13th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW

 13.2.2015

*DELHI AH KRISTIAN SIKUL BEIH A NI
Tukin zing hma takah khan Delhi a Vishant Vihar veng a Kristian sikul Holy Child Auxilium a Principal office chu mi tu tih hriat loh ten beiin bungrua an tihchhiat bakah pawisa Rs.8000 a bo bawk. He thil thleng avang hian PM Narendra Modi chuan police hotu lian te a titi pui tawh a ni. He thil thleng hi tunhnai a Delhi khawpui a Kristian hmun pawimawh beih a nih vawi 6-na a ni.

*HMUIFANG TLANG-AH VALENTINES DAY HMAN A NI DAWN
Tourism Department chuan Valentines Day 14.2.2015 ( Inrinni) chawhnu dar 2:00 atangin Hmuifang Tourist hmunah Barbeque-cum-Dinner an siam dawn a. Couple tan Rs. 500/- a ni a. Ticket hi a hmunah a lei theih. Barbeque-cum-Dinner hi a hlawhtlin dan a zirin chawlhkar tawp apiangin neih chhunzawm a ni ang. (DIPR)

*PARLIAMENTARY SECRETARY PU T.T. ZOTHANSANGA'N GOVT. CHAMPHAI COLLEGE SAK MEK A TLAWH
Govt. Champhai College building sak mek chu nimin khan Parliamentary Secretary Pu T.T. Zothansanga chuan tlawhin a enfiah a, mamawh an thlente chu a ngaihthlak sak a ni.

Pu T.T. Zothansanga chuan Govt. Champhai College-in building thar a neih theih chungchangah a thawktu Proffessor-te chu fakin, he building hi hun rei tak atanga an lo vei tawh rah chhuah a ni a, an hmalakna zarah tun dinhmun hi kan thleng thei a ni, a ti.

Parliamentary Secretary chuan building sakna atana sum lokal leh tur hi a rang thei ang bera hmuh a nih theihna turin sorkar laipuiah pawh bawhzui niin, lehkha pawimawhte tihfel tawh niin sum hi a lokal thuai beisei a ni, a ti a. College-in mamawh hrang hrangte chu a theih anga lo bawhzui a tiam a ni. Pu T.T. Zothansanga chuan professor te chu Champhai kalzel dan tur reltu an nih angin zirlaiten thiamna tak tak an puak chhuah theihna tura thahnem ngai turin a fuih bawk a ni.

Parliamentary Secretary nena inkawmna hun hi Pu Lalnunmawia, Govt. Champhai College Principal chuan kaihruaiin, College-in building thar a neih theihna tura bialtu MLA-in theihtawp a chhuahpuina chu lawmawm a tih a sawi a. Building sak meka harsatna an tawhte leh College mamawh hrang hrangte a lo thlen nghal a. Administrative building hnam chu fur ruahtui a thlen hma ngeia siamthat theih dan ngaihtuahsak tur te, Mizoram University-a accreditation tihna turah endiktute lokal hmaa zirna lam kaihhnawih thil chi hrang hrang lo peihfel hman turte leh subject affiliation chungchangah zirtirtu awm zat tur an tlin loh avanga tunah hian subject hnihah chiah affiliate a nih thute a lo thlen a ni.

*US SENATE IN DEFENSE SECRETARY THAR ATAN ASHTON CARTER PAWM
Nimin khan US Senate chuan Defense Secretary thar atan Ashton Carter chu an pawm ta. Carter hi kum 60 a upa niin Pentagon ah kum 2011-13 chhung khan deputy defense secretary a lo ni tawh thin a ni. Barack Obama President a nih chhung a defense secretary 4-na tur a ni a, nikum a bang ta Chuck Hagel a thlak dawn ta a ni.

*CHIEF SECRETARY HOVIN UNION MOS OF COMMERCE & INDUSTRY DAWNSAWN DAN TUR REL
Nimin chawhnu ah khan Chief Secreretary Pu Lalmalsawma leh sawrkar mi pawimawhten Chief Secretary’s Conference Hall-ah Land Custom Station, Zokhawthar rawn hawng tura rawn zin tum Pi Nirmala Sitharaman, Union Minister Of State, Commerce And Industry lo mikhual dan tur chungchang an rel.

Pi Nirmala Sitharaman rawn kal hun tura ruahman lawk tihdanglam a nih tak avangin Mizoram a rawn tlawh hun hi hriatchian a la ni lova. Lengpui ah leh Zokhawthar hmun a lo hmuah dan tur bakah Department hrang hrang te mawh lakdan tur te nimin meeting ah hian siam a ni.

*MISA IN ANNUAL CONFERENCE HMANG
Nimin khan Mizoram Information Service Association chuan Chaltlang Tourist Lodge-ah Annual Conference an hmang a, Pu K. Lal Nghinglova IAS, Commissioner, Information & Public Relations Department chu khuallian a ni.

MISA Annual Conference hmanpuitu Pu K. Lal Nghinglova chuan MISA dinchhuaktute zing ami anih bakah ama ta ang taka a la ngaih thu a sawi a, Information & Public Relations Department hnathawh hi pawimawh tak a ni a, sorkar thlawpa tha taka tawiawm bakah officer te hian abik takin mawhphurhna pawimawh tak an nei a. Awlsam taka an hnathawh theih te kal pela hmasawn lehzual tuma an penchhuah ngam chiah hian puitlinna leh hlawhtlinna liantham zawk an nei dawn a ni a ti a. Information Officer-te chu mahni chhia leh tha hriatna huaisen taka hmang ngam thin turin a chah a ni.

Pu Lal Nghinglova chuan Social Media hi thil tha tih nan leh ram siamthatna atan hman theih a ni tih kan hriatchian a ngai a, chanchinbumite pawh thahnemngai tura chahin sorkar hnathawk leh politician te chungchangah pawh thudik hailan tur a awm anih chuan huaisen taka kal turin a chah a ni.
Nimin a MISA Conference hi Pu Lalfakzuala MIS, MISA Vice President in a kaihruai a, programme tan anih veleh hian an member nikum December ni 30 a boral ta Pu Robert Thangmawia MIS sunna hun hman a ni a, MISA President Pu David L. Thanglian’n inlawmna thu a sawi hnuah mithiam sawmbik Pu Joseph Lalchhuana IPS, S.P. CID (Crime) paper buatsaih ‘Legal Aspects of Social Media’ leh Dr. Robert Halliday paper buatsaih ‘Social Media and Youth’ zirho a ni a. Chawhnu lamah rorel niin kum 2015 - 2017 chhunga hruaitu tur an thlang nghal a ni. (DIPR)

12th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAW
12.2.2015

*UPC DISTRICT INKHAWMPUI SAILULAK AH TAN
United Pentecostal Church, North East India hnuaia District lianber Aizawl East District PYD Khawmpui vawi 21-na Dt 12-15 February chhunga Sailulak, E.Lungdar Bialah hman tur chu zanin hian tan a ni. Khawmpui hi Rev R.Lalhawia, District Secretary chuan Pathian hnenah hlanna neiin Bial hrang hrang hnen atang report ngaihthlak a ni. Khawmpui Thupui “ lo danglam zawk tawh rawh u” Rom 12:2 chu Speaker hrang hrang: Evan Hrangliankhuma, Chakma Missionary, Rev HL Dawngliana, District Missions Director, Rev Pc Lalnghakliana, District Superintendent, Upa JH Rozawna, District PYD V.President leh Evan Laltlanhlua Hnamte, District PYD President te hnen atang ngaihthak thin a ni ang.

Source: David Z Hmar

*UKRAINE LEH RUSSIA TEN INKAHHAI NEI DAWN TA
Lamtluang ah pawh vawi tam tak kan rawn tarlan thin Ukraine khawchhak lama a mipui tam takin Ukraine atanga inla hrang a Russia zawm an duh avangin hun rei tak buaina an lo siam tawh chu inremna a awm dawn ta a ni. Ukraine leh Russia sorkar hruaitu lu te chuan tun thla ni 15 atangin Ukraine leh Russia zawmduh helpawl te inkar ah inkahhai an nei dawn ta a ni. He inremna inbiak hi Ukraine leh Russia sorkar hruaitu bakah Germany leh France sorkar hruaitu te pawh an tel a ni.

*US A MIZO PROFESSOR THAWK LAI THUSAWI
Mizo academician/theologian te zinga michhuanawm tak Rev. Prof. (Dr.) Lalsangkima Pachuau, Dean, Asbury Theological Seminary, US a thawk laiin University of Hyderabad Mizo zirlai te hma a a thusawi, tunlai khawvel hmasawnna in a ken tel academic lama hmasawnna US, Europe leh India ram a academic research tih dan danglamna te leh post modern debate - Zu, neih in ang inkawp (lesbian, gay, bisexual and transgender ), tunlai a India ram a lar tak sakhaw danga inleh tir chungchang leh trending topic ngaihnawm tak tak UoH Mizo zirlai te zawhna a chhanna te in lo en ve duh chuan a hnuai a youtube link ah hian en theih e.
https://www.youtube.com/watch?v=5UnlvV4ICCM 

*HRIATTIRNA
Ni 16.2.2015 (Thawhtanni) zing atangin Rangvamual leimin paih fai hna thawh a nih dawn avangin hemi ni atang hian nitin zing dar 6:00 leh tlai dar 6:00 inkar chhungin NH-54 kawngpui hi Ch.Chhunga Truck Terminal bulah leh Lalruatkima Filling Station bulah khar (block) a ni dawn a. Hemi chhung hian MMV leh a hnuai lamte chu Sakawrtuichhun – Lungverh road ah tlan theih a ni ang a; lirthei lian chi (HMV) erawh chu phal a ni lo ang. Durtlang – Kawnpui road ah erawh chuan lirthei eng chi pawh tlan theih a ni ang.

Hnathawh laklawh avangin tlai dar 6:00 hnu lam thleng pawha kawng hi khar tul hun a awm thei a. Mipuite hriatthiamna kan ngen a ni.

*Thil pathum, vawi khat lo thlenga lo kir tawh ngai lote chu:
i) Hun
ii) Tawngkam
iii) Remchanna

Thil pathum, mihring tichhe theitute:
i) Thinrimna
ii) Chapona
iii) Ngaihdam lohna

Thil pathum kan neih reng tur atana pawimawhte:
i) Beiseina
ii) Thlamuanna
iii) Dikna

Thil pathum, kan nuna hlu em emte:
i) Hmangaihna
ii) Chhungte leh thiante
iii) Ngilneihna

Thil pathum, kan nuna thleng ngei ngei lote:
i) Vanneihna
ii) Hlawhtlinna
iii) Suangtuahna

Thil pathum, mipuitlinga min siamtute:
i) Inpekna
ii) Takna
iii) Thawhrimna

*PU JOHN ROTLUANGLIANA, MINISTER FOOD CIVIL SUPPLIES & CONSUMER AFFAIRS IN A BIAL CHHUNG TLAWH
Nimin khan Pu John Rotluangliana, Minister, Food Civil Supplies & Consumer Affairs chuan a bial chhung khua Dapchhuah, Mamit leh Nalzawl te a tlawh a, amah lo lawmtu Dapchhuah khaw mipuite hmaah Pu John Rotluangliana chuan a bial chhung khua Dapchhuah chu Model Village ah puan a nih thu a sawi a, hmasawnna dawng tlak ni tur erawh chuan khaw mipuite in buatsaih a, nun dan phung tha lo awmte kan in enfiah erawh a tul a ni a ti.

FCS&CA Minister chuan buhfai man chungchang mipuite hrilhfiahin tuna rate thar kan hman mekah hian sawrkar chuan thla khatah vaibelchhe 4 leh nuai 40 a khawl thei a, hei hi mipuite hmasawnna hna thawhna tur atan kawng hrang hrangah hman a ni dawn tho a ni a ti. Sawrkar Flagship Programme NLUP pawh chak taka kalpui chhoh zel tum a ni tiin Central Sawrkar atangin NLUP chhunzawm zelna tur hian cheng Vaibelchhe 370 a rawn ruahman a ni a ti bawk.

Minister chuan Sawrkarin hmeichhiate dinhmun hriain chawikan a tum a, kan hmalawka Village Council inthlanna kan neih turah hian hmeichhiate tan seat hausak an ni a, khawtin a rorel turin hmeichhia ten chanvo an nei ve tawh dawn a ni a ti.

Mamit Constituency huam chhunga Model Village-a puan tak Dapchhuah khuaah hian In-267 awmin mipa-596 leh hmeichhia- 542, an vaiin mi-1139 an cheng mek a ni. Pu John Rotluangliana, Minister FCS&CA MLA hi a nupui Pi Vanlalhruaii leh Mamit atangin Officer ten an tawiawm a ni. (DIPR)

*LUNGLEI DISTRICT POLICE TEN CRIME CONFERENCE NEI
Nimin khan Lunglei S.P. Pu Zosangliana, MPS hovin Lunglei SP Office Conference Hall-ah ‘Lunglei District Police Crime Conference’ neih a ni a; Addl. SP/Dy. SP (Hqrs) Pu Stephen Lalrinawma, SDPO Lunglei/Tlabung/Hnahthial, Lunglei District huamchhunga O/C leh Police Station/Outpost-a In-charge zawng zawng bakah Lunglei Police Station hnuaia Investigating Officers te an tel kim hle.

Lunglei SP Pu Zosangliana chuan a khat tawka Crime Conference neih hi police ten an tangkaipui hle thin a, nimin a Conference rawn chhimtu zawng zawngte pawhin mahni intuaithar nana hmang tur leh an hnaah rinawm taka an thawk zel turin dauhsakna a hlan a. Lunglei District chhungah Police hnathawh tlangpui tarlansing SP Pu Zosangliana chuan Conviction lamah thawktute an thawhhona a that vangin capital punishment a tlem bakah Case awmah pawh an hnathawh a felfai a; VIP coverage lamah Police ten an duty an ti tha hle thin chu lawmawm a tih thu a sawi a. Traffic lamah pawh Traffic Police-te taimakna zarah Dan bawhchhiate hnen atangin kum 2014-15 chhungin Cheng nuai 10 lai hmuh a ni, a ti. Police Reform Commission-in a rawt angin Law & Order leh Case Investigation hi a hranin kalpui tum a nih thu sawiin Lunglei SP chuan Police zawng zawngten rinawm taka hna an thawh zel thin avangin Department hming pawh a that phah a ni, a ti.

Nimin a Police Crime Conference-ah hian law & order, VIP security & escort, traffic regulations sawiho a nih bakah Lunglei District chhunga Case la chinfel loh te sawiho a ni bawk a. Court thuneihna sang zawnkin Case chhui kawnga guidelines thar a duante pawh zirho a ni bawk.

Kumin 1st January - 10th February, 2015 chhunga Lunglei District Crime Record chu a hnuaia mi ang hi a ni :

1. No. Of cases registered - 19 cases

No. of cases charge-sheeted - 12 cases

No. of pending investigation - 7 cases

No. of special report cases registered - 2 cases

(1). Rape cases - 2 cases

2. Total No. of drugs seized/recovered - NIL

3. Total quatity og liquor (LM) recovered - 5 litres

4. No.of cases registered under MLTP Act - 1 case

5. No. of cases registered under MLPC Act 43(2) - 16 cases

(a). No. of persons arrested - 18 persons (Male-17, Female-1)

6. No. of cases registered under 506 IPC - 24 cases
(a). No. of persons arrested - Male 26, Female 1

7. No. of cases registered under MP Act - 5 cases

(a). No. of persons arrested - Male 7

8. No. of cases registered unnatural death (suicide) - 3 cases

9. Total value of stolen properties recovered - Rs.5,65,000

10. Total amount of traffic violation fine realised - Rs.70,800
(DIPR)

*35th NATIONAL GAMES KERALA RESULT
National Games vawi 35-na, Kerala a khelh mek a hmahruaitu 5 te chu:
1. Services - Gold:68, Silver:19, Bronze:22 - Total:109
2. Haryana - Gold:30, Silver:26, Bronze:17 - Total:73
3. Maharashtra - Gold:27, Silver:40, Bronze:36 - Total:103
4. Kerala - Gold:27, Silver:31, Bronze:36 - Total:94
5. Punjab - Gold:19, Silver:27, Bronze:25 - Total:71
--
Mizoram pawh 26-na niin Gold medal 1 leh Silver medal 1 a la ve tawh a ni.

 

*CHAMPHAI BAWRHSAP HOVIN DISTRICT LEVEL STANDING COMMITTEE THUKHAWM

Village Council inthlanna 2015 inpuahchahna kal meka State Election Commission-in din tura ruahmanna a siam angin nimin chawhma khan Champhai District Level Standing Committee chu Champhai DC Conference Hall, Keifangtlangah an thukhawm.

Meeting hi Committee Chairman Pu Sangdingliana, Champhai DC chuan a kaihhruai a. Kumin VC inthlana hmeichhiate tana seat hauhsak chungchang sawiin, hei hi Panchayati Raj kalphung zulzuia duan a nih thu leh, kum 2010 chho khan rawtna a lo awm tawh thin thu a sawi a. Tuna a taka hman a ni hi hmasawnna ropui tak a ni, a ti. Tuna VC thlan turah hian kum 3 chhung term ni thin chu kum 5 ah pawhsei a ni tawh dawn a. Inthlanna felfai nei tura beisei kan nih ang ngeiin Champhai district-ah inthlanna thianghlim leh felfai a beisei thu Chairman chuan a sawi bawk a ni.

He hunah hian Pu Benjamin Lalzama, Election officer pawhin VC roll buaipui mek chungchang sawizauna a nei a. VC roll-ah hian MLA roll hman a nih tawh avangin tun tum roll-ah hian thun thar an awm loh thu te, pem leh paih ngai paihin tunah hian final roll tlangzarh thei tura inbuatsaih mek a nih thute a tarlang a. Champhai District-ah VC seat nei zat danglam tur a awm loh thu te, chhungkaw awmzat atanga VC seat zat leh hmeichhe seat hauhsak dan te sawizauna a nei bawk.

Nimin a meeting chuan MLA roll-a house number thlak loh avanga VC roll-a in awmzat tur nen a inan theih loh dan tur te, roll felfai tak neih a nih theihna tura hmalakna tur hrang hrangte sawiho a ni. (DIPR)

*AIZAWL NORTH COLLEGE MISS & MISTER
Govt. Aizawl North College Miss 2014-2015 atan Nl.R.Lalhmangaihi, B.A. IV Semester zirlai chu thlan a ni a, Mister atan Tv. Lalnunngila, B.A. IV Semester zirlai thlan a ni bawk. Govt. Aizawl North College hi kum 1988 a din niin, tunah hian zirlai inziak lut zawng zawng 1200 vel an awm mek a ni.

Source: Lalhmachhuana Tochhawng via Dingdi group (fb)

*UKRAINE TUALCHHUNG BUAI AH MI 45 THI LEH
Nimin khan Ukraine atanga Russia zawm duh vanga helna chawkchhuaktu ten Ukraine sipai te an beihna ah mi 45 chuangin nunna an chan a ni. Helna chawkchhuaktu te hian mortar hmangin sorkar sipai hmun pawimawh te an kap a ni. Nimin vek khan Minsk khawpui ah Ukraine buaina chhuak mek a remna zawngin Ukraine, Russia, Germany leh France sorkar hruaitu lu te an inbia a ni. Ukraine buaina avang hian thla 10 chhungin mihring 5,300 chuangin nunna an chan tawh a ni.

*THINGSAI LEH N. VANLAIPHAI-AH RTI CAMPAIGN NEI
Pu Lal Dingliana, IFS (Rtd), Chief Information Commissioner leh Mizoram Information Commission-a thawkten RTI Act Awareness Campaign hlawhtling takin Thingsaiah leh N.Vanlaiphaiah 9 - 11 February, 2015 khan an nei.

Campaign hi Mizo Students Union Sub-Headquarters nen tangkawpin Thingsaiah an nei phawt a, N. Vanlaiphai-ah Sawrkar leh Non-Govt. Organizations te nen tangkawpin an nei bawk. Mizoram hmun dangah pawh RTI Awareness campaign hi neih zel tum a ni. (DIPR)

*Nitin tui no 4 tal in thin hi taksa tan a hrisel in kal/zunkawng tan a tha em em bawk niin mithiam ten an sawi. Nang ni khat ah tui no engzat nge i in thin le?

*BILKHAWTHLIRAH INKANG SAK THAT HNATLANG NEI
Nimin khan Bilkhawthlir VC South leh Joint YMA hmalaknain kangmei tuar Pu B.Lalropuia Kualmawi veng te In sak hnatlang neih a ni. Thawhlehni tuk dar 9:45 vel khan Pu B.Lalropuia Bilkhawthlir Kualmawi Thlanmual veng ami In hi bungrua engmah chuh hman lohin a kang ral a ni.

Source: Lalhmachhuana Tochhawnga via Dingdi group (fb)

*BIHAR CM JITAN RAM MANJHI SORKAR BUK DAWN
Lamtluang ah pawh vawi tam tak kan rawn tarlan tawh thin Bihar a rorelna chelh mek Janata Dal (United) party chhungkua a buaina awm mek ah Chief Minister nilai Jitan Ram Manjhi chu a sorkar in tlawp a hlawh em tih fiah turin Governor Keshar Nath Tripathi chuan February ni 20 ah assembly inkhawm ko turin a hriattir. Kan rawn tarlan tawh thin angin CM nilai JR Manjhi hi a hma a CM lo ni thin Nitish Kumar nen an inmilloh avangin JD(U) atanga hnawhchhuah a ni a, JD(U) chuan legislature party leader thar atan Nitish Kumar hi an thlang a ni.

*AIZAWL DISTRICT LEVEL VIGILANCE & MONITORING COMMITTEE THU
Sawrkar Laipui Ministry of Rural Development, hnuaia thingtlang mite chawikanna tura hmalakna hrang hrangte thlirin nimin chawhnu khan Aizawl District Level Vigilance & Monitoring Committee chu Chairman Pu C.L.Ruala, M.P. (Lok Sabha) leh Co-Chairman Pu Ronald Sapa Tlau, M.P. (Rajya Sabha) leh Member Secretary, Aizawl DC Dr. Franklin Laltinkhuma te hovin DRDA Conference Hall, New Secretariat Complex, Khatla ah an thukhawm.

Nimina District Level Vigilance & Monitoring Committee meeting hian meeting hmasa (October ni 30 2014 a neih) thurel bawhzui dan te an thlirlet a, October 2014 leh December 2014 quarter ending thleng bakah January 2015 chhunga hnathawh dan te an thlir ho nghal bawk.

Aizawl District huamchhunga RD Block panga ah te hian Ni Za Inhlawhna MGNREGA hnuaiah 3rd Quarter (January 2015 tiamin) hna hrang hrang 457 tan niin a vaiin zawh a ni a, hemi atan hian inhlawhna (wage) Rs.574.152 lakhs sem niin bungraw(material) man Rs. 229.415 lakhs sen a ni a. Job card 26013 atan hemi hun chhung hian tha 3,37,736 tan inhlawhna siam a ni bawk.

Mirethei chenna in sak sakna Indira Awaas Yojana (IAY) hnuaiah kum 2013-2014 chhung khan chenna in 472 sanctioned a ni a heng te hi kumin 2014-2015 chhung khan sak zawh vek a ni a. 2014 -2015 a chhena in 70 sanctioned te chu mi pakhat tana Rs 75,000 /- zel senga thawhna turin bawhzui chhoh mek a ni.

Pradhan Mantri Gram Sadak Yojana (PMGSY) hnuaiah Phase I-ah hna 2; Phase II-ah hna 6; Phase III ah hna 3; Phase IV ah hna 4; Phase V ah hna 2; Phase VI ah hna 6; Phase VI Part II ah hna 3 zinga 2; Phase VII a hna 10 zinga 8 te chu zawhfel a ni tawh a. Phase VII Part II a hna 3 te chu thawh mek a ni bawk.

Establishment of Ashram School & Construction of Hostels hnuaia ST hmeichhe hostel 7 zinga 2 chu sak zawh tawh niin a dang 5 te chu sak mek a ni a, sak zawh tawh hostel te hi Dawrpui Vengthar a KM Higher Secondary School leh Govt. Saitual Higher Seondary School a hostel te a ni.

Heng bakah hian Integrated Watershed Management Programme (IWMP), National Land Records Modernization Programme (NLRMP), National Rural Drinking Water Programme (NRDWP), National Social Assistance Programme (NSAP), Establishment of Ashram School & Construction of Hostels leh Rajiv Gandhi Gram Vidyatikaran (RGGVY) hnuaia hmalakna te an sawiho bawk a ni.

Meeting-ah hian beneficiaries te sum dawn tur chu bank kaltlanga pek chhuah zel tawh anih avangin thingtlangah tun aia bank tam zawk neih dan kawng dap a tul thu an sawilan bakah beneficiaries te bank account nei theuh turin ziritirna pek a tul thu an sawi bawk.

Meeting-ah hian Rural Development Minister Pu R. Lalzirliana, Deputy Chief Whip Pu R.L. Pianmawia leh Tuikum bialtu MLA Er. Lalrinawmna te pawh telin thingtlang mipuite chawikan nana hmalakna hrang hrang kalpui danah an ngaihpawimawh zawngte sawiin rawtna te an siam bawk a ni. (DIPR)

Mizo celebrities picture (thlalak)

Mizoram leh Myanmar a Mizo milar (celebrities) te facebook account/page te kan hawng a, an thlalak Zoram leh khawvel mipui te hmuh ve atana kan duhsak deuh deuh te an mahni phalna pawh la hmasa lem lo in kan 'stalk' na atangin kan lo download ve tawp tawp a, kan blog ah hian kan han tarchhuak a, hei hi khawvel zau zawk a kan Mizo milar (celebrities) te hlimthla a lo darhzau zawk nan a duhsak leh ngaisang tak chung a kan tih a ni. Kan theih chin chin ah an thlalak kan neihna (source) pawh kan tarlang tel bawk a ni. (An thlalak tarlan duhlo/phallo te chuan lamtluangmizo[at]gmail[dot]com ah min rawn hrilh se kan lo dahbo dawnnia) Khawvel hmun hrang hrang a Mizofaten in lo hlut ve ngei kan beisei a ni. Kan zaithiam leh milar te hi Mizo hmeichhia leh Mipa zingah chuan a hmeltha tha thlanchhuah anni emaw tih mai tur anni hlawm bawk. In tana kan milar te thlalak rawn chhawpchhuak tute hi Mizo tawng a nitin chanchinthar chhuah thin tu Lamtluang online news te kan ni e. Kan page te hi Facebook ah www.facebook.com/Lamtluang ah min lo like sak tur  leh Twitter ah www.twitter.com/Lamtluang tih hi min lo follow sak ve turin kan ngen bawk a che u.

Pic.1. Name: Bethsy Lalrinsangi
Genre: Gospel song/Artist
Sex: Female
Home place: Lunglei, Mizoram

Bethsy Lalrinsangi, Gospel singer

Pic.2. Name: Lalrindiki Khiangte (Daduhi)
Genre: Mizo love song/patriotic song/artist
Sex: Female
Home place: Aizawl, Mizoram (Now in London, U.K)

Lalrindiki Khiangte (Daduhi), Singer

Pic.3. Name: Pensy B.Lalthangliani
Genre: Gospel song/artist
Sex: Female
Home place: Zohnuai, Lunglei, Mizoram

Pensy B.Lalthangliani, Gospel singer

Pic.4. Name: Rosy K.Remsangpuii
Genre: Gospel song/artist
Sex: Female
Home place: Lawngtlai, Mizoram (Now in Chanmari, Aizawl)

Rosy K.Remsangpuii

Pic.5. Name: Maggie Malsawmzuali
Genre: Gospel song/ artist
Sex: Female
Home place: Mission Vengthlang, Aizawl, Mizoram

Maggie Malsawmzuali, Gospel singer

Pic.6. Name: Mami Varte (Full Name: Lalrinkimi Varte)
Genre: Love song/ artist
Sex: Female
Home place: Kulikawn, Aizawl, Mizoram

Mami Varte, Mizo artist

Pic.7. Name: Feli Fanai
Genre: Love song/ artist
Sex: Female
Home place: Champhai, Mizoram

Feli Fanai, Singer

Pic.8. Name: Lalpanliani (Pantei)
Genre: Love song/ artist
Sex: Female
Home place: Tahan, Myanmar

Lalpanliani (Pantei), Singer

Pic.9. Name: Zoramchhani (RC-i)
Genre: Gospel song/ artist
Sex: Female
Home place:  North Vanlaiphai, Mizoram

Zoramchhani, Mizo singer

Pic. 10. Name: Vanlalsailova
Genre: Gospel & love song/ artist
Sex: Male
Home place:  West Phaileng, Mizoram (Now in Republic veng, Aizawl)

Vanlalsailova, Mizo singer

Pic.11. Name: Sangtei Khuptong
Genre: Love & Gospel song/ artist
Band: The Breeze
Sex: Female
Home place: Dinthar, Aizawl, Mizoram.

Sangteii Khuptong, Mizo singer

Pic.12. Name:  Lawmi Khiangte
Genre: Love song/ artist
Sex: Female
Home place: Venghlui/Nursery veng, Aizawl, Mizoram

Lawmi Khiangte, Singer

Pic.13. Name: Tetei Ralte
Genre: Love & Gospel song/ artist
Sex: Female
Home place: Kawnpui, Mizoram.

Tetei Ralte, Singer

Pic.14. Name: K.Lalremthanga
Genre: Film/Actor
Sex: Male
Home place: Zonuam, Aizawl, Mizoram
(A film chan tam tak zing ah "Nu hmangaihna tuar zo lo" a nihna hi a larpui ber a ni.)

K.Lalremthanga, Actor
(Nu Hmangaihna tuarzo lo)

Pic.15. Name: Rebecca Saimawii (Makuri)
Genre: Love & Gospel song/Artist
 Sex: Female
 Home place: Khatla, Aizawl, Mizoram

Rebecca Saimawii (Makuri), Singer

 Duhsakna nen: Lamtluang@facebook & Lamtluang@twitter

11th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

 11.2.2015

*ARMY HELICOPTER TLA AH OFFICER 2 THI
Zanin dar 7:43 vel khan Jammu and Kashmir a Safapura ah India army helicopter a tla a, a chhung a chuang pilot 2 an thi.

*Tun thla chhungin India ramah swine flu avangin mi 216 an boral tawh niin sorkar thuchhuah in a tarlang.

*CLEAN MIZORAM CYCLING EXPEDITION A KAL TEN CHAMPHAI AH PRESS MEET NEI 
Communication & Capacity Development Unit (CCDU), PHE Department bultuma thawk chhuak, Clean Mizoram Cycling Expedition-a Serchhip leh Champhai tlangdung fang mek, Mission Veng Youth Adventure Club member Vanlallawmzuala Varte leh PC Lalramengmawia te chu vawiin khan Champhai an thleng a, Tourist Lodge-ah thuthar lakhawmtute nen inkawmna hun an nei. Cyclists-te hi PHED leh Sports Department hotuten Tourist Lodge-ah hian an lo hmuak a ni.

Vanlallawmzuala Varte chuan he expedition-a an kaldan hrang hrangte a tarlang a. Communication & Capacity Development Unit (CCDU) bultuma thawk chhuak an nihna angin an chawlhna khuaah faina kawnga Mizoramin hma a sawn theihna atan mipui zirtirna hun an hmang thin a. Khaw hrang hrangte chuan PHE Department hmalaknain bawlhhlawh paihna felfai tak an nei deuh vek tawh thu leh, a tlangpuiin khaw tinten faina kawngah hma an sawn hle tawh a an hriat thu an sawi a ni. An zin chhuahnaah hian harsatna lian tham an tawh loh thu leh, ralmuang taka expedition an nei thei chu lawmawm an tih thu an sawi tel bawk.

Vawiin hunah hian Pu Lalngilneia Colney, DYSO Champhai chuan thu sawiin, adventure club te chu mi chhanchhuak tura ke pentu pawimawh an nih thu leh, tunlaia faina kawnga mipuite kan harh zel theihna tura hetianga hma an lakna chu thil ropui tak a nih thu a sawi a ni.

Inkhawm kaihhruaitu Pu Zohmingliana, PHE EE chuan Clean Mizoram hnuaiah hian PHE Department-in nasa takin hma a lak mek thu te, tunah hian Champhai District-a rural area-ah faina beihpuithlak a kalpui mek thu te leh zirna in hrang hrangte nena tangrualin Champhai District hi District faia siam turin hmalak mek a nih thu a sawi bawk.

Clean Mizoram Expedition Cyclists-te hi Aizawl atanga an chhuah hnuah Tlungvel leh Serchhip an tlawh a, heta tang hian Champhai District-ah lutin Khawhai leh Khawbung te an tlawh leh a; hemi hnu hian Dungtlang, Vangchhia leh Zokhawthar te tlawh lehin vawiin khan Champhai an lut a. Vawiin vek hian Khawzawl panin Kawlkulhah an riak ang a, naktukah Saitualah hun hmangin Aizawl lam an pan leh dawn a ni. (DIPR)

‪#‎cleanmizoram‬

*VALENTINES SPECIAL BARBEQUE CUM DINNER
Mizoram Tourism Department chuan a vawikhatna atan Valentines Day Ni. 14.2.2015 (Inrinni) chawhnu dar 2:00 atanga tan turin “ Valentines Special Barbeque cum Dinner” Hmuifang Tourist Resort ah a buatsaih dawn a. He hunah hian Live Band ngaihthlak tur awm in, barbeque leh buffet dinner a duh apiang tan ei theihin a awm dawn bawk a ni. Heng bak ah hian Adventure activities chi hrang hrang a awm bawk ang.

He hun hi Nula leh tlangval tan mai nilo, chhungkua leh thian ho tan pawh a hlim leh nuam taka Valentines Day hmang duh tan a buatsaih a ni.

He event hi a hlawhtlin dan a zirin, kartin Inrinni apianga tih chhunzawm tum a ni. Tourism Department in a tum ber chu mipui vantlang tana intihlimna leh chhuah thawvenna hmun thawl leh nuam siam a ni.

Ticket leh advance booking ti duh tan, Directorate of Tourism, Bungkawn, Aizawl ah leh heng Phone No. 9774996068 / 8259943044 ah hian zawhfiah theih a ni. (DIPR)

*SAIHA-LAWNGTLAI KAWNGAH RUANG CHHAR
Pu HC. Lalmalsawma Zasai thlam, Saiha -Lawngtlai kawng, (Via Tuipui Ferry ) tawngtaina thlang lawk a mi vengtu Zakam kum 60 vel chu vawiin dar 12 vel khan thlam chhungah thi a chhar a ni.

Zakam hi zu in thin a ni a, A zuin chau bawihsawmtu nei lo chu a thi nia rin a ni. A bawhna hmunah hian thi a luakna hmuh a ni bawk.
Source: Lalhmachhuana Tochhawng via DINGDI Group (FB)

*NEDFI-IN 'BUSINESS MEET' BUATSAIH

North Eastern Development Finance Corporation Ltd. (NEDFi), Lunglei Branch Office chuan vawiin khan DIC Conference Hall, Venglai-ah 'Business Meet' a buatsaih a, Lunglei-a sumdawng mi (entrepreneurs) engemawzat an kalkhawm a ni.

'Business Meet' ah hian NEDFi Lunglei Branch Manager Pu Lalhruaizela Fanai chuan NEDFi hmalakna hrang hrang leh an scheme kalpui mekte a sawifiah a, NEDFi chuan loan nuai 100 (za) aia tam lovah chuan kum khatah 8% pung awmin loan a puktir thin thu a sawi a. Interest chu sum la bat zat atanga thla tin chhut thar zel a nih avangin Bank dangte nena khaikhin chuan an interest rate a hniam hle a ni, a ti. NEDFi chu DoNER Ministry hnuaia awm a nih thu sawiin sorkar laipuiin hmarchhak biala mite a duhsak avanga interest hniam zawka loan pek chhuak thei an nih thu a sawi bawk. Industry dinte leh sumdawngte chuan bank dang an dawr hmain NEDFi chu dawr phawt thin se a duh thu a sawi bawk a ni.

Business Meet chhim tura kalkhawm sumdawngte leh mahni kutkawia eizawnna ngelnghet bultan tumte nen NEDFi hotute chu inkawm zuiin, zawhna hrang hrang an neite chu NEDFi lamin an chhang a ni.

NEDFi hi kum 1995-a India sorkarin NE states te hmasawn nana din a ni a, tunah hian DoNER Ministry hnuaiah awmin industry leh sumdawnna lampangah loak an puk tir thin a ni. Mizoramah hian Aizawl leh Lunglei-ah office neiin Lunglei NEDFi Branch Office hi 26th April, 2012 khan Chanmari-a Pu R.Laldawnglana building-ah hawn a ni. (DIPR)

*UNDER 14 FOOTBALL PLAYERS TE PU JOSEPH LALHIMPUIA, PARLIAMENTARY SECRETARY IN A LAWMPUI
60th National School Games, 2014-2015 Football (Boys) under 14 ah Mizo naupangten lawmman pahnihna an rawn hawn lawmpuina nimin chawhma dar 11 khan Directorate of School Education Conference Hall-ah hman a ni a. Khuallian Pu Joseph Lalhimpuia, Parliamentary Secretary in Players te hnenah certificate leh pawisa fai Rs. 3,000/- theuh a hlan. (DIPR)

 

*VALENTINE'S DAY AH TEMPLE TLAWH TURIN TI
Bangkok khawpui a roreltute chuan an ram Thai thalai te chu Valentine's Day ah sex hmang lo tur a ngen in hemi ni hian hmun fal a interek lo in Temple tlawh theuh zawk turin an ngen. Thailand hi Southeast Asia a tleirawl laia naupai tamna ber pawl anni.

 

*CHAMPHAI DISTRICT VIGILANCE AND MONITORING COMMITTEE THUKHAWM 
Nimin khan Champhai District Level Vigilance & Monitoring Committee chu an Chairman Pu C.L.Ruala, MP (Lok Sabha) leh Co-Chairman Pu Ronald Sapa Tlau, MP(Rajya Sabha) hovin Champhai DC Conference Hall-ah an thukhawm. He hunah hian Champhai North bialtu MLA leh Parliamentary Secretary ni bawk Pu T.T. Zothansanga a tel a. Champhai DC leh Committee Secretary ni bawk Pu Sangdingliana chuan Committee Member zawng zawngte lawmna thu a sawi a ni. (DIPR)

 

*ASSAM RIFLES TEN TEIKHANG AH A THLAWN A INENTIRNA BUATSAIH
39 Assam Rifles chuan niminpiah khan Teikhang ah a thlawn a inentirna Free Medical Camp an buatsaih a. He Free Medical Camp ah hian Teikhang bakah Mimbung, Hrianghmun, Depatlang, North East Khawdungsei leh Kawlbem atangin mi 650 vel an inentir a, damlo te tan a thlawnin damdawi an sem a ni bawk a. Medical Camp hi Assam Rifles atangin Deputy Commandant Amrik Singh, Senior Medical Officer ni bawk leh Major VT Ashokrao, RMO, 39 Assam Rifles ten an buaipui a, Medical Camp hi Pu T.Ropianga, VCP Hrianghmun in a hawng a ni. (DIPR)

 

*MIZO THALAI INFIAMMITE HMASAWNNA AH SPORTS MINISTER LAWM “ZONET, LPS, DDK leh print media te chungah lawmthu ka sawi” - Zodintluanga
Nimin chhun dar 11:30 khan Serchhip District Tuikum Biala Hmuntha khuaah Sports Minister Pu Zodintluanga’n ni 9 chhung awh tur 2nd Hualliana Memorial Football Tournament a hawng a, hawnna ah hian thusawiin Pu Zodintluanga chuan ZONET, LPS, DDK leh Print Media ten Sawrkarin infiammite hmasawnna tura hma a lakna a an thlawp that avang leh anmahni ngei pawhin Mizo thalaite talent haichhuak leh phochhuak tura ruahmanna chi hrang hrang an siam thin avangin Sports lamah pawh a taka hmuh theihin Mizoramin hma a sawn a ni a ti a, Media te hnenah lawmthu a sawi a ni. (DIPR)

 

*AH&VETY DEPARTMENT IN SERCHHIPAH NLUP SEM
Nimin chawhnu dar 1:00 khan AH&Vety Complex, Serchhip ah AH&Vety hnuaia NLUP 2nd Phase beneficiaries Serchhip, Chhiahtlang, Sialhau leh Hriangtlang khua a vawkvulh thlangtu chhungkaw 31 hnenah 3rd /final installment Rs. 20,550/- theuh pek an ni a, tanpuina sum hi beneficiary te bank account ah dahluh sak nghal vek an ni. (DIPR)

 

*CHIEF MINISTER-IN NEEPCO BOARD OF DIRECTORS MEETING HMANPUI
Mizoram Chief Minister Pu Lal Thanhawla chuan nimin khan State Guest House Conference Hall-ah NORTH EASTERN ELECTRIC POWER CORPORATION (NEEPCO) Board of Directors Meeting vawi 213-na a hmanpui.

Chief Minister chuan NEEPCO in Aizawlah Board of Directors Meeting an rawn nghat chu kan vannei hle a ni a ti a. Hmasawnna ruhrel tha, infrastructure kan nei tawklo erawh chu in mi hriatthiam kan duh a ni tiin, Mizo ten mikhual kan dawnsawn danah an tan tawnhriatna thar anih ngei a beisei thu a sawi a. NEEPCO chu hmarchhak bial tan power siamchhuaktu pawimawh tak an nih thu sawiin, hmarchhak bial hi power, abikin hydel power siamchhuah theihna hmunpui a ni chungin power kan khawpkhamlo em em a ni a ti a. 50,000 MW power siam chhuah theihna awm si, 11% pawh kan siamchhuaklo a ni a ti a. Mizoramah phei chuan 1% vel chauh kan hmang a ni a ti. Hei hian hmasawnna a tih chak loh phah hle a ni a ti.

Chief Minister chuan hmarchhakah Neepco hian power siam zawng zawngah 50% vel an thawk chhuak a ni tiin, hmun harsa leh chhengchhe tak kara a hnathawkte inpeknaah kan lawm hle a ni a ti a. Keini pawhin tanpui ngaihnaah kan inhawng reng a ni a ti. Thermal power lamah pawh Neepco chu kal se a duhthu sawiin, Chief Minister chuan natural gas leh lungalhthei 60:40 ang tea tlangramah hydro-thermal mix siam a, micro hydel leh non conventional source te dap chhuak se a duh thu a sawi a.

Neepco hian National Solar Mission atanga sum leh technical lama puihna te dap se tiin Chief Minister hian a rawn bawk a. Tuirial Hydel Project 60MW power pechhuak thei tur hawn hlan a nghahhlelhawm a tih thu a sawi bawk a. Tuivai Hydel Project 210 MW power siam chhuak thei tur pawh Mizoram sorkar-in Neepco kutah hlan nise tia a rel tawh pawh a sawi a ni.

Neepco Chairman & Managing Director Pu P.C.Pankaj chuan Chief Minister Pu Lal Thanhawla’n Board of Directors Meeting a hmanpui chu lawmthu a sawi a. Neepco in Mizoram project a kenkawh te chu a hun taka zawh vek a tum a ni a ti a. Hetih lai hian kumina hawn hman tum, Tuirial Hydel Project chu a Power House bul leichim avangin a hun takah hawn theih a beiseiawmlo a ni a ti a. Kumin May thla khian a tuikhuah (Dam) chu zawh hman a ni ang a ti a. Tuivai project pawh Neepco kuta hlan a ni chu lawmawm a tihthu a sawi a. Mat Hydel Project chungchangah Central Water Commissionin DPR an buatsaih mek a ni a ti a. Lungreng leh Chhimtuipui Hydel project te pawh bawhzui reng a ni a ti a, a huna zawh hman vek tum a ni a ti. Pu Pankaj chuan Hydel project ngau ngau ah chuan Mizoramah an ngah ber a ni a ti a. Solar power siamchhuah lamah pawh hmalak tum anih thu a sawilang bawk a ni.

Chief Minister hi Pu T.P.Khaund, Principal Adviser to Govt of Mizoram & Neepco Permanent Invitee bakah Pu L.Pachuau, E-in-C, P&E leh P&E Chief Engineer pahnih Pu Vanlalhruaia leh Pu Lalnunmawi Sailo ten an tawiawm a. Neepco hotu dang U Moral, Director (T), A.G.West, Director(F), S.Borgohain, Director(P) leh S.C.Verma, Chief Vigilance Officer te an tel bawk a. An ni bakah Central Ministry hrang hrang atangin Independent Director 5 an tel bawk a ni. (DIPR)