3rd March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

3.3.2015

*ZORAM NI HMANG DAWN
Mizo Zirlai Pawl General Headquarters huaihawtin in naktuk chhun dar 12 ah I&PR Auditorium, Aizawl-ah 'Zoram Ni' hman a ni dawn. Kum 1966 March ni 5 khan India sorkar chuan Jet fighter hmangin in Mizoram a bomb a chumi hriatrengna denchhen chuan he ni hman thin a ni ta a ni. Kumin hian MZP in a ruahman dan chuan Zofate inkarah inpumkhatna, inunauna thar leh ram leh hnam hmasawnna kawnga inzirtirna ni atan a hmang dawn a ni.

 

*KOREA PALAITE PUALIN CHIEF MINISTER-IN ZANRIAH BUATSAIH
Ni thum chhung Mizoram rawn tlawh tura nimina Aizawl lo thleng, Republic of Korea (South Korea) palai te chuan nimin khan Chief Minister Pu Lal Thanhawla chu a chenna bungalow ah hmuin, Chief Minister hian an pualin zanriah a buatsaih sak a, anmahni lo lawm nan zai leh cultural programme buatsaih a ni bawk.

Korea palaite hi Korea Ambassador to India Pu Joongyu Lee in a rawn ho a. Ani bakah hian palai pasarih Pu Song Jin Hwa, Political Counsellor, Pu Joon Yul yoo, Chief Project Manager, Hyundai Engineering & Construction Co.Ltd, Pu Il Joon Kwan, Managing Director, Doosan Power System India Ltd, Pu In Hwan Ok, Chairman, Posco E&C India Pvt Ltd, Pu Jinyong Shin, Director, Korea Trade Investment Promotion Agency (KOTRA), Pu Illwhoan Chin, Managing Director, Korea Electric Power Corporation (KEPCO) leh Pu Youngeun Song, Managing Director, Time Tech Management Pvt Ltd te an lokal bawk a ni.

Korean Ambassador Pu Joongyu Lee chuan Chief Minister-in Mizoram tlawh tura a sawmna chu lawmawm tiin, Korea leh Mizoram state te inlaichinna tichak tura lokal an nih thu a sawi a. A bul tan nan Cultural programme Exchange a hmalak ni se tia rawtna a siam chu Chief Minister chuan tha hle dawna a hriat thu a sawi a. Pu Lee chuan ‘Mizo thalaiten Korea culture an ngaina tih a hriatin inpawhtawn taka awm tur kan nih chu ka ti’ a ti a, tun tum an lokal hi bul tanna tur chauh ani a ti.

Chief Minister Pu Lal Thanhawla chuan Korean palaite chu thinlung taka alo lawmthu a sawi a. Mizote chu inpawh tak leh intluktlang hnam kan ni tiin, ei leh barah leh sum leh paiah intodelh hi kan duh ber a ni a ti a. Hemi atan hian sorkarin NLUP a kalpui mek a ni tiin, a programme hi a that avangin UNO peng palite pawhin rawn tel tumin tunah hian hmalak mek a ni a ti. Mizo thalaiten Korean culture an ngainat thu leh an film te chu Mizo tawnga letlingin, hmuhnawm ti taka an en thin thu a sawilang bawk a ni.

Chief Minister hian Korean palaite chu thilpek a hlan vek a, Korean palaite pawhin thilpek an pe ve bawk a ni.

Chief Minister hi Pu Lalrinmawia Ralte, Minister of State for E&F, Chief Secretray Pu Lalmalsawma leh Pu Lalram Thanga, Principal Secretary to Chief Minister ten an tawiawm a ni.

Korean Palaite hian vawiinah Speaker hmuin Speaker chamber ah meeting an neihpui ang a, Chief Secretary pawh a office ah meeting an neihpui bawk ang. Hemi zawhah hian NLUP Implementing Board Officialte leh Mizoram Chambeer of Commerce te meeting an neihpui leh bawk ang. Naktipah CYMA hruaitute leh Environment & Forest Minister te meeting an neihpui leh bawk dawn a ni. (DIPR)

*ZENICS LEH NIELIT IN MoU SIGN
Vawiin khan ICT Secretary Office-ah ZENICS leh NIELIT chuan CCC Computer Course-ah thawhdunna thuthlung (Memorundum of Understanding) an sign a. Thawhdunna thuthlung hi Pu C.Lalhmachhuana, Secretary ICT, ZENICS Managing Director ni bawk leh Pu N.Debachandra Singh, Director NIELIT ten hming an sign a ni. He Course hi thla thum chhung zir tur a ni a, Course Fee a awm dawn lova, mi tupawh a duh apiangin he Computer Course hi man chawi lovin an zir thei dawn a ni. A zir duh chuan ZENICS Office-ah zawhfiah theih a ni. (DIPR)

*ARMY TUR LAK RUNPUI NEI DAWN
Director Army Recruiting Office, Silchar hnen atanga thu kan dawn angin, Army Trade hrang hrang lakna runpui Dt.01 April to 08 April,2015 chhung hian Dima Hasao sport Assn ground, Halflong, DIMA Hasao (Assam) hmunah neih a ni dawn a. Dt.03-04-2015 ah hian Soldier Tech, Soldier Nursing Assistant, Soldier Clerk, Store Keeper Technical, Clerk inventory Management tur Northeast state zawng zawng atanga candidates te inlan tur a ni. Hrechiang duh tan Deputy Commissioner Office ah emaw I & P.R.O, Lunglei ah te zawhfiah theih a ni. (DIPR)

*MIZORAM SIKUL TEN INTERNET CONNECTION NEI THA LO
Digital Empowerment Foundation ten Mizoram chhung Aizawl District chhung zirchianna an neih ah sikul 50% te chuan internet connection an nei lo tih an tarlang. Computer leh a kaihhnawih khawl awman sikul ah te pawh hmangtangkai turin zirtirtuten training tha an dawng lo niin an hria. He zirchianna hi Massachusetts Institute of Technology leh Sir Dorabaji Tata Trust aiawh ten state 3 Rajasthan, Chhattisgarh leh Mizoram an zirchianna atanga an thil hmuhchhuah a ni.

*MAHARASHTRA AH BAWNGSA ZAWRH LEH KAWL KHAP A NI
Maharashtra state sorkar chuan an state chhung ah bawngsa zawrh leh kawl a khap. Dan bawhchhia te chu kum 5 chhung lung in tan leh Rs.10,000 chawitir theih anni dawn. He bawngsa zawrh leh kawl khapna dan hi Maharashtra Animal Preservation Amendment Bill 1995 tlawh chhanin India President in hman phalna a pe a ni. Amaherawh chu lawisa erawh chu zawrh leh kawl khap a ni lo thung a ni. Lamtluang chhiar tu ten kan lo hriat atan Maharashtra ah hian BJP in Shiv Sena te thawhpuina in sorkarna an siam mek a ni.

2nd March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

2.3.2015 
*CADC HUAMCHHUNGA VILLAGE COUNCIL GENERAL ELECTION 2015 TLUANG TAKA NEIH ZAWH A NI TA
Chakma Autonomous District Council hnuaia Village Councils inthlanpui chu ni 25.2.2015 khan Village Council 81-ah tluang taka neih zawh a ni ta. Hetah hian khaw 10-a Candidate-te chu thlan ngai lova uncontest-a tlinga puan an ni a. Village Council 71 inthlanpui buatsaihna khuaah hian voters 26,140 awmin voters 22,153 in vote an thlaka, a pumpuia voter turn-out percentage chu 84.74% a ni.

Vote thlak that berna khua hi 15-Old Bajeisora a ni a, voter 142 awmah 138 in vote an thlak a, 97.18% in vote an thlak tihna a ni. Vote tlak chhiatna ber chu 79-Parva-lll a ni a, he khuaah hian 61.30% a tla thung a ni.

A hnuaia mi ang hi Party-wise results chu a ni:-
BJP - 7, INC-63, MNF-3, Independent - 5, No clear majority - 3, Total - 71

He inthlanpuiah hian harsatna lian tham thleng engmah a awm lo a, vote thlak chungchang bakah dan leh thupek kenkawh kawngah leh inbiak pawhna lamah pawh District Election Officer, Addl. DC, Asst. District Election Officer leh Staff-te, Election Observer, CADC thuneitu te, SDO/BDO/Zonal Officer, Sector Officer-te, Returning Officer, Polling Official-te, SP leh District Police, MPRO, Political Party-te leh NGO a bik takin Young Chakma Association (YCA)-te inpekna leh thahnemngaihna avangin a felfaiin a muanawm hle a ni. Hemi avang hian SEC chuan he inthlanpui tluang taka neih a nih theihna atana mawhphurtu leh tha thawhtu zawng zawngte chungah lawmthu a sawi tak meuh meuh a ni. (DIPR)

*Vawiin khan Mizoram zirlai scholarship lak phut a kawngzawh ten "Hawl eka" tiin an au rual lai a hnuai a youtube link ah hian en theih e.
https://www.youtube.com/watch?v=tdBGzLFsNcg

*MIZO TLANGVAL IN JNU ATANGIN Ph.D ZO THAR
Tv.Robert Lalremtluanga Ralte S/o.Vanlalsiama Ralte, Kolasib New Diakkawn chuan vawiin 2.3.2015 khan Centre for Historical Studies, Jawaharlal Nehru University, New Delhi atangin Doctor of Philosophy (Ph.D) a dawng thar. A thesis chu 'Forest, land and development: An ecological history of Mizoram 1952-2000' tih a ni.

Robert Lalremtluanga Ralte recently awarded Ph.D from JNU

*KUM 5 CHHUNGA NLUP APEX BOARD MEETING HNUHNUNG
27.2.2015 khan NLUP Apex Board chuan Chairman, Pu Lal Thanhawla Chief Minister hovin NLUP Implementing Board conference hall-ah Apex Board meeting vawi 14-na leh, kum 5 chhung atana a hnuhnung ber tur an nei a. NLUP hnuai hmalakna hrang hrang te leh heng atanga hmasawnna dinhmun te thlir hovin NLUP kalpui chhunzawmna tura thil pawimawh te an ngaihtuah ho a ni.

Chief Minister Pu Lal Thanhawla chuan “NLUP chu mirethei kut hnathawktu ten mi hausa leh thil tithei zawkte tlawn ngai lova, mahni kutkea an din ve theihna tura Pathian programme a nih avangin titawp tura theihtawpa beihna leh hekna nasa tak tawk mah se, project kalpui chhunzawm zel tura sum mamawh zat chiah central sorkarin a rawn pe a, kalpui chhunzawm zel a ni ang,” a ti.

Apex Board meeting ah hian kum 5 chhunga NLUP kalpui dan tlangpui leh kum 2014-15 atana NLUP sum ruahmanna thlir ho a ni a. NLUP kalpui chhunzawmna tura ruahmanna hrang hrang- UN Agencies te nena thawh hona tur te, thil deh chhuah hralhna tur market chungchang te, NLUP Phase II kalpui chhunzawmna tur leh hemi hnuaia beneficiary 15,000 dang tanpuina tur te, Funding Agencies dang pahnih, North East Region Livelihood Project(NERLP) leh Tata Trust Fund under Corporate Social Responsibility(CSR)te thawhpuina kawng dap dan chungchang te, Skill development atana hmalakna tur te, NLUP hnuaia hmalakna chhuanawm bik leh chhenfakawm tanpuina pek dan tur chungchang te, Horticulture department hnuaia thlai chi leh hmanraw sem dan tur chungchanga ruahmanna siam te bakah NLUP hmalakna enpui tura State Planning Board mawhphurhna pek chungchang te thlir hovin zau taka sawiho a ni.

He meeting ah hian line department 9 ten kum 5 chhunga an hmalakna leh hmasawnna te, harsatna tawh leh tuna an dinhmun tlangpui theuh te tarlangin presentation an pe a. A pumpuia NLUP dinhmun tlangpui tarlangin NIB Vice Chairman Pu P.L.Thanga’n report a pe a. Consultative Committee on NLUP member pahnih- Dr. Robert Halliday leh Pu Zion Lalremruata ten Marketing leh Safe farming- Israel model chungchang ah presentation an pe bawk a ni.

Apex Board meeting ah hian kum 5 chhung thahnemngai taka NLUP kalpui leh enkawltu Line department 9 te hnenah chawimawina, Certificate of Appreciation, Pi Lal Riliani, President, Indian Society on Tobacco & Health, Mizoram Chapter-in a hlan a. Chief Secretary Pu Lalmalsawma IAS in lawmthu sawiin meeting hun hnung a khar a ni. (DIPR)

*KHAWLAILUNG IN KURTAI KUT 2015 HMANG DAWN
Khawlailung khua chuan March ni 11(Nilaini),2015 khian 'KURTAI KUT' an hmang dawn. Khawlailung khua hi in 530 niin fu ching hi in 150 an awm mek bawk.

Khawlailungah hian fu hi a tha duhin sum lakluhna pui ber atan an hmang mek a, nikum khan KURTAI Quintal 1000 tharin tun kum 2015 ah hian Quintal 3000 thar an in beisei a ni. Hriat theih chinah Mizorama fu ching tamna ber khua niin KURTAI thar tam ber an ni bawk a, hetiang taka an hlawhtlinpui thlai a nih avang hian 'KURTAI KUT' hman hi an rel thlu ta a ni.

He 'Kurtai Kut' ah hian Home minister, Agriculture Minister ni bawk Pu R.Lalzirliana chu Khuallian a ni ang a, Parliamentary Secretary leh Official engemawzatin an hmanpui dawn a, Vanlalhlana’n zaiin mipui a awi bawk ang. '

KURTAI KUT' ah hian hengte hi chhawp chhuah tum a ni:-
1. Fu feh tur - Free
2, Fu tui in tur - Free
3. Kurtai - Discount
4. Faisa hlawm
5. Kurtai atanga siam Toffee
6. Hmawngsawi
7. Fu tui chhuang khang lai-Khuallian chawh khal tir a ni ang.
8. Zochhang leh Kurtai Official te tan.

He 'KURTAI KUT' hmang tur hian Zoram mipuite sawm vek kan ni a, Khawlailung hian KURTAI chauh an ngah lova, Footballer - MPL Player, ISL Player leh National Player te pawh an nei a ni. Anmahni i hmuh duh chuan he KUT ah hian kal ngei chi a ni. Khawlailung KURTAI thlum leh thlum loh i hriat duh chuan March 11,2015 ah ngei ngei aw……

Source: Norbert Khawlhring

*FILM COMPETITION BUATSAIH DAWN
Information & Public Relations Department chuan film siam lama tuimi, Mizoram Films Development Society ( MFDS ) – a in ziaklut film producer te tan Competition a buatsaih dawn a. Film hi 85 to 90 minutes chhung daih a ni ang a, thupui thlan bik awm lovin film siamtuin tha a tih ber a thlang ang a. April 15 hmain film hi siam zawh tur a ni dawn a ni. (DIPR)

*AIZAWL KHAWPUI CHHUNGA RANTALHTUTE HMAN TUR SLAUGHTER HOUSE BAWNGKAWN BRIGADE RAM AH SAK BELH DAWN

AH & Vety Minister Pu C.Ngunlianchunga chuan Bawngkawn Brigade ramchhunga rantalhna in sak tum, 'Rural Slaughter House Brigade Veng' hmunhma leh a panna kawngpui te a endik a. Minister hi AH&Vety Director Dr. L.B. Sailo leh a thawhpuite bakah khawtlang hruaitute'n an tawiawm a ni.

AH&Vety hotute hian helai hmun a Slaughter House sak a tulna chhan sawiin Aizawl khawpui chhuahlam, chhimlam leh New Market rantalhtu zawng zawng te'n Mualpui venga Slaughter House an hman tawh avangin helai hmuna leng ve lo hmundanga rantalhtute tan rantalhna in hran mamawh a nih vang a ni an ti a. He Slaughter House hi Bawngkawn Bazar, Vaivakawn Bazar, Hunthar Veng, MZU kawngpui dung leh Mualpui Slaughter House hmang pha lo tan rantalhna hmun atan hman a ni ang.

Nikhat chhunga bawng 40 leh vawk 50 talh theihna tur, Rural Slaughter House Brigade Veng sakna leh a panna kawng siamthat hnathawhna tur sum Rs. 387.28 Lakh hi NABARD hnuaia Rural Infrastructure Development Fund(RIFD) atanga hmuh a ni a. A sak hna leh kawngpui cheithat hna hi 2015-16 Financial Year chhunga zawh hman beisei a ni. Slaughter House awmna tur hmun hi Brigade Field bul chiah a kawngpengthuampui atanga 600 meters a hla niin rantalhna thli pawh Effluent Treatment Plant(ETP) ah luanluh tir a ni ang. (DIPR)

*MIZO TAWNG A PHONE, COMPUTER LEH INTERNET KAIHHRUAINA
Mobile phone, computer leh internet hmangtu te tan a tangkai leh kaihhruaina Mizo tawng ngei a tarlanna page a hnuai a link kan tarlan hi i la like loh chuan lo like sak ve rawh le. I apps leh software hman duh tam tak kha i hriatchian phah thei ania.
https://www.facebook.com/Hmangchang.Blog 

*ASSAM AH SWINE FLU VEI HMUCHHUAK
Assam ah swine flu (H1N1) vei 2 hmuhchhuah an ni. Heng damlo te hi Namrup leh Guwahati a mi te anni. India hmarchhak state dang Nagaland ah swine flu vei mi 4 hmuhchhuah tawh anni a, Mizoram ah swine flu vei 1 hmuhchhuah tawh a ni bawk.

*MPSC CHAIRMAN THAR
Mizoram Governor chuan ram danpui Article 316 (1)-in thuneihna a pek angin Mizoram Public Service Commission (MPSC) Chairman atan MPSC Member ni lai mek Andrew Lalherliana a ruat thar.

1st March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

1.3.2015

*J&K CM THAR LALUT
Vawiin ah Jammu and Kashmir Chief Minister 12-na turin PDP hotupa Mufti
Mohammad Sayeed chu lakluh a ni. Jammu and Kashmir ah hian People Democratics Party (PDP) leh Bharatya Janata Party (BJP) ten tangrual sorkar an siam ta a ni.

*Zirlaite chanvo rahbeh duh lohna kawngzawh"-Mizo Students' Union

KAWNGZAWH DAN TUR
@Monday 10:00 am: Chanmari kawn ațanga Vanapa Hall thlenga kawng zawh tur te:

1. Govt. Hrangbana College
2. Govt. Aizawl North College
3. Govt. J.Thankima College
4. Govt. Zirtiri Residential Science College
5. Govt Aizawl West College
6. Govt. Mizoram Law College
7. Mizoram University
8. Women Polytechnic
9. ICFAI University
10. Sikkim Manipal University
11. NIELIT
12. Private Insitution leh zirlai scholarship dil, Aizawl hmar lama awm zawng zawng te.

MSU President PC Larinhlua, General Secretary Lalremruata Chhangte leh Finance Secretary T. Nengkhansut leh hruaitu dangte bakah SU leader-te'n an ho vang.

@Monday 10:00 am Sikulpuikawn ațanga Vanapa Hall thlenga zirlai kawngzawh tur te:

1. Govt. Aizawl College
2. Pachhunga University College
3. Govt. Johnson College
4. Govt. T. Romana College
5. ITI zirlaite
6. Private Institution leh zirlai scholarship dil Aizawl chhim lama awm zawng zawng te.

He hunah hian MSU Vice President R. Lallawmsanga, Asst. General Secretary Lalthanzuala, Treasurer Benjamin Lalnghaka Fanai leh hruaitu dangte bakah SU leader-te'n an ho vang.

ZIRLAI SCHOLARSHIP DIL ZAWNG ZAWNGTE KIM TAKA KAL VEK TUR A NI.

*DIK LEH RIL: HENG MAKE-UP HI LO HMANG VE TEH
I hmui ah - THUDIK
I mit ah - LAINATNA
I kut ah - THILPHALNA
I hmai ah - HLIM HMEL
I ka ah - TAWNGTAINA
I thinlung ah - HMANGAIHNA

 

*BCM ASSEMBLY NA TUR HLAN DAWN
Baptist Church of Mizoram (MCM) Assembly vawi 119-na chu March ni 4-8 hian Mizoram Baptist Kohhran Biak In, Farmveng, Lunglei-ah nghah a ni dawn a, hemi inkhawmpui neihna tur Biak in leh a hual vela Pandal an zar chu zanin ah bialtu pastor Rev.JC. Vanlalluaia ho in hlanna neih a ni dawn.

*MIZO IRS OFFICER RL RINAWMA CHAWL TA
Nimin 28.2.2015 khan Mizo pa Indian Revenue Service (IRS) officer R.L Rinawma chu a hna Principal Chief Commissioner of Income Tax - Delhi Region atangin a chawl ta. Amah hi 1978 IRS batch a ni a, kum 37 zet IRS officer hna a thawh chhung in India ram hmun hrang hrang - Pune, Bangalore, Mumbai, Mysore leh Delhi ah te post a ni a, a awmna apiangah sorkar tan leh Mizo te tan a mi tangkai tak a ni thin a ni. Kum 2009 khan Mizoram sorkar ah deputation in a lo chhuak a commissioner/Secretary hna a thawk a, kum 2014 khan Delhi ah a parent department Central Board of Direct Taxes ah a kir leh a ni.

*KTP ROREL INKHAWM ZANINAH TIAK ANG
Mizoram Presbyterian kohhran Kristian Thalai Pawl rorel inkhawm vawi 6-na Mission Veng Kohhran Biak In, Aizawl-a neih mek chu zanin ah a tiak ang. KTP rorel inkhawm hi General conference neih loh kum apiang in neih thin a ni. Palai + Chhimtu mi 828 an awm a ni. Rorel inkhawm an an thu pawm te chu post hmasa lamah tarlan a ni tawh a, i lo hai let mai dawnnia.
Pix courtesy: Matluanga Mission veng

27th & 28th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM
28.2.2015
*PETROL LEH DIESEL MAN SANG DAWN
Zanin zanlai atangin India ram pumah petrol leh diesel man tih san a ni dawn. Petrol hi 1 litre zel ah Rs.3.18 in a to dawn a, Diesel hi 1 litre zel ah Rs.3.09 in a to dawn bawk. International a crude oil man a to tak vangin India ah pawh tuialhthei man hi tih san a ni dawn ni a sawi a ni.

*LAMTLUANG WEEKEND SPECIAL(MIZO FIAMTHU)
*Non-Mizo Pakhat Kristiana inpe kha vanram a kai dawn em tih an zawt a, "Kai chu kai ang, mahse tlem chu hau ang" a ti😀.

*Tlangval sual deuh pakhat pawh hian a pa hnenah meidila tlak a hlauh thu leh a sat tur zia a sawi a, a pa chuan,'mite pawh an awm theih chuan awm theih tum ve tur ania'.. a ti.

*KRISTIAN THALAI PAWL (KTP)
Rorel Inkhawm Vawi 6- na
A hmun : Mission Veng Kohhran Biak In
A hun: Feb 27-March 1, 2015

1.Palai Inchhiarna
i)CKTP-23
ii)Bial aiawh palai-186
III)Br.aiawh Palai-605
Iv)synod puipate-3
V)C Kohhran Hmeichhe Committee-2
VI)Minister,Pastor,Pro.Pastor/Upate-7
Vii)chhimtute-2
Total-828

2.Kum 2017 -a KTP Rorel Inkhawm vawi-7 na.A hmun :Bawngkawn Kohhran Biak In
A hun :March 3-5,2017
Agenda pass te:
1)YRC pual hian Budget Aizawl khawpui chhung tan member pakhatah Rs 50,District Capital tan Rs 30 leh a dang zawng Rs 20
2.YRC pualin thawhtan zan inkhawm thawhlawm tum khat hi ram pum huapin lakkhawm ni rawh se.
3.Central KTP in ram pum huapin sual thupha chawi tawngtai rual buatsaih rawh se leh CKtp hmalaknain Branch tinah zoram tan chawnghei tawngtai neih ni rawh se.
4.Ram pum huapin thawhtan zan inkhawm vawi khat thawhlawm hi synod Hospital pualin pek rawh se.
5.Cenral KTP in Orchestra Band din dan ngaihtuah rawh se.
6.Kum Puan thupui atan
Pathian nena lendun (Mika 6:8)


*#‎Budget2015‬
Vawiin a Union Finance minister Arun Jaitley an Lok Sabha a Budget 2015-16 a pharh a India hmarchhak lam tan a thil lawmawm te:
*Assam ah All India Institute of Medical Sciences (AIIMS) din a ni ang.

*Nagaland ah National Institutes of Pharmaceutical Education and Research din a ni ang.
*Arunachal Pradesh ah Centre for Film Production, Animation and Gaming din a ni ang.
*Mizoram in a bik a thil thar kan chan ve tur sawilan a awm lo thung.

*Central Young Lai Association, Lawngtlai in February 24, 2015 atanga sorkar a an thilphut te tihlawhtling tura sorkar nawrna, total bandh an neih chu sorkar atanga thu lawmawm hriat tur a la awm loh avangin March 4, 2015, zing dar 6 atanga tan leh turin chawlh lailawk a ni dawn.

Hetih chhung hian motor leh mihring khualzin tang te pawh chhuah an ni ang. Thawhlehni thlenga sorkar lam atangin thu lawmawm hriattur a awm loh chuan total bandh hi chhunzawm leh a ni ang.

*KARNATAKA DG&IGP LALROKHUMA PACHUAU CHAWL DAWN TA
Vawiin hian Mizo pa IPS tuna Karnataka state a Police hotu luber Director-General and Inspector General of Police nilai Lalrokhuma Pachuau chu a hna atangin a chawl dawn ta a ni. Amah hi 1977 batch IPS officer niin Karanataka cadre pek a ni. Hman deuh khan Mizoram ah lo chhuak in DGP hna a rawn thawk a, a hnathawhna state ah DG&IGP hna thawk turin Bengaluru ah a chhuk leh a ni. Lamtluang a thlalak kan rawn tarlan hi nimin a amah thlahna parade KSRP Ground, Koramangala a neih a guard of honour a dawng lai a ni.

27.2.2015

*DDK AIZAWL AH UNION BUDGET 2015 SAWI HONA NEI DAWN
Union Budget 2015 chu 28th February, 2015 (Inrinni) ah Finance Minister Arun Jaitley-a'n a pharh dawn a, tlai dar 5:30-6:30 ah Budget pharh tak chungchang sawihona hi Doordarshan Aizawl chuan a buatsaih zui ang. He live discussion ah hian Prof. Vanlalchhawna Department of Economics MZU te, Dr James C.T. Thanga Asst Prof. MZU leh J.Malsawmzuala Vanchhawng DDK ten hun an hmang ang. (DIPR)

*NATIONAL COMMISSION FOR MINORITIES MEMBER-IN CHIEF MINISTER HMU
Ni li chhung cham tura Mizoram rawn tlawha nimina lo thleng, Capt. Praveen Davar, Member, National Commission for Minorities (Union MOS rank) chuan nimin tlai khan Chief Minister Pu Lal Thanhawla chu a office Chamber-ah a hmu.

Capt. Praveen Davar hi Prime Minister 15 Point Programme leh Multi Sectoral Development Programme chungchanga Mizorama lokal a ni. Indian Air Force Chief in a Chief Minister hnena pek tur thilpek a ken tir chu Capt. Praveen hian Chief Minister hnenah a hlan bawk a ni.

Capt. Praveen Davar hian Chief Secretary leh official pawimawh dangte nen vawiin ah a la kawm dawn a ni. (DIPR)

*MBSE IN A HRANPA IN EXAM BUATSAIH DAWN LO
Mizoram Board of School Education thuneitute chuan Higher Secondary School Leaving Examination 2015 tan hun dawn a Central Young Lai Association (CYLA) in Bandh an siam chu pawi an ti a. He Bandh avanga zirlai naupang Higher Secondary School Examination a thu thei lo te tan a hranpa in exam dang nakin ah a buatsaih theih loh tur thu leh, Exam an beih leh theihna hmasa ber chu nakum 2016 a nih thu MBSE chuan an sawi. (DIPR)

*RAIL BUDGET MIZORAM TAN CHHAWR VE TUR AWM EM?
Nimin a Union Railway Minister Suresh Prabu an Parliament a Rail Budget 2015-16 a pharh tak ah khan point 52-na ah India hmarchhak state zawng zawng te railway line pek vek annih tur thu a sawi a, Meghalaya pawh India railway map ah rinluh theih a ni tawh a, kumin March thla atangin Barak Valley pawh rel kawng lian chi (broad gauge) hmang bul tan a ni ang a ti. Mizoram tan bik Barak valley (Silchar vel bawr) rel kawng lian chi - broad gauge hmanga tih zauh a nih chuan bungrua leh ei leh in tur lakluh kawngah pawh kan awlsam phah ve thei a, tin, hmun hla zawk zin nan te pawh Guwahati atang chauh nilo, Silchar vel bawr atang te pawhin rel a chuan theih ve theih thuai turah ngai ila. Tin, Union minister hian NE state dang a rel kawng siam mek te pawh in chak takin hma a sawn zel niin a sawi bawk.