22nd - 23rd January news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

23.1.2015
*MLPC ACT BAWHCHHIA TE COURT IN VANTLANG HNA THAWHTIR
MLPC Act hnuaia thiamloh chantir mi pali te chu CJM court, Kolasib thupek angin nimin khan vantlang hna thawkin Diakkawn Bazar leh a chhehvel phiahfai tir an ni a, Excise department atangin hnathawklai hi uluk takin an vil a ni. Hremna hi Thawhlehni atanga kalpui tan a ni a, a hma hian district court leh a chhehvel an lo thianfai tawh bawk.

Source: Zomuana Chhakchhuak via Kolasib District Special Report Group

*FAI HNATLANG RUNPUI JANUARY 30 HIAN MIZORAM PUMPUI AH NEIH NI DAWN
Vawiin chawhnu khan Pu Joseph Lalhimpuia, Parliamentary Secretary, Education,etc., chuan January 30 a neih tum, Mizoram pumpui huap ‘Fai hnatlang runpui’ huaihawt dan tur relin AMC, Education Department, CYMA, MZP, MSU leh Clean Mizoram Network hruaitute a kawm a. Meeting a rel dan chuan State pumpui huap, bawlhhlawh thenfai hnatlang bul tanna hi January 30, zing dar 7:30 ah Aizawl Electric Veng Sumo/Maxi Cabs Stand ah Chief Minister Pu Lal Thanhawla hova thawh tan a ni dawn a ni.

Pu Joseph Lalhimpuia, Parliamentary Secretary chuan Mizoram chu India ram pumpui a state fai ber nih tum in nikum November thla ah khan Clean Mizoram Movement din tawh in hma a la tan tawh a. Hemi thlawp zawng hian Education Department phei chuan notification pawh chhuah tawh in kan hma kara neih tum ,‘Fai Hnatlang Runpui’ pawh hi chumi hmalakna bul tanna pawimawh tak leh a hlawhtlinna kawng khat a nih tur thu a tarlang a. Clean Mizoram Movement chuan Zoram mipui zawng zawng te ‘Fai hnatlang’ hi tawiawm turin a ngen tak meuh meuh a ni a ti.

Fai Hnatlang Runpui hi meeting in a rel dan chuan Chief Minister hovin zing karah tan hmasak a ni phawt ang a, hemi hnu sikul tan hun zing dar 9:30 atangin Mizoram pumpui a khua leh veng tinah YMA te kaihruaina in sikul naupang leh tlawmngai apiang ten an thawk chhunzawm dawn a ni. Aizawl khawpui chhung bik ah remchan zawkna ngaihtuahin bawlhhlawh hnatlang fehchhuak in an chhek khawl te hi Aizawl Municipal Council(AMC) lirthei ten bawlhhlawh paihna hmunah an paih dawn a. Hemi ni vek hian Sawrkar hnuaia office zawng zawngte chu an hnathawhna hmun leh chhehvel thenfai a nih ve theih nan Meeting chuan Chief Secretary hnenah ngenna a thehlut a. Faina chungchanga mipui zirtirna hun pawh DDK ah January 27 zan dar 6:00-6:30 leh Zonet ah January 28 zan lam programme ah te buatsaih tura ruahman nghal a ni bawk a ni. Chhut lawk dan chuan January 30 a faina beihpui thlak ni hian mipui nuai 3 chuang zet chu an thawhchhuah ngei rin a ni a, Sikul naupang – Primary atanga Higher zirlai zawng zawng te pawh class kal lovin an hnatlang dawn a ni.

Clean Mizoram chungchang relna ah hian Pi M.Zohmingthangi, CEO, AMC, Pi Malsawmthangi, SCERT Director, Pu H.Lalengmawia, School Education Director, Sawrkar mi pawimawh te, NGO hruaitute leh Clean Mizoram Network hotute an tel a ni. (DIPR)

*KTP BIAL INKHAWMPUI ZANIN AH
Mizoram chhung leh ram pawn a Pastor bial hrang hrang ah zanin ațang in Presbyterian kohhran Kristian Țhalai Pawl (KȚP) Pastor bial inkhawmpui hman țan a ni dawn, Inrinni nileng rorel a ni ang a, Pathianni zan ah an țiak ang. In bial in khawnge conference in hman ve dawn le?

*UK IN SCOTLAND THUNEIHNA TAM ZAWK PE TAN
Nikum September thla a Scoland mipui ten United Kingdom atanga zalenna pumhlum neih an hnawl hnu in UK sorkar in a lo tiam tawh ang in Scoland Parliament hnenah thuneihna tam zawk an hlan tan mek a, income tax lak zat tur te, chhiah lakkhawm mipui vantlang tan a hman dan tur te leh Scotland parliament a mipui thlanchhuah roreltute hnathawh dan tur leh kalphung ah te thuneihna sang zawk te London atanga relsak tawh lo in an mahni a rel fel turin thuneihna pek anni tawh dawn a ni.

*1st INDO-BANGLA BORDER MEET MAMIT-AH NEIH A NI
Kum 2012 October 16-17 a India leh Bangladesh inlaichinna tha lehzual a awm theih na tura ram pahnih Home Secretary te Dhaka-a an inbiak na a ram pahnih ri tawn tu District Magistrate leh Superintendent of Police ten inbiakna nei se ti a thu an lo dah tawh bawhzuiin nimin khan Mamit D.C Conference Hall-ah 1st Indo-Bangla Border Meeting neih a ni. Inbiakna hi India (Mizoram sector) leh Bangladesh ramri hrula District Magistrate/District Commissioner te leh Superintendent of Police te bakah officials pawimawh dang ten an nei a ni.

Nimin Meeting-ah hian Indo-Bangladesh border fencing, border trade, ralthuam leh damdawi tawlhruk, dan lova ramri kan, ram pahnih insumdawn tawnna tur leh inlaichinna tha zawk a awm theih nana thil pawimawh hrang hrang te bakah inbiakpawh tawnna tha a awm theih nana hmalak dan tur te sawiho a ni a. Meeting neih leh hunah chuan Mizoram ri tu Bangladesh district pakhat Khakrasuri district koh tel ni se tiin an rel bawk.

Mizoram sector aiawh hian Mizoram district a Bangladesh ramri tu District pathum Mamit District, Lunglei District leh Lawngtlai District atangin Deputy Commissioner, Superintendent of Police leh Home Department atangin Addl Secretary leh OSD, Joint Director, Trade & Commerce Department, Joint Director (Survey) Land Revenue & Settlement Dept., Commandant, Sector Hqrs BSF, R.O, CADC leh S.I.B(aiawh) Lunglei te an tel a. Bangladesh atangin district pahnih - Bandarban Hill District leh Rangamati Hill District atangin District Magistrate te, Superindent of Police, Director, 53 Border Guard Battalion, Ruma, Bandarban Hill District, Additional District Magistrate, Bandarban Hill District, Director, 25 Border Guard Battalion, Additional Deputy Commissioner (Revenue), Rangamati Hill District, Assistant Director Department of Narcotics Control Bandarban Hill District, Assistant Surveyor Officer, DGLR te an tel a ni. Heng mi te bakah hian officials pawimawh dangte an tel bawk.

Zan lamah Bangladesh palai te lawmna chawhlui kilho niin Mizo ziarang phochhuahna hun Mamit Tourist Lodge-ah buatsaih zui a ni. Bangladesh palai te hi vawiin ah an haw leh nghal dawn a ni. (DIPR)

*REAL MADRID HAUSABER
Football club hausa thlang chhuak tu Deloitte football money league 2014 in a tarlan danin khawvel football club ah European Champion Real Madrid chu kum 10 chhung a club hausaber niin an chhut. Kum 2014 chhung a Club hausa an thlanchhuah 10 te chu:-
1. Real Madrid: $639m ($602.7m)
2. Manchester United: $602.3m ($492.3m)
3. Bayern Munich: $566.8m ($500.1m)
4. Barcelona: $563.5m ($560.5m)
5. Paris Saint Germain: $551.5m ($463.2m)
6. Manchester City: $481.9m ($367.2m)
7. Chelsea: $451.1m ($352.4m)
8. Arsenal: $417.9m ($330.2m)
9. Liverpool: $355.8m ($279.5m)
10. Juventus: $325m ($316.4m)

Bracket chhung a mi hi kum 2013 a an sum lakluh zat a ni.

*BREAKING NEWS
Saudi Arabia lal King Abdullah bin Abdulaziz al Saud chu a boral. Amah hi kum 90-a upa a ni. A unaupa Prince Salman chu a aiawh tur a puan a ni.

*HRIATTIRNA
Ni pawimawh – Independence Day leh Republic Day ang chi te lawmna hi mipui ten anmahni ta a ni tih hria a hlawhtlin lehzual nan, a bik takin Sawrkar hnathawk leh officials-te an tel a pawimawh a. General Administration Department chuan heng ni lawmna hi ngai pawimawh a, a lawmna ah te tel ngei thin tur leh kumin Republic Day Lawmna 2015 ah Sawrkar officer zawng zawng te tel ngei turin a hriattir. (DIPR)

*KUM 3 CHHUNGIN KHAWPUI HRANG HRANG AH FREE WIFI PE DAWN
India sorkar laipui hmalakna in Bharat Sanchar Nigam Ltd (BSNL) chuan kum 3 chhungin India ram khawpui 2,500 ah a thlawn in wifi speed chak chi a pe chhuak dawn. He hmalakna hi financial year thar 2015-16 atanga tan tur a ni a, sum pawh Rs.Vaibelchhe 7,000 ruahman a ni. Wifi hi a tirah a thlawn a ni ang a, a hnu leh zel ah chuan man tlawn te in tariff plan siam a ni dawn niin BSNL chairman and managing director Anupam Shrivastava chuan a sawi.

22.1.2015
*TUIALHTHEI MAN THAR
Mizoram hmun hrang hrang ah MS (Petrol), XP (extra premium) leh HSD (Diesel) man thar chu a hnuaia mi ang hian bithliah a ni a. Oil man thar hi 17.1.2015 zanlai atang khan hman tan nghal a ni.

Sl.No. - Khua - MS - XP - HSD
1. Aizawl - 57.75, 60.75, 47.65
2. Vairengte, Ngopa, Thenzawl, Serkhan, Saitual, Mamit - 57.48, 60.48, 47.50
3. Champhai - 57.96, 60.96, 47.77
4. Kolasib - 57.56, 60.56, 47.54
5. Lawngtlai - 57.66, 60.66, 47.60
6. Lunglei - 57.74, 60.74, 47.65
7. Serchhip - 57.76, 60.76, 47.66
8. Hnahthial - 57.67, 60.67, 47.61
9. Saiha - 57.77, 60.77, 47.67


*TELANGANA AH SWINE FLU DARH ZEL
Nimin tlai khan Telangana Chief Minister K.Chandrasekar Rao chuan thuthar lakhawmtu te hmaah tunhnai ah Telangana state chhung ah swine flu natna vanga boral mi 19 an awm tih a sawi. Swine flu vei mi 30 enkawl mek anni a ti. State sorkar in he natna darh zel loh nan theihtawp in hma a la mek a ni a ti.

*WINDOWS 10 FAVANG BORUAK AH
Microsoft chuan kumin favang chho ah Operating system thar Windows 10 chu tlangzarh hman an tum. Microsoft operating systems group hotupa Terry Myerson sawi danin Windows 10 hi kum khat chhung a thlawn in Windows 7, Windows 8.1 leh Windows Phone 8.1 hmangtute tan a thlawn in upgrade an phalsak dawn a ni.

*ASSAM AH MUSLIM AN PUNGCHAK BER
India ram a chhiarpui 2011 a neih a sakhaw hrang hrang awmzat tlangzarh tur ah rampumah Assam ah Muslim sakhaw zuitu an pung chak ber a. Rampum ah kum 2001-2011 chhung a an punna chu 24% a ni a, hei hi chhiarpui hmasa aiin a tlem a ni. Assam a an punna zat chu 34.2% a ni a, an pun tlemna ber chu Meghalaya, Odhisa leh Arunachal Pradesh te niin 1.0% in an pung a ni. Mizoram chhung bik ah chuan Muslim sakhaw zuitu 1.4% in an pung a, chhiarpui hmasa 2001 khan 1.1% in an pung a, chhiarpui neih inkar a an punna zat chu 0.3% a ni.

*NDIA A SAKHAW CHHIARPUI KIMCHANG TLANGZARH DAWN
India ram sorkar laipui chuan karleh lam ah kum 2011 chhiarpui neih atanga ramchhung a sakhaw hrang hrang betu awmzat leh an pun chak leh tlakhniam dan tarlanna (religion-based data of Census 2011) chu a tlangzarh dawn ni a sawi a ni. Dan tlangpuiin sakhaw betu awmzat tarlanna kimchang hi chhiarpui neih atanga kum 4 chhung a tlangzarh thin a ni a, sorkar hmasa UPA II khan inthlanpui an hnaih tawh avang khan an tlangzarh hman ta lo a ni.

20th - 21st January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

 

21.1.2015

MAMI VARTE IN UK AH PASAL NEI DAWN
Mizo zaithiam te special report na an tarlan angin Mami Varte chuan kumin March thla hian kum 2 chuang a lo kawp tawh Aizawl, Upper Kanaan (UK) tlangval Zoramchhana Sailo chu pasal atan nei dawn a ni. Palai te pawh an intir fel tawh ni a sawi a ni.

 

Mami Varte and her fiance Zoramchhana Sailo
(Mami Varte leh a bialpa Zoramchhana Sailo)

WEDDING BELL FOR MIZO CELEB STAR SINGER MAMI VARTE

Mizoram celeb vocalist Lalrinkimi Varte aka (Mami Varte), Kulikawn, Aizawl will tie a knot with her long fiance Mr.Zoramchhana Sailo,  Upper Kanaan, Aizawl on March, 2015.

20.1.2015

*DELHI CM CANDIDATE AH KIRAN BEDI
India rama hmeichhe IPS hmasaber Kiran Bedi chu Delhi Assembly inthlan ah BJP Chief Minister candidate a ni dawn. He thu hi BJP President Amit Shah chuan Delhi ah thuthar lakkhawmtu te hmaah a puang a ni. Amah hi Mizoram ah Deputy Inspector General of Police in a rawn awm tawh nghe nghe kha.

19th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

19.1.2015

*POLIO VACCINE PEK TAN A NI
Vawiin atang khan naupang kum 5 hnuai lam te hnenah zenghri danna polio vaccine pek tan a ni leh ta a. Hawnna inkhawm hi Aizawl Civil Hospital Auditorium-ah neih niin Health Minister Pu Lal Thanzara chu khuallian a ni.

Pu Lal Thanzara chuan India ram atanga zenghri umbo a lo ni ta chu thawktute thawhrimna leh inpekna rah a ni, tiin an chungah lawmthu a sawi a. India ram chu zenghri awm lohna ram ‘polio free’ ni tawh mahse khawvel hmun thenkhatah zenghri natna hi hmuh a la nih cheu avangin fimkhur taka a umbona hna hi kalpui a la tul a, he hri laka invenna vaccine chu nausen piang hlim atanga kum 5 chin te chuan an la ngei tur a ni, a ti. Minister chuan nu naupaite damdawi iron mum sem thin tlakchham chungchang sawiin a chinfel hna department in a thawk mek a. Kum dangah Iron mum hi a thlawnin sorkar laipui atanga dawn thin a nih laiin tun tum ah erawh dawn a nih tak loh avangin he harsatna hi a lo awm a ni, a ti.

Health Minister chuan thisen sawngbawlna senso phuhrukna atana sum lak tul ta chungchang pawh sawi fiahin sorkar laipui NACO (National AIDS Control Organisation) atanga thisen pekna hmanrua – blood bag, test kit leh mamawh dangte a thlawna dawn thin chu tihtawp niin heng hmanrua leina tur senso 25% chu state sorkar tum tura a phut bakah, tanpuina hrang hrang hmuh thinte tihhniam vak a ni a. Miin thisen a thlawnin pe mahse damlovin a hman theih tura thisen siam nan unit khatah Rs. 1,200 vel sen a ngai thin a, kum khat chhungin thisen sawngbawl man hi cheng nuai tam tak sen ral a ngai thin a. Thisen sawngbawlna senso phuhrukna tur pawisa lak a lo tul ta hi thisen man a ni lo tih hrethiam turin Health Minister chuan mipuite a ngen nghal bawk a ni.

Medical Superintendent Dr.Rosangluaia kaihhruai National Immunization Day for Polio, 2015 hawnna inkhawmah hian Principal Director Dr.K.Ropari leh Director Health & Medical Education Dr. Lalbiakkima te pawhin thu an sawi.

Zenghri umbo beihpui hi India ramah sorkar laipui hmalakna in kum 1995 khan tan a ni a. Rampum huapin he hmalakna hi chak taka kalpui niin Mizoramah chuan kum khatah vawi hnih neih thin a ni. Zenghri venna beihpui hi ramchhung hmun dang ah chuan January ni 18 khan neih tan a ni tawh a, Pathianni a nih avangin Mizoram ah chuan January ni 19 Thawhtanni hian neih tan a ni. Mahni awmna hnai ber sub-center ah leh IPPI Booth tin ah zenghri venna hi a thlawna lak theih a ni. Zenghri venna (Polio Vaccine) hi Mizoram pumah naupang 1,35,086 hnenah pek tum niin, hemi atan hian a lakna hmun tur IPPI Booth 1306 siam a ni. Kum kal ta January 2014 a beihpui thlak a nih khan an target za a za an tlin thei a ni.

Kum 1994 khan India ram pumah zenghri vei mi 35,000 report a ni a. Zenghri umbo beihpui thlak a nih atanga kum 16 a liam hnu kum 2011 ah chuan zenghri vei hi mipakhat chiah hmuh a ni ta a. Hemi hnu hian zenghri vei an awm tak loh avangin March 27, 2014 ah chuan World Health Organisation chuan India ram chu zenghri awmlohna ram ‘Polio Free’ ah a puang ta a ni. Chutihrual erawh chuan ram thenkhatah polio hrik hi hmuh a la nih avangin uluk takin vaccination hi kalpui a la tul a. Ram danga zinchhuak tur reng reng, nausen atanga pitar putar thlengin, an zinchhuah hma thla khatah tal vaccine hi an la ngei tur a ni a. Vaccine an la ngei a ni tih hriatpuina certificate an ken a tul tawh a ni. (DIPR)

*KAWNG SIAM THAT NGENIN PWD MINISTER HMU
Vawiin chawhnu khan Lunglei South Thalai Kawng Tha Duh Pawl aiawh te chuan PWD Minister Pu Lal Thanzara chu a pisaah hmu in A.O.C to Zobawk kawng chungchanga an harsatna tawhte chinfel pui turin an ngen.

Lunglei South Thalai Kawng Tha Duhpawl aiawh te hi an Chairman Ngurthansanga Sailo, Vice Chairman Jacob Vanlaltana leh Asst. Secretary Vanlalliana Pachuau te an ni a. National Highway No.54-A, A.O.C to Zobawk kawngpui siam that a nih theih nan vawi tam tak tlawmngai pawl te kaltlang pawha hma lak a nih tawh hnuah vawiin thlenga kawng siam that a la ni lo chu hriatthiam har an tih thu leh motor khalh thin te’n an tuar piah lamah mipui mimir hriselna thlengin kawng chhia hian a khawih pawi nia ngaiin PWD Minister hnenah a rang thei ang bera siam tha turin ngenna an thlen a ni.

Hemi chungchangah hian PWD Minister Pu Lal Thanzara leh amah tawiawmtu PWD Chief Engineer (Highways) Pu John Rammawia leh SE Pu Henry Lalmuankima te chuan he kawng siam that an ngaih pawimawh thu leh a siam tur contractor pawh thlan fel thuai an beisei thu an sawi a. Tum nga lai a thawk tur contractor zawnga tender an chhuah hnuah chhangtu an awm theih loh avanga harsatna an tawh dan te an hrilhfiah a ni.

PWD hotute tarlan danin Lunglei chhim lam kawng NH-54A, Lunglei (A.O.C Ramthar) atanga Hrangchalkawn kawngpui siam tha tur hian Ministry of Road Transport & Highways chuan March 31, 2014 khan cheng nuai 493.04 a sanction a. Tender hmasa ber chu 4.3.2014 ah tihchhuah niin online e-tendering chu technical problem a awm avangin cancel a ni a. 23.05.2014 ah tender chhuah nawn leh a ni a. National Highway a nih avangin sorkar laipui MoRTH kaihhruaina zawm a tul a. MoRTH phut angin single tender a chhuah lovin tender pahnih a then a ni a. Tender hi mi pakhat chauh chhangtu an awm avangin 30.09.2014 ah tender chhuah nawn leh a ni a, a vawi li na atan 30.10.2014 ah tender tihchhuah a ni leh a. Tender vawi li chhuah a nih hnuah pawh a thawk duh contractor an awm leh tak loh avangin a vawi nga na atan 8.12.2014 ah tender dang chhuah leh a ni a. Contractor pahnih in an chhang ta a, tunah hian tender document enfiah sak mek an ni a. Dan anga tih fel a nih veleh contractor thlan hian hna a thawh tan nghal PWD hotute chuan an beisei a ni. (DIPR)

*ISIS TEN TUAI LEH HMEICHHE UIRE TIHLUM
Islam firfiak pawl ISIS te chuan kar hmasa Ningani leh Zirtawpni khan thlalak thehdarh in mipa tuai 2 tower atangin thiturin an nam thla a, hmeichhe pakhat uire chu lungin an deng hlum a, mipa 17 an mahni dodaltute kraws ah an khengbet bawk. ISIS te hian Islam sakhaw dan kalh a awm leh an pawl dodaltu te chungah hetiang hian ro an rel zel dawn niin an sawi.

15th - 18th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

18.1.2015
*PATHIANNI ZING CHANCHINTHAR TAWI LAWRKHAWM
* Niminpiah khan Saitual, Keifang, Rulchawm leh Ruallung khua te tui tlan tur Greater Saitual Water Supply Scheme hna kallai chu Home Minister Pu R.Lalzirliana, bialtu MLA ni bawk leh PHE Minister Pu Zodintluanga ten an tlawh a. He project atana sum ruahman Rs. 21,53,20,000/- hi NLCPR atanga hmuh niin Excelsior Merchants Private (Ltd), Kolkata ten contract hi an thawk a ni. Tuilakna hmun, raw water pump house hi Tuivawl Luiah siam mek a ni. (DIPR)

*Zirtawpni zan zanlai atang khan India ram pum ah tuialhthei man tih hniam a ni a, Petrol 1 litre ah Rs.2.42 leh Diesel 1 litre ah Rs.2.25 a tihhniam a ni.

*India Republic day a khuallian tur US President Barack Obama rawn veng turin US sipai leh intelligence lam mi 1,600 vel an lo kal dawn.

*Nimin khan Delhi ah swine flu natna vei mi 10 hmuchhuah belh anni a, kumin chhungin he natna ve hi Delhi ah mi 108 an tling tawh a ni.

*Roman Catholic puithiam lu Pope Francis chuan kum kalta lama Philippines ram a telphawk thli tleh (Typhoon Haiyan)tuartu te awmna Tacloban a tlawh.

*Nimin khan India in amah a siam chhuah indo thlawhtheihna te chi ( Light Combat Aircraft) Tejas chu Indian Air Force te hman turin Bengaluru ah Union defence minister Manohar Parrikar an IAF hotute hnenah a hlan fel ta.

*Punjab state sorkar chuan an state chhung ah 'Messenger of God' tih film chu buaina chhuah hlauhthawn vangin chhuah an khap.

*EPL- Chelsea in 5-0 in Swansea an hneh.

*Ziaktu lar Louise Hay-i chuan nileng a rilru zangkhai taka awm i duh chuan zing i thawh veleh darthlalang ah inen la, nui var var chung in nangma hming sawi la "Ka hmangaih che" ti thin rawh a ti. Mahni intihhlim luih hram hram a, mahni taksa ngei 'ka hmangaih che' han in tih hian rilru lam thleng in kan vei leh inthiam lohna nasa tak atangin min ti zangkhai thei thin a ni a ti.


*LUNGLEI AH FM RADIO CHANNEL HAWN BELH DAWN
Nimin khan Union Minister of State of Development of North Eastern Region Dr. Jitendra Singh chuan India hmarchhak leh Jammu and Kashmir ah te FM radio channel hawn belh a nih tur thu a sawi. Heng zingah hian Lunglei, Mizoram pawh a tel ve a ni. Hmarchhak bial a FM channel thum hawn belh na tur khua te chu - Lunglei bakah Haflong leh Dhubri (Assam), Jowai (Meghalaya), Mokukchung (Nagaland) leh Belonia (Tripura) te anni.

*HIGH COURT IN ENGATINGE INDIA MI TE TAN NILO A US PRESIDENT TAN CHAUH? TIH A ZAWT
US President Barack Obama India Republic Day hmanpui tur a rawn kal dawn vangin sorkar in Delhi khawpui ah CCTV 15,000 dah thar a ni a, hemi chungchang ah hian Delhi High Court chuan Zirtawpni liamta khan sorkar laipui leh Delhi state police te hnenah "Ramdang President a lo kal 

16.1.2015
*Nimin khan Horticulture Minister Pu P.C. Lalthanliana, Parliamentary Secretary Pu K. Lalrinthanga leh Parliamentary Secretary leh bialtu MLA ni bawk Pu Hmingdailova Khiangte te chuan Hortoki khua tlawhin Tlawng kam nul-a Hortoki khua chhungkaw 200 dawn ten thlai huan an siam te chu a hmuna kalin an hmalakna te an enpui a. He programme-ah hian Pu P.C. Lalthanliana chuan kuthnathawktute leh thlai chingtute hi Sawrkar chuan a thu nilovin a takin a ngaituaha, an hmakhua te chu engtik lai pawha Sawrkarin a ngaihpawimawh a ni, a ti a. Kuthnathawktute hmalakna a hmun ngeia kal a, enpui an duh avangin ama hova Parliamentary Secretary pahnih ten nen Hortoki khua ah thlai chingtu te hmalakna leh hlawhtlinna a thu an hriat thin chu mit ngeia hmuh a duh avangin a hmuna enpui a, Sawrkar angin enge tih thei awm te, enchian leh hrethiam tura lo an nih thu a sawi a. “Hausak tumin thawk lovang ang u, hlawtling turin thawk zawk ang u” tiin he hunah thlai chingtu kalkhawmte chu a chah a. Thlai an la chin ngai loh ang chi tomato, broccoli leh adangte pawh Kolasib Horticulture Division hmalaknain Hortoki ah bultan tum a nih thusawiin tih takzeta kuthnathawktu ten an thawh zel chuan Sawrkarin a theih ang angin a pui zel dawn a ni, a ti.

Thlai chingtu leh kuthnathawktu ten an mahni thawhrimna phu tawk anga an thawh rah an seng a pawimawh thusawiin chu chu hre reng chunga kharchhawngtu ten anmahni an duhsak a tul a ni, a ti a. Thil sem te hi mimal anga tih sen anih loh vangin intawma thil hman te hi Farmer’s Interest Group, Community Water Tank angtea kaltlangpui anih hian mi tam zawkin a hlawkna an tel thei nia a hriat thu a sawi bawk.

Nimin vek khan Horticulture Minister Pu P.C. Lalthanliana chuan Hortoki khua a thlai chingtu ten tangkai taka an hman atana RKVY hnuaia Pack House leh Godown sak thar te leh Tlawngkam Damdiai Thlangta Zau a Community Water Tank pahnih leh Tlawngkam Zau a Individual Water Tank siam te chu a hawng nghal bawk a ni. Thlai thar dah khawmna tur kudam hi feet 36 a sei leh feet 15 a zau a ni a; a chhung ah hian Motor lian phur 10 zeta tam dah khawm theih beisei a ni. Thlai thar dah thatna tur Pack House feet 16 a sei leh feet 10 a zau siam a ni a; a chhungah thlai chhe hma zual bik dahna tur Cold Room pawh siam nghal a ni bawk. Tui dah khawlna tur hmun Community Water Tank 2 siam ah hian tui litres 98125 ve ve leng thei tura siam a ni a. Hei bakah hian hmun dangah Individual Water Tank siam ah hian tui litre 25800 a dah thei a ni.

Farmer’s Interest Group panga ah hian mi 20 zela in thenin a vain mi 100 an awm a, Group tin account ah hian sumfai cheng 1,71,500 theuh dahsak an ni a. He sum hmang hian kum danga pawisa neih loh vanga an tih theih loh pawh an tih theih phah beisei a ni a. Thlai thar an hralh hunah an hnawh khat leh zel dawn a ni.

Hortoki khua ah hian in 600 vel a awm a, za zelah chhungkaw 80 vel chu huan neia thei leh thlai chinga eizawng tute an ni a. Chhungkaw 200 vel hian Tlawng kam nul ah hian huan siamin thlai chi hrang hrang an ching a, an thlai tharchhuah te hi kharchhawngtute an hmuna kalin an leisak thin a. Mai-te, mai, bean leh antam leh thlai dang an tharchhuah te hi Aizawl leh a chhehvel chhawmtu ber a ni, heng bakah hian vaimin leh kawlbahra te pawh an hralhchhuak nasa bawk. Thlai an chinna ah hian hlo leh fertiliser eng chi mah an hman loh avangin an tharchhuah hi tunlai khawvel in a ngaihsan ber ‘organic product’ a ni nghe nghe a ni.

Tlawng kam nul ah te hian thal lai October thla tawp lam atangin thlai an ching tan thin a, February thla tawp thlengin thlai an ching thei a, fur ah chuan heng ram te hi tui in a chim avangin huan a siam theih lo a ni. Thla 4 lek thlawhhma an nei chhung pawh hian chhungkaw tam takin an thawhrimna rah an seng a. Tin 3 hmuna thlai chi hrang hrang chingtu Pu Challianngura chuan ‘Thla 4 chhungin hah takin kan nupa in kan thawk a, thlai nuai 3 man vel kan lei thei a, kharchhawngtu hnenah pe lovin Aizawl lamah mahni in hralh thei ila chuan kan hah man tha zawk kan hmu thei ang’ a ti.

Nikum khan bean chi quintal 10 leh mai chi quintal 1 chu Horticulture Department chuan Hortoki khua a mi an leisak. Nikum khan Hortoki khua hian thlai nuai 80 atanga nuai 100 man hu an hralhchhuak a. Hortiki khua hi Seed Village atan Sawrkarin a lo puang tawh bawk a ni.

Tunhnai khan Horticulture Department hnuaia Horticulture Division Office  Kolasib chuan chak takin hma an la mek a. Hortoki khua ah hian Farmer’s Interest Group te an dinpuia, thlai chi, pipe leh tui pump khawl te semin thlai tui pekna turte an ruahman a, thlai chi hrang hrang chinna tur Unit 54 RKVY hnuaia an kalpui mek a. Tui pump khawl an sem leh thlai tui pekna tur Horticulture Department in an ruahman hian kum danga thlai an chin theih lohna hmuna te pawh thlai an ching thei tura beisei a ni a, hei hian an tharchhuah pawh a tih tam ngei beisei a ni bawk. (DIPR)

**UNION HEALTH MINISTER LO ZIN DAWN
Ministry of Health and Family Welfare enkawltu Union Minister Pu J.P. Nadda lo zin tur chungchang ngaihtuahin nimin khan Chief Secretary Pu Lalmalsawma,IAS hovin Chief Secretary Conference Hall-ah meeting pawimawh neih a ni a, thil tul leh a kaihhnawih chi hrang hrang chipchhiar takin thlir ho a ni.

Union Minister hian ni khat chamin January ni 30 hian Mizoram a rawn tlawh dawn a. Imphal atangin Helicopter- a Aizawl rawn lutin Regional Institute of Paramedical and Nursing Sciences (RIPANS) a tlawh ang a. RIPANS Board of Governors (BOG) meeting a kaihhruai hnuah building thar sakna tur lungphum a phum nghal ang a. Hemi ni vek hian Aizawl a chhuahsan leh ang. (DIPR)

*MI FIRFIAK NIA RINHLELH 2 KAPHLUM
Nimin Ningani khan Begium police ten an ram khawchhak lama Verviers khawpui ah mi firfiak nia rinhlelh mi pahnih an kaphlum. An mi kahhlum te hi man tum a an hual laiin an mahniin police te an rawn kaphmasa a ni. An inkahna hmun hi train station bul lawk a ni.
 

15.1.2015
*A hmaa kan rawn post tawh angin Kiran Bedi, IPS(Retd.)chuan vawiin tlai khan BJP a zawm ta. Delhi Assembly inthlan ah a in candidate dawn a ni.

*MLPC ACT HMANG A RECORD SIAM
Vawiin atanga hman tan MLPC Act 2014 tlawhchhanin vawiin khan Chief Judicial Magistrate, Vanlalena chuan Lalremliana s/o Laltluanga, Lunglei Venghlun chu thla khat chhung Jail tang turin a hrem. Lalremliana hi vawiin ațanga hman țan tak MLPC Act hnuaia district Jail tang hmasa ber niin hriat a ni. A zurui in thenawm khawveng te tan a hnawksak khawp a bengchhen a siam avanga man a ni.

Source: Kiddy Vanchhawng

*DELHI POLITICS THUTHANG
India rama hmeichhe IPS hmasaber, Mizoram ah pawh rawn awm tawh Kiran Bedi chuan BJP a zawm dawn niin an sawi. BJP a zawm dawn anih chuan Delhi assembly inthlan lo awm turah AAP hruaitu Arvind Kejriwal a khing dawn ni a sawi a ni.

*VAWIIN ATANGIN MLPC ACT HMANG TAN DAWN
Mizoram sorkar chuan vawiin atangin zukhap burna dan MLTP Act thlakna tur Mizoram Liqour (Prohibition and Control) Act 2014 chu a hmang tan dawn ta. MLPC Act hman tan ni dawn mahse a dan kaihhnawih thenkhat peih kim loh ala awm avangin zu zawrh a la ni dawn lo a ni. Zu lei theihna licence dilna form chu district tinah semchhuah tawh a ni.

*DELHI AH CHRISTIAN BIAK IN SUASAM
Nimin zing dar 4:18 khan Delhi a Vikaspuri veng a Our Lady of Graces biak in chu misual pahnih in sawisa in biak in bang darthlalang leh Mari lim an ti tlu a ni. CCTV a alan dan chuan misual pakhat zawk hi scooter a lo kalin biak in ah hian tawngtai tur ni awm takin a lut a, hmanhmawh takin biak in bang darthlalang chu a susam a, a tlanchhe nghal a, reilote ah a thianpa nen lo kir leh in Mari lim an rawn suasam leh a ni. Hemi.hnu hian scooter in an tlanchhe leh ta a ni. Police ten case an ziaklut tawh a pawikhawihtute hi an zawng mek a ni. He thil thleng hi chawlhkar ruk chhung a misual in Delhi khawpui a Kristian biak in an suasam vawi 4-na a ni.

*Thawhlehni zana Aizawl Tuikhuahtlang a pawngsual rawn athleng anga whatsapp lama thudiklo thehdarh tan tu chu police ten an chhui mek.

*GERMANY PALAIIN MIZORAM CM HMU
Zan hnih riaka Mizoram rawn tlawh, Pu Rainer Schmeidchen, Consul General, Federal Republic of Germany, Kolkata chuan nimin tlai dar 6:30 pm khan Chief Minister Pu Lal Thanhawla chu a chenna bungalowah a hmu. Chief Minister leh Consul General te hi inkawmna hun tha tak an hmang a, duhsakna thilhlan in pe ve vein Schmeidchen hian Mizo thalai ten football an tuipui hle a ni tih a hriat thu lantir nan Chief Minister hi Football German Flag lanna pe a, Mizoram sorkar in an thleng zo anih chuan German football trainer tha tak a pek theih tur thu a hrilh a ni.

Consul General Rainer Schmeidchen hi niminah Aizawl lo thlengin,MHIP hruaitute nen inkawmin Hotel Regencyah zanriah an kilho a. Nimin khan Bishop of Aizawl te, Mizoram Football Association hruaitute, Higher & Technical Education Director te, Chief Secretary leh Principal Secretary, PWD te alo hmu bawk a ni.

Consul General hi kum 2012 khan Mizoram a rawn tlawh tawh a, tun tumah hian a nupui Dr.Annette Schmeidchen in rawn tawiawmin, vawiinah Kolkataah an kir leh ang. (DIPR)

*SRI LANKA SORKAR IN POPE IN A TLAWH PUALIN MITANG CHHUAH
Sri Lanka sorkar chuan an ram Pope Francis an a tlawh denchhen in mitang case lian neilo 572 te an chhuah. Pope Francis hian nimin khan Sri Lanka a kum zabi 17-na a missionary thawk thin Joseph Vaz chu mithianghlim ah a puang a ni. Joseph Vaz hi Goa lam chhuak niin Sri Lanka ah hian a thihthleng in Pathian rawng bawl in a awm a ni.