25th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
25.2.2015 

*TOTAL BANDH TI TAWP
Darkar 12 awh tur Total bandh MNF party ten an huaihawt chu Mizoram mipui te tawiawmna an dawn that avangin tlai Dar 3:30 khan tih tawp a ni ta e.

*TATA COURT IN DAMCHHUNG LUNG IN TANG TURIN ABU SALEM HREM
Mumbai Special TADA court chuan India ram a gang hotu lar tak Abu Salem chu kum 1995 a Mumbai a contractor lian tak Pradip Jain a thah avangin damchhung lung in tang turin hremna a pe.

*HRIATTIRNA
Addl. DC & CEO, District Disaster Managemenr Authority, Aizawl District, Aizawl chuan a hnuai ami ang hian hriattirna a chhuah.
Rangvamual leimin paih hna thawh mek hi a hma thei ang bera zawh a nih theih nan hnathawh hun chhung pawhsei tula hriat a ni a. 24.2.2015 atang chuan nitin zing dar 6:00 atanga zan dar 10:00 thleng hnathawh a ni tawh dawn a, mipuite hriatthiamna a ngen a ni e. (DIPR)

*SUBJECT COMMITTEE - I THUKHAWM DAWN
26th February, 2015 dar 11:00 AM khian Mizoram Legislative Assembly hnuaia Committee peng pakhat, Subject Committee - I chu Mizoram Legislative Assembly Secretariat Annexe Committee Room-ah an thu khawm dawn.

Member te chu - Pu Chalrosanga - Chairman; Pu Lalrinliana Sailo - Member; Pu K. Sangthuama - Member; Dr. Ngurdingliana - Member; Pu Lalthanliana - Member; Pu R. Vanlalvena, member leh Pi Vanlalawmpuii Chawngtu Member te an ni. (DIPR)

*K LALRINTHANGA’N SIHPHIR AH PACK HOUSE HAWNG
Nimin zing dar 8:00 AM khan Horticulture Department enkawltu Parliamentary Secretary Pu K.Lalrinthanga’n Sihphir Kawn veng a Pack House a hawng a. Pu K.Lalrinthanga chuan huan leh loneitu te fuihna leh an kal zelna atana thil pawimawh tak tak te kawhmuhin thu a sawi a. Sorkar Programme pawimawh tak NLUP avanga RKVY pawh hi Mizoram in kan neih theih phah a ni, tiin hemi hmang hian Sorkar-in Agriculture kaihhnawih hmasawnna hrang hrang pawh a thawh theih phah thu a sawi bawk.

He Pack House hi Horticulture Department in Sihphir Farmers te tan RKVY Scheme hnuaia an siam sak niin he hunah hian bialtu Horticulture Officers leh Staff te, VC leh Farmers Interest Group (FIG) a hotute leh FPO (Farmers Producers Organisation) a board of Director te an tel. (DIPR)

*UPC PASTOR QUARTERS THAR HAWNG
Nimin zing 7;30 khan United Pentecostal Church (North East India) North Mizoram district huamchhung Aizawl a Dinthar bial Pastor Quarters sak thar chu North Mizoram District Superintendent Rev.C.Lalrammuana'n a hawng.

*AIR LIVE PHONE-IN
Tun Inrinni lo awm tur, February ni 28, Chawhnu dar 1:05 - 2:00 inkar, All India Radio Aizawl a Telephone-a zawhna leh chhanna Live Phone-in Programme ah chuan “The Mizo Marriage, Divorce and Inheritance of properly Act, 2014” chungchang a hriat duh neite tan a zawh theih dawn a. Mipui zawhna chu - I) Dr. Lalthanpuii Hnamte, Vice President 2) Saipuii, General Secretary leh 3) Sylvi Z. Ralte, Legal Adviser, MHIP Headquarters, Aizawl - ami ten an rawn chhang ang a. A zawt duh tan Telephone No - 0389/2323148 emaw 0389/2322515 emaw ah biak pawh theih a ni ang. (DIPR)

*ASSAM RIFLES CHHUAHSAN TUR RAM CHUNGCHANGA DIN ADVISORY COMMITTEE THUKHAWM
Assam Rifles in Aizawl khawpui chhunga an ram luah chhuahsan tur, mipui leh vantlang te tana hman tangkai dan tur chungchanga Mizoram Sawrkar hnena thurawn pe tura din Advisory Committee-te chu nimin khan an Chairman, Land Revenue & Settlement Minister Pu R. Romawia hovin Land Revenue & Settlement Conference Hall-ah an thukhawm a. Member dang zingah Pu H.Zothangliana, Parliamentary Secretary; Pu T.Sangkunga, MLA; Pu Vanlalzawma, MLA; Member Secretary leh Land Revenue & Settlement Secretary ni bawk Pu Zothankhuma, IAS leh Pu Lalramnghaka, Director, Land Revenue & Settlement te chu meeting-ah hian an tel a. Member dangte chu Pu P. Rohminthanga, IAS (Rtd.) leh Pu H. Raltawna, IAS (Rtd.) te an ni.

Nimin a meeting chuan Assam Rifles in Draft Memorandum of Understanding an lo siam, Law & Judicial Department lam ten uluk taka an bihchhian chu an thlirho a, Mizoram tan pawm theih a nih leh nih loh dan te sawihoin, an rawtna chu Sawrkar ah an la thehlut dawn. Meeting hmasaa bawhzui tur atana thu an chhawpchhuah te hmalak dan an thlir ho bawk a ni. (DIPR)

*RATION CARD SURRENDER CHUNGCHANGA MIPUITE HNENA NGENNA
Mizoram sorkar hnuaia Food, Civil Supplies & Consumer Affairs Department in Public Distribution System tha taka kalpui a nih nan leh mi harsa zawk ten heng buhfai, khawnvartui, chini leh thildangte Ration Card hmanga hnianghnar zawka an hmuh theih nan MLA, Ex-MLA, MDC, Ex-MDC, Councillor (AMC), Mizoram Sorkar hnuaia thawk Gazetted Officer chin zawng, sumdawng hausa, contractor/supplier leh Ration Card hmang lova khawsa thei te mahni Ration Card surrender theite kan awm a nih chuan, kan awmna theuh District Civil Supply Officer, Supply Department-ah thehlut theuh turin kan in ngen takmeuh a ni.

Ration Card surrender tute hnenah hian District Civil Supply Officer ten uluk taka lo chhinchhiah in Ration Card ah - ‘not for PDS (Rice) for identification only’ tih chuang seal chhu in Ration Card surrender tute hnenah hian an Ration Card hi official document a hman atan pek kir leh a ni ang. (DIPR)

*TRIAU TRACKX TEN HMALAM PAN AN DUH (HLA THAR AN TLANGZARH)
Vawiin aṭangin Champhai project band lar tak Triau Trackx te chuan music video thar 'Hmalam i pan ang u' tih chu an YouTube channel ah a duh apiang te ngaihthlak theih turin an chhawp chhuak ta. Zoland.in-ah pawh mp3 format in an rawn chhawp chhuak tawh bawk. He music video thar hi Chapchar Kut pual a an tihchhuah a ni.
https://www.youtube.com/watch?v=td8DHcmSe3Q

‪#‎TriauTrackx‬

*GEOLOGY & MINERAL RESOURCES MINISTER IN ZANLAWN LEH MEIDUM A ONGC HMALAKNA TLAWH
Nimin chawhma khan Geology & Mineral Resources(G&MR) Minister Pu H.Rohluna chuan Parliamentary Secretary Pu Joseph Lalhimpuia; KVI Chairman Pu K.Lianzuala; Dr H.Lallenmawia, Director, G&MR; I&PR Official leh Kolasib MJA member-te hruaiin ONGC in hydrocarbon laihchhuah tuma kut a thlak mekna Tawitaw Bungalow bul, Zanlawn a mi leh Gas hmuhchhuah tawhna Meidum khaw ram chhung ami te a hmunah kalin a endik a. Minister hi Pu M.C. Das, General Manager, Mizoram Block, ONGC leh a thawhpui ten lo dawngsawngin an hmalak leh thil tum te an lo hrilhfiah a ni.

Minister zawhna chhangin ONGC hotute chuan Mizoram leh Tripura leihnuai a leilung te an in an loh thu sawiin gas emaw oil emaw hi a State pakhat zawk leihnuai atanga a thenawm state hnuaia awm chu lak pen theih a ni lo an ti. Kum hmasa lam a Meidum drilling site atanga tanker bullet lian hmanga gas phurh thlak ni awma sawi chu LPG Gas ni lovin Drilling Rig a hman tur Liquid nitrogen an rawn phurhna tanker kirleh lam a nih zawk thu sawiin gas te hi an thu thu a tanker a phur ngawt theih a ni lo a ti a. Meidum Hydrocarbon Exploratory Well ah hian 3.85 Kms verh a nih hnu in gas 2.2 billion cubic metre hmuh a ni a, a tam lam hi duhthu a sam chiah loh avangin gas tam zawk hawr khawm turin object 3 leh object 4-na a mi te chu hyrdofracturing hmang in hmunkhat ah an khawm mek thu ONGC hotute chuan an sawi a. Hydrofracturing hi March 12 chuan zawh hman inbeiseiin a rang lama commercial production stage (hralhchhuah theih hun) an thlen a rinawm thu an sawi a. Commercial Production stage an thlen hun chuan khawtual mite inhlawhna tam tham tak a awm dawn bakah ONGC Site Office pawh Mizoram ah din a tul dawn a ni ONGC hotute chuan an ti a.

Zanlawn khawdai a Hydrocarbon Exploratory Well laih hna hi January thla tir khan tan a ni tawh a. Hydrocarbon Exploratory Well hmunhma atan hian 40,000 Square Kilometers an neih thu tarlang in Leivung 1,20,000/- Cubic Meter paih tur a awm dawn a, April 7 ah chuan leiverh hman an tum thu ONGC te hian an tarlang. An khawl lian tak tak hnuh Silchar atanga Zanlawn hnuh thlen nan hian Kawnpui leh Zanlawn inkarah kawngzim lai hmun 8 ah zauh hna an mahni in an thawh theih nan Border Road Organisation(BRO) hnen atang pawhin phalna an neih tawh thu an sawi a. Heng kawngzim laih zauh hna an thawh lai hian Civil Administration puihna bakah mipui vantlang leh khualzin veivakte ngaihthiamna an mamawh thu an sawi a ni. (DIPR)

*AIZAWL CITY TAXI CHUAN MAN THAR TLANGZARH
State Transport Authority Mizoram chuan nimin khan I&PR Conference hall, Aizawl-ah kumin March ni 1 a hman tan tur Aizawl city taxi fare 2015 thar ziahna lehkhabu chu a tlangzarh. Taxi chuan man thar ah hian taxi stand chhuahsan atang a 1 km ah Rs.40 a ni anga, a baka zawng chu 1km zelah Rs.30 in belh thin tur a ni ang. Taxi fare hi zan dar 9 leh zing dar 4 inkar ah 25% in a pung dawn a ni. Aizawl khawpui chhung a taxi stand 45 mil a siam niin transport hotute chuan an sawi. Aizawl khawpui chhung ah taxi 3500 chuang a awm thu sawilan a ni bawk.

*H1N1 (SWINE FLU) SCREENING NEIH CHHUNZAWM A NI

Directorate of Health Services hnuaia Integrated Disease Surveilliance Project (ISDP) hmalakna in nimin khan Lengpui Airport-ah Screening neih chhunzawm a ni. Air India leh Jet Airways passenger te ngun taka lo check an ni a. Passenger te zingah hian rinhlelhawm an awm hriat a ni lo va. Amaherawhchu Swine Flu lenna hnai vaia zin veivak te erawh engemaw thulh-ah an contact no lak a ni thung.

Nimina Screening ah hian IDSP atangin Dr.L.Muanzova Paite leh Supporting Staff pathum an thawk chhuak a. Lengpui Airport a Medical Duty ten an tawiawm bawk a ni. IDSP chuan Mizoramah Swine flu a lo luh belh lohna turin theihtawp an chhuah mek thu leh mipuite chiai lo tur leh hlauthawng lo turin mipuite a chah bawk. (DIPR)

*VAWIIN ‪#‎MIZORAM‬
*Mizo National Front party huaihawt in tukin zing atangin Mizoram pumah darkar 12 awh tur Total Bandh kalpui a ni.

*Tukin zing dar 7 atanga tlai dar 4 thleng in Chakma Autonomous district council huamchhung ah Village Council inthlan neih a ni dawn. Khaw 81 ah he inthlan hi neih a ni ang.

*Central Young Lai Association in nimin atanga tiamchin awmlova Lawngtlai district huamchhung a total bandh an huaihawt chu chhunzawm leh a ni ang.

*HNAM IMPUMKHATNA ATANA SULHNU NEI TE TAN KABIR PURASKAR DIL THEIH

Hnam inpumkhatna ti chhe thei boruak a awmin leh chi leh chi inkara buaina a chhuah a, midangte humhim leh an thlavang hauh zawnga hna thawk tha tan Sawrkar Laipui chuan kum tin Kabir Puraskar a hlan thin a. He chawimawina dawng thei turte chu state sawrkar chuan an hming pe lutin anmahni an recommend thin a, a dawng tur chu Sawrkar Laipuiin an thlang thin a ni. He chawimawina hi Grade thum a then niin Grade I hian pawisa fai cheng nuai 2 leh thuziak a keng tel a, Grade II hian pawisa fai cheng nuai 1 leh thuziak a keng telin Grade III hian pawisa fai cheng sing 5 leh thuziak a keng tel a ni. Kumtin October ni 2 hian he chawimawina dawng te hi puan thin niin a dawngte hnenah he chawimawina hi Prime Minister-in a hlan thin a ni.

Kumin atan hian he chawimawina dawng thei te hming a rawt leh theih a, rawtna te hi April ni 30 aia tlai lovah Under Secretary, Home Department hnenah thehluh tur a ni a, State Sawrkar hian an endik hnuin hming an rawt te chu Sawrkar Laipuiah an thawn thla leh thin a. Sawrkar Laipuiin a dawng turte an thlang thin a ni. Hemi chungchang chanchin kimchang leh a dilna form te chu Home Ministry website http://mha.nic.in/scheme ah a en theih a ni.
(DIPR)

24th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
24.2.2015

*HMANLAI THIL VAWN NUN INHRILH HRIATNA WORKSHOP NEI
Vawiin khan I&PR Auditorium Treasury Square, Aizawlah Workshop on Intach heritage Clubs: Mizoram neih a ni a. He hmanlai thil vawn nun inhrilh hriatna zirna hun hi Pu P Rohmingthanga, Convenerin a kaihruai a, Pu Lalmalsawma IAS (CS GoM) chuan he hun hi a hawng a ni. Mizoram school zirtirtu leh college zirtirtu thenkhat ten he hun hi an hmang a. Pi Purnima Dutt, Director Heritage Education and Communication Services Division INTACH, New Delhi chuan heng kalkhawm te hi a zirtir a ni.

*DELHI CM IN MOTHER TERESA THLAVANG HAUH
Tukin a Lamtluang a kan rawn tarlan tawh angin, nimin a RSS hotupa Mohan Bhagwat an Mother Teresa in mirethei te a tanpui nachhan chu Kristian a leh a duh vang tih a sawi chu Delhi Chief Minister Arvind Kejriwal an twitter atanga chhang let in, "Mother Teresa nen khan Kolkata an rawngbawlna Nirmal Hriday ah thla rei lo te kan thawk dun a, nu ropui leh ngaihsan awm tak a ni, khawngaihin i sawichhe lul lovang ang u" tiin a tweet a ni.

 

DAWNTISEI Courtesy ‪#‎Aldy‬ Chawngthu
*Kawng sir thutthlengah te riakin nitin film city a ka kalna tur ka thianpa cheng 20 ka puk ziah thin- Shah Rukh Khan.

*Pawl riat ka fail a ni. - Sachin Tendulkar

*Higher ka kal Lai chuan Kan sikul basketball team atanga paih ka ni - Michael Jordan

* Ka aw thum lian lutuk avangin All India Radio hna ka dilna hnawl ka ni - Amitabh Bachchan

*Petrol pump ah hna ka thawk thin - Dhirubhai Ambani

*Pilot interview ah ka tla - Abdul Kalam

*University ka kal tluan lo - Bill Gates

*Kum 9 ka nihin pawngsual ka ni - Oprah Winfrey

*Football training ka zawm theih nan dawrah thingpui ka sem thin - Lionel Messi

*Ka thiante pindan chhuatah te ka riak thin a, chaw leh pawisa a ka thlengpui turin coke bur ruak te ka fawmkhawm thin a, Temple ah te a thlawna kartin a chaw an sem te ka chang thin. - Steve Jobs

* Kan zirtirtute chuan mi hlawhchham min ti thin - Tony Blair

* Kum 27 chhung taninah ka tang - Nelson Mandela

* Kum 30 ka nih Lai chuan bus conductor ah ka tang thin - Rajnikanth

* Rs 20 hi kutdawh bawma thlak atan chuan tam riaua Kan hriat laiin restaurant lian tak taka bill baka pek belh atan chuan a awm tawk kan ti vel tho si....

* Nilenga hna rim taka thawh hnua darkar tlemte gym a Han inlak fit te kha hahthlak lem loha Kan ngaih laiin hun reilote mahni nu te in lama han puih chu hman lo Kan inti leh hle si....

* Pathian be tura minute 3 pawh rei Kan tih laiin Kan hmuhnawm tih zawng en tur chuan darkar 3 pawh Kan thu reng thei a....

*Kumtluana Valentines day nghakhlel taka thlirtu khan Mother's day erawh Kan mangnghilh leh daih a....

*Kawngkama naupang rethei ei tur nei lo te chuan Chhang zai khat petu pawh an neih loh laiin lemziak thiamin an lem a ziah chu nuaih Chuang fe in a hralh thei thung si...

*Fiamthu tha pui pui Kan forward chur chur a, thutak erawh forward Mai tur chuan Kan han inngaihtuah deuh vang vang thin a...

Ngaihtuah teh, Kum 2015 a danglamna mite nuna thlentu I ni thei asin

*LAWNGTLAI AH TIAMCHIN AWMLO BANDH NEI MEK
Tukin zing dar 5 atangin Central Young Lai Association hmalakna in Lawngtlai leh Lai Autonomous district huamchhung khaw hrang hrang ah tiamchin awmlo Total bandh neih mek a ni. CYLA te hian sorkar hnenah Lawngtlai leh district dang te inkalpawhna siam that leh Lawngtlai a P&E sub division chu Division puitling a hlan kai an phut a ni.

*Veng mipa naupang kum 5 mi Lalrindika s/o. C. Lalrotlinga chu Sarzuk mu dawlh sual palh nia rin vangin a thi a, lumen niin nimin chawhnu dar 1 khan vuina inkhawm neih a ni.

Lalrindika hi a thiante nen khawlai lengin, an thenawm hnaia Sarzuk chu an ei a, hetia sarzuk an ei hnu deuh hian Lalrindika chu a tlu ta tawp a, a bul hnaia lo awm tleirawl ten an pawm thawh chuan a zawi nghal vek a; damdawiin panpui nghal vat a ni a, nimin tlai dar 6 hma deuha damdawiin thlenpui a nih chuan a lo chatthla hman tawh niin Thenzawl Medical Officer chuan kan palai a hrilh.

Lalrindika thih chhan tak hi hriat chian a ni lova, sarzuk mu a dawlh sual palh nia rin a nih ber thu Thenzawl Vengthlang Branch YMA President Pu H. Lalrokima chuan kan palai a hrilh a ni.

Lalrindika hi hi unau pathum zinga naupang ber leh mipa awmchhun a ni a, sikul a la kal tan lova. A pa Pu C. Lalrotlinga chu Kelkang harhna chhim tura zin, an veng Kohhran Pavalai Pawl member 50 rual zingah telin, kar kalta Zirtawpni a zin chhuak kha an ni a, Lalrindika thihna vang hian nizan khan Kelkang atang hian Thenzawl panin an haw hlawm a ni.

Lalrindika hi naupang danglam tak a ni a, Biak Inah pawh lam reng mai leh, kawm theih tak a nih avangin an Kohhran Upa te ngainat pawh a hlawh hle niin Thenzawl Vengthlang Branch YMA President Pu H. Lalrokima chuan kan palai a hrilh a ni.

News Source: Lalhmachhuana Tochhawng via DINGDI group in FB

 

*THUTHAR LAKHAWMTU LAR REUTERS HOTUNU PAKISTAN AH THI A HMUH A NI
Nimin khan Pakistan khawpui Islamabad a Reuters office bual in chhung ah Reuters Chief Bureau for Pakistan and Afghanistan nilai leh hmeichhe journalist lar Maria Golovnina chu thi a hmuh a ni. A thihchhan hriat la nilo mahse police ten post mortem result atangin an zirchian tur thu an sawi. Maria Golovnina hi Russia khua leh tui niin Pakistan leh Afghanistan a Reuters news hotu luber a ni. Reuters hi khawvel a news reporter larber te zing a mi anni tih chu in hriatsa a nih kha.

*FACTORY KHAWL PUAK
Nimin khan Hyderabad khawsir a Gulf Oil Corporation limited te factory ah thil puak a awm avangin mi 2 thihngam in hliam an tuar a, midang 13 te pawn hliam an tuar bawk. He thil puah nachhan hi hriat ni chiah lo mahse IDL chemical wing ah puak thei thil atanga rawn puak ni a rin a ni.

*RSS HOTUPA IN MOTHER TERESA SAWISEL
Nimin khan Bharatpur, Rajasthan ah Hindu duhfir pawl RSS hotupa Mohan Bhagwat chuan NGO pakhat Apna Ghar te programme huaihawt ah thusawiin Mother Teresa rawngbawlna in a tumber chu ringlo mite Kristian inleh tir a ni a ti. Chutiang anih avang chuan a michanhai zawk te tan a a rawngbawlna kha demawm a ni a ti. He hunah hian BSF DGP hlui Prakash Singh pawn thusawiin Mother Teresa pawl Missionary of Charity te aia mi chanhaite tan a thawk tha zawk pawl tam tak an awm a, Kristian te hian an thil tih that hi media kaltlang a vawrh lar an thiam a ni a ti bawk.

23rd February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
23.2.2015

*BRU HEL HRUAITU MAN
February ni 2 a Chikha khaw dai atanga Thangchhuaka leh BRTF Overseer Hukum Singh rubo tu te zinga mi ni a hriat Lianmawia chu kar kakta zirtawpni khan Naisingpara ah Mizoram Police ten an man. Kum 2011 - 2015 chhung hian Bru hel pawl BDFM zinga tel mi 8 an man tawh a ni.

Mamit police te sawi danin Lianmawia hi Bru Democratic Front of Mizoram (BDFM) hel pawl zinga a meizang hlaptu ber a nia hriat a a ni a. Inrinni khan Mamit thlenpui niin court ah hruai nghal a ni a, vawiin khan Aizawl panpui a ni. Bru hel pawl thawhpui thin ni a hriat Raj Mani Tuipuibari - I chu police ten an man tel bawk. Raj Mani hi BNLF hel pawla lo tel tawh thin a ni.

Source: David M Zadeng via Mizo Special Report Group in FB

*FRANCE IN IS FIRFIAK PAWL ZAWM TUM MI 6 PASSPORT TIHTAWP SAK
France Interior Minister Bernard Cazeneuve sawi danin an ram France atangin Islamic State (IS) firfiak zawm tum mi tam tak an awm a, chung zing a mi 6 te passport chu sorkar in a tihtawp sak a ni a ti. Passport an tihtawp sak te hian France atangin Syria an pan a ni.

*SPORTS MINISTER-IN POLICE SPORTS MEET A HAWNG
Mizoram Police Sports & Cultural Control Board buatsaih Mizoram Police Sports Meet vawi 16-na, ni 23-27 February, 2015 chhunga neih tur chu vawiin chawhma dar 10:00 khan Rajiv Gandhi Stadium, Mualpui ah Sport & Youth Services Minister Pu Zodintluanga’n a hawng.

Mizoram Police Sports Meet vawi 16-na ah hian sports discipline hrang hrang ah inelna nei turin infiammi 1228, battalion hrang hrang leh Mizoram hmun hrang hrang atangin an lo kal khawm a ni. (DIPR)

*CHANCHINTHAR LANGSAR ZUAL
*Vawiin atangin India Parliament budget session tan a ni dawn.

*Maldive President hlui Mohammad Nasheed chu nimin ah anti-terror law hmang a man a ni.

*Afghanistan a Taliban ten thla 8 zet an hren hnuah Tamil Nadu a Jesuit puithiam Father Alex Premkumar Antonysamy chu nimin khan chhuah a ni a, nimin khan Delhi a lo thleng.

*Anna Hazare chuan Land ordinance duh loh avangin Delhi ah ni 2 chhung nawrh a huihawt dawn.
*Nimin a Bangladesh a lawng chesual a thizat mi 41 an tling ta.

*87th Academy Award (Oscar award) chu Los Angeles ah sem mek a ni.

*Delhi assembly member thlan thar ten session hmasaber vawiin ah nei tan dawn. MLA thar ten rinawmna thu an tiam ang.

*Mi in bengvar nan Lamtluang like an duh thin.

*TURKEY SIPAI TE SYRIA AH LUT IN HMANLAI THLAN AN VA HAI
Nimin khan Turkey sipai te chuan Syria ramchhung a thlan pawimawh tak Ottoman empire dinchhuak tu Osman-I pu Suleyman Shah thlan chu Islamic State firfiak te kutah a awm mai an hlauh avangin va luhchhuak in thlan chhungna thil pawimawh te hmun him lamah an thiar chhuak a ni. Turkey sipai te hian Suleyman Shah thlan atanga thil pawimawh ah lakchuah te hi Syria ramchhung a Eshme district ah an phum tha leh a ni. An phum thatna hmun hi Turkey nen a an in ramri na atanga 200 metre a hla ah a ni.

 

*INDIA TUIHNUAI LAWNG LEH SANGHA MANNA LAWNG INSU
Ningani liamta zan ah khan Mumbai atanga chhimlam tuipuikam hnaih ah India Navy te tuihnuai lawng INS Sindhughosh chu naval tropwlex exercise an tih laiin lawngchawlhna lam a rawn pan chu sangha manna lawng pakht in a su a, a rawn sutna avangin a pang vel nasa takin a chhia a, siamthat a ngai hial a ni.

 

*Health Minister Conference hmanga Delhi-a kal Health Minister Pu Lal Thanzara chuan Zirtawpni khan AYUSH/Health Minister Conference, Vigyan Bhawan, New Delhi a neih ah telin thusawina hun tha tak a nei.

He Conference-ah hian Health Minister Pu. Lal Thanzara, chuan kan ram ah Traditional Medicine tun hma atanga kan lo neih ve tawh te venhim leh hman tangkai pawimawhzia thehdarhna kawngah AYUSH in nasa taka tan an lak avanga lawmawm a tih thu te, Mizoram AYUSH damdawi hmang tangkai kawngah bul tan tlai hle mah ila Mizoram Hospital a AYUSH OPD awmna ah chuan AYUSH Clinical Service leh Therapy te chu tangkai taka hman a nih tawh thu leh mipuiin ten an chhawr hle thu sawiin hemi mamawhna san zia pawh chiang takin a tarlang bawk. Health Minister hian Kum 2014 - 2015 atana Annual Action Plan Rs 211 lakh pawm sak tawh chu release thuai turin a ngen nghal a. Kum 2012 atanga la dawn loh, Programme Management Unit, Contingencies, Medicine leh Consumable atan Fund te chu release sak thuai turin Ministry hnenah a ngen nghal bawk a ni.

Health Minister chuan "Tunah hian AYUSH Directorate din a nih theih nan hmathlir na kan nei mek a, a pawimawh ber chu Annual Plan hi min pawm sak a Fund release thuai hi a ni a. Khum 50 awmna AYUSH Hospital sak zawh tep ni tawhin, tangkai taka hman a nih theih na turin Department of AYUSH hian nasa taka min puih a min kaihhruai kan mamawh dawn a ni." a ti a. Department kaihhruaina hnuaiah Mizoram Police ten Yoga Training Center District tinah din turin an in tiam thu te, hemi atan hian Annual Action Plan, IEC Component hnuai-ah Plan pawh theh luh tawh a nih thu a sawi bawk.

Minister hi Dr. C. Lallunghnema, Deputy Director, AYUSH H&FW in a tawiawm a ni. (DIPR)

22nd February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
22.2.2015

*IES/ISS EXAM TUM TE TAN HRIATTIRNA
Union Public Service Commission chuan Indian Economic Service (IES)/Indian Statistical Service (ISS) exam 2015 a buatsaih dawn a, dil tum te tan March ni 20 thleng dil theih a ni. Hrechiang duh tan UPSC website www.upsconline.nic.in ah ngaihven theih a ni.

*BANGLADESH AH LAWNG CHESUAL
Vawiin khan Bangladesh ah Padma lui ah khualzin phur lawng MV Mostofa a chesual a mi 16 in nunna an chan a, mi tam tak chin hriat loh in an awm mek. He lawng chesual ta MV Mostofa hian bungraw phur lawnglian a sut avang a chesual ta a ni. Lawngah hian mi 70-150 vel an chuang a ni.

*BIHAR CM THAR ATAN NISTISH LALUT
Janata Dal (United) hruaitu Nitish Kumar chu vawiin tlai ah Bihar Chief Minister thar atan rinawmna thu tiam tir a lakluh a ni. Nitish Kumar hi tihian Bihar CM a vawi 4 nihna a ni dawn ta a ni.

*ICC Cricket World Cup khelh mek ah India chuan run 130 in South Africa an hneh.

*KOHHRAN HMEICHHE INKHAWMPUI LIAN MAMIT AH
Mizoram Presbyterian Kohhran Hmeichhe Inkhawmpui Lian vawi 46-na chu March 6 - 8, 2015 chhungin Mamit- ah neih a ni dawn a, InkhawmpuiAgenda tur leh Budget turte thlirhoin Feb. 19, 2015 khan Central Kohhran Hmeichhe Committee-te J.M. Lloyd Hall, Synod Office-ah an thu.

Hmeichhe Inkhawmpui Lian vawi 46-na hi Mamit leh Hmunsam Bialin an thleng dawn a, Mamit GSA Playground- ah nghah tur a ni a, thupuiah ‘I nunna turin tlan chhuak rawh’ (Gen. 19:17) tih hman a ni ang a, Speaker atan Rev. Vanlalzuata an hmang ang. Inkhawmpui chhung hian Thupuan 2 & 3 ‘Kohhran 7-te’ tih zirho a ni dawn a, Nl. Lalzuimawii Tlau, M.A., B.D, Synod Higher Secondary School-in a zirpui ang. (Synfo)

*LAMTLUANG ZINGKAR CHANCHINTHAR TAWI LAWRKHAWM
*NECS Cup 2015 Inter Village Football Tournament Kick Off chu Zirtawpni zan khan Chanmari YMA Hall, Aizawl-ah neih a ni. Naktuk atangin Lammual ah Kolasib College veng leh Lengte an intum ang. Team 132 an tel dawn a, pool 8 ah thendarh anni.

*Salvation Army atanga chhuak Salvation Church te chuan 21-22 February hian Tourist Lodge, Aizawl leh Ramhlun Indoor Stadium ah te National General Assembly ah hmang.

*Mizo Students' Union (MSU) chuan sorkar in sikul tan hma a rawt chu an dodal thu leh hmantan a nih dawn chuan a ni khat ni atanga an dodal tur thu an sawi.

*Jammu and Kashmir a sorkar siamturin BJP leh PDP te chuan inbiakna an nei zo thawkhat tawh a, vawiin a emaw karleh lamah an thawh dunna tur thuthlung an puan hman beisei a ni.

*Bangladesh tlawh a zin mek West Bengal Chief Minister Mamta Banerjee chuan nimin chawhnu khan Prime Minister Sheikh Hasina a hmu.

*Vawiin hian Parliament political party hruaitu zawng zawng ten Budget sesssion thlirlawkna na turin inhmuhkhawm an nei dawn.

*Sardar Vallabhbhai Patel National Police Academy, Hyderabad a IPS training lai mi 9 te chu swine flu an vei tih hmuhchhuah a ni.

*Union Minister for Human Resource and Development Smriti Irani chuan Subject hrang hrang 88 ah free online certification courses hawn thuai tum a ni a ti.

*Yemen President hlui Abdrabbuh Mansour Hadi chu an ram khawpui Sanaa ah Houthi helpawl ten house arrest a an dah hnuah tlanchhuak in Aden khawpui ah a raltlan.

*Nimin piah khan UAE khawpui Abu Dhabi a Mussafah Industrial Area a inchhawng sang a kangmei chhuak avangin mi 10 an thi a, mi 8 in hliam an tuar. He inkang ah hian khawvel ram hrang hrang atangin hnathawk an awm a ni.

*UNICEF thuchhuah in a tarlan danin South Sudan ah helpawl ten mipa naupang 89 aia tlemlo an ru bo niin an tarlang. Heng mipa naupang te hi kum 13 vel anni a, Malakal khawbul atangin an ru bo a ni.

*Singapore Prime Minister hmasaber Lee KUan Yew chu pneumonia avangin nimin khan damdawiin ah dahluh a ni. Amah hi kum 91 a upa ni tawhin kum 31 Prime Minister hna athawh hnuin kum 1990 khan PM hna a chawlh san a ni.

*Khawvel a rambuai tak leh Islam mipa te inlulinna ram tia hriatlar Iraq ah khawpuiber Baghdad ah an khawpui roreltulu Mayor turin hmeichhia Zekra Alwach chu ruat a ni. Baghdad a hmeichhia mayor an neih vawi 1 na a ni a, amah hi civil engineer a ni.

*Karnataka ah kumin January thla atang in swine flu vang in mi 33 an thi tawh a, a natna ve mi 602 hmuhchhuah tawh anni. West Bengal ah pawh swine flu vei mi 5 hmuhchhuah belh anni.

*Manipur a kawlphetha indaihlohna tihziaawm nan Manipur State Power Distribution Company Limited (MSPDCL) chuan 2015-16 financial year chhung in state pawn atangin Rs.Vaibelchhe 300 man kawlphetha lei an tum.

*Pope Francis chuan Italy ram a danlova damdawi tawlhruk ching te awmkhawmna hmun Calabria khua a misual pawl 'Ndrangheta te pual a thuchah sawiin " Pathian hnenah in thinlung hawng ula, Pathian in a la nghak reng che u, thil tha tih in duh pawhin kohhran ten kan lo lawm thei reng che u a ni" a ti.

*Union Finance Minister Arun Jaitley chuan amah hmutu All India Bank Employees' Association te hnenah February ni 25 atanga ni 4 awh tur nawrh huaihawt an tum chu thulh turin a lo ngen a ni.

*SMB IN INTERSERVE PARTNERSHIP COUNCIL MEETING THLENG
Synod Mission Board (Mizoram Presbyterian Church) chuan February 18 - 19, 2015 chhung khan Interserve India 2nd Partnership Council Meeting-cum-Consultation a thleng.

Kum 2013 kum tawp lam khan Interserve India chuan partnership rawngbawlna a neihpui Kohhran 5 (panga) -
1) Synod Mission Board (Mizoram Presybyterian Church)
2) Council of Baptist Churches in North East India (CBCNEI)
3) Baptist Church of Mizoram
4) Evangelical Congregational Church of India (ECCI), Churachandpur
5) Nagaland Missionary Movement (Nagaland Baptist Church Council)

te chu Partnership Council dinpui turin a sawm a. Chu sawmna chu pawmin Partnership Council Meeting chu din a ni a, Partnership Council Meeting vawi 1-na chu nikum (2014) February 19 khan Guwahati-ah neih a lo ni tawh a ni.

Interserve India 2nd Partnership Council Meeting cum Consultation thleng tur hian Interserve India hotuten Synod Mission Board an rawn ngen angin Synod Mission Board-in a thleng a ni. Feb. 18, 2015 khan Partnership Council Member-ten Synod Office-ah Council Meeting an nei a, Feb. 19, 2015 khanAizawl khawpui chhunga Kohhran hrang hrang - Presbyterian, Baptist, UPC (North East & Mizoram) - aiawh hruaitute sawmin Synod Office Devotion Room-ah rawngbawlna kawnga zau zawk leh inpumkhat zawka thawhho dan tur inrawnkhawmna Partnership Consultation neih a ni. (Synfo)

*MBKHP INKHAWMPUI HNAHTHIAL AH HMANG MEK
Mizoram Baptist Kohhran Hmeichhe Pawl (MBKHP) Inkhawmpui vawi 49-na leh Rorel vawi 64-na ni bawk chu Ningani zan atang khan Hnahthial ah tan a ni ta. He inkhawmpui lian hi Hnahthial Field-a Pandal-a dung feet 200 leh a vang feet 150-a sak, mi 5000-600 vel leng tura buatsaih-ah nghah a ni. Inkhawmpui thupui ah "I ram lo thleng rawh se” tih hman a ni. Inkhawmpui hi zanin ah an tiak ang. (www.mizobaptist.org)

 

*EDUCATION SUNDAY HMANG DAWN
Mizoram Baptist Kohhran chuan kum tinin February Pathianni hnuhnung ber hi BCM chuan Education Sunday atan a hmang thin a. Kuminah pawh February 22, 2015 hian Mizoram Baptist Kohhran Biak In tinah he Ni pual hian Chawhma inkhawm-ah hun hman a ni ang. Headquarters atanga thupui thlan sa “Zirna hmanga ênna” tih thupui hmangin thusawituten thuchah an sawi bakah Kohhran Nipawimawh Bu-a hemi ni pual thuchah chhiarchhuah tura buatsaih sa chu chhiarchhuah a ni bawk ang. Thupui thlanchhuah 3 te hmangin tawngtai rualna neih a ni bawk ang. (www.mizobaptist.org)

*CONSULTATION ON CONTOURS OF TRIBAL THEOLOGY

February ni 19-20, 2015 khan Consultation on Contours of Tribal Theology, Synod Conference Centre, Aizawl-ah neih a ni.

He programme hi Board of Theological Education of the Senate of Serampore College leh Mizoram Presbyterian Church tangkawpin an buatsaih a ni a, Mizoram Synod aiawhin Tuikhuahtlang Kohhranin a lo thleng a ni.

A ni 1-na Feb. 19, 2015) chawhma dar 10:00 khan Inaugural Session neih a ni a, Rev. Lalramliana Pachuau, Executive Secretary-in Inaugural address a sawi a, Dr. Wati Longchar, Kolkata-in KeynoteAddress pe-in ‘Tribal Theology Contibution on Contextual Theologies in Asia’ tih a sawi.

Consultation-ah hian Theological College zirtirtute, Doctorate zirlaite,Aizawl Theological College (ATC), Academy of Integrated Christian Studies (AICS), John Roberts Theological Seminary, Shillong atangin an tel a, consultation neih chhung hian Tribal Theology thupui then hrang hrang paper an zirho a ni. (Synfo)