuite zawng zawng chungah lawmthu a sawi. Union Minister chuan hmarchhak state te hmasawnna chu sorkar laipuiin a ngai pawimawh hle a, hemi chungchang ngaihtuah hian Prime Minister Pu Narendra Modi hova meeting neih a nih dan te sawiin tun tum a rawn zin pawh he meeting rah chhuah kal zel a ni, a ti a. Hmarchhak biala zirna sang zawk, Higher Education kalpui a nihdan a hmun ngeia enfiah a, tanpui an ngaihna lai apianga tanpui tura lokal a nih thu a sawi. Ram hmasawnna turin zirna tha a pawimawh a, zirna tha nei turin University tih changtluna zirtirtu tha neih a tul tih sawiin hei hi Prime Minister pawhin a ngaihpawimawh ber te zinga mi a ni, a ti a. Mizoram University hmasawnna tura HRD Ministry a rawtna an thehluhte uluk taka lo enzui a tum thu leh Prime Minister duhdan ang takin University tihchangtlun a, North East tihhmasawn an tum thu, Prof. Ram Shankar Katheria chuan a sawi bawk.

MZU Auditorium a official function ah hian Vice Chancellor MZU, Prof R. Lalthantluanga’n kalkhawmte lawmna thu a sawi a. MZU Project Engineer Pu Chawnghmingthanga hnen atangin Examination Building Technical report ngaihthlak a ni a. He technical report-a a lan danin Union Minister hawn tak Examination Building hi cheng nuai 575.41 senga sak a ni a. January 4, 2013 a sak tan niin February 28, 2015 ah sak zawh a ni. A building len zawng hi 1803 sq.metres a ni.

Official function neih zawh hnu hian Union Minister Prof. Ram Shankar Katheria hian Mizoram sorkar-a Higher and Technical Education (H&TE) Department aiawh Secretary Pu K. Lalnghinglova leh official-te a kawm zui nghal a. Anni bakah hian Student Council leh Executive Committee te, Mizoram University Teaching Association (MIZUTA) leh Mizoram University Non Teaching Staff Association (MUNTSA) aiawhte leh Mizoram Hindi Training College zirtute a kawm bawk.

Union Minister of State hi Prof. Nityanand Pandey, Assam University, Silchar in coordinator niin a rawn tawimawm a. A ni bakah hian Ministry of HRD Deputy Secretary Pu PK Saha, OSD to Minister of State Dr BP Nilaratna bakah a nupui leh fapa in an tawiawm a ni. (DIPR)

*NURSE KHAWNGAIHTHLAK ARUNA BORAL
KEM Hospital, Mumbai a kum 40 chuang nikhawhre lo a awm tawh nurse Aruna Shanbaug chu tukin dar 9:42 khan a boral. Hmanni a Lamtluang a kan rawn tarlan tawh angin kum 42 kal ta khan Aruna Shanbaug hi nurse a thawhna KEM hospital ah hian pawngsual a tawk a, chuta tang chuan nikhua a hre chhunzawm ta lo a ni. 2011 khan Supreme Court ah khawngaih tihhlum (mercy killing) dilsak a ni a, mahse, court hian a hnawl sak a ni. Aruna hi hetiang anih avang hian a chhungte buaipui tur tumah a nei lo a, KEM hospital a thawk ten tlawmngaiin kum 40 chuang an inenkawl chhawk thin a ni
‪#‎ArunaShanbaug‬