15th September 2015 (Tuesday) news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*PU C. NGUNLIANCHUNGA’N REPUBLIC VENG THLANMUAL CHIM A TLAWH
Nizan a ruahsur nasa avang khan veng pathum in an intawm Republic Veng thlanmual chu tukin zing dar 1:00 am bawr vel khan a chim a, thlan 40 lai a chim a ni. Pu C. Ngunlianchunga, Disaster Management & Rehabilitation (DMR) Minister chuan vawiin khan thlanmual chimna hi a hmunah a tlawh.

Minister chuan Republic Thlanmual chim chu pawi a tih thu leh khuarel chhiatna chu dan lawk theih a nih loh avangin a thinlung taka a tawrhpui thu sawiin an hmangaih kaltate zalna hmun chu hriat theih mumal loh a hmun thenkhat laiah te leimin in a siam danglam chu pawi a tih thu a sawi a. Sorkar atanga tanpuina awm thei ang ang pek tum a nih dan leh heng tanpuina an dawn tur chu a nihna dik taka hmang turin khawtlang hruaitute chu a ngen nghal a ni.

Chhiatna thleng thin thenkhat hi chu fimkhur tawk loh avang leh lui luan kawr awm that loh avanga thleng thin a nih thu Pu C. Ngunlianchunga chuan sawiin chhiatna kan tawh hi fimkhur zual nan hmang thei ila a duh thu leh In leh lo kan dinna kawngah leh hmalakna dangah te chhiatna chi hrang hrang awm thin chu fimkhur nan a hmangin lui kawr siam leh septic tank siam kawngah pawh uluk taka siam a ngaihthu a sawi a. Hriat lawk loh thil avang hian kan tum loh deuhin kan chenna in ngei te pawh hi zan khat thil thu ah chan vek thei kan ni a.Chuvang chuan mipuite pawhin Property Insurance chungchangte hi kan ngaihven a thanharh a ngai tawh takzet a ni a tiin DM & R Department lam pawhin mipuiten man tlawm zawka Property Insurance an neih theih nan tan la chho zel turin a fuih bawk.

Vawiina Republic Veng thlamual chim Minister in a tlawhna ah hian Pu R. Vanlalvena Bialtu MLA, Aizawl DC Dr. Franklin Laltinkhuma,AMC Councilor Lalhuthangi leh khawtlang hruaituten an tawiawm a ni.

Pu C. Ngunlianchunga hian chhiat tawhna hmuna tlawmngai hnatlangte thingpui in nan Rs.7,000 bakah Tarpauline engemawzat a pe bawk a ni. (DIPR)

*RUAHSUR VANGIN LEIMIN
Nizan ruahsur avang khan Zemabawk ah in 2 a chim. Leimin hian National highway a hnawh. Inchim avang hian thi leh hliam an awm lo. Republic veng thlanmual pawh a chim a, tunhnai a vuiliam mi 2 thlan pawh a chim tel. Vawiinah Republic veng khawtlang in leimin senghawi vel in hnatlang an nei ang.

Zemabawk leimin, (Landslide in Aizawl, Zemabawk)

14th September 2015 (Monday) news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM
*MIZO TLANGVAL IN YOUNG SCIENTIST PROJECT DAWNG
Dr. Lalremruata Hauhnar (Tetea) S/o. Lalchhuanmawia, Ramhlun North, Aizawl chuan Department of Science and Technology, Govt. of India atangin 'Young Scientist Project" a dawng. Lamtluang thudawn danin he a project khawih tur hi Post Doctoral fellowship a ni nghal dawn bawk a ni. Dr.Lalremruata Hauhnar hi B.Sc (PUC), M.Sc (D.U) leh Ph.D (JNU) te a zir zawh hnuin MZU a Biotech Dept ah Guest Lecturer in kum 3 vel a lo thawk tawh bawk a ni.

Dr. Lalremruata Hauhnar, Ramhlun North, Aizawl

*MHIP TEN TUAI LEH PATIL PUNG AN NGAIMAWH
Vawiin a Mizo Hmeichhe Insuihkhawm Pawl (MHIP) General Headquarters meeting chuan tunlai a Mizoram a tuai leh patil an pung ta hluai chu an ngaimawh thu an sawi. Lamtluang thudawn danin MHIP hruaitute hian tuai leh patil pung ta hluai hian khawtlang leh kohhran te thleng pawh in nghawng thalo a nei thei dawn niin an hri a, tlawmngai pawl dang te pawh hemi chungchang a hmalak ho dan tur sawipui an tum a ni

*AUSTRALIA IN PM THAR NEI DAWN
Australia a sorkarna chang mek Liberal party leh an tanrualpui te chuan vawiin ah khan hruaitu thar atan Malcolm Turnbull an thlang. Lamtluang thulakna in a tarlan danin Prime Minister nilai Tonny Abbott chu Macolm Turnbull hian a thlak dawn ta a ni. Foreign minister nilai Julie Bishop pawh Deputy PM atan an thlang bawk a ni.

*DDK FOUNDATION DAY VAWI 56-NA PUAL IN LIVE PHONE IN PROGRAMME NEIH A NI DAWN
September ni 15 (Thawhlehni) zan dar 7:00 pm inkar hian Doordarshan Foundation Day vawi 56-na pualin DDK Aizawl chuan Live Programme a buatsaih dawn a. Hetah hian top artists te bakah ‘The Frozen’ an lam bawk ang. DDK Aizawl programme te hi Cable TV Operation te atangin he programme hi pechhawng turin ngen leh hriattir an ni bawk. (DIPR)

*India tennis khelthiam Sania Mirza leh Martina Hingiz te tangdun chuan 6-3, 6-3 in Dellacqua leh Shvedova te chu US Open 2015 hmeichhe double final ah an hneh.

*DJOKOVIC A CHAMPION TA
US Open 2015 Mipa single final ah Novak Djokovic chuan 6-4,5-76-4,6-4 in Roger Federer hneh in a champion ta.

*KASHMIR MARATHON A HMEICHHE CHHAIH TU MI 12 MAN
Nimin khan Jammu and Kashmir khawpui Srinagar ah International marathon huaihawt a ni a, heta tel ve hmeichhia te chu mipui thenkhat in an lo chhaih buai avangin buaina a chhuak ta a, police ten buaina siamtu mi 12 te an man. Lamtluang thulakna in a tarlan danin he Marathon hi khua leh tui ten an dikna chanvo te, traffic rules leh tui renchem dan an hriat theihna tura inzirtir pah nan a hman tum a ni a, mahse buaina a chhuah tak avangin an beisei angin thil a kal thei ta lo a ni. Marathon ah hian tualchhung mite bakah Kenya leh Ethiopia tlanchak te pawh an tel a ni.

 

*MUALCHENG 'S' AH FREE CLINIC NEI DAWN
Ni 15th September, 2015 (Tuesday) hian Lunglei District chhunga 'Model Village' atana thlan Mualcheng 'S' ah Health Clinic neih tur a ni a, hemi atan hian Medical Mobile Unit Lunglei Team kal tur te chu ;

1. Dr. VLMS Dawngliana, CMO Lunglei
2. Pc. Lalhmunsiama, Dist. Programme Manager NHM
3. Dr. Laldinsangi, Medical Officer, NCD Cell
4. Dr. C. Lalhlimpuii Medical Officer, NCD Clinic
5. Dr. Johny Lalmuanpuia Tlau, RCH Medical Officer
6. Dr. Vanneihthanga, Medical Officer, DEIC
7. Angela Zonuntluangi, Pharmacist
8. K. Lalawmpuii, Staff Nurse, NCD Clinic
9. Lalramengi Punte, Staff Nurse, NCD Clinic
10. H. Lalmalsawma, Lab-Technician
11. Freddy Lalngaihawma, Physiotherapist

Mualcheng 'S' Free Clinic hun hi bialtu MLA, Lunglei HPC Vice-Chairman Pu S.Laldingliana-in a hmanpui tura beisei a ni. (DIPR)

*IAS 559 TEN IN LEH LO NEILO NI IN AN IN SAWI
India rama IAS officer 3600 zinga 559 ten nikum chhung a immoveable property returns (IPR) an thehluh atanga a landan in in leh lo leh ram an nei miah lo niin an in sawi. Lamtluang thulakna in a tarlan danin heng IAS offficer in leh lo leh ram neilo awmzat hi 14.50% an tling a ni. Cadre hrang hrang atanga in leh lo leh ram neilo awm tam deuh zual te chu Uttar Pradesh (57), Madhya Pradesh (42), AGMUT (37), Maharashtra (33) leh Tamil Nadu (31) te anni.

*Ruahsur vanga hun engemaw chen tihkhawtlai anih hnuah tunah hian US Open 2015 Mipa single final chu Djokovic leh Roger Federer ten an khel mek.

*PAKISTAN MORTAR KAHCHHUAH AVANGIN INDIA SIPAI OFFICER THI
Nimin tlaiah khan Jammu and Kashmir a India leh Pakistan ramri LoC hnaih Samba, Manjakote sector, Rajouri district ah Pakistan lam atanga mortar kahchhuah avangin BSF ASI pakhat a boral. Lamtluang thulakna in a tarlan danin BSF ASI boral ta hi Sohan Lal niin Rajasthan lam mi a ni. Pakistan sipai te hian India sipai BSF camp chu morter bomb hmangin an rawn kap a a ni hian nunna a chan phah ta a ni. Tun thla chhung hian Pakistan sipai te hian India nen a inkahhai thuthlung an siam chu vawi 15 ngawt an bawhchhe tawh a ni.

 

*US OPEN MIPA SINGLE FINAL KHELH HUN TITLAI
Ruah a sur avangin US Open mipa single final khelh hun chu tun atanga reilo teah khelh theih beisei a ni. An khelh hun tur a tih ah ruah a sur avangin final hi an la tan thei lo a ni.

13th September 2015 (Sunday) news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM
 #‎EPL‬ UPDATE
Leicester City 3-2 Aston Villa

*HIMACHAL A LEIVERH HNATHAWKTUTE CHHANCHHUAH TUMIN BEI MEK
Himachal Pradesh a Tihri hmun a leiverh chhung a hnathawktu 3 leiin a delh te chhanchhuah hna kalpui mek a ni. Lamtluang thulakna in a tarlan danin heng hnathawktu 3 te hian leiverh chhungah hna an thawh laiin lei a min thut a leiverh chhung luhna a hnawh ping ta a ni. Darkar 20 chuang leiverh chhung a leimin hi tih tlang tum a beih a ni tawh a, tun thleng hian an la ti tlang thei lo a ni.

*#‎EPL‬ RESULT UPDATE
Sunderland 0-1 Tottenham (FULL TIME)
Scorer: Ryan Mason (82 minutes)

*US OPEN MEN'S SINGLE FINAL SCHEDULE
US Open 2015 mipa single final chu September ni 14 zing dar 1:30 ah N.Djokovic leh Roger Federar ten an khel dawn. Zanin dar 9:30 ah hian Hmeichhe double final chu Martina Hingis & Saniz Mirza leh C.Dellacqua & Y.Shvedova ten an khel bawk ang.

*SYNOD MISSIONARY TRAINING CENTRE THUTHAR
September 1 - 6, 2015 Beihrual Ramthar Hapta chhung khan Short Course Missionary Training lai te leh zirtirtu thenkhatte Model Veng leh Mission Vengthlangah te insem darh in hun an hmang a. September 6, 2015 (Pathianni) bikah erawh chuan Chawhnu inkhawm leh zan inkhawmah Khatla South-ah hun an hmang thung. Pathian ni chawhnuah hian Dr. Laldineni'n thupui a sawi a, Pi LalrinawmiStaff Nurse South Chhimluang in rawngbawlna Report a pe a, Rodney Lalremruata Chhangte, B.Miss III a zai thung a. Zan Inkhawmah hian Rev. Dr. K. Lalrinkima, Principal in thupui a sawi a, H. Malsawmkimi, Itanagar in rawngbawlna report a pe a, Joel Zaithanzuala B.Miss III in Pathian fakna hla a sa bawk. (Synfocity=553)

*NARENDRA MODI AN FACEBOOK HEADQUARTERS TLAWH DAWN
Facebook neitupa Mark Zuckerberg an vawiin khan India Prime Minister Narendra Modi an September ni 27 ah Facebook headquarters, Menlo Park, Sillicon Valley, California (US) a tlawh dawn niin a sawi. Lamtluang thulakna in a tarlan danin India PM hian FB hmunpui a tlawh hunah hian townhall Q&A (zawhna leh chhanna) hun pawh a hmang nghal dawn a ni. Lamtluang page chhiar tu ten in lo hriat atan Facebook hi kum 2004 atang khan hawn tan a ni a, tunah hian nangni leh keini tiam in mi tluklehdingawn 1.18 in an hmang mek a ni. August thla chhung khan facebook hmangtu nitin mi tluklehdingawn 1.49 an awm thin a, chung zingah chuan India atangin mi maktaduai 63 an awm a, an zingah hian mi maktaduai 58 te chuan mobile phone hmangin FB an hmang thin a ni.

*BCM AGS MISSION UK AH ZIN DAWN
Baptist Missionary Society(BMS)-in an sawm angin Associate General Secretary i/c Mission. Rev. Dr. K. Lalrinthanga leh a nupui Dr. Chawngthanpari (Principal, HATIM) te chuan UK-a rawngbawlna nei turin London an kal dawn a, September 14 hian Aizawl chhuahsanin UK-ah ni 10 chhung an cham ang. An tum anga an awm thei a nih chuan September 26-ah Mizoram lo thleng leh tura beisei an ni.

BMS World Mission Director, Rev. Peter Dunn chuan Mizoram Baptist Kohhran hotute pahnih hi an Office pui, London tlawh tur leh khawvel ram hrang hranga BMS thawhpui Kohhranhote hnena Mizoram Baptist Kohhran rawngbawl dan leh Mission lama kan rawngbawl dante report pe turin an duh a ni. An kal man leh a hmuna an cham chhunga an senso zawng zawng pawh BMS hian a tumsak vek dawn a ni. (mizobaptist.org)

*NAUPANG INKHAWMPUI HMANG
Mizoram Presbyterian Kohhran te chuan Pastor bial hrang hrangah nizan atang khan Naupang Inkhawmpui an hmang. Lamtluang thudawn danin vawiin chawhma leh chawhnu ah te Bible chang, zaipawl leh thu inchhang leh mimal chanvo hmang te in intihsiakn an nei a, zaninah lawmman sem leh inthlahna hun an hmang leh ang.

*CAMPUS MINISTRY IN LEHKHABU TLANGZARH
September 11, 2015(Zirtawpni) tlai dar 3 khan Mission Veng Kohhran Hall-ah “Hringnun Zawhna ril - Pathian a awm nge awm lo?” tih lehkhabu chu Rev. Lalrinmawia, Synod Moderator-in a tlangzarh.

He lehkhabuah hian zirlaite nun tibuai thei thu hrang hrang - 'Pathian awm loh rinna', 'Nun awmze thlirna', 'Science- in Pathian awm leh awm loh chungchanga a zawhna chhanna', 'Philosophy atanga Pathian chungchanga harsatna leh Kristian channa thenkhat', 'Bible-in Pathian chungchang a sawi dana harsatna awm chhanna', 'Isua leh Kristianna takzia', 'Isua thawhlehna hi khawvela thil thleng ngei a ni', 'Mihring nun awmzia leh tum - Kristian Thurin atanga thlirna', 'Tlipna leh Thu belh' , tih thupui hrang hrang chu mi thiamten an ziak a ni. Rs. 100/- man a ni. (Synfocity=553)

*LAWNGTLAI AREA MEDIA MINISTRY DIN
Mizoram Baptist Kohhran, Lawngtlai Area Administrative Development Committee chuan Media hmanga rawngbawlna chak zawka kalpui a nih theih nan Lawngtlai Area Media Ministry a din a ni a. Hruaitu pawh nakkum March, 2016 thleng atan inruat nghalin hengte hi an ni:

Chairman: Remlalnghaka
Secretary: Rbt. Thangrivunga
Treasurer : Elvis Lalthangzuala
(mizobaptist.org)

*2016 ATANGIN AICS AH M.Th ZIR THEIH BEISEI A NI
Mizoram Baptist Kohhran, Theological education Board-in Academy of integrated Christian Studied(AICS)-a M.Th Course hawng tura ruamhmanna a lo siam tawh chu, BCM Assembly 2015-in a pawm angin bawhzui mek zel a ni a, kum 2016 session atangin M.Th Course hi tan hman turin ruahmanna kalpui mek a ni.

AICS-a M. Th. zir theihna tur a dilna chu Senate of Serampore Commission member te chuan August 26-27, 2015 khan a hmunah kalin an rawn endik a. Heng mikhualte hi BCM President hovin AICS Faculty ten an lo dawngsawng a, Commission member-te hian subject pahnih- New Testament leh History subject-a M.Th. zirna a awm theih nan Council-ah recommend an tum thu an rawn sawi chiang ta a. Beisei anga thil a awm theih chuan nakum 2016 session atangin M.Th zirna hi tan thei tura beisei a ni. (mizobaptist.org)

*SYNOD HOSPITAL THUTHAR
Synod Hospital, Durtlang-ah Lithotripsy khawl (Kala lungte awm chhut kehna) chu hman theih turin bun fel a ni ta a. Kala lungte awm chhut kehna man Package Rate chu Rs. 30,000/- a ni a. Hei hian vawi khata a chhut keh zawh loh pawhin vawi thum chhut thleng a huam a ni. (Synfocity=553)

*PASTOR NUPUI HNA THAWKTE CHUNGCHANG NGAIHTUAH
Mizoram Baptist Kohhran, Pastoral Department Committee Meeting, September 9, 2015-a neih chuan Assembly 2008-in a lo rel tawh, 2015 atanga Pastor nupui hna(full time) neite ban chungchang bawhzuina kal zel chu ngaihtuahin hmalak tawh dan te a thlir a. Pastoral Coordinator-in report-a a tarlan danin kum 2008 Assembly thu zawm a 2008 Assembly zawh atanga 2015 thlenga Pastor nupui hna(full time) thawh bansan mi 17 an awm tawh a ni.

Heng bakah hian Kohhran hnuaia thawk mi 3 te chu an thawhna Department-in a mamawh avanga rawih zawm dil an awm a, an dil angin an insiamrem hun chhung pawhsei sak remtih an ni. Sorkar hnathawk, an pasal/Pastor te zirna avanga hmun danga awm, an pasalte zir zawh hun nghah dil an awm bawk a, hei pawh hi an insiamrem theih hun chhung thlir puiin an dil ang hian remtih sak an ni bawk.

Chutihlaiin Pastor 17 te chuan chhan hrang hang avang a Assembly duh dan an la tihpuitlin theih rih loh thu an thlen bawk a. Anni ho hi December 2015 thleng hun pek ni se la, amaherawhchu Assembly rorel an tih hlawhtlin theih dawn leh dawn loh an thutlukna dik tak(decision) chu November 2015 Pastoral Committee-a ngaihtuah turin General Secretry hnenah ziakin rawn thlen rawh se tih a ni.

Sawi tawh thin ang khan, Mizoram Baptist Kohhran Assembly 2008 rorelna chuan Sawt zawk leh tangkai zawk a rawng kan bawl theih nan Bialtu Pastor chuan a thawhna hmunah a nupui a hruai ngei tur a ni. Kum 2015 hnu lamah chuan Pastor/Minister nupuite chu Sorkar hna leh hnadang fulltime a thawh phal a ni lovang a. Kohhranin Pastor/Minister nupui service mamawh tak takna a nei a nih chuan, a mamawhtu Department chuan Pastoral Committee-ah a dil thei ang a, Pastoral Committee chuan a thu tlukna chu Executive Committee-ah a thlen ang. ti-a thu a lo dah chu 2015 Assembly-a ngaihtuah nawn leh turin Lunglei South ABC chuan a thlen leh a. “Kum 2008 hma lama pastor/minister nupui, sorkar hna emaw hna dang emaw lo thawk nghet tawhte chu an thawh chhunzawm zel remtihsak nise; 2008 hnu lama mite chu April 1, 2015 atangin bang se, tiin thu a thehlut a; mahse a tlu zo ta lo a ni.

Hemi chungchang thu Social Media leh titi-na hrang hrangah thu dik lo vawrh darh a awm thin chu BCM General Secretary chuan pawi a tih thu a sawi a. A eng zawng pawh a social media leh khawlai ti-ti-a thu belh chian dawl lo, zeldin thu leh rin thu mai mai sawi chhuak lo turin mipuite a ngen bawk. (mizobaptist.org)

*MYANMAR TUILIAN TANPUINA
Mizoram Presbyterian Kohhran Synod-in Myanmar tuillian tuarte tanpuina thawhlawm a lakkhawm chu Synod Officer's Meeting chuan Presbyterian Kohhran mite chauh ni lovin Zo hnahthlak, tuilian tuar zawng zawng hnena pek turin a rel a. Tanpuina hi Presbyterian Church of Myanmar (PCM) Hruaitute hnenah September thla chawhma lama Aizawla lo kal tura sawmin an kuta hlan tura ruahman a ni. Myanmar tuilian tuarte tanpuina thawhlawm, September 4, 2015(Zirtawpni) thlenga dawn chu Rs. 28,42,231/- a ni. (Synfocity=553)

*US OPEN 2015 HMEICHHE CHAMPION FLAVIA PENNETTA
‪#‎USOpen2015‬ hmeichhe single final khelh zawh takah Flavia Pennetta (Italy) chuan Roberto Vicni (Italy) 7-6, 6-2 a hneh in a champion ta. Lamtluang thulakna in a tarlan danin he Italian nula kum 33 mi Flavia Pennetta hian Grand Slam title a vawi khat lakna a ni.

*CINEMA ENTU TE TUI IN TUR ATHLAWNA PE VEK TURIN TI
National Consumer Disputes Redressal Commission (NCDRC) chuan India rama cinema/movie hall neitu zawng zawng ten cinema/movie entu te a thlawn in tui in tur an pe vek tur a ni a ti. Lamtluang thulakna in a tarlan danin cinema hall ah mi tupawh in movie darkar 3 emaw aia tam a en chuan tui a mamawh ngei dawn a, mahse mi zawng zawng in tui leina an nei kher lo thei a chuvangin movie/cinema hall neitu ten tui in tur pek hi an tih tur niin NCDRC chuan a sawi.

12th September 2015 (Saturday) news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*#‎EPL‬ RESULT UPDATE
Manchester United 3-1 Liverpool

*TOM CRUISE TE MOVIE SHOOT NAAH MI 2 THI
Hollywood star Tom Cruise te channa movie thar 'Mena' an shoot na thlawhtheihna te chi Piper Aerostar-600 chu niminah a tlak avangin crew member 2 - Alan Purwin leh Carlos Berl te an thi a, mi 1 in hliam a tuar bawk. Lamtluang thulakn in a tarlan danin thlawhtheihna hi movie an shoot na Colombia a Andes ah a tla a ni.

#‎EPL‬ RESULT UPDATE
Arsenal 2-0 Stoke
Crystal Palace 0-1 Manchester City
Norwich City 3-1 Bournemouth
West Brom 0-0 Southamton
Watford 1-0 Swansea City
---------------
Manchester Utd vs Liverpool (10 PM IST)

 

#‎EPL‬ UPDATE
Everton 3-1 Chelsea
Scorers: Steven Naismith (17, 22, 82)
Nemanja Matic (36)

*LAMTLUANG WEEKEND SPECIAL (MIZO FIAMTHU)
Nula 1 khan bus stand ah bus a lo nghak a. A nghah lai chuan tlangval 1 hian bike in a rawn tlan pel fua. A hnu deuhah tlangval chu a rawn tlan let a nula hma ah chuan a rawn ding ta a.
Tv: Min hria em?
Nula: Hre lo.
Tv: Weinch!!! Nichin khan ka rawn tlan pelh fua che kha :)

*Vai thirchhe zawng rilru chak-
Mi pakhatin a lokal a hmuh rual khan- "Vai thirchhe zawng ho lah hi ninawm ltk!!"
Vaipa- Rilru chhia nei em?

*THIL PUAK VANGA INCHIM AH MI 82 CHUANG THI
Tukin dar 8:30 vel khan Madhya Pradesh a Petlawad khua ah thil puak in in a ti chim a, mi 82 in nunna an chan a, mi 50 chuang in hliam an tuar. Lamtluang thulakna in a tarlan danin he in chim ta chhungah hian leiverhna hmanrua puak thei thil tam tak dah a nih avangin in chim hi a sawp nasa ni a sawi a ni. Tunah hian chhanchhuah hna la thawh mek zel a ni. Madhya Pradesh Chief Minister Shivraj Singh Chouhan chuan he in chim chhan chhui tur mi a a ruat tawh a, nunna chanta chhung te tan zangna dawmna Rs. Nuai 2 theuh leh hliam tuar te tan Rs.Sing 5 theuh pek a tiam a ni.

*US OPEN MIPA FINALIST TUR CHIANG TA
US Open 2015 khelh mek ah tukin khan Mipa single semi final khelh zawh a ni ta a, Roger Federar leh N.Djokovic te final ah an intum dawn ta a ni. Semi final result chu hetiang hi a ni:
Roger Federar 6-4, 6-3, 6-1 S.Warinka
N.Djokovic 6-0, 6-1, 6-2, M Cilic

*MZP IN ZOFATE RUN HAWNG
Niminpiah khan MZP President Lalhmachhuana chuan Borapansuri a MZP ten 'Zofate run' an sak chu a hawng. MZP President hian Mizoram chhung ngei ah Mizo fate pual a insak a ngai ta chu Mizo hnam te hnamdang te lakah kan ram humhalh tul zia lantir tu niin a sawi.

*KHAW CHIN
State Meteorological Centre Directorate of Science & Technology in a tarlan dan in nimin a Aizawl khawpui a ruah tla zat chu 0.6 mm a ni a, khua lum lai ber in 29.7o C a vawh lai ber in 15.3o C a ni. Humidity chu a san lai ber in 93% a hniam lai ber in 90 % a ni. Ni 11 leh ni 15 September, 2015 chhung hian ruah a sur rin a ni.

*REFRESHER COURSE HMANG DAWN
September 12 - 21, 2015 chhung hian Church of South India (CSI) chuan Mizoram-ah an Kohhran Pastor 19 chu Refresher Course Programme hmang turin a rawn tir a, Mizoram Presbyterian Kohhran Synod-in lo dawngsawngin a tul angin a lo buaipui ang. Ruahman dan chuan September 14, 2015 tlaiah CSI Pastor lo kalte hi Synod Moderator- in zanriah buatsaihsak ang a, Cultural item leh Solo ngaihthlak a ni bawk ang. CSI nen hian Pastor Refresher Course hi kumtin in hman thleng tura ruahman a ni. (Synfocity=553)

*LAMTLUANG ZINGKAR CHANCHINTHAR LAWRKHAWM
*Chief Minister Pu Lal Thanhawla chuan ‘Puipunna leh meizuk phallohna hmuna meizu man turin Police zawng zawng te chu thuneihna pek an ni tawh’ a ti. He thu hi vawiin Mizoram State Anti Tobacco Day vawi 2-na, Lal Thanhawla Auditorium, Treasury Square, Aizawla hmanna inkhawm buatsaiha a sawi a ni. (DIPR)

*Hungary Prime Minister Viktor Orban chuan raltlan tupawh danlo a an ramri rawn kal an awm chuan man anni ang a ti. Lamtluang a kan rawn post tawh thin angin Hungary hian an ramah Islam mipui raltlan te awm an phallo a ni.

*July thla chhung khan India ramah thil siamchhuah lam (Industrial production) 4.2% in a pung.

*India hmeichhia ISIS firfiak pawl nen a inzawmna nei ni a sawi Hyderabad mi Afsha Jabeen leh a pasal leh a fate chu UAE sorkar in India ah a rawn thawn let. Lamtluang thulakna in a tarlan danin India ram an lo thlen veleh airport ah police ten thu zawhfiah turin an lo man nghal a ni.

*India sipai officer training na National Defence Academy, Khadakwasla ah training lai sipai officer 250 te chu an mess a chaw an eisual avangin an damlo a, damdawiin ah hruai ngaiin an awm a ni.

*Nimin khan India rama University lar 2 University of Delhi leh Jawaharlal Nehru University te chuan zirlai hruaitu thlanna an nei.

*Nepal a constitution thar hman duh loh vanga tualchhung buaina chhuak mek ah mi 4 ten nunna an chan.

*Nimin khan Singapore chuan an ram inthlanpui vawi 12-na an nei a, Lamtluang thulakna in a tarlan danin mi maktaduai 2 chuangin vote an thlak a ni.

*UN General Headquarters a Palestine flag tar phalsak anni ve ta a, Lamtluang thulakn in a tarlan danin India pawh in hemi chungchang ah hian UN General Assembly ah a pawmpui zawngin vote a pe a ni. UN thutlukna hi Israel chuan a duhlo hle thung.

*Jain sakhaw zuitu ten an kutpui 'Paryushan' an hman dawn avangin Maharashtra leh Rajasthan ah sa zawrh leh lei khap a ni. Lamtluang thulakna in a tarlan danin Chhattisgarh ah pawh sa zawrh leh lei hi khap a ni. Jain sakhua hian sa ei leh thah an khap a ni. Jammu and Kashmir ah pawh bawngsa zawrh leh lei khap a nih avangin dodalna a chhuak nasa hle.

*West Bengal sorkar chuan India ram zalenna sualtu lar Netaji Subhas Chandra Bose kaihhnawih file 64 te chu mipui te hmuh theih turin phochhuah an tum. Lamtluang thulakna in a tarlan danin tun thla ni 18 ah Kolkata Police Archives ah phochhuah a ni dawn a ni.

*Tukin hian Mizoram khawpui lianah te chuan Pathianni sa turin lei turin chhungkaw tam tak a nu leh pa te an thawk chhuak hlawm a ni. Hetih lai hian thlai leh anhnah zuar te pawh an in pho chhuak tha hle bawk. Thingtlang lamah pawh mahni lo leh tul dang ah te hna thawk turin an chhuak leh hlawm ang.

*SCIENTIST TEN HMANLAI KHAWVEL A RAMSA TE BORAL VAK NA CHHAN CHHUI
Scientist ten kum maktaduai 445-415 liamta a ramsa chi hrang hrang 85 te an boral duak na chhan an chhui chiang. Lamtluang thulakna in a tarlan danin heng ramsa te an boral duak nachhan ah hian tuifinriat atangin toxic metal a chhuah nasat avang niin an ngai. An zirchian naah hian ramsa leh mihring te tan a pawi thei thil lead, arsenic, leh iron sang tak te chu tuifinriat chhuat atangin a chhuak nasa a chu chuan tui a oxygen awm a pawlh ta a, seashell te inthlah punna a tibuai zo a, chumi chu khawmual ah rawn chhuak in ramsa leh mihring ten an lo hip a an boral phah nasa ta niin an ngai.

*US OPEN 2015 UPDATE & FIXTURE
Hmeichhe Single Semi Final result:
F.Pennetta 6-1, 6-3, S.Halep
Roberta Vinci 2-6, 6-4, 6-4 Serena Williams

Hmeichhe Single Final: F.Pennetta vs Roberta Vinci
Mipa single semi final (12 Sept):
R.Federar vs S.Wawrinka (5 AM)
N.Djokovic vs M.Cilic (2:30 AM)

*BUNGRAW KHAINA LIAN CHIM VANGIN MI 87 BORAL
Mosolman te khawthianghlim Mecca a Grand Mosque a bungraw khaina lian chi (crane) a chim avangin mi 87 chuang an boral a, mi 180 in hliam an tuar. Lamtluang thulakna in a tarlan danin he bungraw khaina lian chim hian Mosque chung a delh chhia a ni. Saudi Arabia ah hian tun thla tawp lam hian Mosolman sakhaw zuitu khawvel hmun hrang hrang a mi te an punkhawm hun anih avangin nasa takin an inbuatsaih a, hemi atana an inbuatsaihna lamah bungraw khaina lian pawh hi hman ni a sawi a ni.