18th June 2014 news in Mizo

 Latest news collection in Mizo language
MIZO TAWNG A CHANCHINTHAR LAWRKHAWM

19.6.2014

*MISS MIZORAM 2014 BIKINI ROUND
Pix: Te-a Boitlung
#missmizoram #missmizoram2014

Miss Mizoram 2014 Bikini round

Miss Mizoram 2014 Bikini round

 

*MIZORAM EXCISE & NARCOTICS DEPARTMENT IN RUIHHLO DONA KAWNGAH MIPUITE TANPUI NGEN
Mizoram Excise & Narcotics Department chuan ngenna an siam.

Mizoram Excise & Narcotics Department (END) chuan ruihhlo dona kawngah Mizoram mipuite tanpuina a ngen.

India sawrkar chuan India ram chhunga ruihhlo (drugs) khapna leh khuahkhirhna atana Dan a hman ber chu “The Narcotics Drugs & Psychotropic Substances Act, 1985 “ (NDPS Act) a ni a. Mizoram sawrkar chuan he Dan kengkawhtu bik atan Excise & Narcotics Department chu 22nd June 1992 khan Nodal Department atan a puang a. Police Department nen thawhhona tha tak neiin ruihhlo dona kawngah he Dan hi hman mek a ni. Hemi bakah hian khawtlang leh tlawmngai pawlte (NGO’s) te nena thawhhona tha tak avangin Mizoram chhunga ruihhlo khuahkhirna kawngah chak taka hmalak mek zel a ni.

Mizoram-a damdawi kan hman leh hman sual langsar tak chu Spasmo Proxyvon, Parvon Spas, Heroin (No.4), Ganja, Nitrazepam, Alprazolam, Cough Syrup chi hrang hrang, etc te an ni ber a. Tunah hian heng damdawi aia mihring tikhawlo nasa thei zawk, Methamphetamine lo chhuak hi kan hmachhawn dawn mek a ni. He damdawi hi ngaihthah chi a ni lova, chhungtin lo inveng lawk tur leh khawtlang leh tlawmngai pawlte pawhin mutmawh hnarmawhah kan neih a tul ta niin a lang. Hetiang thil thalo a awm phawt chuan Excise & Narcotics Department ah emaw Police Department-ah emaw a rang thei ang bera hriattir thin turin Excise & Narcotics Department chuan Mizoram mipuite a ngen a ni.

He damdawi hlauhawm tak, siamna hmanraw pawimawh tak mai, Ephedrine Quintal 2 leh 84 Kgs, Myanmar leh Shillong lam mite rawn phurh luh chu 22 September, 1999 khan END chuan a lo man tawh. Tin, Ephedrine 44.5 Kgs chu Myanmar lam mi 4 hnen atangin 22.1.2001 khan man a ni tawh a. Anni hi Special Court (NDPS) chuan 9.9.2004 khan a lo convict tawh nghe nghe a ni.

Hemi atang hian Methamphetamine siamna turin Pseudo-Ephedrine (damdawi kheh) chu phai lam atanga lokalin khawchhak lamah thawn chhoh a ni a. Heng Pseudo-Ephedrine te hi a remchan ang angin Mizoram Excise & Narcotics Department leh Mizoram Police Department te chuan an man ta zel a ni.

Pseudo-Ephedrine hi Mizoram Excise & Narcotics Department chuan 2011 atang khan an man tan a. Aizawl, Champhai leh Kolasib District-ah te man an ni ber. Tun thlengin Excise & Narcotics Department chuan Pseudo-Ephedrine tablet 598,69,632 (Nuai Za nga Sawmkua pariat, Sing ruk Sang kua leh Za ruk Sawmthum Pahnih) an man tawh a. Damdawi hlut zawng hi Local Market-ah Rs. 44,90,22,240.00 (Cheng Vaibelchhe Sawmli pali, Nuai Sawmkua, Sing hnih Sang hnih Za hnih Sawmli) a ni. Pseudo-ephedrine case 38 ziah luh tawh a ni a, mihring kaihhnawih hi mi 69 man an ni tawh. Heng zinga 15 chu Myanmar lam mi an ni a, 15 dang chu Mizoram State pawn mi (non-mizo) an ni.

Mizoram Excise & Narcotics Department-in Methamphetamine an man hmasak ber chu kum 13 kal ta, 20 December, 2001 khan a ni a, tablet 670 an man a ni. October, 2002-ah tablet 971 man a ni leh a, hemi hnu hi chuan tun hnai 2011 atang khan an man leh tan ta a ni. Methamphetamine case 6 ziahluh tawh a ni a, a kaihhnawihah hian mi 9 man an ni tawh. Chung zinga mi 8 chu Myanmar lam mi an ni a, 1 chu Mizoram mi a ni.

Hetiang taka kan ram min runtu Ruihhlo leh kaihhnawih dona kawngah Mizoram Excise & Narctotics Department chuan mipui thawhpuina a beisei tlat a. Hetianga ruihhlo tawlh hria an awm chuan heng a hnuaia tarlanah te hian a rang lama Information pe thin turin a beisei a ni :- Aizawl - (0389)2323147 ; Lunglei - (0372) 2322028 ; Saiha (03835)222076 : Champhai - (03831) 234883 ; Kolasib -(03837)220632 ; Serchhip - (03838) 226006 ; Mamit - (0389)2565705 ; Vairengte - (03837) 262369
(DIPR)

 

*AIR INDIA CABIN CREW 47 BAN ANNI
Air India chuan thlawhna hnathawk (cabin crew) mi 47 te chu thla 3 chhung hna ah an kal tawh loh avangin an ban a, midang 20 pawh hna an zawm loh chuan ban tur annih thu an hriattir. Air India hian cabin crew 3500 an nei mek a ni. Cabin Crew tih Mizo ten a' tia kan hriatlar thin te hi anni.

 

*REANG (BRU) RALTLAN TEN MIZORAM RAWN PAN
Tripura Transit Camp-a Reang (Bru) awm te chuan Mizoram an rawn luh belh zel a.

Tarlan tawh angin Kanhmun leh Zomuantlang ah lo hmuah an ni a. Vawiin tlai dar 4 thleng a lo let zat leh dinhmun enfiah tawh te chu hetiang hi an ni.

Zomuantlang Facilitation Centre ah chhungkaw 5 lo thleng tawhin, an vaiin mi 33 puitling 11 leh naupang 22 an ni a, an vai hian Naisingpara camp atanga lo chhuak vek a ni. Heng chhungkua te hi Mizoram a an awmna tur khua Zomuantlang-ah (chhungkaw 1), Tuipuibari-ah (chhungkua 2), Thaidawr-ah (chhungkaw 2).

Kanhmun Facilitation Centre ah chhungkaw 10 mi 53 puitling 38 naupang 15 Hamsapara atangin (chhungkaw 6) , Naisingpara atangin(chhungkaw 4), Zawlnuam-ah (chhungkaw 7) leh Kananthar-ah (chhungkaw 2), Tumpang lui-ah (chhungkaw 1) te an ni.

Nimin a Reang (Bru) Mizoram a lo lut zawng zawng zat chu chhungkaw 30 an ni a. Vawiin ah chhungkaw 15 enfel tawh an ni a, a dang la enfel tur an awm nual bawk. Centre-ah hian Doctor in an hriselna dinhmun te endik sak vek an ni a, an eitur buhfai kg 20 theuh pek an ni bawk. (DIPR)

 

*Tun Inrinni lo awm tur, June ni 21, chawhnu dar 1:05-dar 2:00 inkar Telephone a zawhna leh chhanna AIR Aizawl Live Phone In Programme ah chuan “Health Care Scheme leh RSBY Hospital-a hman dan chungchang” a hriat duh neite tan a zawh theih dawn a. Mipui zawhna chu Dr. Lalthanpara, Officer on Special Duty leh Zirsangliana, Claimed Supervisor, Mizoram Health Care Society, Dinthar, Aizawl ami ten an rawn chhang ang a. A zawt duh tan Telephone No. 0389/2322515 ah emaw 2323148 ah emaw a biak pawh theih ang.

 

*Dido Angel Khiangte > CHANCHINTHAR(Zofate tan)
Chhingchhip ah nizan dar 8:45 vel khan pa in afapa hreipuiin achek hlum..hming thup rih a ni...afapa hi asual em2 a,azu ruiin chhungkua ah buai na nasa tak asiam avangin apa thin rim chuan ahnung lam atrangin atukhum ah hreipui hian achek ta ani (apa hi dem ngawt suh U)

 

*YMA THINGKANGPHAI BRANCH (MANIPUR) IN KUM 60 TLIN LAWM
Manipura Mizo khaw lianberte zinga mi Thingkangphai khua chuan nimin khan YMA Branch dinchampha Kum 60 (1954-2014) na ruai nen ropui takin an lawm. Programme hi zing dar 11:00 AM ah YMA Hall tan ani a , Jubilee dar vawi 60 vuak a ni. Khuallian ah Manipur Group YMA(GYMA) President Pu Mangcha Thangjom a ni. Manipur GYMA puipate pawhin an rawn hmawn pui ani. He hunah hian Hruaitu hluite chawimawi an ni a. Khawchhung zaithiam Nl. Lalramnghaki leh Tv. Rotluangpuia ten zai in mipuite an awi a, Hnam lam - Cheraw, Kuallam, Chawnglaizawn te entir a ni bawk.

He hun hmang tur hian Thingkangphai khawchhuak zawng zawngte sawm an ni a, Mizoram atang pawhin mi engemawzat in an han hman pui a ni. Diamond Jubilee Denchhen a siam Souvenir magazine “Kang Tek” tih chu khuallian in a tlangzarh nghal bawk a ni. Vengchhung mipuiten Diamond Jubilee ruai hi Bawng pakhat leh Vawk pahnih talhin ropui takin an theh a ni. YMA Thingkangphai Branch a hian member 350 vel an awm mek a ni. Thingkangphai hi Zoram Khawvel a mikhual lo tak Pu. HT Sangliana (Rtd IPS), Pu. HV Lalringa (Rtd IAS) leh Captain LZ Sailoa ten an thatlai hun an lo hmanna khua a ni.
Source: Joel Lungtau
Pix: Thingkangphai Y.M.A Diamond Jubilee 2014 page

YMA Diamond Jubilee, Thingkangphai, Manipur

YMA Diamond Jubilee, Thingkangphai, Manipur

*IRAQ AH INDIA MI 40 KIDNAP ANNI
Iraq tualchhung buaina kal zel ah firfiak pawl ISIS ten an awp mek Mosul khawpui a India mi insakna hmuna hnathawk a awm mek mi 40 te chu rukbo anni. Firfiak pawl ten an awp mek khawpui dang Tikrit ah pawh India mi nurse hnathawk a awm mi 46 an awm mek a, anni ho zing a atam zawk hian an sahim nan India a haw an duh a, an zinga mi 14 te erawh chuan haw tul lemlo in an hri ani. India sorkar hian Iraq ah hian ambassador hlui Suresh Reddy chu India mite buaina chingfel turin a tir luh tawh a ni.

 

*US IN IRAQ AH SIPAI THAWN BELH
Iraq ram a Islamic State in Iraq and the Levant (ISIS) firfiak pawl ten hmarlam khawpui lian te an lak zel avangin US sorkar chuan Baghdad khawpui a an embassy venghim turin sipai 275 an thawn luh belh a ni. US hian indo lawnglian USS George HW Bush leh indo lawnglian dang 2 pawh Gulf tuifianriat ah an chhawp hnai tawh a ni.

*2012 A US EMBASSY BEITU MAN
Kum 2012 September thla a Libya ram khawpui pakhat Benghazi a US Ambassador Christ Stevens leh midang te thattu ni a puh Ahmed Abu Khattala chu June ni 15 man a ni. Pentagon press secretary Rear Adm John Kirby chuan he pa an man na tur a US sipai ten Libya ram a operation an neih ah hian civil mi tumah nunna chan leh hliam tuar an awm lo niin a sawi.

*REANG (BRU) LO LET TAN
Ruahman lawk angin vawiin khan Tripura Transit Camp-a Reang (Bru) awmte chuan Mizoram an lo pan tan ta.

Reang (Bru) te hi Kanhmun leh Zomuantlang ah lo hmuah an ni a. Vawiin tlai dar 4:00 thlenga lo let zat leh dinhmun chu hetiang hi a ni:

Kanhmun Facilitation Centre-ah chhungkaw 20 lo thleng tawhin, an vaiin mi 86; puitling 56 leh naupang 30 an ni a. Asapara camp atangin chhungkaw 4, Naisingpara camp atangin chhungkaw 12, Kaskai camp atangin chhungkaw 1 leh Hamsapara camp atangin chhungkaw 3 te an ni. Heng chhungkua te hi Mizorama an awmna tur khua Saikhawthlir-ah (chhungkaw 1), Sihthiang-ah (chhungkaw 3), Kanhmun-ah (chhungkaw 1), Bawngva-ah (chhungkaw 13), Zamuang-ah (chhungkaw 1) leh Khanthuam-ah (chhungkaw 1) te hruai an ni ang.

Zomuantlang Facilitation Centre-ah chhungkaw 4 lo thleng tawhin, an vaiin mi 23; puitling 20 leh naupang 1 an ni a, an vai hian Naisingpara camp atanga lo chhuak vek an ni. Heng chhungkua te hi Mizorama an awmna tur khua Tuirum-ah (chhungkaw 2) leh Damparengpui-ah (chhungkaw 2) te hruai an ni ang. Facilitation Centre-ah hian Reang (Bru) te hi Tripura Transit Camp a mi an ni ngei leh ngei loh enfiah an nih bakah, 1995 Mizoram Electoral Roil-a awm emaw a awmte thlah te an ni em tih leh an dinhmun te lo enfiah a ni a. Centre-ah hian Doctor in an hriselna dinhmun te endik sak vek an ni a, an eitur buhfai kg 20 theuh pek an ni bawk. An dinhmun endik a nih hnuah Mizoram a an awmna tur khua a ruahmanah hruai an ni ang. Mizorama an awmna tur khua hi Tripura Transit Camp-a an awm hma a an awmna Assembly Constituency huam chhungah siamrem a ni.

Tlawmngai Pawl ten Reang (Bru) lo let te hi Facilitation Centre-ah an lo hmuak ve a ni.

Reang (Bru) zinga lo let duh thenkhat te hi Camp atanga an chhuak tur lo dan chah an nih avangin vawiina Mizorama lo let te hi beisei angin an tam lo a ni. SDM, Kanchanpur in Camp-ah thil thlen dan a zuk enfiah nghal a ni. (DIPR)

17th June 2014 news in Mizo

 Latest news collection in Mizo language
MIZO TAWNG A CHANCHINTHAR LAWRKHAWM

17.6.2014 

*UTTAR PRADESH  GOVERNOR BL JOHSI AN BANNA THEHLUT
Tukin a kan rawn post tawh ang khan tunhnai lawk khan Union Home Secretay Anil Goswami  chuan State 7 a Governor te bia in bang mai turin thu a rawn a nih kha. A biak zing a mi Uttar Pradesh Governor BL Johsi chuan vawiin khan a banna a thehlut a ni. Sorkar na chelhtu an inthlak a a ni lo pawh hi Governor bang tur a sawi neuh neuh an awm nual bawk.

Amah hi IPS thin niin Lt.Governor Delhi (2004-2007), Meghalaya Governor (2007), Uttarakhand Governor (2007-200) a lo ni tawh thin bawk a ni.

*MIZORAM ATANGA CHHUAK SAPTAWNG JOURNAL TLANGZARH
Vawiin khan I&PR Conference Hall ah Mizoram English Literature Society (MIELS) te buatsaih Journal of MIELS volume hmasaber chu R.Romawia H&TE minister in a tlangzarh. Journal tlangzarh inkhawm hi MIELS Chairman R.Lallianzuala'n a kaihruai a, Henry Lalmawizuala, General Secretary MIELS leh Dr.Lalawmpuia Vanchiau, Editor MIELS ten report an pe a, Malsawmkima, Vice President MIELS in lawmthu sawina a nei a ni. Journal of MIELS hi kum tin chhuak tur niin Mizoram a saptawng thu leh hla lama tuite tan a peer reviewed journal atana siam niin International Standard Serial Number (ISSN) nei thlap a ni bawk a ni.

Journal of MIELS release function organized by Mizoram English Literature Society (MIELS)
pix: Zualteii Poonte

*GOVERNOR 6 TE BANG TURIN THURAWN
NDA kaihhruai sorkar thar chuan an rawng tak an chhuah chho zel a, tunhnai khan Union Home secretary Anil Goswami chuan Governor 6 te bia in banna thelut turin thu a rawn hlawm ni a sawi a ni. Chung Governor a biak te chu West Bengal Governor - MK Narayanan te, Kerala Governor - Sheila Dikshit, Rajasthan Governor - Margaret Alva, Gujarat Governor - Kamla Beniwal, Maharashtra Governor - K Sankaranarayanan leh Tripura Governor - Devendra Konwar te anni. An zing a pakhat chuan an thurawn pek hi hnial in bang tur a an duh tak tak chuan ziak lehkha pek a phut a ni.

India ram a sorkar laipui a roreltu an inthlak a Governor tanglai bantir hi thil thar em em a ni lo a, kum 2004 a UPA an rawn sorkar tirh khan BJP sorkar in an ruat Governor 4 - Vishnukant Shastri (UP), Kailashpati Mishra (Gujarat), Babu Parmananad (Haryana) and Kedarnath Sahni (Goa) te pawh an lo chawlhtir tawh a nih kha.

 

*DELHI UNIVERSITY AH ENGLISH SUBJECT THLANG TAM BER
Kumin session a Delhi University hnuai a college hrang hrang a lehkhazir tum ten online application kal tlang a an dilna ah English subject zir tum an tam ber a, a dawt ah Mathematics, 3-na ah Chemistry, 4-na ah Physics, 5-na ah Computer Science.

 

*KENYA AH WORLD CUP ENTU MI 48 KAPHLUM
Nimin piah zan dar 8 vel khan Kenya ram a tuipuikam hnaih khua Mpeketoni ah Muslim firfiak pawl Al-Shabab ten TV a World Cup inkhel lo entute leh Muslim nilo a an rinhlelh mi 48 te an kaphlum. Firfiak pawl te hian police station an beih bakah hotel 2 an hal a, kawtthler ah nasa takin silai an hmetpuak bawk a ni. Firfiak pawl te hi Somali ram atanag Kenya a lut anni a, Muslim ni lo leh Somai tawng thiam lo te an bitum bik ni a sawi a ni.

He thil thlenna khua Mpeketoni hi Somalia ramri ataga mel 60 a awm a ni a, Al-Shabab firfiak pawl silai leh ralthuam dang keng mi 30 vel te hian in tinah lut in World Cup inkhel lo en tute chu Muslim sakhaw zuitu annih leh nihloh bakah Somalia tawng hmang annih loh chuan an kaphlum nghal hmak hmak a ni. He khua a nu pakhat Anne Gathigi chuan "Firfiak pawl te hian Somalia tawngin Muslim kan nih leh nih loh min zawt a, ka pasal in Christian kan ni tih a hrilh a, chawp leh chilh in an a lu leh a awm ah an kap nghal a ni" a ti. Muslis sakhaw firfiak te hian World Cup inkhel en te, Miss thlan tih te hi an do nasa thin reng a ni.

 

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM

*Tukin chu nimin tlai a Chennai khawpui a damlo an chhan chungchang hian bul i'n tan teh ang:

Chennai khawpui Adyar veng a Fortis Malar Hospitals ah Mumbai nula kum 21 mi B.Com zirlai chu lung thlak ngai in a damlo a, chu nu lung thlakna tur chu damdawiin awmna atang a veng dang 12 kms a hla awm Government General Hospital atang lak ngai a ni. Mihring lung thlak (heart transplant) nan a an hman thin hian lung hi taksa dek lo chuan darkar 4 bak a nung thei lo a ni.

Khawpui lian Chennai anga te chuan lirthei a tam thin avangin traffic jam a tan fuh phei chuan kal tumna lam hla deuh ah phei chuan darkar engemaw zah tan awlsam deuh a ni thin. Chutiang anih avangin chuan heng dawmdawiin 2 a doctor te leh sorkar lam DC leh traffic police hotuten tluang taka lung thlakna tur kalpui a nih theih nan ruahmanna an siam ho ta ani.

Tichuan Chennai khawpui a motor kawng lun lai ber pawl Beach road leh Santhome high road kaltlang tur chuan nimin zan dar 6:44 khan driver senior C Kathir-a khalh Ambulance chuan mihring lung (heart) phur in Government hospital an chhuhsan a, ambulance hi traffice police pilot motor in hma a hruai sak a ni. An kalna tur kawng Poonamallee High Road leh Adyar inkar ah hian motor dangin an lo tih khawtlai loh nan kawng pengthuam 12 ah police 26 duty tir anni a, VIP light chhi motor te pawh in an tihbuai loh nan kawngbik 'Green corridor' hi siam a ni. Tichuan zan dar 6:57 khan Fortis Malar Hospitals an thleng a, damlo lungthlak ngai hnenah hlawhtling takin vuah a ni ta a ni.

Ambulance te hian lung thlakna tur hi an thlenna tur damdawiin pan nan hian minute 13 leh second 22 hun an hmang a, dan tlang pui chuan a tlem berah minute 45 tal tlan thin a, traffice a jam nasat phei chuan darkar engemaw zah pawh tan theih a ni. Chennai doctor te leh sorkar hotu leh traffice te tanrualna hian buai map lo in damlo lung thlak tur hi kalpui theih a ni ta a ni.

*Nimin tlai dar 3 vel khan Aizawl-Phulpui sumo chu Hualngohmun khaw bulah a chesual a, a neitupa Lallianhmawi a hmunah a boral, michuang dang 10 te pawh in hliam natak an tuar a, hliam te hi Referral Hospital Falkawn leh Aizawl Civil Hospital ah te hruai anni.

*Nimin YMA DAY a Minister te khuallian a an tanna te:
R.Lalzirliana: Keifang Venghlun Branch YMA leh Thingsul Tlangnuam Branch YMA
Lalrinmawia Ralte: Kangmun
Lal Thanzara: Bethlehem Branch YMA

*Rajya Sabha MP Lalhmingliana chuan nimin khan Lungdai YMA Hall sak thar a hawng. Lalhmingliana leave travel concession (LTC) bill dik loa puhna chungchang chu awlsamtea enfel theih anih a beisei thu a sawi. (Vanglaini)

*World Bank chuan Mizoram chhung a kawngpui siam nan US dollar maktaduai 107 puk tir a rem ti. He sum hmang hian Champhai-Zokhawthar leh Chhumkhum-Chawngte kawng te siam a ni ang.

*India ram atanga din multinational company Tata Consultancy Services (TCS) chu khawvel a company te zing a technology sector zing a hnathawk ruaihnem ber 3-na niin an hnuaiah hnathawk mi 300,464 an awm. 1-na chu IBM niin hnathawk 431,212 an awm a, 2-na chu HP niin hnathawk 317,500 an nei thung a ni.

*Nimin khan ni 2 tlawh a Bhutan a zin India Prime Minister Narendra Modi chuan India ram a rawn let leh tawh a ni. Bhutan leh India hian tangrual a hydro electric power 10000 MW siam chhuah dun an tum chu chak leh zual hma lak nise an ti.

*Sorkar laipuiin thla thar atangin trade policy thar anti chhuak dawn. Sorkar hmasa in an lo kalpui FDI multibrand retail chu tihdanglam tum a ni a, India company te venhimna tur dan thar pawh siam tum a ni bawk.

*Fiji ram a kumin September ni 17 a inthlanpui an hmachhawn tur tanpui nan India sorkar chuan Indian High Commissioner kal tlang in nimin khan Fijian Elections Office hnenah motor 8 an pe. India hia Fiji sorkar hnenah hian inthlan a hmantur lehkhatui pawh an pe dawn bawk a ni.

*Iraq tualchhung buai ah nimin khan Iraq ram hmarlam khawpui 1 Syria ramri bula a mi Tal Afar chu firfiak pawl Islamic State in Iraq and the Levant (ISIS) te kut ah a awm. ISIS te hian khawpui lian Mosul leh Tikrit te pawh an kut ah an dah tawh bawk a ni.

*Burma ram a mipui rorelna din duhtu Aung San Suu Kyi chuan an ram dan in ramdang mi nupui pasal a nei emaw, an fate ram dang a awm ten Presisent leh Vice President post an chuh theihlohna dan chu siam tha turin mipui ten mawhphurhna lian tak annei a ti. Aung San Suu Kyi hi ramdang mi pasal a aneih avang leh a fate ramdang a an awm avangin an ram inthlan ah President post a chuh theih dawn lo a ni.

*Delhi sorkar chuan eirawngbawl nan a khawnvartui hmangtu mi nuai 2 chuang te hnenah a thlawn in LPG connection an pe a, gas cylinder thunsa leh gas thuk(stove) pawh a thlawn in an pe tel a ni. A thlawn a LPG connection dawngtu te hi Jhuggi Ration Card, BPL leh Antodaya Ann Yojna ration card hmangtute anni.

*Beas lui Himachal Pradesh a tlahlum Hyderabad zirlai te ruang 17 chu tun thleng in hmuh an la ni lo.

*Thawtanni zing khan Uttar Pradesh a Firozbad khua ah police 2 misual ten an kaphlum a ni. Heng police 2 nun chanta te hian kawngpui dung ah rukru an awm tih report an dawn enfiah tum a an kal chu rukru te hian an lo kaphlum ta mai a ni.

*Nimin khan interbank foreign exchange market ah India pawisaw Rs.60.16 leh US Dollar 1 a intluk a ni.

*Iraq ram chhung a buaina thleng mek vangin Asia ramah tuialhthei (Crude oil) man nasa takin tihsan a ni. Crude oil man sang hi thla 9 chhung a to ber tum a ni.

*World Cup 2014 thlengtu ram Brazil hi khawvel a coffee tharchhuak hnember ram anni (High School commercial geography zirlai i hrechhuak em?) a, khawvel a car siamchhuak hnem tu ram zing a 4-na anni bawk. Ziak leh chhiar thiam awm zat chu 90.4% a ni a, sakhua na lamah Kristian tam na ram anni. Catholici 15.41% Protestant 1.33% Kardecist spiritism; 1.22% Kristian kohhran dang 0.31% Afro-Brazilian religions 0.13% Buddhism 0.05% Judaism 0.02% Islam 0.01% Amerindian religions 0.59% te an awm a ni.

*HMANLAI VAWIIN: Kum 1789 vawiin angah khan France rama mi naran (The Third Estate) ten an ram rorel khawl Estate-General lak atangin rorelna khawl lak sakin National Assembly an din a, mipui rorelna din nan danpui (constitution) thar an duang tan a ni. Kum 1944 vawiin angah khan Europe hmarkil a ram Iceland ah mipui rorelna (reublic) din a ni.

*MIZORAM HRECHIANG ANG: Kum 1907 khan Mizo pastor hmasa 2 Pastor Chuautera leh Pastor Challiana te Sapram (England) leh Europe ram dang fang in an zin. Chumi hnu kum 1912 khan Pastor R. Dala pawh Sapram (England) ah a zin ve leh a ni. R.Dala hian zosap missionary bawihchhuah vei em em tu Dr.Fraser-a damlo London thleng a hruai thla a, kum 1913 November thla ah a lo haw leh a ni.

*THURIL: "Tawngkam ngilnei tak te hi a man a to loh bakah a tihtur tha takin a hlen thin bawk a ni." -Blaise Pascal
-----------
Lamtluang page min lo hlutsaktu nangni ho hian rin aiin like leh comment hi in uar lo a, in like emaw in comment hian in a rawn in up kang zel a chu chu in friend list a mi te tan pawh like tir ve na chance tha tak a nih zia lah hi in hre silo aw...like mai bakah comment lamah tan in lak loh chuan heti mai hi kan ni hrih dawn e. Ni hman nuam vek ule.

Pix: BBC
(Thlalak kan rawn tarlan hi kum 1930 July ni 30 a World Cup football final khelh hmasak ber tum a a thlengtu ram Uraguay in Argentina 4-2 a an hnehna Centenario stadium, Montevideo, Uruguay a ni e.)

15th & 16th June 2014 news in Mizo

 Latest news collection in Mizo language
MIZO TAWNG A CHANCHINTHAR LAWRKHAWM

16.6.2014
*FIFA WORLD CUP 2014 UPDATE
Germany 4-0 Portugal
Scorer:
Thomas Müller (78 Minutes)
Thomas Müller (45+1 Minutes)
Mats Hummels (32 Minutes)
Thomas Müller (12 Minutes Penalty)
 
*KOLASIB SALVATION ARMY BUAINA KAL ZEL
Chhandamna sipai pawl (The Salvation Army) chhungkaw buaina kal zelah nimin a Kolasib Vengthara ACSAL Special Territorial Conference neih chuan kohhran thar The Salvation Army Church an din.

June ni 8 khan Salvation Army, Kolasib Vengthar Corps Biak In a bungraw thenkhat te Salvation Army atanga inkhawm hrang ten an lo thiar chhuak tawh a nih kha.
 
*MICHAEL SCHUMACHER HARHCHUAK TA
Formula One champion hlui Michael Schumacher chu nikum December 29 khan vur chung tawlh infiamna (ski) a tih lai a a chetsual avangin hun rei tak thi leh dam inkar (coma) ah a awm a. Tukin khan amah an enkawlna France ram a CHU Grenoble (hospital) atangin Switzerland a University Hospital of Lausanne damdawiin ah enkawl chhunzawm turin dah luh a ni. A thupuangtu in a sawi danin thi leh dam kar a awm (coma) ni tawh lo in a ziawm tawh a, mahse hun rei tak enkawl chhunzawm erawh a la ngai dawn a ni a ti.
 
*REANG (BRU) HMUAK TURIN CHHUAK
17th & 18th June, 2014 a neih tur 6th batch repatriation a Reang (Bru), Tripura Transit Camp atanga Mizoram a lo let te hmuak turin tukin khan Mizoram sawrkar mi leh sa ten Mamit an chhuahsan.

Tarlan tawh angin Reang (Bru), Tripura Transit Camp atanga Mizorama lo let tur te hi Zomuantlangah leh Kanhmunah lo hmuah an ni ang a. Hmuahna hmuna (Facilitation Centre) lo thleng te hi Tripura Transit Camp a mi ngei an ni nge ni lo enfiah a nih hnuah an awmna tur khuaah hruai an ni ang a. An awmna tur khuaah hian an chen lailawkna tur siam sak niin, hemi hnu hian tanpuina pawisa (cash assistance), kum khat chhung a thlawna ration pek leh housing assistance pek an ni bawk ang.

6th batch repatriation atan hian Mizoram sorkar chuan theihtawp a chhuah a, vawi engemaw zah hmalak dan tur sawihona neih niin, inpuahchahna anga tluang taka kalpui a nih theih beisei a ni.Reang (Bru) te hi Transit Camp atanga facilitation centre rawn hruai thlen hna chu Tripura sorkar lamin an buaipui ve thung dawn a ni. (DIPR)
 
*INDIA PM BHUTAN PARLIAMENT AH TAWNG SUAL/WORLD CUP FINAL EN MAI THEI
Vawiin khan India Prime Minister Narendra Modi chuan Bhutan Parliament ah thusawiin an ram lal chhungkua (Royal family) te fak a tum na lamah 'Bhutan' ti lo in 'Nepal' a ti palh a, twitter lamah a tawngsual hi a darh chak hle. Bhutan ramah hian mi thusawi lawmpui nan a kutben hnan an ching ngai lo a, a chhan pawh ramhuai hnawhchhuah dawn chauh in kut an ben thin vang a ni. Mahse, vawiin a India PM Narendra Modi thusawi zawh hian lawmpui nan Bhutan Parliament member te hian kut an beng ta hluah hluah sia mi tam tak mak tih tham a tling a ni.

Brazil President Dilma Rousseff chuan World Cup 2014 final en turin India PM Narendra Modi a rawn sawm a, a sawmna hi tihhlawh tlin a nih chuan Russia President Vladimir Putin, China President Xi Jinping leh South African President Jacob Zuma te nen an en tlang dawn a ni. Tin, July 15-17 hian Brazil ram khawpui pakhat Fortaleza.ah 2014 BRICS summit neih a ni dawn avangin World Cup inkhel hi en lo mahse Narendra Modi hi a zin tho tho chu a ngai hmel a ni.
 

*Inrinni liamta khan Aizawl ah World Blood Donor Day hman a ni a, he thisen petute Chawimawina Ni ah hian Pu Lalbiakthanga Pachuau, Senior Adviser, AVBD, Tv. Lalremruata vawi 54 thisen petu leh Pi Rebecca Saimawii vawi 35 thisen petute chawimawina hun hmang a ni a. Khuallian hian April 2013 - March, 2014 chhunga a thlawn a thisen petute pawl hrang hrang hnenah chawimawina No (Trophy) leh Thuziak (Citation) a hlan.

Educational Institution Category : 1) NSS, Pachhunga University College - 312 Unit ; 2) NSS, Govt. Hrangbana College - 187 Unit ; 3) NSS, Govt. Aizawl College - 178 Unit.

YMA Category : 1) Chanmari West Branch - 192 Unit ; 2) Ramthar Branch - 158 Unit ; 3) Ramhlun North Branch - 131 Unit.

Religious Category : Youth Evangelical Front, Kohhran Thianghlim - 325 Unit ; 2) TKP Aizawl Co-ordination - 224 Unit ; 3) General PYD Mizoram UPC - 127 Unit.

Miscellaneous Category : 1) Mizoram EPL Fans Club - 161 Unit ; Special Report FB Group - 61 Unit ; 2) Adventure Club Inter-College - 48 Unit. (DIPR)

*YMA DAY 2014
Mizoram a tlawmngai pawl lianber Young Mizo Association Day vawi 79-na chu nimin kha a ni a, mahse Pathianni a nih avangin vawiin hian ram pum ah YMA DAY hman a ni dawn ta a ni. Kan hriat theuh angin YMA hi June 15, 1935 khan din tan a ni a, a hming hmasa chu Young Lushai Association tih a ni.

 

*IRAQ RAM BUAI ZIAWM THEILO
Iraq ram a khawpui lian 2 sorkar laksaktu Muslim helpawl Islamic State of Iraq and Greater Syria (ISIS) te chuan an website ah leh twitter ah an hmelma (sorka sipai) te an kaphlum lai leh sawisa lai thlalak te an thehdarh a ni. Heng thlalak te hi Iraq sorkar leh Human Rights Watch hruaitu te erawh chuan a lem anih leh nih loh enfiah phawt tha a an hriat thu an sawi thung. ISIS helpawl te hian Salahuddin Province ah sokar sipai 1700 an that tawh niin an insawi a ni. Kan rawn post tawh thin angin ISIS helpawl te hian Iraq hmar lam ram khawpui pawimawh deuh deuh te an la tawh a ni.

*FIFA WORLD CUP 2014 UPDATE
Argentina 2-1 Bosnia and Herzegovina
Goal scorers:
Sead Kolašinac (3 minutes)
Lionel Messi (65 minute)
Vedad Ibišević (85minutes)

*FIFA WORLD CUP 2014 UPDATE
France 3-0 Honduras
Goal scorers:
Karim Benzema (45 minutes)
Noel Valladares (48 minute) [own goal]
Karim Benzema (72 minutes)

15.6.2014
*India Prime Minister Narendra Modi chuan PM a nih hnu a ramdang a tlawh hmasak ber tur atan vawiin hian ni 2 cham turin Bhutan a tlawh dawn. Bhutan airport ah thlawhtheihna lian Air India One (Boeing 747) a tum theih dawn loh avangin sipai thlawhtheihna in a kal dawn a ni. PM hmasa ten chanchinbu mi 30 chuang an hruai thin lai in Modi hian 8 chauh a hruai thung dawn a ni.

*VAWIIN HI PATE NI ANI
Vawiin June thla a Pathianni vawi 3-na hi khawvel pum a Pate Ni (Father's day) hman na ni a ni.

Pate ni lo chhuah chhan an sawi thin ah chuan: USA a Spokane (Washington) cheng
Sonora Louise Smart Dodd chuan an unau naupang ber pian lai a nu in raicheh a a thihsan hnu a hmangaih tak a an unauza a enkawl seilian tu a pa William Jackson Smart pual a engemaw tih a duh a. Tichuan an kohhran pastor hnenah Pate chawimawina ni bik siam tur in a ngen ta a ni. Pate chawimawina ni bik neih chu tha hle in an lo hre zel a, US mai nilo khawvel pum ah Pate chawimawina ni bik chu hman a lo ni ta thin a ni.

Lamtluang page like tu/follower zing a Pa ho te kha in pualin he post hi kan hlan a, chibai kan buk vek a che u.

14th June 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

14.6.2014

*WORLD CUP 2014 RESULT UPDATE
Columbia 3-0 Greece
Costa Rica 3-1 Uruguay
Italy 2-1 England

*WORLD CUP 2014 A RED CARD HMU HMASABE
Uruguay defender kum 30 mi Maximiliano Pereira chu tun kum world cup a red card hmu hmasaber a ni ta.

*EPTU TEN UKRAINE SIPAI THLAWHTHEIHNA AN KAP THLA
Ukraine rama Russia zawmduh vanga hel na chawkchhuaktu pawl ten vawiin khan Ukraine sipai thlawhtheihna Ilyushin-76 (Il-76) chu Ukraine khawchhak lam a Lugansk khawpui ah an kap thla a, a chhung a chuang sipai 49 an boral a ni. Nunna chantate hi thlawhna crew member 9 leh paratrooper 40 anni.

Ukraine khawchhak lam ah hian thla 2 kalta atang khan Russia sorkar zawm duh tu ten sorkar lakah buaina an siam tan a, khawvel sorkar lian hruaitu hrang hrang te pawh in an buaina hi an ngaichang reng thin a ni.

*BANGLADESH AH MI 9 HALHLUM
Tukin khan Bangladesh khawpui Dhaka ah Kashi veng a Mirpur hmun a Bihari camp ah tualchhung mi Bangalee leh Bihari mite intihbuai avangin mi 9 halhlum anni. Thi zingah hian naupang 2 an tel a ni. An intihbuaina hi nizan a Muslim kut Shab-e-Barat an lawm lai a halpuah hal nasat vang a lo irhchhuak a ni a, he kut hmanlai hian halpuah hal khap a ni thin a ni.

Bihari camp a awmho te hi Urdu tawng hmang Muslim sakhaw zuitu Bihari ho India atanga pem an ni a, Pakistan zawm duh mahse Pakistan sorkar in a lak tak loh te anni. Kan hriat angin tunhma chuan Bangladesh hi Pakistan in an awp thin avangin East Pakistan tih annih thin kha.

*FIFIFA WORLD CUP 2014 FIXTURE
14.6.2014 (Saturday) 9:30 PM Columbia vs Greece
15.6.2014 (Sunday) 12:30 AM Uruguay vs Costa Rica
3:30 AM England vs Italy
6:30 AM Cote d'lvoire vs Japan
9:30 AM Switzeland vs Ecuador

*Indian railway chuan faina beihpui thlak an tum. Railway Board Chairman Arunendra Kumar zone hrang hrang a railway thawktu te hnenah thupek chhuah in rail platform te, ek in leh zun in te, waiting room leh retiring room bakah passenger te awmna hmun leh tui dawhna te, luikawr zawng zawng te pawh tifai vek thin turin a ti. He thupek hi a hlawhtlin theih nan Divisional Railway Manager ten nitin chawlhkar 2 chhung an enfiah thin a, an report te chu zonal railways office kal tlangin Railway board an an thawn thin dawn a ni.

*Israel President thar atan Reuven Rivlin (74) thlan tlin a ni. A ni hian an president nilai Simon Peres a thlak dawn a ni. Thiamna lamah  Hebrew University of Jerusalem atang in dan (law) a zir chhuak a, dan hremi ukil ah a tang chhunzawm ta zel a ni. Israel president zing a sipai lama tawnhriat neilo awm chhun a la ni. Lukud party mi leh sa niin kum 1998 khan Knesset member atan thlan tlin a ni tan a, kum 2003 khan an ram rorelna in Knesset ah speaker atan thlan tlin a lo ni tawh bawk a ni.

Reuven Rivlin hi Nechama nen innei in fa 4 annei a ni. 1960 atang khan sa eilo (vegetarian) ah a inlet a, football a ngaina a an ram club  Beitar Jerusalem football club tan em em tu ni a hriatlar a ni.

*Goa sorkar chuan an state sum hmang a MLA 6 te World Cup 2014 en tur a tirh an tum chu mipui lam atanga sawiselna a nasat em avangin an thulh leh. Goa state sports department hian a tir chuan an zin nan hian Rs.Nuai 89 an thehchhuah sak a ni. Zin tur zing a mi Goa Sports Minister Ramesh Tavadkar chuan World CUp en tur a sorkar sum a zin an tum chu an thulh tih a sawi. A thian MLA dang 5 te chuan an mahni sum sengin World Cup en tur hian kal an tum ta tho tih a sawi bawk. Sorkar sum hmanga kal an tum hi eptu pawl leh civil society ten nasa tak a an sawisel avangin an ti hlawhtling ngam ta lo a ni.

*PREITY ZINTA IN A EX A KHING
Bollywood star Preity Zinta chuan a bialpa hlui Ness Wadia lakah a thubuai a theh lut. May ni 30 zan khan Wankhede stadium, Mumbai ah Preity Zinta te team Kings XI Punjab leh Chennai Super Kings an inkhel a, chumi zan chuan stadium chhung ah hian a ex Ness Wadia hian a tihbuai bakah a vau avangin Marine Drive Police station ah FIR a thehlut ta  ani. Preity Zinta leh sumdawng hausa Ness wadia te hi kum 5 an inngaizawng a tlemlai deuh khan an in then (break up) ta a ni. 

GOOD MORNING MIZORAM
LAMTLUANG ZINGKAR CHANCHITHAR LAWRKHAWM
*Nimin tlai dar 4:00 khan Pu Zodintluanga, Minister UD& PA, PHE & SYS chuan Champhai Chhangphut Field a phul lem phah tur bul a rawn tan pui. Vawiinah Champhai Stadium Zotlang-a sak tur leh hmun dang danga sawrkar hmalak mek te a tlawh leh ang.

*Nikum MPSC buatsaih a Combine Exam a tling Mizoram Civil Service Officer thar 15 leh Mizoram Finance & Accounts Service Officer thar 2 te chuan Larsap Pu Vakkom Purushothaman chu nimin khan a chenna In ah an hmu a. Inkawm hona hun tha tak neiin thingpui in hona an nei bawk. Heng officer thar te hi ATI ah 3 June atang khan thla thum chhung training an nei dawn a ni.(DIPR)

*Nimin khan INTACH Mizoram Chapter buatsaih Essay and Painting Competition lawmman semna Secretariat Conference Hall, Aizawl-ah neih a ni.

*Nimin chawhma dar 11.00 khan, MZP Headquarters, Kolasib huaihawtin St. John’s Higher Secondary School, Kolasib-ah he khawpui chhunga kumina HSLC leh HSSLC Exam-a titha te chawimawina inkhawm buatsaih a ni. (DIPR)

*May 2014 chhunga Aizawl Civil Hospital report chu hetiang hi a ni :
Admit zat - 1356 ; Mi zai zat -1818; Nau piang zat - 373 ; X-Ray a en zat - 2710 ; Laboratory a en zat - 49952 ; Khawl dang a en zat- 2703 ; Damlo outdoor leh casualty a en zat - 34408; Dam lo thi zat – 78 ; Mizoram pawn lama refer zat - 237. (DIPR)

*May 2014 chhunga Excise & Narcotics Department (END) chuan zu zuar mi 168 an man a, zurui mi 7 an man a zu phurhna motor 15 an man tel bawk. Zu chi hrang hrang an man dan chu hetiang hi a ni:
Rak Zu: 2772.375 litres
Zu bilhlai: 8359 tins
Dawidim: 2.5 kgs
IMFL 750 ml: 7055 bottles & 4 Loose
375 ml: 869 bottles
180 ml: 90 bottles
Canned Beer 500 ml: 24 cans
Foreign (Imp) Canned Beer: 3644 cans
(DIPR)

*Nimin khan 9-13 June 2014 chhung a neih 'Horti Fair"chu Assembly House Annexe Basement Seminar Hall-ah a kharna hun hman a ni.

*Socio-Economic and Caste Census (SECC) 2011 Draft List chu 25th June, 2014 hian khaw tinah tarchhuah a ni dawn a. Hemi chungchangah hian sawisel duh leh thun belh/ paih ngai chungchangah hriattur pawimawhte inhrilhhriatna hun “State Level Workshop for BNVs on SECC Claims and Objections” chu nimin khan State Institute of Rural Development in I&PR Auditorium-ah workshop buatsaih a ni. (DIPR)

*Nimin piah khan Serchhip District Legal Services Authority buatsaihin Lal Thanhawla Higher Secondary School-ah World Day Against Child Labour pualin hun hman a ni a, Pi Lalsiampuii, District Child Protection Officer chuan Resource Person niin a hmanpui a ni. (DIPR)

*Union Road Transport minister  Nitin Gadkari chuan sorkar laipuiin ram chhung a National Highway zulzuiin thingkung vaibelchhe 200 phun tur a ruahmanna siam a ni a ti.

*India President Pranab Mukherjee chuan Israel President atana thlan thar Reuven Rivlin chu duhsakna chibai thawn in  India leh Israel in inlaichinna tha tak neih chhunzawm zel a duh thu a hrilh a ni.

*Vawiin hian Goa tuipui kam hnaiah Prime Minister Narendra Modi chu India indo lawng lianber INS Vikramaditya ah a chuang dawn a, helicopter hmangin lawng hi panpui a ni ang. Lawng sipai ten lawng chhungah hian ralthuam leh ralbeih dan hrang hrang te an entir dawn bawk a ni.

*Niminpiah a  Chhattisgarh a steel siamna hmunpui Bhilai Steel Plant a gas put vang a chhiatna thleng vanga thi zat chu mi 6 an tling tawh a, thi zingah hian deputy General manager 2 pawh an tel a, hliam tuar mi 30 an awm bawk. Chhiatna thlen chhan chhui chiang tur hian magisterial inquiry din a ni tawh a ni.

*Thailand a sipai sorkar hruaitute te chuan kumin September thla hian sokar lailawk (interim government) din an tum thu an sawi. Chumi hnuah politics boruak a that chhoh zel chuan kum 1 hnuah inthlan buatsaih an tum a ni.

*June ni 15 YMA Day hian Prime Minister Narendra Modi chuan ni 2 cham turin Bhutan a tlawh dawn. Hei hi PM a nih hnua ramdang a tlawh hmasakber tur a ni.

*Burma (Myanmar) ram a mipui siam sorkar din duhtu hruaitu lar Aung Suu Kyi chuan ni 3 cham turin Nepal a tlawh mek.

*Somalia ram a Islam firfiak pawl Al-Shabab te chuan bazar ah hmeichhia 100 chuang man in an taksa leh hmai khuh tawh turin an hriattir. An sakhaw hmeichhia te inthuamna tur hmai leh taksa khuh vek chi Niqaab an hmang lo a man an tawk leh a nih chuan vantlang hma a sawisak ah an vau bawk a ni.

*Iraq sorkar chuan an ram khawpuiber Baghdad chu firfiak pawl ten an rawn beih thut theih avangin chak zawkin venhimna an kalpui mek. Islam firfiak pawl te hian an ram khawpui pawimawh thenkhat an awp mek a, Baghdad pawh hi lak tum in an beih mai rin a ni. US sorkar pawh in ngun takin Iraq tualchhung buaina hi a thlir mek a, a tul hun hun a che ve mai thei turin an in ralring tawh a ni.

*Iraq ram tualchhung buaina avang hian khawvel ram hran hrang a tuialhthei sumdawnna a buai phah hle a, India pawh Iraq atanga tuialhthei la lut nasa ram anih avangin India pawisa hlutna paise 51 in a tlakhniam phah a ni.

*Ukraine sorkar sipai te chuan Russia zawm duh vanga buaina siam mek chu Mariupol lawngchawlhhnum ah an bei. Sorkar sipai te hian he khawpui inlakhran duh pawl ten an awp mek chu an hnehchhuh let leh niin sawi a ni a, he inbeihna ah hian inlakhran duh pawl mi 5  an thi a, sorkar sipai 4 in hliam an tuar bawk a ni.

*Maharashtra cabinet meeting chuan Thane district chu hmun 2 a then an rawt a, Thane atang hian district thar Palghar an indang dawn a ni. Palghar chu an state chhung a district 36-na a ni dawn a ni.

*Union Minister of State of Petroleum and Natural gas, Dharmendra Pradhan chuan eirawngbawlna gas (LPG cylinder)  man tihpun a ni dawn lo a ti.

*Khawvel mipui tam takin World cup football in buaipui mek lai hian Men's Hockey World Cup chanchin lo zep ve ila. Netherland ram khawpui Hague a khelh mek Mipa Hockey World cup ah a thlengtu ram Netherland leh Australia ten final an khel dawn.

*Microsoft chuan micromax phone thar chi 2  Windows Phone 8.1 device an tlangzarh thuai dawn. Aman tur chu pakhat zawk hi  Rs 6,000-7,000 a ni ang a, a dang leh chu Rs 10,000-11,000 a ni ang. Microsot hian hian Google android khum tumin nasa takin hma an la mek a ni

*HMANLAI VAWIIN: Kum 1775 vawiin angah khan America ram in zalenna a neih theih nan sipai pawl Continental Army chu din a ni a, hei hi United States Army din tanni a ngaih niin naktuk angah khan US President hmasaber nita George Washington chu he continental army commander-in-chief atan hian ruat a ni. Kum 1907 vawiin angah khan Norway ram a hmeichhia te vote an neih phalsak anni.Tichuan kum 1945 vawiin angah khan kan thenawm ram Burma chuan British lakah zalenna (independence) an nei.

*MIZORAM HRECHIANG ANG: Kum 1894 February-March khan sap Missionary Pu Buanga leh Sap Upa ten  Mizo A AW B min siam sak a, kum 1894 April ah Sikul hmasaber hawn a ni, hemi kum hian Lungleng lal Khamliana'n lehkhathawn a ziak a ni. Kum 1895 October thla khan Mizo tawng lehkhabu hmasaber 'Mizo Zirtir Bu' tih chhuah a ni. Kum 1898 khan Mizoram Map siam a ni.

*THURIL: "Hmalam hun neitu te chu vawiin a lo inbuatsaih lawk te hi anni." - Malcolm X
------------
Facebook ah hian i hmelhriat loh thian nei suh, a pawng a pui a hmel hriat loh add thin te hian hmelhriat chauh thian (friend)  a neite aiin buaina leh hmingchhiatna an tawk nasa bik thin, a chhan pawh thian an thlan uluk loh vang a  ni. Thian thlang uluk tawh ang che, vawiin a i thlalak hi i hmelhriat ngai miah loh tute computer hard disc leh phone memory a a awm ve avang ngawt khan ngaihtha chuang suh ang che. Kawppui leh duhzawng tak tak te hi chu internet ah nilo a tak ah zawn zawk tur a ni. Ransa te mahin thian bik an nei thin a, hmelhriat loh an fawm ve tun ngai lo asin. Enge i ngaihdan ni ve le?

Pix: Thlalak kan rawn tarlan te hi nimin a MCS leh MFAS thling thar Governor hmute te leh an hruaitute anni e. Thlalak hi DIPR lam ta a ni.

Newly appointed MCS and  MF&AS officers with Mizoram Governor