1st May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
1.5.2014

*Zoram thalai te hian lehkhabu tha chhiar i uar thar leh ang u. Social networking hi a nuam a, a bengvar thlak bawk a, mahse finna tak tak hi chu mithiam te kutchhuat lehkhabu chhiar hian a lo fiah in a chiang ber mai thin zawk a ni. Finna nei duh lo Zo thalai kan awm em ni le? Kan awm lo, tun atang chuan lehkhabu tha chhiar kan uar tawh dawn a ni. A dik em?

 

*North East Students Organisation (NESO) Vice President hlui Lalmuanpuia Punte, Aizawl Kanan veng chu Zoram Nationalist Party (ZNP) Thalai Headquarters President atan ruat thar a ni.

Former NESO leader Lalmuanpuia Punte is recently elevated to ZNP Youth President

*KOLASIB DC LEH HAILAKANDI DC TE RAMRI A BUAINA CHUNGCHANGAH AH INBIA
Buhchangphai Ramtharzau a Assam Police ten In an tihchhiat avanga buaina chungchangah nimin tlai khan Kolasib DC Jitender Yadav leh Hailakandi DC Sam Sher Singh te Hailakandi DC Office ah an inbia a, he inbiakna ah hian Kolasib atangin SP Rishi Pal, Addl SP MS Dawngkima leh DFO Pu Lalthlamuana leh Pu Lalrinawma, ASO te telin, Hailakandi DC hi SP leh DFO ten an tawiawm ve bawk.

He inbiakna ah hian tunhnai a Buhchangphai Ramtharzau a Assam Police ten In an tihchhiat chu Mizoram sorkarin a ngai thutak hle ani tih Kolasib DC hian a sawi a. Ramri hrulah state pahnih te inkar a buaina chawkchhuak thei zawnga hma lak loh nise, tun dinhmunah kalphung pangngai zawmin (status quo) -a kal hrih nise, tiin thutlukna an siam a. State ramri ah hmalakna tharlam siam loh nisela, ramri buaina a awm leh reng reng in, Kolasib leh Hailakandi District DFO ten joint verification neih thin ni tawh sela, buaina chingfel turin DC ve ve ten dawhkan khat kila sawi ho thin nise, thilthleng a awm a nih chuan rang taka inhrilh tawn ni bawk se an ti a ni.

Tun dinhmunah Buhchangphai leh a chhehvel khua chu Boruak a muanawm tawh hle a, 1st IR batallion Platoon thum (3) -in an awm chilh mek a, Buhchangphai leh a chhehvel khua ah buaina a thlen tawhlohna turin Patrolling an nei reng a, Vairengte SDPO leh 1st IR batallion Deputy Commandent ten an thut chilh bawk a ni.

Tin, Vairengte police Station a FIR thehluh pawh case ziah fel tawh niin, a titu leh inhnamhnawih zawng zawngte zawnchhhuah hna ngawrh taka chhuizui zel a ni tih Kolasib Addl.SP Pu MS Dawngkima chuan a sawi bawk a ni. - DIPR

*CHENNAI CENTRAL RAILWAY STATION AH BOMB VAWI 2 PUAK
Tukin dar 7 khan Chennai Central Railway station platform no.9 ah Guwahati-Bangalore Express pindan S4 & S5 ah a indawt in bomb tihpuah a ni. He bomb puak ah hian Tata Consultancy Services(TCS) a thawk engineer nula kum 24 mi thlahnih chhung a pasal nei mai tur Swathi chuan nunna a chan a, midang 14 ten hliam na tak an tuar bawk. Hliam te hi Rajiv Gandhi General Hospital, Chennai ah enkawl mek anni. Nunna chan ta Swathi hi Andhra Pradesh a Guntur khu a mi niin Hyderabad atanga engineering a graduate a ni a, thla 4 kalta khan Bangalore ah TCS hi a zawm a, Bangalore atanga an khua a haw tur ti hian vanduaina hi a tawk ta a ni. Tamil Nadu CM Jayalalitha chuan thi chhung te hnenah luman Rs.Nuai 1 leh hliam tuar nasa te tan tanpuina Rs.Sing 5 leh hliam tuar nep deuh te tan Rs.25,000 pek turin thu a pe a. Railway minister M Mallikarjun Khargea pawn thi chhungte tuarpui nan Rs.Nuai 1 leh hliam tuar na deuh te tan Rs.25,000 leh hliam tuar nep deuh te tan Rs.Sang5 pek annih tur thu a sawi bawk. He bomb puak hi tute tih nge tih tun thleng in hriat a la ni lo.

30th April 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
30.4.2014 

*CONGRESS GS IN CHHASS THAR NEI
Pathlawi kum 67 mi Indian National Congress party General Secretary ni mek bawk Digvijaya Singh chuan nikum a nupui a sun hnuin tunlai hian TV journalist Amrita Rai nen an inngaihzawn thu a sawichhuak. Amrita Rai hian tweeter ah a post dan chuan a pasal nen an awmhran tawh thu leh dan anga inthenna tur a tihfel hnuah Digvijaya Singh nen a inneih an tum thu a lo tarlang ve bawk a ni. Digvijaya Singh hi kum 10 chhung Madhya Pradesh Chief Minister lo ni tawh in, tunah hian Rajya Sabha MP a ni mek a ni.

Romantic bloom: Digvijaya Singh & Amrita Rai

*Lunglen Magazine Editor Sangzuala Hmar chu Mizoram Journalist Association(MJA) General Secretary thar atan ruat a ni. MJA Gen. Secy hi MJA dan angin President thlan thar in an mi duh zawng an ruat thin a ni.

Sangzuala Hmar, Editor Lunglen

*SORKAR LEH NAGA HEL TEN INKAHHAI PAWTSEI
Sorkar laipui chuan kum 13 chhung zet Naga helpawl National Socialist Council of Nagaland (Khaplang)/NSCN-K te nen a inkahhai thuthlung an siam chu kum 1 atan a pawtsei leh a ni. Sorkar leh helpawl te inkahhai(ceasefire) pawhsei lehna thuthlung hi India sorkar aiawh in Home Ministry a Joint Secretary Shambhu Singh leh NSCN-K lam atangin Supervisor of Ceasefire Y.Wangtin ten an ziak a ni.

 
 *GOVERNOR IN HSLC TOPPER LAWMPUINA A HLAN

Vawiin khan Mizoram Governor Pu Vakkom Purushothaman chuan kumin HSLC a ti tha zual top 5-te chu Raj Bhavan ah lawmpuina a hlan.

Governor hian pakhatna 2-te Lalremruati Sailo leh Malsawmzuala Royte te chu Rs. 5000/- ve ve leh lehkhabu tha tak a pe a. 2-na atanga 5-na mi 8 te hnenah Rs. 3000/- theuh a pe bawk.

Governor chuan tuna an result tha chu duh tawk mai lovin an zir leh zelna turah tun aia tang sauh sauh turin a fuih a. Tumruhna leh taimakna nen lehkha an zir chuan dinhmun sang takah an inhlang thei a ni a ti bawk.

Lawmna inkhawmah hian Governor hi Secretary to Governor Pu Manoj Kumar IAS leh Pu R. Lalvena IAS, Director, School Education ten an tawiawm a ni. - DIPR

2014 HSLC toppers with Governor and IAS officers

*PAWNGSUAL TAWK TE DARKAR 24 CHHUNGIN MAGISTRATE HMA AH HRUAI TUR
Supreme Court chuan pawngsual tawk an awmin darkar 24 chhungin Judicial magistrate hnenah hruai ngei ngei tur tiin thupek an siam. Thubuai siam a ran zawk theih nan police officer nilo in Judicial Magistrate in direct in pawngsualtawktu statement pawh an la tawh tur a ni tiin thupek thar siam a ni. Vanduaina tawk te darkar 24 chhunga magistrate hnena hruai annih loh chuan a chhan chiang tak a ziakin investigation officer in magistrate an hrilh tur a ni tawh bawk ang. Tin, pawngsual tawktu statement chu chargesheet siam a nih hma chuan tuma hnenah puanzar phal a ni lo tiin thupek siam a ni bawk.

 
*Vawiin hian Telangana state thar lo awm tur atan Assembly leh Lok Sabha inthlan neih mek a ni. MLA thlan tlin te chu Telangana state thar a MLA hmasaber tur te anni.

29th April 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
29.4.2014

*KENYA PRESIDENT IN NUPUI TAM TAK NEIH PHAL
Lamtluang ah pawh thla hmasa a kan rawn post tawh Kenya parliament in mipa ten nupui pakhat aia tam an neih theihna (Polygamy) tur dan an pass tak kha an ram President Uhuru Kenyatta chuan dan puitling atan pawmpuiin a tak a hman a ni dawn ta. He bill hi thla hmasa a pass a nih khan parliament a hmeichhe member ten nasa takin an dodal a nih kha. He dan duhlo tute zingah hian Kristian kohhran 40 inhlawmkhawm National Council of Churches in Kenya (NCCK) pawh telin an duhloh thu nasa takin an auchhuah pui a ni. An ram kalphung ah Parliament in dan a pass chu President pawmpui angaih avangin President hian a pawmpui ta a ni. Kenya President thuchhuah chuan "Inneihna na hi mipa leh hmeichhia ten inlungrual a inzawmna an siam a ni a, kawppui 1 chauh neih(monogamy) emaw kawppui 1 aia tam (polygamy) pawh nise a pawm theih ve ve a ni" tiin.

*RUSSIA IN UKRAINE RUN AN TUM LO
US Secretary of Defense Chuck Hagel an Russian Defense Minister Sergei Shoigu bia in Russia chu Ukraine tualchhung buaina ah inrawlh tawh lo turin a ngen a ni. Russia defense minister hian US Secretary of Defence hnenah hian Ukraine in tualchhung buaina tawk mahse run an tum loh thu a lo hrilh a ni. US hian Russia chu Ukraine ramchhung a a inrawlh zel chuan khawvel ramdang te lakah a tlatlum loh telh telh dawn niin an vaukhan a ni.

*Vawiin khan Health & Family Welfare Minister Pu Lal Thanzara chuan Aizawl Civil Hospital chu chipchiar taka fanna hun a hmang.

Minister hi Dr. K. Ropari, Principal Director, H&FW, Dr. Lalbiakkima, Director, Hospital & Medical Education, leh Dr. Rosangluaia, Medical Superintendent bakah Doctor leh Nurse senior dang ten tawiawm in, Aizawl Civil Hospital-a department leh ward tin te a fang kual a. Thawktuten an harsatna tawh thin leh mamawhte an sawi chu ngaihthlak sakin, a remchan dan zel a hmalakpui Minister chuan a tiam a ni.

Accident tam avangin a bika enkawl na tur Trauma Centre mamawhna te, department thenkhat tihchangtlun ngai a awm thu te, morgue van (mitthi phurhna) indaihloh chungchang leh thawktu, a bik takin nurse indiahloh chungchang te Minister hnenah hian thlen a ni a. Referral Hospital, Falkawn tih changtlung kawng a hmalakna te, medical college din chungchanga hmalakna hrang hrang kalpui mek te sawiho a ni bawk.

Tunah hian Aizawl Civil Hospital hi India hmarchhak a sorkar hospital zingah chuan thawk tha ber pawl a ni a. Chawkawng cancer zai dam kawngah chuan North-east ah thawk tha ber a chhal theih a nih mai bakah, Aizawl Civil Hospital chu north-east state sorkar hospital zinga mit darthlalang tha lo thlak (corneal transplant) tithei awmchhun a ni a. Aizawl Civil Hospital Eye Bank ami mit darthlalang Sri Lanka-a thawnchhuah pawh a awm tawh a ni. - DIPR

Mizoram Health Minister Lal Thanzara visit Aizawl Civil Hospital

 

*DREAMHUNTER MUSIC VIDEO THAR
Mizo band chuai theilo Dreamhunter chuan "Dawn tisei tura'n" tih hla hmangin music video thar an tichhuak leh ta, a hla a nalh bakah video quality pawh a tha khawp mai, a hnuai a youtube link ah hian ngaihthlak theih e.

 

*TALIBAN MI 46 KAPHLUM
Vawiin a Afghan Interior Ministry thuchhuah in a sawi danin Nangarhar, Kandahar, Zabul, Logar, Paktiya, Helmand leh Paktika province ah te Afghan sipai ten beihpui an thlak na ah firfiak pawl Taliban mi 46 kahhhlum anni a, midang 10 hliam tuar awm in mi 26 an man bawk a ni. Taliban te hnen atang hian silai leh a mu bakah ralthuam hlauhawm thahnem tak an man tel bawk a ni.

 

*SANGHA CHITHAR HMUCHHUAK LEH TA!
Dr.Lalramliana (Tetea Lrl), Asst. Professor, Zoology Dept. Pachhunga University College chuan hian Mizoram atangin Sangha chithar (new species) a hmuchhuak thar leh ta. Khopai khaw ram chhung a Tuisih lui atangin Sangha chi thar Psilorhynchus khopai an hmuhchhuah hi International Journal Zootaxa 3793 (2): 265–272 ah tunhnai te khan khan an publish a. Khopai khua hian Tuisih an humhalh tha hle a ni.

Dr.Tetea hian Mizoram atangin kum 4 chhung lekin Sangha chithar 10 a hmuchhuak (describe) ta der mai! Mizo fish taxonomic scientist thiam tak kan nei hi a chhuanawm takzet a ni, Heng Sangha chithar te hi PUC Zoological Museum ah en theihin an awm.
http://www.mapress.com/zootaxa/2014/f/z03793p272f.pdf
Source: Hmar Lalthanzara via CHANCHINTHAR (Zofate chanchinthar inhriat tawnna)

 

*HOME MINISTER IN CHANCHINBUMI-TE A KAWM
Vawiin chawhnu khan Home Minister R. Lalzirliana chuan tunlai Mizoram chhunga law and order chungchanga sawichhuah tul a tihte tarlangin ama Office ah journalist-te a kawm. Law&Judicial Minister Pu Lalsawta, Environment & Forest Minister Pu Lalrinmawia Ralte, Parliamentary Secretary Lt.Col.(Rtd) Z.S. Zuala leh Parliamentary Secretary Pu K.Lalrinthanga ten Home Minister hi an tawiawm a.

Home Minister chuan thubelhchian dawllo leh dawta inpuhna thenkhat vanga buaina thenkhat awm mek te hi ram hmasawnna leh ram ralmuanna atana thil tha ani lova. Heng buaina te tih reh leh chhuichhuahna kawngah Mizoram Police te an chhuanawm in an rintlak thu a sawi. Court rorelna te hial rinhlelhna a awm te hi thil pawi tak thil nithei lo leh awmze nei lo a ni a ti a. Court rorelna hi sawrkar in a hriatpui lo mai nilovin tihdanglam theih pawh a ni lova. Court rorelna ah Sawrkarin thuneihna pakhatmah a neilova, a hnathawk te pawh High Court hnuai a awm an ni a ti.

Home Minister Press conference a tel journalist-ten Law & order chungchanga zawhna te chu Pu Zorammawia, IGP leh Pu Zorammuana, DIG(Range) ten an chhang a ni. - DIPR

 

*INDIA MI NOKIA CEO THAR ATAN RUAT
Tunhnai a an mobile phone sumdawnna Microsoft hnen a hralh tu Nokia company chuan Chief Executive Officer (CEO) tahr atan India ram a piang Kuwait a seilian Rajeev suri(47) an ruat. Rajeev Suri hi Manipal Institute of Technology, India atang a Electronics and Telecommunications Engineering zirchhuak a ni. Rajeev Suri hi a danglam bikna chu MBA emaw master degree nei silo a khawvel company lian ber pawl a CEO a ni pha hi a ni. Nokia hotupaber (CEO) a nih hma hian Nokia Solutions and Networks (NSN) ah hotu a ni thin a ni. Nokia hian an larpui ber mobile phone sumdawnna (Nokia's Devices & Services) chu microsoft ah hralh tawh mahse electronics thildang internet leh computer sofware dang tam tak an la siam chhuak reng tho a ni.

 

*LAMTLUANG ZINGKAR CHANCHINTHAR LAWRKHAWM
*Tunhnai a Assam police leh forest hnathawk ten Buhchangphai leilet a Mizo te in leh an thilneih te an suasam sak thin avangin Mizoram sorkar chuan nimin khan 1st IR Battallion platoon hnih (sipai 60) ramri vel abikin Buhchangphai ah te patrol turin a tir a ni.

*Liverpool striker Luis Suarez chu Professional Footballers' Association Player of the Year atan thlan niin Chelsea player Eden Hazard chu Young Player of the Year atan thlan a ni bawk.

*Sikkim khawchhak ram Thegu khua ah vur sur avangin nimin khan khualzin sanghnih chuang an tangkhang a, Black cat sipai ten tanpuiin khualzin te hi dam takin Gangtok ah an let leh thei a ni. Sikkim a vur a sur mek lai hian nimin khan Odhisa ah chuan khawlum in 40 degree celsius a pel a mi 17 khawlum vang in an boral niin sawi a ni. Odhisa ah hian Non-Ac bus te chu chawhma dar 11 atanga tlai dar 3 chhung tlan lo turin hriattir anni.

*US leh European Union chuan Russia sawisel in Ukraine khawchhak lam a helpawl te tanpuitu ah an puh a ni.

*Aigupta(Egypt) court chuan Muslim Brotherhood hotupaber Mohamed Badie leh a hnungzuitue mi 682 te chu thi turin an chungthu a rel.

*19 April zan a Khawzawl a an in a thi a chhar Ronald Lalrinpuia(25) chu Lalfakawma(23) S/o.Vulmawia, Khawzawl in damdawi duh vangin a that a ni tih police hma ah inpuang.

27th & 28th April 214 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
28.4.2014
*BUANGA'N NUPUI A NEI DAWN E:
"Lo phone tawh lo mai rawh se aw" tih atanga Zoram khawvel in kan hriat lar, Buanga kan tih tak mai, LH.Vanlalruata 'Vavaltea' S/o LH. Lalchhuanmawii Lunglei Ramthar leh K.Lallawmsangi D/o H.Lalkhumi, Bethlehem Vengthlang te chu tunkar Nilaini 30.4.2014 tlai Dar 3 hian BCM Diamond Jubilee Hall Ramthar, Lunglei ah an innei dawn.
(Thlalak - Vavaltea leh A nupui tur Malawmi)

Vavaltea (Buanga lo phone tu) leh a nupui tur Malawmi

Source: Gilbert Renthlei via Lunglei Chanchinthar Group.
Buanga nu leh Vavaltea te inbiakna ngaihthla duh tan a hnuaia youtube link ah hian ngaihthlak theih:

 
 
*NUI LAWK ANG U!
Sap Nursery Rhyme lar tak "Johny, Johny, Yes, Papa" tih chu Mizo lengkhawm thlukin ngaihthlak tur a awm ve ta a hnuaia youtube link ah hian ngaihthlak theih e.

 

*MIZO ICON STAR SARAH-I MZU MISS AH THLAN ANI
Mizoram University zirlaite kut Vibrio 2014 zawh tak ah Varsity Miss atan LPS in Mizo Icon an thlan hmasak ber tum a top 10 a lang Sarah Lalngaihawmi, M.A (Psychology) zirlai chu thlan a ni a, 1st Runner Up-ah Bernice Malsawmdawngliani (Department of Commerce) leh 2nd runner up atan F Laltlankimi (Department of English) te thlan an ni.
source: www.vanglaini.org

Mizoram University Miss Contest winners 2014
L-R: 2nd Runner up F Laltlankimi, Varsity Miss 2014 Sarah Lalngaihawmi, 1st Runner up Bernice Malsawmdawngliani
Pix: Joe Joseph

*MH370 BORUAK AH ZAWNG TAWH DAWN LO
8 March a Malaysia thlawhtheihna bo MH370 chu ram hrang hrang ten vawiin thleng khan boruak leh tui ah te an la zawng zel a, mahse an beisei ang a engmah an hmuh chhuah tak loh avangin thlawhna hmang a boruak a zawn chu an titawp ta a ni. Tuipui leh khawmual lamah chuan blackbox tal hmuh chhuah tumin la zawn chhunzawm zel a ni ang.
 
*I CHHASS HNENA I SAWI HREH LOH TUR THIL 7 TE
Inngaizawng/nupa inkungkaihna nun hlim leh hlim loh hi mi pahnih inkawp te inkar a inbiak thiam dan a zir a ni ber e an ti thin. A chang chuan kawppui te bula thil sawi loh theih loh tawn chang a awm vek thin a ni. Chung ang hun tawn lai chuan thil sawichhuah nuam vak lo nimahse nakin zel a inkungkaihna tha neih nan erawh chuan heng thil 7 te hi a bikin nula tlangval ngaihzawng nei ten mahni kawppui te an hrilh hreh tur a ni lo:
1.MIPAT HMEICHHIATNA (Sex)
I kawppui in mipat hmeichhiatna(sex) hman a duh a nangmah i inpeih silo chuan "Aih" tih hreh suh ang che. Taksa leh rilru lam in peih miah loh chung si a kawppui te tih lungawi tum duh vang chauh a sex hman hian rah tha a chhuah chuang lo a ni. In peih lo chung ai chuan "Aih, tunah lo nidang/zandang ah zawk le" tih hi a pawi reng reng lo a ni

2. KA BEISEINA NANGMAH AH
Inngaihzawnna chu engtin zel a kalpui nge i tum thin le? I kawppui chu hlawkna hmuh nan/nawmchen nan chauh nge hmalam hun hlim tak a hmanpui atan i duh tih chiang takin hrilh thin ang che. I rilru dik tak a i hrilh chuan a ni pawh in i chungah ngaidan dik tak a neih theih phah dawn a ni.

3. NANG LO ZAWK KA HMANGAIH TLAT?
Kum rei tak inlo inkawp tawh a mahse mak deuh maiin i duhzawng dik tak i tawng ta tlat mai! chutiang boruak i tawn hunah chuan i duh zawk i thlang a nih chuan i duhthlanna chu i ngaihzawng hnenah a rilru pawh na dawn mahse i hrilh ngei tur a ni, i hrilh loh chuan i kawppui leh i tawnthar tan pawh a dik(fair) bik miah lo a ni.

4. I TAN KA INSENG VE ASIN
Ngaihzawng te tan a insenso hreh suh ang che. I hausa emaw i rethei pawh nise, i ngaihzawng tan chuan a tha ber lei/pek tum thin ang che. I pek/leisak rualin i neih atanga i theih sang ber i tih ve a ni tih hrilh hreh suh ang che. Mi tupawh hausa emaw rethei pawh nise an neih/theih sang ber kan tan a sengtute an lo awm chuan tuman kan ngainep ngai lo ang hian.

5.MIN TI RILRU HAH
A ni/nutei emaw a unau te ngaihzawng ve tho ten i inchei dan, i sam/mithmul/tinrawng chei dan an lo sawisel a nih chuan, i kawppui hnenah nuam i tih loh thu leh chutiang insawisel sak a awm tawh loh nan a hma la turin i titi pui hreh tur a ni lo.

6. DUH LEH DUHLO SAWI NGAM
In ngaihzawnna hi a tawp lamah chuan inhauh in a chhunzawm duh khawp thin a, a chhan pawh duh zawng/ngainat zawng in an loh vang te, ngaihdan in an loh vang te, ei leh in duh zawng te thleng a in an loh chuan inremlohna a thlen fo thei a ni, chuvangin tlang tak a ngainat/duhzawng in hrilh mai thin hi sawichhuah silo a inrem si lo ai chuan a tha zawk a ni. Tin, ngaihzawng hlui kan neih leh neih loh thleng a hre duh an awm pawn mahni ngaihzawng te na na chu tha tak a hrilh a tunhma nun chu engpawh nise tun amah nen a tha tak inkawp i duh zawk thu te i hrilh hreh tur a ni lo a ni.

7. MAHNI A AWM KA DUH LAWK
A chang chuan midang nen a awmho lo a a fal a tuma tihbuai loh a mahni a awm duh chang i nei thin ngei ang, chung hunah chuan i ngaihzawng hnenah tlang takin mimal rilru sen ngai chi i neih thu leh mahni a awm i duh thu i hrilh ngei thin tur a ni. I hrilh siloh a i reh daih bawk si chuan i kawppui ten an rinhlelh loh che pawn an ngaih a tha ngai lovang.

Compiled by Simi Kuriakose
Source: Times of India @Lifestyle
 
*BAWNGHNUTE PACKET CHUNGCHANGA MULCO THUCHHUAK
Mizoram Milk Producers’ Co-operative Union Ltd. chuan ni 24.4.2014 (Ningani)-a MULCO Bawnghnute buk tlinglo chungchanga PRISM ten Legal Metrology hotute nena Press mite hmaa an thu puan chungchangah a hnuai ami ang hian thu awmzia an tarlang a ni:

1. Bawnghnute rate litre khata Rs. 40 ni thin chu November ni 1, 2013 kha Rs. 45 ah tihsan a ni a. Bawnghnute standard packing hi 500 ml a ni a. Standard packing ang kalpui dawn chuan packet khat man hi Rs. 22.50 a ni a. Pawisa nawi kir thu ah harsatna a awm thin avangin bawnghnute zuartu leh mipuite tan a awlsam zawk nan packet khat Rs. 20 manin siam a ni a. Packet khatah hian bawnghnute 445 ml thun a ni. Hetianga kalpui hma hian mipui hriat turin TV kaltlanga puan zar a ni.

2. Bawnghnute pack-na polyfilm hi chhut (print) sa vekin phailam atanga lei a ni a. Vawi khatah kum khat daih te lei thin a ni. Tuna stock kan neihsa zawng zawng hi 500 ml in chhut (print) sa vek a ni a. Polyfilm thar kan la lei mai theih loh avangin kan stock neihsa hi kan la hmang zel a, chuvangin a pawna inziak leh a chhunga bawnghnute awm zat hi a inmil theilo a ni. Hetiang anih avang hian mipuiin an hriatthiam theih nan TV kaltlangin November 2013 khan puanzar a ni a, hemi bakah hian bawnghnute zuartu zawng zawng pawh mipui an hnen atanga bawnghnute leitu te hrilh hre tura hriattirna pek an ni bawk. A packet pawnah hian 500 ml tih chhut nimahsela, a chhunga bawnghnute awm zat chu 445 ml a ni. Packet khat man hi litre-ah cheng 45 a chhutin Rs. 20 man a ni.

3. Bawnghnute pack-na khawl (Packing Machine) hi darkar khata packet 4000 pack thei a ni a, minute khatah chuan packet 66 vel a chhuak thei a, packet zawng zawng hi teh/buk kim vek sen a ni lova. A tling chiah tura khawl siamrem (adjust) reng a ni chung pawhin Power supply mumal lo (voltage hniam leh sangte) leh engemaw thildang avangte pawhin a packet hi a inang vek lo thin a. Kan bawnghnute packet zawrh chhuah chin erawh hi chu a tling pangngai veka ngaih a ni.

Hetiang anga ngaih sual theih thil a awm hi pawi kan ti hle a. Mipuite hriatthiamna kan ngen a, Packet khat hi 500 ml nilovin, 445 ml a ni a, a man pawh chumi hisapa siam a ni e. -DIPR
 
*NITLA NGAILO ZION KHAWPUI TIH HLA PHUAHNA KHUA TEN THUPHA CHAWINA HMANG
Kum 1927 a "Nitla ngailo Zion khawpui" tih phuahtu Rev. Lienrum(L) Pathian thu sawi phal lova an hnawhchhuahna Khua Suongsang (Thanlon Sub-Div, Manipur) mipuite chuan Pathian hnenah thuphachawina leh ngaihdam dilna Maicham an buatsaih.

He hun pawimawh tak hi April 24, 2014 khan Suongsang khuaah Bawng 2 leh Vawk 2 talh in hman a ni a, hunserh hi Rev. Lienrum(L) fapa Rev. L.Neithang leh a tute 16 zetin an hman pui a ni.

Khatih hunlai khan Rev. Lienrum(L) chu Pathian thu sawi phal lovin Suongsang khua atanga hnawhchhuah a ni a, riah na tur nei lo a an khaw dai a khawhar taka hun a hman laiin Pathianin hla ropui leh chuai tawh ngai lo tur “Ni tla ngai naw Zion Khawpui”(Ni tla ngai lo Zion Khawpui) hi a pe ta a ni.

Suongsang Lal Pu Chunga sawi danin Pathian rawngbawltu an lo hnawl vang nge ni, an Khua hian Vanduaina tamtak a tawk thin a, an khua a changkang thei lo a, an khawchhuak zingah lehkhathiam, sorkar officers leh miropui sawi tur pawh an vang thin hle a ni. Kum tam tak hnuah ti hian Rev. Lienrum(L) an a lo belh leh hla ropui tak a phuahna hmun Thingbuk hnuaiah ngei chuan Suongsang mipuiten thuphachawina leh ngaihdam dilna hun hmang in Maicham lung an phun nghal bawk a ni. Rev. Lienrum-a fapa Rev. L. Neithang in hunserh hmang in Ngaihdam dilsakna tawngtaina a nei.

Lungphuna thu inziak :
SUONGSANG KHAWPUI INSIRNA MAICHAM “Lungsirhai kuomah LALPA a hung hnai ie” SAM 34:18 Evan. Lienrum, Suongsang khawpui 1927 kuma harsat beidawnga a tuorna chunga ngaidam inhnina maicham. “Ni tla ngai naw Zion Khawpui”

Source : Rengkhawpui Mail
Transcript: Joel Lungtau

Nitla ngailo Zion khawpui

*RAMRI KAN A M.A.P TE CHETDAN AH TIPAIMUKH KHAWTLANG HRUAITUTE LAWMLO
Manipur a Tipaimukh Sub-division Village Authority Union te chuan Parvachawm leh Lungthulienk khua a Mizoram Armed Police (MAP) ten mipui pawisawilo an rikrap an duhloh zia thuchhuah siam in an tarlang. An thuchhuah in a sawi danin kumin February 19 khan MAP te hi Parvachawm khua ah kalin in hrang hrang ah an lut a, an khaw lalpa Malsawm in pawh an zuah lo a, inthenkhat tukverh leh kawngkhar te an tihchhiat sak mai bakah mipui pawisawi lo engemaw zat te kut an thlak niin an sawi.

Tipaimukh Village Authority Union te thuchhuah in a sawizel danin kumin April ni 22 zan ah khan Parbung sub-divisional headquarter atanga 10km a hla Lungthulien khua ah MAP te hi kalin an khaw lalpa Ralkapthuom in chu a kalhna tichhia in an lut a, inchhung bungrua an tihchhiatsak zingah an thingrem a kohhran pawisa Rs.3,555 awm pawh an la tel niin an tarlang. He khua a mi Lalpiengruol s/o. Lalsiem Sanate chu MAP te hian a motor a Mizoram a hruai turin an tilui a, kut an thlak hrep hnuah an rawn chhuah leh ni a sawi niin a taksa a hliam awm avangin damdawi a inenkawl na alak phah hial niin an sawi bawk.

Tipaimukh Village Authority Union te hian state ramri kan a MAP te chet dan hi na takin an dem a, Manipur sorkar hnenah an harsatna tawh hi enfiah sak a, a adawt leh thleng tawh ngai lo tur a titawp dan ngaihtuah sak thuai turin an phut a ni.

Source:www.thesangaiexpress.com
 
27.4.2014
*POPE HLUI 2 MITHIANGHLIM AH PUANG
Roman Catholic Puithiam luber Pope Francis chuan vawiin khan Vatican St.Peter's Square ah mipui sangtam tak hmaah Pope hlui pahnih John XXIII leh John Paul II te chu mithianghlim(Saint) ah a puang a ni. Pope John XXIII hi 1958-1963 chhung in Pope a ni a, Pope John Paul II thung hi 1978-2005 chhungin Pope a ni bawk a ni. Tun atang chuan anni 2 hi mithianghlim(saint) ti a sawi anni thin tawh dawn ani.

Newly declared Saints of the two Popes

*Tukin zing inkhawm reh lai dar 10 vel khan West Phaileng, Bethlehem veng ah In pathum a kang a, inkhawm reh lai tak anih avangin bungrua chuh hman loh in a kangral hlawm a ni.

*Vawiin khan kum 64 mi Justice Rajendra Mal Lodha chu Chief Justice of India vawi 41-na atan lakluh a ni. Kumin September ni 27 ah pension in a chhuak ang.

*South Korea Prime Minister Chung Hong-Won chuan vawiin khan tun hnai a lawng chesual vanga mi 300 chuang bo leh nunna chan an awm avangin banna a thehlut.

*Mizoram Presbyterian Kohhran ten Pastor Bial Inkhawmpui an hmang mek, vawiin chawhnu hian upa boral te sunna hun leh Lalpa zanriah sakramen kilhona an nei hlawm ang.

*Mizoram Food, Civil Supplies & Consumer Affairs Department March ni 31,2014 thleng khan carrying contractor te buhfai phurhman ba Rs. 12,57,40,359/- a ba. - Zalen
 
*DARLAWN BUS ACCIDENT
Vawiin chhun dar12:30 vel bawr khan Pi Sangpuii, Darlawn bus Sawleng a inkhawmpui hruaitura a kal chu Darlawn dai ah a chesual a. Kawngthlang ft.300 velah a liam a, hriat theih chinah a hmunah mi pakhat a thi nghal a ni. Bus ah hian mi 10 vel an chuang nia hriat a ni.
Source: Amozzy Ralte Lûtmâng via DINGDI (since May 30, 1982)

Bus accident in Darlawn village, Mizoram on 27 April 2014