24th - 25th January 2015 news in Mizo

 Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

 

25.1.2015
*SMART CITY SIAM TURIN INDIA LEH US IN MOU ZIAK
Vawiin khan India leh United State chuan India rama khawpui pathum Visakhapatnam, Allahabad leh Ajmer te smart city a siam turin inremna thuthlung an ziak fel. Inremna thuthlung hi India Union Urban Development Minister, M Venkaiah Naidu leh United States Trade Development Agency, USTDA Director, Leocadia I. Zak ten an ziak a ni.

*MIZORAM ATANGA POLICE MEDAL FOR MERITORIOUS SERVICE DAWNG TUR TE
India sorkar in kumin Republic Day denchhen a police huaisen chawimawina dawng tur a thlan te zinga Mizoram police atanga hming lang te chu:

1.Shri Vivek Kishore, DIG, Training, PHQ Khatla, Aizawl.
2. Smt. Chhaya Sharma, DIG, CID Complex Bungkawn, Aizawl.
3. Shri R.Lalrinmawia, Chief Drill Instructor, Police Training School, Thenzawl
4. Shri C.Lalchhuanliana, Inspector, Reserve Officer, Aizawl DEF

*MIZO POLICE OFFICER IN PRESIDENT's POLICE MEDAL FOR DISTINGUISHED SERVICE DAWNG DAWN
India sorkar in Republic Day denchhen a police hnathawk tha te hnenah chawimawina dawng tur a thlan zingah Mizoram police atang atangin Pu Joseph Lalchhuana, SP CID, Aizawl chu a tel ve.

*PADMA AWARD 2015 DAWNG TUR PUANG
Vawiin khan India civilian Award dawng tur te puan chhuah a ni a, mi 9 hnenah Padma Vibhushan pek anni a, mi 20 hnenah Padma Bhushan pek anni a, mi 75 hnenah Padma Shri pek anni.

Padma Vibhushan dawngtu tur te chu:
1. Shri L. K. Advani, Public Affairs, Gujarat
2. Shri Amitabh Bachchan, Art, Maharashtra
3. Shri Prakash Singh Badal, Public Affairs, Punjab
4. Dr. D. Veerendra Heggade, Social Work, Karnataka
5. Shri Mohammad Yusuf Khan alias Dilip Kumar, Art, Maharashtra
6. Shri Jagadguru Ramanandacharya Swami Rambhadracharya, Others, Uttar Pradesh
7. Prof. Malur Ramaswamy Srinivasan, Science and Engineering, Tamil Nadu
8. Shri Kottayan K. Venugopal, Public Affairs, Delhi
9. Shri Karim Al Hussaini Aga Khan (Foreigner), Trade and Industry, France/UK

*#FA_Cup results:
Chelsea 2 - 4 Bradford City
Spurs 0 - 2 Leicester
Man City 0 - 2 Middlesbrough
Southampton 2 - 3 Crystal Palace

*UKRAINE TUALCHHUNG BUAINA KAL ZEL AH MI 21 IN NUNNA CHAN BELH
Lamtluang ah vawi tam tak kan rawn posf tawh thin angin, Ukraine atanga Russia zawm duh vanga helna chhuak mek ah, nimin khan Ukraine a Azov sea tuipuikam a lawngchawlhna pawimawh tak awmna Mariupol khua chu Russia zawm duh helpawl ten rocket a an kah avangin mi 21 in nunna an chan belh leh a ni. An rocket kahchhuah hian bazar te, sikul te leh mihring chenna in te a kapfuh a ni.

*PATHIANNI ZING CHANCHINTHAR TAWI LAWRKHAWM
*India Republic day vawi 66-na a khuallian ni turin US President Barack Obama chuan a nupui leh sorkar mi pawimawh te nen tunah hian Air Force One thlawhtheihna in India an rawn pan mek a, tukin dar 10 ah Delhi an rawn thleng ang.

*Nimin khan India Prime Minister Narendra Modi chuan naupang huaisen mi 24 hnenah chawimawina National Awards for Bravery a hlan.

*Telangana ah swine flu natna vei mi 48 hmuhchhuah belh anni a, tihian an state chhungah swine flu vei mi 291 an tling ta a ni.

*Kan ram thenawm Bangladesh tualchhung poltics buaina chhuak avang in mi 34 in nunna an chan. Tunlai hian Prime Minister Sheikh Hasina leh eptu pawl te inkar ah buaina a chhuak a, boruak a muanawm loh hle.

*Sorkar laipui hnuai a Department of Personal and Training chuan thuchhuah siamin Indian Administrative Service, Indian Police Service leh India Forest Service officer tanglai te chu kumin January thla ral hma an sum leh ro neih hlut zawng kimchang te sorkar hnenah thehlut vek turin a hriattir. Hei hi eiruk dona dan Lokpal Act in a phut angin April thla ral hma in an thehlut nawn a ngai leh dawn bawk a ni.

*Nimin khan Iran leh United States palai ten Switzerland ram khawpui pakhat Davos ah nuclear siamchhuah chungchang ah inbiakn an nei.

*Imphal ah tunhnai lawk ah bomb vawi hnih apuah avangin sorkar in uluk leh zual in venhimna a kalpui mek.

*Republic day a nih dawn avangin Delhi metro rail chu vawiin leh naktuk ah a tlan mumal thei dawn lo a ni.

*Islamic States firfiak pawl ten Japan mi 2 an hrente chu a that ta niin an ram PM chuan a sawi. IS firfiak pawl te hian nikum August thla atang khan khawthlang ram mi 5 an mi man te an that tawh bawk a ni.

*Indian Statistical Institiute Kolkata chuan Bachelor, Master, M.Tech leh Research course zirduh te tan 3.2.2015-3.3.2015 chhungin admission dilna online in an hawng dawn.


*KTP BIAL CONFERENCE NEIH MEK A NI
Mizoram Presbyterian kohhran Kristian Thalai Pawl (KTP) te chuan Pastor bial hrang hrang ah bial inkhawmpui an hmang mek a, nimin ah rorel inkhawm an nei a, vawiin nileng leh zan in thleng in hun an hmang ho leh dawn a ni. Bial thenkhat ah speaker te neiin thupui thlanchhuah bik hmangin thuchah an ngai thla a, bial thenkhat ah erawh bial KTP hruaitu ten thuchah an in sawi chhawk a ni.

*ELECTRIC IN MAN HLUM
Nimin zing dar 7 vel khan W. Phaileng Dintharveng ah Pu Vanlalchaka( kum 55)chu electric current in a man a, Aizawl pan pui anih laiin kawng lakah a boral.
Pu R. Vanlalchaka hian an In saklai ah tui a pe a, an Inrel chunga electric hrui chu a lu in a tawk palh (a sam pawh electric hrui ah hian ala kai nghe2 niin an sawi) a current in a man a, a hnuai chhuatah a tla ta a ni. Pu R. Vanlalchaka hi Phaileng damdawi inah hruai a ni a. Doctor ten Aizawl lam panpui tura an rawn angin Aizawl panpui a ni a, Dapchhuah bulah a thi ta a ni. Pu R. Vanlalchaka hi Mizoram Police ah Head Constable niin W. Phailengah thawk a ni a, a ruang hi lumenpui mek a ni, vawiinah vui a ni ang.

Source: Lachua Palian

24.1.2015
*BOKO HARAM IN MI 15 THAT
Nimin zing khan Nigeria hmarchhak lama awm Kambari thingtlang khua ah Boko Haram firfiak pawl ten mi 15 an that a, an khua an hal sal bawk. He khua hi Maiduguri khaw bul hnai a ni a, firfiak pawlte hian Maiduguri khua ah luh an tum a, an lut theilo in Kambari khua hi an bei ta niin ngaih a ni.

*BABA RAMDEV AN CHAWIMAWINA SANG HNAWL
Kumin Republic Day vawi 66-na ah hian Yoga guru lar Baba Ramdev chu sorkar laipuiin khua leh tuite chawimawina sangber dawttu 'Padma Vibushan' dawng tur a puan an tum a, mahse amah Ramdev hian a pawmloh thu Union Home Minister Rajnath Singh hnenah a thawn a ni. A hnawl na chhan ah hian sakhuana lama mi inhmang anih angin eng chawimawina mah dawng tur niin a inhre lo a ni.

*OBAMA TE NUPA IN INDIA PAN
Vawiin chawhnu khan India ram a Republic Day hman pui tur in US President Barack OBama leh a nupui Michelle Obama te chuan Air Force One thlawhtheihna in Andrews Air Base atangin India lam an pan. US President te nupa leh an mahni rawn zuitu te hi naktuk zingah New Delhi an rawn thleng ang. Ruahmanna hmasa ang chuan January 27 ah Agra a Taj Mahal tlawh tum anni a, mahse Saudi Arabia lal a thih tak avangin an ram lal thar hmuh a duh leh tak thut avangin Taj Mahal tlawh hi a thulh leh ta a ni.

*UKRAINE A RUSSIA ZAWM A DUH HEL TEN INBIAK DUH LO
Tunlai a international news luah tu langsar tak Ukraine khawchhak lam a Russia ram zawm duh zawk vanga tharum hmanga helna chawk chhuak mek Donetsk separatist hotupa Alexander Zakharchenko chuan Ukraine sorkar nen a inremna zawng a inbiak an tum loh thu leh an luahchin ram bakah khawthlang lam ram te zau zawk a lak belh zel an tum thu a sawi. Ukraine buaina avang hian nikum April thla atang khan mi 5086 in nunna an chan tawh niin United Nations human rights office thuchhuah chuan an sawi.

*IIT BOMBAY IN KHAWVEL A NETBOOK MAN TLAWMBER TLANGZARH DAWN
Indian Institute of Technology - Bombay (IIT-B) chuan khawvel a netbook man tlawm ber tur an duang chhuak. He netbook hi inches 10 a hlai niin, Rs.6,000 man tur a ni a, thlaleh February chawlhkar hnihna ah tlangzarh an tum a ni. He IIT Bombay ten a project an neih hi Delhi company Basic Computers te nen a thawk tlang an ni.

22nd - 23rd January news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

23.1.2015
*MLPC ACT BAWHCHHIA TE COURT IN VANTLANG HNA THAWHTIR
MLPC Act hnuaia thiamloh chantir mi pali te chu CJM court, Kolasib thupek angin nimin khan vantlang hna thawkin Diakkawn Bazar leh a chhehvel phiahfai tir an ni a, Excise department atangin hnathawklai hi uluk takin an vil a ni. Hremna hi Thawhlehni atanga kalpui tan a ni a, a hma hian district court leh a chhehvel an lo thianfai tawh bawk.

Source: Zomuana Chhakchhuak via Kolasib District Special Report Group

*FAI HNATLANG RUNPUI JANUARY 30 HIAN MIZORAM PUMPUI AH NEIH NI DAWN
Vawiin chawhnu khan Pu Joseph Lalhimpuia, Parliamentary Secretary, Education,etc., chuan January 30 a neih tum, Mizoram pumpui huap ‘Fai hnatlang runpui’ huaihawt dan tur relin AMC, Education Department, CYMA, MZP, MSU leh Clean Mizoram Network hruaitute a kawm a. Meeting a rel dan chuan State pumpui huap, bawlhhlawh thenfai hnatlang bul tanna hi January 30, zing dar 7:30 ah Aizawl Electric Veng Sumo/Maxi Cabs Stand ah Chief Minister Pu Lal Thanhawla hova thawh tan a ni dawn a ni.

Pu Joseph Lalhimpuia, Parliamentary Secretary chuan Mizoram chu India ram pumpui a state fai ber nih tum in nikum November thla ah khan Clean Mizoram Movement din tawh in hma a la tan tawh a. Hemi thlawp zawng hian Education Department phei chuan notification pawh chhuah tawh in kan hma kara neih tum ,‘Fai Hnatlang Runpui’ pawh hi chumi hmalakna bul tanna pawimawh tak leh a hlawhtlinna kawng khat a nih tur thu a tarlang a. Clean Mizoram Movement chuan Zoram mipui zawng zawng te ‘Fai hnatlang’ hi tawiawm turin a ngen tak meuh meuh a ni a ti.

Fai Hnatlang Runpui hi meeting in a rel dan chuan Chief Minister hovin zing karah tan hmasak a ni phawt ang a, hemi hnu sikul tan hun zing dar 9:30 atangin Mizoram pumpui a khua leh veng tinah YMA te kaihruaina in sikul naupang leh tlawmngai apiang ten an thawk chhunzawm dawn a ni. Aizawl khawpui chhung bik ah remchan zawkna ngaihtuahin bawlhhlawh hnatlang fehchhuak in an chhek khawl te hi Aizawl Municipal Council(AMC) lirthei ten bawlhhlawh paihna hmunah an paih dawn a. Hemi ni vek hian Sawrkar hnuaia office zawng zawngte chu an hnathawhna hmun leh chhehvel thenfai a nih ve theih nan Meeting chuan Chief Secretary hnenah ngenna a thehlut a. Faina chungchanga mipui zirtirna hun pawh DDK ah January 27 zan dar 6:00-6:30 leh Zonet ah January 28 zan lam programme ah te buatsaih tura ruahman nghal a ni bawk a ni. Chhut lawk dan chuan January 30 a faina beihpui thlak ni hian mipui nuai 3 chuang zet chu an thawhchhuah ngei rin a ni a, Sikul naupang – Primary atanga Higher zirlai zawng zawng te pawh class kal lovin an hnatlang dawn a ni.

Clean Mizoram chungchang relna ah hian Pi M.Zohmingthangi, CEO, AMC, Pi Malsawmthangi, SCERT Director, Pu H.Lalengmawia, School Education Director, Sawrkar mi pawimawh te, NGO hruaitute leh Clean Mizoram Network hotute an tel a ni. (DIPR)

*KTP BIAL INKHAWMPUI ZANIN AH
Mizoram chhung leh ram pawn a Pastor bial hrang hrang ah zanin ațang in Presbyterian kohhran Kristian Țhalai Pawl (KȚP) Pastor bial inkhawmpui hman țan a ni dawn, Inrinni nileng rorel a ni ang a, Pathianni zan ah an țiak ang. In bial in khawnge conference in hman ve dawn le?

*UK IN SCOTLAND THUNEIHNA TAM ZAWK PE TAN
Nikum September thla a Scoland mipui ten United Kingdom atanga zalenna pumhlum neih an hnawl hnu in UK sorkar in a lo tiam tawh ang in Scoland Parliament hnenah thuneihna tam zawk an hlan tan mek a, income tax lak zat tur te, chhiah lakkhawm mipui vantlang tan a hman dan tur te leh Scotland parliament a mipui thlanchhuah roreltute hnathawh dan tur leh kalphung ah te thuneihna sang zawk te London atanga relsak tawh lo in an mahni a rel fel turin thuneihna pek anni tawh dawn a ni.

*1st INDO-BANGLA BORDER MEET MAMIT-AH NEIH A NI
Kum 2012 October 16-17 a India leh Bangladesh inlaichinna tha lehzual a awm theih na tura ram pahnih Home Secretary te Dhaka-a an inbiak na a ram pahnih ri tawn tu District Magistrate leh Superintendent of Police ten inbiakna nei se ti a thu an lo dah tawh bawhzuiin nimin khan Mamit D.C Conference Hall-ah 1st Indo-Bangla Border Meeting neih a ni. Inbiakna hi India (Mizoram sector) leh Bangladesh ramri hrula District Magistrate/District Commissioner te leh Superintendent of Police te bakah officials pawimawh dang ten an nei a ni.

Nimin Meeting-ah hian Indo-Bangladesh border fencing, border trade, ralthuam leh damdawi tawlhruk, dan lova ramri kan, ram pahnih insumdawn tawnna tur leh inlaichinna tha zawk a awm theih nana thil pawimawh hrang hrang te bakah inbiakpawh tawnna tha a awm theih nana hmalak dan tur te sawiho a ni a. Meeting neih leh hunah chuan Mizoram ri tu Bangladesh district pakhat Khakrasuri district koh tel ni se tiin an rel bawk.

Mizoram sector aiawh hian Mizoram district a Bangladesh ramri tu District pathum Mamit District, Lunglei District leh Lawngtlai District atangin Deputy Commissioner, Superintendent of Police leh Home Department atangin Addl Secretary leh OSD, Joint Director, Trade & Commerce Department, Joint Director (Survey) Land Revenue & Settlement Dept., Commandant, Sector Hqrs BSF, R.O, CADC leh S.I.B(aiawh) Lunglei te an tel a. Bangladesh atangin district pahnih - Bandarban Hill District leh Rangamati Hill District atangin District Magistrate te, Superindent of Police, Director, 53 Border Guard Battalion, Ruma, Bandarban Hill District, Additional District Magistrate, Bandarban Hill District, Director, 25 Border Guard Battalion, Additional Deputy Commissioner (Revenue), Rangamati Hill District, Assistant Director Department of Narcotics Control Bandarban Hill District, Assistant Surveyor Officer, DGLR te an tel a ni. Heng mi te bakah hian officials pawimawh dangte an tel bawk.

Zan lamah Bangladesh palai te lawmna chawhlui kilho niin Mizo ziarang phochhuahna hun Mamit Tourist Lodge-ah buatsaih zui a ni. Bangladesh palai te hi vawiin ah an haw leh nghal dawn a ni. (DIPR)

*REAL MADRID HAUSABER
Football club hausa thlang chhuak tu Deloitte football money league 2014 in a tarlan danin khawvel football club ah European Champion Real Madrid chu kum 10 chhung a club hausaber niin an chhut. Kum 2014 chhung a Club hausa an thlanchhuah 10 te chu:-
1. Real Madrid: $639m ($602.7m)
2. Manchester United: $602.3m ($492.3m)
3. Bayern Munich: $566.8m ($500.1m)
4. Barcelona: $563.5m ($560.5m)
5. Paris Saint Germain: $551.5m ($463.2m)
6. Manchester City: $481.9m ($367.2m)
7. Chelsea: $451.1m ($352.4m)
8. Arsenal: $417.9m ($330.2m)
9. Liverpool: $355.8m ($279.5m)
10. Juventus: $325m ($316.4m)

Bracket chhung a mi hi kum 2013 a an sum lakluh zat a ni.

*BREAKING NEWS
Saudi Arabia lal King Abdullah bin Abdulaziz al Saud chu a boral. Amah hi kum 90-a upa a ni. A unaupa Prince Salman chu a aiawh tur a puan a ni.

*HRIATTIRNA
Ni pawimawh – Independence Day leh Republic Day ang chi te lawmna hi mipui ten anmahni ta a ni tih hria a hlawhtlin lehzual nan, a bik takin Sawrkar hnathawk leh officials-te an tel a pawimawh a. General Administration Department chuan heng ni lawmna hi ngai pawimawh a, a lawmna ah te tel ngei thin tur leh kumin Republic Day Lawmna 2015 ah Sawrkar officer zawng zawng te tel ngei turin a hriattir. (DIPR)

*KUM 3 CHHUNGIN KHAWPUI HRANG HRANG AH FREE WIFI PE DAWN
India sorkar laipui hmalakna in Bharat Sanchar Nigam Ltd (BSNL) chuan kum 3 chhungin India ram khawpui 2,500 ah a thlawn in wifi speed chak chi a pe chhuak dawn. He hmalakna hi financial year thar 2015-16 atanga tan tur a ni a, sum pawh Rs.Vaibelchhe 7,000 ruahman a ni. Wifi hi a tirah a thlawn a ni ang a, a hnu leh zel ah chuan man tlawn te in tariff plan siam a ni dawn niin BSNL chairman and managing director Anupam Shrivastava chuan a sawi.

22.1.2015
*TUIALHTHEI MAN THAR
Mizoram hmun hrang hrang ah MS (Petrol), XP (extra premium) leh HSD (Diesel) man thar chu a hnuaia mi ang hian bithliah a ni a. Oil man thar hi 17.1.2015 zanlai atang khan hman tan nghal a ni.

Sl.No. - Khua - MS - XP - HSD
1. Aizawl - 57.75, 60.75, 47.65
2. Vairengte, Ngopa, Thenzawl, Serkhan, Saitual, Mamit - 57.48, 60.48, 47.50
3. Champhai - 57.96, 60.96, 47.77
4. Kolasib - 57.56, 60.56, 47.54
5. Lawngtlai - 57.66, 60.66, 47.60
6. Lunglei - 57.74, 60.74, 47.65
7. Serchhip - 57.76, 60.76, 47.66
8. Hnahthial - 57.67, 60.67, 47.61
9. Saiha - 57.77, 60.77, 47.67


*TELANGANA AH SWINE FLU DARH ZEL
Nimin tlai khan Telangana Chief Minister K.Chandrasekar Rao chuan thuthar lakhawmtu te hmaah tunhnai ah Telangana state chhung ah swine flu natna vanga boral mi 19 an awm tih a sawi. Swine flu vei mi 30 enkawl mek anni a ti. State sorkar in he natna darh zel loh nan theihtawp in hma a la mek a ni a ti.

*WINDOWS 10 FAVANG BORUAK AH
Microsoft chuan kumin favang chho ah Operating system thar Windows 10 chu tlangzarh hman an tum. Microsoft operating systems group hotupa Terry Myerson sawi danin Windows 10 hi kum khat chhung a thlawn in Windows 7, Windows 8.1 leh Windows Phone 8.1 hmangtute tan a thlawn in upgrade an phalsak dawn a ni.

*ASSAM AH MUSLIM AN PUNGCHAK BER
India ram a chhiarpui 2011 a neih a sakhaw hrang hrang awmzat tlangzarh tur ah rampumah Assam ah Muslim sakhaw zuitu an pung chak ber a. Rampum ah kum 2001-2011 chhung a an punna chu 24% a ni a, hei hi chhiarpui hmasa aiin a tlem a ni. Assam a an punna zat chu 34.2% a ni a, an pun tlemna ber chu Meghalaya, Odhisa leh Arunachal Pradesh te niin 1.0% in an pung a ni. Mizoram chhung bik ah chuan Muslim sakhaw zuitu 1.4% in an pung a, chhiarpui hmasa 2001 khan 1.1% in an pung a, chhiarpui neih inkar a an punna zat chu 0.3% a ni.

*NDIA A SAKHAW CHHIARPUI KIMCHANG TLANGZARH DAWN
India ram sorkar laipui chuan karleh lam ah kum 2011 chhiarpui neih atanga ramchhung a sakhaw hrang hrang betu awmzat leh an pun chak leh tlakhniam dan tarlanna (religion-based data of Census 2011) chu a tlangzarh dawn ni a sawi a ni. Dan tlangpuiin sakhaw betu awmzat tarlanna kimchang hi chhiarpui neih atanga kum 4 chhung a tlangzarh thin a ni a, sorkar hmasa UPA II khan inthlanpui an hnaih tawh avang khan an tlangzarh hman ta lo a ni.

20th - 21st January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

 

21.1.2015

MAMI VARTE IN UK AH PASAL NEI DAWN
Mizo zaithiam te special report na an tarlan angin Mami Varte chuan kumin March thla hian kum 2 chuang a lo kawp tawh Aizawl, Upper Kanaan (UK) tlangval Zoramchhana Sailo chu pasal atan nei dawn a ni. Palai te pawh an intir fel tawh ni a sawi a ni.

 

Mami Varte and her fiance Zoramchhana Sailo
(Mami Varte leh a bialpa Zoramchhana Sailo)

WEDDING BELL FOR MIZO CELEB STAR SINGER MAMI VARTE

Mizoram celeb vocalist Lalrinkimi Varte aka (Mami Varte), Kulikawn, Aizawl will tie a knot with her long fiance Mr.Zoramchhana Sailo,  Upper Kanaan, Aizawl on March, 2015.

20.1.2015

*DELHI CM CANDIDATE AH KIRAN BEDI
India rama hmeichhe IPS hmasaber Kiran Bedi chu Delhi Assembly inthlan ah BJP Chief Minister candidate a ni dawn. He thu hi BJP President Amit Shah chuan Delhi ah thuthar lakkhawmtu te hmaah a puang a ni. Amah hi Mizoram ah Deputy Inspector General of Police in a rawn awm tawh nghe nghe kha.

19th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

19.1.2015

*POLIO VACCINE PEK TAN A NI
Vawiin atang khan naupang kum 5 hnuai lam te hnenah zenghri danna polio vaccine pek tan a ni leh ta a. Hawnna inkhawm hi Aizawl Civil Hospital Auditorium-ah neih niin Health Minister Pu Lal Thanzara chu khuallian a ni.

Pu Lal Thanzara chuan India ram atanga zenghri umbo a lo ni ta chu thawktute thawhrimna leh inpekna rah a ni, tiin an chungah lawmthu a sawi a. India ram chu zenghri awm lohna ram ‘polio free’ ni tawh mahse khawvel hmun thenkhatah zenghri natna hi hmuh a la nih cheu avangin fimkhur taka a umbona hna hi kalpui a la tul a, he hri laka invenna vaccine chu nausen piang hlim atanga kum 5 chin te chuan an la ngei tur a ni, a ti. Minister chuan nu naupaite damdawi iron mum sem thin tlakchham chungchang sawiin a chinfel hna department in a thawk mek a. Kum dangah Iron mum hi a thlawnin sorkar laipui atanga dawn thin a nih laiin tun tum ah erawh dawn a nih tak loh avangin he harsatna hi a lo awm a ni, a ti.

Health Minister chuan thisen sawngbawlna senso phuhrukna atana sum lak tul ta chungchang pawh sawi fiahin sorkar laipui NACO (National AIDS Control Organisation) atanga thisen pekna hmanrua – blood bag, test kit leh mamawh dangte a thlawna dawn thin chu tihtawp niin heng hmanrua leina tur senso 25% chu state sorkar tum tura a phut bakah, tanpuina hrang hrang hmuh thinte tihhniam vak a ni a. Miin thisen a thlawnin pe mahse damlovin a hman theih tura thisen siam nan unit khatah Rs. 1,200 vel sen a ngai thin a, kum khat chhungin thisen sawngbawl man hi cheng nuai tam tak sen ral a ngai thin a. Thisen sawngbawlna senso phuhrukna tur pawisa lak a lo tul ta hi thisen man a ni lo tih hrethiam turin Health Minister chuan mipuite a ngen nghal bawk a ni.

Medical Superintendent Dr.Rosangluaia kaihhruai National Immunization Day for Polio, 2015 hawnna inkhawmah hian Principal Director Dr.K.Ropari leh Director Health & Medical Education Dr. Lalbiakkima te pawhin thu an sawi.

Zenghri umbo beihpui hi India ramah sorkar laipui hmalakna in kum 1995 khan tan a ni a. Rampum huapin he hmalakna hi chak taka kalpui niin Mizoramah chuan kum khatah vawi hnih neih thin a ni. Zenghri venna beihpui hi ramchhung hmun dang ah chuan January ni 18 khan neih tan a ni tawh a, Pathianni a nih avangin Mizoram ah chuan January ni 19 Thawhtanni hian neih tan a ni. Mahni awmna hnai ber sub-center ah leh IPPI Booth tin ah zenghri venna hi a thlawna lak theih a ni. Zenghri venna (Polio Vaccine) hi Mizoram pumah naupang 1,35,086 hnenah pek tum niin, hemi atan hian a lakna hmun tur IPPI Booth 1306 siam a ni. Kum kal ta January 2014 a beihpui thlak a nih khan an target za a za an tlin thei a ni.

Kum 1994 khan India ram pumah zenghri vei mi 35,000 report a ni a. Zenghri umbo beihpui thlak a nih atanga kum 16 a liam hnu kum 2011 ah chuan zenghri vei hi mipakhat chiah hmuh a ni ta a. Hemi hnu hian zenghri vei an awm tak loh avangin March 27, 2014 ah chuan World Health Organisation chuan India ram chu zenghri awmlohna ram ‘Polio Free’ ah a puang ta a ni. Chutihrual erawh chuan ram thenkhatah polio hrik hi hmuh a la nih avangin uluk takin vaccination hi kalpui a la tul a. Ram danga zinchhuak tur reng reng, nausen atanga pitar putar thlengin, an zinchhuah hma thla khatah tal vaccine hi an la ngei tur a ni a. Vaccine an la ngei a ni tih hriatpuina certificate an ken a tul tawh a ni. (DIPR)

*KAWNG SIAM THAT NGENIN PWD MINISTER HMU
Vawiin chawhnu khan Lunglei South Thalai Kawng Tha Duh Pawl aiawh te chuan PWD Minister Pu Lal Thanzara chu a pisaah hmu in A.O.C to Zobawk kawng chungchanga an harsatna tawhte chinfel pui turin an ngen.

Lunglei South Thalai Kawng Tha Duhpawl aiawh te hi an Chairman Ngurthansanga Sailo, Vice Chairman Jacob Vanlaltana leh Asst. Secretary Vanlalliana Pachuau te an ni a. National Highway No.54-A, A.O.C to Zobawk kawngpui siam that a nih theih nan vawi tam tak tlawmngai pawl te kaltlang pawha hma lak a nih tawh hnuah vawiin thlenga kawng siam that a la ni lo chu hriatthiam har an tih thu leh motor khalh thin te’n an tuar piah lamah mipui mimir hriselna thlengin kawng chhia hian a khawih pawi nia ngaiin PWD Minister hnenah a rang thei ang bera siam tha turin ngenna an thlen a ni.

Hemi chungchangah hian PWD Minister Pu Lal Thanzara leh amah tawiawmtu PWD Chief Engineer (Highways) Pu John Rammawia leh SE Pu Henry Lalmuankima te chuan he kawng siam that an ngaih pawimawh thu leh a siam tur contractor pawh thlan fel thuai an beisei thu an sawi a. Tum nga lai a thawk tur contractor zawnga tender an chhuah hnuah chhangtu an awm theih loh avanga harsatna an tawh dan te an hrilhfiah a ni.

PWD hotute tarlan danin Lunglei chhim lam kawng NH-54A, Lunglei (A.O.C Ramthar) atanga Hrangchalkawn kawngpui siam tha tur hian Ministry of Road Transport & Highways chuan March 31, 2014 khan cheng nuai 493.04 a sanction a. Tender hmasa ber chu 4.3.2014 ah tihchhuah niin online e-tendering chu technical problem a awm avangin cancel a ni a. 23.05.2014 ah tender chhuah nawn leh a ni a. National Highway a nih avangin sorkar laipui MoRTH kaihhruaina zawm a tul a. MoRTH phut angin single tender a chhuah lovin tender pahnih a then a ni a. Tender hi mi pakhat chauh chhangtu an awm avangin 30.09.2014 ah tender chhuah nawn leh a ni a, a vawi li na atan 30.10.2014 ah tender tihchhuah a ni leh a. Tender vawi li chhuah a nih hnuah pawh a thawk duh contractor an awm leh tak loh avangin a vawi nga na atan 8.12.2014 ah tender dang chhuah leh a ni a. Contractor pahnih in an chhang ta a, tunah hian tender document enfiah sak mek an ni a. Dan anga tih fel a nih veleh contractor thlan hian hna a thawh tan nghal PWD hotute chuan an beisei a ni. (DIPR)

*ISIS TEN TUAI LEH HMEICHHE UIRE TIHLUM
Islam firfiak pawl ISIS te chuan kar hmasa Ningani leh Zirtawpni khan thlalak thehdarh in mipa tuai 2 tower atangin thiturin an nam thla a, hmeichhe pakhat uire chu lungin an deng hlum a, mipa 17 an mahni dodaltute kraws ah an khengbet bawk. ISIS te hian Islam sakhaw dan kalh a awm leh an pawl dodaltu te chungah hetiang hian ro an rel zel dawn niin an sawi.