23rd May 2014 news in Mizo

Latest news collection in Mizo language

 

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

23.5.2014
*NEICC HRUAITU THAR
May 14-18, 2014 chhung khan North East India Christian Council (NEICC) Annual Meeting, Sielmat, Churachandpur ah a neih a ni a, kum 2014 - 2016 chhunga hruaitu thar tur hetiang a ni:
President: Rev.Zosangliana Colney, Mizoram Synod
Vice Presidents: Rev.W.C. Khongwir, KJP Synod Sepngi
Rev.Dr. S. Rongpi, CBCNEI
Secretary: Rev. R. Lalnunzira, BCM
Treasurer: Elder K. Lyngkhoi, KJP Synod Sepngi
 
*SHDC TERM PAWTSEI
Mizoram Governor chuan Shinlung Hills Development Council term chu ni 31, May, 2014 atangin kum 2 dang atan a pawtsei a, Chairman leh Member dangte pawhin an term hi kum 2 dang chhung an chelh chhunzawm ang. (DIPR)
 
*NUI LEH LAWK ANG:
Hmangaihna awmzia (Indian music thluk in)
https://www.youtube.com/watch?v=ttrcwSEQgCI
 
*MZP HQTRS. LUNGLEI HRUAITU THLAN THAR TE
President : Benjamin Vanlalfela
Vice President : Lalrammuanawma
Secretary : K. Lalremruata
Treasurer: Lalpeksanga Chenkual
Joint Secretary : Lalramthanga Chinzah
Fin. Secretary : B.Lalsawmliana
 
*ARCHAEOLOGICAL SURVEY OF INDIA (ASI) ATANGIN MITHIAM LO KAL
Vawiin khan Archaeological Survey of India (ASI) hnuaia Nagpur-a awm Prehistory Branch atanga mithiam pathum te chuan Mizoram an lo thleng.

Heng mithiamte hi mihringte hun chhinchhiah theih hma chanchin Pre-history zir tur, pipu hmunhlui te zirchiang turin leh lunghriam hmanrua te dap tura rawn kal an ni.

Art & Culture Department nen thawk hoin Mizoram a Pipu hmunhlui – North Vanlaiphai, Sailulak, Dungtlang leh Zawlsei te tlawhchhuakin helai hmun chanchin hi an zir dawn a ni. (DIPR)
 
*NUILAWK ANG U (UANG HUANG/MIZO FIAMTHU)
"Ka pa, ka nu, dam takin mangtha" Santhali version
https://www.youtube.com/watch?v=XxVJNcUnMAM

*HLAKUNGPUI MUAL A THU LEH HLA SEMINAR NEI
Vawiin khan Khawbung khua a 'Mizo Hlakungpui mual' ah Mizo Novel leh Poets lama hmahruaitute zing ami Lalzuithanga leh Laithangpuia te pualin ‘Seminar on Mizo Novelist and Poets’ tih hmangin hun hman a ni. He hunah hian Pu P.L Thanga, Vice Chairman & CEO, NLUP Implementing Board chu Khuallian niin, Pu Lalrinawma, Principal, Hrangbana College chu Khualzahawm a ni bawk.

He seminar hi Khawbung khua chuan an hlutin an ngai pawimawh hle a, zirna in hrang hranga zirlaite leh zirtirtute an tel a, Village Council leh Tlawmngai Pawl hrang hrangte bakah Hrangbana College, Aizawl atangin Mizo Subject zirlaite leh zirtirtute an tel bawk a ni.

Hemi denchhen hian Khawbung khawtlang hruaitute chuan Pu P.L Thanga chu kuthnathawktute’n, sawhthing leh serthlum tam nasa thin avanga harsatna an tawrhnate an lo sawipui a, hemi sutkian nana hmalak dan turte an sawiho bawk a ni. (DIPR)

Seminar on Mizo poet and novelist at Mizo Hla kungpui mual (Mizo Poet's square), Khawbung

 

*TRUCK ACCIDENT
Tukin dar 8 vel khan Hmuifang tlang dung Chamring khaw pelh a rupa kham (Aizawl - Lunglei World Bank road a km 60 na vel) thlang ah hnamdang khalh cement phur truck 1 kawngthlang ah a tlan liam a, nunna chan an awm lo a, hliam tuar 2 an awm. An chetsualna hmun hi thlalak ah hian a sen in kan thai bial a, a bikin hnamdang motor khalh te helai ah hian an chesual zing tawh hle a ni.

Hmuifang tlang, Rupa kham, Aizawl - Lunglei road, Mizoram

 

*AFGHANISTAN AH INDIAN CONSULATE KAP
Tukin khan firfiak pawl zing a mi 3 ten Afghanistan khawthlang lam a Herat khua ah India cosulate an kap. Heng mi 3 te hian Indian consulate office chu a thenawm in atangin machine gun leh rocket-propelled grenades hmangin an bei a ni. Police ten pawikhawihtu mi 3 zinga 2 chu an kaphlum tawh a, pakhat la dam chhung pawh a dang chep hle tawh a ni. He chhiatna thleng ah hian vanneih thlak takin Indian consulate a thawk te thi leh hliam an awm lo a ni.

 

*MIZORAM A CRICKET STADIUM HMASABER TUR HAWNG DAWN
Vawiin chawhnu dar 2 hian Chief Minister Lal Thanhawla'n Mizoram a cricket stadium hmasaber tur Aizawl Cricket Stadium, Sihhmui a mi chu a hawng dawn. A hawnna inkhawm hi R.Lalvena, IAS, Secretary Sports etc. chuan a kaihruai ang a, C.Laltlanthanga, Secretary, MSSC-in technical report a pe ang. Sports Minister Zodintluanga, Cricket Association of Mizoram Working President Lalrochuanga Pachuau leh Chief Guest Lal Thanhawla ten thusawina hun an hmang ang. Hawnna inkhawmah hian Chief Minister XI leh Sports Minister XI te an inkhel dawn a ni.

(Kan news source ho ah hian Aizawl Cricket Stadium, Sihhmui tih a ni vek a, he stadium hi 15 April 2010 a Mizoram CM Lal Thanhawla'n a hawn khan 'Lalsuaka Memorial Cricket Stadium' tih ani sia, engtik laiin nge a hming hi an thlak? Nge kan source ho hian an tarlang dik lo zawk? hria kan awm chuan, comment lamah rawn sawi fiah teh u.)
Pix:Zonuni Fanai

 

Aizawl Cricket Stadium, Sihhmui

22nd May 2014 news in Mizo

Latest news collection in Mizo language

 

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

22.5.2014

*SELAM KHAWTLANG HRUAITU MI 10 POLICE IN MAN
Vawiin khan Champhai Police leh IR Bn police 100 te Selam khua ah lutin tunhnai a forest department motor thingzai phur an hal vangin Selam khawtlang hruaitu mi 10 an man. An mi mante hi Champhai lam pan pui an tum laiin Selam khawtlang hian an lo dang a, nunau nen tan an khawh tlat avangin police te nen hian tlai thleng khan an inep nasa hle a ni.
Thulakna: DINGDI

 

*TLAILAM NEWS TAWI TE
*Tukin khan China ram a Xinjiang province Urumqi khua a chi leh chi intihbuai vang a bomb puak ah mi 31 an thi a, hliam tuar 90 an awm.

*MLA tling thar Nl.Vanlalawmpuii Chawngthu chu vawiin khan a zirchhuahna Helen Lowry Higher Secondary School in HSSLC & HSLC pass thar te pual a Graduation day an hmanna ah khuallian ah tang.

*Serchhip DC staff ten bawrhsap Dr.Franklin Laltinkhuma IAS chu Aizawl DC (bawrhsap) ni tura a insawn dawn vangin vawiin khan thlahna an nei.

*Vawiin ah Gujarat CM thar atan Anandiben Patel lakluh a ni.

*Thailand sipai hotuluber in Sipai ten ram rorelna an la pumhlun ta tih a puang.

*Bollywood star Shahrukh Khan chu khawvel filmstar hausaber dawttu a ni a, khawvel a filmstar hausa ber chu comedian Jerry Seinfield a ni. Shahrukh Khan a hian US dollar maktaduai 600 a nei ni a chhut a ni a, i hriat lar em em Tom Cruise te, Johny Depp te ai khan a lo hausa daih zawl a lawm le.

*RBI in India ram a bank zawng zawng hnenah ATM an dahthar ah te pianphung a rualbanlo ten an hman ve theih nan aw hmang a control theih khawl leh mitdel hawrawp(braille) chhut theihna keypad dah tel vek tawh turin hriattirna a chhuah.

*SAARC ram hruaitu 6 in Modi PM lakluh ah an rawn tel theih tur thu sawi chiang tawh.

*Lalu Prasad Yadav a pawl RJD ten Bihar ah an khingpui thin JD(U) sorkar an thlawp leh dawn si.

*Kumin FIFA World Cup khelh tur a an football pet tur hi i rinloh deuh in Pakistan a Sialkot ball company te siam an hmang dawn. He company hian German Bundesliga, French League leh Champions Leagu a ball pet tur an lo siam sak tawh thin a ni.

*Thing kan phun belh loh chuan khua a lum zel ang.

 

*LOK SABHA AH OPPOSITION LEADER NEI THEI DAWN LO
Tun tum Lok Sabha 16-na inthlan ah hian BJP (Seat 283) leh an tanrualpui NDA tel party te an chak fal em avang in eptu lam chan a chau deuh a, opposition leader an awm thei dawn lo a ni. Eptu lam ah Congress in vote an hmusang ber an seat hmuh zat hi 44 a ni a, amaherawhchu dan in a phut anga parliament a eptu hruaitu Leader of Oppostition ni tur chuan seat 55 (10% seat) angaih avangin eng party mah in an tlin lo a ni. Tangrual pawl ang chi hi eptu hruaitu a nih theih loh bawk a, party mal chak dan a zir a chhut thin a ni. Parliament a Leader of Opposition te hi Cabiner minister rank an ni. Tun tum hi Leader of Opposition awmloh vawi 1-na a ni lo a, kum 1969 hmalam zawng khan India parliament ah Leader of opposition nei thei an awm ngai lo a, tichuan, kum 1980 atanga kum 1989 thleng khan an awm lo tawh bawk a ni.

 

*TUIKUK TIH AIAH REANG HMANG TURIN
Nimin a Information and Public Relation Department hotute leh Mizoram Journalist Association ten inhmuhkhawm an neih ah I&PR Director in Mizoram chanchinbumi te chu an thuchhuah ah Tuikuk emaw Bru tia an puanzar thin chu sorkar laipuiin an pawm dan Reang tih emaw Reang (Bru) tia puangzar thin turin a hrilh. 

21st May 2014 news in Mizo

Latest news collection in Mizo language

 

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

21.5.2014

*ASSAM CHIEF MINISTER BANG DAWN
Naktuk 22 May 2014 hian Assam Chief Minister Tarun Gogoi chu Lok Sabha inthlan a an party Congress an chet that loh avangin Chief Minister a nihna atangin a bang dawn. Tunkar thawhlehni khan Tarun Gogoi hian an party president Sonia Gandhi hmu n a banna thu a zuk thlen tawh a ni. Assam hian Lok Sabha member 14 an nei a chung zingah chuan rorellai congress hian seat 3 chiah an la a ni.

*MLTP ACT ZIRCHIANNA LEHKHABU CHHUAK THAR
Mizo tlangval Department of Political Science, University of Hyderabad atanga M.Phil zirzo Lalnundika Hnamte (Zohnuai, Lunglei) in a research behchhan a saptawng a a lehkhabu ziah 'Mizoram leh Gujarat a Zukhap na dan' a zirchianna " "Prohibition: A Socio-Economic Assessment in Gujarat and Mizoam" tih chu online a lei theih turin a awm ta. A hnuaia link ah hian online in a duh tan a chah theih e.
http://serialspublications.com/books/index.php?route=product%2Fproduct&product_id=3498

 

*BJP HRUAITUTE HI HNUK TIH ULH AN UAR THAR RIAU
Gujarat Chief Minister Narendra Modi chu Prime Minister anih dawn tak avangin vawiin khan BJL legislature Party chuan Gandhinagar town hall ah Chief Minister thar atan revenue minister nilai nuthlawi kum 73 mi Anandiben Patel an thlang. Anandiben Patel hian an party MLA te hmaah hnuk ulh teuh a thusawiin (Nimin khan Narendra Modi a thusawi laiin a hnuk a lo ulh tawh bawk a) "Gurarat hi hmasawnna kawng ka zawh pui zel dawn a ni" a ti. He nuthlawi hi an state chhunga hmeichhe MLA ni rei ber niin a naupan laiin an khua ah hmeichhe sikul a awm silo a mipa sikul ah a pa in a kai tir ve thin a ni. Tunhma chuan sikul ah zirtirtu hna a thawk thin a, an sikul picnic na ah an zirlai hmeichhe 2 tuitla a chhanchhuah avangin huaisen lawmman a dawng nghe nghe a ni. He huaisen lawmman (National bravery award) a dawn avang hian BJP in an party zawm turin an sawm tichuan kum 1987 atang khan politics ah a inhmang chho ta zel a ni.

*MIZORAM DIG HLUI IN DELHI CM NIH A HREH LO
Mizoram a DIG a nih lai a MZP ten "haw rawh se, haw loh chuan pawi zawk ang" an tih vanga Delhi lam a haw ta, India rama hmeichhe IPS hmasaber Kiran Bedi chuan Delhi ah assembly inthlan that awm ta se BJP Chief Minister candidate nih a hreh lo tih a sawi. Kiran Bedi hian tunhnai a Narendra Modi chu fakin ram hruaitu tha anih a rin thu a sawi chhuak a ni. Assembly inthlan hnuhnungber a Delhi a BJP CM candidate Harsh Vardhan chu Lok Sabha MP atan thlan tlin a ni tawh sia, BJP lam hian Kiran Bedi hi an party zawm a CM candidate a tan an sawm ring an tam hle.

 

*ARVIND KEJRIWAL JAIL AH TAN TIR A NI
Aam Admi Party hruaitupa Arvind Kejriwal chu metropolitan magistrate hmaah amah bail na tur Rs.10,000 a pek duh loh avangin Tihar Jail ah ni 2 chhung tang tur a thawn a ni. BJP hruaitu hlun Nitin Gadkari chuan politician eiru tih a puh vangin Arvind Kejriwal hia court khing a, a thubuai sawifiah tur hian Kejriwal hi court ah koh a ni a, bail a chhuak mai thei tur a nih laiin amah bailna tur pawisa an phut chu thil tihsual neilo ni a a inhriat avangin a chawi duh ta lo a ni. Arvind Kejriwal hi May ni 23 a court a hruai leh turin Tihar Jail pindan no.4 ah thawn a ni ta a ni.

*MAMIT AH TAXI TLAN LAIIN KANG
Nimin 20.5.2014 chhun dar 12:00 bawr vel khan Pu H.Laltanpuia (Tpa) Mamit, Dinthar Veng Taxi chu Mangkhawngdai Field bula a tlanlaiin a kang. Taxi hi aneitupa in khalhin a hma lam Bonet chhung lam atangin nasa takin meikhu a chhuaka, a kang zui ta a ni. Akan lai hian Driverte nen puitling panga leh naupang pakhat an chhuang a inhliam erawh an awmlo. Motor hma lam erawh a kang chhe nasa hle a, akan chhan hi wiring dikloh vang nia rin a ni.
Thulakna: Lachua Palian@MAMIT DISTRICT NEWS

Engine fire gutted running taxi in Mamit, Mizoram

*INDUSTRIES DEPTT. IN NLUP SEM DAWN
SDIO, Kolasib chuan Industries Deptt. hnuaia NLUP dawngtu Carpentry, Tailoring, Photo & Video leh Petty trade thlangtute hnenah naktuk May 22, 2014 hian hnathawhna tur pawisa a sem dawn a. District Industries Centre, Tuitha Veng, Kolasib-ah Training neih pahin pawisa hi sem a ni ang.

NLUP tanpuina sem tur hi Carpentry thlangtu mi 13 hnenah 2nd Phase hnuaia 2nd & final instalment te, tailoring, Petty trade, Carpentry leh Photo & Video trade thlangtu mi 8 hnenah 1st leh 2nd instalment te an ni. (DIPR)

 

*MIZORAM LEGISLATIVE ASSEMBLY SECRETARIAT IN ANTI-TERRORISM DAY HMANG
Vawiin ni 21.5.2014 hi Anti-Terrorism Day anih angin Mizoram Legislative Assembly Secretariat a thawkte chuan Pu Ngurthanzuala, Secretary hovin thutiam la in he ni hi an hmang. (DIPR)

 

*Vawiin ah:
*Sikkim Chief Minister turin Pawan Kumar Chamling lakluh a ni ang.
*Odhisa Chief Minister turin Navin Patnaik lakluh a ni ang.

 

*26 MAY AH PRIME MINISTER THAR LALUT DAWN
Karleh thawhtanni 26 May 2014 tlai dar 6 ah Narendra Modi chu India Prime Minister thar atan lakluh a ni dawn ta. Narendra Modi hi 17 September 1950 kha Gujarat a Vadnagar khua ah a lo piang a, unau 6 zing a upat lam a chhiar a 3-na a ni. Thiamna lamah Delhi University a Distance Education hnuaiah Political Science atangin a graduate a, Gujarat University atangin Political Science ah tho Master a zo leh a ni. Amah hi RSS ah naupan tet lai atanga in hmang niin lehkha zir lai pawh in ABVP ah hmang nasa thin hle a ni.

 

*EXCISE & NARCOTICS TEN RUIHHLO MAN
Excise & Narcotics Department (END) thawktute chuan nizan (19.05.2014) dar 7:30 khan Phunchawngah Heroin gram 72 leh mg 50 an man. Hemi kaihhnawihah hian Heroin neitu Engzami (55) d/o Khuangliana (L), Khawpual, Myanmar, tuna Phunchawng Mel 7-a khawsa mek chu an man nghal. Heroin man hi Hawng 5 niin, sahbawn bawm 4 leh penicillin bur 40-ah dah a ni a; Myanmar atanga lakthlak, Aizawla hralh tum mek a sawi a ni.

Excise & Narcotics Department chuan Heroin neitu Engzami hi Section 21(b) of The Narcotic Drugs & Psychotropic Substances Act (NDPS Act) hnuaiah thubuai an siamsak a ni. (DIPR)

20th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

20.5.2014 
*KAWRTETHAWVENG WELFARE IN KHAW MI HMINGTHA TE CHAWIMAWI

Vawiin chawhnu khan I&PR auditorium ah Kawrtethawveng Welfare Committee(KWCA), Aizawl chuan an khawchhuak chawimawi phu ni a an hriat te chawimawina hun an hmanga. Infiamna khawvela hmingtha National level a medal la phak chin, University a Gold Medalist-te, MBBS, MS leh Ph.D hlawhtling taka sual chhuak tute bakah ramhruaitute he chawimawina dawngtu zingah hian an tel a. Pu Lalrinmawia Ralte, Minister of State pawhin chawimawina a dawn ve avangin he hunah hian a tel ve a ni.
KWCA felicitation programme hi an pawl Chairman Pu Hmingchungnunga in a kaihruai a. KWCA in chawimawina a lo pek tawh te zingah hian infiammi-7, university gold medalist-3, MBBS & MD-2, Ph.D-2, Group A Officer-15, MES-3, MHS-1, MF&AS-2,MSS-1, MIS-1, MPS-2,MCS-2,IAS-1,MLA-1, Minister-2, Advocate-1, AMC councillor-1,MPS-2 leh pastor-8 te an ni. (DIPR)

*MIZO NULA VANLALAWMPUII CHAWNGTHU MLA ATAN SPEAKER IN LA LUT
Hrangturzo Assembly bial MLA thar atan thlan tlin leh Mizoram Legislative Assembly 7-na ah hmeichhe MLA awm chhun tur Nl.Vanlalawmpuii Chawngthu chu vawiin khan Mizoram Legislative Assembly Speaker Pu Hiphei chuan Mizoram Legislative Assembly Conference Hall-ah rinawm thu tiam tir in MLA atan a la lut.

Nl.Vanlalawmpuii Chawngthu MLA atana lakluhna programme ‘Swearing-in-Ceremony’ ah hian Chief Minister Pu Lal Thanhawla, Home Minister Pu R. Lalzirliana bakah Cabinet Minister-te, Deputy Speaker Minister of State-te, , Parliamentary Secretary-te leh MLA te an tel kim hle a ni.

Nl.Vanlalawmpuii Chawngthu hi Pu C. Chawngkunga leh Pi Lalliankimi Sailo fanu niin kum 34 a upa a ni a, zirna lamah MA (Political Science) niin MPYCC a nihna hrang hrang te lo luah tawh in tunah hian MPYCC President ni lai mek a ni a, Dawrpui Vengthar ah chhungkua in an khawsa a ni. (DIPR)

Vanlalawmpuii Chawngthu (Opi) - Newly elected and lone female legislator in Mizoram State Assembly

*MIZO FOOTBALLER IN NUPUI NEI DAWN
Mizo tlangval East Bengal club a football khel mek Lalrindika Ralte (Didika) chuan June ni 5 2014 hian Lunglei Electric veng BCM Biak In ah nupui a nei dawn. A nupui tur hi kohhran dan a vawi 2 puan a la ngaih avangin kan thu dawnna ten an la zep hrih a ni.
 
*MODI-A HNUK A ULH
Vawiin khan BJP Parliamentary Board leh MP thlan thar ten Prime Minister atan Narendra Modi an thlang a, Modi hming hi party member senior L.K Advani an a rawt a ni. Modi-a chuan PM atan an thlan a pawm hnuah thusawiin hnuk ulh teuh in LK Advani an BJP tan thil tha i ti a ni a tih chu chhangin: fapa chuan a nu tan thil tha a ti lo ngai em ni? a tia, an party miten a chungah thil tha an ti chauh zawk niin a sawi. An inhmuhkhawmna Central Hall of Parliament chu a vawi 1 luhna a ni a, a thingthi a chal in chhuat sik tirin zah takin a lut a ni. Parliament house zahawm a tih thu leh Gujarat assembly house a luh hmasak ber leh CM bangla a luh hmasak ber tum te a hriatchhuah thu a sawi. An party MP te chu nihna ah buailo a ram tan a thawh chu an mawhphurhna a ngai zawk turin a ngen a, 2019 ah ram tan hmasawnna report lawmawm ka entir dawn che u ati a ni. A sorkar chu a tawp ah chuan mirethei ten an hlawkpui ber ang a ti bawk. Chhungkaw harsa tak a bul rawn tan a nih thu sawiin ram mipui ten mawhphurhn an pek leh beisei ang a hnathawh a tum thu a sawi a "Keima tan nilo in ram tan hna ka thawk dawn a ni" a ti.
 
*GUJARAT IN HMEICHHE CM NEI DAWN
An state Chief Minister tanglai Narendra Modi chu Prime Minister a nih dawn tak avangin Gujarat chuan Chief Minister thar atan nuthlawi kum 73 mi Anandiben Patel an nei dawn niin BJP hotuten an sawi. CM thar tur Anandiben Patel hi Narendra Modi hnuai a minister for revenue, urban development and roads and buildings ni lai mek a ni a, Gujarat a hmeichhe MLA ni rei ber niin kum 1998 atang khan MLA a la ni char char a, Modi a hma a Kesubhai Patel-a sorkar ah pawh khan minister a lo ni hman tawh a ni. A pasal Mafatbhai (77) nen kum 15 kal ta khan an inthen a, a fapa nen inkhat ah an cheng dun thung a ni. Gujarat ah hmeichhe CM hmasaber a ni a, ningani 22 may ah rinawmna thu tiam tir a lakluh a nih rin a ni.
 
*RUSSIA IN SIPAI LAKIR LO
Russia sorkar in Ukraine ramri a an sipai dah te lakir turin in sawi mahse an la awm reng niin NATO leh US sipai ten an sawi. Russia hian an sipai te Ukraine ramri hrul Rostov, Belgorod leh Bryansk ah a dah a, hei hian Ukraine tualchhung buaina thleng mek a remna zawnna kawng ah harsatna a siam thei ni a hria in khawthlang ram te hian lakir turin an ngen a ni.
 
*THAILAND AH SIPAI RORELNA
Thailand tualchhung politics in mumal lam an pan theih loh avang leh mipui aiawh thlan ten sorkar ngialnghet an siam theih loh avangin an ram sipai ten rorelna an laksak. Thailand sipai hotute thuchhuah chuan hei hi sipai rorelna ram din tumna nilo in buai lai a ram chhung a fel zawk nan a thuneihna la hrih chauh ni in an in sawi thung a ni. Kan hriat theuh angin hmanni lawka Thailand Prime Minister chu eiruk thubuai avangin court in an ban tir a nih kha.
 
*BUS ACCIDENT
Tukin khan J&K Ramban district a Jammu-Srinagar kawngpui ah bus 1 kham ah a tlanliam a mi 17 an thi a, mi 27 in hliam an tuar a ni.
 
*UGANDA NURSE KUM 3 TANG TURIN TI
Uganda ram a nurse pakhat kum 64 mi, HIV/AIDS vei, Rosemary Namubiru chuan a damlo enkawl lai mipa naupang a chiu dawn laiin tihpalh thilthu in a chiuna tur hriau chuan a ma taksa a vit palh a, chu chu naute nu leh pa ten an fapa chungah HIV/AIDS a kai tir thei tiin an khing a, court in kum 3 lung in tang turin an hrem.

Nurse Rosemary hian naute chiuna tur in a thisem zam (vein) a zawn sak a, chutih lai tak chuan tihpalh thilthu ah a ma kut zungtang hriau in a tai palh zauh chauh a nih thu leh a naute chiu tur chungah a hri vei HIV/AIDS thehdarh tumna a neih loh  thu a sawi ve thung a ni. Uganda ramah hian mipui 7.2% in Aids an vei mek anga chhut a ni.
 

GOOD MORNING MIZORAM
LAMTLUANG ZINGKAR CHANCHINTHAR LAWRKHAWM

*MSU IN ZIRLAI CHAWIMAWI: Nimin khan Vanapa Hall, Aizawl ah Mizo Students' Union ten HSSLC 2014 exam a zirlai tithate chawimawina hun an hmang a, Education Minister H.Rohluna chu khuallian a ni. MSU in chawimawina an hlan hi Art subject-a tithate hnenah ‘Lalziki Award’, Science subject-ah ‘Rev. Zairema Award’ leh Commerce subject-ah ‘A.Sawihlira Award’ tiin hming phuahin, zirlai 10 (stream tinah pakhatna atanga pathumna zel) hnenah an sem a ni.

*TUICHANGRAL ZIRLAI: Tuichangral Zirlai Pawl te chuan sorkar in an ngenna ngaipawimawh a Gov't. Chekawn Primary School a zirtirtu an dah thar avangin he sikul khar an tum chu an thulh leh.

*CM BIRTHDAY: Nimin khan Indian Society on Tobacco & Health, Mizoram Chapter (ISTH-M) in vawiin khan Chief Ministr Pu Lal Thanhawla chu kum 76 a tlin champhaphak denchhenin Chief Minister tum nga ni theia thlan tlin anihnaah lawmpuiin a office chamberah chawimawina thilpek an hlan.

*TUITLA CHHAR: Nimin zinga kan rawn tarlan Sairang Dur lui a chesual H.Lalhmingmawia (21) S/o. H.Lalhmingthanga, Vaivakawn, Aizawl ruang chu nimin chhun dar 12 vel khan hmuh a ni.

*MIZO PHANTOM: Nimin khan Mizo Phantom K.Chhawnthuam leh a rual a man ve K.Lalhruaitluanga, Journalist te chu court in bail a chhuah an phal sak ta.

*VAWIIN AH: BJP MP thlan tlin thar mi 282 te chuan vawiin chhunah Central Hall of Parliament ah Narendra Modi chu Prime Ministe atan an thlang ang. Narendra Modi hian PM atana thlan a nih zawh hunah President a hmu ang. Tlailamah Delhi atangin Ahmedabad a pan anga, naktuk ah Gujarat Chief Minister a nihna atangin banna a thehlut ang.

*CBSE PAWL 10 RESULT: Vawiin tlai lam hian Central Board of Secondary Education (CBSE) chuan Class 10 examination 2014 result an ti chhuak dawn. Result te hi www.results.nic.in, www.cbseresults.nic.in leh  www.cbse.nic.in ah te bakah Phone number 011-24300699,  011-28127030 (MTNL) leh 1255536 (BSNL) te hriat theih ang.

*MODI THLAKTU TUR: Gujarat CM Narendra Modi an ban chuan a aiawh tu atan revenue minister nilai Anandiben Patel a nih ring an tam hle.

*BIHAR CM THAR TUR: Bihar CM tanglai Nitish Kumar a ban thut avangin a aiawh tur in SC/ST welfare Minister Jitan Ram Manjhi (68) chu thlan a ni.

*INDIA CM NI REI BER TUR NAKTUK AH: Naktuk ah Sikkim Democratic Front hruaitu Pawan Chamling chu Sikkim Chief Minister atan lakluh a ni dawn. Pawan Chamling hi kum 63 mi niin 12 December 1994 atang khan CM a la ni char char a, naktuk ah lakluh leh a nih chuan a zawn a vawi 5 CM a nihna a ni dawn ta a ni. A term tha tak a hmang zo a nih chuan India ram a CM ni rei ber Jyoti Basu an West Bengal a kum 23 chhung CM hna a lo chelh chu a khum thei dawn a ni.

*CM LEH BAWK: Biju Janata Dal (BJD) president Naveen Patnaik pawh naktuk hian Odisha Chief Minister atan lakluh leh a ni dawn a, a ni pawh hian a zawnin tum 4 CM hna a chelh dawn a ni.

*CWC IN RAHUL-A TE NUFA BAN PHALLO: Nimin a Delhi a Congress party thuneitu sang Congress Working Committee(CWC) thukhawm chuan Sonia Gandhi leh Rahul Gandhi ten Lok Sabha inthlan a an party chakloh chu an mawhphurhna a ni tia ban an tum chu an pawmsak lo a ni.

*EMBASSY KHAR: Saudi Arabia chuan Libya khawpui Tripoli a an ram palai leh embassy a hnathawk te an sahim na ngaihtuah vangin an ko haw.

*RUSSIA IN SIPAI KO HAW: Russia President Vladimir Putin chuan Ukraine  tualchhung buaina avang a ramri hnaih a  an sipai an tirh chhuah te chu a an hmun ngai ah let leh tawh turin thu a pe.

*TULIAN: Serbia leh Bosnia ramah tuilian  in zual lam a pan zel a, mi 35 chuang in nunna an chan tawh a, mi maktaduai 1 chuang in an tuar mek a ni. Khawvel ram hrang hrang ten tanpuina leh chhanchhuah na hnathawk tur an tir lut mek.

*NUNNA HI A HLU A SIN: Britain a hmunpui nei Syrian Observatory for Human Rights te chuan zirchianna an neih ah Syria ram a tualchhung buaina thleng vang a nunna chan zat an chhinchhiah zat chu mi 162,402 an ni. UN pawh in nikum July thleng khan mitthi zat hi 100,000 an lo chhinchhiah tawh a ni.

*MINISTER RAIL IN CHILHLUM: Nimin khan Uttar Pradesh Minister of State nilai Satai Ram Yadav leh a driver leh personal guard te chu an chuanna motor in rail kawng an kan laiin rail lo tlan in a su hlum.

*OIL MAN TO: Libya ram a helpawl ten oil  supply an tihbuai vangin Asia ramah tuialhthei man a sang.

*MIZORAM HRECHIANG ANG (G.K): Mizoram state bird (Sava) chu Vavu (Hume's Bartailed Pheaasant) a ni a, Mizoram state animal(ramsa) chu Saza (Serow), Mizoram state tree (thing) chu Herhse (Mesual Ferrea/Nahar) niin Mizoram state flower(pangpar) chu Aiting (Dancing girl ginger) a ni.

*HMANLAI VAWIIN: Kum 1506 vawiin angah khan America khawmualpui hmuchhuaktu tuipui mihrang Christopher Columbus chu  Valladolid, Spain ah kum 54 mi niin a boral. A thih chhan ah hian tuipui nanta 'gout' an puh thin a mahse a hnua an zirchian na ah tunlai mithiam te chuan 'Reiter's Syndrome' niin an ring zawk. Kum 1902 vawiin angah khan Cuba ram chuan Spain sorkar lak atangin zalenna a hmu.
1874 vawiin angah khan Levi Strauss company chuan tun thleng pawh an la chin chhunzawm jeans kekawr pawl, a ipte tlang a dar(copper) chhutber vuah an hralh chhuak tan a ni. Kum 1942 vawiin angah khan Japan in Burma an la.

*THURIL: "Thil tha hian awmzia pahnih a nei, a awmzia pakhat chu thil tha famkim hi a ni a, a dang leh chu midang te tan a thiltha tih a ni." — Aristotle
--------
"Mizo ten 'april par' kan tih hi may thla ah a par chauh sia, a saptawng ah pawh 'may flower' tih a nia, 'may par' tih leh hnuhnawh pawh ni ila a pawi dawn em ni le?" Tukchhuah nuam, comment ah i duhkhawp loh lai lo sawi la, kan lo ngaichang ang che.

Mizoram state tree, flower, animal & bird