Latest news collection in Mizo language
MIZO TAWNG A CHANCHINTHAR LAWRKHAWM
23.11.2014
*KERALA MI PAHNIH POPE IN MITHIANGHLIM AH PUANG
Vawiin khan Pope Francis chuan Kerala mi pahnih Father Kuriakose Elias
Chavara ((1805-1871) leh Sister Euphrasia Eluventhinkal (1877-1952) te
chu mithianghlim (saint) ah a puang. Pope Francis chuan St.Peter's
Square, Vatican ah special mass a neih laiin India mi Roman Catholic
rawngbawltu pahnih te hi mithianghlim atan a puang ta a ni.
*LAMTLUANG PATHIANNI ZING CHANCHINTHAR LAWRKHAWM
*November 18, 2014 zing dar 9:30 khan Synod Press-ah Computer to Plate
(CTP) thar an neih chu Rev. Lalzuithanga, Senior Executive Secretary-in
Pathian hnenah a hlan. Khawl thar hlanna inkhawm hi Upa R. Lalmalsawma,
PRESCOM General Manager-in a kaihruai a, Pu Lalhruaitluanga Ralte, Synod
Press Manager-in CTP chanchin a sawifiah.
Tunhma chuan colour-a
thlalak leh lehkhabu kawmte Synod Press-a an chhut dawnin Imagesetter,
color separation khawl hmangin color film an siam phawt a, color film
atang chuan rangva phek, aluminium phekah an nemkai leh thin a. Chu
rangva phek chu Offset khawlah an vuah a, lehkhabute chu an chhu ta thin
a ni.
Kum 2001 atanga 2010 thleng kha chuan Synod Press-ah
hian Imagesetter khawl German siam tha tak chu an hmang thin a, tunah
chuan a technology a lo hlui tak avangin an hluihlawn a, ATC Archives-a
thilhlui dahkhawmnaah an suan chho tawh a ni.
Kum 2014 hian
Synod Press tihchangtlun nan tunlai technology lar, Violet system CTP
chu Synod-in Cheng Nuai sawmnga pathumin a lei leh ta a ni. CTP hian
direct-in computer atangin aluminium plate-ah a chhu kai nghal mai thei a
ni. CTP hi khawl pahnih a ni a, CTP leh Precessor a ni a. CTP khawl
thar hi Electronic Character Recognition Machinery (ECRM) Nautilus model
a ni a, Massachussets, USA siam a ni. Processor erawh chu Glunz &
Jensen Company, Ringsted, Denmark siam a ni thung.
*November
14, 2014 zan khan Synod Information & Publicity (Synfo) buatsaih
Kohler Power Systems Hruaina Eng Quiz Top 20 Round chu zawh a ni a, Top
10 lut tur puan nghal a ni.Top 10 lut tur hian mark hmu sang sang thlan
an ni a, Branch 8 an lut chiang sa a, hmun awl pahnih la awmah mark hmuh
zat inang te - Bawngkawn Branch, Bawngkawn Hmar Veng Branch, Chanmari
West Hmar Veng Branch leh Zonuam Branch te an inel tha leh bawk.
*BCM Assembly Committee lian Central Committee Meeting ni hnih awh
November 17 leh 18 2014-a neih chu tunkar Nilaini khan tluang takin an
zo ta.Tun tum Committee-ah hian Agenda lian tham leh thu thar langsar
lutuk a awm lo va, Central Committee hnuaia Department hrang hrang ten
Kum 2015-16 Annual Plan leh Budget ruahman te thlirin kum kal lai mek
Achievement leh Report te an thlirho a ni.
**BCM Relief &
Development Department chuan an hnuaia puanthui zirte thlahna hun
November 17, 2014 khan an nei a. General Secretary, AGS i/c Service leh
FOD Director te bakah R&D Committee member ten he hun hi hmanpuiin
kumina zir chhuak mi 10 hnenah Puanthui khawl leh Certificate an hlan a
ni.
*Aizawl khawpui huam chhunga Baptist Kohhran Mipa Pawl
(BMP)te chuan a vawi 18-na atan November 28-30, 2014 chhung khian Aizawl
City BMP Meet, Kanaan Veng Biak inah an nei leh dawn. Thupui atan
‘Dinthar lehna’ tih thlangin speaker atan Rev.F. Sangvela an hmang ang.
*Mizoram Home Minister R.Lalzirliana chuan HPC (D) te chuan Mizoram
sorkar leh mipui te ralthuam hmang a an tihbuai thin avangin dan ang
taka helpawl anga ngaih annih theih nan Home ministry ah thlen anni tawh
niin a sawi.
*Home Minister Pu R. Lalzirliana chuan nimin khan
Zofate insuihkhawmna kut hman mek Zofa Global Unity Festival 2014
kharna Rih Dil a neih chu a hmanpui. He hun hmang tur hian Parliamentary
Secretary Pu KS Thanga leh MLA Pu Vanlalzawma bakah Addl. DGP Pu.
Lalthianghlima leh IGP Pu. Zorammawia ten Home Minister hi an tawiawm a
ni.
*Nimin chawhma dar 10:30 khan Feed Mill, Selesih Farm ah Pu
C. Ngunlianchunga, AH & Vety Minister in chaff cutter (bawngchaw
channa khawl) mi 20 hnenah a pe chhuak.Heng chaff cutter dawngtute hi
NLUP hnuaia bawng lian dawngtute an niin a dang zawng chu Vety Farm a
hman turin pek chhuah a ni.
*Nimin 22 November 2014 khan
Kolasib D.C. Conference Hall ah NABARD tangkai zawka hmang theih tur a
workshop neih a ni. He hun ah hian Kolasib D.C. Jitender Yadav IAS chu
khuallian a ni a, khuallian chuan thu sawi in, NABARD chu mipui leh
co-operative society hrang hrang tana tangkai tak, agriculture thiamna
sang zawk hmanga thlai chin dan te leh pawisa an mamawh dan ang a bank
nen a thawh ho puitu a ni a ti.
*Press Information Bureau leh
I&B Ministry hnuaia Media Units hrang hrang - DDK, AIR, DAVP, DFP,
Song & Drama Division leh Mizoram Sawrkar leh Mizoram Journalists
Association te nena tang tlanga an buatsaih Public Information
Campaign/Jan Soochna Abhiyan on Programmes/Initiatives of Government of
India chu Lunglei District-ah November 26 - 28, 2014 chhung hian neih a
ni dawn a.
*India sipai te hman turin laipui 814 lei turin
sorkar in thutlukna a siam ta, hemi atana pawisa senso tur Rs.
Vaibelchhe 15,750 pawh pawm a ni tawh a ni. India sipai te hian kum 1986
a Bofor laipui leina tur a buaina nasa tak a chhuah atang khan laipui
an la lei belh ta lo a ni.
*Nizan a Indian Super League inkhel ah Fc Goa chuan FC Pune city 2-1 in an hneh.
*Lok Sabha Speaker Sumitra Mahajan chuan naktuk atanga Parliament
thlasik thutkhawm tan tur ah tluang tak a session hman a nih theih nan
all party meeting nimin khan a ko.
*Minister for Water
Resources, River Development and Ganga Rejuvenation chuan nakum 2015 chu
India ram pumah "Tui humhalh kum (Water Conservation year)" ah puan a
ni ang a ti.
*JAPAN AH LIRNGHING
Nimin Inrinni tlai ah
khan Japan ah 6.8 magnitude a chakin lir a nghing. Lirnghinna hmun hi an
ram khawpui Tokyo atanga 180 km huam chhung ah a ni. Rel chak chi te
chu an tlan lai tih tawp lailawk a ni a, lirnghing vang hian Nagano leh
Hakuba khua ah te In thenkhat a chhia a, hliam tuar zat hriat theih a la
a ni lo. Lirnghinna hnaih ah leimin a awm nual bawk.
22.11.2014
*KHAWVELA HMEICHHIA HMUN THUM A THEN A HMUN KHAT TE DAN LO ANGA ENKAWL ANNI
World Health Organization (WHO) report a alandan in khawvel a hmeichhia
hmun thum a then a hmun hnih te hi an taksa dan lo ang a hman tir anni.
Khawvel pumah hmeichhia maktaduai 100-140 inkar te hi tihduhdahna hnuai
ah an awm a, maktaduai 70 te chu kum 18 an tlin hma a pasal neih luih
tir anni. Khawvel pumah hmeichhia 7%te hian pawngsual an tawk bawk a ni.
*US PRESIDENT INDIA REPUBLIC DAY AH KHUALLIAN NI DAWN
India Prime Minister Narendra Modi sawmna chhangin US President Barack
Obama chu nakkum January ni 26 a India Republic day lawmna puiber Delhi a
neih turah khuallian a ni dawn. US President te zinga vawi 2 India ram
tlawh awm chhun a ni dawn a ni.
