9th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*AIR LIVE PHONE IN PROGRAMME
Tun Inrinni (September 12, 2015 ) lo awm tur chawhnu dar 1:05 - dar 2:00 inkar, AIR Aizawl a Telephone a zawhna leh chhanna Live Phone In Programme ah chuan “Zuk leh hmuamin a nghawng theih te” tih chungchang a zawh theih dawn a. Mipui zawhna chu - Lal Riliani, President, Indian Society on Tobacco & Health, Mizoram Chapter leh Dr. Jane R. Ralte, State Nodal Officer (Tobacco Control) Mizoram State Tobacco Control Society, Aizawl ami ten an rawn chhang ang a. Zawh duh neite tan Telephone No. 0389/2323148 emaw 0389/2322515 emaw ah biak pawh theih a ni ang. (DIPR)

*FM ZOAWI LIVE PHONE IN PROGRAMME
All India Radio, FM Zoawi 100.7 Mega Hertz chuan naktuk 10th September, 2015 (Ningani) zan dar 8:02 leh dar 9:00 ikar hian “World Suicide Day pualin I beidawnna atangin i nunna a chhanhim theih” tih chungchangah Dr. Vanlaldiki Ralte, Psychiatrist, Civil Hospital, Aizawl leh Lalremruati, Clinical Psychologist, Zotlang, Aizawl te kawmna/Live Interaction programme a buatsaih dawn a. Zawhna zawt duh tan Telephone No. 0389-2323148 emaw 0389-2322515 emaw ah biak pawh theih a ni ang. (DIPR)

*CHIEF MINISTERIN SORKAR HNATHAWKTE CHENNA IN SAK TUR HMUN THLIR
Vawiin tlai khan Chief Minister Pu Lal Thanhawla chuan sorkar hnathawkte chenna tur in sakna tur hmun Govt Complex, Luangmuala hmun ruahmante Lawipu Primary School thlang atanga thlirin, Federation of Mizoram Government Employees & Workers hruaitute leh Rajya Sabha MP Pu Ronald Sapa ten an hrilhfiah.

Sorkar hnathawkte tana he Housing Project ruahman a ni chu Chief Minister chuan remchang hle a a hriat thu a sawi a. Pu Ronald Sapa, Rajya MP thahnemngaihna chu a fakawm hle a ni a ti.

Ruahman ang chuan he project hi private kuta dahin, chhungkaw 2000 chen theihna tura tih a ni a. A senso tur leh a sak hna thawk tur hian building sak hna thawktu company, Skyline Builders, Kolkata leh Ashoka Nanda, Guwahati te chu biak fel an ni tawh a, inremna thuthlung erawh la tihfel tur a ni. Tuna ruahmanna ang chuan building hi sorkar hnathawk hrang hrang tan chi hrang hrang, Type I, Type II leh adang dang sak a ni ang a, a building man hi a luah man angin thla tin sorkar hnathawk luahtu chuan chawiin, an pek kim hunah an ta neih theih dawn a ni. Sak tan hun tur erawh hriat theih ala nilo. (DIPR)

*MIZO FEATURE FILM BEISEINA IN TLANGZARH A NI
Mizo feature film Beiseina-in tih chu Myanmar rama tui lian tuarte leh TNT tanpui nan nimin khan Pi Lallianpuii, Dy. Director, I & PR & Nodal Officer, Films Development chuan I&PR Conference Hall-ah a tlangzarh.

Mizoram sawrkar Information & Public Relations Department chuan Nodal Department a nih angin kumin May thla khan Feature Film Competition a buatsaih a. Hemi tum hian Beiseinain tih film hian lawmman pahnihna a dawng a. Department chuan tunhma lamin short film Competition pawh lo buatsaih tawhin Film siamtute leh film lama tuimite tan Workshop te, Film Exhibition te hlawhtling takin alo buatsaih tawh thin nghe nghe a ni.

Nimina release tak Beiseina-in tih film hi a taka mi nunchan behchhana Khiangte Pictures siam a ni a. Tlangzarh zawha thu sawiin Pi Lallianpuii chuan, Film hi mihring rilru leh suangtuahna khawvel thuk taka luah a kuaiher theitu a ni a, vawiina Mizoram Film Development Society member te pawh hian in film siam hi a thlirtu apiang hnena thuchah ropui tak a pek dawn avangin film tha siam turin tang sauh sauh ang che u, a ti a. Ngaihtuahna ngilnei tak neia mite tanpui nana film a hlan avangin Pu Lalawmpuia Khiangte, film siamtu chu a fak a ni.

Film siamtu Pu Lalawmpuia Khiangte leh Pu C. Hmingthangvunga, MFDS President ten thu an sawi a. Pu V.L. Peka Zote in Beiseinain film chanchin sawizauna hun a hmang a. Inkhawm zawhah hian Film hi en ho nghal a ni.

Hun remchang hmasa bera tanin Beiseinain film hi hmun hrang hrangah man neia chhuah kual a, chuta sum hmuhte chu tarlan tak tanpuina atan hlan a ni dawn a ni. (DIPR)

*COMPUTER GAMES KHELH NASAT LUTUK VANGIN BORAL
Russia ram chhim lama Republic of Bashkortostan a Uchaly khua a rawlthar kum 17 mi Rustam chu a zawna ni 22 chhung computer games a khelh avangin a boral. Lamtluang thulakna in a tarlan dan in Rustam hian August ni 8 khan a ke a tih tliah avangin pawn a chhuak thei lo a, inah chaw ei leh mut lai tih loh chu computer games 'Defence of the Ancients' chu a khel char char thin a ni. August ni 30 khan nikhawhrelo in a awm a, damdawiinah hruai a ni a, a nunna an chhan zo ta lo a ni. Kumin March thla pawh khan China a mi tlangval pakhat pawh computer game 'world of warcraft' ni 19 chhung a zawn a a khelh char char avangin a boral tawh bawk a ni.

 

*#‎Euro‬ 2016 qualifying match result:
England 2-0 Switzerland
Scorers: Harry Kane & Wayne Rooney
*Rooney hian England tan record thar siamin England tana goal khung hnem ber a ni ta a ni.

*VENICE FILM FESTIVAL NEIH MEK A NI
Kum 1932 atanga an lo neih tan Venice Festival chu September ni 2-12 chhung hian neih mek a ni. Lamtluang thulakna in a tarlan danin he 72nd Annual Film Festival ah hian India mi Coimbatore a auto rickshaw driver Chandrakumar lehkhabuziah 'Lock Up' behchhhan a Tamil movie an siam “Visaranai” chu chhuah a ni dawn a, hemi hmang tur hian rickshaw driver Chandrakumar chuan Italy a pan a ni. A lehkhabu ziah hi traffic jam kar a passenger a nghah dan chanchin a ni.

8th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*WORLD CUP QUALIFYING MATCH
India 0-3 Iran

*PUC LEH PRISM IN RTI WORKSHOP NEI
Vawiin chawhnu dar 2 khan Pachhunga University College a Department of History te huaihawt 'Workshop on The Right to Information Act and People's Response" chu PUC Auditorium ah neih a ni a, Resource person ah Vanlalruata, President, 'People's Right to Information and Development Implementing Society of Mizoram' (PRISM) hman a ni. Lamtluang thudawn danin he workshop ah hian PRISM President hian power point presentation hmangin thu a sawi a, Mizoram sorkar in dik lo tak sum a hman dan leh sorkar kalphung dik lo vanga mipui chanai kal ral dan te leh RTI act hman tangkai dan te a sawi a ni. Thusawi bakah hian zirlai leh zirtirtu te nen zawhna leh chhanna hun hlawhtling takin an hmang a ni. Workshop hi Vice Principal PUC Prof. JV Hluna'n a kaihhruai a, Senior faculty H.S Lalsangpuia'n lawmthu sawina hun hmangin a khar a ni.

RTI Activist and PRISM President Vanlalruata, Mizoram

*EUROPE A RALTLANTE BELCHIANG ANG AW
Tunlai a khawvel thuthar luah hneh em em tu pakhat chu Europe a raltlan te hi anni. Lamtluang page chhiartu ten in lo hriat atan heng raltlan te hi Middle East leh Africa mite anni a, Islamic State firfiak te an hlauh avang te leh an ram a sorkar mumal awm theihloh avanga buaina chhuak avang te in Europe ah hian an sahimna ngaihtuah an raltlan ta a ni.

Heng raltlan tam zawk te hi Islam sakhaw zuitu te anni a, Europe ram sorkar hrang hrang te hian chuti maiin an ramah awm an lo remti nghal mai bik lo a ni. Raltlan ten a tir an pan hmasak ber pawl Hungary chuan raltlan te hi an in ziaklut phawt anih loh chuan hmarlam pan a an kal a phalsak lo reng a nih kha.

Chutiang harsatna an tawh avang chuan raltlan te chuan tunkar liamta khan Hungary chhuahsan in mi 20,000 te chuan Austria leh Germany an pan leh ta a ni.

Lamtluang page thulakna in a tarlan danin kumin chhung ringawt pawh hian Europe ah hian Africa leh Middle East atanga raltlan mi 340,000 an awm tawh a ni. Europe ramah raltlan an pun chak tak em avang hian European Union hruaitu te lu pawh a hai hial a, thutkhawm hmanhmawh ko in engtia lo dawnsawn tur nge tih te an rel ta rum rum a ni. 

EU a tel ram hrang hrang te chuan an ram in raltlan an dawnsawn theih tur zat te thlengin an sawi chiang ta hlawm a, UK chuan kum 5 chhungin Syria atanga raltlan 20,000 an enkawl theih tur thu an sawi . Germany ah chuan kumin chhung in raltlan 800,000 an thlen rin a ni a, German Chancellor Angela Merkel chuan an ramah raltlan an pun zel chuan an ram dinhmun pawh nasa takin a nghawng dawn a ti bawk. Greece chuan an ram chhung a raltlan te chhawmdawlna pek annih theih tan EU ah tanpuina a dil ta hial.

Hungary, Czech Republic, Slovakia leh Romania te chuan EU in raltlan te inchansem tur a tih chu an pawm lo hulhual a ni. Hungary phei hi chuan a rukin raltlan te an ramah an lut ang tih hlau in an ramri te thirhling nei hmangin an hung ta rum rum hial.

Middle East leh Africa atanga raltlan ten Europe a an pan nasat zail ram 5 te chu Germany, Austria, Hungary, Serbia leh Sweden te anni. Keini India ramah chengin ei leh bar te awlsam em em lo mahse mahni inlum ah emaw miin luah pawh ni ila dipdal na em em lo a nun kan la hmang thei te hi mipui rorelna (democracy) kan chhawr ve na a ni tih heng raltlan te dinhmun hreawm tak avang hian i hre thar leh theuh ang u.

*INDIA LEH PAKISTAN SIPAI TE INBE DAWN
India leh Pakistan ramri vengtu sipai te chu naktuk ah Delhi ah an inbe dawn. Lamtluang thulakna in a tarlan danin Border Security Force leh Pakistan Rangers te hi Director General level ve ve hmangin an inbe dawn a, India lam hi DG BSF Devendra Kumar Pathak in a ho ang a, Pakistan lam hi Maj Gen Umar Farooq Burki an a rawn ho dawn a ni. An inbiakna turah hian Lamtluang thulakna in a tarlan danin J&K a ramri a inkahhai bawhchhiat anih thin chungchang te, ramri a damdawi leh phalloh thil tawlhruk chungchang te bakah danlo a ramri a lut ru thin te chungchang te an sawi ho dawn a ni.

*BSNL IN INTERNET BROADBAND SPEED TICHAK DAWN
Nimin khan Union Information Technology (IT) Minister Ravi Shankar Prasad chuan Gurgoan ah thusawiin BSNL in thlathar ni 1 atangin internet broadband speed chu a hmangtu ten a hranpa a pawisa chawibelh ngai lovin 2 mbps in tichak sak anni vek dawn a ti. Lamtluang thulakna in a tarlan danin BSNL hian broadband hmangtu te tan hian 512 kbps leh 1 mbps atangin 2 mbps ah a tihsan sak vek dawn a ni.

*AIR INDIA THLAWHNA AH KANGMEI CHHUAK
Nizan dar 7.55 vel khan Air India thlawhtheihna Varanasi atanga Delhi pana thlawk chu Delhi aiport ah hmanhmawh taka tum tir a ni a, he thlawhtheihna A320 hi hydraulic problem a neih avangin a ke ah kangmei a chhuak a, passenger 7 velin hliam na vak lo an tuar a ni. Lamtluang thulakna in a tarlan danin thlawhna chhungah michuang te an buai nuaih nuaih avanga an innek na lamah an inti hliam ta ni a sawi a ni. Hemi hnu hian passenger te chu him takin thlawhna atangin an chhuak kim thei a ni.

*PAWNGSUAL LEH TUALTHAH NA THLENG DUHLOHNA KAWNGZAWH
Nimin khan Chhingchhip khawtlang huap in an khua a rawng taka hmeichhe naupang unau pawngsual annih hnu a rawng taka thah annih duhloh entirn nan kawngzawh an nei. Mipui pungkhawm te hian pawngsual leh tualthattu pa hi damchhung lung in tang turin an duh tih resolution an passed.

7th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*DIET AIZAWL-AH TEACHERS’ DAY HMANG

DIET Aizawl a Elementary Teacher Trainees leh Pre-Service Teachers Trainees te chuan vawiin khan DIET Aizawl Auditorium-ah Teachers’ Day vawi 54 na an hmang.

Trainees & Student te buatsaih Teachers’ Day 54-na lawmna ah hian programme item hrang hrang section tin ten an entir a In-Servie leh Pre-Service aiawh ten zirtirtute fuihna thu tha tak an sawi a. Pu H. Lalnunnema, Senior Lecturer chuan Teachers’ Day lo chhuah chhan te, zirtirtu dinhmun pawimawhna te, Mizoram zirtirtu dinhmun pawimawhna a sawi bawk.

Trainee leh Student te hian Teachers’ Day lawm nan thilpek hlu tak DIET Aizawl Faculty te an pe a. Programme hlimawm tak an hman a ni. (DIPR)

*Mi harsa zualte tanpuina turin Higher Secondary Lecturer Association chu Rs.1,00,000/- (Cheng nuai khat) Chief Ministers’ Relief Fund ah an chhunglut.

*LEILAWN DAWH CHIM AVANG IN IIT PROFESSOR 2 MAN ANNI

IIT Roorkee a civil engineer department a professor 2 - Vipul Prakash leh Vijay Kumar Gupta te chu kum 2012 a leilawn dawh tur an design a chim avangin court ah inlan tur a koh anni a, mahse an inlan duh lo avang in police ten an man ta a ni. Lamtluang thulakna in a tarlan danin heng professor 2 te hian Uttarakhand a Tehri district a Alaknanda lui a dawh tur leilawn design an siam a, an design anga lei hi dawh a nih laiin kum 2012 khan a chim ta a, mi 8 in nunna an chan phah a ni. Professor 2 te hi bail theih loh tur a manna thupek pek anni.

*MZP President Lalhmachhuana chuan Mizoram ah kumtin sorkar sum Rs. Nuaih Singkhat a bo ziah niin vawiin a Sorkar hnathawk leh politician eiru lo thlanchhuah te chawimawina hun an hmanah a sawi

*LAWNGTLAI KHAWCHHUNGA LEIMINTE ADDL. DC HOVIN ENFIAH A NI

Vawiin hian tunhnai ruahsur nasa avanga Lawngtlai College venga leiminna hmunte chu Addl. DC Pu. R. Lalsangluaia hovin enfiah a ni a, hmalak dan turte ngaihtuah a ni.

Tukin zing 5:30 vel khan Lawngtlai College Venga National Highway an kawng chhak, Pu Zamanga inhmun chu a min a, he leimin hian kawngpui pawh hi engemawchen a rawn chhilh a, vanneihthlak takin tihchhiat lian tham a neilo thung, lirthei pawh a kaltlang thei a ni. He leiminna atanga hla vaklo National Highway chhaklam an ah tho Pu M. Hlunzika ram pawh a min bawk a, hei pawh hian tihchhiat lian tham a neilova, kawng pawh a hnawh lo bawk. Lawngtlai dai, Saiha kawnga College Veng Tuikhur bulah tukin vek khan tuihawk tam lutukin hnawl leh leithil hmangin kawng a hnawh ping thung a, lirthei pawh sawmruk vel lai chu zingkarah khan a dang hman a ni. Hei pawh hi PWD National Highway enkawltuten JCB hmangin an thian nghal a, zing dar 8:00Am vel khan lirthei chitin kaltlang theiin an peih leh hman a ni.

Hengte bakah hian College Veng chhung inkalpawhna chuan hnuai kawng chu, Pu Lalhneha kawmthlang minin a hnawh bawk a, College Veng a mi vek Pu. M Lalnunsanga in chhak pawh che bawkin, an kawtah leivung engemawzat a tawlhthla a, heng leivungte hi zingkarah College Veng YLA ten hnatlangin an thensak nghe nghe a ni.

Heng hmun hrang hranga leiminte hi khuain a zirloh chuan paihfai nghal mai chi an nih hmel lohva, amaherawh chu a min zel tur ven nan Tuipuan (Silpauline) a khuh him nise, vengchhung kawng inhnawh ping erawh chu Deputy Commissioner JCB hmanga then dan ngaihtuah a nih tur thu Pu R. Lalsangluaia chuan a sawi.

Pu R. Lalsangluaia hi Pu Lalrinngheta, EE National Highway, Pu Lalchhuanawma, EM College Veng bialtu leh College Veng VC member ten an tawiawm a ni. (DIPR)

*KHAW CHIN

State Meteorological Centre Directorate of Science & Technology in a tarlan dan in vawiin a Aizawl khawpui a ruah tla zat chu 4.5 mm a ni a, khua lum lai ber in 24.5o C a vawh lai ber in 15.6o C a ni. Humidity chu a san lai ber in 98% a hniam lai ber in 90 % a ni. Religion Meteorological centre Guwahati chuan September 7, 10 leh 11 ah te hian Nagaland, Manipur, Mizoram leh Tripura hmun thenkhat ah te ruah tam tham tak a sur dawn niin a tarlang. (DIPR)

*ODHISA TLEIRAWL INDIAN IDOL JUNIOR 2015 ATAN THLAN A NI

Nimin khan Indian Idol Junior second season chu zawh a ni ta a, Odhisa tleirawl Ananya Sritam Nanda (13) chu Idol atan hian thlan a ni. Lamtluang thulakna in a tarlan danin Bhubaneshwar tleirawl Ananya Nanda hian final a luh pui Nahid Afrin leh Nithyashree Venkataramanan te chu khumin Indian Idol Junior nihna hi a chang ta a ni. Ananya hian trophy bakah Sony Entertainment TV nen contract nuai 10 man siamna tur a hlawh chhuak a ni. Indian Idol Junior 2015 hi Lamtluang chhiartu tam zawk chuan kan hrelo mai thei a, kumin May ni 30 atang khan neih tan a ni a, Sony TV ah Inrinni leh Pathianni zan apiangin dar 8:30 ah tihchhuah thin a ni a, nizan ah khan final an nei a ni.

*GUWAHATI LEH SHILLONG INKAR KAWNG PING

Nimin Pathianni tlai a ruahsur nasa avangin Guwahati leh Shillong inkar kawngpui National Highway - 40 chu Nongpoh bul Unming ah leimin in a hnawh ping. Lamtluang thulakn in a tarlan danin NH-40 ping mek hi thenfai hna thawh mek a ni a, vawiin lamah ruah te a sur belh tawh loh chuan a tlang hman beisei a ni. Niminpiah ah pawh khan NH-40 hi Byrinhat a leimin vangin a ping tawh bawk a ni. Mizoram atanga Guwahati zin tur ten hei hi hriat lawk a tul hle dawn a ni.

*MOBILE PHONE RUK MANCHHUAH VANGIN NULA INAWKHLUM

Bengaluru a Alvas college a B.Com 1st year zirlai Rakshitha(18) chu nimin khan an hostel bual inah inawkhlum a hmuh a ni. Lamtluang thulakna in a tarlan danin Rakshitha hi Ningani khan a hostel awmpui ten zirlai dang mobile phone a ru lai an hmu a, mobile phone a ruk sak chu a neitu an pe let leh a ni. Inrinni zan dar 10:30 vel khan Rakshitha hian a room a pan a, a tuk Pathianni ah a rawn thawh chhuah loh avangin a hostel awmpui te ngaihtha lo chuan a room an va en a, room ah a lo awm silo a, bual in chu chhunglamah a lo in kalh a, bual in kawngkhar chu an kar chhia a, Rakshitha chu kawrkhaina in a lo inawkhlum tih an va hmuchhuak ta a ni. Lehkha lo hnuchhiah in a nu leh pa te chu a thil tih avanga ngaidam a dil a ni. A ruang hi police ten post mortem turin an la a ni.

*ITALIAN GRAND PRIX AH LEWIS HAMILTON CHAK

Nimin a tlan zawh tak Intalian Grand Prix ah Mercedes driver Lewis Hamilton chu a tlanchak ber. Lamtluang thulakna in a tarlan danin Ferari driver Sebastian Vettel chu pahnihna a ni. Hamilton hi ti hian tun season ah a chak vawi 7-na a ni ta a, point 53 hmuin a teammate Nico Rosberg aiin a sang ta a ni.

*WALES TAN EURO 2016 KHELH BEISEINA TLEM

Euro 2016 qualify match khelh mekah Wales chuan Israel nen intumin huntawp ah goal khung lo ve ve in an in draw. Lamtluang thulakna in a tarlan danin he an in draw avang hian Wales tan chuan Group B ah point hmusangber ni mahse Euro khel tur chuan beiseina a tlem tawh hle. Pathianni leh ah Belgium in Cyprus an hneh lo hlauh te anih tak leh Wales hian Euro 2016 an qualify hram dawn chauh niin a lang ta.

*SOUTH KOREA A LAWNG CHESUAL AH MI 10 THI

Nimin Pathianni zing khan South Korea chhim lam a Jeju thliarkar hmar lamah lawng pakhat Dolphin tia a hming an vuah chu a chesual a, mi 10 in nunna an chan a, mi 8 te chu an chin hriat loh in tuiah an tla bawk a ni. Lamtluang thulakna in a tarlan danin lawng a chuang zat hi hriat chian ni chiah lo mahse mi 21 vel nia hriat a ni a, lawng captain pawh nunna chan zingah hian a tel a ni. An zingah hian mi 3 te chu nungdam in hmuh anni. Coastguard ten lawng a chesual an la hmuhloh te hi an zawng mek a ni.

6th September 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

*SUNDAY TLAI NEWS LAWRKHAWM
*India sipai pension te chuan chawnghei an phut one-ranl-one pension chu sorkar in tihhlawhtlin a tiam avangin an chawnghei an titawp ta.

*Congress hruaitu hlun leh Madhya Pradesh CM hlui DIgvijaya Singh chuan a nupui 2-na atan TV anchor Amrita Rai a nei ta.

*Austria leh Germany te chuan raltlan tangkhang te tan an ramri an hawng ta. Heng raltlan te hi Islamic State firfiak te hlau a Europe a tlanchhia anni a, Europe ram thenkhat hian an ram a awmtir an duhlo a ni.

*England team in Euro 2016 qualifying match a San Marion 6-0 a an hneh tum a goal khung tu 1 Wayne Rooney chuan hranghlui inkhel thiam Bobby Charlton a record lo siam goal vawi 49 pet luh chu a tawmpui ve thei ta.

*Indian Space Research Organisation thlalem kahchhuah GSAT 6 (GSLV-D6) chuan a awmna tur orbit hlawhtling takin a thleng. He thlalem hi August ni 27 khan Sriharikota atanga kahchhuah a ni.

*Lamtluang page hi i thiante lo like tir ve la aw.

*ASSAM AH TUILIAN VANGIN MI 3 BORAL
Tukin ah khan Assam ah tuilian avangin mi 3 in nunna an chan. Assam ah hian darkar 24 chhungin tuilian avangin mi 7 an boral tawh a ni. Lamtluang thulakna in a tarlan danin Assam ah hian tunlai hian tuilian avangin mi nuaih 20 chuang te nunphung a tibuai a ni. Tuilian hi Goalpara, Barpeta leh Morigaon distrit ah te a nasa zual bik a ni.

*PM IN METRO RAIL THAR HAWNG
Tun atanga reilo te ah hian India Prime Minister Narendra Modi chuan 13.87 km a thui Delhi (Badarpur)- Faridabad (Escorts Mujesar) metro rail thar tur chu a vailiam dawn. Lamtluang thulakna in a tarlan danin he metro rail tlanna tur a station zawng zawng hi nizung chakna (solar power) nen a thuam vek a ni.

*BCM BEIHRUAL THLA
Mizoram Baptist Kohhran chuan kum tina an hman thin angin September 1, 2015 atang khan Beirual Programme an hmang tan ta a. Kuminah hian Beirual thuzir hi thla chawhnu lam, September 21 atanga zir tan turin buatsaih a ni a. Thla chawhma lam September 1 – 20 chhung hian Tualchhung Kohhran hrang hrangin anmahni remchan dan angin – Crusade/Camping leh Convention Progamme te an hmang mek a, Kohhran thenkhat chuan House Fellowship/House Church leh Home Visit Programme an kalpui thung.

Sawi tawh ang khan kumin Beirual Thupuiah“Mizoram Kristiante leh Tunlai KHawvel ” tih thu mi hrang hrang ziak zir a ni ang. (mizobaptist.org)

*FINANCE COMMITTEE VAWI-114 NA THU
Sept. 3, 2015 chawhma dar 10:00 khan J.M. Lloyd Hall, Synod Office-ah Synod Finance Committee a thu. He Committee hi a vawi 114-na niin Moderator Rev. Lalrinmawian a kaihruai a, member 35 an kal a ni.

Tun tum thutkhawmah hian Synod Hospital CharityFund hmuh leh hman chungchang te, Foreign Contribution Head tihpun rawtna te, Synod Financial Rules enthat rawtna te, Guwahati Biak In hmun leina tur chungchang te leh thil pawimawh engmaw zat ngaihtuah a ni.

Secretary Report atanga a lan danin kum 2014 - 2015 SynodAccounts CharteredAccountantAudit Reports dawn a nih tawh thu te, Bial Inkhawmpui Rorel bawhzuiin Pastor Bial 5-ah Finance Campaign/Synod Sum Vawn Dan Training tluang taka neih a nih tawh thu te ngaihthlak a ni.
Finance Officers' Report atanga a lan daninApril, 2015 atangaAugust, 2015 chhunga sum hmuh tawh chu Pastoral- ah Rs.30,99,67,427/- (Nuai sangthum sawmkua pakua sing ruk sang sarih zali sawmhnih leh pasarih) a ni a, Mission lamah Rs.24,20,33,415/- (Nuai sanghnih zali sawmhnih sing thum sang thum zali sawm leh panga) hmuh tawh a ni.Avaiin Pastoral leh Mission sum hmuh belhkhawm chu Rs. 55,20,00,842/- (Nuai sangnga zanga sawmhnih zariat sawmli leh pahnih) a ni a, chu chu budget pum pui atangin za zela 33.51 a ni.

Presbytery huapa sum chhun luh tawh chinah a sang ber chu Aizawl Bethel Presbytery an ni a, Rs. 5,93,51,322/- (Nuai zanga sawmkua pathum singnga sangkhat zathum sawmhnih leh pahnih) an chhung lut tawh a, a dawttu chu Aizawl Central Presbytery niin Rs. 5,59,40,829/- (Nuai zanga sawmnga pakua singli zariat sawmhnih leh pakua) an chhung lut tawh a ni. (Synfocity=552)

*MISSIONARY TIRCHHUAK DAWN
Vawiinah BCM Gilgal Biak In, Theiriat-ah Missionary pakhat tirhchhuah Inkhawm buatsaih a ni dawn a. Tun tuma Missionary tirchhuah tur hi August 2, 2015-a Missionary tirhchhuah tawh zinga pakhat, a hna zawm thei lo hmun ruak luah khat tura, Pannel List atanga lut chho ta, Nl. Lalhriatpuii, D/o R. Lalrinzuala, Theiriat Gilgal Kohhran a ni a, Arunachal East Field-ah Evangelist hna a thawk ang. Ani hian August 20 atang khan Headquarters Office, Serkawn-ah Orientation pawh neih pui a lo ni tawh a ni.

Missionary Tirchchhuah Inkhawm hi Rev.Samuel Lalremsanga Organiser MTKP -in a kaihruai ang a, Rev.B.Lalrinawma Mission Co-ordinator-in Thuchah sawiin Rev.C.Lalbiakzama Executive Editor-in a tirchhuak ang a, Gilgal Kohhran Zaipawl leh Theiriat Pastor Bial Zaipawl te an zai ang. (mizobaptist.org)

*BEHRUAL THLA HMANG TAN
Mizoram Presbyterian Kohhran chuan September 1, 2015 atang khan Beihrual thla an hmang tan a. September 1 - 6 chhung hian 'Ramthar Hapta' hman a ni ang a, September 21 - 27 hian 'Kristian Chhungkaw Hapta' hman a ni bawk ang.

September 27-ah 'Nu leh Pa Ni leh Kristian Chhungkaw Ni' hman a ni ang.Beihrual hi kum 1918 June thla atanga hman tan a ni a, kum 1925 atangin September thlaah neih thin a ni ta a, kum 1947 atangin Nilai Zan Thupui Bu leh Beihrual Thupui hi bu khata siam tan a ni. (Synfocity=552)

*GOVERNOR IN SOLOMON'S TEMPLE TLAWH
Nimin chawhnu ah khan Governor Lt.Gen(Rtd.) Nirbhay Sharma leh Lady Governor Pi Jyotsna Sharma te chuan Solomon’s Temple tlawh in Coronation Day, 2015 cheimawina te an fang kual. Governor leh a nupui hi Dr.L.B. Sailo, Chairman, Executive Committee,Kohhran Thianghlim leh Solomon’s Temple Management Authority ten an lo dawngsawng a ni.

Solomon’s Temple tlawhtu, Governor chuan Coronation Day, 2015 chu ropui a tih thu leh Mizoram ah remna leh muanna a awm ngei a ni tih tarlang tu pakhat a nih thu a sawi a. A thil hmuh ah chuan tunhnai mai a Mizoram a rawn thlen hnu ah Mizo te theihna leh thiamna san zia hmuh tawh te a lang chiang hle in a sawi a. Mizoram, state ralmuang leh hmun mawi tak chhunga thiamna namai lo tak kawltu mizo te hian an theihna hrang hrang thawhkhawm a hmalam an pan zel chuan reilo te chhungin khawvel hriat ah thil nasa tak an ti thei ngei in a rinthu a sawi a. Mizo thalai ten pianpui themthiamna an neih chu Skill training hmanga chher hriam a pawimawh hle ang a ti. Mizoram ah Governor inthlak zung zung vanga a mah pawh awm rei lo tur tho a ni em tih zawhna chu – Mizoram ah Governor atan Sawrkar in a ruat a. India Danpui hnuaia state khat hotuluber ni mahse, Sawrkar hnathawk zinga challang ber, First Government servant ni mai in a hriat thu thu in a chhang a. Mizo zingah Governor a dah a ni angin Mizo ah a inngaih tawh thu leh Mizo a nih reng tawh tur thu a sawi bawk.

Governor leh a nupui hi Kohhran Thianghlim thalai hruaitu ten Veng hrang hrang Kohhran member te cheimawi leh tarmawi te kawhhmuh in Solomon’s Temple sakphung leh chhinchhiahna thilsiam hrang hrang ten tarlan a tum te an lo hrilh fiah a. Cheimawi zingah hian – Davida tingtang, Jakoba tuichhunchhuah, Nehem Hunlaia Jerusalem Kulh, Mizo Thlam, Vantirhkoh, Cherub leh a dang tam tak te a tel bawk a ni. (DIPR)

*PRESIDENT IN ZIRTIRTU THA CHAWIMAWINA HLAN
Nimin Inrinni khan India President Pranab Mukherjee chuan 'Zirtirtute Ni" denchhenin India ram a zirtirtu tha chawimawina National Awards to Teachers for the year 2014 chu zirtirtu 338 te hnenah a hlan. Lamtluang thulakna in a tarlan danin heng chawimawina dawng zingah hian Mizoram atangin zirtirtu 2 - C. Lalbiaktluangi, Head Mistress, Government Primary School, Bazar Veng, Lunglei leh Lalnunpuia Hrahsel, Teacher, Government Mizo High School, Aizawl te pawh an tel ve a ni.

*KAL A LUNGTE AWM CHHUTKEHNA KHAWL HAWNG
September 2, 2015 (Thawhlehni) khan Kal-a lungte awm chhut kehna khawl (Lithotripsy) chu Synod Moderator, Rev. Lalrinmawia’n Pathian hnenah a hlan.

Kum 2014 Synod inkhawmpui-in a lo rel tawh angin Kal-a lungte awm chhut kehna khawl (Lithotripsy) Dornier Sigma, German siam chu India rama an supplier Healthware, Kolkata hnen atangin chu Rs. 85,68,693/- lei a ni a, hemi khawlin a mamawh C-Arm X Ray khawl pawh installment in lei a ni tawh bawk a, tunah chuan hman theih a peih fel a ni ta a, dam lo pahnih pawh he khawl hmang hian hlawhtling taka enkawl an ni tawh a ni. (Synfocity=552