6th December 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

6.12.2014

*MIZORAM SYNOD IN PRO PASTOR A LAK THAR TE
Remlalpuia Renthlei B.A; B.D
S/o. Zirliana, Bukpui

Lalhlimpuia, M.A; M.Th
S/o. Thanmawia, Tlungvel Dawrkawn

C.Lalrosiama B.A; B.D
S/o. Chalhlira, Samthang Vengsang

Samuel Vanlalmuanpuia Renthlei, B.A; B.D
S/o. Upa. R. Lallianzuala, Champhai Vengthlang North

C. Thangromawia, BCA; B.D
S/o. C. Thuankunga, Hnahlan Vengthlang

Lalrinchhana B.A; B.D
S/o. Upa Laluapa, Haulawng

Isaac Lallawmkima, B.A; B.D
S/o. V.Lalthanga, Sihphir

H.Zoliansanga B.A; B.D; M.Th.
S/o. Upa HL Thasawta, Thuampui, Aizawl

Jimmy Lalsiammawia Fanai B.A; B.D
S/o. F. Lalrinawma, Khatla

PC Vanlalfinga B.D
S/o. PC Vanlalhruaia, Ramthar veng, Aizawl

Peter Lalhmumawia M.A; B.D
S/o. Lalchhunga, Kepran

Jessie Zosangliana,B.A; B.D
S/o. J. Laldawngliana, Govt. Complex, Aizawl

Albert Lalchhanhima,B.A; B.D
S/o. Malsawmtluanga, Thiak

Andrew L.R Khiangte B.A; B.D
S/o. K. Ronghaka, Khatla East

Lalhunthara B.Sc; B.D
S/o/ Lalchhanhima Chhangte, Seling

C. Lalramchena Chhangte, B.A; B.D
S/o. Upa C. Lalhmunliana, Serchhip

Vanlalngeiha B.Sc; B.D
S/o. PC Lalthantluanga, Mission veng

C.Lalrinliana B.A; B.D
S/o/ Upa. C.Lalrintluanga, Damveng, Aizawl

Lalrinsanga B.Com; B.D
S/o. Upa. RV Lalnunzira, Ruallung

Alfred Lalruatfela, B.Th; B.D; M.Th
Biate

T.Sachin Kumar Singha B.D
S/o.T. Nanda Babu Singha, Chandpur, Cachar

Lalngaihawma B.A; B.D
S/o. Upa Laltukhupa, Dolchora

James C.Lalremruata B.Th
S/o. C.Lallianmawia, Thuampui, Aizawl

Stanley Goala, M.A; B.D
S/o. Upa Ranjit Goala, Karimganj

Kennya Ngomdir B.A;B.D
S/o. Token Ngomdir, Beye, Aalo

Philip Hanse B.D
S/o. Longki Hanse, Chelso, Karbi Anglong

*UNIVERSITY OF HYDERABAD ADMISSION 2015-16
University of Hyderabad (UoH) online admission application 2015-2016 session atan hawn a ni leh dawn ta. December ni 8 atang hian university website ah ngaihven theih ani ang. Last date of application 9.1.2015
Admission Form pek chhuah hi Central University dang aiin a hma zawk thin avangin ngaihven hma deuh a ngai ang.
Kan unaute leh thiante lut duh an awm chuan inbengvarsak theih nise a lawmawm viau ang.
Official Website : http://www.uohyd.ac.in/
  

*US DEFENCE SECRETARY THAR TUR THLANG
US President Barack Obama chuan a defence secretary thar atan Ashton Carter a thlang fel ta. Ashton carter hi defence secretary atan an ram rorel khawl senate in an pawmpui a la ngai a ni. Barack Obama President a nih hnuna Defence secretary 4-na tur a ni.

4th-5th December 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

 

5.12.2014

*ZIKPUIIN KHIANG AWI TA
LPS vision Chibai Mizoram puang thintu Zikpuii (Chuauzikpuii), Chanmari West leh Lalfakawma, Zotlang Aizawl te vawiin chhun dar 12 khan Zotlang Presbyterian kohhran biak in ah an innei.

Mizo celeb TV Presenter Zikpuii (Chuauzikpuii) weds Lalfakawma, Zotlang, Aizawl

Mizo celeb TV Presenter Zikpuii (Chuauzikpuii) tie a knot with Lalfakawma, Zotlang, Aizawl

 

*MI 277-IN SKILL DEVELOPMENT TRAINING CHHUAK
Mizoram Youth Commission (MYC) leh Sub-Headquarter YMA, Mamit tangkawp buatsaih Skill Development Traning chu nimin khan MYC Chairman Pu T. Sangkunga’n a khar.

Kharna inkhawm Chhim Veng Hall, Mamit a neihah Pu T. Sangkunga chuan training buatsaih ngaihlua inziaklut an tam chu lawmawm a tih thu sawiin, taima tak leh tha taka training chhuak thei mi 277 lai an awm chu lawmawm a tih thu a sawi. Ram changkang apiangah thiamna bik nei mi an tam thu sawiin, ram leh hnam humhalhna tha ber chu intodelhna leh thiamna chhawrtlak neih a ni a ti a, hnam dang chhawr ngailo turin mizo thalai te’n thiamna bik kan neih a tul thu a sawi a. Training chhuakte chu an thiamna te eizawnna tlaka hmang tangkai tur a chahin, a ti pung zawnga kal zel turin a fuih a ni.

Mamit district-a Skill Development Training neih hi 10th November, 2014 khan tan niin nimin 4thDecember, 2014 hian khar a ni a. Trade paruk : tailoring, electric wiring, mobile repairing, cement mistiri, beauty culture leh two wheeler repairing-ah te training hi pek a ni a. Training tur hian mi 300 chuang inziaklutin mi 277 in an training chhuak a, training chhuakte hi certificate hlan nghal an ni. (DIPR)

 

4.12.2014

*AIZAWL AH BOMB PUAK
Zan in dar 10:30 pm vel khan Aizawl Dinthar-II , Dinthar Salvation Army CO Quarters veranda a bawlhlawh bawmah bomb tih puah a ni, a puah chhan leh a tih chhiat hriat a la ni lo.

Bomb exploded in Salvation Army Commanding Officer Quarters, Dinthar, Aizawl, Mizoram.

 

*CHIEF MINISTER-IN ZOFEST 2014 HAFLONG-AH HMANPUI
Mizo Zirlai Pawl (MZP)in Haflong Moulhoi-a ZOFEST 2014 a buatsaih chu vawiin khan Chief Minister Pu Lal Thanhawla chuan a hmanpui.

Chief Minister chuan Zofate insuihkhawma rorelna khat hnuaia kan awm hi Pathianin engtik hunah emaw chuan min la pek ngei ka beisei tlat a ni a ti a. Zohnahthlakte hi British awpna tuar nasa ber hnam kan ni tiin, Myanmar-ah te, Bangladesh-ah te leh India ah pawh State hrang hrangah min dah darh a, rorelna khat hnuaia awm ni ila hnam zahawm leh hnam ropui kan ni thei a ni a ti a. Zohnahthlak tawng tam tak zingah Duhlian tawng, Mizo tawng kan tih bawk chauh chu a thiam anih avanga hmang a nih thu sawiin, tawng thiamlo te pawhin an hriatthiam tho ringin, thiamlo an awm anih chuan ngaihdam a dil nghal a. Zohnahthlakte insuihkhawm theihna tura MZP in theihtawp an chhuah lai leh North Cachar Hills Autonomous District Council hruaitu te leh District Administration pawh ina an phurpui em em laia harsatna siama, tharum hial thawh hreh lova invauna nena hmalatu te hi insuihkhawm duhlo tu an ni a, an demawm hle a ni tiin, hnamdang zingah min timualpho hle a ni a ti. Ching tawhlo tura a duhthu a sawi bawk.

Chief Minister chuan Insuihkhawm hi hnamdang tena min zaha min hlauh theihna tur a ni a ti a. Pathianin A chanchintha hril tura Chanchintha hmanga min zawn chhuah kan ni tiin, chanchintha kan hril chhung chu chimralin kan awm lovang a ti a. Insuihkhawm hi Pa hun tiam a thlen hma chu a hlawhtling lovang tiin, Hun tiam a thlen hunah tharum tel lovin rorelna khat hnuaiah kan awm ka ring tlat a ni a ti. Chuvangin tute pawh hian kan unaute hi rilru zau tak pu chunga kan kaihkuah thiam a angai a ni a ti. ZOFEST 2014 hi harsatna leh vauna hnuaia MZP ten huaisen taka hma an lakna chu a chhuanawm hle a ni a ti.

Chief Minister hian Souvenir a tlangzarh nghal bawk a ni.

ZOFEST 2014 hi vawi 6 MZP in an buatsaihna a ni a. Kum 2002 ah Churachanpur-ah, 2004 leh 2006 ah Aizawl ah, 2009 ah Tripura-ah te neih tawh a ni. Vawiina hun hmanah hian hnam incheina hrang hrang Manipur atangin Gangte,Tidim Chin, Chiru, Zo (Zou) leh Simte te, Mizoram atangin Lai, Paihte, Lusei, Pang leh Mara te, Tripura atangin Darlong, Molsom, Chorai te, Bangladesh atangin Bawm, Arunachal Pradesh atangin Shinpho (Kachin) leh Assam (Haflong) atangin Biate, Vaiphei leh Myanmar atangin Chin Halka ten an entir a ni.

Inkhawmah hian chawimawina mi pariatte hnenah hlan a ni a. Pu Lal Thanhawla, Pu L.Keivom IFS (Rtd), Pu Malsawma Colney leh midang panga te an ni.

Inkhawm khualzahawm chu Pu Debojeet Thaosen, Chief Executive Member, NCHAC a ni a, Inkhawm hi Pu Lalsangzuala Ngente, Vice President, MZP GHQ in a kaihruai a ni.

Chief Minister hi NCHADC member ten ropui takin an lo hmuak a, a kal chhung hian traffic zawng zawng an khuahkhirh vek a. Rajiv Bhawanah ropui takin chawimawina an hlan bawk a ni. (DIPR)

1st-3rd December 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

3.11.2014

*Union Finance Minister Arun Jaitley chuan state tin ten an mahni in sum an thawk chhuak tur a ni a, tunhma lama sorkar laipuiin an in enkawlna tur sum a pek thin ang chu zawi zawi a tih tlem tum a ni a ti.

 

*RUALBANLO TE NI, INTERNATIONAL DAY OF PERSONS WITH DISABILITIES AIZAWL HMAN A NI
Vawiin khan Zarkawt Recreation Centre-ah rualbanlote ni, International Day of Persons with Disabilities chu Social Welfare Department leh rualbanlote tana thawk pawl hrang hrang tangkawpte’n an buatsaih a, he hun hi Health Minister Pu Lal Thanzara leh Parliamentary Secretary Pu K. Lalrinthanga ten an hmanpui a ni.

Pu Lal Thanzara chuan Sawrkarin rualbanlote hi a bika chhawmdawlna an mamawhin an phu hle a ni tih hriain Commissioner of Persons With Disabilities Office hmalakna kaltlangin rualbanlote nunphung tih hmasawn hi a tum mek a ni, a ti. Pianphunga rualbanlote hian zirna leh hnathawhna lamah te, hriselna leh eizawnna kawngah te harsatna tam tak neiin an tawk thin a, mahse enkawlna, kaihhruainna leh zirtirna tha an dawn chuan midang aia hnufualna an nei lova, mi pangngai thil tih theih tam tak an ti thei a ni, a ti.

Health Minister chuan Sawrkar hian kan hmalam hun leh kum lo kal zel turah hian ruabanlote tan intluktlanna turin midangte ang bawka kan nitin nun, zirna in, hnathawhna hmun, khawtlang leh infiamna lama tel tir te, rah tha chhuah khawpa rualbanlote tana thawktu pawlte thawhpui te leh kawng hrang hranga rualbanlote hmasawnna tura pawl te hmalakna tlawp te hi a ngaihtuahin a ti zel dawn a ni, a ti.

He hun hmanpuitu dang Parliamentary Secretary Pu K Lalrinthanga chuan rualbanlohna hi pianphung avang emaw, thawhsual tawh avang emaw a awm a ni tiin an ni duat leh hmangaih taka enkawl hi Pathian duh dan pawh a nih thu a sawi a. He Ni ah hian mitin in rualbanlote hmasawnna leh chawmdawlna atan enge kan tih theih ve tih hi ngaituahna neiin a taka an tana thawk tura rilru siam theuh turin mipuite a chah a ni.

He programme hi Pi B Sairengpuii, State Commissioner for Persons with Disabilities chuan a kaihruai a, Pu Sagar Parasri, Peace Researcher-cum-Founder World Wide Peace Organization chuan fuihna thuchah sawiin Pu Alendra Tripathi, Officer-in-charge, North East Regional Centre – National Institute for the Orthopedically Handicapped pawhin thu a sawi bawk a ni.

He programme ah hian Aizawl a vohbik sikul hrang hrang – Special Blind School Durtlang, Moriah Blind School leh Gilead Special School-a naupangten zai leh lam te entirin hun hlimawm tak an hmang a ni.

Kum 2011 Chhiarpuia chhinchhiah dan chuan Mizoramah rualbanlo 15160 an awm a. Sawrkarin an mahni chawmdawl nan kawng hrang hrangin hma a la a, kum 2013- 2014 chhung khan Rualbanlo pension (State Scheme) mi 200 hnenah pek a ni a, National Social Assistance Programme hnuaiah mi 613 pension pek a ni a, rualbanlo mi 142 eizawnna ngaihtuah sak an ni a, rualbanlo lekhkhathiam 25 hnenah stipend pek an ni a, rualbanlo zirlai 788 hnenah stipend pek a ni bawk a. Rualbanlote tan training centre pahnih (2) Aizawl leh Lunglei-ah te din niin kum khat chhung puanthui zirna buatsaih a ni. ADIP (Assistance of Disabled Persons) hmanrua leh bungraw leina tur pek an ni bawk.

Sawrkar Department hrang hrang – Health, Education Department-te leh NIOH Regional Centre te nena thawhhona atangin rualbanlote dapchhuah beihpui District hrang hrangah thlak niin ID card te siam sak ni.(DIPR)

 

*LUNGLEI S.P. THAR PU ZOSANGLIANA, MPS
Mizoram Sawrkar Order angin Pu Zosangliana, MPS chuan Superintendent of Police, Lunglei District, Lunglei hna chu nimin ni 2.12.2014 (Thawhlehni) khan a zawm fel ta a. Amah hi senior Police Officer niin Police hna pawimawh hrang hrang lo chelh tawh a ni.

A service chhunga a hna chelh tawh hrang hrangte chu a hnuaia tarlan ang hi a ni :

1. Entry into service : 11.3.1996 as Mizoram Police Service

2. Dy. SP CID (Crime), SDPO Tlabung, Asst. Commandant 3rd MAP, Dy. SP (Legal Cell) PHQ

3. Deputy Commandant 3rd MAP, Addl. Superintendent of Police CID (SB), Addl. Superintendent of Police CID (Crime)

4. Commandant 3rd IR Bn., Superintendent of Police, Lawngtlai.

5. Other experience : Deputation to UN Mission in Sudan as UN Civilian Police during 2006-2007. (DIPR)

 

*LAMTLUANG ZINGKAR CHANCHINTHAR LAWRKHAWM
* DDK, Aizawl Regional News Unit (RNU) chuan vawiin tlai dar 4-5 pm hian Zoram Thupui Programme ah Mizoram Liquor Prohibition and Control (MLPC) Act chungchang sawihona Live in a tichhuak dawn. He hunah hian Excise Minister Lalzirliana bakah CYMA leh Kohhran lam aiawhten an tel dawn a ni.

*Tunkar Ningani ah New Delhi Railway station a athlawn a internet hman theihna tur wifi service chu Union Railway minister Suresh Prabhu an a hawng dawn. India ram railway station a wifi internet awmna hmasaber chu Bangalore city railway station ah a ni a, kumin October thla khan hawn a ni.

* Israel Prime Minister Benjamin Netanyahu chuan a sorkar a minister 2 - finance minister Yair Lapid leh justice minister Tzipi Livni te a ban. Israel PM hian a theih anga hma an ram parliament thiah a, nakum March thla a inthlanpui neih hmachhawn a duh thu a sawi.

*US deputy defence secretary hlui Ashton Carter chu US President Barack Obama in Defence secretary thar atan a ruat dawn ni a sawi a ni. Kar hmasa khan defence secretary nilai Chuck Hagel chuan banna a thehlut a ni.

*Samsung chuan Tizen operating
system hmang smartphone Z1 chu December ni 10 ah India ramah tlangzarh an tum.

*Thawhtanni zing a East Delhi a Roman Catholic biak in St. Sebastian Church a kangmei chhuak chhuichiang turin Delhi police te chuan Special Investigation Team an ruat.

*India football captain hlui Baichung Bhutia chu niminpiah khan Manila khawpui ah Asian Football Confederation (AFC) Hall of Fame Award pek a ni. He award hi FIFA President Sepp Blatter an a hlan a ni.

 

*CBI DIRECTOR RUAT THAR
IPS 1979 batch (Bihar cadre) Anil Kumar Sinha chu CBI Director thar atan ruat a ni. Amah hi CBI special director tanglai a ni a, tunhma lam in Chief Vigilance Commission hnuaiah Additional secretary a lo ni tawh thin bawk. Nimin khan CBI Director nilai Ranjit Sinha chuan a hun hmang zo in sorkar hna atangin a chawl a, Anil Kumar Sinha hian a thlak dawn ta a ni. CBI director thar ruatna hi zanin zanlai khan PM in a pawmpui a ni.

 

2.11.2014

*STATE LEVEL CHILDREN SCIENCE CONGRESS 2014
Vawiin khan ni 2 awh tur State Level Children Science Congress chu I &PR Auditorium ah Pu B. Lalchhuanliana, Addl. Director, Directorate of School Education chuan a hawng.

Kumin hi a vawi 22-na niin a tan tirh kum 1993 atangin Science Congress hi STAM buaipui na hnuaiah la neih ziah a ni. Kumin hian Project 31 State Level ah intihsiak nan hman tur a ni a, School 13 an tel thei a ni. Distric 3 - Aizawl, Champhai leh Lunglei atangin School naupang (Child Scientist) ten he hunah hian an Project hmangin intihsiakna an nei a ni.

Naktuk ni 3 December 2014 ah result puan a ni anga, National Level Science Congress 2014 a tel tur Project 8 leh Indian Science Congress a Mizoram aiawh tur mi 2 te thlan an ni ang. Kumin hian National Children Science Congress hi Bangalore ah ni 27-31st December 2014 chhungin neih tur a ni a, Indian Science Congress hi 3rd-7th January chhungin Mumbai ah neih tur a ni. (DIPR)

 

*QUARRY HNATHAWK MI 36 THAT
Somalia Islamic firfiak pawl Al-Shabaab te chuan nizan zanlai pelh hnu lawk khan Kenya ramri hnaih Mandera khua ah lunglakna (quarry) a hnathawk mi 36 an that. An mi thah te hi Muslim nilo te anni.

 

*INDIA IN BOMB MITNEI ENCHHIN
Vawiin khan Wheeler Island, Odisha atangin India sipai te hman tur ralthuam siam thin tu Defence Research and Development Organisation (DRDO) te chuan bomb mitnei (missile) nuclear ralthuam keng tel thei Agni-IV hlawhtling takin a enchhin. Agni-IV hian 4,000 km a kap thei a, a rih zawng chu 17 tonne a rit a ni, a san zawng chu 20 metre a ni.

*LAMTLUANG ZINGKAR CHANCHINTHAR LAWRKHAWM
*Inrinni liamta 29.11.2014 khan Mizo gospel singer PBK Liankhuma leh Nancy Lalzuitluangi te Agartala Presbyterian Biak In ah an innei. (nupa tuak thar te thlalak kan rawn tarlang tel e)

* Nimin kha World AIDS Day a ni a; Mizorama HIV hrik pai hmuh chhuah ṭan hun, October 1990 aṭanga October 2014 thleng khan HIV hrik pai mi 9,637 hmuh chhuah tawh niin, AIDS vangin mi 587 an thi tawh. (Vanglaini)

*Nimin khan Chhattisgarh a Sukma district ah Maoist hel ten CRPF sipai 14 an kaphlum. Thi zingah hian officer 2 an tel.

*Nimin khan PM Narendra Modi chuan Nagaland ah Hornbill festival a hawng. Naga hruaitute chu an thalai ten English an thiam avangin IT lam thiamna chaw lut turin a fuih.

*Nimin zing khan East Delhi, Dilshad Garden a Roman Catholic biak in St.
Sebastian's Church a kang a, biak in chhung bungrua leh hmun pawimawh te a kang chhe nasa hle. He kangmei chhuah chhan hi misual tih a ni em tih police ten an chhui mek.

*Nimin khan Nigeria hmarlam khawpui pakhat Maiduguri bazar ah Islamic firfiak pawl a mi ten thichilh bomb an tihpuah avangin mi 7 in nunna an chan.

*BJP kaihhruai Maharashtra state sorkar chu Shiv Sena ten hnenah cabinet minister 6 leh minister of state 4 pek an tiam avangin Shiv sena party hian thlawp an remti dawn ta a, naktuk ah minister thar te hi lakluh anni ang.

*Eirawngbawlna gas sorkar in a man tlawm zawk a hman tur a tih nilo (non-subsidised cooking gas -LPG) man Rs.113 a tih tlawm a ni a, aman thar tur chu bur khat zel ah Rs.752 a ni tawh ang. Hetiang gas hi Mizoram ah kan hmang ve meuh lo a ni.

*Vawiin ah Jharkhand leh Jammu and Kashmir ah te assembly inthlan thawh hnihna neih a ni dawn.

*Mizoram a thingtlang lo neitu tam zawk ten buh an seng zo thawkhat tawh a ni.

*Tripura chief minister Manik Sarkar chuan India PM Narendra Modi chu an state cabinet hma ah thusawi turin a sawm niin media thenkhat ten an tarlang a,mahse hei hi thu belh chian dawllo niin Tripura sorkar bruaitu ten an sawi. Manik Sarkar hi tun dinhmun ah India ram a communist party (CPIM) CM awm chhun a ni a, BJP kaihhruai PM thusawi tur a asawm hi mitam tak mak tih a tling a ni. Nimin khan PM hian Tripura a tlawh a state cabinet te hma ah thu a sawi lo a, chuvangin media thenkhat te thu tarlan chu a dik lo a ni tih finfiah a ni.

*Krisman thlen nan vawiin atanga chhiar in ni 22 chiah a ngai ta. Tukchhuah nuam vek ule.

 

 

1.12.2014 

*Vawiin hi World AIDS day a ni a, AIDS natna lakah inveng fimkhur theuh ang u. AIDS vei te endawng mai lovin an tan a tanpuitu kan nih theih na ah tanpui zel ang u.

 

*TUIALHTHEI MAN TI TLAWM
Zanin zanlai atang khan India ram pumah Petrol man 1 litre ah Paise 7 in tih tlawm a ni a, Diesel man pawh 1 Litre ah paise 84 in tih tlawm a ni bawk.

 

*INDIAN NAVY-AH SAILOR HNA DIL THEIH
Indian Navy-ah Sailor hna a dil theih a. Diltu chu mipa, zirna lamah 10+2 Pass (Maths leh Physics) passed a ni tur a ni a. 01 Aug 1992 leh 31 July 1998 inkara piangte tan he hna hi a dil theih. Dilna hi online-in www.nausena-bhartia.nic.in ah December 21, 2014 thleng a thehluh thei a ni. Hrechiang duh tan Directorate of Sainak Welfare & Resettlement, Aizawl ah zawhfiah thei a ni.

27th-30th November 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

30.11.2014
*POPE IN ISTANBUL TLAWH
Nimin khan Pope Francis chuan Turkey khawpui Istanbul tlawh in Muslim biak in lar tak Sultan Ahmet mosque ah Muslim sakhaw puithiam hotulu Rahmi Yaran nen tawngtaina an hmang dun a ni. Pope Francis hian nimin tlai khan Turkey ram a Orthodox kohhran hotulu Patriarch Bartholomew I a hmu a, Roman Catholic leh Orthodox Christian te inkar a inpumkhatna awm dan tur te an sawi dun a ni. Kum 1054 khan khatih lai a Kristian te khan Pope thuneihna chungchang ah an inhmuh thiamloh avangin Roman Catholic leh Orthodox Christian ah an inthen ta a ni.

Tin, Turkey ram khawpui Istanbul hi tunhma chuan Constantinople tih a ni thin a, Kristian hmun pawimawh tak a ni thin a ni. Kum 1453 ah khan Constantinople khawpui chu Muslim sipai ten hnehin an thuhnuai ah a tlulut ta a ni. Istanbul khawpui hi hun hmasa lama Kristian sakhaw hmun pawimawh anih thin avangin Pope John Paul II leh Pope Benedict XVI te pawh khan an tlawh tawh a ni.
 

*PM IN BAIRABI-SAIRANG REL KAWNG SIAMNA TUR LUNG PHUM
Nimin khan India Prime Minister Narendra Modi chuan Maligaon Railway stadium, Guwahati, Assam ah Mizoram chhung a Bairabi-Sairang rel kawng siamna tur lung phumna a nei. PM hian Mendipathar, Meghalaya leh Guwahaty inkar a tlan tur rel a vailiam bawk a ni. Bairabi-Sairang rel kawng siamna tur lungphum neihna ah hian Mizoram CM Lal Thanhawla leh Mizoram governor hna hmui mek tu Meghalaya governor nibawk Dr.KK Paul te pawh an tel a ni.

Lamtluang thulakna in a tarlan danin Bairabi-Sairang rel kawng hi 51.38 km a thui tur a ni a, kum 2008-09 khan hemi project atan hian bul tan a ni a, a senso tur atan Rs.Vaibelchhe 2399 ruahman a ni. Kum 2013 March thla thleng khan Rs.Vaibelchhe 44.39 hman a ni tawh a, hemi bakah hian nikum chhung khan Rs.Vaibelchhe 77.10 pek chhuah leh a ni. Zangnadawmna leh ram hman tur chungchang ah te harsatna lian tham tak a awm avangin a hna thawh tur 4% chauh thawh ala ni. He project hi a zawh hun tur pawh ruahman hleih theih a la ni lo a ni.

Prime Minister Narendra Modi inaugurated Bairabi-Sairang railway line in Guwahati

 

29.11.2014
*Vanglaini Mizo Award 2014 chu Sangthankima, Thutak Nunpuitu Team (TNT) hnenah vawiinah hlan a ni.
 
*CHAPPATI 2 MAN DIL BELH VANGIN KAPHLUM
Tunkar Nilaini zan dar 10 vel khan Uttar Pradesh a Meerut khua a Libra hotel a thawk (waiter) Ratan Singh (29) chuan an hotel a chaw ei, mi pariat te chu chappati pahnih ei belh man pe turin a hrilh a, anni ho chuan a man an pe tawh tiin an lo hnial a, an inhnial buai avangin hotel waiter hi an kaphlum ta a ni. Heng mite hi zu a rui ni a sawi anni a, he thil thlen lai hi hotel a chawl thenkhat ten video a an lo lak avangin police ten pawikhawihtute zing a 3 te chu tutenge annih an hrethei tawh a, an mahni man tumin an zawng mek a ni. Ratan Singh ruang hi nilaini zan khan post mortem nghal niin a chhung ten an ram Uttarakhand ah vui turin an haw pui a ni.
 
*INDIA MI ISIS FIRFIAK PAWL ZAWM MAN A NI
Nimin zing khan National Investigation Agency te chuan Mumbai airport ah India mi ISIS firfiak pawl zawm a nia hriat Arif Majid, Kalyan, Maharashtra a mi chu an man. Arif Majisd hi thu zawh fiah turin NIA custody New Delhi ah thawn a ni.
 
*NIGERIA AH BOMB PUAK
Nimin Zirtawpni khan Nigeria ram hmarlam a khawpui pakhat Kano ah Muslim biak inlar tak Kano Mosque ah bomb vawi 3 a puak a, mi 64 an thi a, midang 126 in hliam an tuar. Nunna chan zat hi an pung zel niin an sawi. He mosque a an sakhaw puithiam Emir in tunhnai lawk khan Islam firfiak pawl Boko Haram te lakah an mi leh sa te chu inveng turin thupek a lo chhuah tawh a ni.
 

*SMARTPHONE THAR LUMIA 535
Microsoft chuan nimin atang khan smartphone chhuak thar Lumia 535 chu India ram ah an zuar chhuak tan ta. Aman Rs. 9,199 a ni a, operating system ah Windows Phone 8.1 a hmang a ni. Dual SIM hman theih a siam a ni. A hma lamah selfie lak theihna tur leh skype atan a hman turin camera 5 megapixel a awm a, a hnung lamah camera 5 megapixel tho a awm bawk. RAM 1 Gb niin, processor ah 1.2GHz Qualcomm Snapdragon 200 quad-core a hmang a, video 848x480p resolution in a lak theih a ni. Internal memory 8Gb niin microsd 128 Gb thleng a hman theih bawk. A LCD hlai zawng chu inches 5 niin IPS lcd display a hmang a ni. Lumia 535 smartphone hi Microsoft in Nokia company an lei hnu a, Nokia brand tello a Lumia series an siamchhuah hmasak ber a ni.

28.11.2014
*SC IN SANSKRIT NGAIPAWIMAWH TURIN TI
Supreme Court of India chuan Sorkar laipui hnenah Kendriya Vidyalayas pawl 8 zirlai te tan Sanskrit subject chu third language nilo in additional language a dah zawk turin a hriattir. German subject chu third language a dah zawk turin a ti bawk.
 
*KUMIN CHRISTMAS LEH KUMTHAR VUAK VET AH NO VEHICLE ZONE SIAM LEH DAWN

Vawiin chawhnu khan Co-ordination Committee on Traffic Management member-te chu Home Minister Pu R.Lalzirliana Office ah an thu khawm a. Traffic Management chuan Co-ordination committee chuan Christmas leh Kumthar vuak vet chhunga Aizawl khawpui hmun thenkhat laia lirthei kal dan thlak danglam relin kum 3 chhung lo hman thin ‘No Vehicle Zone’ pawh ni bik ruat ah te siam leh tura thutlukna a siam a ni.

Co-ordination Committee on Traffic Management chu mipui ke a kalte an lo him zawk nana hma latu anih thu he hun kaihruaitu leh Chairman nihna chelhtu Home Minister Pu R.Lalzirliana chuan a sawi a. Krismas leh Kumthar vuakvet chhungte hlim tlang taka hman a nih theih nan mipui himna tura ruahmanna traffic coordination committee hian a duan a ngaih thu leh mipuite pawhin he ruahmanna hi an thlawp theuhva a rin thu a sawi a ni.

Meeting ah hian Vice Chairman nihna chelhtu Parliamentary Secretary Lt.Col(Rtd) Z.S.Zuala leh sawrkar mi pawimawh te bakah Chanchinbu mite an tel a. Dt 16.9.2013 leh dt.29.5.2014 a Committee neih tak te a thutlukna hrang hrangte bawhzui a nih dan te thlir leh in hmalak chhunzawm dan tur te rel a ni a. Kum in Krismas leh Kumthar vuak veta Aizawl khawpui chhunga veivakte him zawk nana Aizawl Traffic Superintendant Office in ruahmanna thar a siam te leh thuchhuah tur a duan pawh meeting ah hian Aizawl Traffic S.P. Pu Lallianmawia’n a sawi zau hnuah pawm tlan a ni a. Notification hi kim chang zawkin Aizawl Traffic S.P. Office in an la rawn chhuah dawn a ni. Kum 3 chhung lo hman tawh thin, No Vehicle Zone pawh sawiho a nihhnu in, tha tih tlan a ni a. December 23,24 leh 31 ah te Chanmari kawn leh Zodin Square inkarah te lirhthei engchi mah kal awih loha ni leh dawn a ni. Aizawl khawpui chhunga kawngpui ti chep zawnga thilzuar leh mihring kalna(pavement) a thil zuar te chu an thil tih ti tawp tura hriattir an ni a, Dawrkai-te pawh Chrismas leh Kumthar vuakvet chhunga an dawr te kawng nek zawnga rawn zauh loh tura hriattir an ni bawk a ni. (DIPR)
*CHIEF MINISTER-IN V.L.ZAIKIMA ZIAK LEHKHABU TLANGZARH
Chief Minister Pu Lal Thanhawla chuan vawiin khan Tuikhuahtlang a Central YMA Hall ah Pu V.L.Zaikima lehkhabu saptawnga ziah ‘Tlira’s Teachings and Other Indigenous Faith in Mizoram’ tih leh lehkhabu dang 13 Mizo tawnga a ziah te a tlangzarh.

Chief Minister Pu Lal Thanhawla chuan saptawnga ziah lehkhabu tlangzarh tura sawm a ni chu lawmthu a sawi a.Lahkhabu ziah hi mi taima, hriatna zau nei leh teirei peihte tan lo chuan mi nazawng tih theih a nilo a ti a. Lehkhabu chhiar tam erawh kan zira kan tum a tha tiin, a pa in lehkhabu chhiar tam tura a zirtir thin angin a chhiar hnem ve hle a ni a ti a. Pu V.L.Zaikima lehkhabu ziahahte pawh a mikhual lo hle a ni a ti a. Copy Rights nei thlapa a chhuah chu tih awm reng a ni tih sawiin, kan puan nalh tak tak kan tahte pawh hi ‘patent’ vek a tul hle a ni a ti a. Chutilo chu hun lokal zelah hnam dang ten min chhuhsak mai ang tih a hlauhawm a ni a ti.

Chief Minister chuan Mizo tawng mawi leh hausa tak hi tunlaiin kan hmang duhdah hle a a hriat thu sawiin, thangthar leh kohhranah te thleng kan hmang dik tawklo a ni a ti a. Television anchor-te pawhin thangtharte entawn an ni tih inhria a, uluk takin hmang thin se tih a duhthu a sawi a. Kan tawng hi a mawina leh a hausakna ti zual zel thei turin tan lak a ngai hle a ni a ti. Lehkhabu a tlangzarh tak te chu Mizo literature ti hmasawn zualtu a ni tiin, lawmthu a sawi bawk a ni.

Lehkhabu tlangzarh tak saptawnga ziak hi ‘International Standard Book Number’, ISBN chuang a ni a. Lehkhabu dang ziah thenkhat hi Mizorama Book of the Year top 3 leh top 10-a lang phakte a awm bawk a ni.

Tlangzarh inkhawm hi Dr.Rualkhuma Colney in a kaihruai a ni.(DIPR)
 
 

*RIPANS GRADUATION AND LAMP LIGHTING CEREMONY 2014
Regional Institute of Paramedical and Nursing Sciences, Aizawl te chuan vawiin khan Graduation and Lamp lighting Ceremony an hmang a. Dr. K.Ropari, Principal Director, Health & Family Welfare, Government of Mizoram chu khuallian niin a hmanpui a.

Dr. K. Ropari chuan RIPANS chu health care atana kut leh ke pawimawh tak tak chherchhuahna kawngah an tih that thu a sawi a. Graduate thar te an hnathawh hunah rinawm tak, fimkhur tak leh thahnemngai tak a thawk tur a fuihna leh duhsakna a hlan bawk.

B.Sc. Nursing First year te Lamp Lighting Ceremony hi Pi Mary Ramtei Pachuau, Nursing Superintendent, Civil Hospital Aizawl, kaihhruaina hnuaiah thu tiam chhamna nen neih a ni a. Zirlai tharte tan fuihna thuchah a sawi. RIPANS Director, Dr . Chawngthanliana’n an hmalak tawhna te leh hmalak zel dan tur chungchang thu a sawi. North East State hrang hrang atangin Graduate thar te leh B.Sc. Nursing first year nu leh pa ten an hmanpui bawk.

Kum 2014 hian BSc Nursing, B.Sc. MLT leh B.Pharm atangin zirlai 74 graduate chhuak an awm a, Distinction ah mi 5, First Division ah mi 65 leh Second Division ah mi 4 an awm a ni. Zirlai ti tha zual te hnenah chawimawina thilpek hlan an ni bawk.

RIPANS ah hian tun dinhmun ah Course hrang hrang B.Sc Nursing, B.Sc Medical Laboratory Technology, B.Pharmacy, B.Sc Radio Imaging Technology leh B.Sc Optometry & Ophthalmic Techniques te awmin India hmarchhak state hrang hrang atangin zirlaite tan seat hauhsa (quota) neiin zirlai 581 an awm mek a ni.

Kum 2014 Academic Session atangin M. Pharm zirna hawn thar ani a, zirlai 10 in he post graduate degree zir tur hian an zawm. (DIPR)

 

27.11.2014

*MIZO HISTORY ASSOCIATION SESSION NEI
Mizo History Association ten XXXIV Annual session chu vawiin ah Pachhunga University College, Aizawl-ah an hmang.

Thupui atan British awpna in Mizoram a nghawng dan tih neiin zirchianna neih a ni a. He hunah hian Pachhunga Univerisity College chuan Mizo History Association lo dintu te Prof. JV Hluna, Prof. Sangkima leh Prof. Darchhawna te chawimawina hlan nghal a ni. He hun a khuallian Dr. Tawnenga, Principal PUC chuan Mizo te nun a tlawmngaihna chu tun hun a kan hnathawh nan a hmang nghal turin a chah a. Mizo te hian history ropui tak kan nei a, chumi tarlang chhuaktu te chu historiante an ni in Mizo hnamah an pawimawhna a sawi lang bawk. Dr. Tawnenga hian Mizo History Journal chu a tlangzarh nghal bawk a ni. He in tawhkhawmna hian ni hnih chhung a awh ang a, paper 20 vel chhiarchhuah a ni ang. College hrang hranga college zirtirtu te leh historian te an intawk khawm a ni. Naktuk ah a ni hnihna chu chhunzawm leh a ni ang.

 

Mizo History Association held annual session in Pachhunga University College, Aizawl

*PRIME MINISTER-IN BAIRABI - SAIRANG REL KAWNG TUR LUNGPHUM PHUM DAWN
Prime Minister Pu Narendra Modi chuan inrinni lo awm tur ni 29 Nov 2014 tlai dar 5:30 pm khian Guwahati Maligaon Railway Stadium ah Bairabi - Sairang rel kawng (Broad Guage) siam tur lungphum a phum dawn. He hunah hian Chief Minister Pu Lal Thanhawla chu Distinguished Guest a ni ang. Prime Minister hian Meghalaya State chhung Mendipathar atanga Guwahati thleng passenger phur rel service hmasa ber a vailiam dawn bawk a ni. (DIPR)