7th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*DIET AIZAWL-AH TEACHERS’ DAY HMANG

DIET Aizawl a Elementary Teacher Trainees leh Pre-Service Teachers Trainees te chuan vawiin khan DIET Aizawl Auditorium-ah Teachers’ Day vawi 54 na an hmang.

Trainees & Student te buatsaih Teachers’ Day 54-na lawmna ah hian programme item hrang hrang section tin ten an entir a In-Servie leh Pre-Service aiawh ten zirtirtute fuihna thu tha tak an sawi a. Pu H. Lalnunnema, Senior Lecturer chuan Teachers’ Day lo chhuah chhan te, zirtirtu dinhmun pawimawhna te, Mizoram zirtirtu dinhmun pawimawhna a sawi bawk.

Trainee leh Student te hian Teachers’ Day lawm nan thilpek hlu tak DIET Aizawl Faculty te an pe a. Programme hlimawm tak an hman a ni. (DIPR)

*Mi harsa zualte tanpuina turin Higher Secondary Lecturer Association chu Rs.1,00,000/- (Cheng nuai khat) Chief Ministers’ Relief Fund ah an chhunglut.

*LEILAWN DAWH CHIM AVANG IN IIT PROFESSOR 2 MAN ANNI

IIT Roorkee a civil engineer department a professor 2 - Vipul Prakash leh Vijay Kumar Gupta te chu kum 2012 a leilawn dawh tur an design a chim avangin court ah inlan tur a koh anni a, mahse an inlan duh lo avang in police ten an man ta a ni. Lamtluang thulakna in a tarlan danin heng professor 2 te hian Uttarakhand a Tehri district a Alaknanda lui a dawh tur leilawn design an siam a, an design anga lei hi dawh a nih laiin kum 2012 khan a chim ta a, mi 8 in nunna an chan phah a ni. Professor 2 te hi bail theih loh tur a manna thupek pek anni.

*MZP President Lalhmachhuana chuan Mizoram ah kumtin sorkar sum Rs. Nuaih Singkhat a bo ziah niin vawiin a Sorkar hnathawk leh politician eiru lo thlanchhuah te chawimawina hun an hmanah a sawi

*LAWNGTLAI KHAWCHHUNGA LEIMINTE ADDL. DC HOVIN ENFIAH A NI

Vawiin hian tunhnai ruahsur nasa avanga Lawngtlai College venga leiminna hmunte chu Addl. DC Pu. R. Lalsangluaia hovin enfiah a ni a, hmalak dan turte ngaihtuah a ni.

Tukin zing 5:30 vel khan Lawngtlai College Venga National Highway an kawng chhak, Pu Zamanga inhmun chu a min a, he leimin hian kawngpui pawh hi engemawchen a rawn chhilh a, vanneihthlak takin tihchhiat lian tham a neilo thung, lirthei pawh a kaltlang thei a ni. He leiminna atanga hla vaklo National Highway chhaklam an ah tho Pu M. Hlunzika ram pawh a min bawk a, hei pawh hian tihchhiat lian tham a neilova, kawng pawh a hnawh lo bawk. Lawngtlai dai, Saiha kawnga College Veng Tuikhur bulah tukin vek khan tuihawk tam lutukin hnawl leh leithil hmangin kawng a hnawh ping thung a, lirthei pawh sawmruk vel lai chu zingkarah khan a dang hman a ni. Hei pawh hi PWD National Highway enkawltuten JCB hmangin an thian nghal a, zing dar 8:00Am vel khan lirthei chitin kaltlang theiin an peih leh hman a ni.

Hengte bakah hian College Veng chhung inkalpawhna chuan hnuai kawng chu, Pu Lalhneha kawmthlang minin a hnawh bawk a, College Veng a mi vek Pu. M Lalnunsanga in chhak pawh che bawkin, an kawtah leivung engemawzat a tawlhthla a, heng leivungte hi zingkarah College Veng YLA ten hnatlangin an thensak nghe nghe a ni.

Heng hmun hrang hranga leiminte hi khuain a zirloh chuan paihfai nghal mai chi an nih hmel lohva, amaherawh chu a min zel tur ven nan Tuipuan (Silpauline) a khuh him nise, vengchhung kawng inhnawh ping erawh chu Deputy Commissioner JCB hmanga then dan ngaihtuah a nih tur thu Pu R. Lalsangluaia chuan a sawi.

Pu R. Lalsangluaia hi Pu Lalrinngheta, EE National Highway, Pu Lalchhuanawma, EM College Veng bialtu leh College Veng VC member ten an tawiawm a ni. (DIPR)

*KHAW CHIN

State Meteorological Centre Directorate of Science & Technology in a tarlan dan in vawiin a Aizawl khawpui a ruah tla zat chu 4.5 mm a ni a, khua lum lai ber in 24.5o C a vawh lai ber in 15.6o C a ni. Humidity chu a san lai ber in 98% a hniam lai ber in 90 % a ni. Religion Meteorological centre Guwahati chuan September 7, 10 leh 11 ah te hian Nagaland, Manipur, Mizoram leh Tripura hmun thenkhat ah te ruah tam tham tak a sur dawn niin a tarlang. (DIPR)

*ODHISA TLEIRAWL INDIAN IDOL JUNIOR 2015 ATAN THLAN A NI

Nimin khan Indian Idol Junior second season chu zawh a ni ta a, Odhisa tleirawl Ananya Sritam Nanda (13) chu Idol atan hian thlan a ni. Lamtluang thulakna in a tarlan danin Bhubaneshwar tleirawl Ananya Nanda hian final a luh pui Nahid Afrin leh Nithyashree Venkataramanan te chu khumin Indian Idol Junior nihna hi a chang ta a ni. Ananya hian trophy bakah Sony Entertainment TV nen contract nuai 10 man siamna tur a hlawh chhuak a ni. Indian Idol Junior 2015 hi Lamtluang chhiartu tam zawk chuan kan hrelo mai thei a, kumin May ni 30 atang khan neih tan a ni a, Sony TV ah Inrinni leh Pathianni zan apiangin dar 8:30 ah tihchhuah thin a ni a, nizan ah khan final an nei a ni.

*GUWAHATI LEH SHILLONG INKAR KAWNG PING

Nimin Pathianni tlai a ruahsur nasa avangin Guwahati leh Shillong inkar kawngpui National Highway - 40 chu Nongpoh bul Unming ah leimin in a hnawh ping. Lamtluang thulakn in a tarlan danin NH-40 ping mek hi thenfai hna thawh mek a ni a, vawiin lamah ruah te a sur belh tawh loh chuan a tlang hman beisei a ni. Niminpiah ah pawh khan NH-40 hi Byrinhat a leimin vangin a ping tawh bawk a ni. Mizoram atanga Guwahati zin tur ten hei hi hriat lawk a tul hle dawn a ni.

*MOBILE PHONE RUK MANCHHUAH VANGIN NULA INAWKHLUM

Bengaluru a Alvas college a B.Com 1st year zirlai Rakshitha(18) chu nimin khan an hostel bual inah inawkhlum a hmuh a ni. Lamtluang thulakna in a tarlan danin Rakshitha hi Ningani khan a hostel awmpui ten zirlai dang mobile phone a ru lai an hmu a, mobile phone a ruk sak chu a neitu an pe let leh a ni. Inrinni zan dar 10:30 vel khan Rakshitha hian a room a pan a, a tuk Pathianni ah a rawn thawh chhuah loh avangin a hostel awmpui te ngaihtha lo chuan a room an va en a, room ah a lo awm silo a, bual in chu chhunglamah a lo in kalh a, bual in kawngkhar chu an kar chhia a, Rakshitha chu kawrkhaina in a lo inawkhlum tih an va hmuchhuak ta a ni. Lehkha lo hnuchhiah in a nu leh pa te chu a thil tih avanga ngaidam a dil a ni. A ruang hi police ten post mortem turin an la a ni.

*ITALIAN GRAND PRIX AH LEWIS HAMILTON CHAK

Nimin a tlan zawh tak Intalian Grand Prix ah Mercedes driver Lewis Hamilton chu a tlanchak ber. Lamtluang thulakna in a tarlan danin Ferari driver Sebastian Vettel chu pahnihna a ni. Hamilton hi ti hian tun season ah a chak vawi 7-na a ni ta a, point 53 hmuin a teammate Nico Rosberg aiin a sang ta a ni.

*WALES TAN EURO 2016 KHELH BEISEINA TLEM

Euro 2016 qualify match khelh mekah Wales chuan Israel nen intumin huntawp ah goal khung lo ve ve in an in draw. Lamtluang thulakna in a tarlan danin he an in draw avang hian Wales tan chuan Group B ah point hmusangber ni mahse Euro khel tur chuan beiseina a tlem tawh hle. Pathianni leh ah Belgium in Cyprus an hneh lo hlauh te anih tak leh Wales hian Euro 2016 an qualify hram dawn chauh niin a lang ta.

*SOUTH KOREA A LAWNG CHESUAL AH MI 10 THI

Nimin Pathianni zing khan South Korea chhim lam a Jeju thliarkar hmar lamah lawng pakhat Dolphin tia a hming an vuah chu a chesual a, mi 10 in nunna an chan a, mi 8 te chu an chin hriat loh in tuiah an tla bawk a ni. Lamtluang thulakna in a tarlan danin lawng a chuang zat hi hriat chian ni chiah lo mahse mi 21 vel nia hriat a ni a, lawng captain pawh nunna chan zingah hian a tel a ni. An zingah hian mi 3 te chu nungdam in hmuh anni. Coastguard ten lawng a chesual an la hmuhloh te hi an zawng mek a ni.

6th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*SUNDAY TLAI NEWS LAWRKHAWM
*India sipai pension te chuan chawnghei an phut one-ranl-one pension chu sorkar in tihhlawhtlin a tiam avangin an chawnghei an titawp ta.

*Congress hruaitu hlun leh Madhya Pradesh CM hlui DIgvijaya Singh chuan a nupui 2-na atan TV anchor Amrita Rai a nei ta.

*Austria leh Germany te chuan raltlan tangkhang te tan an ramri an hawng ta. Heng raltlan te hi Islamic State firfiak te hlau a Europe a tlanchhia anni a, Europe ram thenkhat hian an ram a awmtir an duhlo a ni.

*England team in Euro 2016 qualifying match a San Marion 6-0 a an hneh tum a goal khung tu 1 Wayne Rooney chuan hranghlui inkhel thiam Bobby Charlton a record lo siam goal vawi 49 pet luh chu a tawmpui ve thei ta.

*Indian Space Research Organisation thlalem kahchhuah GSAT 6 (GSLV-D6) chuan a awmna tur orbit hlawhtling takin a thleng. He thlalem hi August ni 27 khan Sriharikota atanga kahchhuah a ni.

*Lamtluang page hi i thiante lo like tir ve la aw.

*ASSAM AH TUILIAN VANGIN MI 3 BORAL
Tukin ah khan Assam ah tuilian avangin mi 3 in nunna an chan. Assam ah hian darkar 24 chhungin tuilian avangin mi 7 an boral tawh a ni. Lamtluang thulakna in a tarlan danin Assam ah hian tunlai hian tuilian avangin mi nuaih 20 chuang te nunphung a tibuai a ni. Tuilian hi Goalpara, Barpeta leh Morigaon distrit ah te a nasa zual bik a ni.

*PM IN METRO RAIL THAR HAWNG
Tun atanga reilo te ah hian India Prime Minister Narendra Modi chuan 13.87 km a thui Delhi (Badarpur)- Faridabad (Escorts Mujesar) metro rail thar tur chu a vailiam dawn. Lamtluang thulakna in a tarlan danin he metro rail tlanna tur a station zawng zawng hi nizung chakna (solar power) nen a thuam vek a ni.

*BCM BEIHRUAL THLA
Mizoram Baptist Kohhran chuan kum tina an hman thin angin September 1, 2015 atang khan Beirual Programme an hmang tan ta a. Kuminah hian Beirual thuzir hi thla chawhnu lam, September 21 atanga zir tan turin buatsaih a ni a. Thla chawhma lam September 1 – 20 chhung hian Tualchhung Kohhran hrang hrangin anmahni remchan dan angin – Crusade/Camping leh Convention Progamme te an hmang mek a, Kohhran thenkhat chuan House Fellowship/House Church leh Home Visit Programme an kalpui thung.

Sawi tawh ang khan kumin Beirual Thupuiah“Mizoram Kristiante leh Tunlai KHawvel ” tih thu mi hrang hrang ziak zir a ni ang. (mizobaptist.org)

*FINANCE COMMITTEE VAWI-114 NA THU
Sept. 3, 2015 chawhma dar 10:00 khan J.M. Lloyd Hall, Synod Office-ah Synod Finance Committee a thu. He Committee hi a vawi 114-na niin Moderator Rev. Lalrinmawian a kaihruai a, member 35 an kal a ni.

Tun tum thutkhawmah hian Synod Hospital CharityFund hmuh leh hman chungchang te, Foreign Contribution Head tihpun rawtna te, Synod Financial Rules enthat rawtna te, Guwahati Biak In hmun leina tur chungchang te leh thil pawimawh engmaw zat ngaihtuah a ni.

Secretary Report atanga a lan danin kum 2014 - 2015 SynodAccounts CharteredAccountantAudit Reports dawn a nih tawh thu te, Bial Inkhawmpui Rorel bawhzuiin Pastor Bial 5-ah Finance Campaign/Synod Sum Vawn Dan Training tluang taka neih a nih tawh thu te ngaihthlak a ni.
Finance Officers' Report atanga a lan daninApril, 2015 atangaAugust, 2015 chhunga sum hmuh tawh chu Pastoral- ah Rs.30,99,67,427/- (Nuai sangthum sawmkua pakua sing ruk sang sarih zali sawmhnih leh pasarih) a ni a, Mission lamah Rs.24,20,33,415/- (Nuai sanghnih zali sawmhnih sing thum sang thum zali sawm leh panga) hmuh tawh a ni.Avaiin Pastoral leh Mission sum hmuh belhkhawm chu Rs. 55,20,00,842/- (Nuai sangnga zanga sawmhnih zariat sawmli leh pahnih) a ni a, chu chu budget pum pui atangin za zela 33.51 a ni.

Presbytery huapa sum chhun luh tawh chinah a sang ber chu Aizawl Bethel Presbytery an ni a, Rs. 5,93,51,322/- (Nuai zanga sawmkua pathum singnga sangkhat zathum sawmhnih leh pahnih) an chhung lut tawh a, a dawttu chu Aizawl Central Presbytery niin Rs. 5,59,40,829/- (Nuai zanga sawmnga pakua singli zariat sawmhnih leh pakua) an chhung lut tawh a ni. (Synfocity=552)

*MISSIONARY TIRCHHUAK DAWN
Vawiinah BCM Gilgal Biak In, Theiriat-ah Missionary pakhat tirhchhuah Inkhawm buatsaih a ni dawn a. Tun tuma Missionary tirchhuah tur hi August 2, 2015-a Missionary tirhchhuah tawh zinga pakhat, a hna zawm thei lo hmun ruak luah khat tura, Pannel List atanga lut chho ta, Nl. Lalhriatpuii, D/o R. Lalrinzuala, Theiriat Gilgal Kohhran a ni a, Arunachal East Field-ah Evangelist hna a thawk ang. Ani hian August 20 atang khan Headquarters Office, Serkawn-ah Orientation pawh neih pui a lo ni tawh a ni.

Missionary Tirchchhuah Inkhawm hi Rev.Samuel Lalremsanga Organiser MTKP -in a kaihruai ang a, Rev.B.Lalrinawma Mission Co-ordinator-in Thuchah sawiin Rev.C.Lalbiakzama Executive Editor-in a tirchhuak ang a, Gilgal Kohhran Zaipawl leh Theiriat Pastor Bial Zaipawl te an zai ang. (mizobaptist.org)

*BEHRUAL THLA HMANG TAN
Mizoram Presbyterian Kohhran chuan September 1, 2015 atang khan Beihrual thla an hmang tan a. September 1 - 6 chhung hian 'Ramthar Hapta' hman a ni ang a, September 21 - 27 hian 'Kristian Chhungkaw Hapta' hman a ni bawk ang.

September 27-ah 'Nu leh Pa Ni leh Kristian Chhungkaw Ni' hman a ni ang.Beihrual hi kum 1918 June thla atanga hman tan a ni a, kum 1925 atangin September thlaah neih thin a ni ta a, kum 1947 atangin Nilai Zan Thupui Bu leh Beihrual Thupui hi bu khata siam tan a ni. (Synfocity=552)

*GOVERNOR IN SOLOMON'S TEMPLE TLAWH
Nimin chawhnu ah khan Governor Lt.Gen(Rtd.) Nirbhay Sharma leh Lady Governor Pi Jyotsna Sharma te chuan Solomon’s Temple tlawh in Coronation Day, 2015 cheimawina te an fang kual. Governor leh a nupui hi Dr.L.B. Sailo, Chairman, Executive Committee,Kohhran Thianghlim leh Solomon’s Temple Management Authority ten an lo dawngsawng a ni.

Solomon’s Temple tlawhtu, Governor chuan Coronation Day, 2015 chu ropui a tih thu leh Mizoram ah remna leh muanna a awm ngei a ni tih tarlang tu pakhat a nih thu a sawi a. A thil hmuh ah chuan tunhnai mai a Mizoram a rawn thlen hnu ah Mizo te theihna leh thiamna san zia hmuh tawh te a lang chiang hle in a sawi a. Mizoram, state ralmuang leh hmun mawi tak chhunga thiamna namai lo tak kawltu mizo te hian an theihna hrang hrang thawhkhawm a hmalam an pan zel chuan reilo te chhungin khawvel hriat ah thil nasa tak an ti thei ngei in a rinthu a sawi a. Mizo thalai ten pianpui themthiamna an neih chu Skill training hmanga chher hriam a pawimawh hle ang a ti. Mizoram ah Governor inthlak zung zung vanga a mah pawh awm rei lo tur tho a ni em tih zawhna chu – Mizoram ah Governor atan Sawrkar in a ruat a. India Danpui hnuaia state khat hotuluber ni mahse, Sawrkar hnathawk zinga challang ber, First Government servant ni mai in a hriat thu thu in a chhang a. Mizo zingah Governor a dah a ni angin Mizo ah a inngaih tawh thu leh Mizo a nih reng tawh tur thu a sawi bawk.

Governor leh a nupui hi Kohhran Thianghlim thalai hruaitu ten Veng hrang hrang Kohhran member te cheimawi leh tarmawi te kawhhmuh in Solomon’s Temple sakphung leh chhinchhiahna thilsiam hrang hrang ten tarlan a tum te an lo hrilh fiah a. Cheimawi zingah hian – Davida tingtang, Jakoba tuichhunchhuah, Nehem Hunlaia Jerusalem Kulh, Mizo Thlam, Vantirhkoh, Cherub leh a dang tam tak te a tel bawk a ni. (DIPR)

*PRESIDENT IN ZIRTIRTU THA CHAWIMAWINA HLAN
Nimin Inrinni khan India President Pranab Mukherjee chuan 'Zirtirtute Ni" denchhenin India ram a zirtirtu tha chawimawina National Awards to Teachers for the year 2014 chu zirtirtu 338 te hnenah a hlan. Lamtluang thulakna in a tarlan danin heng chawimawina dawng zingah hian Mizoram atangin zirtirtu 2 - C. Lalbiaktluangi, Head Mistress, Government Primary School, Bazar Veng, Lunglei leh Lalnunpuia Hrahsel, Teacher, Government Mizo High School, Aizawl te pawh an tel ve a ni.

*KAL A LUNGTE AWM CHHUTKEHNA KHAWL HAWNG
September 2, 2015 (Thawhlehni) khan Kal-a lungte awm chhut kehna khawl (Lithotripsy) chu Synod Moderator, Rev. Lalrinmawia’n Pathian hnenah a hlan.

Kum 2014 Synod inkhawmpui-in a lo rel tawh angin Kal-a lungte awm chhut kehna khawl (Lithotripsy) Dornier Sigma, German siam chu India rama an supplier Healthware, Kolkata hnen atangin chu Rs. 85,68,693/- lei a ni a, hemi khawlin a mamawh C-Arm X Ray khawl pawh installment in lei a ni tawh bawk a, tunah chuan hman theih a peih fel a ni ta a, dam lo pahnih pawh he khawl hmang hian hlawhtling taka enkawl an ni tawh a ni. (Synfocity=552

5th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*BURMA RAMRI AH HEL 3 KAPHLUM
Vawiin chawhma dar 11 vel khan India sipai 11 Assam Rifles leh 6 Dogra regiment tangrual leh helpawl te India leh Burma ramri Manipura Chandel district ah an inkap a, hel 3 an kaphlum. Lamtluang thulakna in a tarlan danin helpawl zing a midang te chu Burma ram chhung ah an bibu hman a ni. Thi te ruang hi Moreh police station ah dah anni a, eng helpawl ber nge tih finfiah an la ni lo a ni. An inkah hun chhung hi minute 90 vel lai a awh a ni.

*LAMTLUANG WEEKEND SPECIAL (MIZO FIAMTHU)
Police pakhat pawh intithei deuhin a nula rimnaah Pistol a pai a, a thriat darh vel a. A remkhawm leh thiam si lo va, Rawmawl in a fun haw ringawt...

*US OPEN AH NADAL A TLA
Tennis khel thiam lar Rafael Nadal chuan US Open 2015 a bye bye angai ta tlat mai. Lamtluang thulakna in a tarlan danin Nadal hian Italy player Fabio Fognini chu 3-6, 4-6, 6-4, 6-3, 6-4 in a hneh lo a ni. Tun tum hi Nadal tan hian US Open a khelh tawh zawng zawng a a tlak hmaber tum a ni

*CHAMPHAI DISTRICT-AH TEACHERS' DAY URHSUN TAKA HMAN A NI
Teachers' Day 2015 chu nimin khan urhsun takin Champhai District-ah chuan hman a ni a. He ni hi District Level Teachers' Day Celebration Committee-in a rel tawh angin Committee member-te bakah Champhai District-a Sorkar Department Office hotuten khaw hrang hrang 17 bakah Champhai khawchhung hmun 6-ah a huhova he ni lawmna hun hi an hmanpui a. Khawhai a lawmnaah Champhai DC Pu H. Lalengmawia chu khuallian niin, Tuichang bialtu MLA Pu Rinliana Sailo chu khualzahawm a ni a. He hunah hian SP Pu RP Meena pawhin a tawiawm a ni.

Khawhai-a Zirtirtute Ni lawmna hun Community Hall-a neihah hian khuallian Pu H. Lalengmawia chuan zirtirtute chu ram leh hnam hmasawnna chu thiamna ah a innghahna zirlaite nun kaihruaitu pawimawh an nih thu sawiin, quality education nei tur chuan zirtirtu 'quality' neih a ngai a ni, a ti a. Zirtirtute hnenah chuan mithiam chawrtlak tam zawk zirtir chhuak turin mahni ah chona nei theih turin a sawm a. Inchhiar zau a, text book ringawt a innghat lova, thu a zirtia mai bakah nunchang thleng a entawntlak leh rawn tlak zirtirtu ni zel turin a chah bawk.

Khualzahawm Pu Lalrinliana Sailo, MLA chuan mi hlawhtlingte hlawhtlinna chhanah ah zirtirtuten thui tak mawh an phur thu sawiin, naupangte chuan an zirtitute zah nachang hre tura a duh thu a sawi a. Zirna hi duh tawk hma chi a nih loh thu leh zir thui apiang nun kawngah oawh an thleng thuiin an thleng sang a ni tiin, zirlaite chu taimakna leh huaisenna nen a bei turin a chah a. Zirtirtute chu inchhiar zau turin leh naupangte thlamuanna ni turin a sawm a ni.

Khawhai Teachers' Day lawnna ah hian Champhai SP Pu RP Meena pawhin zirtirtute hlut zia leh chawimawi nachang kan hriat a tul zia a sawi a ni. He hunah hian zirlaite atangin thiam thil hrang hrang entir a ni.

Champhai District Level Teachers' Day Celebration Committee chuan Teachers' Day hi zirtirtute chawimawina ni mai bakah zirna chawisanna atan Education Campaign ni pah se ti a a rel angin Head of Office ten khaw hrang hrangah programme an hmapui a. Sorkar laipuiin a phut angin Teachers' Day denchhen hian Prime Minsiter thuchah ngaihthlakna hun hman a nih bakah Mizoram School Education Minister thuchah chhiarchhuah a ni bawk a. Local cable TV a chhuah tur Talk Show/ Panel Discussion neih a nih bakah khawchhung hmun thenkhatah Banner tar a ni a. Champhai DC chuan local cable-a chhuah tur thuchah a sawi bawk. (DIPR)

*ZIRTIRTUTE NI
Vawiin hi India ramah chuan zirtirtute ni (Teachers' day) a nia, Lamtluang page chhiartu zinga zirtirtu zawng zawng te chibai kan buk a che u. Mizoram ah chuan Inrinni ah a tlak avang hian zirna in thenkhat ah chuan nimin ah khan he ni hi an lo hmang lawk a, sikul thenkhat chuan karleh Thawhtanni ah hman an tum bawk.

*HIGH COURT IN HMEICHHIA TE TAN LAWNG SIPAI OFFICER NGHET NIH PHAL SAK
Nimin khan Delhi High Court chuan India lawng sipai (Navy) ah hmeichhia te chu officer nghet annih a phal sak. Lamtluang thulakna in a tarlan danin Indian Navy ah hian hmeichhe officer te chu kum 14 chauh an tan phalsak anni a, pension pawh an nei thei lo a ni. Hemi avang hian court chuan mipa leh hmeichhia thliar hranna awm hi tha a ti lo a, hmeichhe officer te chu mipa te ang tho a pension nei thei turin a phut kum 20 tal lawng sipai a tan chu a phal sak ve ta a ni.

*HUNGARY IN RALTLAN TANGKHANG TE TAN BUS TIR
Hungary ram chuan an ramchhung a raltlan tangkhang ten ke a Austria ramri an pan avangin an mahni phur turin bus a thawn. Lamtluang thulakna in a tarlan danin heng raltlan zinga mi 1000 te chuan Zirtawpni zing khan ke in ramri an pan a ni. Heng raltlan te hi Middle East leh Africa atang a Islamic State te laka sahimna zawng a Europe hmar lam rawn pan an ni. Europe ram hruaitu te chuan raltlan te lo dawnsawn dan tur ngaihtuah hian thutkhawm annei tawh a, ram thenkhat chuan heng Islam sakhaw zuitu raltlan te hi an ram a awm an phal lem lo a ni. Chutiang dinhmun khirh taka an din avang chuan raltlan zinga chhangchhia leh chhumchhia te chu an lainatawm hle.

1st - 4th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

4.9.2015

*HARLEY DAVIDSON RU TU MAN TA
Hyderabad a Banjara Hills a Harley Davidson bike showroom atanga enchhin tur a insawi a, bike khalh chhuaktupa chu hun engemaw chen a awmna hriat loh a nih hnuah vawiin khan Mumbai ah man a ni ta. Lamtluang thulakna in a sawidanin bike rutu hi Kiran niin ONGC Mumbai a hnathawk lai a ni a, amah hi IIT-Madras atanga zirchhuak a ni. Tunkar Thawhlehni khan hepa hian showroom ah hian test drive nei tur anga insawiin 750 cc (Harley Davidson–Street 750model) chu a tlanbo pui ta a ni.

*Vawiin tlai khan Mizoram police te chuan Heroine 30 gram Zamkhanthanga In Zemabawk ah an man. He heroine hi Dalmunga ta a ni. Dalmunga hian Zamkhanthanga fanu hnenah hralh a tum niin hriat a ni.

*#‎MFA‬ Super Cup Result
Bethlehem Vengthlang FC 2-1 Aizawl FC

*SERCHHIP-AH BOOTH LEVEL OFFICER TE TAN TRAINING BUATSAIH
Nimin khan Serchhip DC Conference Hall-ah Serchhip District chhunga Booth Level Officer (BLO) te tan Special Summary Revision of Electoral Roll, 2016 inbuatsaihna Training buatsaih a ni.

He Training hi Pu Lalhmansanga, MCS, Election Officer chuan kaihruaiin Electoral Roll Revision chu inthlanna dik leh felfai neihna tura rahbi pawimawh hmasa anih vanga a pawimawh zia sawiin BLO te chu an hna rinawm tak leh felfai taka hlen chhuak turin a fuih a, BLO te chu ECI hmanraw pawimawh, mipui hne hnai bertu an nih avangin anmahni bial chhung hre chiang hle turin a fuih bakah, an hna thawh turte pawh uluk leh fimkhur taka thawk tura chahin, hriatthiam loh leh harsatna an neih chang pawh a hotute rawn hreh lo turin a chah bawk a ni.

Tun tum Special Summary Revision of Electoral Roll, 2016 atan hian ruahmanna thar siam a ni a, he ruahmanna thar ang hian Polling Station tinah Polling Station huam chhunga mipuite inrawnkhawmna Gram Sabha BLO te kaihhruaina in neih tur a ni a, Gram Sabha chuan Draft Electoral Roll an thlir hmasa ang a, Electoral Roll dik leh felfai neih anih theih nan hma an la dawn a ni.

Nimin a BLO kalkhawmte hi Master Trainer pahnih Pu Lalnunfela Chawngthu, SDC leh Pi B.Malsawmtluangi, SDC ten training an pe a Serchhip District chhunga ERO te leh AERO te an tel kim hle bawk a ni. BLO te hi Electoral Roll Revision atana hman tur Form hrang hrang te leh an mamawh tur tul te pek nghal vek an ni. (DIPR)

3.9.2015

*J&K AH SIPAI LEH FIRFIAK TE INKAP
Nimin zing khan Jammu and Kashmir a Baramulla district chhung a Rafiabad ah India sipai te leh firfiak pawl a mi te an inkap a, he inkahna ah hian sipai 1 leh firfiak pawl a mi 1 in nunna an chan. Lamtluang thulakna in a tarlan danin sipai pakhat pawhin hliam a tuar a ni. Sipai ten an kahhlum firfiak pawl a mi hi Riyaz Ahmad Mir (Gosha tia hriat bawk) niin Lashkar-e-Islam pawl a mi a ni a, tunhma lam pawhin J&K a pawikhawihna chi hrang hrangah a lo inrawlh tawh thin a ni.

 

2.9.2015

*BUS ACCIDENT AH MI 18 THI
Nimin Thawhlehni khan Himachal Pradesh a Hindustan-Tibet National highway ah bus pakhat kham 200 mts a sangah a tlak avangin mi 18 an boral a mi 12 in hliam an tuar. Lamtluang thulakna in a tarlan danin a hmunah mi 15 an boral nghal a, midang 3 te chu damdawiin panpui annih laiin an boral ve leh a ni. Hliam tuar te hi Civil Hospital Rampur ah enkawl tur a hruai anni. Bus chetsual chhan tak hi hriat chian theih la nilo mahse mita hmutu ten an sawi danin bus chesual ta hian he khamsang tak zawnah hian bus lehpel a tum laiin a chesual ta niin an sawi.

*GOOGLE IN LOGO THAR HMANG
Internet a thil zawnna hmunpui (search engine) lianber google chuan an logo hmanlai tidanglam in logo thar an hmang ta. Lamtluang thulakna in a tarlan danin google hian an logo an thlak chhan an sawiah chuan mobile phone tana remchang thei ang ber tur an duh tel vang a ni.

1.9.2015

*LAW COMMISSION IN THI TURA INHREM TIH TAWP DUH
Nimin tlaiah khan Law Commission chairman Justice A.P Shah chuan press conference neiin thil tisual te hrem nan a thi tur an chungthu rel tih tawp an rawt tih a sawi. Lamtluang thulakna in a tarlan danin AP Shah hian firfiak a chetna (terrorism) leh ramchhung a buaina thlen tum te erawh he an rawtna hian a huamlo tih a sawi. Law commission member te hi hemi chungchang ah hian an ngaihdan a inang vek bik lo a, member 9 awmah member 3 te chuan misual thi tur a hremna pek chu an la duh niin sawi a ni. An rawtna hi sorkar leh supreme court in engtin nge a dawnsawn dawn tih chu mipui tam tak te hriat chak ber a ni dawn a ni.

*MILEY CYRUS IN TAWNGKAM FEIKIBAR IN TAYLOR SWIFT A CHHUN
Pathianni zan khan Miley Cyrus chuan Los Angeles ah 2015 MTV Video Music Awards a host a, The New York Times in an interview naah Taylor Swift angin model lar leh celeb te nen a inchhek arbawm vel ka mamawh hran lo a ti. Lamtluang thulakna in a tarlan zel danin Miley hian "Ka thiante tumah hi milar anni hran lo a, mi tak tak te hi ka ngaina a, chungmite chu ka ngaisang bawk a ni." a ti. Miley hian a bialpa Wayne Coyne chungchang pawh sawiin "Wayne hi 100% in ka hmangaih a, ani pawhin min hmangaih a ni a ti."

*US OPEN AH SHARAPOVA TEL THEI DAWN LO
Zanin atangin US Open 2015 chu tan a ni dawn a, September ni 13 thleng khelh a ni ang. Lamtluang thulakna in a tarlan danin tun tum US Open ah hian hmeichhe world no 3 nilai Maria Sharapova (28) chu a inhliam avangin a tel thei dawn lo a ni.