14th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

14.3.2015

*MIZO CELEB MAMI VARTE IN PASAL NEI DAWN TA
Mizo hmeichhe zaithiam lar Mami Varte (Lalrinkimi Varte) chuan tunkar lo awm tur Zirptawni March 20, 2015 Chawhnu Dar 1:00 ah Kanan Veng Presbyterian Kohhran, Aizawl-ah Zoramchhana, Kanan Veng chu "tiam tlat e"a tihpui dawn ta. Mami Varte hian thian atan a naupanlai atanga a lo kawm tawh Mary Lalrinpuii, Zarkawt chu a hmang a, a pasal tur Zoramchhana pawhin naupan lai atanga a thiantha Zorammawia chu thian ah a hmang ve bawk ang.

‪#‎MamiVarte‬

Mizoram Celeb artist Mami Varte will be getting married with her longtime fiance Zoramchhana on 20th March 2015 at Kanan Veng Presbyterian Church, Aizawl, Mizoram.

*LAMTLUANG WEEKEND SPECIAL (MIZO FIAMTHU)
An YMA hnatlang pawh kha an han pachhe khawp a. 2 lek kha an chhuak a. Pakhat zawk khan "Hnatlan hi chuan a zelthel tawk hi a awm loh theih loh a" a la tihsan zui..

*BHU ADMISSION HAWN A NI
Kum 2015-16 academic session chhung atana Banaras Hindu University (BHU), Varanasi a Under Graduate, Post Graduate leh Diploma/Certificate course zir duh tan entrance test form a ngaihven theih ta e. Online application hi 12.3.2015-8.4.2015 chhungin university website www.bhuonline.in ah ngaihven theih a ni. Phaia lehkhazir tum tam admission ngaihven hun lai a ni e.

*ATHLAWN IN THISEN PE
Sialsuk Pastor bial KTP te chuan vawiin khan Synod hospital, Durtlang a hman turin a thlawn in thisen unit 66 an pe. Athlawn a thisen petute hi mipa 60 leh hmeichhia 6 anni. Synod hospital thawktute hian Pastor bial thuthmun Sialsuk ah va kal chilh in thisen te hi an lakhawm a ni.

‪#‎bloodDonation‬

*SENTEFIANG AH IN KANG
Nimin chawhma dar 10:30 vel khan Sangau atanga Km 3 vela hla Sentetfiang khua ah Pu Dawtchhunga in a kang a, Bungrua tam zawk an chuh hman a, Pu Dawtchunga in hi rap in a ni a, Vawk 3 a kang hlum bawk. He kang mei hi Lo hal na a tang a chhuak tan ni a sawi a ni.

*MARCH NI 16 ATANGIN ZU ZUAR TAN DAWN
Mizoram sorkar chuan karleh Thawhtanni March ni 16 atangin MLPC Act in a phal angin a mamawh te tan zu a zuar tan dawn. Sorkar in zu lei phalna card a pekchhuah neitu te tan zu hi zawrh a ni ang.

*AH & VETY DEPARTMENT HNUAIA NLUP HMALAKNA DOCUMENTARY FILM
NLUP Media Cell, I & PR/NIB ten an buatsaih documentary Film, 'AH & Vety department hnuaia NLUP hmalakna' chu LPS Vision ah ni 14.3.2015 zan dar 9:00 vel ah tih chhuah a ni dawn. (DIPR)

*BUS ACCIDENT
Nimin chhun khan Nagaland a Phek khawpui a Lanyie junction ah Nagaland State Transport Bus a chesual a mi 13 in nunna an chan a, mi 19 in hliam an tuar. Hliam tuar te hi Civil Hospital, Phek ah enkawl mek anni. Bus chetsual chhan hi hriat theih ala ni lo.

12th & 13th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

13.3.2015

*SANTOSH TROPHY SEMI FINAL
Mizoram 9-10 Punjab (Penalty shoot)

*LYUVA KHUTLA SAIHA-AH ROPUI TAKA HMAN A NI
Vawiin chawhma dar 10:30 atang khan Art & Culture Department, MADC bul tumin Saiha District Playground-ah Mara te KUT ngaihlut ber LYUVA KHUTLA-2015 chu ropui taka lawm a ni. He Kut hmanna-ah hian Dr.K.Beichhua, MLA Saiha Bialtu chu Khuallian a ni.

Vawiin Lyuva Khutla lawmna-ah thu sawiin Dr.K.Beichhua chuan hmanlai hnam zia leh rang vawnghim thiam leh phochhuak thiam ram leh hnam te hi hnam changkang leh ram ropui zia a ni a. Lyuva Khutla kan lawm dan leh Saiha mipuiin kan ngaihlut dan ka hmu hian min ti lawm hle a ni; a ti.

Lyuva Khutla lawmna-ah hian Mara hnam lam hrang hrang, Sawlakia, Zawchhy La,Hlichhy La, Pakhupi 0-do La, Azao la, Rakha tla, Bei La, Athih La, Khocheino La , Awkhypa La etc. te chu Saiha khawchhung leh khaw pawn a MTP Branch hrang hrang ten an entir a. Saiha Group YMA ten Khuallam an entir bakah YLA Sub Hqrs ten Chawnglaizawn lam an entir ve thung bawk a ni. Lyuva Khutla Miss (Chhivaw) leh Mister (Khydi) thlanna te neih nghal a ni a. M.CH.P (Mara Chano py) ten Costume Parade an entir a, School hrang hranga zirlai naupang ten pawnto hnunawm tak an entir bawk.

Vawiin KUT hmanna-a lawmman hrang hrang an siam te semna hun hi Pu R. Zarzosanga, District Bawrhsap in a hman hnua he Kut hi khar a ni. (DIPR)

Lyuva Khutla Festival in Saiha Town, Mizoram
Pix: DIPR

*AIZAWL BEAUTIFICATION MEMBER THAR TE
Mizoram sorkar chuan Aizawl Beautification member atan heng a hnuai ami te hi a ruat thar.

1) SP Traffic, Aizawl ; 2) Director, UD & PA ; 3) President Local Council Association ; Representative of Central Young Mizo Association. (DIPR)

*KAWNPUI-AH HOCKEY TOURNAMENT NEIH A NI DAWN
March ni 17 - 20, 2015 chhungin Boys Hockey Academy, Kawnpuiah Mizoram Hockey Association chuan tournament danglam tak buatsaih a tum.

He tournament-ah hian MHA hnuaia team tha zual 4 (super 4) chauh an inel dawn a, Mizoram Hockey Association chuan kum 2015-a ram pum huap inelna, National Championship hrang hrang awm turah team tha tak tirh a tum a, chumi atana inpuahchahnaah he tournament hi a hmang nghal dawn a ni.

Pu Hmingdailova Khiangte, President MHA leh Parliamentary Secretary, Sports etc. ni bawk chuan Senior level-ah kan la che tha vak thei lo chungin, inbuatsaihna tha tak kan neih phawt chuan sang tak pawh kan thleng thei. Ruahmanna fel leh tha kan neih hmasak a ngai a, National level-ah hniam tak atanga bul tan kan hreh lova, hma kan sawn theihna tur a nih chuan theihtawp kan chhuah zel dawn a ni. Junior leh Sub-Junior level-ah kan lan hmasak phawt a ngai a, rahbi thar rapa hmasawn chho zel turin ruahmanna kan siam a ni. Mizoram mipui beisei tihhlawhtlin hi kan chak takzet zet a ni a ti.

*HOME MINISTER IN CHAPCHAR KUT MISS LAWMPUINA HLAN
Nimin chawhnu khan Diktawn Monthly Magazine chuan Miss Chapchar Kut 2015 lawmman semna inkhawm Zonet Studio-ah a nei a. He hunah hian Home Minister Pu R. Lalzirliana chu khuallian niin Chairperson, Mizoram Women Commission Vanlalawmpuii Chawngthu MLA chu khualzahawm a ni.

Home Minister Pu R. Lalzirliana chuan Miss Chapchar Kut 2015 leh Runner Up te chu lawmman hlanin Miss Chapchar Kut chu a mimal tak pawha a hlut thu sawiin Mizo hmeichhe hmel tha tak tak te pholanna leh chawikanna a nih avangin tih zel tlakah pawh a ngaih thu a sawi a.

Miss Chapchar Kut 2015 te lawmman dawn dan chu hetiang hi a ni. Miss Chapchar Kut 2015 H. Vanlalhlimpuii Ramhlun North hian a thlangtu Diktawn Monthly Magazine atangin sumfai Rs. 10,000 a dawn bakah Photo Album Rs. 5,000 man hu, Photo Frame Rs. 1,500 man hu, Citation leh lehkhabu tha tak tak a dawng a, kumin chhung thla tin Rs. 1,000 a dawng ziah bawk ang. Samsung 3 : 16 Plan Solution atangin Washing Machine Kg. 6.2 a dawng bawk.

1st Runner Up - Brenda Laldampuii Chhinga Veng, 2nd Runner Up - Nethel Zodinpuii Chhinga Veng, 3rd Runner Up - Zoremmawii Ralte Tanhril, K. Lalremruati Upper Republic, leh Christina Lalmuanzuali Ramhlun South te'n Diktawn Monthly Magazine atangin Rs. 2,000 theuh bakah Citation leh lehkhabu tha tak tak an dawng a, Samsung 3 : 16 Plan Solution atangin Samsung Smartphone an dawng vek bawk. (DIPR)

Miss Chapchar Kut 2015 winners and R.Lalzirliana, Home Minister, Mizoram
Pix: DIPR

12.3.2015
*ZU PERMIT LAK AWLSAM DAN
Mizoram Excise Dept. chuan awlsam zawkin Zu leitheihna tur permit lak dan tur ruahmanna a siam.Challan siama State Bank of India a cheng 520/- deposit ngai tawh loh khan dilna form pangngai thehlutte kha an Zu lei theihna tur card kha cheng 520/- in an khul tawh tawh dawn a ni.

 

*KHAWLAILUNG IN KURTAI KUT HMANG

Khawlailung Sugarcane Growers’ Association (Fu chingtute) buatsaih Khawlailung khaw pum huap “Kurtai Kut” chu nimin nileng khan Khawlailung Bazar kawnah hman a ni a, Agriculture MinisterPu R. Lalzirliana chu “Kut Pa” niin Bialtu MLA Pi Vanlalawmpuii Chawngthu chu “Kut Nu” atan hman a ni a, District bawrhsap Pi Juhi Mukherjee, IAS, Superintendent of Police Pu Romil Baaniya, IPS, DRDA Project Director Pi Teresy Vanlalhruaii, MCS bakah mipawimawh tam takin he Kut hi an chhim a ni.

Kurtai Kut lawmna inkhawm buatsaihah “Kut Pa” Pu R. Lalzirliana chuan thu sawiin Sawrkarin Kuthnathawktute a dah pawimawh bera an hamthatna tur kawng hrang hranga dapin hma a la chhunzawm reng a ni a ti a, Khawlailung Sugar Growers’ Association ten Sugar Mills/Winery an mamawh thu leh Sawrkarin kawng dap pui se an duh thu an lo thlen chu chhangin MLPC Act hman anih takah hetiang atan hian kawng a inhawng tan a, tun dinhmunah erawh sum dinhmun a harsat rih avangin Sawrkar tan tanpuina inpek a harsa rih a, nasa lehzuala Fu an chin a Fu chingtu pawh an pung zel anih chuan kawng a inhawn veleh ngaihpawimawh hmasak an nih ngei tur thu a sawi bawk a ni. MLPC Act chungchang sawi chhunzawmin kum 17 zet Zu khap bur ani chungin khawtin leh veng tin deuhthaw ah Zu zuar an awm a, Dan pawisalo tute lahin nawmchenna atan an hmang mai mai a, zu thalo a tam phahin mirethei zawk Dan in a khap beh si te lahin zu chhia an in nasa in an thih phah nasa em em a, hetiang hi kan nih kumkhua dawn avangin leh zu in lo theilo an tam bawk si avangin zu thianghlim leh zu tha zawk an hmuh theih nan Dan hnuaiah khauh taka hralh Sawrkarin a tha a ti a, ruahmanna tha tak a siam ta a ni a ti a, kan nihna dik tak hi lan mawi duh vanga thup a tha lova, hmaithing kawr vuah chunga Kristian nih ai chuan a taka Kristian kan nihna kan lan tir ngam a tul tawh zawk a, Zu permit neih hi ruihbuai phalna ani tel lo mai nilovin ruibuai chu man tur an nih bakah awlsam taka Bail mai mai theih an ni tawh dawn lova, an phu ang tawk hremna an tawrh ngei ngei a ngai tawh dawn a ni a ti a, MLPC Act chuan milian leh mite a thliar dawnloh thu a sawi bawk a ni.

Agriculture Minister chuan Kuthnathawktute hamthatna tura Sawrkarin ruahmanna a siam chi hrang hrang hrangte tarlangin Custom Hiring Centre, loneitu telkhawm (farming society) hnenah leilehna hmanraw chi hrang hrang (Tractor + Trailer, Rotavator, Paddy Weeder leh Paddy Reaper) te man tlawm zawka mimalin an hire theih nan a man atanga 95% tumsak an nih tur thu a sawi a, Farming Society te hian 5% an tum ve a ngai dawn thung a ni. Hetiang Centre hi kum kalta khan 7 din a ni a, kumin hian Centre 40 din thar tum a ni a ti bawk. Heng bakah hian loneitute hman tur khawl chi hrang hrang subsidy a Sawrkarin a pek theih te a sawi lang bawk a ni.

Fu chingtute dawm kanna tur bik ruahmanna pawh siam anih thu sawiin Pu Zira chuan kum 2014-15 atang hian RKVY hnuaiah ruahmanna thar tha tak tak siam a ni a, Fu chin dan thar enchhinna siam niin he programme hmang hian Fu mit pakhat chauh nei leh mit 2/mit 3 nei karthlaka chin a ni dawn a, Hectare 1 zelah Rs. 8,000/- tanpuina pek an ni bawk ang a ti a, Fu chi tha bik tihpunna tur Nursery siam a, Fu chingtute hnena semchhuah anih tur thu te leh Training mumal leh changtlung lehzual buatsaih anih tur thu a sawi bawk a ni.

Pu Zira hian Khawlailunga Roadside Market sakna tur work order (Rs. Nuai 10) chu Kurtai Kut Organising Committee Chairman hnenah a hlan a, tangkafai Rs. 20,000/- an thawhrimna rah lawmna Kut lawmpuinan a hlan tel bawk a ni.

 

“Kut Nu”, bialtu MLA ni bawk Pi Vanlalawmpuii Chawngthu pawhin thu sawiin a bial a rawn ngaihsak avangin “Kut Pa”, Agriculture Minister ni bawk Pu R. Lalzirliana hnenah lawmthu a sawi a, Fu chingtute thawhrimna rah seng tur a awm chu lawmawm a tih thu sawiin an zinga chhungkaw engemawzat NLUP tanpuina dawng an awm tel chuan NLUP hlawhtlinna pawh a tarlang tel a ni tiin lawmthu a sawi bawk a ni. Pi Awmpuii chuan loneitute chu an tana Sawrkarin hamthatna a siam te chang ve tura an beihna kawngah theihtawp a chhuahpui tur thu a sawi bawk.

Khawlailung hi In 515 khua an ni a, an zinga In 150 chuang zetin Fu an ching a, kum kalta 2014 khan Fu atanga siam Kurtai hi Quintal 2250 vel tharchhuakin Rs. 1,12,50,000 /- an thar chhuak a, kuminah hian hei aia tam hi tharchhuah an inbeisei bawk a ni. Kum 1938 vel atang khan Khawlailungah hian Fu an lo ching tan tawh a, kum 2007 ah Fu chingtu pawl (Sugarcane Growers’ Association) din a ni a tun thlengin kum 100 dawn lai Fu an lo ching tawh a ni. NLUP kalpui mekah pawh Khawlailung atang chhungkaw engemawzatin Sugarcane/Fu Trade thlangin 100% hlawhtlinna an hmuh thu Sugarcane Growers’ Association hotuten an sawi a, Khawlailung ramah Fu a that duh bik zia leh Sugar Mill emaw Winery emaw pawh sawrkarin a ruahman sak thei anih phawt chuan Khawlailung mai bakah an khaw thenawmte pawhin Fu an ching duh vek hiala an rin thu an sawi bawk a ni.

Nimin Kurtai Kut lawmna inkhawm hi Pu Lalchangliana Ralte, Kurtai Kut Organising Committee Chairman in a kaihruai a, Khawlailung khawchhuak mi 20 hnenah chawimawina thuziak hlan a ni a, tlaiah khawtlang huapin ruai ropui tak theh a ni. (DIPR)

Mizoram Home Minister R.Lalzirliana inaugurate Sugarcane (Kurtai) Festival at Khawlailung Village, Mizoram
Pix: DIPR

*IMPHAL BAZAR AH BOMB PUAK
Nizan dar 6 vel khan Imphal a Khwairamband Bazaar ah IED bomb puak avangin mi 3 in nunna an chan a, mi 23 chuang in hliam an tuar. Hliam tuar te hi RIIMS hospital ah enkawl mek anni. Bomb tipuak tute hi tute nge annih hriat an la nilo.

‪#‎imphal‬

11th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

11.3.2015

*AIR AIZAWL CHANCHINTHAR PAGE LIKE DUH TAN
A hnuaia link ah hian All India Radio Aizawl chanchinthar page a like a theih e.
https://www.facebook.com/rnuaizawl?pnref=lhc 

*NATIONAL HEALTH MISSION DIRECTOR-IN CHIEF MINISTER HMU
Ni hnih cham tura vawiina Aizawl lo thleng Pu C.K.Mishra, Director, National Health Mission & Additional Secretary, Govt. of India chuan vawiin tlai vek khan Chief Minister Pu Lal Thanhawla chu a chenna bungalowah a hmu.

Pu Mishra hi Mizoram sorkarin National Health Mission chungchanga a hmalakna te rawn endika rawn zirchiang tur leh, abikin nausen thi, infant mortality rate chungchanga hmalakna te rawn thlithlai tura rawn kal a ni a. Naktuk ni 12 March 2015 hian Mizoram sorkar mipawimawh te nen Aijal Club-ah inkawmhona neiin, chawhnu lamah Aibawk leh Melriat khuaa Primary Health Centre te a tlawh ang a. Zanah amah lawmna puala cultural programme leh zanriah kilhona Aijal Club-ah buatsaih a ni bawk ang.

Chief Minister nena an inkawmna hunah hian Mizorama Medical College din tura hmalakna kal mek pawh chak zawka kalpui anih theihna turin Chief Minister Pu Lal Thanhawla hian alo sawipui bawk a ni.

Chief Minister hi Pu Lal Thanzara, Health Minister, Pu Arun Goyal, Principal Secretary, Health & Family Welfare leh Dr.K.Lalbiakzuala, Director, Mizoram State NHM ten an tawiawm a ni. (DIPR)

*RATION CARD SURRENDER
Tun dinhmunah Aizawl West DCSO bial chhungah ration card surrender mi 11 an awm. Chungte chu:- Kaphnuna, Engineer in Chief, P&E, Upper Republic; Vanlaldika, EE, PWD, Bethlehem; Lt Col (Rtd) Kawlremsiama, Mission Vengthlang; Maj (Rtd.) Zosangliana Hualngo, Mission Vengthlang; Lalthuamliana, Joint Secretary, Tuikual North; Lalthanmawia Pachuau, Business, Kulikawn; R.Siamliana, DCSO,Dinthar ; Lt.Col.ZS Zuala, Parliamentary Secretary, Mission Veng; C.Zasanga, Addl.Director FCS&CA, Kanan; Zorammuana, Director UD&PA, Kulikawn leh Kaizamang Thangeo, Gazetted Officer, Tuikual ‘N’ te an ni. Aizawl East DCSO huam chhungah mi 3 – Pu John Rotluangliana, Minister, Dawrpui; Pu C.Chawnghnuna, Jt.Secretary PHE, Zemabawk leh Dr H.Saithantluanga, DAO (Aizawl), Ramhlun South-te’n an thehlut a.

Kolasib DCSO bial chhungah chhungkaw pali ten an thehlut tawh bawk.Heti hian tun dinhmunah ration card surrender hi chhungkaw 18 an awm ta a ni. FCS&CA department chuan tlawmngaih chhuaha an card thehluttute zawng zawng chungah lawmthu an sawi tak meuh a ni.
Source: Lalhmachhuana Tochhawng via DINGDI FB Group

*MFAS OFFICER PROMOTION HMU THARTE
Mizoram Finance & Accounts Service (MFAS) Officer Promotion heng te hian an hmu thar :
1. Pi Lalbiakhluni, Supertime 'B' ah a kaisang a, Additional Secretary, Finance ah post a ni.

2. Pu Lalthlamuana, Selection Grade ah a kaisang a, Joint Secretary, Finance ah post a ni.

3. Pu Khanzagin, Jr. Admn. Gr. ah a kaisang a, Joint Director, Accounts & Treasuries ah post a ni.

Pu Lalringliana, Chief Controller of Accounts, Accounts & Treasuries chu pension a a chhuah tak avangin a hmunah Pu R. Lalbiakthanga, Additional Secretary, Finance chu dah a ni. (DIPR

10th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

10.3.2015

*AIRPORT AUTHORITY EMPLOYEES UNION NUAR DAWN
Naktuk 11.3.2015 hian Airport Authority Employees Union (AAEU) ten ram pum huap a nawrh an huaihawt dawn avangin Lengpui Airport a AAEU te pawhin an zawm dawn. He nawrh neih tur hian ramchhung a thlawhna a khualzin te a nghawng dawn a, sorkar laipuiin Chennai, Jaipur, Ahmedabad leh Kolkata airport te privatise a tum dodalna tur tih a ni.

*ZU ZAWRH DUH LO
Vaivakawn khawtlang chuan an venga zu zawrh an phal ta lo. Zanin khan ZIDCO in an venga zu dawr hawn an tum chu Vaivakawn VC chuan mipui ngaihdan an la a, 65 - 35% in zu zawrh hi an duh lo a ni.
Source: Lalhmachhuana Tochhawng via DINGDI Group

*HELICOPTER TLA AH MI 10 BORAL
Argentina, La Rioja province ah TF1 channel a celebrity show a chhuah tur Dropped film an chan laiin helicopter a tla a mi 10 an boral. Nunna chan te hi French mi 8 leh Argentina mi pilot 2 an te anni. France mi thi zingah hian Olympic a medal la tawh mi 3 - Florence Arthaud (Yacht), Camille Muffat (Swimmer) leh Alexis Vastine (boxer) te an tel a ni. An tlakna hmun hi Villa Castelli khua ah a ni a, an ram khawpui Buenos Aires atangin 1,170km (720 miles) a hla a ni. An tlak chhan hriat nilo mahse an tlakna hmun hi tlangram chhengchhe lai a ni a, khua a that loh avangin an tum loh deuhin an chesual ta ni a rin a ni.

*MAHIMA'N SORKAR LAIPUI DAWR
Pu Joseph Lalhimpuia, Parliamentary Secretary, School Education, Mizoram chu New Delhi ah sawrkar laipui dawrin a cham mek, Pu Lalhimpuia hian School Education hmalakna hrang hrang bawhzuiin Ministry of Human Resource Development (MHRD) leh Ministry of DoNER te dawrin hun a hmang a, SSA hnuaia thawktute hlawh Ministry in an release loh pawh vawiin khan a ti fel a, sanction order pawh lachhuakin naktuk khian RBI lamah thun turin tihfel a ni tawh a. RMSA sum tur pawh tihfel thuai a nih theih nan MHRD a dawr bawk a, tihfel thuai a beisei awm bawk. Pu Joseph Lalhimpuia hian tunkar chhung hian Mizoram School Education Department bakah Trade & Commerce, Industry Department tana hma hrang hrang lakna tur atan Ministry hrang hrang dawr kualin hun a hmang zel ang. (DIPR)

*AIR LIVE PHONE-IN
Tun Inrinni lo a awm tur, March ni 14, Chawhnu dar 1:05 - 2:00 inkar AIR AIzawl a Telephone-a zawhna leh chhanna Live Phone-in Programme ah chuan ‘Spa’ chungchanga hriat duh neite tan a zawh theih dawn a. Mipui zawhna chu - Rosy Lalrempuii leh Lalchhanhimi, Irene Spa - ami ten an rawn chhang ang a. A zawt duh tan Telephone No -0389/2323148 emaw 0389/2322515 emaw ah biak pawh theih a ni ang. (DIPR)

*DIMAPUR ‪#‎NAGALAND‬ AH CURFEW TI TAWP
Nagaland a pawngsual tu ni a puh mipui in an sawisak hlum chungchang a inhnamhawih a puh mi 42 te thuzawhfiah turin man anni tawh a. Nimin zing atang khan Dimapur khawpui ah curfew tih tawp a ni tawh a, internet leh sms te erawh buaina punlun hlauh vangin sorkar in a la khuakhirh hrih a ni. Mipuiin an sawisak hlum Syed Sarif Uddin Khan ruang chu nimin piah khan an khua Bosla, Karimganj District, Assam ah vuiliam a ni ta bawk.