Mizoram Lok Sabha Election result & Assembly by-election result

*HEI LE MIZORAM MP THLANTLIN CHU
Aizawl DC Juhi Mukherjee, IAS, Returning Officer ni bawk chuan Mizoram MP (Lok Sabha) thlan tlin thar C.L Ruala hnenah thlan tlin ani tih entirna certificate a hlan a ni.
pix:DIPR
#mizoramloksabha_result

Newly elected INC candidate Mr. C.L Ruala was given certificate by R.O Mrs. Juhi Mukherjee, IAS @Aizawl

 *MIZORAM MP ATAN CL RUALA THLAN TLIN A NI
Mizoram Lok Sabha bial neihchhun a vote tla te chhiar zawh a ni ta a, Indian National Congress Candidate C.L Ruala chu vote 2,10,485 hmu a tling a puan a ni. A dawttu UDA candidate Robert Romawia Royte chuan vote 2,04,331 a hmu a, A 3-na APP candidate M.Lalmanzuala chuan vote 11,890 a hmu a, NOTA ah vote 6495 a tla bawk a ni. CL Ruala leh Robert Romawia Royte te vote inthlauhna hi 6154 a ni.

C.L Ruala hi 25 December 1935 khan Chawnhnu, Lawngtlai District, Mizoram ah a piang a, MLA term hnih 1989-1998 a ni tawh a, MP term 1 (2009-2014) a hmang zo tawh bawk. Kum 1966 February ni 8 khan Lalhmingthangi nen innei in fapa 5 annei a ni. Amah hi thiamna lamah B.A., B.T a nia St.Edmund's Collge leh Guwhati University atanga zirchhuak a ni. Aizawl ah Tuikhuahtlang ah an cheng a ni. Lamtluang in MP thar CL Ruala kan lawmpui e.

#mizoramloksabha_result

 

Mr. C.L Ruala winner of 16th Lok Sabha Election from Mizoram (ST) constituency.

*MIZORAM IN HMEICHHE MLA THAR NEI TA
Hrangturzo bial Assembly by-election result tih chhuah tak ah chuan INC candidate Nula Vanlalawmpuii Chawngthu  d/o. C.Chawngkunga, Dawrpui Vengthar chuan vote 6721 hmuin chak a, a khingpui UDA candidate Pu Lalduhawma'n vote 4218 a hmu thung a ni.
#Mizorambyelectionresult

Vanlalawmpuii Chawngthu (INC) winner of Hrangturzo Assembly constituency by-election.
She will be the lone female MLA in current Mizoram legislative assembly.

* Mizoram Lok Sabha bial neihchhun result chhiar mek ah INC candidate CL Rualan hma hruai mek a, UDA candidate Robert Romawia Royte in dawt in AAP candidate M.Lalmanzuala a hnung tlar ah a la thu hrih a ni.
#Mizoram_loksabha_result

Mizoram Lok Sabha election result counting going on

*RAM PUM LOK SABHA INTHLAN RESULT UPDATE
(534/543) BJP - 280; INC - 44; Trinamool - 34; Shiv Sena - 19; AIADMK - 35; AAP - 4; TRS - 11; TDP - 13; CPI(M)- 8; SP - 7; YSRCP - 10; BSP - 1; BJD - 20 ; JD(U) - 2; RJD - 4

Lamtluang (Mizo online news service) exclusive coverage of Lok Sabha election result 2014

16th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

 16.5.2014
*LABOUR NO.1 KA NI - NARENDRA MODI
BJP Prime Ministerial candidate Narendra Modi chuan a tlinna bial 1 zawk Vadodara ah a chak lawmna a athusawi ah "Hnathawktu dik tak (Mazdoor/labourer number one)" ka ni a ti. Thawhrimna vanga tling ni a inhria in Gujarat CM tumli a nih chhung vawi 1 mah chawlh (vacation) a lak loh thu a sawi a, India mipui vaibelchhe 125 chuang te tan a theina zawng zawng leh a hum pum hlan a tum thu a sawi lang bawk. Politics leh democracy ah hmelma a awm theih loh a eptu/khingpui erawh kan nei thin chauh zawk a ni a ti. "Keimah ah rinna nghat ula, kei pawh in nangmah ni ah rinna ka nghat ve bawk ang" a ti bawk. India Prime Minister thar ni mai tur Narendra Modi hi Uttar Pradesh a Varansi bial ah pawh thlan tlin a ni bawk. Natuk ah Modi hian Delhi a thleng dawn a, BJP ten ropui takin airport atanga an party headquarters awmna 11, Ashok Road thleng lo hmuah an tum a ni.

Narendra Modi hi khawvel ram hrang hrang a sorkar hruaitu ten lawmpuina an thawn a, an zingah chuan Isarael PM Benjamin Netanyahu te, Australia PM Tony Abbott te, US secretary of state John Kerry te, British PM David Cameron te, Pakistani PM Nawaz Sharif leh Sri Lanka President Mahinda Rajapaksa te pawh an tel a ni.
 
*Tun tum Lok Sabha inthlan a India political party lian te zinga chhiar theih mahse MP pakhat mah nei pha lo langsar zual te:
DMK (Dravida Munnetra Kazhagam) - Tamil Nadu
Bahujan Samaj Pary (BSP) - Uttar Pradesh/All India
Communist Party of India (CPI- All India
Maharashtra Navnirman Sena (MNS) - Maharashtra
National Conference(NC) - Jammu & Kashmir
Asom Gana Parishad (AGP) - Assam
 
*RAHUL-A TE NUFA IN AN MAWH AH NGAI
Congress president Sonia Gandhi leh a fapa, an party vice-president Rahul Gandhi te chuan news conference tawite neiin tun tum Lok Sabha inthlan a an party Congress an chaklohna chu hruaitu an nihna angin an pawm thu leh an mawhphurna a nih thu an sawi a ni. Ram mipui ten duhtak a an thlan sorkar thar lo ding tur chuan ramchhung mipui te tan thiltha leh inpumkhat nan hna an thawh an duhsak thu an nufa hian an sawi bawk a ni. Rahul-a te nufa hian BJP emaw Narendra Modi hming vawi 1 mah an lam lo a "Sorkar thar lo ding tur kan lawm pui e" tih chiah in an sawi lang a ni. Rorellai congress hian state 7 ah seat khat mah an la lo a ni.
 
*REL CHUAN MAN TO DAWN
Indian railways chuan inthlan te a zo ta bawk a 20 May 2014 atangin rail chuan man 14.2% in a ti to dawn a, tin, bungraw thawn man 6.5% in an ti sang dawn bawk.
 
*MIZO MUSIC VIDEO THAR CHHUAK DAWN
Zanin dar 7 hian CYMA Hall, Tuikhuahtlang ah Mission Veng YMA North Zaipawl te music video siam 'Zokhaw tleitir' chu tlangzarh a ni dawn. He music video hi zawrhchhuah a ni dawn lo a, a buatsaihtute te sawi dan in Mizo te rilru mil zawng tak a thlawn a thil neih tum reng reng kan nih avangin zan in zanlai atangin youtube ah entheih tur a dah a ni bawk dawn a ni. Music video inspiration hi '70 chho vel a Bollywood movie te atang a lo chhuak niin an sawi.

'Zokhaw Tleitir' music video shooting scene

 
*BJP HOTU LAWK ARUN JAITLEY A TLA
BJP hotu lawk zinga a mi Rajya Sabha a opposition leader nimek Arun Jaitley chu rampum huap a BJP in hnehna an chan mup mup laiin a dinna Amritsar Lok Sabha bial ah a tla. A khingpui Congress hruaitu hlun Amarinder Singh a hneh lo a ni. BJP hruaitu Arun Jaitley hian tun tum hi LOk Sabha inthlan a chuh vawi 1 na a nia, Amritsar bial ah hian MP nilai Navjot Singh Sidhu an lungthlu lo zet in a kian a nih kha kan la hre theuh awm e. Lok Sabha ah tling lo mahse Rajya Sabha member a nih tho avangin BJP sorkar ah chuan nihna pawimawh tak a chan tho a rinawm a ni.
 
*ASSAM CM IN BANNA THEHLUH TUM
Assam Chief Minister Tarun Gogoi chuan an state chhung a an party Indian National Congress in Lok Sabha inthlan ah beisei aia an chetchhiat avangin ama mawhphuhna angaiin President Sonia Gandhi hnenah banna thehluh a tum thu a sawi. Assam a Lok Sabha bial 14 ah awm ah BJP in bial 9 ah hma an hruai mek a ni. Tarun Gogoi a fapa Gaurav Gogoi tuna Kaliabor constituency a in candidate mek phei chu vote chhiar mek a 3-na niin BJP leh AGP candidate te hnungah a awm mek a ni.
 

*MIZORAM DIESEL MAN THAR
Thlalak ah hian en mai tur a ni e.

Diesel rates in Mizoram state

*MIZORAM: LAND USE POLICY HMANGA INBUMNA
14 May 2014 khan India national newspaper lar tak 'The Hindu' ah Mizoram mau te humhalh a tul zia Nature Conservation Foundation, Mysore a Senior Scientist T. R. Shankar Raman chuan a rawn ziak a. A point rawn tarlan thenkhat te in lo chhiar ve duh takin:

*Tlangram loneih (Jhum) hi ramngaw tichhe tu niin kan sawi thin a, mahse, chuai chuan oil palm, rubber leh horticultural plantations te hian ramngawt a ti chhe nasa zawk.

*Tlangram loneih (jhum) ah chuan thing leh maute vat in hal mah ila chemical leh fertilizers hmang lo in loneitu ten hna an thawk a kum 5 chhung in ramngaw a lo awm leh thei mai.

*Tlangram lo(jhum) leh terrace hmang a tharchhuah te khaikhin kan ching thin hi a fuh ber lo. Tlangram lo ah chuan terrace ang lo takin thlai pakhat chauh thar lo in kumtluan a chhungkaw mamawh entirnan - thingtuah tur, meihawl, ramhnuai thei, mau leh thing insak nan a chak lak tur chenin a awm vek ani.

*Thlai pakhat chauh chinna (monocrops) hmun leilet a leitha leh rannung venna hlo (chemical) hmanga buh chin leh chemical tello a tlangram lo neih (organic jhum) khaikhin kan ching fo mai hi apple leh sethlum khaikhin ai pawh in a remchang lo zawk a ni. Em khat a Lakhuihthei hlang dah in nge em dang a buh, thlaihnah, sum chang thlai, tuahthing, mau te remkhawm in kan mamawh phuhruk kim zawk ang? tih ang vel a ni.

*Jawaharlal Nehru University a zirtirtu Prof. P. Ramakrishnan chuan "Tlangram loneih(jhum) hi economic takin a hlawk a, ecological tak in a rintlak bawk" a lo ti a ni.

*State sorkar in tlangram loneih(jhum) tihtawp tumin NLUP hmangin pawisa tam tak a seng a, mahse NLUP kalpui a nih hma in tlangram lonei am tam em em a, chuti chung pawh in Mizoram leilung 90% chu ramhnuai a la ni thei tho a, a mauhmun tam zawk awmna te hi tlangram loneihna an uar hmun ah zel zawk a ni.

*Tunhnai a Mizoram a ramhnuai huam chin (forest cover) lo tlem ta lutuk te hi tlangram lo nei an tlem tak zel hnu a ni. Huan/lo nghet nei an pung zel te hi ramhnuai ti chereu tu an ni ve zel tho a ni.

*Oil palm chin a nih avangin kum 10 chhungin Mizoram ah ramhnuai 17,500 hectares a zau chu thiah darh vek a ni. Oil palm hian ramsa leh thlai tam tak a hnawt tiau a, hman a mau tamna khua nithin mahse thlai dang chin duh vang a mauhmun an thiahna khaw thenkhat ah chuan hmun dang atangin mau an lei a ngai ta hial a ni.

*Lo nghet nei an tam chho a, mauhmun pawh rei a leng hman ta lo. Tichuan, mauhmun kum 10 leng an nghah thinna ram ah te khan kum 5 ah te lo atan an vat leh ta mai thin a ni. Chuvangin ramchang tha an neih avanga buh leh thlai an thar hlawk na thin hmun ah te khan tun hma angin an thar hlawk zo ta lo thin a ni.

*Tlangram lo neih tihbo tum ai chuan a neih hlawk dan zawk leh awmze nei a mauhmun humhalh dan te inzirtir zawk nise. Kum reilo te chhung a lo atan a mauhmun vat thuai thuai lo a, len rei tir deuh dan ngaihtuah nise. Chumi kar lak ah ramchang tha neih theih na tur a nih phawt chuan sorkarin tuna eizawnna tur dang kawhmuh nan a NLUP hmang a sum an sem tho ang hian thingtlang khua te hnenah mauhmun tha zawk a awm theih nan tanpuina te sem ve thin se.

*Sorkar fing takin policy mumal tak duang a tlangram loneih awmze nei zawk a an kalpui chhunzawm thuai loh phei chuan khuanu leng in Mizoram mauhmun tha tak tak leh mawi tak tak a dah te hi reilote ah an la ral zo mai ang tih a hlauhawm.

A chung a mite hi a tlangpui kan lo hriat theih nan thiam tawkin Mizo tawng in kan han ziak chhuak a nia, a saptawng a article original chhiar duh tan a hnuaia link ah hian en mai tur a ni: http://www.thehindu.com/opinion/op-ed/mizoram-bamboozled-by-land-use-policy/article6005950.ece

 

*GOOD MORNING MIZORAM:
LAMTLUANG ZINGKAR CHANCHINTHAR LAWRKHAWM

*LOK SABHA VOTE CHHIAR NI: Chibai le, khawvel a democracy ram lian ber India chuan vawiin hian sorkar laipui a roreltu tur Lok Sabha 16-na inthlan result puanna a nei dawn a ni. ECI ruahman ang chuan zing dar 8 atanga tlai dar 5 chhung a chhiar zawh hman tur a ni. India ah hian mihring tluk leh dingawn 1.3 chuang kan awm mek a, vote chhiarna hi India ram pumah hmun 989 siam a ni. Mizoram ah pawh MP ni lai INC candidate CL Ruala leh eptu lam tangrual UDA candidate RObert Romawia Royte te an in khing a, tunge chak zawk ang tih chu vawiin hian a chiang dawn ta a ni. Vawiin vek hian Hrangturzo bial a Assembly by-election result pawh puan tel a ni ang.

*VOTE CHHIAR NA TURTE: Mizoram in Lok Sabha seat 1 kan neih a Member of Parliament tur thlanna result chu tukin dar 8 atang hian district hrang hrang ah vote tla te chhiar a ni ang. Vote chhiar na hmun (Counting hall) tur te:
Aizawl District: Assembly Annexe (L&J Building)
Lunglei District: Saikuti Hall
Saiha District: DC Conference Hall
Kolasib District: Revenue Office
Serchhip District: DC Office (Serchhip ah hian Hrangturzo bial Assembly By-election result chhiar tel a ni ang)
Mamit District: DC Office
Champhai District: DC office
Lawngtlai District: DC Office

*AKASVANI LAM PAWN PUANG DAWN: All India Radio, Aizawl chuan tun tum Lok Sabha inthlan result, Mizoram leh ram pum dinhmun chu vawiin hian programme kar lakah a puang chhuak thin dawn a, Chanchinthar puan hunbi pangngaite bakah chhun dar 11, chawhnu dar 1:05, chawhnu dar 3 leh tlai dar 5:10 ah te hian result ngaihthlak theih a ni ang. FM Zoawi-ah pawh a ngaihthlak theih bawk ang a, Programme kar lakah a tul dan a zirin inthlan chanchinthar hi puan thin a ni bawk ang.

News Services Division, All India Radio, New Delhi in vote chhiar leh inthlan result LIVE a a puanchhuah chu zing dar 7:55 atanga tlai dar 5 thleng lak chhawn a ni ang. (DIPR)

*DDK AH EN THEIH DAWN: Doordarshan Aizawl chuan naktuka MP Inthlanna leh Hrangturzo bial by election vote chhiar chu live in a tichhuak dawn a, Doordarshan Studio ah J.Malsawmzuala leh H Laldinmawia te an thu ang a, District tina vote chhiar thuthar ber ber zing dar 8 atanga tichhuak tanin, Mizorama vote chhiar zawhfel anih hma chuan live telecast hi chhunzawm a ni ang. Naktuk tlai dar 4.30-5.00Pm inkar hian inthlan thlirletna hun live discussion neih a ni bawk ang. (DIPR)

*ZU LEH BAWK: Thlahmasa April chhung khan MLTP Act 1995 hnuaia Mizoram Excise & Narcoticts Department te chuan zu zuar 83 leh zu rui mi 4 an man. Rakzu 1456.8 ltr leh asenchi um 4571 an man bawk.

*DAMDAWIIN REPORT: April 2014 chhunga Aizawl Civil Hospital report chu hetiang hi a ni :
Admit zat - 1247 ; Mi zai zat -1606; Nau piang zat - 390 ; X-Ray a en zat - 2360 ; Laboratory a en zat - 43398; Khawl dang a en zat- 1876 ; Damlo outdoor leh casualty a en zat - 28541; Dam lo thi zat – 66 ; Mizoram pawn lama refer zat - 218. (DIPR)

*US IN RUSsIA VAU: United States chuan Russia hnenah Ukraine inthlan ah an inrawlh vaih chuan economy hrek beh sak ah an vau a ni.

*PAKISTAN IN INDIA CHANCHINBU MI HAW TIR: Pakistan leh India in remna thuthlung an neih angin sorkar hriatpuiin ram 2 ah hian chanchinbu mi 2 ve ve awm an inphal sak tawn a, mahse tunhnai khan thupek thar siam in may 20 a Pakistan chhuahsan turin India journalist 2 - Meena Menon (The Hindu) leh Snehesh Alex Philip (PTI) te an hriattir a ni.

*PROFESSOR SUSPEND: Tunhnai a Maoist hel te nen a inzawmna nei a puh, Maharashtra police ten 9 may a an man Ram Lal Anand College a English zirtirtu GN Saibaba chu Delhi University thuneitu ten an suspend fel ta.

*INDIA PAWISA HLUTNA PUNG: Nimin kha thla 10 kalta chhung a India pawisa hlutna san lai ber a ni a, US dollar 1 leh India pawisa Rs.59.29/30 a intluk a ni.

*BANGALORE UNIVERSITY KALPHUNG THAR TUR: Nakum academic session thar atangin Bangalore University chuan UG leh PG zirlai te tan credit-based semester system tihchangtlun an tum a, UG course bikah zirlai in B.Sc/B.A kum 2 an zir zawh chuan associate degree an pe tawh dawn a ni. Kum 3 an zawh chuan a pangngai angin bachelor degree pek chhunzawm an ni ang. PG course ah zirlaiin kum 1 a zawh tawh chuan honours certificate pek anni ang a, kum 2 an zawh ah master degree pangngai pek chhunzawm anni ang.

*BRAZIL AH WORLD CUP DUHLO: Kumin a World Cup football khelhna tur ram Brazil khawpui 50 ah te nimin khan World Cup duhloh entir nan mipui an pungkhawm a, kawngpui an dan bakah motor ke(tyre) te an hal a ni. Heng Wolrd Cup thlen dodaltu te hian World Cup thlen nan a sorkar in sum tam tak a sen tur aiah mirethei te insak sak leh kawngpui tha siam te, vantlang hmasawnna tur ngaihtuah zawk turin an duh a ni.

*KRISTIAN NEIH VANGIN KHAIHLUM DAWN: Sudan ram a hmeichhe 1 Meriam Yehya Ibrahim Ishag chu pasal atan Kristian a neih avangin khaihlum turin rorelsak a ni. Sudan ram hi Muslim tamna ram a ni. He nu khaihlum tur hi nau apai mek avangin a nau neih hma chuan khaihlum a ni hrih lo ang. Amnesty International chuan sudan roreltute thuthlukna hi dem in hmeichhia raipuar mek chu a duh zawng sakhua zui phalsak turin an ngenpui a ni. Khaihhlum tur a tih hmeichhia hian Islam atanga Kristian a inlet nilo in, a naupan lai atang in a nu sakhua Kristian a awm sa niin a insawi a ni. A pa erawh chu Muslim a ni a, a naupan laiin a pa hian a awmbo san tawh niin a sawi.

*INDIA CAPTAIN IN MIZO VAL FAK: Nimin The Hindu newspaper sports column a an rawn tarlan danin India National Football Captain chuan Sunil Chhetri chuan Asian Games lo awm tur a India Under-23 list a tel tur a duh zingah Mizo tlangval East Bengal a khel mek Lalrindika Ralte hming a sawi chhuak. A sawi dan chuan "Lalrindika Ralte hi India Under-23 team a tel tur a ka duh zing a mi a ni a. Telh ngei pawh a phu a, a mah ah hian thil inthup ropui tak a awm in ka hria a, hma a sawn telh telh a, a theihna za a 50 pawh a la hmang chhuak lo zawk niin ka hri a, Nakin zelah pawh India rohlu te zing a mi ala ni ang" a ti. Chhetri hian Bangalore FC a khelhpui Siam Hangal pawh India team tel ngei turin a duh thu a sawi. India under-23 team list tur te hi puan chhuah a la nilo a ni.

*MIZORAM HRECHIANG ANG: Mizoram hian Member of Parliament (Lok Sabha) 8 kan nei tawh a, MP hmasaber chu Sangliana niin Mizo Union ticket a thlan tlin a nia, Lok Sabha 5-na (15 March 1971- 18 January 1977) ah Mizoram aiawh tur a thlan tlin a ni. MP(LS) ah hian Dr.c.Silvera tum 3 (9th, 10th & 11th Lok Sabha) thlan tlin niin Dr.R.Rothuama (6th & 7th Lok Sabha) leh Vanlalzawma (13th & 14th Lok Sabha) te tum 2 ve ve thlan tlin an lo ni tawh thin a ni.

*HMANLAI VAWIIN KHA: Kum 1770 vawiin angah khan tleirawl hmeltha kum 14 mi Marie Antoinette leh ahnu a France lalber ni chho ta rawlthar kum 15 mi Louis XVI te an innei. Kum 1881 vawiin angah khan Germany ah electric tram hmasaber mipuite hman turin a tlan tan. Kum 1952 vawiin angah khan James Bond film changtupa Peirce Brosnan chu Drogheda, Ireland ah a piang.

*ANTIA LAWM: Ram mipui te dinhmun a zir zel in ram hian hruaitu an nei thin an ti. Chuvangin ramhruaitu tha nei tur chuan mipui ten rilru leh thil tih lamah a awmze nei zawng a kan than ve a ngai a ni.

15th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

15.5.2014 
*MIZORAM CALENDAR 2015
Mizoram Calendar 2015 tur atan thlalak thehluh leh theih tawh a ni a. June 20,2014 ral hma in Directorate of Information & Public Relations Office ah thehluh tur a ni. (DIPR)
 
*Missionary Retreat for Central Region
May 15 - 18, 2014 awh tur chu Synod Mission Board hnuai a India ram laili lai a missionary thawk mek ten Missionary Retreat for Central Region, ITI Vengchhak Kohhran Biak Inah an nei tan, thupuiah ‘Krista Thuhretu’ (Tirh. 2:32) tih an hmang ang. Retreat-ah hian Rev. Vanlalbela, BEC member; Rev. C. Lalsangliana, BEC member; Upa Denghmingthanga, BEC member; Rev. P.C. Pachhunga, E/S i/c Mission & Rev. C. Chawngliana, BEC Member ten thupui awmsa hmangin Pathian thuchah an sawi ang. (Synfo)
 
*Ramhlun East Kohhran Biak In thar hawng
Nimin (May 14, 2014) khan Synod Moderator Rev. K. Lalhmuchhuakan Ramhlun East Kohhran Biak In sak thar chu Pathian hnenah hlanin a hawng a, thuchah a sawi bawk. Biak In thar hawnna programme zan inkhawmah Rev. Lalzuithanga, Senior Executive Secretary-in Pathian thuchah a sawi bawk. Ramhlun East Kohhran hi March 13, 2010 khan Branch Church atan hawn a ni a, November 13, 2010 khan Rev. R. Lalnuntluanga, Moderator, Aizawl Bethel Presbytery-in Kohhran puitlingah a hlangkai a ni. Biak In thar hi a dung 75ft. a ni a, a vang lam hi 48ft. a ni. (Synfo)
 

*VOTE THLAK THAT AH TUMAH CHHUAK LO
Vawiin khan EC thupek angin Nagaland a Wokha District chhung 39-Sanis assembly constituency huam chhung a polling station 5 ah Lok Sabha inthlan that na neih a ni a, mahse, tumah vote thlak tur a an chhuah duh loh avangin polling duty te pawh an hawihai hle a ni. Mipui te hian vote thlak that tulna an hre lem lo niin a lang.

(THUBELH: Naga mipui te hi an duh zawng ah hi chuan tanrual hi an thiam hle niin a lang. 30 March 1953 khan kha tih lai India PM Jawaharlal Nehru khan Naga buaina sawifel pui tumin Nagaland khawpui Kohima a tlawh a, thuneituten Nehru biak emaw an memorandum thehluh emaw pawh an phalsak loh avangin a thusawi ngaithla tur a mipui singkhat pungkhawm te chu inthurual in Nehru thusawi hma in an tho suau a an hawsan ta vek mai a, Prime Minister meuh thusawi tur hma a mipui haw zo vek chu a hrilhhai thlak ve ngei ang le.)

 

*INTHLAN RESULT LAWM PHALLO
Election Commission of India chuan naktuk a Lok Sabha inthlan result puan a nih hunah tupawh chak se Uttar Pradesh ah leh tunhnaia buaina chhuahna Assam a district 3, Baksha, Chirang leh Kokrajhar ah te lawmna siam a phallo. He thupek hi state sorkar te hnenah khauh tak a kalpui turin a hriattir tawh nghe nghe a ni.

 

*INNEIH TLAI LUAT AWM LO
Tum tam tak chanchinthar lo luah tawh thin Congress hruaitu hlun leh AP Governor hlui ND Tiwari (89) chuan tunhnai a ama fa ngei a ni tih a pawm tak Rohit Shekhar a nu Ujjwala Sharma chu vawiin khan Lucknow ah 'tiam tlat e' a tihpui tlai khawhnu leh a ni. Rohit Shekhar hian a pa ngei a ni tih finfiah phut in court ah vawi duai lo a kal thin a nih kha, kan la hre vek in a rinawm.

 

*KHAWVEL A ZUHEH BER CANADIAN
World Health Organization (WHO) in surevey report an tlangzarh thar berah chuan khawvel a ram hrang hrang te zingah Canada ram mipui ten zu an heh ber a, a dawt ah America mipui te anni. India leh China ah pawh zu in nasa takin an pung a ni. Africa mite rin aiin zu an in tam lo a, Islam sakhaw zuitu ram te phei chuan zu an in tam lo hle a ni. Canada ah chuan kum 1 chhung in mi 1 in zu 12.5 litre in ziah ang a chhut anni. WHO report a lan dan chuan kum 2012 chhung khan zu vangin khawvel pumah mi maktaduai 3.3 an thi a ni.

 

*TUAK THAR
Nimin a kan rawn post nupa tuak thar H.Rotluanga (Mapuia of Zephyr) leh T.Malsawmtluangi te thlalak (wedding picture) dang i la hmuh loh takin. Kan lawmpui em em e.

 

Mizo celebrity comedian H. Rotluanga (Mapuia of Zephyr) weds T.Malsawmtluangi (Tawii)

Zephyr Drama club frontman H Rotluanga (Mapuia) weds T Malsawmtluangi

GOOD MORNING MIZORAM:
LAMTLUANG ZINGKAR CHANCHINTHAR LAWRKHAWM
*HMANGAIHBERTE LENNA: Kolasib khawpui ah sorkar kar nan a nimin atanga total bandh neih mek chu tukin zing dar 5 thleng khan neih a ni. Nizan ah Rengtekawn leh Thingdawl lam atanga motor tangkhang te Diakkawn ah an lut khawm huk a, hei vang hian nawrh huaihawttu te leh khualzin te inkarah boruak a thalo a chhuak hman tep ni a sawi a ni. Tun tum total bandh hi Kolasib MZP te meizang hlaptu ber anni a, NGO dang tam takin an thlawp loh mai bakah mipui te tawiawmna pawh tum dang aiin an hmu tha lo niin a hmun a awm ten an sawi. He thu ziah a nih lai hian bandh hi kaltlang pui zel an tum leh tum loh hriat hman a ni ta lo!

*CHHAKTIANG KAWLRAWN: Nimin piah khan Champhai DC office ah bawrhsap Sangdingliana IAS kaihhruaina in mipuite nitin mamawh hrang hranga mawhphurtuten Joint Meeting an nei. An thurel zingah vairam atanga nitin mamawh an kham tawk loh avangin khawchhak (Burma) lam atanga lakluh dan tur ngaihtuah a hmalak mai nise an ti a, hei hian buhfai indaihlohna pawh a ziaawm an beisei a ni.

*LAI NU HO INKHAWMPUI: Lai Women Association(LWA) General Conference Vawi 12-na chu nimin khan Central YLA Hall, Lawngtlai-III ah neih tan ani. He inkhawmpui hian mitthi kuang ah pangpar dah tawh lo nise an ti a, an inkhawmpui hi vawiin ah an tiak ang.

*ATM THAR: Mamit DC Complex chhung ah SBI ATM Booth hawn thar a ni. Tihian Mamit district huam chhungah SBI ATM 3 a awm ta a, Mamit ah 2 leh Zawlnuam a 1 a awm a mek a ni.

*TUIKUK VOTE CHHIAR DAWN: Nimin khan Election Commission of India thupek angin Tripura refugee camp a Bru (Tuikuk) te vote chhiar turin sorkar mi pawimawh ten Mamit chhuahsan in Tripura an pan.

*SUMO CHUAN MAN TITO: Saiha leh Aizawl inkar sumo/maxi cab chuan man Rs.700 atangin Rs.800 ah tihsan a ni. Tin, Lunglei leh Aizawl inkar sumo/maxi cab chuan man pawh Rs.330 atangin Rs.400 ah tihsan a ni.

*INDIA HMARCHHAK KRISTIANTE: Vawiin May 15 atanga Pathianni zan thleng awh tur India hmarchhak a Kristian inzawmkhawm pawl North East India Christian Council (NEICC) Inkhawmpui vawi 76-na (First Biennial Session) chu Churachanpur, Manipur-ah neih a ni dawn a. Thupui atan I puan in hmun chu zauh rawh (Isaia 54:2) a ni ang. NEICC inkhawmpui hi Rev. Chawnga Memorial Chapel, Sielmat ah Evangelical Free Church of India (EFCI) kohhran ten an thleng dawn a ni.

*KHAWLTHLUAKNEI ZIRDUH TAN: Pawl 10 pass chin tan Synod Multipurpose Training Centre, Mission Vengthlang, Aizawl-ah Certificate in Computer Application Course (6 months) zir theih, 5.6.2014 thleng SMTC ah dilna thehluh theih.

*INCOME TAX ZIRCHIANG: Nimin khan MZP Pisapui Confrence hall ah MZP buatsaih in “Seminar on Income Tax” neih a ni. R.L. Rinawma IRS, Principal Secretary to the Gov’t of Mizoram buatsaih ‘Income Tax bihchianna’ tih thupui leh C.Zothankhuma IDAS, Registrar Mizoram University buatsaih ‘Tax Payer tana Financial Management lama hmasawnna’ tih thupui hmang in paper an present a, Lalhriatrenga Chhangte, Deputy Controller of Mines, IBM Bhubaneshwar hnen atangin ‘Corruption dona leh mimal hmasawnna' tih paper ngaihthlak a ni bawk.

*BJP SENIOR TE: BJP President Rajnath Singh chuan an party in Sorkar laipui ah hnehna an chang a nih a, Narendra Modi PM a nih chuan an party mihlun PM atana Modi duhlo tute LK Advani, Murli Manohar Joshi leh Sushma Swaraj te chungchang leh mawhphurhna an chan tur vel chu party in an la ngaihtuah ang a ti.

*KERALA PUITHIAM HLAWHTAM: Kerala khawpui Thiruvananthapuram a Hindu temple lar tak Sree Padmanabhaswamy temple a puithiam luber (thanthris) chu thlakhat a Rs.Nuai 5 hlawh pe turin temple adviser Gopal Subramaniam chuan Supreme Court ah report a thehlut. He temple hi India ram mai nilo khawvel pum a Hindu temple hausa ber niin US dollar tluklehdingawn 20 hu thil hlu an kawl a ni.

*LALU INSUM ZO LO: Nimin a Bihar khawpui Patna a RJP hotupa Lalu Prasad an press conference a neihna ah, an party in BJP kaihhruai NDA an zawm dawn leh dawn loh chanchinbumi 1 in a zawh laiin insum zo lo in "Engtik kumah nge i pian? Ka politics kalpui dan hrechiang hawt lo chuan chutiang zawhna chu min zawt buai lo mai rawh" a ti a ni awm e. BJP zawm chu a tum chiah lo a nih hmel.

*MAHSE, RAHUL-A A TEL VE LO: Nimin a Rahul-a nu Sonia Gandhi in Prime Minister Manmohan Singh thlahna chawlhlui a buatsaih ah Congress Vice President Rahul Gandhi a tel ve lo. Rahul-a hian kar hmasa inrinni khan PM hi hmu in he zanriah hi a kil pui hman loh tur thu a lo hrilh lawk tawh thung a ni. Rahul hi Delhi ah awm loh vang a tel thei lo ni a sawi a ni.

*SAZU KUA ANG A LEI LAIH PHALLO: Meghalaya sorkar chuan an state chhung ah sorkar hriatpuina leh kaihhruaina nilo a mahni remchan ang ang a lungalhthei lo laihchhuah ve ringawt chu an khap ta. Hetiang a mahni a lungalhthei laihchhuahna khur lo siam ve tawp thin hi a saptawng chuan "Rat hole mining" an ti a, Mizo tawng chuan "Sazu kua anga lungalhthei laihchhuah" tihna te pawh a ni thei mai awm e. Jowai leh Cherapunjee vel a kawl tawh chuan in hriatthiam kha.

*3rd FRONT THLAWP LO ANG: Congress General Secretary Digvijay Singh chuan sorkar laipui ah an party Congress in sorkarna an chang lo a nih pawn party te zawk infawmkhawm in 3rd front an siam pawn an thlawp loh tur thu a sawi.

*ARUNACHAL AH TUILIAN HLAUHAWM: Tunlai hian chhum lo chat lo in Arunachal hmun thenkhat ah ruah a sur a, chuvang chuan khaw tam tak ah tuilian an tawn palh a hlauhawm thu sorkar thuneitu ten an sawi.

*LUNGHLU ZIRNA: India ramah hian Lunghlu zirna a awm tih i hre tawh ngai em? Kum 1978 a din Indian Diamond Institute (IDI), Surat, Gujarat chuan course thar synthetic diamonds telh thar an tum.

*MIZORAM HRECHIANG ANG: Mizoram a puk lianber chu Pukzing puk niin he puk hi Mualzavatan bakilh hmang a laih kuak ni a sawi a ni. Mizoram larsap(Governor) hmasaber chu Hiteswar Saikia niin 20.2.1987 atanga 30.4.1989 thleng atang a ni.

*HMANLAI VAWIIN: Kum 1957 vawiin angah khan zaithiam Elvis Presley chuan a halem kawr a lempalh avangin Los Angeles damdawiin ah hruai a ni a, a kawchhung atangin lakchhuah turin dahluh a ni. A vawi khatna atan kum 1940 vawiin angah khan US ah nylon stockings hralhchhuah a ni. Kum 1948 vawiin angah khan Israel in independence an puan atanga darkar reilo te ah an thenawm ram Transjordan, Egypt, Syria, Iraq leh Lebanon ten an do rawn nghal.

*THURIL: "I la suangtuah theih chuan, i ti thei tih inhria ang che" - Walt Disney
---------
Lamtluang pawh sangriat kan chuang e. Singkhat tlin hlan kan nghakhlel, i thian/bialnu/bialpa/nupui/pasal te mawlh khan an lo la like ve lo ang e. Engpawh nise nuisak phawt mai teh, nui var var chung a ni hman tan hi inchhirawm loh thin! A chung a mite ho khi i chhiar chhuak dap (CCD) em le?

14th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

14.5.2014

*India President hlui APJ Abdul Kalam chu University of Edinburgh, Scotland te chuan India ram tan a science and technology hmasawn nan a a thawh that em avangin honorary doctorate an hlan. Abdul Kalam hian India chuan vision nei tha ram hruaitu a neih a ngai a ni ti.

 

*SONY COMPANY TLACHHIA
Japan ram electronic bungrua leh hmanraw chakkhai siam chhuak tu lar SONY chuan kum 1 chhung in US $ Tluk leh dingawn 1.3 an hloh niin an in sawi. An hloh neih let leh tum hian tunlai hian company hotuten kalphung thar an duang mek a ni.

 

*TURKEY LUNGALHTHEI KHUR CHIM
Nizan leh tukin lamah pawh kan rawn post tawh Turkey ram a Soma khua a lungalhthei khur (Coal mine) chimah thizat an pung zel a tunah hian nunna chan zat chu mi 245 an tling tawh niin BBC chuan an puang. He chhiatna a thlen avang hian an ram Prime Minister Recep Tayyip Erdogan chuan ram pawn a zin a tum pawh thulh in Soma khua hi a tlawh a, chhanchhuah hna thawh mekte mit ngeiin a enfiah a ni. Energy minister Taner Yildi chuan lungalhthei khur chhung ah hian hnathawk mi 787 an awm ni a hriat niin an zing a mi 368 chu chhanchhuah an ni tawh a, midang 120 te chin erawh hriat thiam a la har niin a sawi. Lungalhthei khur chimna Soma khua hi an ram khawpuiber Istanbul atanga chhimlam km 250 a hla a awm a ni.

 

*CHI LEH CHI INTIBUAI
Tukin khan Hyderabad Old City (Charminar awmna lam) Kishanbagh ah Sikh leh Muslim te intihbuai avangin mi 3 in nunna an chana, mi 17 in hliam an tuar, hliam tuar zingah hian police te pawh an tel. Cyberabad police ten helai veng huam chhung ah hian buaina dang a chhuah tawh loh nan curfew an puang mek a ni.

 

*KUM 500 HNUAH COLUMBUS-A LAWNG HLUI SANTA MARIA HMUCHHUAK
America khawmualpui hmuchhuaktu Christopher Columbus-a lawng hmingthang tak 'Santa Maria', kum 500 kal ta a tuipui a kehchhe ta ni a rin chu tunhnai khan Haiti hmar lam tuipui chhungril ah an hmuchhuak niin a sawi a ni. Massachusetts marine investigator Barry Clifford chuan an thil hmuchhuah hi ngun tak a zirchian pawh in Santa Maria lawng ngei kha nia an hriat thu a sawi. Kum 1492 khan Christopher Columbus chu Asia panna kawng hnai zawk zawn tumin lawng 3 hmangin Spain a chhuahsan a, chumi kum Krismas ni chuan Haiti hnaih tuipui ah Santa Maria lawng hi a chhia a, siamthat rual a nih tawh loh avangin thil pawimawh thenkhat an la a, tichuan an kalsan ta a ni. He lawng hlui hmuchhuah hi Santa Maria a ni ngei em tih erawh chu Haiti Sokar leh History Channel te nen a tangrual zirchianna a la neih chhunzawm zel ani dawn a ni. A hria ten an sawi danin an hmuchhuahna hmun hi Columbus-a'n a diary a lawngchhiatna hmun a sawi nen pawh in mil viau ni awm tak a ni.

 

*MAPUIA ZEPHYR IN NUPUI NEI
Mizo fiamthu thiam lar H.Rotluanga (Mapuia of Zephyr) leh Chanmari West nula T.Malsawmtluangi te tukin khan Aizawl Dinthar Presbyterian Kohhran Hall ah an innei. Kan lawmpui e.

Zephyr drama club frontman H Rotluanga weds T Malsawmtluagi

 

*MANGTHA PU PRIME MINISTER
Kum 10 zet Congress kaihhruai UPA sorkar hnuai a India Prime Minister hna thawk tu Manmohan Singh chu nimin khan nitin a kaina office South Block staff ten thlahna hun an hmang. Hemi hnu hian a Prime Minister nupui Gursharan Kaur chuan an chenna In 7 Race Course Road-ah PM office staff te nen hian inthlahna hun a huaihawt sak bawk a ni.

Prime Minister office awmna South Block staff te aiawh in national security advisor Shivshankar Menon chuan Prime Minister Manmohan Singh hi world map a present a, he map ah hian PM a nih chhunga khawvel ram hrang hrang 110 a tlawh te tarlan a ni.

Manmohan Singh hian nimin khan official tak a file pawimawh a tihfel hnuhnun ber pawl niturin Andhra Pradesh governor tanglai ESL Narasimhan chu Telangana leh Seemandhra state Governor nikawp tur a ruatna a ziak fel a, hei hi cabinet in la pawmpui leh tur a ni. Tin, nimin vek khan Union Cabinet meeting a neihpui a, chutah chuan Army Chief thar tur ruatna leh FDI kaltlang a damdawi lam a sumdawnna an pawm bawk a ni.

Manmohan Singh hian may 17 ah cabinet meeting hnuhnung ber a neihpui anga , chumi hnuah Prime Minister atang a a banna lehkha India President hnenah a thehlut dawn a ni. Prime Minister thar lakluh a nih hnuah Delhi a Motilal Nehru Marg ah an insawn chhuak tawh dawn a ni.

Tunkar inrinni hian India President Pranab Mukherjee chuan a chenna Rashtrapati Bhavan ah Prime Minister kalchhuak tur Manmohan Singh hi thlahna zanriah a buatsaih sak dawn bawk a ni.

I lo la hrelo mai thei a Manmohan Singh hi Lok Sabha member nilo a India Prime Minister a zawn a ni thei awm chhun a ni a, Assam atanga Rajya Sabha member a thlantlin niin tum 4 thlan tlin a ni tawh a ni. An nupa hian fanu 3 an nei a, an fanu pakhat Daman Singh chuan Mizoram ah hun engemaw chen rawn awmchilh in saptawng in lehkhabu "The Last Frontier: People and Forests in Mizoram" tih a ziak nghe nghe. Kum 2004 May ni 22 khan India Prime Minister 13-na ni tur a lakluh a ni a, Sikh zing a Prime Minister nihmasaber a ni. An party Congress in sorkarna siam leh dawn mahse Prime Minister nih zui a tum tawh loh thu a sawi chiang tawh a ni. Mangtha, Pu Prime Minister!

 

*GOOD MORNING MIZORAM: LAMTLUANG CHANCHINTHAR LAWRKHAWM
*KAN VUNVAR MIKHUAL TE: Germany ram a football club pakhat India ram tlawh a lo zin mek, TSG 1899 Hoffenheim te chuan nizan a AR Lammual a Mizoram XI team 3-0 a an hneh hnuin tukin hian Mizo infiammi te football camp an neih pui leh dawn. Chumi hnuah vawiin ah Lengpui airport atangin Kolkata panin an thlawk chhuak leh ang.

*KOLASIB BANDH: Kolasib a tlawmngai pawl thenkhat 'Joint NGO" te chuan tukin zing dar 5 atanga ningani zing dar 5 thleng Kolasib ah Total Bandh huaihawt an tum. Kolasib kawngpui leh sorkar hnathawk post dah belh te leh Higher Secondary School thar siam te an ngiat a ni.

*MSSC MEETING: Nimin khan Mizoram State Sport Council chu an president, Sport Minister Zodintluanga hovin meeting pawimawh tak annei a, District Sports Committee inkaihhruaina chungchangte ; Recruitment Rules ennawn; Sport Medical Section tana hmanraw lei dan ; leh Pykka staff te Sport council-a rawihzui chungchang te an ngaihtuah a ni.

*INTHLANG RAM TIH TAKAH: Lok Sabha leh 28 Hrangturzo (ST) Assembly Bial Bye-Election inthlanna a Serchhip District chhung Constituency pathum a vote tlate chu May 16, 2014 Zirtawpni chawhma dar 08:00 atangin DC Conference Hall leh DC Office Establishment Room-ah te chhiar a ni dawn a. He hunah hian Polling Station hrang hranga Presiding Officer zawng zawngte chu Identity Card kengin DC office-ah awm ve vek tura hriattir an ni.(DIPR)

*UN TEAM HAW TA: Chawlhkar khat chuang Mizoram hmasawnna tur zirchiang tura lo zin UN Team te chuan nimin khan Mizoram an chhuahsan leh ta. Mizoram hausakna hlawkpui tur zawnga development kalphung buatsaih an tum thu an sawi.

*MI HEK THEIHNA BILL: India President Pranab Mukherjee chuan Sorkar hnathawk te an diklo a ni tih a ruk a thuneitu te hnen a hek na thlen theihna dan Whistleblowers Protection Bill, 2011 chu a pawmpui ta. He dan thar hi nikum a Parliament thlasik thutkhawm khan an pawm a nih kha, miin he dam hmang a sorkar hnathawk thiltih dik loh a hailan pawn sorkarin venhimna tha tawk a pek na tur dan pawh telh a ni.

*MISSIONARY INKHAWMPUI: Naktuk zan atanga Pathianni zan thleng awh tur Mizoram Synod Mission Board hnuai a India ram laili a missionary thawk te pualin Missionary Retreat for Central region chu ITI Vengchhak Kohhran Biak In ah neih a ni dawn.

*CANCER HOSPITAL CHAPLAIN: Rev.Zawlthuama, Bawngkawn chu Zemabawk Cancer Hospital ah Chaplain thar atan Mizoram Synod in a ruat.

*KRISTIAN CHHUNGKAW NI: Mizoram Baptist Kohhran chuan May 18 (Pathianni) atang khian Kristian Chhungkaw Chawlhkar hmang tanin May 23 (Zirtawpni) zan thleng an hmang dawn a ni.

*MODI THLAKTUTUR: Gujarat CM ni mek Narendra Modi chu an party BJP in Lok sabha inthlan a hnehna an chan chuan CM atan a mah thlak tu tur vote chhiar tuk 17 May ah ngaihtuah a ni ang.

*RSS IN KUM UPA DUHLO: Hindu pawl chak tak leh BJP te nen a thawkho tlat RSS te chuan sorkar laipui ah BJP leh an thawhpui ten hnehna an chang anih chuan politician kum 75 chunglam te chuan an aia nau zawk te hmun an kian thiam tur a ni an ti.

*ISRAEL PM HLUI TANG DAWN: Israel Prime Minister hlui Ehud Olmert (68) chu Tel Aviv Court in Jerusalem Mayor a nih lai a Holyland project a thamna pawisa alo dawn avangin kum 6 tang tur leh US $nuai 3 chawi turin a chungthu an rel sak. Ehud Olmert hi kum 2006-2009 chhung khan Israel PM a ni.

*OBAMA THUCHAH: US President Barack Obama chuan India mipui ten tluang taka ram hruaitu tur an thlang thei chu a lawmpui thu leh tupawh in sorkarna siam se US nen a inlaichinna tha neih a duh thu a sawi.

*LUNGALHTHEI KHUR CHIM: Nizan a kan rawn post tawh Turkey ram a lungalhthei khur chim ah nunna chan zat chu mi 157 anni tawh a, mi engemaw zat lungalhthei khur chhung ah hian an la tangkhang mek bawk a ni.

*DU IN DAN THAR SIAM: Delhi University thuneitu te chuan an hnuai a awm college hrang hrang te chu 2014-15 session atana admission tih zawh a nih veleh, an website theuh ah zirlai te hming tarlang vek turin hriattir na chhuah.

*COACH BAN: EPL club Tottenham Hotspur chuan an manager Tim Sherwood chu thla 6 chhung an rawih hnuah an ban fel der.

*THURIL: "Thingphun hun tha ber chu kum 20 kal ta tawh khan ania, mahse a thaber dawttu chu vawiin a phun a ni" - Chinese Thufing.

*AIR LIVE PHONE-IN: Tun Inrinni lo awm tur May 17, 2014 chawhnu dar 1:05 - 2:00 inkar telephone a zawhna leh chhanna AIR Aizawl Live Phone-In programme-ah chuan ‘Rannung Seh (Scrub Typhus)’ tih chungchanga hriat duh neite tan a zawh theih dawn a. Mipui zawhna te chu Dr. Pachuau Lalmalsawma, Nodal Officer, IDSP, DHS leh Lalfakzuala, Entomologist, IDSP, DHS, Dte. of Health Services, Aizawl ami ten an rawn chhang ang a. A zawt duh tan telephone no. 0389-2322515 leh 2323148 ah emaw a biak pawh theih ang. (DIPR)

*MIZO HISTORY: British in min awplai 9 April 1946 khan Mizoram a political party hmasaber tur Mizo Common People's Union din a ni a, hemi hnu hian Mizo Union Party ti a thlak a ni.

*HMANLAI VAWIIN KHA: Kum 1796 vawiin ang ah khan khawvel a zawnghri (smallpox) vaccine hmasaber Edward Jenner hnen ah pek a ni. 1811 kum vawiin angah tho hian Paraguay chuan Spain lak atangin zalenna an hmu. Kum 1948 vawiin ang ah khan a lawm tunlai a Isareal ram kan tih hi a lo pian ni, an ram Prime Minister ni ta David Ben-Gurion chuan zalenna thuthlung 'Declaration of the Establishment of State of Israel' a puang a ni.
--------------
Lamtluang page hi nangmah tiam in like tu mi 7653 kan nei mek a, sangriat tlin nan mi 347 kan la mamawh a ni, i lo tan ve angai a nia. Smsgupshup hmang a Lamtluang in sms news kan thawn chhuah thin lai a min join sak thin tu kum lam a upa tak tak, FB hmang ve bawk silo te khan FB ah hian page kan nei tih hi hria se an like ve chak in kan ring thin! Ni hman nuam le, i chhiar zo vek em aw? comment ah i rawn sawi angai a nia!

 

 

*INDIA SIPAI HOTU THAR TUR RUAT FEL
Lamtluang ah pawh vawiduailo kan rawn post tawh thin tuna sorkar laipui a rorel mek UPA chuan Lok Sabha inthlan result puan hma a thuthlukna lian tham a siam hnuhnun ber pawl niturin eptu lam BJP te dodalna nasa tak karah India Army hotuber (Chief/General) thar atan Lieutenant General Dalbir Singh Suhag chu an ruat fel ta. He thuthlukna hi Prime Minister kaihhruai Appointments Committee of Cabinet (ACC) chuan an tifel ta a ni. Tuna India sipai General nilai General Bikram Singh hi kumin July ni 31-ah a chawl tawh dawn a, a chawlh veleh Lt.Gen. Dalbir Singh Suhag hian a thlak dawn a ni.

Lieutenant General Suhag (59) hian kum 1970 ah National Defence Academy (NDA) zawmin kum 1974 khan 4/5 Gorkha Rifles ah sipai officer hna hmasaber chu zawm a ni. Hmun hrang hrang ah post a ni a, kum 2012 khan Jorhat (Assam) leh Dimapur (Nagaland) ah intelligence operation hlawhchham vangin khatih lai Army General V.K Singh khan "Discipline and Vigilance ban" hmangin a hrem a, mahse a hnu lawk a hremna hi a hlip leh a ni. Sorkar laipui ah BJP an rawn chak a nih a, Congress kaihhruai UPA sorkar in a appointment an siam hi an duhlo a, an tidanglam leh te a nih ngawt loh chuan, kum 2016 December ni 31 ah pension in a chhuak chauh dawn a ni. Amah hi tuna India leilam sipai hotuber dawttu Army Vice Chief nilai mek a ni.