24th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
24.2.2015

*HMANLAI THIL VAWN NUN INHRILH HRIATNA WORKSHOP NEI
Vawiin khan I&PR Auditorium Treasury Square, Aizawlah Workshop on Intach heritage Clubs: Mizoram neih a ni a. He hmanlai thil vawn nun inhrilh hriatna zirna hun hi Pu P Rohmingthanga, Convenerin a kaihruai a, Pu Lalmalsawma IAS (CS GoM) chuan he hun hi a hawng a ni. Mizoram school zirtirtu leh college zirtirtu thenkhat ten he hun hi an hmang a. Pi Purnima Dutt, Director Heritage Education and Communication Services Division INTACH, New Delhi chuan heng kalkhawm te hi a zirtir a ni.

*DELHI CM IN MOTHER TERESA THLAVANG HAUH
Tukin a Lamtluang a kan rawn tarlan tawh angin, nimin a RSS hotupa Mohan Bhagwat an Mother Teresa in mirethei te a tanpui nachhan chu Kristian a leh a duh vang tih a sawi chu Delhi Chief Minister Arvind Kejriwal an twitter atanga chhang let in, "Mother Teresa nen khan Kolkata an rawngbawlna Nirmal Hriday ah thla rei lo te kan thawk dun a, nu ropui leh ngaihsan awm tak a ni, khawngaihin i sawichhe lul lovang ang u" tiin a tweet a ni.

 

DAWNTISEI Courtesy ‪#‎Aldy‬ Chawngthu
*Kawng sir thutthlengah te riakin nitin film city a ka kalna tur ka thianpa cheng 20 ka puk ziah thin- Shah Rukh Khan.

*Pawl riat ka fail a ni. - Sachin Tendulkar

*Higher ka kal Lai chuan Kan sikul basketball team atanga paih ka ni - Michael Jordan

* Ka aw thum lian lutuk avangin All India Radio hna ka dilna hnawl ka ni - Amitabh Bachchan

*Petrol pump ah hna ka thawk thin - Dhirubhai Ambani

*Pilot interview ah ka tla - Abdul Kalam

*University ka kal tluan lo - Bill Gates

*Kum 9 ka nihin pawngsual ka ni - Oprah Winfrey

*Football training ka zawm theih nan dawrah thingpui ka sem thin - Lionel Messi

*Ka thiante pindan chhuatah te ka riak thin a, chaw leh pawisa a ka thlengpui turin coke bur ruak te ka fawmkhawm thin a, Temple ah te a thlawna kartin a chaw an sem te ka chang thin. - Steve Jobs

* Kan zirtirtute chuan mi hlawhchham min ti thin - Tony Blair

* Kum 27 chhung taninah ka tang - Nelson Mandela

* Kum 30 ka nih Lai chuan bus conductor ah ka tang thin - Rajnikanth

* Rs 20 hi kutdawh bawma thlak atan chuan tam riaua Kan hriat laiin restaurant lian tak taka bill baka pek belh atan chuan a awm tawk kan ti vel tho si....

* Nilenga hna rim taka thawh hnua darkar tlemte gym a Han inlak fit te kha hahthlak lem loha Kan ngaih laiin hun reilote mahni nu te in lama han puih chu hman lo Kan inti leh hle si....

* Pathian be tura minute 3 pawh rei Kan tih laiin Kan hmuhnawm tih zawng en tur chuan darkar 3 pawh Kan thu reng thei a....

*Kumtluana Valentines day nghakhlel taka thlirtu khan Mother's day erawh Kan mangnghilh leh daih a....

*Kawngkama naupang rethei ei tur nei lo te chuan Chhang zai khat petu pawh an neih loh laiin lemziak thiamin an lem a ziah chu nuaih Chuang fe in a hralh thei thung si...

*Fiamthu tha pui pui Kan forward chur chur a, thutak erawh forward Mai tur chuan Kan han inngaihtuah deuh vang vang thin a...

Ngaihtuah teh, Kum 2015 a danglamna mite nuna thlentu I ni thei asin

*LAWNGTLAI AH TIAMCHIN AWMLO BANDH NEI MEK
Tukin zing dar 5 atangin Central Young Lai Association hmalakna in Lawngtlai leh Lai Autonomous district huamchhung khaw hrang hrang ah tiamchin awmlo Total bandh neih mek a ni. CYLA te hian sorkar hnenah Lawngtlai leh district dang te inkalpawhna siam that leh Lawngtlai a P&E sub division chu Division puitling a hlan kai an phut a ni.

*Veng mipa naupang kum 5 mi Lalrindika s/o. C. Lalrotlinga chu Sarzuk mu dawlh sual palh nia rin vangin a thi a, lumen niin nimin chawhnu dar 1 khan vuina inkhawm neih a ni.

Lalrindika hi a thiante nen khawlai lengin, an thenawm hnaia Sarzuk chu an ei a, hetia sarzuk an ei hnu deuh hian Lalrindika chu a tlu ta tawp a, a bul hnaia lo awm tleirawl ten an pawm thawh chuan a zawi nghal vek a; damdawiin panpui nghal vat a ni a, nimin tlai dar 6 hma deuha damdawiin thlenpui a nih chuan a lo chatthla hman tawh niin Thenzawl Medical Officer chuan kan palai a hrilh.

Lalrindika thih chhan tak hi hriat chian a ni lova, sarzuk mu a dawlh sual palh nia rin a nih ber thu Thenzawl Vengthlang Branch YMA President Pu H. Lalrokima chuan kan palai a hrilh a ni.

Lalrindika hi hi unau pathum zinga naupang ber leh mipa awmchhun a ni a, sikul a la kal tan lova. A pa Pu C. Lalrotlinga chu Kelkang harhna chhim tura zin, an veng Kohhran Pavalai Pawl member 50 rual zingah telin, kar kalta Zirtawpni a zin chhuak kha an ni a, Lalrindika thihna vang hian nizan khan Kelkang atang hian Thenzawl panin an haw hlawm a ni.

Lalrindika hi naupang danglam tak a ni a, Biak Inah pawh lam reng mai leh, kawm theih tak a nih avangin an Kohhran Upa te ngainat pawh a hlawh hle niin Thenzawl Vengthlang Branch YMA President Pu H. Lalrokima chuan kan palai a hrilh a ni.

News Source: Lalhmachhuana Tochhawng via DINGDI group in FB

 

*THUTHAR LAKHAWMTU LAR REUTERS HOTUNU PAKISTAN AH THI A HMUH A NI
Nimin khan Pakistan khawpui Islamabad a Reuters office bual in chhung ah Reuters Chief Bureau for Pakistan and Afghanistan nilai leh hmeichhe journalist lar Maria Golovnina chu thi a hmuh a ni. A thihchhan hriat la nilo mahse police ten post mortem result atangin an zirchian tur thu an sawi. Maria Golovnina hi Russia khua leh tui niin Pakistan leh Afghanistan a Reuters news hotu luber a ni. Reuters hi khawvel a news reporter larber te zing a mi anni tih chu in hriatsa a nih kha.

*FACTORY KHAWL PUAK
Nimin khan Hyderabad khawsir a Gulf Oil Corporation limited te factory ah thil puak a awm avangin mi 2 thihngam in hliam an tuar a, midang 13 te pawn hliam an tuar bawk. He thil puah nachhan hi hriat ni chiah lo mahse IDL chemical wing ah puak thei thil atanga rawn puak ni a rin a ni.

*RSS HOTUPA IN MOTHER TERESA SAWISEL
Nimin khan Bharatpur, Rajasthan ah Hindu duhfir pawl RSS hotupa Mohan Bhagwat chuan NGO pakhat Apna Ghar te programme huaihawt ah thusawiin Mother Teresa rawngbawlna in a tumber chu ringlo mite Kristian inleh tir a ni a ti. Chutiang anih avang chuan a michanhai zawk te tan a a rawngbawlna kha demawm a ni a ti. He hunah hian BSF DGP hlui Prakash Singh pawn thusawiin Mother Teresa pawl Missionary of Charity te aia mi chanhaite tan a thawk tha zawk pawl tam tak an awm a, Kristian te hian an thil tih that hi media kaltlang a vawrh lar an thiam a ni a ti bawk.

23rd February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
23.2.2015

*BRU HEL HRUAITU MAN
February ni 2 a Chikha khaw dai atanga Thangchhuaka leh BRTF Overseer Hukum Singh rubo tu te zinga mi ni a hriat Lianmawia chu kar kakta zirtawpni khan Naisingpara ah Mizoram Police ten an man. Kum 2011 - 2015 chhung hian Bru hel pawl BDFM zinga tel mi 8 an man tawh a ni.

Mamit police te sawi danin Lianmawia hi Bru Democratic Front of Mizoram (BDFM) hel pawl zinga a meizang hlaptu ber a nia hriat a a ni a. Inrinni khan Mamit thlenpui niin court ah hruai nghal a ni a, vawiin khan Aizawl panpui a ni. Bru hel pawl thawhpui thin ni a hriat Raj Mani Tuipuibari - I chu police ten an man tel bawk. Raj Mani hi BNLF hel pawla lo tel tawh thin a ni.

Source: David M Zadeng via Mizo Special Report Group in FB

*FRANCE IN IS FIRFIAK PAWL ZAWM TUM MI 6 PASSPORT TIHTAWP SAK
France Interior Minister Bernard Cazeneuve sawi danin an ram France atangin Islamic State (IS) firfiak zawm tum mi tam tak an awm a, chung zing a mi 6 te passport chu sorkar in a tihtawp sak a ni a ti. Passport an tihtawp sak te hian France atangin Syria an pan a ni.

*SPORTS MINISTER-IN POLICE SPORTS MEET A HAWNG
Mizoram Police Sports & Cultural Control Board buatsaih Mizoram Police Sports Meet vawi 16-na, ni 23-27 February, 2015 chhunga neih tur chu vawiin chawhma dar 10:00 khan Rajiv Gandhi Stadium, Mualpui ah Sport & Youth Services Minister Pu Zodintluanga’n a hawng.

Mizoram Police Sports Meet vawi 16-na ah hian sports discipline hrang hrang ah inelna nei turin infiammi 1228, battalion hrang hrang leh Mizoram hmun hrang hrang atangin an lo kal khawm a ni. (DIPR)

*CHANCHINTHAR LANGSAR ZUAL
*Vawiin atangin India Parliament budget session tan a ni dawn.

*Maldive President hlui Mohammad Nasheed chu nimin ah anti-terror law hmang a man a ni.

*Afghanistan a Taliban ten thla 8 zet an hren hnuah Tamil Nadu a Jesuit puithiam Father Alex Premkumar Antonysamy chu nimin khan chhuah a ni a, nimin khan Delhi a lo thleng.

*Anna Hazare chuan Land ordinance duh loh avangin Delhi ah ni 2 chhung nawrh a huihawt dawn.
*Nimin a Bangladesh a lawng chesual a thizat mi 41 an tling ta.

*87th Academy Award (Oscar award) chu Los Angeles ah sem mek a ni.

*Delhi assembly member thlan thar ten session hmasaber vawiin ah nei tan dawn. MLA thar ten rinawmna thu an tiam ang.

*Mi in bengvar nan Lamtluang like an duh thin.

*TURKEY SIPAI TE SYRIA AH LUT IN HMANLAI THLAN AN VA HAI
Nimin khan Turkey sipai te chuan Syria ramchhung a thlan pawimawh tak Ottoman empire dinchhuak tu Osman-I pu Suleyman Shah thlan chu Islamic State firfiak te kutah a awm mai an hlauh avangin va luhchhuak in thlan chhungna thil pawimawh te hmun him lamah an thiar chhuak a ni. Turkey sipai te hian Suleyman Shah thlan atanga thil pawimawh ah lakchuah te hi Syria ramchhung a Eshme district ah an phum tha leh a ni. An phum thatna hmun hi Turkey nen a an in ramri na atanga 200 metre a hla ah a ni.

 

*INDIA TUIHNUAI LAWNG LEH SANGHA MANNA LAWNG INSU
Ningani liamta zan ah khan Mumbai atanga chhimlam tuipuikam hnaih ah India Navy te tuihnuai lawng INS Sindhughosh chu naval tropwlex exercise an tih laiin lawngchawlhna lam a rawn pan chu sangha manna lawng pakht in a su a, a rawn sutna avangin a pang vel nasa takin a chhia a, siamthat a ngai hial a ni.

 

*Health Minister Conference hmanga Delhi-a kal Health Minister Pu Lal Thanzara chuan Zirtawpni khan AYUSH/Health Minister Conference, Vigyan Bhawan, New Delhi a neih ah telin thusawina hun tha tak a nei.

He Conference-ah hian Health Minister Pu. Lal Thanzara, chuan kan ram ah Traditional Medicine tun hma atanga kan lo neih ve tawh te venhim leh hman tangkai pawimawhzia thehdarhna kawngah AYUSH in nasa taka tan an lak avanga lawmawm a tih thu te, Mizoram AYUSH damdawi hmang tangkai kawngah bul tan tlai hle mah ila Mizoram Hospital a AYUSH OPD awmna ah chuan AYUSH Clinical Service leh Therapy te chu tangkai taka hman a nih tawh thu leh mipuiin ten an chhawr hle thu sawiin hemi mamawhna san zia pawh chiang takin a tarlang bawk. Health Minister hian Kum 2014 - 2015 atana Annual Action Plan Rs 211 lakh pawm sak tawh chu release thuai turin a ngen nghal a. Kum 2012 atanga la dawn loh, Programme Management Unit, Contingencies, Medicine leh Consumable atan Fund te chu release sak thuai turin Ministry hnenah a ngen nghal bawk a ni.

Health Minister chuan "Tunah hian AYUSH Directorate din a nih theih nan hmathlir na kan nei mek a, a pawimawh ber chu Annual Plan hi min pawm sak a Fund release thuai hi a ni a. Khum 50 awmna AYUSH Hospital sak zawh tep ni tawhin, tangkai taka hman a nih theih na turin Department of AYUSH hian nasa taka min puih a min kaihhruai kan mamawh dawn a ni." a ti a. Department kaihhruaina hnuaiah Mizoram Police ten Yoga Training Center District tinah din turin an in tiam thu te, hemi atan hian Annual Action Plan, IEC Component hnuai-ah Plan pawh theh luh tawh a nih thu a sawi bawk.

Minister hi Dr. C. Lallunghnema, Deputy Director, AYUSH H&FW in a tawiawm a ni. (DIPR)

22nd February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
22.2.2015

*IES/ISS EXAM TUM TE TAN HRIATTIRNA
Union Public Service Commission chuan Indian Economic Service (IES)/Indian Statistical Service (ISS) exam 2015 a buatsaih dawn a, dil tum te tan March ni 20 thleng dil theih a ni. Hrechiang duh tan UPSC website www.upsconline.nic.in ah ngaihven theih a ni.

*BANGLADESH AH LAWNG CHESUAL
Vawiin khan Bangladesh ah Padma lui ah khualzin phur lawng MV Mostofa a chesual a mi 16 in nunna an chan a, mi tam tak chin hriat loh in an awm mek. He lawng chesual ta MV Mostofa hian bungraw phur lawnglian a sut avang a chesual ta a ni. Lawngah hian mi 70-150 vel an chuang a ni.

*BIHAR CM THAR ATAN NISTISH LALUT
Janata Dal (United) hruaitu Nitish Kumar chu vawiin tlai ah Bihar Chief Minister thar atan rinawmna thu tiam tir a lakluh a ni. Nitish Kumar hi tihian Bihar CM a vawi 4 nihna a ni dawn ta a ni.

*ICC Cricket World Cup khelh mek ah India chuan run 130 in South Africa an hneh.

*KOHHRAN HMEICHHE INKHAWMPUI LIAN MAMIT AH
Mizoram Presbyterian Kohhran Hmeichhe Inkhawmpui Lian vawi 46-na chu March 6 - 8, 2015 chhungin Mamit- ah neih a ni dawn a, InkhawmpuiAgenda tur leh Budget turte thlirhoin Feb. 19, 2015 khan Central Kohhran Hmeichhe Committee-te J.M. Lloyd Hall, Synod Office-ah an thu.

Hmeichhe Inkhawmpui Lian vawi 46-na hi Mamit leh Hmunsam Bialin an thleng dawn a, Mamit GSA Playground- ah nghah tur a ni a, thupuiah ‘I nunna turin tlan chhuak rawh’ (Gen. 19:17) tih hman a ni ang a, Speaker atan Rev. Vanlalzuata an hmang ang. Inkhawmpui chhung hian Thupuan 2 & 3 ‘Kohhran 7-te’ tih zirho a ni dawn a, Nl. Lalzuimawii Tlau, M.A., B.D, Synod Higher Secondary School-in a zirpui ang. (Synfo)

*LAMTLUANG ZINGKAR CHANCHINTHAR TAWI LAWRKHAWM
*NECS Cup 2015 Inter Village Football Tournament Kick Off chu Zirtawpni zan khan Chanmari YMA Hall, Aizawl-ah neih a ni. Naktuk atangin Lammual ah Kolasib College veng leh Lengte an intum ang. Team 132 an tel dawn a, pool 8 ah thendarh anni.

*Salvation Army atanga chhuak Salvation Church te chuan 21-22 February hian Tourist Lodge, Aizawl leh Ramhlun Indoor Stadium ah te National General Assembly ah hmang.

*Mizo Students' Union (MSU) chuan sorkar in sikul tan hma a rawt chu an dodal thu leh hmantan a nih dawn chuan a ni khat ni atanga an dodal tur thu an sawi.

*Jammu and Kashmir a sorkar siamturin BJP leh PDP te chuan inbiakna an nei zo thawkhat tawh a, vawiin a emaw karleh lamah an thawh dunna tur thuthlung an puan hman beisei a ni.

*Bangladesh tlawh a zin mek West Bengal Chief Minister Mamta Banerjee chuan nimin chawhnu khan Prime Minister Sheikh Hasina a hmu.

*Vawiin hian Parliament political party hruaitu zawng zawng ten Budget sesssion thlirlawkna na turin inhmuhkhawm an nei dawn.

*Sardar Vallabhbhai Patel National Police Academy, Hyderabad a IPS training lai mi 9 te chu swine flu an vei tih hmuhchhuah a ni.

*Union Minister for Human Resource and Development Smriti Irani chuan Subject hrang hrang 88 ah free online certification courses hawn thuai tum a ni a ti.

*Yemen President hlui Abdrabbuh Mansour Hadi chu an ram khawpui Sanaa ah Houthi helpawl ten house arrest a an dah hnuah tlanchhuak in Aden khawpui ah a raltlan.

*Nimin piah khan UAE khawpui Abu Dhabi a Mussafah Industrial Area a inchhawng sang a kangmei chhuak avangin mi 10 an thi a, mi 8 in hliam an tuar. He inkang ah hian khawvel ram hrang hrang atangin hnathawk an awm a ni.

*UNICEF thuchhuah in a tarlan danin South Sudan ah helpawl ten mipa naupang 89 aia tlemlo an ru bo niin an tarlang. Heng mipa naupang te hi kum 13 vel anni a, Malakal khawbul atangin an ru bo a ni.

*Singapore Prime Minister hmasaber Lee KUan Yew chu pneumonia avangin nimin khan damdawiin ah dahluh a ni. Amah hi kum 91 a upa ni tawhin kum 31 Prime Minister hna athawh hnuin kum 1990 khan PM hna a chawlh san a ni.

*Khawvel a rambuai tak leh Islam mipa te inlulinna ram tia hriatlar Iraq ah khawpuiber Baghdad ah an khawpui roreltulu Mayor turin hmeichhia Zekra Alwach chu ruat a ni. Baghdad a hmeichhia mayor an neih vawi 1 na a ni a, amah hi civil engineer a ni.

*Karnataka ah kumin January thla atang in swine flu vang in mi 33 an thi tawh a, a natna ve mi 602 hmuhchhuah tawh anni. West Bengal ah pawh swine flu vei mi 5 hmuhchhuah belh anni.

*Manipur a kawlphetha indaihlohna tihziaawm nan Manipur State Power Distribution Company Limited (MSPDCL) chuan 2015-16 financial year chhung in state pawn atangin Rs.Vaibelchhe 300 man kawlphetha lei an tum.

*Pope Francis chuan Italy ram a danlova damdawi tawlhruk ching te awmkhawmna hmun Calabria khua a misual pawl 'Ndrangheta te pual a thuchah sawiin " Pathian hnenah in thinlung hawng ula, Pathian in a la nghak reng che u, thil tha tih in duh pawhin kohhran ten kan lo lawm thei reng che u a ni" a ti.

*Union Finance Minister Arun Jaitley chuan amah hmutu All India Bank Employees' Association te hnenah February ni 25 atanga ni 4 awh tur nawrh huaihawt an tum chu thulh turin a lo ngen a ni.

*SMB IN INTERSERVE PARTNERSHIP COUNCIL MEETING THLENG
Synod Mission Board (Mizoram Presbyterian Church) chuan February 18 - 19, 2015 chhung khan Interserve India 2nd Partnership Council Meeting-cum-Consultation a thleng.

Kum 2013 kum tawp lam khan Interserve India chuan partnership rawngbawlna a neihpui Kohhran 5 (panga) -
1) Synod Mission Board (Mizoram Presybyterian Church)
2) Council of Baptist Churches in North East India (CBCNEI)
3) Baptist Church of Mizoram
4) Evangelical Congregational Church of India (ECCI), Churachandpur
5) Nagaland Missionary Movement (Nagaland Baptist Church Council)

te chu Partnership Council dinpui turin a sawm a. Chu sawmna chu pawmin Partnership Council Meeting chu din a ni a, Partnership Council Meeting vawi 1-na chu nikum (2014) February 19 khan Guwahati-ah neih a lo ni tawh a ni.

Interserve India 2nd Partnership Council Meeting cum Consultation thleng tur hian Interserve India hotuten Synod Mission Board an rawn ngen angin Synod Mission Board-in a thleng a ni. Feb. 18, 2015 khan Partnership Council Member-ten Synod Office-ah Council Meeting an nei a, Feb. 19, 2015 khanAizawl khawpui chhunga Kohhran hrang hrang - Presbyterian, Baptist, UPC (North East & Mizoram) - aiawh hruaitute sawmin Synod Office Devotion Room-ah rawngbawlna kawnga zau zawk leh inpumkhat zawka thawhho dan tur inrawnkhawmna Partnership Consultation neih a ni. (Synfo)

*MBKHP INKHAWMPUI HNAHTHIAL AH HMANG MEK
Mizoram Baptist Kohhran Hmeichhe Pawl (MBKHP) Inkhawmpui vawi 49-na leh Rorel vawi 64-na ni bawk chu Ningani zan atang khan Hnahthial ah tan a ni ta. He inkhawmpui lian hi Hnahthial Field-a Pandal-a dung feet 200 leh a vang feet 150-a sak, mi 5000-600 vel leng tura buatsaih-ah nghah a ni. Inkhawmpui thupui ah "I ram lo thleng rawh se” tih hman a ni. Inkhawmpui hi zanin ah an tiak ang. (www.mizobaptist.org)

 

*EDUCATION SUNDAY HMANG DAWN
Mizoram Baptist Kohhran chuan kum tinin February Pathianni hnuhnung ber hi BCM chuan Education Sunday atan a hmang thin a. Kuminah pawh February 22, 2015 hian Mizoram Baptist Kohhran Biak In tinah he Ni pual hian Chawhma inkhawm-ah hun hman a ni ang. Headquarters atanga thupui thlan sa “Zirna hmanga ênna” tih thupui hmangin thusawituten thuchah an sawi bakah Kohhran Nipawimawh Bu-a hemi ni pual thuchah chhiarchhuah tura buatsaih sa chu chhiarchhuah a ni bawk ang. Thupui thlanchhuah 3 te hmangin tawngtai rualna neih a ni bawk ang. (www.mizobaptist.org)

*CONSULTATION ON CONTOURS OF TRIBAL THEOLOGY

February ni 19-20, 2015 khan Consultation on Contours of Tribal Theology, Synod Conference Centre, Aizawl-ah neih a ni.

He programme hi Board of Theological Education of the Senate of Serampore College leh Mizoram Presbyterian Church tangkawpin an buatsaih a ni a, Mizoram Synod aiawhin Tuikhuahtlang Kohhranin a lo thleng a ni.

A ni 1-na Feb. 19, 2015) chawhma dar 10:00 khan Inaugural Session neih a ni a, Rev. Lalramliana Pachuau, Executive Secretary-in Inaugural address a sawi a, Dr. Wati Longchar, Kolkata-in KeynoteAddress pe-in ‘Tribal Theology Contibution on Contextual Theologies in Asia’ tih a sawi.

Consultation-ah hian Theological College zirtirtute, Doctorate zirlaite,Aizawl Theological College (ATC), Academy of Integrated Christian Studies (AICS), John Roberts Theological Seminary, Shillong atangin an tel a, consultation neih chhung hian Tribal Theology thupui then hrang hrang paper an zirho a ni. (Synfo)

21st February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
21.2.2015

*ASSAM AH ULFA HEL 3 MAN
Vawiin tlai khan Assam a Tinsukia police te chuan ULFA hel pawl a mi 3 te an man. Heng helpawl a mi te hi tualchhung sumdawng te hnena pawisa khawn tur a an lo kal chu police te hian an lo man ta a ni. Tin Assam police te hian vawiin ah Guwahati khawchhung a Garchuk vengah ralthuam puak theih thil an man bawk.

*INDIA AH SWINE FLU VEI 31 HMUHCHHUAH BELH
Tunlai a India rama natna hri leng mek Swine flu chuan remlam a pan hlei thei lo. Vawiin khan rampumah he natna vei mi 31 hmuhchhuah belh leh anni. Health ministry thuchhuah in a tarlan danin tunthla February ni 19 thleng khan Swine flu (H1N1) natna vei mi 11,955 hmuchhuah anni a, he natna thihpui zat chu mi 743 anni.

 

*HOME MINISTER IN SAITUAL KUM 100 TLIN LAWMNA ATANA UPA TE PUALA PROGRAMME BUATSAIH A HMANPUI

Home Minister Pu R Lalzirliana chuan nimin khan Saitual Centenary Celebration Organizing Committee-in Saitual kum 100 tlin lawmna chi khat atana Kum 70 chin chunglam upate puala Intihlimna Programme Saitual Kohhran Gospel Centenary Hall-ah an buatsaih chu khuallian niin a hmanpui. Home Minister hi Parliamentary Secretary Pu H Zothangliana’n a tawiawm a, he programme ah hian Ex-Minister leh Speaker lo ni tawh bawk Dr. H. Thansanga pawh a tel a ni.

Home Minister Pu R Lalzirliana chuan Kristian hmasa te inhumhimna atana din Saitual khua in kum 100 hmel a hmu chu a lawmpuina thusawiin a duhsakna Saitual mipui te a hlan a, kum lama upa tawh tak te puala hetiang intihhlimna programme Centenary Organizing Committee in an buatsaih chu a fakawm hle a ni, a ti a. Saitual chu District Headquarters-a hlankai anih theih nan 14th Finance Commission hnenah hemi atan sum mamawh chu Commission-in Mizoram an rawn tlawh tumah dil anih thusawiin hemi chungchangah hian beiseinna sang tak kan nei, a ti.

Pu R Lalzirliana chuan Saitual a bial tan tirh hun leh tun hun ngaihtuahin a in thlau tawh hle nia a hriat thusawiin kawng hrang hrangah Saitual in hmasawnna a hmu chho mek a, bial hmasawnna atan theitawp kan chhuah zel dawn a ni, a ti. Saitual tui tlanna tur project kumin chhung ngeia hawn beisei anih thu te, Saitual a Jail sak mek chhunzawm a nih tur thu te leh Saitual-Lailak-Khanpui Road, Tualbung leh Lungpher thleng tur kawng, thui tak hma lakna lo awm tawh chu sum ruahman belha hna chhunzawm thuai anih tur thu te a sawi a. Saitual High School Field chu hockey khelhna hmun atan buatsaih tum anih thusawiin helai hmuna phul lem phah turin ruahmanna siam mek a ni, a ti.

Home Minister chuan zirna chungchang sawiin Saitual ah zirna kawngah a hmun hma lamah te kan intodelh tawh niin ka hria mahse kan zirtir chhuah te hi engzat nge dinhmun sang zawkah inhlangkai tih leh mi hmantlak leh mi hlawhtling engzat nge kan cherchhuah tih erawh kan ngaihtuah a ngai a ni, a ti.

Parliamentary Secretary Pu Zothangliana chuan Saitual in Centenary lawmna atan kum khat programme an duan chu ropui leh entawntlak nia a hriat thu sawiin Pathian hminga khaw dinin Upate chawimawia hetiang programme an buatsaih chu fakawm a tih thu sawiin Centenary duhsakna a hlan.

Saitual Centenary Celebration Organizing Committee hnuaiah hian Sub Committee 15 lai din niin tun thleng sum an khawl chu nuai 36 vel an tling tawh a. Saitual kum 100 tlin lawmna Centenary hi kumin kumtluana lawm turin ruahmanna leh programme hrang hrang duan a ni a. Centenary Year hi January ni 5, 2015 khan an nei, a kharna chu December ni 18 khian nei tura ruahman a ni.

Saitual hi Kristian hmasa Lal Dorawta’n Kristian tih duhdahte awmkhawm nan leh Kristian khua ni tura kum 1915 a a din a ni. Indopui I ah khan Saitual atangin Lushai Labour Corps a tlangval 11 te chu France ramah an zuk kal nghe nghe a ni.

Saitual ah hian kum 70 tling tawh upate mi 247 an awm a, mi 11 chu kum 100 tling tawh te an ni a. Nimin programme ah khan kum 70 chunglam mi 150 vel an tel a, intihhlimna hun te hmangin Centenary Organizing Committee-in tlai lam khan an pualin ruai an buatsaih sak a ni. (DIPR)

*LAMTLUANG WEEKEND SPECIAL (MIZO FIAMTHU)
"Zu i in em?"
"In lo."
"I in lo tak tak maw..?"
"In miah lo, ka in lo tak tak?"
"A nih, engtik nge i in hnuhnun ber?"
"Nizanah."
"A hriat mai ang chu," tih pahin Excise ho chuan 'Breath Analyser' an han hamtir ta, 160mg a kawk ta va a, inzep ngaihna a awm ta lo va. Excise Officer chuan, "30mg chin chung lam hi phal loh a nih avangin kan man che a ngai a, i chhungte hrilh rawh le," an ti a.
Phone-in a nu a han bia a, aw zangkhai vah hian, "Nu, hei Excise hovin eng emaw ni min hâmtir a, ka inhâm tling ve hlauh mai a.. Zanin atrangin kan camp nghal ang, engmah ken a ngai lo, min tumsak vek dwn...."

 

#‎EPL‬ FIXTURE (21.2.2015)
Sunderland vs West Brom - 8:30 PM
Aston Villa vs Stoke City 8:30 PM
Chelsea vs Burnley FC 8:30 PM
Cyrstal Palace vs Arsenal 8:30 PM
Swansea City vs Manchester United 8:30 PM
Hull City vs QPR 8:30 PM

 

*TUNLAI HRILENG SWINE FLU
Nimin khan Swine flu natna avangin India ram pumah mi 40 an boral leh. Kumin January thla atang khan India ah swine flu avangin mi 743 an boral tawh a, a natna vei mi 11,955 an awm mek a ni. Swine flu natna chungchang leh a inven dan te Lamtluang ah hian kan rawn post a, i la chhiar loh chuan i hailet leh mai dawnnia. Swine flu hi Gujarat, Rajasthan, Delhi, Maharashtra leh Telangana state/UT ah te a hluar zual a ni. India hmarchhak state Mizoram leh Nagaland ah pawh swine flu vei hmuhchhuah tawh a ni.

*LIBYA AH BOMB PUAK VANGIN MI 40 CHUANG BORAL
Nimin khan Libya ram a al-Qubbah khuah car bomb vawi 3 a puah avangin mi 42 an boral a, mi 30 in hliam an tuar. Bomb tipuak tu te hian petrol station, police station leh an ram Parliament speaker Agila Salah chenna in te an an bitum a ni. Heng bomb puak te hi Islamic State firfiak ten tunhnai a Egypt in indo thlawhna hmang a anmahni a rawn beih phuba lakna a ni an ti.

*LAMTLUANG ZINGKAR CHANCHINTHAR TAWI LAWRKHAWM
*Nimin khan Bible Society of India Aizawl Auxliliary ten Bible House Aizawl ah Auxiliary committee meeting vawi 53-na an nei.

*Mizoram People Conference (MPC) Thalai ten kum 30 dawn Congress leh MNF ten sorkar an inchan chhawk hnua Mizoram mipui ten harsatna kan tawh chhan a heng party 2 an inpuh tawn hi a dik a ni an ti. Ram vei na tak tak an nei lo ve ve an ti.

*Central Young Lai Association (CYLA) ten karleh Thawlehni (24 Feb) atanga tiamchin awmlo a Lai Autonomous District Council huamchhung a total bandh neih an tum chu kaltlang pui nise an ti.

*Janata Dal (United) hruaitu Nitish Kumar chu naktuk tlai dar 5 ah Bihar Chief Minister thar atan lakluh a ni dawn. Kan rawn tarlan tawh thin angin nimin khan Chief Minister Jitan Ram Manjhi chuan thlawptu a neih tam tawk loh avangin banna a thehlut a ni.

*India mithiam Nobel Prize pawh dawng tawh Amartya Sen chuan Nalanda University Chancellor hna chu kumin July thla thleng bak a chelh tawh loh tur thu a sawi.

*India Prime Minister Narendra Modi an US President Barack Obama India a lo kal tum a a suit hak, amah Narendra Modi hming inziak hmanga tial chu nimin khan Surat ah lilam a ni a Rs.Vaibelchhe 4.31 in hralh a ni. Suit hralhna sum hi Clean Ganga Mission atana hman turin pek a ni dawn.

*Nimin khan India Prime Minister Narendra Modi chuan Arunachal Pradesh state dincham vawi 29-na Itanagar ah a hmanpui. PM hian Itanagar ah chawlhkar tin a vawi 1 tlan tur Naharlagun-New Delhi air-conditioned train a vailiam bawk.

*Indian Air Force Sarang team chuan a vawi khatna atan hmeichhe pilot hmasaber Squadron Leader Deepika Misra an nei ta.

*Nimin khan Assam a Baksa district ah laipui mu tihpuah palh avangin mi 1 a thi a, mi 3 in hliam an tuar.

  *India hmarlam Ladhak leh Himachal Pradesh ah khawvawt a zual zel a, hmun tam tak ah vur a sur a ni.

*West Bengal sorkar chuan an state assembly house chu a thlawna wi-fi hman theih tur a thuam tum a ni.

*Delhi Police ten Petroleum Ministry atanga document pawimawh ruchhuak tu mi 2 an man. He thil a inhnamhnawih ni a rinhlelh mi 7 te pawh court ah hek anni.

*CHIEF SECRETARY IN HORTICULTURE CENTRE, CHITE A TLAWH

Nimin zing khan Chief Secretary Pu Lalmalsawma chuan Horticulture Centre, Chite a tlawh.

Horticulture Centre Chite hi kum 2006 a din niin ram Hectare 4.36 a zau a ni a. He hmunah hian Horticulture Department chuan kut hnathawktute tan ser phun tur tha leh hrisel siam chhuah hna hun rei tak chhung hlawhtling takin a lo kalpui tawh a. Tunah hian kumina phun theih tur quality planting materials 38,000 zet a siam peih fel tawh a ni. He Centre-ah hian NRCC, Nagpur atangin kum tin Scientist ten thil zir nan an rawn hmang tangkai thin a, State danga B.Sc (Horti) final year zirlaiten practical neih nan an rawn hmang thin bawk.

He Centre-ah hian Citrus Scion Bank tha tak pahnih siam a ni a. Kum 2012 a sak he Scion Bank hi India ramah a hmasa ber leh awm chhun a ni. Chief Secretary hian Plant Tissue Culture Unit te, Rose Unit te, Integrated Unit for Mushroom Development leh Indo-Israel Citrus Nursery te a tlawh bawk a. Rose chinna hmunpui Rose Unit hi pathum awmin heng unit atang hian kum tin rose par nuai 2.5 zet hralh chhuah thin a ni.

Chief Secretary Pu Lalmalsawma hi Horticulture Secretary Pu B.Lalhmingthanga leh Director Pu R.Zotawna bakah Horticulture Officer engemawzatin an tawiawm a ni. (DIPR)