3rd - 4th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

4.2.2014

*INDIA MI MICROSOFT CEO NI DAWN
India ram Hyderabad a piang leh seilian Satya Nadella chu Microsoft Chief Executive Officer(CEO) thar tur a thlan a ni. Satya hian Manipal University atanga lehkhazir chhuakin 1992 khan khawvel a computer siam chhuak tu lar tak Microsoft company hi a zawm a ni.

 

*Muallungthu Presbyterian Kohhran chuan 19-23 February 2014 hian an kum 100 tlin(Centenary) an lawm dawn.

 

*Khuangthing Branch KTP chuan 22 February 2014 hian Diamond Jubilee an lawm dawn.

 

*Vawiin chawhma dar 11:00 khan North east Festival, Minnistry Of Youth Affairs & Sports, Government Of India leh NSS Mizoram tangkawpin an buatsaih chu Mizoram University (MZU), Tanhrilah Pu Zodintluanga, Minister i/c Sport And Youth Services etc. chu khuallian niin a hmanpui.

Pu Zodintluanga chuan Youth Festival Mizoramin a thleng thei chu lawmawm a tiin,MizoramUniversityhotuten phal taka hmun leh hma bakah tul ang te an hmantir avangin lawmthu a sawi.

He festival hi MZU hotuten lo dawng sawngin khelmual tura an lo riruat pawh an en pui nghal a ni.

Pu R.Vanlalvena, Secretary, Sport And Youth Services chuan inkhawm hi Mizoram University Multipurpore Hall-ah a kaihruai a, Prof. R.Lalthantluanga, Vice Chancellor, MZU, Pu Sunil Kumar Basumatary, Youth Officer, NSS Regional Centre, Guwahati, Dr. P.Rinawma, Programme Co-Ordinator, NSS (MZU) Dr. Lalzuiliana, State Liaison Officer-cum-Dy.Secretary NSS Cell, Mizoram leh mi pawimawh ten an hman pui.

He Festivalah hian Mizoram chhung College leh State pawn lam College atangin an rawn hmang a, ni 7.2.2014 ah khar a ni ang. - DIPR

 

*Manipur Group YMA Conference vawi 29 na chu zanin atangin Thingkangphai ah tan a ni dawn ta. Khuallian ah Pu PC Lawmkunga IAS, Chief Secretary, Govt of Manipur a ni ang a, he inkhawmpui hian 6 Feb 2014 thleng a awh ang.

 

*7th PAY COMMISSION MEMBER THAR TE
India ram a central sorkar hnuai a hnathawk mi nuai 50 chuangte hlawhbi enthatna hna thawk turte a hnuai ami ang hian Prime Minister chuan a pawm ta:
Chairman: Ashok Kumar Mathur (Former Supreme Court Judge)
Secretary: Meena Agarwal (OSD Dept. of Expenditure)
Member (Fulltime): Vivek Rae (Oil Secretary)
Member (Parttime): Rithin Roy (Director NIPFP)
7th Pay commission te hi kum 2 chhung a report thehlut tur a tih anni a chung an rawtna te chu 1 Jan 2016 ah hman tan tur a ruahmanna siam a ni. Sorkar laipui hian a hnuaia thawkte hlawh enthat hna hi kum 10 danah a nei thin a ni.

 

*Kum 2014 – 2015 atana Rashtriya Swasthya Bima Yojana (RSBY) leh Mizoram State Health Care Scheme (MSHCS) hnuaia inziah luhna kumin bik tana hmasaber chu vawiin khan Govt. Complex, Luangmual-ah buatsaih a ni a, he hun hi Health Minister Pu Lal Thanzara chuan hmanpuiin inziaklut mipa panga hnenah damloh ni khuaa RSBY atan hman tur Smart Card a hlan nghal bawk a ni.

RSBY hi Central Sawrkar ruahmanna niin kum 2010 atang khan tan in Health & Family Welfare Department in an kalpui mek. He scheme hian BPL, MNREGA Job Card neite leh Street Vendor te a huam a, List hi khua leh veng tina Health Worker-te leh VC leh Local Council ten an survey a ni. Registration Fee cheng 30 chawiin an inziaklut thei a. Chhungkaw pakhat tan kum khatah Damdawi In inenkawlna cheng 30,000 thleng a thlawin Sawrkar-in a tum sak thin a ni. Inziak lut te hi an thlalak leh an kutzungpui thla nem kai hnuah Smart card pek vek an ni a, chu chu Damdawi Ina an in admit hunah hman tur a ni. RSBY hnuaia hian nikum January leh December inkar khan bill 15531 pek tawh niin bill an pek chhuah tawh zat chu cheng 8,09,48,864/- a ni.

Mizoram State Health Care Scheme (MSHCS) hi kum 2008 atang kalpui tan tawh niin hei hi State sawrkar ruahmanna a ni a. He scheme hian RSBY BPL leh APL(MGNREGA Job Card neite leh Street vendor te) leh APL pangai, Sawrkar hnathawk lo emaw thawk emaw, State leh Central Sawrkar atanga MR bill thei lo zawng zawngte a huam thei vek ani. Voter Card kengin mahni veng.khau Sub-Centre-ah inzaihluh thei a ni. Chhungkua member 5 chin tan cheng 500-a in register-in cheng nuai khat thleng a bill theih a, cheng 750-a in register-in cheng cheng nuai hnih thleng a bill thei a leh cheng 1000-a in register-in cheng nuai thum thleng a bill theih a ni. Chhungkaw member panga aia tam naah chuan member pakhat zelah cheng 100, cheng 200 leh cheng 300 te pek belhin cheng nuai khat, cheng nuai hnih leh cheng nuai thum te a bill theih dawn a ni. MSHCS hnuaia hian bill 7141 pek tawh niin bill an pek chhuah tawh zat chu cheng 7,01,61,527/- a ni. MSHCS hian natna khirh tak tak Cancer, lung lampang, zunkawng bakah a vaiin natna hrang hrang 120 a huam a ni.

BPL tan bik RSBY Top-up Scheme siam a ni a, registration fee cheng 30 an pek bak engmah dang bekbelh ngai lovin Health Care Scheme-ah automatic-in ziah luh an ni a, RSBY cheng 30,000 bakah MSHCS hnuaia cheng 2,70,000 thleng cover an ni zel. BPL lo tan chuan Health Care Scheme hnuaia registration pangai pek a ngai.

He Scheme pahnih te hi kum 2014 – 2015 (1.4.2014 to 31.3.2015) chhunga hman atan inziah luhna hun hawn tan mek a ni a. April 2014 thlang hawn a ni ang. Sub-Centre-ah inziahluh theih a ni a, RSBY tan bikah hian chhungkaw kima thlalak a ngaih avangin leh an kutzung tang (fingerprint) nem a tul avangin a hun leh a hmun ngaih pawimawh tur a ni ang. Veng leh khaw tinah a hun leh hmun chu VC leh LC kal tlanga inhriattir thin a ni. - DIPR

 

3.2.2014

*Delhi police te chuan Arunachal Pradesh zirlai Nido Tania thih chungchang a rilhlelh mi 3 an man tawh a, heng mite hi thu zawhfiah tur in an kawl mek niin sawi a ni.

 

*Cricket khelthiam Sachin Tendulkar(40) leh Scientist lar CNR Rao(79) te chu naktuk hian India President in khua leh tui te chawimawina sang ber 'Bharat Ratna' a hlan dawn. Tendulkar hi sportman zinga he chawimawina sang dawng hmaber a ni. Bharat Ratna award hi 1954 ah India sorkar in bul tanin mi 39 te hnenah he chawimawina hi a lo hlan tawh a ni.

 

*AIADMK Party chuan Lok Sabha inthlanpui lo awm turah CPI nen an thawhho tur thu an sawi chiang ta. Tamil Nadu CM leh AIADMK hotunu J.Jayalalitha chuan sorkar laipui ah BJP leh Congress tellohna Third Front sorkar siam ngei an tum thu a sawi a ni.

 

*MZP hruaitute leh Aizawl City Joint Students' Union te chuan 6 Feb 2014 thleng a sorkar in Post Matric Scholarship a pe chhuak lo a nih chuan Aizawl ah kawngzawh an tum a, thuneitu lamin tunkar chhung a scholarship hi pek an tiam avangin kawngzawh tur chungchang hi naktuk lamah ngaihtuah nawn leh an tum.

 

*Delhi cabinet chuan eirukdona tur Jan Lok Pal bill chu an passed ta, 13 Feb ah assembly ah put luh a ni ang.

 

*SUPREME COURT IN AIRTEL LEH VODAFONE LICENCE PAWHSEI SAK PHALLO
India rama mobile phone operator lian 2 Airtel leh Vodafone ten November 2014 a an licence tawp mai tawh tur pawhsei an dilna chu Supreme Court in a hnawl sak. Heng company 2 te hian telecom ministry in spectrum licence kumin a an lilam hunah a hranpa a company dang te rual a an chhan ve leh a ngai dawn a, an mahni aia ngam huai an awm chuan an licence hi tihtawp sak anni thei a ni. Airtel leh Vodafone hian tunah hian subscriber mi maktduai 350 an nei mek a ni.

 

*SORKAR HNATHAWK NULA TIBUAI
North Khawlek-a awm Health Worker leh RMSA clerk leh middle school zirtirtu, nula 3 te chu khawtual tlangval zurui ten an tihbuai avangin vawiin (feb 3) hian North Khawlek atangin Aizawl panin an haw.

Thudawnnain a sawi danin North Khawlek-a sorkar hnathawk nula pathum te hian tlangval zurui avang hian zan pawh mu mumal thei lo khawpin harsatna an lo tawk fo tawh a. February ni 1 leh ni 2 zan ah pawh tlangval te hian chhaih buai lehin an tukverh te an sawi sak a, zan mu theilo khawpa an siam leh avangin an department hotute an hriattir hnuah Aizawl lam panin an haw ta hrih niin thudawnna chuan a sawi.

Hetiang harsatna avang hian Health department chuan hun engemawchen Health Worker pelova hrem khua te pawh an lo nei tawh ni a thudawn a ni bawk.
Source: Aitea Ralte via Times Corner Group

 

*PC Zoramsangliana, MLA chu a kal (kidney) thlak turin nimin khan Kolkata pan pui a ni.

 

*Vawiin ah Indian Science Congress vawi 101-na chu Jammu University ah PM Manmohan Singh an a hawng dawn. Ramchhung leh rampawn a science lam a mithiam te an fuankhawm mek a ni.

 

*DAVP IN PHOTO EXHIBITION NEI DAWN
Directorate of Advertising & Visual Publicity (DAVP), Ministry of Information & Broadcasting chuan Seling-ah Sorkar Laipui in thingtlang hmasawn nana ruahmanna hrang hrang a duan, a bikin Bharat Nirman Campaign leh National Rural Health Misssion (NHRM) schemes te kalpui dan leh hnathawh dan te chu thlalak hmanga pholanna (Photo Exhibition) a buatsaih dawn a. Photo Exhibition hi Seling YMA Hall-ah February ni 4 atangin February ni 8 thleng buatsaih a ni dawn.

Sorkar Laipui ruahmanna hrang hrang te chipchiar taka mipui hnenah thehdarh leh zau zawka heng ruahmanna chungchang an hriat theih nan Photo Exhibition hi Field Exhibition Unit Aizawl, YMA Seling Branch leh Seling VC te thawhhona in buatsaih a ni dawn a ni. - DIPR

1st - 2nd February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

2.2.2014

*MANIPUR NULA 2 KUTTLAK VANGIN MIPA 1 DELHI AH MAN A NI
24 Jan tlai a Delhi a dawr pakhat kawt a Manipur hmeichhe 2 kutthlak a mawilo tak a ankhum tu Prem Chand(32), Kotla Mubarakpur, South Delhi a cheng chu police ten an man. Prem Chand hian khawlaiah ui kai chhuak in a ui kaihna hrui leh Manipur nula pakhat pheikhawk chu a lo thlun zawm a, he hmeichhia hian inthiarfihlim a tumna lamah a ui chu a pet sak a, chumi thinrim chuan henu hi a ben bakah a mah rawn chhantu Manipur nula dang pawh thinrim engphiarin a lo tawng tel a, heng nula 2 te hian Police hnenah FIR thehlut in man chhuah a ni ta a ni. Kan national capital Delhi hmarchhak lam mi te tan hian a him lo ta fo mai!

 

*HOLLYWOOD STAR SEYMOUR HOFFMAN BORAL
Hollywood filmstar Philip Seymour Hoffman(46) chu New York a a chenna(apartment) ah thi a hmuh a ni. A thih chhan hi New York Police ten an chhui chiang mek a ni. Hoffman hian 2005 khan Capote tih film a chan vangin Academy Award for best actor a lo dawng tawh a ni. A thih chhan ah hian drug overdose ni a rinhlelh a ni a, nikum khan drug a tih avang hian rehab ah te pawh a lo lut tawh thin a ni. A nupui leh a fate 3 a kalsan a ni.

 

*HYDERABAD MIZO CHRISTIAN FELLOWSHIP 2014-15 HRUAITU THAR
Chairman: Pu Samuel Lalnghatliana Ralte
Vice Chairman: Pu Zohmingthanga
Secretary: Tv.H.Z Siama
Asst.Secretary: Tv.K.C Lalmuanpuia
Treasurer: Nl. P.C Lalchhanhimi
Finance Secretary: Nl.Laldinpuii

 

*Sikkim chuan khualzin te hip nan paragliding lamah hma chak takin an la mek. Kum 2020 thleng target siam in paragliding ti tur khualzin kum tin mi 5000 tal hip luh an tum a ni. Paragliding an promote that avang hian kum 3 kalta chhung khan ram pawn leh ramchhung tourist mi 6000 chuangin Sikkim hi an tlawh tawh a ni.

 

*Mahniin thil dang i thei lo a nih pawh in rinawmna leh taimakna hi chu nangma chauh pawn i thei a ni.

 

*Ahnuaia links ah hian Femina Miss India 2014 a tel tum te tan online in form a fill up theih e:
http://beautypageants.indiatimes.com/feminacontestform2014.cms

 

*A hma lama kan rawn post tawh ang khan vawiin atang hian Mumbai khawpui ah chuan monorail service mipuite hman theih turin tan a ni ta.

 

1.2.2014

*Indonesia ah tlangkang vangin mi 11 in nunna an chan a, mi 3 in hliam an tuar bawk, tlangkang hian leichhungril atangin tui leh chirh 2,000 meter a sang ah a vawrh chhuak a ni.

 

*Rilru lam zirmi(Psychologist) ten an ti:
1.Mi hi thilho te te ah pawh a nuih luih vak vak chuan chhungrilah a khawhar rukna a nei tihna.
2. Mi damlohna pawh nei em em chuang silo a mut reng chuan a lungngai tih na.
3.Mi thilho te te ah a phunnawi a a lungawiloh fo chuan hmangaihtu a mamawh tihna.
4. Mi in damlohna pawh nei chuang silo a thil a ei that theihloh chuan a rilru a vei ruk tak leh hlauhthawn ruk a nei tih na.
5. Titi nikhua a mi a tawng that duh vaklo a a tawng chhun ah rang deuh deuh a sawi chuan thil zep then an nei duh chawk.

 

*GNAT-A ALBUM TLANGZARH

Gnat Lalrinchhana (L) album release

January ni 13, 2013 zan dar 10:30-a chatuan ram pan ta, Mizo zinga talent nei tha chungchuanga chhal ngam Gnat Lalrinchhana album chu nizan (jan 31) dar 7 khan Vanapa Hall, Aizawl-ah C. Zorammawia, IGP-in Gnat-a zahna chibai buka salute-in a tlangzarh. Album tlangzarh zawh hian Gnat-a tribute concert neih chhunzawm a ni.
source: Aitea Ralte via Times Corner Group

 

*Union Home ministry chuan Arunachal Pradesh zirlai a sam zuah dan an nuihzat vanga Delhi dawrkai thenkhat te nen a in hnial thinrim a hnua na tak a sawisak tawk Nido Tania Delhi a a thih chungchang ah Delhi police te chu report kimchang pe thuai turin a hriattir. Nido Tania thihna tawh chungchang ah hian thu zawhfiah turin mi 3 police ten an la tawh a ni. Chief Minister Arvind Kejriwal pawn Delhi Lt Governor Najeeb Jung hnenah magisterial inquiry tih tir turin a ngen bawk a ni.
  #Lamtluang ah a thihdan chungchang hi kan post tawh a, post hlui i lo hai chhuak mai dawnnia.

 

*Mizoram Youth Commission leh Emporium Training & Consultancy (ET&C) Pvt. Ltd te chuan vawiin khan Mizoram Youth Commission Chairman Pu T Sangkunga office-ah thawhhona thuthlung an ziak. Thawhhona thuthlungah hian Mizoram sorkar aiawhin Youth Commission Secretary Pu JT Vanlalngheta’n a hming a ziak a, Emporium Training & Consultancy Pvt. Ltd. aiawhin an Director Pu Piyush Kheria chuan hming a ziak ve thung. Mizo thalai 250 te tan Certificate Course hrang hrang - Aviation & Hotel Hospitality, Travel & Tourism Management, Retail Management, BPO Training leh Spa Training-te pek an ni ang a, training chhuakte chu ram chhung leh ram pawn Company lian leh rintlak hrang hrangah hna zawn sak an ni ang.

Inremna ang hian MYC chuan advertisement tichhuakin DPR a buatsaih anga, Mizo zirlai Graduate chin chunglam 250 thlanchhuah te chu ET&C Pvt.Ltd., Kolkata a an training centre-ah a thlawnin training pek an ni ang. Training an zawh veleh hna zawn sak an ni ang a, thla khat chhunga hnathawh tur an hmuhsak lo a nih chuan hna an hmuh hma zawng training chhuak hna hmu lote hnenah tanpuina thlatin cheng 8000 an pe thin dawn a ni. - DIPR

 

*Khawvela hnam leh chi tinreng, vunngo, vuneng, vunhang, samdum, samvar, sambuang, samsen, mitmeng zim, mitmeng zau deuh te pawh Pathian in duhtaka a siam te vek kan ni e. Mi chung a hleilen leh in diriam hi kan ching tur a ni lo.

31st January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

31.1.2014
*DIESEL MAN TIH PUN A NI
Zanin zanlai atang hian India ram pumah diesel man 1 litre zelah 50 paise(Duli) a tihpun a ni dawn.

*ARUNACHAL ZIRLAI DELHI AH SAWISAK VANGIN THI
Nido Tania, Arunachal Pradesh a congress MLA leh Parliamentary secretary fapa Delhi a college zirlai chu nilaini khan Lajpat Nagar, South Delhi a dawrkai thenkhat ten a sam cheidan(hairstyle) an lo nuihzat avangin an inhnial thinrim chu amah hi natakin kut an thlak a,nimin khan Green Park a an inluah ah an sawisakna tuar lo hian a boral ta a ni. A ruang hi AIIMS ah post-mortem a niin result nghah mek a ni.

*Mizo Idol 2013 Top 7 ah Janet K.Lalrinpuii, Sairang a tla.

*Mizoram 2 - 0 Manipur, Santosh Trophy 2014 NE qualifying round

*Santosh Trophy 2014 Northeast zone qualifying match khelh mek ah vawiin tlai dar 4 hian Lammual ah Mizoram leh Manipur an in tum dawn. Mizoram hian chak ngei ngei an ngai a, an chak lo emaw an draw emaw a nih chuan Manipur hi an lut dawn zawk a ni.

 *Counselling Centre hawng dawn
Synod Executive Committee (SEC)-in a phalsak angin Family Guidance & Counselling Centre chuan February 3, 2014 (Thawhtanni) chawhnu dar 2:00 hian Vaivakawnah Counselling Centre thar an hawng dawn a, Centre hawnna inkhawm hi Rev. Lalzuithanga, Senior Executive Secretary-in a kaihruai ang a, Rev. R. Lalhmingthanga, Director, Family Guidance & Counselling Centre hnen atangin Report ngaihthlak a ni ang a, Synod Moderator Rev. K. Lalhmuchhuakan Centre hlanna hun hmangin thuchah a sawi ang. Mizoram Synod Choir leh Vaivakawn Bial Zaipawlten hla an rem ang a, Rev. Lalsangbera Pastor i/c, Vaivakawn Bial-in malsawmna sawiin hun a khar ang. Counselling Centre thar hi Vaivakawn Kohhran Hall, First floor-ah a awm dawn a, Counsellor atan Rev. C. Chawngliana leh Chowkidar 1 an awm ang. - Synfocity =472

*UTTARAKHAND CM IN BANNA THEHLUT
Uttarakhand Chief Minister Vijay Bahuguna chuan vawiin khan an state Governor hnenah banna a thehlut. Vijay Bahuguna banna chhanah hian nikum a an state a tuilian nasa tak an tawrh lai a a chet dan in a thawhpui te leh congress hruaitu lu te mit a tlin loh vang ni ber a sawi a ni. Naktuk ah Congress Legislature Party meeting in CM thar tur an thlang ang.

 

*Vawiin khan Pi Zaii Hall, Mission Vengah State Level Best Anganwadi Worker Award leh Helper Award mi sawm hnenah hlan a ni a, Social Welfare Department Minister, Pu P.C. Lalthanliana chu khuallian a ni.
State Level Best Anganwadi Workers Award dawngtu te:
1)Lalthlamuani, Kawnpui AWC-I, Thingdawl ICDS Project.
2)F. Vanlalengi, Chiahpui AWC-II, Ngopa ICDS.
3)Laltanpuii, Ramhlun ‘N’ AWC, Aizawl Urban ICDS Project.
4)Lalchhanhimi, Khawzawl AWC-X, Khawzawl ICDS Project.
5)Zothansangi, Chawkawn AWC, E.Lungdar ICDS Project.

State Level Best Anganwadi Helper Award dawngtu te:
1)Lalengmawii, Kolasib AWC-VI, Thingdawl ICDS Project.
2)Lallawmchhungi, Vairengte AWC-II, Bilkhawthlir ICDS Project.
3) Liansangpuii, Ngopa AWC-III, Ngopa ICDS Project.
4)Kaphnuni, W.Phaileng AWC-VII, W. Phaileng ICDS Project.
5)Zosangpuii, Sethlun AWC-I, Lunglei ICDS Project.

State Level Best Anganwadi Workers Award hian certificate bakah pawisa fai Rs. 5000/- a keng tel a, State Level Best Anganwadi Helper Award hian certificate leh pawisa fai Rs. 2500/- a keng tel bawk. State Level Best Anganwadi Workers Award hi 1995 atang khan kumtin hlan thin niin, tun kum atang helper award hi telh a ni.

Heng award bakah hian National Award Anganwadi Workers hnena hlanturinheng mi te hi thlan an ni a, hun remchang hmasa berah hlan an ni ang.
Huallianguri, Champhai AWC-XIII, Champhai ICDS Project.
Vanlalringi, Siphir AWC-II, Tlangnuam ICDS Project.
Lalkamlovi, Republic AWC-III, Aizawl Urban ICDS Project.
Rothangi, Ngopa AWC-V, Ngopa ICDS Project.
Lalrokimi, Bawngkawn South AWC-II, Aizawl Urban ICDS Project. - DIPR

 

*EDENTHAR AH IN KANG

EDENTHAR AH IN KANG (Fire in Aizawl)
pix: Opi Ralte

EDENTHAR AH IN KANG  (Fire in Aizawl)
pix: Seni Ralte

Vawiin chawhma dar 11 vel khan Aizawl Edenthar veng a Sangliana Petrol Pump chhak a motor ke(tyre) siamna workshop chu a kang a, he in hi akang fai vek a, a bula cement concrete building 2 te pawh a kang kai a ni. Kangmei chhuahna na chhan ah hian electric kalsual vang ni a rin a ni.

 

*Hollywood star Kim Kardashian leh Kanye West te chuan kumin June thla hian Paris ah ropui takin inneih an tum. An inneih senso atan hia $ Maktaduai 30 lai hman an tum a ni. 2011 khan Kim Kardashian hian a pasal hmasa Kris Humphries a neih khan $ Maktaduai 10 inneih senso atan a lo hmang ral tawh bawk a ni.

30th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

30.1.2014
*AIZAWL AH BOMB PUAK
Zanin dar 11:30 vel khan Aizawl Treasury Square chawhmeh bazar tawntirh ah gelatin bomb a puak a thi leh hiam an awm hriat a ni lo. Bomb puahna hnaih Assembly house darthlalang thenkhat erawh a keh nasa niin sawi a ni. Police ten bomb puahna hmun hi an enfiah mek a ni.
 
*Naktuk ah Santosh Tropy 2014 qualifying round of NE zone Aizawl a khelh mek ah Mizoram leh Manipur an intum dawn, Mizoram hi an chak ngei ngei angai,an chak lo emaw draw chuan Manipur hi an tlang ang.
 
*ULFA HRUAITU THI TURIN TI
Chittagong Metropolitan Special Tribunal court, Bangladesh chuan Assam hel ULFA hruaitu Paresh Barua leh midang 11 te chu 2004 a a ruk a Bangladesh a ralthuam tam tham tak tawlhruk thubuai ah thi turin an chungthu a rel sak.
 
*Home Minister R.Lalzirliana'n Mizoram Liquor Total Prohibition Act chu enthat a nih dawn thu leh zu khuahkhirhna thlah zalen hlek tum ani a, chumi atan chuan Kohhran te rawn anni lo ang a ti.
 
*Mizoram police CID(Crime) hnuai a special narcotic cell te chuan nimin tlai dar 5 khan Lalremruata s/o.Lalhmingthanga(L), Chhinga Vengthlang hnen atangin ruihhlo hlauhawm tak methamphetamine mum 1,20,000 an man, an thil man hi Rs.Nuai 224 man hu nia chhut a ni. Lalremruata hian heng ruihhlo te hi an bedroom chhung a air bag ah a lo dahtha a, khawchhak lam atanga an rawn ken a lo kharchhawn sak niin a insawi. - Zonet Zingdaifim
 
*INDIA RAMA MONORAIL HMASABER MUMBAI AH HAWNG DAWN
Tunkar inrinni lo awm turah hian India khawpui te zinga monorail service hmasaber tur chu Mumbai ah hawn a ni dawn ta. Mumbai monorail service 1st phase ah hian monorail 6 hman a ni rih phawt dawn a, rail 1 ah hian pindan(coach) 4 zel a awm ang a tum khat ah mi 560 a chuan theih dawn a ni. 15 mins inkar dan zel ah Wadala leh Chembur inkar (8.26 Kms) ah a service thin dawn a, 2nd phase Wadala leh Jocob's circle inkar chu nakum lamah peih hman beisei a ni. Monorail chuan man hi Rs.5-11 inkar a ni ang.
 
*EIRAWNGBAWLNA GAS THLATIN SEM DAWN
Union Cabinet chuan vawiin khan sorkar in a man tlawm zawk(subsidized) a eirawngbawlna gas chhungkaw tin tan a pek chhuah thin chu kum 1 chhung atan bur 9 atangin bur 12 ni tawh turin thu tlukna an siam. Oil minister M Veerappa Moily chuan 1 February atang chuan chhungkaw tinin kum 1 chhungin thla tin LPG an chang thei tawh dawn niin a sawi.
 
*Vawiin khan Lunglei High Powered Committee Vice-Chairman Pu S.Laldingliana chu Govt. Theiriat Middle School Golden Jubilee (1964-2014) lawmnaah Khuallian niin Jubilee Lungphun a hawng nghal a ni.

Jubile lawmna inkhawm Govt. Theiriat M/S Headmistress Pi F.Chhunzami kaihhruaiah Khuallian Pu S.Laldingliana chuan Jubilee lawmna chhimtu zawng zawngte chu Jubilee Chibai bukin, kum 50 kalta chhungin he sikul atangin sorkar officer leh mi pawimawh engemaw zat an chherchhuak thei avangin a chhuanawm hle a ni, a ti. Mizoram chhimlam chu “thluak a awm” tiha hriatlar thin a ni a, amaherawhchu tunhnaiah Central leh Civil Service lamah mi kan tlem tak avangin tun aia nasa zawka tanla turin zirtirtu leh zirlai kalkhawmte a fuih a, hun lokal zel tur atan duhsakna a hlan a ni. Zirlai ten zirna lama an tui leh thahnemngaihna chang an hriat theih nan zirtirtuten an cho thiam a ngai a, nu leh pa te pawhin faten lehkha an zir that theihna turin hun tha an pek a ngai a ni, a ti.

HPC Vice-Chairman hi a nupui Pi Lilypari Sailo, ARCS Lunglei, SDEO(S) Lunglei Pu Vanlalchhana leh sorkar officials dangten an tawiawm a ni. Golden Jubilee lawmnaah hian sikul naupang ten special item hrang hrang an nei a, an school-a Hindi Teacher Pu C.Biakkunga chu a hnathawh that avangin Citation hlan a ni bawk a. Vawiin tlai vek khan Jubilee ruai kilho nghal a ni bawk.

Theiriat Middle School hi khua mipuiten School Managing Board dinin ni 15.1.1964 khan din tan a ni a, zirlai naupang 55 an nei a ni. Headmaster hmasa ber chu Pu C.Lawmkima niin zirtirtu pahnih - Pu R.Sangthuama leh Pi R.Rokimi - te nen zitir hna an thawk tan a ni. Kum 1968-ah Adhoc Aided leh kum 1972-ah Deficit-ah te hlankai niin kum 1991 atang khan Sorkar School-ah hlankai a nih tak avangin a hming pawh ‘Govt. Middle School, Theiriat’ tih a lo ni ta a ni. Kum 2005 khan SSA tanpuinain School building chu semi-pucca leh changtlung zawkin sakthat a ni. -DIPR
 

*KOM NULA IFS AH TLING THAR

Esther Laltankim Serto, IFS
Pix source: www.facebook.com/Lamtluang

Nl.Esther Latankim Serto chu UPSC in nimin a Indian Forest Service Examination 2013 result a tih chhuah ah tling zingah telin a pumpui ah 62-na a ni. Nl.Esther-i hi a pa Kom hnam niin a nu Hmar a ni a, Imphal, Manipur-ah chengin University of Delhi atanga Mathematics a Graduate a ni. IFS tling thar Esther-i hi kan lawmpui e. IFS 2013 exam ah hian mi 85 an tling a, tling zingah hian ST-6, SC-13, OBC-29 awmin a bak zawng chu General candidate an ni.

 

*AP ASSEMBLY IN TELANGANA BILL AN HNAWL
Vawiin khan Andhra Pradesh Assembly chuan Telangana state thar siamna tur Andhra Pradesh Reorganisation Bill 2013 chu voice vote hmangin an hnawl. Chief minister Kiran Kumar Reddy chuan Parliament ah he bill hi passed a nih chuan politics atanga chawlh a tum thu a sawi. AP assembly house ah he bill sawiho a nih lai hian Telangana bial chhunga MLA te chuan house pawmpui na phut in nasa takin an nawr a mahse Telangana state thar siam duhlo tu an tam zawk avangin an duhdan hi a tlang zo ta rih lo a ni. State thar siam hi state assembly in duh lo mahse Parliament ah passed a nih chuan kal tlang pui theih tho a ni.

 

*LIRNGHING KHA
Nizan a kan rawn post tawh lirnghing (earthquake) kha Regional Seismological Centre, Shillong in an chhut dan chuan dar 7:16 p.m khan epicentre atanga Richter Scale a tehin 5.1 magnitude a chakin a nghing a ni. Manipur lamah a nghing nasa ber a, India hmarchhak state dang ah te pawh lirnghing hi hriat a ni deuh vak a, a thawh nasat na hmun hi India leh Myanmar inrina lai vel a nih avangin Mizoram ah pawh a siper chhete kan lo hre ve a ni. He lirnghing avang hian chhiatna thleng a awm hriat a ni lo a, chik zual duh te tan lirnghinna hmun tak tak chu 93.9A E Longitude leh 23.9A N Latitude a ni e.

 

*Directorate General of Civil Aviation chuan tunhnai lawk khan private airlines te hnenah India ram a Member of Parliament -Rajya Sabha & Lok Sabha te chu thlawhna an zin leh haw reng rengin 'mi pawimawh bik' (VIP) annih avang in 'lal' anga lo buaipui thin turin hriattirna a chhuah. Sorkar enkawl Air India ah chuan MP te hi 'lal' anga lo buaipui thin anni.