26th May 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

26.5.2015

*CBSE IN PAWL 12 RESULT TICHHUAK
Nimin khan Central Board of Secondary Education (CBSE) chuan India rampum huap in class XII result a tichhuak a, zirlai 82% an pass a ni. Lamtluang chhiar tu ten in lo hriat atan Delhi tleirawl M.Gayatri chu topper (pakhatna) niin a mark hmuh zat chu 99.2% (500 ah 496 a hmu) a ni. Amah hi New Green Fields school, Delhi a zirlai a ni. Zirlai pass zingah hian mipa aiin hmeichhia an sang zawk a, hmeichhia pass zawng zawng 87.56% annih laiin mipa pass zawng zawng chu 77.77% anni thung a ni.
 
GOOD MORNING #MIZORAM: LAMTLUANG ZINGKAR CHANCHINTHAR LAWRKHAWM

*Vawiin chawhma dar 11-ah Mizoram larsap (governor) thar atan Lt.General Nirbhay Sharma chu Raj Bhavan Aizawl-ah Gauhati High Court Judge Justice T. Vaiphei-a'n rinawmna thutiam tirin a lalut ang. Lamtluang a kan rawn tarlan tawh thin angin amah hi Arunachal Pradesh Governor hlui niin nimin khan Aizawl a lo thleng.

*Nimin khan Aizawl khawpui huam chhung a hman tur Closed-circuit television (CCTV) hmanga khawpui venhimna leh enthlakna tur Aizawl City Surveillance Project chu Home Minister R.Lalzirliana'n a hawng. Lamtluang chhiartu ten in lo hriat atan Aizawl ah hian a thawh khatna atan hmun thlan bik 10 ah CCTV 56 dah fel tawh a ni a, a thawhhnihna ah CCTV 35 dang bun belh tum a ni bawk.

*Mizo Society of America te huaihawt Chapchar Kut 2015 chu Maryland a neih chu a tiak ta. Lamtluang in a lo hriat danin May ni 23-24 khan America a Mizo awm te chuan he kut hi tluang takin an hmang a, Mizoram zaithiam Rosy K.Remsangpuii leh Burma Mizo zaithiam Lalpanliani ten an hmanpui a ni. Chapchar kut hi kum 2017 ah Indiana state ah hman leh an tum a ni.

*India sorkar thupek angin Mizoram ah pawh Bio Metric enrollment neih mek a ni a, India khua leh tui te chhinchhiahna tur Unique Identification Number (Aadhaar card number tia hriat bawk) chu mitam takin sakawlh chhinchhiahna ah an ngai a ni. Lamtluang thulakna in a tarlan danin Champhai district a mihring 208 chenna Zawngtetui khua a mi zawng zawng ten UID neih an duh loh avangin bio metric enrollment hi an khua ah tih a ni ta lo a ni.

*Inrinni liamta khan Mizoram hmar lam a awm Phainuam khua ah thli leh ruah avangin mihring chenna In 18 a tichhia. Lamtluang chhiartu ten in lo hriat atan Inrinni liamta tho khan Bualpui khua ah B.K Thanga (56) chu a chenna In ah a mut laiin thingtlu in a vua a, a In hi a chhiat bakah amah hian hliam natak a tuar.

*National Green Tribunal (NGT) chuan Delhi khawpui a diesel hmang motor kum 10 a upa te tlan phallohna a lo chhuah tawh chu kumin July ni 13 thleng atan a pawtsei leh. Lamtluang in a hriat danin thlaleh ni 13 ah he thupek hi a ngaihtuah nawn leh dawn a ni.

*Assam tlangval Union Minister of State, Sports & Youth Affairs nimek Sarbananda Sonowal chuan vawiin ah Tripura khawpui Agartala a tlawh dawn. Lamtluang thulakna in a tarlan danin Sonowal hian DAVP huaihawt thlalak entirna a hawng dawn a ni.

*Jammu and Kashmir ah sorkar sipai leh helpawl te inbeihna ah sorkar sipai 3 leh helpawl mi 1 an thi. Lamtluang thulakna in a tarlan danin an inbeihna hi Kupwara district chhung ah a ni a, sipai te patrol a an kallai helpawl te hian an lo bei a ni. Tin, Kulgam district ah pawh helpawl leh sipai te inbeihna ah sipai 1 leh helpawl mi 1 an thi ve ve bawk.

*Nimin khan West Bengal a Malda khua ah licence neilo hawker (kawngsir a sumdawng) te hnawhchhuah an tumna lamah buaina a chhuak a, RPF sipai pakhat in nunna a chan a, sipai 2 ten hliam an tuar bawk. Lamtluang thulakna in a tarlan danin hawker te hian RPF sipai te hi lungin an vawm a ni.

*Prime Minister Social Security Schemes hnuai ah Nagaland sorkar chuan an state chhung a chhungkaw 80% te chu bank account thar an siam sak tawh a ni.

*Karhmasa Inrinni a lakluh thar leh Tamil Nadu Chief Minister J.Jayalalithaa chuan hmasawna leh khua leh tuite chhawmdawlna atan Rs.Vaibelchhe 1800 a ruahman a ni. Lamtluang thulakna in a tarlan danin he hmalakna turah hian kawngpui siamthat leh tui in tur siam te a huam tel dawn a ni.

*Nimin khan Afghanistan ram chhimlam Kalat khawpui ah thihchhilh bomb phur truck atanga bomb a puah avangin mi 5 an boral a, mi 62 in hliam an tuar.

*Ruahsur leh tuilian avangin America ram chhimlam state Texas leh Oklahoma te an buai hle. Oklahama ah hian tuilian in kangthelh tu pakhat a len hlum a, San Marcos, Texas ah pawh tuilian vangin mi 1 a boral.

*Switzerland sorkar thuchhuah official gazette chuan Swiss Bank account nei India mi 2 hming a tarlang. Heng mite hi Sneh Lata Sawhney leh Sangita Sawhney te nin a tarlang a, mahse an pianni bak an chanchin kimchang engmah a tarlang lo. Lamtluang thulakan in tarlan danin Switzerland sorkar thuchhuah hian heng India mi black money hmanga Swiss Bank account nei a ngaih mi 2 te hi ni 30 chhung a an chanchin kimchang leh insawifiahna thehlut turin a hriattir a ni.

*Pathianni zan khan Indian Premiere League (IPL) cricket 2015 final ah Mumbai Indians chuan Chennai Super Kings chu run 41 a hneh in an champion ta. Lamtluang chhiartu ten in lo hriat atan Mumbai Indians te hian IPL champion nomawi hi an tum hnih chawina a ni.

*India rama damdawi in thaber pawl a sawi Delhi a All India Institute Of Medical Sciences chu Uttar Pradesh a hmeichhe naupang damlo pa in a fanu kal tihbo sak ah puhin Hauz Khas police station ah FIR a thehlut a ni. Lamtluang chhiartu ten in lo hriat atan he hmeichhe naupang damlo hi a kal a that loh avangin March ni 14 khan a kal pakhat paih a ni a, hemi hnu hian CT scan atanga landan in a kal 2 te chu a awm lo ve ve a, hemi avang hian damlo pa hian police hnenah AIIMS lamah hian FIR a thehlut ta a ni.

*Kum 1805 vawiin angah khan Milan Cathedral ah Napoleon Bonaparte chu Italy Lal atan nemngheh a ni. Lamtluang chhiartu ten in lo hriat atan kum 1999 vawiin angah khan Backstreet Boys te album 'Millennium" chu tlangzarh a nih hnu chawlhkar khat atlin chiah in maktaduai 1.13 an hralh hman a ni.
 
*Mizoram hrechiang ang: Kum 1937 March thla vel khan Vandawt khua ami Thanghnuaia chu Kelkang ah a kal a, a chamchilh rei tak hnuah thlarau lamah harhna nasa tak a lo chhuak ta a ni. Harhna chang ten an bialtu pastor pawh thusawi an phal lo a, kumpinu tlawm tur te an sawilawk avangin chutih laia Lushai hills bawrhsap A.G McCall chuan sorkar lakah an hel niin a hre ta a ni. Lamtluang chhiartu ten in lo hriat atan kum 1937 September ni 10 khan bawrhsap leh Assam rifle sipai te chu Kelkang khaw bul ah an an han inkulh a, chumi hnuah sipat te nen silai keng chungin khua an luhchilh ta a ni. Bawrhsap hian harhna chang te chu a kokhawm a, an chungchang a ngaihtuah sak a, harhna an chan avanga buaina leh thil dik lo ti tawh lo turin a hrilh hlawm a, September ni 19 ah thuremna tichhuak in harhna bul tumtu ber Thanghnuaia leh midang 2 - Pasina leh Thangzinga te chu kum 3 chhung Syhlet a tang turin a hrem a ni. Hemi hnu hian Kelkang harhna chu zawi zawi in a reh ta a ni. Bawrhsap hian Kelkang a harhna chang te hi sorkar laka helna puang ah a ngai ni a sawi a ni.

*Lamtluang news page hi facebook ah www.facebook.com/Lamtluang hi hawng la i lo like ve dawnnia.   

25th May 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

25.5.2015

*KELKANG RECEPTION INFORMATION CONTACT NUMBER
A hnuaia hming leh mobile number tarlan ah te hian Kelkang a harhna chhim tur ten information leh mikhual thlen chungchang ah hriat duh an neih chuan an be pawp thei ang:

Upa Ngurliana - 9436194966.
Upa Hipliana - 8014225383.
Tv.  Muana - 9615230646.
Tv. Zuala - 8014536029.
Tv.  Ms.Tluanga - 8575175416.

*CARRIE UNDERWOOD IN AMERICAN IDOL TLIN VAWI 10 LAWMAWM TI
Nimin khan sap zaithiam Carrie Underwood chuan instagram ah kum 2005 May ni 25 a American Idol season 4 a pakhatna a tlin champha kum 10 na pual in thlalak a post. A thlalak post caption ah "Kum 10 a lo tling ta der hi awih a har mang e! Ka nun tlak danglamtu American Idol chungah ka lawm em em a ni" tih a ziak tel a ni. A thlalak post chu kan rawn post chhawng leh a, he thlalak hi American Idol atana thlan a nih tum ami kha a ni.

*MIZORAM GOVERNOR TUR LO THLENG
Mizoram Governor tur Lt. Gen. Nirbhay Sharma chu vawiin khan Aizawl a thleng a, Lengpui Airport-ah Chief Minister Pu Lal Thanhawla, Home Minister Pu R.Lalzirliana, Chief Secretary Pu Lalmalsawma, DGP Pu Dharmendra Kumar leh official dang ten an lo hmuak a. Governor tur hi amah chawimawina leh zahna entir nan Airport kawtah Guard of Honour pek a ni. Governor tur hi a nupui, a fanu leh a pizawn ten an rawn zui a ni. (DIPR)

 Lt.General Nirbhay Sharma a newly appointed Governor of Mizoram was given Guard of Honour at Lengpui Airport, Mizoram.
Pix: DIPR, Mizoram

*MIZO IDOL JUDGES THAR TUR 2
Zonet Mizo Idol 2015 chu June thla a tan turin an in buatsaih mek a, endiktu (Judge) nilai Robin Lalremruata leh Rebecca Saimawii te chu chhungkua leh rawngbawlna tul vangin an tel thei dawn lo a, an aiah Singapore atanga Bachelor of Music zirchhuak Lalsiamkima, Chawnpui veng, Aizawl leh zaithiam lar Mimi Renthlei te judges ah lak thar anni dawn.

Mizo Idol 2015 will be start from June 2015

*MIZO TLANGVAL IN CHHIARKAWP ATANGIN PH.D DAWNG
Lalhmangaihzuala Khaimeichho S/o.K.Zatlunga, Khatla South, Aizawl chuan Department of Mathematics & Computer Science, Mizoram University atangin Ph.D degree a dawng thar. A thesis title chu 'A Study of Topological Entropy of Chaotic and Symbolic Dynamical System' tih a ni.

Mizo scholar mathematician Lalhmangaihzuala Khaimeichho (Mazuala) recently awarded Ph.D in Mathematics from Mizoram University.

*Mizo Society of America ten Maryland ah tluang takin Chapchar Kut  2015 an hmang.

*Nipui khawlum avangin Andhra Pradesh leh Telangana state ah te mi 445 an boral tawh.

*CBSE in class 12 result a tichhuak.

24th May 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

24.5.2015

*Mizoram ah fur ruah a sur thin mek laiin India ram state tam zawk ah chuan kumin chhungin nipui khawlum avang in mi 335 an boral tawh.

GOOD MORNING ‪#‎MIZORAM‬: LAMTLUANG PATHIANNI ZING CHANCHINTHAR LAWRKHAWM

*Vawiin hi Kristian te tan Thlarau Thianghlim tlen ni 'Pentikos Ni" a ni a, Mizoram Presbyterian kohhran te chuan thupui 3: Tihuaisentu - Thlarau Thianghlim, Tichaktu - Thlarau Thianghlim, Thlamuantu _ Thlarau Thianghlim tih an ngaithla dawn a, Mizoram Baptist Kohhran te chuan thupui 2: Thlarau Thianghlim Thlamuantu tih leh Thlarau Thianghlim Hruaitu ropui tih an ngaithla ang.

*May ni2 1 khan Mizoram UPC UPC General Headquarters Office-ah Mizoram UPC General Sunday School Executive Board meeting vawi 136-na neih a ni. An thurel langsar zual zingah June thla Pathianni hnuhnung ber hmanga Manipur District, Imphal Biala Children Meet neih tur chungchang te, 2017 puitling leh naupang Sunday School zirbu tur te, kum 2015 kumtawp sunday school exam Question tur te, leh Sunday School Hall sak tanpuina pek dan tur chungchangte chu an rorel langsar zual a ni. (Source: mizoramupc.org)

*Mara Students’ Organisation General Headquarter, Siaha te chuan Saiha khawpui huamchhunga hnam dang dan lova sumdawng dawr 50 chuang an khar sak.

*Nimin khan Champhai DC Pu H. Lalengmawia hovin Champhai Helipad thar tur hna thawh mek chu enfiah a ni. Pu Saidenga, Dy. Controller, Aviation, Champhai PWD engineer-te leh khawtlang hruaitute an tel a. Helipad hi nikum December 2014 atanga khan laihrem hna tan a ni a. Tunah hian a panna kawng siam hna thawh mek a nih bakah waiting shed sak hmabak a ni. (DIPR)

*Aam Aadmi Party kaihhruai Delhi sorkar chuan chuan tunkar Thawhlehni lo awm turah hian special assembly a ko. Lamtluang chhiartu ten in lo hriat atan Delhi Chief Minister leh Lt.Governor te inkarah sorkar hnathawk lian te post ruat chungchang ah inhriatthiam lohn a awm a, hei hi sorkar laipui chuan Delhi sorkar hi hriattirna pe in Lt.Governor hian Delhi CM rawn kher lo in thuneihn a nei a ti a, he mi chungchang hi special assembly ah hian an ngaihtuah dawn a ni.

*Lamtluang a kan rawn tarlan tawh angin nimin khan a tum 5-na atan J.Jayalalithaa chu Tamil Nadu Chief Minister atan lakluh a ni.

*Andhra Pradesh leh Telangana state chhung ah nipui khawlum lutuk avangin mi 168 in nunna an chan tawh a ni. Lamtluang thulakna in a tarlan dan chuan AP huam chhung ah mi 95 an boral a, Telangana huam chhung ah mi 73 an boral a ni.

*Union Public Service Commission (UPSC) chuan Civil Services (Preliminary) Examination, 2015 neih hun atan August ni 23 a ruat fel ta. Lamtluang chhiar tu ten in lo hriat atan he exam hi India ram pumah centre 71 ah buatsaih a ni ang a, Mizoram khawpui Aizawl ah pawh exam theih a ni ang. 23 May - June 19 chhungin online application buaipui theih a ni ang.

*Lamtluang a kan rawn tarlan tawh angin nimin ah India Prime Minister Narendra Modi kaihhruaina hnuaiah Central Information Commission (CIC) leh Central Vigilance Commission (CVC) thar tur ruat tum in meeting neih a ni a, mahse tumah an la ruat ta lo a, meeting hi neih nawn leh tur a tih a ni.

*Bangladesh khawpui Dhaka leh Guwahati inkar a tlan tur bus service tur enchhinna chu niminpiah khan Dhaka atangin a tlan tan. Lamtluang thulakna in a tarlan danin he bus service enchhinna hi Bangladesh leh Indian High Commissioner Pankaj Saran ten an vai liam a ni. 

*Thla hmasa April ni 25 a Nepal a lirnghing avang a nunna chan zat hriat theih chin chu mi 8,600 an tling tawh a ni. Lamtluang chhiartu ten in lo hriat atan nunna chan zingah hian ramdang mi 79 an awm a, chung zingah chuan India mi 49 an tel a ni.

*India mi America a cheng mipa naupang kum 11 mi Tanishq Abraham chu California a American River College atangin a graduate. Lamtluang thulakna in a tarlan danin Tanishq hi maths, science leh foreign language studies atangin degree a la a ni.

*Nimin a Lamtluang a kan rawn tarlan Assam chhung a Alipurdwar leh Guwahati inkar a rel tlan chesual ah khan thi an awm lo a, rel khalhtu leh michuang thenkhat ten hliam an tuar a ni.

*Haryana Chief Minister, Mr Manohar Lal chuan Haryana state in a hranpa in High court neih a mamawh niin a sawi. Lamtluang chhiartu ten in lo hriat atan Punjab leh Harayana state 2 te hian High Court pakhat an intawm a, chu chu Chandigarh khawpui ah a awm a ni.

*Vawiin tlai ah Indian Premiere League (IPL) cricket tournament final chu Mumbai Indians leh Chennai Super Kings ten an khel dawn. Lamtluang chhiar tu ten in lo hriat atan IPL 2015 final hi Eden gardens, Kolkata ah an khel dawn a ni.

*Kum 1738 vawiin angah khan John Wesley leh Charles Wesley te unau chu Aldersgate Street, London ah an tawngtai a, hei hi Methodist kohhran lo din tanna atan hun pawimawh tak a ni. Lamtluang chhiartu ten in lo hriat atan kum 1689 khan English Parliament chuan dan thar Act of Toleration an pass a, chu dan chu Protestant te hum na tur a ni.

*Mizoram hrechiang ang: Kum 1916 khan Mizo tawng in Thuthlung thar bu peih fel a ni, hemi kum vek hian Mizoram ah Chhandamna Sipai Pawl (Salvation Army) din tan a ni. Lamtluang chhiartu ten in lo hriat loh takin Kum 1925 khan Mizoram ah Roman Catholic kohhran din tan a ni.

*Fanghma ah hian Vitamin B1, Vitamin B2, Vitamin B3, Vitamin B5, Vitamin B6, Folic Acid, Vitamin C, Calcium, Iron, Magnesium, Phosphorus, Potassium leh Zinc te a awm a, fanghma i ei hian multivitamin i ei a ni tih i hrereng thin dawnnia.

*Lamtluang news page hi facebook ah i lo like lo a nih chuan Mizo chanchinthar awlsam tak a i hriat zung zung theih nan www.facebook.com/Lamtluang hi hawng la i lo like ve dawnnia.

23rd May 2015 news in Mizo

Latest news collection in Mizo language (Online News update from Mizoram)

MIZO TAWNG A CHANCHINTHAR LAWRKHAWM

23.5.2015

GOOD MORNING ‪#‎MIZORAM‬: LAMTLUANG ZINGKAR CHANCHINTHAR LAWRKHAWM
*Vawiin chawhma dar 11 hian Madras University Centenary hall ah AIADMK hotunu J,Jayalalithaa chu Tamil Nadu Chief Minister thar atan lakluh a ni dawn.

*Thlaleh June ni 16 atangin Aizawl Municipal council chuan AMC huam chhung ah Property tax a la tan dawn.

*Dr. Lalramliana (Deptt. Of Zoology, PUC), Dr.Lalnuntlunga (Deptt. Of Environmental Science, MZU) & Samuel Lalronunga (Deptt. Of Environmental Science, MZU) te chuan sangha chi thar chu Chhimtuipui atangin an hmu chhuak. He Ngha-lung-bawk / Ngha-lung-bet (Psilorhynchus sp.) chi thar hi a hming atan an hmuhchhuahna lui hming chawiin Psilorhyncus kaladanensis an vuah.

*Nimin chawhma khan Central YMA leh Disaster Management & Rehabilitation Depaetment buatsaihin Champhai Venglai Community Hall-ah Community Awareness Programme on Disaster Management cum Training For YMA Volunteers neih a ni. (DIPR)

*Tukin dar 6 vel khan Assam a Kokrajhar district a Salakati leh Basugaon inkar ah Sifung khualzin phur rel (train) a chesual a, he rel hi Alipurdwar leh Guwahati inkar a tlan a ni. Thi leh hliam an awm leh awm loh hriat theih ala ni lo a ni.

*Nimin khan Defence Minister Manohar Parrikar chuan Jammu & Kashmir state tlawh in Leh khua a thleng a ni. Lamtluang thulakna in a tarlan danin Defence Minister hi Army Chief General Dalbir Singh Suhag leh General Officer Commanding in Chief of Northern Command Lt Gen DS Hooda ten an tawiawm a ni. Vawiinah Jammu bial a tlawh leh ang.

*Islamic State firfiak pawlte chuan nimin a Saudia Arabia khawchhak lama Shia mosque a thihchilh bomb puak chu an mahni tih niin an sawi. Lamtluang chhiar tu ten in lo hriat atan he bomb puak avang hian mi 21 chuang in nunna an chan a ni.

*Assam Education minister Sarat Borkotoky chuan June thla chhung in an state chhung a zirtirtu hnaruak sang sarih te chu hnawhkhah vek a ni dawn niin a sawi. Heng zirtirtu hnaruak te hi Prmary leh Upper Primary school a thawk tur te anni.

*Tukin hian Forex rate atanga chhut in India pawisa Rs.63.49 leh US $1 a intluk a ni.

*Mumbai khawpui a lunghlu a sumdawng lar tak Hare Krishna Exports Pvt. Ltd te chuan Muslim tlangval MBA zirzo in an company a hna a dil an chhanlet na ah Muslim ni lo chauh hnathawk a an chhawr thin thu an hrilh. Lamtluang thulakna in a tarlan danin he an chhanna hi sakhaw thleibikna thil ni a lan avangin sorkar in a enfiah mek a, a tul angin he thil hi chhuichian a tum a ni.

*European Union chuan Ukraine ram ei leh bar siamthat nan Euro tluklehdingawn 1.8 puk tir turin inremna a siam. EU leh Urkraine te hian Riga ah inremna an ziak a ni.

*Department of Science and Technology in an tarlan danin India chu scientific publication lamah khawvel a parukna a ni.

*Vawiin ah India Prime Minister Narendra Modi kahhruaina hnuaiah Chiefs of Central Information Commission (CIC) leh Central Vigilance Commission (CVC) thar ruat turin meeting neih a ni dawn.

*Columbia sorkar sipai ten nimin khan Marxist helpawl mi 18 an that.

*Ireland ramah neih inang inkawp te dan anga inneih phal sak chi anni em tih ngaihdan khawn khawmna vote thlak chu nimin khan zawh a ni a, vawiinah vote tla te hi chhiar a ni ang a, mipui ten vote hmang a an ngaihdan an lantir atangin an ramah neih inang inkawp te hmalam hun tur a hriat theih dawn a ni.

*Kum 1430 vawiin angah khan Joan of Arc chu Burgundians ten an man a, Sap ho (English) hnenah an hralh a ni. Kum 1915 vawiin angah khan Indopui I-na hunlai a ni a, Italy chuan tangrual (Allies) zawmin Austria- Hungary lakah indo a puang nghal. Lamtluang chhiar tuten in lo hriat atan kum 1949 vawiin angah khan West Germany ram din a ni.

*Mizoram hrechiang ang: Mizoram a Mizo zingah MBBS zir zo hmasaber chu Dr.Tlanglawma Hmar a ni a, kum 1953 khan a zir chhuak a ni. Lamtluang chhiar tu ten in lo hriat tel atan Mizoram hmeichhia te zingah Dr.Lalengi Khiangte chu MBBS zirchhuak hmasaber a ni a, kum 1964 khan a rawn zir chhuak a ni.

*Lamtluang hi facebook ah i la like lo a nih chuan www.facebook.com/Lamtluang hi hawng la i lo like ve dawnnia.

*CT GROUP CUP KHARNA HUN HIGHER & TECHNICAL EDUCATION MINISTER IN HMANPUI
Nimin chawhnuah khan Aizawl Lammual ah CT Group Cup Inter Branch YMA Football Tournament Final neih a ni a. He tournament kharna hunah hian Higher & Technical Education Minister Pu R.Romawia chu khuallian ah hman a ni.

CT Group Cup tournament hi MFA leh CYMA tangkawp te’n CT Group of Institutions, Jalandhar, Punjab in sum a thawh hmanga an huai hawt a ni a. He tournament a khel tur hian Branch YMA Team 191 an inziak luta, Armed Veng leh Lengpui ten final lutin Champion Trophy leh Sum fai Rs. 1,00,000/ an inchuh a. A chaklo zawk hian Rs.50,000/ leh Trophy an dawng thung ang.

CT CUP kharna hun a thusawitu Higher & Technical Education Minister Pu R.Romawia chuan mi thilphal te inpekna in Football Tournament liantham te a khat tawk in buatsaih a la ni zel chu lawmawm a tih thu sawiin hei hian rah tha tak chhuah mek zelin India rampum pui huap ah Mizoram a ti hming tha hle a ni a ti. Mizoram sawrkar in thalai te rual awhna au aw chhangin khelmual tha a siam sak a, heng khelmual te hi tangkai taka hman chhunzawm a nih theih nan mi thilphal te an pawimawh dawn chauh a ni a ti. Aizawl FC in I-League a khel thei tur leh India National Senior team a Mizo tlangval 5 ngawt thlan an ni chu Mizo te tan inchhuanna tham a tling a ti a ni.

Thusawitu dang, Health Minister Pu Lal Thanzara, MFA President ni bawk chuan Football Tournament lian tham chu talent haichhuahna rem chang a nih avangin a hlut thu a sawi a. MFA in ruihhlo do na kawnga CYMA a lungrualpui zia lantir nan MFA sum Rs 10,000/- CYMA hotute hnenah a hlan nghal a ni.

CT Group Cup Tournament huaihawt nan hian CT Group of Institutions hian Rs 5 lakhs a tum a. Pu Mandir Singh, President, CT Group of Institutions leh a thawhpui te pawh in Final hi en ve in Tournament hi hlawhtling hle a an hriat thu an sawi a ni. (DIPR)